تازيون خبرون

Daily Archives: July 6, 2015

ايم ڪيو ايم جي تنظيمي ڪميٽي عسڪري ونگ کي منظم ڪري ٿي: رينجرز جي دعويٰ

ڪراچي (اسٽاف رپورٽر) سنڌ رينجرز هڪ ڀيرو ٻيهر واضح ڪيو آهي ته ڪراچي ۾ آپريشن صرف ڏوهارين خلاف ڪيو پيو وڃي، هي آپريشن ڪنهن به سياسي، مذهبي ۽ لساني گروپ خلاف آهي، ايم ڪيو ايم جي تنظيمي ڪميٽِي عسڪري ونگ کي منظم ڪري ٿي تنهنڪري ان جي سيڪٽر انچارج ۽ يونٽ انچارج کي گرفتار ڪيو پيو وڃي، گرفتار ٿيلن کي قانوني حق ڏنا پيا وڃن، رينجرز پاران جاري ڪيل پڌرنامي مطابق ڪراچي آپريشن ڏوهارين خلاف ڪيو پيو وڃي، رينجرز پاران دعويٰ ڪئي وئي آهي ته ايم ڪيو ايم جي تنظيمي ڪميٽِي عسڪري ونگ کي منظم ڪري ٿي تنهنڪري ايم ڪيو ايم جي سيڪٽر ۽ يونٽ انچارج گرفتار ڪيا پيا وڃن، پڌرنامي مطابق ڪجهه ماڻهو پاڻ به گرفتاري ڏئي رهيا آهن.، گرفتار ٿيلن قانوني حق ڏنا پيا وڃن، گرفتاري کانپوءِ جلد کان جلد عدالت آڏو پيش ڪيو وڃي، پڌر نامي ۾ ٻڌايو ويو آهي ته ڪراچي ۾ امن لاءِ رينجرز ۽ عوام گڏ آهي. ٻئي طرف ايم ڪيو ايم جي رابطا ڪميٽي چيو آهي ته رينجرز جو بيان ايم ڪيو ايم خلاف آپريشن جو اعتراف آهي، ايم ڪيو ايم کي قومي ڌارا مان ٻاهر ڪڍڻ جا نتيجا خراب نڪرندا، ايم ڪيو ايم جي رابطا ڪميٽي رينجرز جي ترجمان جي بيان تي سخت نوٽيش وٺندي چيف جسٽس آف پاڪستان کي نوٽيس وٺڻ جو مطالبو ڪيو آهي، رابطا ڪميٽي جو چوڻ آهي ته رينجرز ترجمان جو بيان ۾ اعتراف ڪيو ويو آهي ته آپريشن صرف ايم ڪيو ايم خلاف ڪيو پيو وڃي، آپريشن جو مقصد ڪراچي مان ڏوهارين جي پاڙ پٽڻ نه پر صرف ايم ڪيو ايم کي ختم ڪرڻ آهي، رابطا ڪميٽي جي بيان ۾ چيو ويو آهي ته رينجرز ترجمان بيان ذريعي خود اقرار ڪيو آهي ته رينجرز ايم ڪيو ايم جي تنظيمي عهديدارن کي باقائده منصوبي ۽ ٽارگيٽ تحت گرفتار ڪري رهي آهي، رابطا ڪميٽي سپريم ڪورٽ ۽ سڌ هاءِ ڪورٽ کي رينجرز جي بيان جو نوٽيس وٺڻ جو مطالبو ڪيو آهي، هن سوال ڪيو ته ڇا ايم ڪيو ايم سيڪٽر يا يونٽ عهديدار ٿيڻ پاڪستان جي ڪهڙي قانون جي خلاف ورزي آهي، ان ڳالهه ۾ ڪو شڪ ناهي رهيو ته آپريشن جو مقصد ڏوهاري کي ختم نه ڪرڻ پر ايم ڪيو ايم کي ختم ڪرڻ آهي، رينجرز کي ڏوهارين کي عدالت ۾ پيش ڪرڻ اکين ۾ مٽي وجهڻ جي برابر آهي، رابطا ڪميٽي چيو ته رينجرز جنهن تنظيمي ڪميٽي جو ذڪر ڪري رهي آهي ان جو ڪو به وجود نه آهي.

