تازيون خبرون

Daily Archives: July 11, 2015

پاڪ-ڀارت وزير اعظمن جي ملاقات، مسئلا ڳالهين ذريعي حل ڪرڻ تي اتفاق

اوفا (اي پي پي) پاڪستان ۽ ڀارت دهشتگردي سميت سمورن معاملن تي ڳالهيون ڪرڻ تي اتفاق ڪندي چيو آهي ته امن کي يقيني بڻائڻ ۽ ترقي کي فروغ ڏيڻ ڀارت ۽ پاڪستان جي گڏيل ذميواري آهي، ان حوالي سان هو سمورن حل طلب مسئلن تي ڳالهين جي لاءِ تيار آهن. اهو اتفاق راءِ شنگهائي تعاون تنظيم (ايس سي او) جي 15 هين اجلاس جي موقعي تي وزيراعظم محمد نواز شريف ۽ ڀارتي وزيراعظم نريندر مودي جي وچ ۾ ڪالهه جمعي ڏينهن هتي  ٿيندڙ ملاقات دوران ٿيو، ملاقات هڪ ڪلاڪ تائين جاري رهي. وزيراعظم نريندر مودي 2016ع ۾ ايندڙ سارڪ سربراهه اجلاس ۾ شرڪت جي لاءِ وزيراعظم نواز شريف جي دعوت قبول ڪري ورتي. پرڏيهي سيڪريٽري اعزاز احمد چوڌري ملاقات کانپوءِ ڀارتي هم منصب سبرامنيم جئه شنڪر سان گڏيل پريس ڪانفرنس کي خطاب ڪيو ۽ ملاقات جي حوالي سان بيان پڙهي ٻڌايو. اعزاز احمد چوڌري چيو ته هي ملاقات خوشگوار ماحول ۾ ٿي ۽ ٻنهي اڳواڻن ٻطرفي ۽ علائقائي دلچسپي جي معاملن تي خيالن جي ڏي وٺ ڪئي. هن چيو ته ٻنهي اڳواڻن اتفاق ڪيو ته امن کي يقيني بڻائڻ ۽ ترقي کي هٿي وٺرائڻ ڀارت ۽ پاڪستان جي گڏيل ذميواري آهي. ان حوالي سان هو سمورن حل طلب مسئلن تي ڳالهين جي لاءِ تيار آهن. هن چيو ته ٻنهي اڳواڻن هر قسم جي دهشتگردي جي مذمت ڪندي ڏکڻ ايشيا مان ان لعنت جي خاتمي جي لاءِ هڪ ٻئي سان تعاون تي اتفاق ڪيو. ڪو ٽائيم فريم ڏيڻ کانسواءِ ڀارتي پرڏيهي سيڪريٽري چيو ته ٻنهي اڳواڻن اتفاق ڪيو ته سندن قومي سلامتي وارا صلاحڪار دهشتگردي بابت سمورن معاملن تي خيالن جي ڏي وٺ جي لاءِ نئين دهلي ۾ ملاقات ڪندا. هن چيو ته ٻنهي اڳواڻن ڀارتي ڊي جي بارڊر سيڪيورٽي فورس ۽ پاڪستان جي ڊي جي رينجرز جي جلد ملاقات تي پڻ اتفاق ڪيو جنهن کانپوءِ سندن لاڳاپيل ڊي جي ملٽري آپريشنز ملاقات ڪندا. سرحدي خلاف ورزي تي هڪ ٻئي جي ملڪ ۾ گرفتار ٿيل مهاڻن کي ٻيڙين سميت 15 ڏينهن جي اندر آزاد ڪرڻ ۽ مذهبي سياحت ۾ سهولت جي لاءِ طريقيڪار تي ڪم ڪرڻ تي پڻ اتفاق ڪيو ويو. هن چيو ته ٻنهي طرف آواز جي نمونن جي فراهمي جهڙي اضافي معلومات سميت ممبئي ڪيس ٽرائل کي تيز ڪرڻ جي طريقن تي ڳالهين جي لاءِ پڻ اتفاق ڪيو. وزيراعظم جو قومي سلامتي معاملن بابت صلاحڪار سرتاج عزيز ۽ وزيراعظم جو خصوصي معاون طارق فاطمي پڻ ٻنهي وزيراعظمن جي وچ ۾ ملاقات ۾ موجود هئا. ڀارتي وفد ۾ قومي سلامتي بابت صلاحڪار اجيت دوول ۽ پرڏيهي سيڪريٽري سبرامنيم جئه شنڪر شامل هئا. ان کان اڳ ڳالهين کان اڳ ۾ ٻنهي اڳواڻن گرمجوشي سان هٿ ملايو ۽ تصوير ڪڍرائي. وزيراعظم نواز شريف ۽ سندس ڀارتي هم منصب جي وچ ۾ آخري ڀيرو ملاقات سارڪ سربراهه اجلاس جي موقعي تي گذريل سال نومبر ۾ کٽمنڊو ۾ ٿي هئي. ان کان اڳ اسلام آباد ۾ پرڏيهي آفيس جي ترجمان صحافين کي ٻڌايو ته ٻنهي اڳواڻن جي وچ ۾ ملاقات هڪ مثبت اڳڀرائي آهي. هن اميد ظاهر ڪئي ته ٻنهي ملڪن جي لاڳاپن تي مثبت اثر پوندا. ترجمان چيو ته عالمي برادري به پاڪستان ۽ ڀارت جي وچ ۾ لاڳاپن ۾ بهتري ۾ دلچسپي رکي ٿي، ان سان نه رڳو ٻنهي ملڪن جي عوام پر پوري خطي کي فائدو پهچندو.

