تازيون خبرون

Daily Archives: July 10, 2015

نيب ۽ احستاب ڪميشن ڪي پي ڪي جي موجوده وزير، ڪمشنر بنون ۽ اڳوڻي وزير سميت ٻين کي گرفتار ڪري ورتو

پشاور(اي پي پي) نيب ۽ خيبرپختونخواه جي احتساب ڪميشن خميس ڏينهن بدعنواني جي الزام هيٺ خيبرپختونخواه جي معدني ترقي واري صوبائي وزير ضياءُ الله آفريدي، پيپلزپارٽي سان تعلق رکندڙ اڳوڻي وزير ۽ ڪمشنر بنون عصمت الله گنڊاپور سميت 10 ڄڻن کي گرفتار ڪري ورتو آهي. احتساب ڪميشن جي ترجمان اي پي پي کي ٻڌايو ته ضياءُ الله آفريدي کي غيرقانوني کاڻين کي تحفظ فراهم ڪري قومي خزاني کي اربين رپين جو نقصان پهچائڻ جي الزام هيٺ گرفتار ڪيو ويو آهي. احتساب ڪميشن جي ترجمان ٻڌايو ته آفريدي معدني کاڻين جون ليزون ڏيڻ ۾ اختيارن جو ناجائز استعمال پڻ ڪيو. واضح رهي ته پي ٽي آءِ جي مرڪزي قيادت صوبي اندر وڏن منصوبن جي جائزي وٺڻ جي ذميواري ضياءُ الله آفريدي حوالي ڪئي هئي. هوڏانهن نيب خيبرپختونخواه پيپلزپارٽي سان تعلق رکندڙ خيبرپختونخوا جي اڳوڻي وزير نوابزاده محمود زيب ۽ بنون جي موجوده ڪمشنر عصمت الله گنڊاپور کي انتظاميا ۽ معدني ترقي واري کاتي جي 9 عملدارن سميت گرفتار ڪري ورتو آهي. اڳوڻي وزير نوابزاده محمود زيب ۽ عصمت الله گنڊاپور معدني ترقي واري کاتي جي ايڊيشنل سيڪريٽري جي حيثيت ۾ مبينه طور تي فاسفيٽ جا سرڪاري ذخيرا غيرقانوني طور تي هڪ اسڪول ٽيچر رخسانه جاويد کي الاٽ ڪيا جنهن سان قومي خزاني کي 36 ڪروڙ رپين جو نقصان پهتو. جوابدارن ۾ اڳوڻو سيڪريٽري ٽيڪنيڪل ايجوڪيشن شاهه ولي خان، تڏهوڪو ايڊيشنل سيڪريٽري معدني ترقي ۽ موجوده ڪمشنر بنون عصمت الله گنڊاپور، سيڪشن آفيسر فرهاد عيل، خان بادشاهه، نوروز خان، زيارت خان، شاڪر الله، پرويز خان ۽ احتشام الملڪ پڻ شامل آهن

 

ڪراچي، لاهور، ڪوئيٽا، ملتان ۽ ٻين شهرن ۾ حضرت علي رضه الله عنه جي شهادت جو ڏهاڙي ملهايو ويو

