تازيون خبرون

Daily Archives: July 15, 2015

ضرب عضب ڪاميابي سان جاري آهي، ختم ٿيڻ جو ٽائيم فريم نٿو ڏئي سگهجي: ترجمان پاڪ فوج

راولپنڊي (بيورو) پاڪ فوج جي ترجمان ميجر جنرل عاصم باجوه چيو آهي ته قبائلي علائقي خيبر ايجنسي ۾ ويڙهاڪن خلاف ڪارروائي مڪمل ڪئي وئي آهي، آپريشن ضرب عضب جلد مڪمل ڪرڻ چاهيون ٿا پر ان لاءِ ڪو ٽائيم فريم نٿو ڏئي سگهجي. برطانوي خابرو اداري کي انٽرويو ڏيندي ڊي جي آءِ ايس پي آر ميجر جنرل عاصم باجوا چيو ته  آپريشن ضرب عضب هڪ منصوبي تحت ڪاميابي سان جاري آهي ۽ پاڪ فوج ان کي جلدکان جلد مڪمل ڪرڻ چاهي ٿي. هن چيو ته آپريشن ضربعضب ۾ اڳڀرائي ٿي رهي آهي، پاڪ فوج کي گهربل حدف پورا ٿي رهيا آهن پر آپريشن مڪمل ڪرڻ جو ٽائيم نٿو ڏئي سگهجي، جيترو جلد ٿي سگهيو آپريشن کي انجام تائين پهچايو ويندو. ميجر جنرل عاصم باجوا چيو ته خيبر ايجنسي ۾ فوجي ڪارروائي گذريل سال آڪٽوبر ۾ شروع ڪئي وئي ۽ ان دوران ميڊيا کي به وڌيڪ معلومات فراهم نه ڪئي وئي. پاڪ فوج جي ترجمان چيو ته  خيبر ايجنسي ۾ويڙهاڪن خلاف ڪارروائي مڪمل ڪئي وئي آهي، جڏهن ته شوال جي خطرناڪ پهاڙي علائقي ۾ به ڪارروائي جو پهريون مرحلو مڪمل ٿي چڪو آهي. هن چيو ته شوال ۾ ڪارروائي دوران شروعاتي مرحلي ۾ مزاحمت کي منهن ڏيڻو پئجي رهيو هو، شوال دهشتگردن جو ڳڙهه بڻجي چڪو هو، دهشتگردن کي ڪافي نقصان پهچايو ويو آهي. شوال کي دهشتگردن کان مڪمل  صاف بابت سوال جي جواب ۾ ڊي جي آءِ ايس پي آر چيو ته پاڪ فوج ان علائقي کي مڪمل طور تي دهشتگردن کان پاڪ ڪندي. هن چيو ته اتر وزيرستان کي دهشتگردن کان ڪليئر ڪيو ته دهشتگرد شوال ۾ جمع ٿي ويا هئا، ڪجهه ٻين طريقين سان ڪم جاري آهي، شوال ۽ دتا خيل جو سمورو علائقو صاف ڪرڻو آهي. دهشتگردن جي افغانستان فرار ٿيڻ بابت سوال جي جواب ميجر جنرل عاصم باجوا چيو ته اطلاع باوجود افغانستان ۾ دهشتگردن کي نه روڪيو ويو، جيئن ٿيڻ گهرجي ها، اهو ڪم ناهي ٿيو. آءِ ڊي پيز بابت سوال جي جواب ۾ ڊي جي آءِ ايس پي آر چيو ته هڪ جامع منصوبي تحت بي گهر ٿيلن کي واپس موڪلڻ جي عمل ۾ تيزي آندي ويندي، هن سال حڪومت به بجيٽ ۾ رقم مختص ڪئي آهي، کين سٺي حالت ۾ واپس موڪليو ويندو.

 

پنجاب ۽ سنڌ مڪاني چونڊون مرحليوار ڪرائڻ جو مطالبو ڪري ڇڏيو

لاهور (اين اين آءِ) پنجاب ۽ سنڌ مڪاني چونڊون مرحليوار ڪرائڻ جو مطالبو ڪري ڇڏيو، اليڪشن ڪميشن صوبن جو مطالبو سپريم ڪورٽ جي آڏو پيش ڪرڻ جو فيصلو ڪيو آهي، سپريم ڪورٽ جي حڪم جي روشني ۾ پنجاب ۽ سنڌ ۾ مڪاني چونڊون 20 سيپٽمبر تي ٿيڻو آهن پر شيڊول جاري ٿيڻ کان 2 هفتا اڳ ٻنهي صوبن طرفان مرحليوار چونڊون ڪرائڻ جو مطالبو ڪيو ويو آهي، اليڪشن ڪميشن کي لکيل خط ۾ صوبن موقف اختيار ڪيو آهي ته امن امان ۽ انتظامي مسئلن سبب هڪ ڏينهن چونڊون ڪرائڻ گهرجن، هڪ ڏينهن ۾ چونڊن ۽ پولنگ آفيسرن جي سيڪيورٽي لاءِ اهلڪارن جو وڏو تعداد گهربل هوندو، سنڌ ۾ 3 ، جڏهن ته پنجاب ۾ ٻن مرحلن ۾ چونڊون ڪرائڻ جو مطالبو ڪيو ويو آهي، ذريعن مطابق اليڪشن ڪميشن ٻنهي صوبن جا مطالبا سپريم ڪورٽ جي نوٽيس ۾ آڻيندو، ان کان اڳ اليڪشن ڪميشن به پنجاب ۽ سنڌ ۾ مرحليوار چونڊون ڪرائڻ جي تجويز ڏئي چڪو آهي.

 

ايران ايٽم بم نه ٺاهيندو. ايران ۽ 6 عالمي طاقتن ۾ تاريخي معاهدو ٿي ويو

ويانا(اي پي پي) آمريڪا سميت عالمي طاقتن ۽ ايران وچ ۾ ايران جي ايٽمي پروگرام بابت جاري ڳالهيون ڪامياب ٿي ويون آهن ۽ ڌرين وچ ۾ تاريخي ٺاهه ٿي ويو آهي جنهن تحت ايران ايٽم بم نه ٺاهڻ جو اعلان ڪيو آهي جڏهن ته اولهه جي ملڪن طرفان ايران مٿان آمريڪا، يورپي يونين ۽ گڏيل قومن طرفان لڳايل معاشي پابنديون هٽائڻ تي اتفاق ڪيو آهي جڏهن ته ايران تي گڏيل قومن طرفان هٿيارن جون لڳايل پابنديون اڃا 5 سالن تائين برقرار رهندون. ايران سينٽري فيوجز 2 ڀاڱي 3 سيڪڙو گهٽائڻ تي راضي ٿي ويو آهي. آسٽريا جي گادي واري هنڌ ويانا ۾ آمريڪا ۽ يورپي يونين ايران سان ٿيل معاهدي کي تاريخي قرار ڏنو آهي جڏهن ته ايران جي مخالف ملڪ اسرائيل انمعاهدي کي ”تاريخي غلطي“ جو نالو ڏنو آهي. آمريڪي صدر بارڪ اوبامه چيو آهي ته ايران سان ايٽمي معاهدي سان ايران طرفان ايٽم بم ٺاهڻ جي هر رستي کي بند ڪيو ويو آهي. آمريڪي صدر بارڪ اوبامه نائب صدر جوزف بائيڊن سان گڏ قوم کي خطاب ڪندي چيو آهي ته ايران سان معاهدي مان ثابت ٿي ويو آهي ته آمريڪا جي سفارتڪاري جي ذريعي حقيقي ۽ بامقصد تبديلي آڻي سگهي ٿي. هن چيو ته ان معاهدي سان مختلف رخ طرف وڌڻ جو موقعو مليو آهي ۽ اسان کي ان موقعي مان فائدو وٺڻو آهي. آمريڪي صدر بارڪ اوبامه ايران ۽ آمريڪا، روس، چين، برطانيا، فرانس ۽ جرمني وچ ۾ ٿيل معاهدي جي راهه ۾ ايندڙ ڪانگريسي ڪوششن کي روڪڻ لاءِ ويٽو ڪرڻ جو اعلان ڪيو. ايران جي سرڪاري ٽيليويزن ايران ۽ عالمي طاقتن وچ ۾ ٿيل ايٽمي معاهدي بعد آمريڪي صدر جي قوم کي ڪيل خطاب سڌي ريت نشر ڪيو ۽ 1979ع جي ايران ۾ آيل انقلاب بعد ٻيو دفعو آهي جو آمريڪي صدر جو ايراني سرڪاري ٽيليويزن تي سڌي ريت خطاب نشر ڪيو ويو آهي. ايراني صدر حسن روحاني قوم کي خطاب ڪندي چيو آهي ته الله تعليٰ قوم جون دعائون قبول ڪري ورتيون آهن. يورپي يونين جي پرڏيهي پاليسي بابت سربراهه فيڊريڪا موگرني ان معاهدي کي اميد جو ڪرڻو قرار ڏنو آهي جڏهن ته روسي صدر ولاديمير پيوٽن چيو آهي ته ان معاهدي بعد دنيا سک جو ساهه کنيو آهي. ايران جي اتحادي شام جي صدر بشار الاسد ان معاهدي تي ايران کي مبارڪون ڏنيون آهن.