 

قومن جي اقتصادي ترقي لاءِ علائقائي استحڪام اهم آهي: نواز شريف

اوفا (اين اين آءِ) وزيراعظم نواز شريف چيو آهي ته انتهاپسندي، دهشتگردي ۽ منشيات جي اسملنگ کي منهن ڏيڻ لاءِ مضبوط اجتماعي رد عمل جي ضرورت آهي، علائقائي استحڪام قومن جي اقتصادي ترقي لاءِ اهم آهي، اختلاف ختم ڪرڻ حل طلب تڪرار حل ڪرڻ ۽ عوام جي ڀلائي لاءِ سازگار ماحول پيدا ڪرڻ لاءِ گڏجي ڪم ڪرڻ گهرجي، هو هتي شنگهائي تعاون تنظيم جي 15 هين اجلاس کي خطاب ڪري رهيو هو، وزيراعظم چيو ته خطي کي نازڪ جگرافيائي ۽ سياسي ماحول کي منهن ڏيڻو پئجي رهيو آهي، انتهاپسندي روڪٿام ۽ بارڊر سڪيورٽي ۾ اضافي جي حوالي سان پاڪستان جا مقصد ايس سي او سان هماهنگ آهن، هن چيو ته ايس سي او پاڪستان کي ڏکڻ ايشيا، افغانستان ۽ سينٽرل ايشيا ۾ امن کي هٿي ڏيڻ ۾ هڪ فائديمند پليٽ فارم مهيا ڪري ٿو، نواز شريف چيو ته ايس سي او ميمبر ملڪن سان خوشگوار ۽ گڏيل طور مفيد لاڳاپن کي اسان جي پرڏيهي پاليسي ۾ ترجيحي حيثت حاصل هوندي، قومن جي اقتصادي ترقي لاءِ علائقائي استحڪام اهم آهي، هن چيو ته ايس سي او پارٽرنرز هڪ شاندار ايجنڊا رکن ٿا، اهي مقصد حاصل ڪرڻ لاءِ علائقائي استحڪام کي يقيني بڻائڻ ۽ اقتصادي هم آهنگي کي هٿي ڏيڻ جي ضرورت آهي، هن چيو ته اختلاف گهٽائڻ ۽ تڪرار حل ڪرڻ ۽ پنهنجي عوام جي ڀلائي لاءِ سازگار ماحول پيدا ڪرڻ لاءِ گڏجي ڪم ڪرڻ گهرجي، ان نموني سان شنگهائي اسپرٽ کي حقيقت طور تي عملي جامو پارائي سگهجي ٿو، وزيراعظم تنظيم ۾ پاڪستان ۽ ڀارت جي شموليت کي ايس سي او جي تاريخ ۾ اهم موڙ قرار ڏنو، هن چيو ته مون کي هن باوقار فورم ۾ پنهنجي ملڪ جي نمائندگي ڪرڻ جو اعزاز مليو آهي، مون کي اعتماد آهي ته ايس سي او جي توسيع يوري شيائي پٽي جي بلدجندڙ سياسي منظر نامي ۾ اهم اڳڀرائي ثابت ٿيندي، وزيراعظم چيو ته پاڪستان ايس سي او خطي ۽ ان کان ٻاهر تجارتي لاڳاپن لاءِ زمين ۽ بحري رستا پيش ڪري ٿو هي يوري شيائي خطي کي عربي سمنڊ سان ملائڻ لاءِ ايس سي او ميمبر ملڪن لاءِ هڪ قدرتي رابطو فراهم ڪري ٿو، ايس سي او جي هڪ اهم ميمبر حيثيت روس، ايشيا ۽ يورپ جي سنگم تي واقع آهي، وزيراعظم شاندار مهمانواز تي روس جي صدر ولادي مير پيوٽن جو شڪريو ادا ڪيو.