ڪراچي (نمائندن وٽان) حضرت علي رضه الله عنه جي شهادت جي ڏهاڙي تي لاهور، ڪوئيٽا، ملتان ۽ ٻين شهرن ۾ ملهايو ويو، سنڌ جي راڄڌاني ڪراچي ۾ حضرت علي عليه السلام جي شهادت جو ڏهاڙو نهايت عقيدت ۽ احترام سان ملهايو ويو. مرڪزي جلوس شاهه خراسان نمائش چورنگي کان برآمد ٿيو ۽ پنهنجي روايتي رستن تان ٿيندو امام بارگاهه ايرانيا حسينيه کارادر پهچي نهر ٿيو. جلوس دوران مومن ماتم ڪندا رهيا ۽ نوحه خواني ٿيندي رهي. ان موقعي تيسيڪيورٽي جا سخت انتظام ڪيا ويا. مرڪزي جلوس جي حفاظت لاءِ 11 هزار پوليس اهلڪار مقرر ڪيا ويا. ڊي جي رينجرز ميجر جنرل بلال اڪبر مرڪزي جلوس جي گذرگاهه تي سيڪيورٽي انتظامن جو جائزو ورتو. جلوس جي مرڪزي رستن کي بم ڊسپوزل اسڪواڊ وسيلي ڪليئر ڪرايو ويو. ٻيئ طرف ننڍا وڏا جلوس منزل ڏانهن روان دوان آهن، لاهور سميت وڏن شهرن ۾ جلوسن جي رستن تي موبائيل فون جي سروس معطل رهي، سڪيورٽي جا انتظام پڻ انتهائي سخت ڪيا ويا، لاهور ۾ مرڪزي ماتمي جلوس نثار حويلي کان برآمد ٿيو، جيڪو پنهنجي مقرري رستن تان ٿيندي ڪربلا گامي شاهه تي ختم ٿيو، جلوس جي رستي تي سڪيورٽي جا انتظام انتهائي سخت ڪيا ويا . جلوسن جي سڪيورٽي لاءِ 4 هزار کان وڌيڪ پوليس اهلڪار سڪيورٽي تي مقرر ڪيا ويا هئا، ضرورت پوڻ تي فوج ۽ رينجرز کي به الرٽ رکيو ويو، ملتان مان مرڪزي ماتمي جلوس شانه حيدر بوهڙ والا مان برآمد ٿيو، جيڪو پنهنجي مقرري رستن تان ٿيندي ڪانا شبير ۾ پڄاڻي تي پهتو، ٻين شهرن جيان ملتان ۾ به جلوسن جي سڪيورٽي جا انتظام انتهائي سخت ڪندي 3  هزار اهلڪار مقرر ڪيا ويا هئا، وڏين عمارتن تي ماهر شوٽرز کي به مقرر ڪيو ويو . حافظ آباد، رحيم يار خان، بهاولنگر ۽ فيصل آباد سميت ٻين ننڍن وڏن شهرن ۾ به ماتمي جلوس پڄاڻي تي پهتو، حضرت علي رضه جي شهادت واري ڏهاڙي تي بلوچستان جي سمورن ضلعن ۾ موٽر سائيل جي ٻيلهه سواري تي پابندي لاڳو ڪئي وئي هئي، . سبي جي مختلف علائقن مان ننڍا وڏا جلوس پنهنجي منزل تي پهتا، ه جلوسن جي سڪيورٽي لاءِ 1500 ايف سي ۽ ليويز اهلڪارن کي مقرر ڪيو ويو هيو..

 

مون کي صوفياڻي ڪلام ۽ سينيئرن جي ادب جي ڪري مشهوري ملي آهي: صنم ماروي

ڪراچي (شوبز نيوز) سنڌ جي جڳ مشهور ڳائڻي صنم مارويءَ چيو آهي ته مون کي صوفياڻي ڪلام ۽ سينيئرن جي ادب جي ڪري مشهوري ملي آهي، جڏهن به صوفياڻو ڪلام پيش ڪندي آهيان ته پنهنجي ذات ۾ گھم ٿي ويندي آهيان. خابرو اداري سان خاص ڳالهه ٻولهه دوران صنم مارويءَ چيو ته جن به صوفياڻو ڪلام ڳايو آهي، خدا ان کي عزت، مقام ۽ مشهوري عطا ڪئي آهي، جنهن جو جيئرو مثال سنڌ جي ليجنڊري ڳائڻي سانئڻ عابده پروين، اقبال باهو، مائي ڀاڳي، علڻ فقير سميت ٻيا شامل آهن. صنم مارويءَ چيو ته منهنجا چاهيندڙ منهنجي ڳائڻ واري انداز کي تمام گھڻو پسند ڪندا آهن. پر ڪنهن به ڳائڻي جي لاءِ رياضت تمام ضروري آهي. هڪ سوال جي جواب ۾ صنم مارويءَ چيو ته صوفياڻي ڪلام کي ڀارت ۾ قدر جي نگاهه سان ڏٺو ويندو آهي. مان پاڪستان سميت سڄي دنيا ۾ پرفارم ڪري چڪي آهيان، پر سٺا ٻڌندڙ رڳو پاڪستان ۾ ئي آهن.