 

عمران خان يوٽرن خان آهي، چونڊيل حڪومت ڪيرائي وزير اعظم ٿيڻ ٿو چاهي: شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات کاتي واري وزير شرجيل انعام ميمڻ چيو آهي ته قبضن خلاف هلندڙ مهم ڪنهن هڪ جماعت يا هڪ ضلعي ۾ ناهي پر سڄي سنڌ ۾ جاري آهي ۽ ان وقت تائين جاري رهندي ، جيستائين قبضن جو مڪمل خاتمو نه ڪيو ويندو.ڪي ايم سي سميت ٻيا بلديات کاتي جا آفيسر موڪلن تي ويا آهن موڪلون ختم ٿيندي ئي واپس ايندا. ميڊيا ان ڳالهه کي ڪجهه وڌائي پيش ڪيو آهي. هاڻي قبضن تي نه ته ڪو سرڪاري آفيسر، وزير ۽ نه ئي وزير اعليٰ سنڌ به ڊيل نه ٿو ڪري سگهي ۽ ان سلسلي سڀ افواهون بي معنيٰ آهن. سپريم ڪورٽ جي واضح حڪمن تي ڪارروائي ڪري رهيا آهيون ۽ ڪنهن به دٻاءَ ۾ اچي ڪاررواين کي نه روڪيندا سين. اهڙن خيالن جو اظهار هن آچر ڏينهن ڊسٽرڪٽ ايسٽ ۾ ٺاهيل غير قانوني شادي هال کي مسمار ڪرڻ بعد اتي موجود ميڊيا سان ڳالهائيندي ڪيو. ان موقعي تي سينيئر ڊائريڪٽر ميونسپل سروسز مسعود عالم، ايڊمنسٽريٽرايسٽ سيد صلاح الدين، ڊپٽي ڊائريڪٽر انڪروچمينٽ مظهر ۽ ٻيا آفيسر به موجود هئا. صوبائي وزير شرجيل انعام ميمڻ چيو ته قبضن ۽ صفائي جي حوالي سان مهم ڪجهه مهينا اڳ شروع ڪئي ويئي هئي ۽ اڄ به اها مهم ڪراچي سميت حيدرآباد، سکر، لاڙڪاڻو، شهيد بينظير آباد، ٽنڊوالهيار، ٽنڊو آدم، سميت سڄي صوبي جي سڀني ضلعن ۾ بغير ڪنهن فرق جي جاري آهي ۽ ان وقت تائين جاري رهندي، جيستائين اسان سڀني قبضن واري جاين جو خاتمو نه ڪنداسين. هن چيو ته گذريل ڏينهن جي ڪارروائي کانپوءِ هڪ سياسي جماعت ۽ هڪ اين جي او طرفان ان مهم خلاف بيان ڏنا ويا، پر انهن کي وضاحت سان چوان ٿو ته رفاهي ۽ فلاحي زمين جنهن مقصد لاءِ ڏني ويئي آهي ان جي حيثيت نه ته ڪوئي ادارو،نه ئي ڪو آفيسر، نه ڪوئي وزير ۽ نه ئي وري وزير اعليٰ سنڌ تبديل ڪري سگهن ٿا. زمين جي حيثيت جي حوالي سان سپريم ڪورٽ جا واضح حڪم مليل آهن ۽ جيڪڏهن ڪنهن کي ڪو اعتراض آهي ته هو شوق سان سپريم ڪورٽ ۾ وڃي. هن چيو ته مان ڪنهن به قسم جي دٻاءَ ۾ نه ايندس ۽ نه ئي ان مهم کي روڪيو ويندو. هن چيو ته اسان عوام کي تفريحي ماڳ ۽ راندين جا ميدان واپس ڏيڻ جو جيڪو واعدو ڪيو آهي ان کي پورو ڪري ئي دم کڻندا سين. هڪ سوال جي جواب ۾ شرجيل انعام ميمڻ چيو ته ڪنهن به غير قانوني شادي هال کي نه ٿوڇڏيو وڃي ۽ اهڙين خبرن ۾ ڪا به سچائي ناهي. هن چيو ته زمين جي حيثيت، ان جي ليز ۽ ٻين سڀني معاملن جو جائزو وٺڻ کانپوءِ ڪارروايون ڪيون پيون وڃن ۽ ان سلسلي ۾ ڪجهه شادي هالن جا مالڪ عدالتن کان اسٽي آرڊر به وٺي آيا آهن. هن چيو ته بلديات کاتي ۽ بالخصوص ڪي ايم سي لاءِ سٺن وڪيلن تي مشتمل پئنل ٺاهيو پيو وڃي ۽ جلد ئي هي پئنل سڀني اهڙن ڪيسن جو جائزو وٺي بلديات کاتي جو موقف عدالت ۾ پيش ڪندو ۽ اهڙي طرح جا غير ضروري ۽ غير قانوني طور تي اسٽي آرڊرن جو خاتمو ڪرايو ويندو. هڪ ٻئي سوال جي جواب ۾ شرجيل انعام ميمڻ چيو ته جيڪي ڪارروايون مان ڪري رهيو آهيان انهن تي ڪراچي جو مينڊيٽ رکندڙن کي ته خوش ٿيڻ کپي ته مان ڪراچي جي عوام کي گهٽ ۽ ٻوسٽ کان ڪڍي انهن کي آسائشون فراهم ڪرائڻ لاءِ قبضي گروپن خلاف ڪارروايون ڪريان ٿو. هن چيوته مان واضح ڪرڻ چاهيان ٿو ته هي مهم مڪمل طور تي غير سياسي آهي ۽ ان ۾ اڄڪلهه ڪنهن به سياسي شخصيت کي ٽارگيٽ نه ڪيو ويو آهي. هن چيو ته اسان جي هن مهم ۾ مڪمل طور تي غير قانوني ۽ سرڪاري زمينن، راندين جي ميدانن، پارڪن، رفاهي ۽ فلاهي پلاٽن تي انهن جي حيثيت کي تبديل ڪري انهن کي تجارتي سرگرميون ڪندڙن خلاف آهي ۽ هي مهم ان وقت تائين جاري رهندي جيستائين اسان قبضا گروپن کي مڪمل طور ختم نه ڪيون. هن چيو ته جيڪا زمين جنهن مقصد لاءِ الاٽ ڪئي ويئي آهي، ان کان علاوه ان تي ٿيندڙ سڀ سرگرميون غير قانوني تصور ڪيون وينديون ۽ اهڙين سرگرمين ۾ چاهي ڪو به ملوث هوندو، ان کي بخش نه ڪيو ويندو. عمران خان جي بيان جي رد عمل ۾ جاري ڪيل بيان ۾ پاڪستان پيپلز پارٽي جي مرڪزي ڊپٽي سيڪريٽري اطلاعات ۽ صوبائي وزير اطلاعات ۽ بلديات شرجيل انعام ميمڻ چيو آهي ته تحريڪ انصاف جي سربراهه عمران خان ڌرڻي ۾ ناڪامي کانپوءِ بوکلاهٽ جو شڪار ٿي ويو آهي.عمران خان ڌرڻو هڻي اهو سوچي رهيو هو ته هو پاڪستان جو وزير اعظم ٿي ويندو ۽ چونڊيل حڪومتن کي ڪيرائڻ ۾ ڪامياب ٿي ويندو.عمران خان اصل ۾ مسٽر يو ٽرن خان آهي. عمران خان ڪنهن به قسم جي غلط فهمي ۾ نه رهي ته آصف علي زرداري پاڪستان واپس نه ايندو. آچر ڏينهن پنهجي جاري ڪيل هڪ بيان ۾ شرجيل انعام ميمڻ چيو ته عمران خان کي مڪمل طور تي ناڪامي ملي آهي ۽ ڪا به ان جي سازش هن جي ڪم نه آئي ته هاڻي هو ٻين سياسي جماعتن تي خلاف گند اڇلائي رهيو آهي.هن چيو ته ٻين تي ڪيچڙ اڇلائڻ کان پهريان عمران خان پنهنجي گريبان ۾ جهاتي پائي ڏسي. عمران خان جو ماضي ۽ حال ٻئي داغدار آهن ۽ عوام ان جي بيهوده بيانن کي ناهي ڀلايو،جيڪي هن ملڪ جي اهم ادارن جي باري ۾ ڏنا آهن. شرجيل انعام ميمڻ چيو آهي ته عمران خان ڪنهن به قسم جي غلط فهمي ۾ نه رهي ته آصف علي زرداري پاڪستان واپس نه ايندو. هن چيو ته عمران خان خيبر پختونخواهه کي پئرس بنائڻ جي دعويٰ اڄ سڀ جي سامهون آهي. شرجيل انعام ميمڻ چيو ته عمران خان جي بدقسمتي آهي ته ان جا سڀ الزام ڪوڙ ثابت ٿيا آهن ۽ هن کي يوٽرن جي پاليسي وٺڻي پوي ٿي.