 

جاچ شعبي کي رقم نه ڏيڻ افسوسناڪ عمل آهي: سپريم ڪورٽ

ڪراچي (اي پي پي)سپريم ڪورٽ پوليس جي جاچ ونگ کي رقم ادا نه ڪرڻ تي آءِ جي سنڌ کي سڀاڻي طلب ڪري ورتو آهي. جسٽس سرمد جلال عثماني جي سربراهي ۾ جڙيل 3 رڪني بينچ داخل درخواست تي ٻڌڻي ڪئي، جنهن ۾ ريمارڪس ڏيندي چيو ته جاچ واري شعبي کي رقم مهيا نه ڪرڻ افسوس ناڪ عمل آهي. جاچ واري شعبي عدالت ۾ موُقف اختيار ڪيو ته دهشتگردي کي منهن ڏئي رهيا آهيون، رقمون فراهم نه ٿيڻ سبب جاچ وارا معاملا مشڪلاتن جو شڪار بڻجي رهيا آهن. جاچ آفيسر کيسي مان خرچ ڪري ڊيوٽيون ادا ڪن پيا، عدالت جي حڪم باوجود کين رقم نه پئي ڏني وڃي جڏهن ته گذريل ٻه هفتا اڳ جسٽس امير هاني مسلم دهشتگردي جي عدالتن جي ججن واري ميٽنگ دوُران ٻڌايو ويو هو ته جاچ آفيسرن لاءِ رکيل رقم کين فراهم نٿي ڪئي وڃي، جنهن سبب کين پريشاني کي منهن ڏيڻو پوي ٿو. ان ڏس ۾ پوليس جي اعليٰ عملدارن کي هدايت ڪئي وئي ته جاچ آفيسرن کي رقم فراهم ڪئي وڃي،  اڄ عدالت ۾ جمع ڪيل رپورٽ ۾ عدالت کي ٻڌايو ويو ته هن وقت تائين جاچ آفيسرن کي رقم فراهم ناهي ڪئي وئي جنهن تي سپريم ڪورٽ جي 3 رڪني بينچ سڀاڻي اربع ڏينهن آءِ جي سنڌ ۽ لاڳاپيل آفيسرن کي رڪارڊ سميت طلب ڪري ورتو آهي.