 

مشهور آمريڪي ڳائڻي ريحانه جي نئين گيت ۾ حيران ڪندڙ ديسي چهرو سامهون آيو آهي

لاس اينجلس (شوبز نيوز) مشهور آمريڪي ڳائڻي ريحانه جي نئين گيت ۾ حيران ڪندڙ ديسي چهرون سامهون آيو آهي. پاپ ڳائڻي پنهنجي نئين گيت جي وڊيو ۾ هڪ اهڙي چهري جي چونڊ ڪئي آهي، جنهن کي اڄ تائي ڪنهن نه ڏٺو هو، وڊيو ۾ نظر ايندڙ چهرو صنم نالي هڪ آمريڪي شهري عورت جو آهي، جنهن جي عمر 25 سال آهي. ٽِي مهينا اڳ مشهور ڳائڻي ريحانه پنهنجي آفيشل اڪائونٽ تان صنم کي انسٽاگرام تي فالو ڪيو هو ۽ پوءِ هن صنم کي پنهنجي گيت جي وڊيو جي آڇ ڪئي. مشهور ڳائڻيءَ صنم کي انسٽا گرام تي پوسٽ ڪيل تصوير کي ڏسندي پنهنجي گيت جي وڊيو لاءِ چونڊيو هو. هڪ انٽرويوءَ ۾ صنم ٻڌايو ته هڪ صبح جو کيس ريحانه طرفان وڊيو پيغام مليو جنهن ۾ هن مون سان ڪم ڪرڻ جي خواهش جو اظهار ڪيو. صنم جو چوڻ هو ته پهريان ته مون کي يقين نه آيو ته اها حقيقت ناهي، پر پوءِ ريحانه جو هڪ پيغام مليو، جنهن ۾ هن چيو ته مان توسان ڪم جي خواهشمند آهيان، اي ميل يا نمبر موڪل. صنم چيو ته ريحانه کي اربع تي انسٽا گرام تي فالو ۽ جمعي جي ڏينهن لاس اينجلس ۾ وڊيو جي شوٽنگ ڪرائي رهي هيس. هن چيو ته ريحانا هڪ پياري عورت آهي، هوءَ سدائين تعريفون ڪندي آهي، هوءَ مشهور هجڻ باوجود بلڪل به مغرور ناهي. هڪ سوال جي جواب ۾ صنم جو چوڻ هو ته ريحانا سيٽ تي اچڻ وقت ڪافي بيمار هئي، ٻِن ٽِن ڏينهن تائين ته کانئس آواز به نه پي نڪتو. پر اهو هفتو منهنجي زندگيءَ جو تمام خاص ۽ خوبصورت هفتو هو.

 

پنهنجي ڪيريئر جي شروعات پاڪستان کان ڪئي، جنهن دوران کيس تمام گھڻيون ڪاميابيون مليون: رونا ليليٰ

لنڊن (شوبز نيوز) هائوس آف پارليامينٽ ۾ راجا ڪاشف ۽ عبايا جهان جي بنگالي ۽ اردو زبانن ۾ ڳايل گيتن جي مهورتي تقريب ٿي، جنهن ۾ پارليامينٽ ميمبر سيما ملهوترا کان سواءِ ناليواري اداڪارا رونا ليليٰ به شرڪت ڪئي. ان موقعي تي رونا ليليٰ جو چوڻ هو ته پنهنجي ڪيريئر جي شروعات پاڪستان کان ڪئي، جنهن دوران کيس تمام گھڻيون ڪاميابيون مليون ۽ هوءَ پاڪستاني عوام طرفان ملندڙ پيار کي ڪڏهن به وساري ناهي سگھي. رونا ليليٰ چيو ته منهنجي خوش قسمتي آهي جو پاڪستان فلم انڊسٽريءَ جي سونهري دور ۾ مون ڪم ڪيو ۽ ڀلي ڪٿي به وڃان مون کان انهن ئي گيتن جي فرمائش ڪئي ويندي آهي جيڪي مون پاڪستاني فلمن لاءِ ڳايا. پاڪستان ڄائي برطانوي ڳائڻي راجا ڪاشف جي ڪم جي تعريف ڪندي رونا ليليٰ چيو ته جيتري پيار سان هن بنگالي ۽ اردو ۾ گيت ڳايا آهن، ان تي دل ٿي چوي ته بنگالي ۽ پاڪستاني هڪ ڀيرو هڪ ٿي وڃن. هن چيو ته مان پاڪستان مان ملندڙ پيار کي وساري نه ٿي سگھان.