 

شنگهائي تعاون تنظيم پاڪستان کي ميمبرشپ ڏيڻ جي منظوري ڏئي ڇڏي

اسلام آباد (اين اين آءِ) شنگهائي تعاون تنظيم پاڪستان کي ميمبرشپ ڏيڻ جي منظوري ڏئي ڇڏي آهي، پرڏيهي وزارت جي ترجمان قاضي خليل پاڪستان کي ايس سي او جي ميمبرشپ ڏيڻ جي تصديق ڪئي آهي، هي فيصلو جمعي تي روس جي شهر اوفا ۾ تنظيم جي ميمبر ملڪن جي سربراهن ۽ حڪومت جي سربراهن جي اجلاس ۾ ڪيو ويو، تنظيم ڀارت کي به ميمبرشپ ڏيڻ جي منظوري ڏني، چيني صدر شي جن پنگ چيو آهي ته شنگهائي تعاون تنظيم ۾ پاڪستان ۽ ڀارت شامل ٿيڻ سان هي تنظيم وڌيڪ فعال ٿيندي ۽ ميمبرن ملڪن وچ ۾ هر شعبي ۾ تعاون وڌندو.

 

وزيراعظم نوازشريف جي چيني صدر سان ملاقات، ٻطرفو لاڳاپا ۽ خطي جي صورتحال تي ڳالهيون

اوفا (اين اين آءِ) وزيراعظم نوازشريف چيو ته شنگهائي تعاون تنظيم جي ميمبرشپ لاءِ چين جي تعاون جو قدر ڪيون ٿا شنگهائي تعاون تنظيم جي اجلاس جي موقعي تي وزيراعظم نوازشريف ۽ چين جي صدر شي چن پنگ وچ ۾ روس جي شهر اوفا ۾ ملاقات ٿي جنهن ۾ پاڪ چين دوستي سميت ٻين اهم معاملن تي به ڳالهيون ڪيون ويون وزرياعظم نوازشريف چيو ته چين پاڪستان جو بهترين دوست آهي ۽ اسان کي ٻنهي ملڪن جي دوستي تي ناز آهي ملاقات ۾ وزيراعظم نوازشريف ڀارتي هم منصب نريندرمودي سان ملاقات جو تفصيل شيئر ڪيو وزيراعظم چيو ته چين سان دوستي اسان جي پرڏيهي پاليسي جو اهم جز آهي چيني صدر ۽ ان جي زال جي پاڪستان جي دوري عوام جون دليون ۽ دماغ کٽي ورتا اقتصادي راهداري جي منصوبن ۾ چيني صدر شي چن پنگ جي دلچسپي جو قدر ڪيون ٿا هن چيو ته شنگهائي تعاون تنظيم جي ميمبرشپ لاءِ چين جي تعاون جو قدر ڪيون ٿا ۽ شنگهائي تعاون تنظيم ۾ موثر ڪردار لاءِ تيار آهيون چين جي صدر جو ان موقعي تي چوڻ هو ته پاڪستان سان لاڳاپا چين جو اولين ايجنڊا آهي ۽ صدر پاڪستان ممنون حسين جي چين جي دوري جا منتظر آهن.