 

دهشتگردي، مني لانڊرنگ، گينگ وار ۾ ملوث وڏا ڪردار ٻين ملڪن ۾ پهچڻ ۾ ڪامياب

ڪراچي (اسٽاف رپورٽر) سنڌ ۾ ڪيل ڪرپشن جو پيسو ڪرپٽ شخصتين کي ٻاهرين ملڪ فرار ٿيڻ ۾ استعمال ٿي رهيو آهي جنهن جي ڪري جاچ ادارن کي گهربل جوابدارن جي گرفتاري ۾ ڏکيائي ٿي رهيو آهي،ڪارين رڍن جي مدد سان ڪرپشن ۾ ملوث وڏا وڏا مانگر مڇ پيسو کارائي ملڪ مان فرار ٿي رهيا آهن، ڪراچي ۾ جاري آپريشن دوران ڪرپٽ آفيسرن ۽ ان کان اڳ دهشتگردي، ٽارگيٽ ڪلنگ، مني لانڊرنگ ۽ گينگ وار ۾ ملوث وڏا وڏا ڪردار پاڪستان مان فرار ٿي ٻاهرين ملڪ پهچي ويا آهن، پاڪستان مان فرار ٿيڻ ۾ مختلف کاتن جي ڪارين رڍن ڳري رشوت وٺي ڪردار ادا ڪيو، سنڌ ۾ 230 ارب رپين جي ڪاري ناڻي ۽ وڏي پيماني تي ڪرپشن ۾ ملوث طاقتورشخصتين جي آس پاس گهيرو تنگ ٿيڻ جو اعلان ٿيندي ئي وڏا وڏا مانگر مڇ فرار ٿي ويا، قادر ڪاڪا، نثار مورائي سميت اهم ماڻهو رستو روڪي نه سگهيا، منظور ڪاڪا گلگت مان چين جي رستي ڪينيڊا هليو ويو، نثار مورائي خليجي رياست هليو ويو، فشري لائيو اسٽاڪ جو اڳوڻو سيڪريٽري لائق ميمڻ جيڪو وڏي غبن ۾ ملوث آهي اهو پهريائين ٻاهرين ملڪ ويٺو آهي، لياري گينگ جو اهم ڪردار عزيز بلوچ آپريشن وقت ٻاهر وڃڻ ۾ ڪامياب ٿي ويو، بابا لاڏلا بابت قانون لاڳو ڪندڙ ادارا اڻ تصديق ٿيل رپورٽ ڏين ٿا ته هو مارجي ويو آهي، ذريعن مطابق عزير بلوچ کي پاڪستان واپس آڻڻ جي ڪوشش ڪئي، ٻين ماڻهن کي پاڪستان آڻڻ لاءِ اڃاتائين ڪي ٺوس قدم نه کنيا ويا آهن.