 

صدر ممنون حسين سان انڊونيشيا لاءِ پاڪستان جي نامزد سفير محمد عاقل نديم جي ملاقات

اسلام آباد (اين اين آءِ) پاڪستان جي صدر ممنون حسين پاڪستان ۽ انڊونيشيا وچ ۾ ٻطرفو تعاون ۽ پاٽنرشپ وڌائڻ لاءِ ڪوششون تيز ڪرڻ جي ضرورت تي زور ڀريندي چيو ته تجارتي عدم توازن کي دور ڪرڻ لاءِ پاڪستاني برآمدادات ۾ واڌ تي توجهه ڏني وڃي اها ڳالهه صدر ممنون حسين انڊونيشيا لاءِ پاڪستان جي نامزد سفير محمد عاقل نديم سان ڳالهائينديڪئي جنهن پاڪستان جي صدر سان ايوان صدر اسلام آباد ۾ ملاقات ڪئي صدر نامزد سفير کي نيون ذميواريون سنڀالڻ تي واڌايون ڏنيون ۽ اميد ظاهر ڪئي ته ان جي سفارتڪاري دوران ٻنهي ملڪن جا لاڳاپا بهتر ٿيندا صدر ٻنهي ملڪن وچ ۾ واپار جي اهميت تي زور ڀريندي چيو ته ان ۾ واڌ وقت جي اهم ضرورت آهي هن چيو ته انڊونيشيا عام ملڪ ۽ سڀ کان وڌيڪ آبادي رکندڙ مسلمان ملڪ آهي جتي پاڪستاني مصنوعات جي وڏي انگ ۾ کپت ٿي سگهي ٿي جنهن تي سنجيدگي سان توجهه ڏيڻ جي ضرورت آهي صدر ممنون حسين ٻنهي ملڪن وچ ۾ مختلف شعبن ۾ لاڳاپا بهتر بنائڻ لاءِ اعليٰ سطحي رابطن پارليماني وفدن ۽ عوامي سطح تي بدلين جي ضرورت تي به زور ڀريو. صدر نامزد سفير محمد عاقل نديم کي هدايت ڪئي ته هو انڊونيشيا ۾ رهندڙ پاڪستاني ڪميونٽي جي فلاح ۽ بهبود لاءِ ڪم ڪن.

 

 

وفاقي حڪومت جو هلندڙ سال سڄي ملڪ ۾ پوليو ويڪسين مهم شروع ڪرڻ جو فيصلو

اسلام آباد (اين اين آءِ) وفاقي حڪومت هلندڙ سال سڄي ملڪ ۾ پوليو ٽيڪو مهم شروع ڪرڻ جو فيصلو ڪيو آهي هڪ سال عمر جي 61 لکٻارڙن کي پوليو ويڪسين جا ٽڪا لڳايا ويندا پنجاب ۾ عيد کان پوءِ مهم شروع ٿيندي تفصيل مطابق وفاقي حڪومت هلندڙ سال پوليو ڦڙن سان گڏوگڏ ٽڪن جي مهم هلائڻ جو به فيصلو ڪيو آهي سڄي ملڪ ۾ هلندڙ سال 61 لک ٻارڙن کي پوليو ويڪسين جا ٽڪا لڳايا ويندا پنجاب تياريون مڪمل ڪري وٺي عيدالفطر کان پوءِ لاهور ۽ فيصل آباد سميت پنجاب صوبي جي سمورن ضلعن ۾ 32 لک ٻارڙن کي پوليو ٽڪا لڳايا ويندا ماهر انهن ٽڪن کي ٻارڙن جي مدافعتي نظام لاءِ نهايت فائيديمند ڪوٺين ٿا پوليو ڦڙن جو في ٻارڙو خرچ 30 رپيا جڏهن ته ٽڪي تي 1500 رپيا خرچ ٿيندا ٽن سالن جي هن مهم تي 3 ارب رپيا خرچ ٿيندا رقم عالمي اتحاد ايمونائيزيشن گاوي فراهم ڪندي. هي ٽڪا پوليو جي مخصوص مرڪزن ۾ لڳايا ويندا ٻئي مرحلي ۾ سنڌ بلوچستان ۽ خيبرپختونخواهه ۾ به پوليو ٽڪن جي مهم شروع ٿيندي باقي ٽن صوبن به تياريون شروع ڪري ڇڏيون آهن.