 

سپريم ڪورٽ جو سمورن وفاقي ادارن کي پنهنجون پاليسيون ۽ قانونن جو اردو ترجمو شايع ڪرڻ جو حڪم

اسلام آباد (اين اين آءِ) سپريم ڪورٽ سمورن وفاقي ادارن کي پنهنجون پاليسيون ۽ قانونن جو اردو ترجمو شايع ڪرڻ جو حڪم ڏنو آهي سپريم ڪورٽ ۾ اردو کي سرڪاري ٻولي قرار ڏيڻ جي حوالي سان ڪيس جي ٻڌڻي جسٽس جواد ايس خواجه جي سربراهي ۾ ٽه رڪني بئنچ ڪئي ٻڌڻي جي موقعي تي جسٽس جواد ايس خواجه چيو ته بلوچستان پنجابي رائج ڪري ڇڏي جڏهن ته پنجاب نه ڪري ڇڏيو سمورا وفاقي ادارا پنهنجون پاليسيون ۽ قانون جو اردو ترجمو شايع ڪن سمورا وفاقي ادارا پنهنجا دستاويز  ۽ فارم انگريزي سان گڏ اردو ۾ به منتقل ڪن سيڪريٽري انفارميشن چيو ته وزيراعظم اردو جي آفيس ۾ استعمال جو انتظامي حڪم 6 جولا3 تي جاري ڪيو هو جنهن مطابق وفاقي حڪومت جا سمورا ادرا پنهنجون ويب سائيٽ ٽن مهينن ۾ اردو ۾ منتقل ڪري ڇڏيندا صدر وزيراعظم ۽ سمورا وفاقي وزير ملڪ اندر ۽ ٻاهر پنهنجون تقريرون اردو ۾ ڪندا عدالت وزيراعظم جي حڪم نامي تي اطيمنان جو اظهار ڪندي ڪيس جي ٻڌني ملتوي ڪري ڇڏي.

 

وزيراعظم نوازشريف پاران افغانستان سان بهتر لاڳاپا قائم ڪرڻ جي خواهش جو اظهار

اوفا (اين اين آءِ) وزيراعظم محمد نوازشريف افغانستان سان بهتر لاڳاپا قائم ڪرڻ جي خواهش جو اظهار ڪندي چيو ته پاڪ افغان لاڳاپا بهتر ٿيڻ نهايت حوصله افزا آهي جڏهن ته افغان صدر اشرف غني افغانستان ۾ امن قائم ڪرڻ جي ڪوششن ۾ پاڪستان جي ڪردار کي ساراهيندي هن اميد جو اظهار ڪيو ته ان سان ملڪ ۾ ڊگهي مدي امن قائم ٿيندو وزراعظم نوازشريف ۽ افغان صدر اشرف غني شنگهائي تعاون تنظيم جي سربراهه اجلاس ۾ ملاقات ڪئي جنهن ۾ ٻطرفو لاڳاپا دهشتگردي خلاف جنگ ۽ خطي جي صورتحال سميت مختلف معاملا غور هيٺ آيا ملاقات ۾ ٻنهي ملڪن جي سربراهن لاڳاپن کي مضبوط بنيادن تي قائم ڪرڻ لاءِ گڏيل تعاون جي ضرورت تي زور ڀريو وزرياعظم نوازشريف چيو ته چئليجنز کي منهن ڏيڻ لاءِ ثابت قدمي ضروري آهي مضبوط بنيادن تي لاڳاپا قائم ڪرڻ لاءِ گڏيل تعاون اڻٽر آهي ملاقات ۾ ٻنهي اڳواڻن پاران 7 جولاءِ تي افغانستان ۾ قيام امن ۽ استحڪام لاءِ افغان حڪومت ۽ افغان طالبان وچ ۾ مري ۾ ٿيندڙ ڳالهين ۾ اڳڀرائي تي اطمينان جو اظهار ڪيو.