 

ڪوئيٽا ۾ باچا خان چوڪ ويجهو بم ڌماڪو، هڪ ڄڻو مارجي ويو، عورتن ۽ ٻارڙن سميت 16 ڄڻا زخمي

ڪوئيٽا (بيورو) ڪوئيٽا شهر جي ڪاروباري علائقي باچا خان چوڪ تي بم ڌماڪو، هڪ شخص فوت، عورتن ۽ ٻارڙن سميت 16 ڄڻا زخمي ٿيا، تفصيل مطابق آچر جي منجهند باچا خان چوڪ جيڪو ميزان چوڪ جي نالي سان ياد ڪيو ويندو آهي، اتي بم جو ڌماڪو ٿيو جنهن ۾ هڪ شخص فوت، عورتن ۽ ٻارڙن سميت 16 ڄڻا زخمي ٿيا جن جي حالت ڳڻتي جوڳي ٻڌائي وڃي ٿي، ڌماڪو ايترو زوردار هو جو ويجهن عمارتن جا شيشا ٽٽي پيا، ڪيترن گاڏين کي نقصان ٿيو، ڌماڪي کانپوءِ علائقي ۾ فائرنگ جو آواز ٻڌو ويو، ڌماڪو بلديا پلازه ويجهو ٿيو.

 

ڪراچي ۾ ڪنهن خاص پارٽي کي نشانو بڻائڻ جو تاثر درست ناهي: رانا تنوير حسين

لاهور (اين اين آءِ) وفاقي وزير رانا تنوير حسين چيو آهي ته نيشنل ايڪشن پلان ڪاميابي سان جاري آهي، ڪراچي ۾ بنا فرق ڪارروائي ٿيون رهيون آهن، ڪنهن مخصوص جماعت خلاف ڪارروائي جو تاثر درست نه آهي، پنجاب حڪومت پاران سڄي صوبي ۾ رمضان مارڪيٽن ۾ عوام کي کاڌي پيتي جون شيون سستي اگهه تي ملي رهيون آهن، جيڪو خادم پنجاب شهباز شريف جو عوام دوستي جو چٽو ثبوت آهي، اهڙن خيالن جو اظهار هن آچر تي ڪوٽ عبدالمالڪ ۾ ڊي سي او شيخوپوره ڪرن خورشيد، آرگنائيز مسلم ليگ ن ضلعي شيخوپوره محمد اختر گوريا، حاجي مظفر علي ظفر، ملڪ نويد چوهاڻ سان گڏ رمضان بازار جي موقعي تي ميڊيا سان ڳالهائيندي ڪيو. هڪ سوال جي جواب ۾ هن چيو ته لوڊشيڊنگ کان نجات لاءِ حڪومت پوري ڪوشش ڪري رهي آهي، توانائي کانسواءِ ڪو به ملڪ ترقي نٿو ڪري سگهي.، وزيراعظم محمد نواز شريف توانائي بحران کي حل ڪرڻ لاءِ ڏينهن رات ڪوشش ڪري رهي آهي، ان تي ڪنٽرول ڪرڻ لاءِ حڪومت سمورا وسيلا ڪتب آڻي رهي آهي.