 

ٻارڙيءَ جي والد ٽريفڪ قانونن جي پابندي نه ڪئي، جنهن جي ڪري حادثو پيش آيو: هما مالني

نئين دهلي (شوبز نيوز) بالي ووڊ اداڪارا هيما مالنيءَ راجسٿان ٽريفڪ حادثي جو ذميوار حادثي ۾ مري ويندڙ ٻارڙيءَ جي والد کي قرار ڏنو آهي. ڀارتيه جنتا پارٽي جي اڳواڻ هيما مالنيءَ جو چوڻ هو ته ٻارڙيءَ جي والد ٽريفڪ قانونن جي پابندي نه ڪئي، جنهن جي ڪري حادثو پيش آيو. سوشل ميڊيا تي تبصرو ڪندي 67 ورهين جي اداڪارا جو چوڻ هو ته کيس حادثي ۾ 2 سالن جي ٻارڙيءَ جي مرڻ تي تمام گھڻو افسوس آهي. جيڪڏهن ٻارڙيءَ جو پيءُ ٽريفڪ قانونن جي پابندي ڪري ها ته هڪ ننڍڙي جان جو زيان نه ٿئي ها. هيما مالني 3 جولاءِ تي رياست راجسٿان جي علائقي دوسه ۾ پيش ايندڙ ٽريفڪ حادثي ۾ زخمي ٿي پئي هئي. پوليس موجب هيما مالنيءَ جي گاڏي غلط طرف کان ايندڙ هڪ گاڏيءَ سان ٽڪرائجي وئي هئي. حادثي ۾ هيما مالنيءَ سميت 4 ڄڻا زخمي ٿيا هئا. جڏهن ته مالنيءَ ميڊيا تي خوف ڦهلائڻ جو الزام لڳايو آهي. هيما مالني ٽوئيٽر تي چيو ته: ”منهنجي دل ۾ ان ٻارڙيءَ لاءِ افسوس آهي، جنهن جو بي سبب فوت ٿيو ۽ سندس خاندان جا ماڻهو زخمي ٿيا، ميڊيا تي تبصرو ڪندي هيما مالني لکيو ته: ”خوف ڦهلائيندڙ ميڊيا ۽ ڪجهه ماڻهن کلي عام مون تي الزام لڳايا، جڏهن ته مان پاڻ به لاچار  ۽ گهري صدمي ۾ هئس. اُهي انسانيت جي سطح کان ڪيترا ڪريل  آهن. انهن لاءِ صرف اهو ئي چونديس، شرم ڪيو، هاڻي بس ڪيو.

 

هاڪي جي رانديگرن کي نه نوڪريون آهن، نه ئي ڪو ڪانٽريڪٽ، حب الوطني ڪيستائين ڪم ايندي؟ ڪوچ شهناز شيخ

لاهور(اسپورٽس نيوز):قومي هاڪي ٽيم جي ڪوچ شهناز شيخ پنهنجي رپورٽ ۾ عالمي هاڪي ليگ ۾ ناڪامي جو ڪارڻ مالي مسئلن کي قرار ڏنو آهي. عالمي هاڪي ليگ ۾ پاڪستان جي شرم جوڳي شڪست جا ڪارڻ ڄاڻڻ لاءِ  وزيراعظم جي هدايت هيٺ جوڙيل ڪميٽي جي اجلاس ۾ شرڪت کانپوءِ شهناز شيخ جو چوڻ هو ته هاڪي جي رانديگرن کي نه ته نوڪريون آهن ۽ نه ئي ڪو ڪانٽريڪٽ، حب الوطني ڪيستائين ڪم ايندي؟ رانديگر ته چيمپيئنز ٽرافي ۾ شرڪت لاءِ به نه پئي ويا، پر هو منهنجو احترام ڪندي ويا. هن چيو ته 6 مهينا پهرين ڪميٽي جوڙي وڃي ها ته هي سونامي نه اچي ها، ڪوئي ٻلي جي راند ٻيهر شروع ٿي ته هاڪي جو ڪو فائدو نه ٿيندو. پنهنجي استعيفيٰ بابت شهناز شيخ چيو ته پاڪستان هاڪي فيڊريشن سان سندس 2016ع تائين ٺاهه ٿيل آهي، ان ڪري هو پنهنجي عهدي تان استعيفيٰ نه ڏيندو. ان کان اڳ شهناز شيخ پنهجي رپورٽ ڪميٽي ۾ پيش ڪئي، جنهن ۾ چيو ويو آهي ته اولمپڪ ڪواليفائنگ رائونڊ ۾ مقرر وقت تي نه وڃي سگهياسين، جنهن ڪري 5 ميچون مس ٿيون، رانديگرن جي مالي ۽ نفسياتي مسئلن راند تي ناڪاري اثر وڌا ۽ انهن گول ڪرڻ جا ڪيترائي موقعا وڃايا.