 

پاڪ ڀارت وزيراعظم وچ ۾ ملاقات خوش آئيند آهي: پرويز رشيد

اسلام آباد (اين اين آءِ) وفاقي وزير سينيٽر پرويز رشيد پاڪ ڀارت وزيراعظم وچ ۾ ملاقات کي خوش آئيند قرار ڏيندي چيو ته ٻنهي ملڪن کي سمورا مسئلا ميز تي ويهي ڳالهين ذريعي حل ڪرڻ گهرجن پاڙيسرين کي تبديل نٿو ڪري سگهجي اسان کي ماضي جون شڪايتون وسارڻيون پونديون ٻنهي ملڪن وچ ۾ ڪرڪيٽ سميت هاڪي فوٽبال ۽ ڪٻٽي جون مئچون به کيڏڻ گهرجن هڪ انٽرويو ۾ پرويز رشيد چيو ته ننڍي کنڊ جي مسئلن جو بهترين حل ڳالهيون آهن پاڪستان ۽ ڀارت کي گهرجي ته اهي پنهنجا سمورا معاملا ۽ مسئلا ميز تي ويهي ڳالهين سان حل ڪن وفاقي وزير چيو ته گذريل هڪ سال ۾ ورڪنگ بائونڊري تي ڪيترائي واقعا ٿيا آهن جن ۾ ڪيترائي ئي ماڻهو فوتٿي چڪا آهن اسان پاڙيسري آهيون ۽ پاڙيسرين کي تبديل نٿو ڪري سگهجي پرويز رشيد وڌيڪ چيو ته اسان کي گذريل 65 سالن جي زخمن کي وڌائڻ بدران مثبت سوچ اختيار ڪرڻي پوندي ۽ اهو ئي اسان لاءِ بهتر آهي.

 

بلوچستان ۾ امن امان جي صورتحال بهتر ٿي وئي آهي، هٿيار ڦٽا ڪري قومي ڌاري ۾ ايندڙن جي آجيان ڪنداسين: آرمي چيف

ڪوئٽا(بيورو) آرمي چيف جنرل راحيل شريف  ڪوئٽه جو دورو ڪيو. آرمي چيف سان گڏ ڊي جي آئي ايس پي آر، چيف سڪريٽري ۽ آئي جي ايف سي به موجود هوآئي ايس پي آر مطابق آرمي چيف کي بلوچستان ۾ امن امان جي صورتحال  ۽ سلامتي بابت گڏيل بريفنگ ڏني وئي. بريفنگ ۾ ٻڌايو ويو ته بلوچساتن ۾ گڏيل طور تي امن امان جي صورتحال بهتر ٿي آهي،ايف سي ۽ پوليس جي آپريشن سان ڏوهن ۾ گهٽتائي ٿي آهي، اثرائتي ڪاررواين سبب فرقيواريت تشدد ۾ به گهٽتائي ٿي آهي.ڪوئٽه ۾ سدرن ڪمانڊ هيڊ ڪواٽر جو دورو ڪندي جنرل راحيل شريف بلوچستان ۾ امن امان جي صورتحال تي قانون لاڳو ڪندڙ ادارن کي ساراهيندي چيو ته ايف سي ۽ پوليس ٽارگيٽڊ ڪاررواين سان صوبي ۾ امن امان جي صورتهال بهتر ٿي آهي.آرمي چيف جنرل راحيل شريف تشدد جو رستو ڇڏي ۽ هٿيار ڦٽا ڪندڙن جي آجيان ڪندي چيو ته تشدد جو رستو ڇڏي قومي مفاد جي راهه ڏانهن وڌندڙن سان سهڪار ڪيو ويندو. سندس چوڻ هو ته بجلي ۽ تجارت جي حوالي سان بلوچستان ريجنل حب جي حيثيت رکي ٿو ۽ سول توڙي ملٽري ڪوششن سان بلوچستان ترقي ڪندو.