 

وفاداريون تبديل ڪندڙن سان پارٽي تي ڪو به فرق نٿو پوي، خراب وقت جلد ٽري ويندو: اعتزاز احسن

لاهور (اين اين آءِ) پاڪستان پيپلز پارٽي جي مرڪزي اڳواڻ سينيٽر اعتزاز احسن چيو آهي ته وفاداريون تبديل ڪندڙن سان پارٽي ڪو به فرق نٿو پوي، آيل برو وقت جلد ٽري ويندو، نواز شريف پنهنجن پيرن تي پاڻ ڪهاڙي هڻي جو عادي آهي، ملڪ ۾ عام چونڊون 2018 کان اڳ ٿي وينديون، ميڊيا سان ڳالهائيندي هن چيو ته تاريخ گواهه آهن جن شخصيتن پ پ سان بي وفائي ڪئي ان سان پارٽي تي ڪو به فرق نه پيو پر انهن جو سياسي مستقبل هميشه لاءِ اونداهو ٿي ويو، پ پ هڪ سوچ جو نالو آهي،پارٽي ڇڏي ويندڙ سان پ پ جو ڪو نقصان نه ٿيندو، اعتزاز احسن چيو ته عوام جا مسئلا جيئن جو تئين آهن پر حڪمران سڀ ٺيڪ جي رپورٽ ڏئي عوام کي اکين ۾ ڍوڙ وجهي رهيا آهن، لوڊشيڊنگ اڳ کان ڌائي وئي آهي.

 

شهيد ڀٽو جي جمهوري حڪومت تي هنيل راتاهي کي 38 سال مڪمل، پيپلز پارٽي پاران ڪارو ڏهاڙو ملهايو ويو

ڪراچي (نمائندن وٽان) ايشيا جي ماڊل ڊڪٽيٽر جنرل ضياءُ الحق پاران 5 جولاءِ 1977 تي شهيد ذوالفقار علي ڀـُٽي جي چونڊيل حڪومت تي هنيل راتاهي کي 38 سال مڪمل ٿيڻ تي پيپلز پارٽي پاران سڄي ملڪ ۾ ڪارو ڏهاڙو ملهايو ويو، ننڍن وڏن ‎شهرن ۾ جيالن احتجاجي مظاهرا ڪري ريليون پڻ ڪڍيون، دادو ۾ جمهوري حڪومت جو تختو اونڌو ڪرڻ خلاف پي پي سٽي، سپاف ۽ ڪلچرل ونگ پاران ڪارو ڏينهن ملهائيندي ڌار ڌار احتجاجي مظاهرا ڪري پريس ڪلب آڏو مبين جمالي، نصر الله پنهور، صيف الله پنهور جي اڳواڻي ۾ ڌرڻا هنيا . خيرپور ۾ قيوم بروهي، خادم حسين شاھه، زاهد ڳنڀير، عرس ابڙي ۽ ٻين جي اڳواڻي ۾ ٻانهن ۾ ڪاريون پٽيون ٻڌي جيلاني هائوس کان پريس ڪلب تائين احتجاجي ريلي ڪڍي. نوابشاهه ۾ پ پ پاران 5 جولاءِ جي حوالي سان تقريب ڪوٺائي وئي، جنهن کي علي اڪبر جمالي،امداد ڌامراهه، انجنيئر عبدالرسول بروهي ۽ ٻين خطاب ڪيو. ڪنڌڪوٽ ۾ پ پ سنڌ ڪائونسل جي ميمبر گل محمد جکراڻي،غلام رسول ميراڻي ۽ حمزي خان ميراڻي جي اڳواڻي ۾ پ پ آفيس کان گهنٽه گهر چوڪ تائين ڪاريون پٽيون ٻڌي ريلي ڪڍي احتجاجي مظاهرو ڪري ڌرڻو هنيو. هالا ۾ جيالن شهيد ڀٽو هائوس کان سيد حاڪم علي شاهه، ڪامريڊ عثمان،گيدوڙي سنڌي ۽ حاجي امير بخش سولنگي جي اڳواڻي ۾ ٻانهن تي ڪاريون پٽيون ٻڌي ريلي ڪڍي نعريبازي ڪئي. مدئجي ۾ پ پ ڪارڪنن عبدالحميد ميمڻ ۽ رجب جوڻيجي جي اڳواڻي ۾ ريلي ڪڍي وئي. ڪنري ۾ بلاول ورڪرز آرگنائيزيشن طرفان تعلقي صدر عباس علي رند جي اڳواڻي ۾ ڪارڪنن جو ميڙاڪو ڪوٺايو ويو. مختلف شهرن ۾ ڪوٺايل احتجاجي مظاهرن ۽ تقريبن کي خطاب ڪندي پ پ اڳواڻن چيو ته 5 جولاءِ تي فوجي آمر چونڊيل وزيراعظم جو تختو اونڌو ڪري اونداهيءَ جو راڄ قائم ڪيو. هنن چيو ته جنرل ضياءُ الحق پاران جمهوريت تي هنيل راتاهي ۽ آمريتي راڄ جا اثر قوم اڄ به ڀوڳي رهي آهي. پ پ اڳواڻن ۽ ڪارڪنن ان عزم جو اظهار ڪيو ته عوامي راڄ جي بالادستيءَ لاءِ ڪنهن به قربانيءَ کان نه ڪيٻايو ويندو .