 

آءِ سي سيءَ چيمپئنز ٽرافي ۾ پاڪستان جي رسائيءَ جا امڪان اڃا به چٽا

ڪولمبو (اسپورٽس نيوز) آءِ سي سيءَ چيمپئنز ٽرافي ۾ پاڪستان جي رسائيءَ جا امڪان اڃا به چٽا آهن ۽ سريلنڪا خلاف سيريز ۾ 2-3 سان ڪاميابيءَ جي صورت ۾ پاڪستان چيمپئنز ٽرافيءَ ۾ پهچي ويندو. آءِ سي سيءَ چيمپئنز ٽرافي لاءِ ڪوليفاءِ ڪرڻ لاءِ پاڪستان ۽ بنگلاديش جي رينڪنگ جي صورتحال واضح ٿي وئي آهي. هِن وقت آءِ سي سي رينڪنگ ۾ بنگلاديش 93 پوائنٽن سان ستين، 88 پوائنٽن سان ويسٽ انڊيز اٺين ۽ 87 پوائنٽن سان پاڪستان جو نائون نمبر آهي. هِن وقت پاڪستان کي سريلنڪا ۽ بنگلاديش کي ڏکڻ آفريڪا واري چئلينج سان منهن ڏيڻو آهي ۽ ٻنهي ٽيمن جي لاءِ هلندڙ سيريزون تمام اهميت واريون آهن. جيڪڏهن ڏکڻ آفريڪا ٽِن ون ڊي ميچن جي سيريز ۾ بنگلاديش کي ڪلين سوئيپ ڪري ٿو ته بنگلاديش ٽيم ٽي پوائنٽون وڃائي 90 تي پڄي ويندي، جنهن سان گڏ ئي ان جي چيمپئنز ٽرافيءَ ۾ شرڪت به خطري ۾ پئجي ويندي. ٻئي طرف پاڪستان کي چيمپئنز ٽرافيءَ تائين پڄڻ لاءِ سريلنڪا کي ون ڊي سيريز ۾  لازمي هارائڻو پوندو. جيڪڏهن گرين شرٽن سريلنڪا خلاف پنج ون ڊي ميچن جي سيريز ۾ 1-4 سان فتح ماڻي ته ملڪي ٽيم 92 پوائنٽن سان چيمپئنز ٽرافي تائين پهچي ويندي. سيريز ۾ 3-2 سان فتح تي ملڪي ٽيم جون پوائنٽون 90 ٿينديون ۽ پاڪستاني ٽيم رينڪنگ ۾ ويسٽ انڊيز کان مٿي اچي ويندي، جنهن کان پوءِ پاڪستان کي زمبابوي ۾ شيڊيولڊ ٽِه ملڪي سيريز ۾ ويسٽ انڊيز کي لازمي هارائڻو پوندو.

 

ميچ دوران بيٽسمين هڪ اوور ۾ 6 ڇڪا هڻي بالر جا بال سان گڏ هوش به اڏائي ڇڏيا

سڊني (اسپورٽس نيوز) آسٽريليا جي رياست ڪوئنزلينڊ ۾ هڪ ميچ دوران بيٽسمين هڪ اوور ۾ 6 ڇڪا هڻي بالر جا بال سان گڏ هوش به اڏائي ڇڏيا، بريز بين شهر جي ايلن هارڊ فيلڊ اسٽيڊيم ۾ بش رينجرز ۽ اين آءِ ايس وچ ۾ ميچ کيڏي وئي، بش رينجرز جي بيٽسمين مارڪس سٽونيز اين آءِ ايس جي بالر هينڊن سمٿ تي هڪ اوور ۾ 6 ڇڪا هنيا. سمٿ کي ان هڪ اوور ۾ گڏيل طور 37 رنسون پيون جنهن ۾ هڪ وائيڊ بال جو اسڪور به شامل ڪيو ويو. مارڪن گڏيل طور73 بالرن تي 121 رنسون ٺاهيون. مارڪس 37 هين اوور ۾ 165جي اسڪور تي 5 هين وڪيٽ ڪرڻ تي ميدان ۾ لٿو هو. سمٿ اوور جو پهريون بال وائيڊ ڪرايو هو. ان کان پوءِ 6 بالن تي لاڳيتو 6 ڇڪا هنيا. واضح رهي ته فرسٽ ڪلاس کان وٺي عالمي ڪرڪيٽ تائين هڪ اوور ۾ 6 ڇڪا هڻن جا هيل تائين صرف 4 رڪارڊ جڙيا آهن. 1968ع ۾ ويسٽ انڊيز جي بيٽسمين سر گيري فيلڊ سوبرز پهريون ڀيرو هڪ اوور ۾ 6 ڇڪا هڻڻ کان پوءِ نئون رڪارڊ جوڙيو هو، گيري سوبرز کان 17 سال پوءِ 1985ع ڀارت جي بيٽسمين روي شاستريءَ بروڊا خلاف اهو رڪارڊ جوڙيِو هو. ويست انڊيز جي بيٽسمين گرس گيل به اهڙو اعزاز پنهنجي نالي ڪيو آهي