 

عمران خان رمضان ۾ ته غلط بياني کان پاسو ڪري:پرويز رشيد

اسلام آباد (بيورو) سڌ سماءَ جي وفاقي وزير پرويز رشيد چيو آهي ته عمران خان رمضان ۾ ته غلط بياني کان پاسو ڪري. اسلام آباد ۾ ميڊيا سان ڳالهائيندي هن چيو ته عمران خان بهتان بازي لاءِ ڪنهن ٻئي موضوع جي چونڊ ڪري. پرويز اشرف چيو ته عمران خان ٻين تي الزامن هڻڻ بدران ڪي پي ڪي ۾ ڪرپشن جو جواب ڏيو. وفاقي وزير چيو ته شريف ڪٽنب 1998۾ بئنڪن جو قرض ادا ڪري ڇڏيو هو.

 

آرمي چيف سان ارجنٽينا جي سفير جي ملاقات، اسڪردو هيليڪاپٽر سانحي جي جاچ ۾ اڳڀرائي تي ڳالهيون

راولپنڊي (مانيٽرنگ ڊيسڪ) آرمي چيف جنرل راحيل شريف سان ارجنٽينا جي سفير ملاقات ڪئي آهي، جنهن دوران اسڪردو ۾ پيش آيل هيليڪاپٽر سانحي جي جاچ ۾ اڳڀرائي تي ڳالهيون ڪيون ويون. آءِ ايس پي آر پاران جاري ڪيل بيان موجب، آرمي چيف جنرل راحيل شريف سان جي ايڇ ڪيو راولپنڊي ۾ ارجنٽينا جي سفير  “ڊين روڊ ڊِلفو جي مارٽن” ملاقات ڪئي. ملاقات دوران پاڪ- ارجنٽينا لاڳاپن ۽ گڏيل دلچسپي وارن معاملن تي خيالن جي ڏي وٺ ڪئي وئي. آءِ ايس پي آر موجب، ملاقات دوران ارجنٽينا جي سفير کي اسڪردو جي علائقي نلتر ۾ پيش آيل هيليڪاپٽر سانحي جي جاچ بابت اڳڀرائي ڏني وئي.آءِ ايس پي آر موجب، ارجنٽينا جي سفير، نلتر هيليڪاپٽر سانحي جي جاچ ۾ اڳڀرائي کي ساراهيو.

 

مون کي ڪجهه ٿي وڃي ته ڪارڪن تحريڪ کي زنده رکن: الطاف حسين

ڪراچي (اين اين آءِ) ايم ڪيو ايم جي اڳواڻ الطاف حسين چيو آهي ته حڪمران پنهنجي صفن جو جائزو وٺن ڪوڙا الزام هڻي جيل اماڻي سگهجي ٿو تقريرن تي پابندي به لڳي سگهي ٿي ۽ مون کي قتل به ڪيو ويندو ايم ڪيو ايم حيدرآباد جي زونل ڪميٽي جي ميمبرن ۽ عورت ميمبرن سان ٽيليفون تي ڳالهائيندي الطاف حسين چيو ته ايم ڪيو ايم عوام کي بنا فرق حق ڏيارڻ جي جدوجهد ڪري رهي آهي هن ملڪ جي خلاف نه پر ظلم ۽ ڏاڍ جي خلاف ڳالهه ڪئي کيس ڪوڙن ڪيسن ۾ ڦاسائي جيل به اماڻي سگهجي ٿو سندس تقريرن تي پابندي به لڳي سگهي ٿي کيس مافياز جي ذريعي قتل به ڪري سگهجي ٿو الطاف حسين چيو ته ايم ڪيو ايم کي ختم ڪرڻ جي ڪائي نه ڪائي سازش ٿيندي رهندي آهي ايم ڪيو ايم کي بدنام ڪرڻ لاءِ ٽارگيٽ ڪلنگ، اسٽريٽ ڪرائيم، اغوا ۽ ڌاڙن جي واقعن جو الزام ايم ڪيو ايم مٿان مڙهيو وڃي ٿو خواجه آصف جي بيان تي چوڌري نثار ڪجهه نه چيو هن چيو ته پيپلزپارٽي جي حڪومت سنڌ جي مختلف شهرن ۾ ان جي خلاف ڪيس داخل ڪرائي ڇڏيا آهن ۽ ان تي ڪوڙا الزام مڙهيا پيا وڃن الطاف حسين ڪارڪنن کي هدايت ڪئي ته جيڪڏهن کيس ڪجهه ٿي وڃي ته اهي تحريڪ کي زنده رکن مهاجرن ۽ مظلومن جي حقن جي تحريڪ جاري رکن ۽ قانون هٿ ۾ نه کڻن.