 

قانون لاڳو ڪندڙ ادارن جو مختلف علائقن ۾ ٽارگيٽيڊ ڪارروائيون، سياسي پارٽي جي ڪارڪنن سميت 50 کان وڌيڪ گرفتار

ڪراچي (اين اين آءِ) قانون لاڳو ڪندڙ ادارن جون مختلف علائقن ۾ ٽارگيٽيڊ ڪارروايون سياسي پارٽي جي ڪارڪنن سميت 50 کان وڌيڪ ماڻهن کي گرفتار ڪري ورتو جڏهن ته گارڊن شو مارڪيٽ مان گرفتار جوابدار جي نشاندهي تي وڏي مقدار ۾ هٿيار هٿ ڪيا ويا تفصيل مطابق ڪراچي جي مختلف علائقن ۾ رينجرز ۽ پوليس جون ڪارروايون جاري آهن ڪارروائين دوران 50 کان وڌيڪ ماڻهو گرفتار ڪيا ويا.  رينجرز ملير جناح اسڪوائر ويجهو ڇاپو هنيو سياسي جماعت جي ڪارڪنن کي گرفتار ڪري اڻڄاتل هنڌ تي منتقل ڪري ڇڏيو هوڏانهن پوليس سچل جي علائقي بکر ٽائون ۾ سرچ آپريشن ڪري 45 ماڻهو گرفتار ڪري هٿيار ۽ منشيات هٿ ڪري ورتي اهي اورنگي ٽائون جي علائقي پاڪستان بازار ۾ پوليس مقابلي کان پوءِ پابندي پيل تنظيم جي جوابار عليم کي زخمي حالت ۾ گرفتار ڪيو ويو جڏهن ته ان جو ساٿي فرار ٿي ويا جوابدار وٽان هٿيار ڊيٽونيٽر ۽ بال بم هٿ ڪيو ويو آهي مومن اباد جي علائقي ۾ پوليس منشيات وڪرو ڪندڙ کي گرفتار ڪري منشيات هٿ ڪري ورتي جڏهن ته جوابدار جا ٻه ساٿي ٻه ڪلوگرام چرس ۽ موٽر سائيڪل ڇڏي فرار ٿي ويا ٻئي پاسي گارڊن شو مارڪيٽ ۾ رينجرز ڇاپو هڻي وڏي مقدار ۾ هٿيار هٿ ڪري ورتا آهن ڇاپو گلستان شميم مان گرفتار ڪيل سياسي پارٽي جي عهديدارن جي نشاندهي تي هنيو ويو ڪراچي جي علائقي ملير جناح اسڪوائر ويجهو رينجرز مسجد تي ڇاپو هڻي پيش امام ريحان چشتي سميت 4 ڄڻن کي گرفتار ڪري ورتو جنهن کان پوءِ علائقي واسي ۽ گهرڀاتين سخت احتجاج ڪيو رينجرز ۽ علائقي واسين جي ڪامياب ڳالهين کان پوءِ احتجاج ختم ڪيو ويو علائقي واسين جو چوڻ آهي ته اسان جي رينجرز عملدارن سان ڳالهه ٻولهه ٿي آهي جنهن جو چوڻ آهي ته قانوني ڪارروائي کان پوءِ پيش امام کي ڇڏيو ويندو.