 

وڏو ٽارگيٽ حاصل ڪرڻ جي لاءِ وڏي رانديگر جي ضرورت هوندي آهي: وقار يونس

پاليڪيلي (اسپورٽس نيوز) پاڪستان ڪرڪيٽ ٽيم جي هيڊ ڪوچ وقار يونس چيو آهي ته وڏو ٽارگيٽ حاصل ڪرڻ جي لاءِ وڏي رانديگر جي ضرورت هوندي آهي ۽ پاڪستاني ٽيم ۾ هن وقت يونس خان کان وڏو رانديگر ڪو به ناهي. برطانوي خابرو اداري کي ڏنل انٽرويوءَ ۾ وقار يونس جو چوڻ هو ته 9 سالن کان پوءِ سريلنڪا ۾ ٽيسٽ سيريز کٽڻ جو سهرو ڪپتان مصباح الحق ۽ سندس ٽيم ڏي وڃي ٿو. پاليڪيلي ٽيسٽ ۾ پاڪستان وٽ يونس خان جھڙو مُهرو هو جنهن جي مدد سان 377 رنسن جو وڏو ٽارگيٽ ماڻيو. يونس خان ڏکئي وقت ۾ جيئن شاندار ڪارڪردگي ڏيکاري اهو ڪم صرف يونس ئي ڪري سگھي پيو. يونس خان ۽ شان مسعود جي ڊبل سينچري ڀائيواريءَ کان پوءِ يونس ۽ مصباح وچ ۾ 127 رنسن جي ڀائيواري ٽارگيٽ تائين پهچڻ ۾ مددگار ثابت ٿي. وقار يونس جو چوڻ هو ته سعيد اجمل کان پوءِ هر ڪو مايوس ٿي ويو هو، پر ٽيسٽ سيريز ۾ ياسر شاهه سعيد اجمل جي کوٽ محسوس ٿيڻ نه ڏني. ياسر شاهه پنهنجي ڪيريئر جي شروعاتي 9 ٽيسٽ ميچن ۾ ئي وڪيٽن جي ففٽي مڪمل ڪئي هئي ۽ اهڙي ڪارڪردگي ته شين وارن به پنهنجي ڪيريئر نه ڏيکاري هئي، اهڙيءَ طرح ذوالفقار بابر به وڏي بهترين بالنگ ڪرائي. هن چيو ته ون ڊي سيريز ۾ به پاڪستاني ٽيم سٺي ڪارڪردگيءَ جو مظاهرو ڪندي ڇو ته سريلنڪا جي ٽيم کي هارائي سگھجي ٿو ۽ جيڪي رانديگر ون ڊي سيريز جي لاءِ اچي رهيا آهن انهن کي ٽيست سيريز جي کٽڻ سان ضرور حوصلو مليو هوندو. ملڪي ٽيم جي هيڊ ڪوچ جوچوڻ هو ته گذريل ڏيڍ سال دوران پاڪستاني ٽيم ٽيسٽ ڪرڪيٽ ۾ آسٽريليا، سريلنڪا، نيوزيلينڊ ۽ بنگلاديش کي هارايو آهي. جيڪڏهن رانديگرن جي ذاتي ڪارڪردگيءَ جو جائزو ورتو وڃي ته بيٽسمينن ڪيتريون ئي سينچريون جڏهن ته بالرن به ڪيترين ئي اننگن ۾ پنج وڪيٽون حاصل ڪيون آهن. اهڙي ڪارڪردگيءَ تي تبصرا ڪندڙن پاران غير ضروري تنقيد جو سبب سمجھه ۾ نه ٿو اچي.