 

ورڪنگ بائونڊري تي ڪنهن به جارحيت جو منهن ٽوڙ جواب ڏنو ويندو: اسحاق ڊار

اسلام آباد (اي پي پي) ناڻي واري وفاقي وزير سينيٽر اسحاق ڊار چيو آهي ته پاڪستان سمورن پاڙيسري ملڪن سان خوشگوار لاڳاپا چاهي ٿو پر قومي يڪجهتي، سلامتي ۽ خودمختياري کي هر شيءَ تي اوليت ڏني ويندي، پاڪ چين اقتصادي لنگهه منصوبو ڀارت کان هضم نه ٿي رهيو آهي، ورڪنگ بائونڊري تي ڪنهن به جارحيت جو منهن ٽوڙ جواب ڏنو ويندو، نجي تعليمي ادارن پاران انڪم ٽيڪس جي نالي تي فيس ۾ اضافو غيرقانوني آهي، فيس وڌائڻ وارن تعليمي ادارن جي خلاف ڪارروائي ٿيڻ گهرجي، ٻه لک رپين کان وڌيڪ جي سالياني فيس ادا ڪندڙ والدين تي ٽيڪس هنيو ويو، گذريل ٻن سالن دوران ڪڻڪ ۽ چانور جي ڪا کيپ ضبط نه ڪئي وئي. ڪالهه جمعي ڏينهن سينيٽ ۾ سينيٽر سسئي پليجو جي ورڪنگ بائونڊري تي ڀارت پاران گولاباري جي حوالي سان ڌيان ڇڪايو نوٽيس جي جواب ۾ ناڻي واري وفاقي وزير چيو ته اسان پاڙيسري ملڪن سان پرامن لاڳاپا چاهيون ٿا پر ان جو اهو مطلب نه آهي ته اهڙي قسم جي واقعن کي قبول ڪيو ويندو. هن چيو ته جڏهن به ڪو اهڙو واقعو ٿئي ٿو ته ان تي سخت ردعمل ظاهر ڪيو وڃي ٿو ۽ ڊي جي ملٽري آپريشنز ۽ پرڏيهي آفيس جي سطح تي احتجاج به ڪيو وڃي ٿو ۽ ان جو ڀرپور جواب به ڏنو وڃي ٿو. هن چيو ته پاڪ چين اقتصادي لنگهه منصوبو ڀارت کي هضم نه ٿي رهيو آهي، ڀارت چين کي به ان منصوبي جي حوالي سان گمراهه ڪرڻ جي ڪوشش ڪئي پر چين ان جي خدشن کي رد ڪري ڇڏيو جنهن کانپوءِ ڀارت پاڪستان جي اندر به ڀارتي ميڊيا جي ذريعي غلط فهميون پيدا ڪرڻ جي ڪوشش ڪئي پر وزيراعظم نواز شريف جي صدارت هيٺ سياسي قيادت گڏجي ان منصوبي کي ناڪام بڻائڻ جو فيصلو ڪيو آهي. اجلاس ۾ اڳوڻي سينيٽر عبدالطيف انصاري ۽ سينيٽر عثمان ڪاڪڙ پاران اٿاريل نقطن جي جواب ۾ ناڻي واري وفاقي وزير اسحاق ڊار چيو ته نجي تعليمي ادارن جو انتظام ايف بي آر تحت نه آهي ۽ ريگيوليٽر ان جا انتظام هلائين ٿا. هن چيو ته ٻارن جي سالياني 2 لک کان وڌيڪ فيس ادا ڪندڙ والدين تي ودهولڊنگ ٽيڪس هنيو ويو آهي ڇو ته معاشري جو هڪ وڏو امير طبقو ٽيڪس نه ٿو ڏي پر اهو ٽيڪس ايڊجسٽ ٿي سگهي ٿو.

 

سينيٽ پاران ڪريڊٽ بيورو بل 2015ع اتفاق راءِ سان منظور

اسلام آباد (اي پي پي) سينيٽ ڪريڊٽ بيورو بل 2015ع جي اتفاق راءِ سان منظوري ڏئي ڇڏي آهي. ڪالهه جمعي ڏينهن سينيٽ جي اجلاس دوران سينيٽر اسحاق ڊار رٿ پيش ڪئي ته ڪريڊٽ بيورو بل 2015ع کي اسٽينڊنگ ڪميٽي جي رپورٽ ڪيل صورت ۾ غور هيٺ آندو وڃي. ايوان رٿ جي منظوري ڏئي ڇڏي جنهن کانپوءِ چيئرمين شقوار منظوري جي لاءِ بل ايوان ۾ پيش ڪيو جنهن کي اتفاق راءِ سان منظور ڪيو ويو.