 

پرويز مشرف جو طاهر القادري سان ٽيليفونڪ رابطو، ملڪ جي موجوده صورتحال تي خيالن جي ڏي وٺ

لاهور (بيورو) آل پاڪستان مسلم ليگ جي سربراهه ۽ اڳوڻي صدر پرويز مشرف، عوامي تحريڪ جي سربراهه ڊاڪٽر طاهر القادري سان ٽيليفونڪ رابطو ڪري ملڪ جي موجوده صورتحال تي خيالن جي ڏي وٺ ڪئي. ذريعن مطابق ٻنهي اڳواڻن ۾ ٿيل تيليفونڪ رابطي ۾ پرويز مشرف ڊاڪٽر طاهر القادري کان صحت بابت معلومات حاصل ڪرڻ سان گڏ کيس ڪراچي جي دوري جي دعوت پڻ ڏني، ذريعن مطابق ٽيليفونڪ رابطي ۾ ٻنهي اڳواڻن ملڪ جي مجموعي صورتحال سميت عوام کي درپيش مسئلن مهانگائي، بيروزگاري ۽ لوڊشيڊنگ تي به ڳالهايو.

 

اسانجي وڪيل ثابت ڪري ڇڏيو ته عام چونڊن ۾ 35 نه 70 پنچر هنيا ويا: عمران خان

ڪراچي (اسٽاف رپورٽر) تحريڪ انصاف جي سربراهه عمران خان چيو آهي ته 35 پنچرن جي دعويٰ جي پنهنجي بيان تي اڃا به قائم آهيان جڏهن ته جوڊيشل ڪميشن ۾ اسانکي خبر پئي ته عام چنڊن ۾ 35 نه پر 70 پنچر لڳايا ويا. ڪراچي ۾ ميڊيا سان ڳالهائيندي عمران خان جو چوڻ هو ته جوڊيشل ڪميشن ۾ اسان ثابت ڪري ڇڏيو ته عام چونڊن ۾ ڌانڌلي ٿي جڏهن ته پنجاب ۾ رٽرننگ آفيسرن اليڪشن ڪرائي جنهن ذريعي ڌانڌلي ڪئي وئي ۽ جوڊيشل ڪميشن ۾ اسانجي وڪيل عبدالحفيظ پيرزادي ثابت ڪري ڇڏيو آهي ته چونڊن ۾ 35 نه پر 70 پنچر لڳايا ويا. هن چيو ته اصل ڌانڌلي پنجاب ۾ ٿي جتي حڪومت نجم سيٺي کي نوازيندي 2 ڀيران چيئرمين پي سي بي بڻايو ملڪي تاريخ ۾ پهريو ن ڀيرو ڪميشن ڌانڌلي جا جانچ ڪري رهي آهي ۽ جوڊيشل ڪميشن جو جيڪو به فيصلو ايندو اُهو قبول هوندو جنهن سان ملڪ ۾ جمهوريت اڳتي وڌندي. هن چيو ته سنڌ ۾ ڪرپشن جا سمورا رڪارڊ ٽٽي ويا آهن انهيءَ لاءِ صوبي ۾ افراتفري آهي جڏهن ته آصف زرداري وزيراعظم نوازشريف جي ايما تي فوج خلاف بيان ڏنو جڏهن اُن کي پوئتي هٽندي ڏٺو ته دبئي وڃي ويهي رهيو آهي. هن چيو ته ڀارتي خفيه ايجنسي ”را“ جي اڳوڻي سربراهه ترديد ناهي ئي ته هو ايم ڪيو ايم کي پيسا ڏيندا هئا، جيڪڏهن ايم ڪيو ايم منهنجي خلاف ڪيس ڪري سگهي ٿي ته بي بي سي خلاف به عدالت ۾ وڃي.