 

ڪرنسي ڪيس ۾ گرفتار ماڊل اياز علي جي ضمانت منظور، آزاد ڪرڻ جو حڪم

لاهور (اين اين آءِ) لاهور هاءِ ڪورٽ ڪرنسي اسمگلنگڪيس ۾ گرفتار سپر ماڊل ايان علي جي درخواست ضمانت منظور ڪندي کيس فوري آزاد ڪرڻ جو حڪم ڏيئي ڇڏيو گذريل ڏينهن لاهور هاءِ ڪورٽ جي جسٽس انورالحق جي سربراهي ۾ ٻه رڪني بئنچ ماڊل ايان علي جي درخواست ضمانت جي ٻڌڻي ڪئي ايان علي پاران سردار لطيف کوسو عدالت ۾ پيش ٿيو ۽ موقف اختيار ڪيو ته ماڊل ايان علي پنهنجي ڀاءُ کي رقم ڏيڻ لاءِ اسلام آباد ايئرپورٽ ويئي هئي ايان علي کي اي ايس ايف عملدارن چيڪنگ لاءِ روڪيو ايان علي ڪسٽم جي اسڪيننگ مشين تي به نه پهتي هئي ۽ نه ئي کيس بورڊنگ پاس جاري ڪيو ويو ته ڪرنسي اسمگلنگ ڪيئن ٿي سگهي ٿي ماڊل جي خلاف جعلي ڪيس داخل ڪيو ويو عدالت پاران فرد جرم عائد ناهي ڪيو ويو ان جي موئوڪلا بنا ڪنهن سبب جي جيل ۾ آهي ان موقف اختيار ڪيو ته ڪسٽم ايڪٽ مطابق جيڪڏهن جوابدار ڪائي خاتون هجي ۽ تفتيش مڪمل ٿي ويئي هجي ته ان کي ضمانت تي ازاد ڪري ڇڏي ٿو ڇو ته ان موئڪلا هڪ عورت آهي ۽ جاچ مڪمل ٿي ويئي آهي تنهنڪري عدالت کي درخواست آهي ته کيس ضمانت تي آزاد ڪيو وڇي ٻڌڻي دوران ڪسٽم عملدارن جي وڪيلن موقف اختيار ڪيو ته تفتيش دوران ايان علي قصوار آهي جنهن تي کيس 16 سال قيد ٿي سگهي ٿو ۽ ايندڙ ٻڌڻي تي ان جي خلاف فرد جرم عائد ٿي ويندو عدالت دليل ٻڌڻ کان پوءِ مختصر فيصلو جاري ڪري ڇڏيو جنهن ۾ ماڊل ايان علي جي درخواست ضمانت منظور ڪندي کيس آزاد ڪرڻ جو حڪم ڏنو ويو ايان علي تي 27 جولاءِ تي فرد جرم عائد ٿيندو.