تازيون خبرون

Monthly Archives: July 2015

برف تيزي سان پگهرجڻ ۽ برساتن سبب تباهي آئي آهي: نواز شريف

گلگت بلتستان (مانيٽرنگ ڊيسڪ) وزيراعظم نواز شريف پاران گلگت  بلتستان جي ٻوڏ متاثر علائقي گهانچي جي نئين سر تعمير لاءِ 50 ڪروڙ، ٻوڏ سبب فوت ٿيلن جي وارثن کي 5-5 لک ۽ گهرن جي تعمير لاءِ اڍائي لک رپيا ڏيڻ جو اعلان ڪري ڇڏيو آهي،  وزيراعظم چيو ته برف تيزي سان پگهرجڻ ۽ برساتن سبب تباهي آئي آهي، متاثرن جي بحالي ۾ ڪا به ڪسر نه ڇڏي ويندي. گلگت بلتستان جي علائقي گهانچي ۾ ٻوڏ متاثرن کي خطاب ڪندي وزيراعظم نواز شريف چيو ته هـُو گلگت جي عوام جو ٿورائتو آهي، جن ن ليگ جي اميدوارن کي ووٽ ڏنا، عوام جي ووٽن جي ڪري ئي اڄ گلگت بلتستان ۾ مسلم ليگ ن جي حڪومت آهي.  وزيراعظم چيو ته هن وقت ملڪ جي اڪثر حصن ۾ ٻوڏ جي صورتحال، پاڪ فوج، سول انتظاميه ۽ ٻيا ادارا متاثرن جي بحالي ۾ مصروف آهن، جنهن تي هـُو کين سلام پيش ڪري ٿو. وزيراعظم چيو ته تيزي سان برف پگهرجڻ ۽ برساتن سبب ٻوڏ آهي پر الله جو شڪر آهي ته ٻوڏ سبب گهٽ تباهي آئي آهي. هن چيو ته ٻوڏ متاثر علائقن جو دورو ڪيو ۽ نقصانن جو ڪاٿو لڳايو آهي، حڪومت گهانچي جي نئين سر بحالي لاءِ 50 ڪروڙ رپيا فراهم ڪندي. وزيراعظم نواز شريف ٻوڏ دوران فوت ٿي ويلن جي وارثن لاءِپنج-پنج لک ۽ هر زخمين لاءِ ڏيڍ لک رپين جو اعلان ڪندي چيو ته ٻوڏ سبب جن جي گهرن کي نقصان پهتو آهي، انهن کي اڍائي اڍائي لک رپيا ڏنا ويندا، جڏهن ته جن جو چوپايو مال مري ويو آهي، انهن کي به 15 کان 50هزار تائين معاوضو ڏنو ويندو. وزيراعظم چيو ته خوشحالي جو دور گلگت بلتستان جي تقدير بدلائي ڏيندو، ماضي ۾ گلگت جي بجيٽ اسلام ۾ منظور ٿيندي هئي پر هاڻي گلگت قانون ساز اسيمبلي ۾ ئي ٿيندي آهي.

 

گهرو کاتي ڪراچي آپريشن ۽ ملڪ ۾ رهندڙ پرڏيهين جا تفصيل قومي اسيمبلي ۾ پيش ڪري ڇڏيا

اسلام آباد (بيورو) گهرو کاتي، ڪراچي آپريشن ۽ ملڪ ۾ رهندڙ پرڏيهين جا تفصيل قومي اسيمبلي ۾ پيش ڪري ڇڏيا، پي ٽي آءِ  ترجمان شيرين مزاري چيو آهي ته حڪومت افغان طالبان اڳواڻ ملا عمر جي معاملي تي پارليامينٽ کي اعتماد ۾ وٺي،  پ پ جي رميش لال جو چوڻ هو ته چترال ۾ لاڙڪاڻي واسي چار ڄڻا ٻڏي ويا آهن، جن جي ڳولا ۾ مدد ڪئي وڃي. قومي اسيمبلي جو اجلاس اسپيڪر سردار اياز صادق جي صدارت هيٺ ٿيو، جنهن ۾ مختلف معاملن تي بحث ڪيو ويو. اجلاس ۾ گهرو کاتي پاران آمريڪا سميت  پاڪستان ۾ رهندڙ مختلف ملڪن جي شهرين جا تفصيل قومي اسيمبلي ۾ پيش ڪيا ويا. گهرو کاتي لکت ۾ ايوان کي آگاهي ڏيندي چيو ته پاڪستان ۾ رهندڙ پرڏيهين ۾ سڀ کان وڌيڪ انگ افغان شهرين جو آهي، هڪ لک 16 هزار 308 افغان شهري پاڪستان ۾ رهيل آهن.گهرو کاتي موجب 79 هزار 447 برطانوي شهري، 52 هزار 46 آمريڪي، 17 هزار 230 ڪينڊا ۽ ڀارت جا 16 هزار 501 شهري پاڪستان ۾ موجود آهن. گهرو کاتي ڪراچي آپريشن جي ڪاميابين کان ايوان کي آگاهي ڏيندي چيو ته شهر ۾ ٽارگيٽڊ آپريشن کانپوءِ ٽارگيٽ ڪلنگ جي واقعن ۾ 43 سيڪڙو گهٽٽائي آئي آهي. گهرو کاتي موجب، ڪراچي آپريشن دوران قتل جي واقعن ۾ 37 سيڪڙو گهٽتائي ٿي، جڏهن ته دهشتگردي جا واقعا به 6 ڏهائي 7 سيڪڙو گهٽيا آهن. گهرو کاتي جو چوڻ آهي ته ڪراچي آپريشن دوران 58 هزار 630 ڏوهارين ۽ 630 اشتهارين کي گرفتار ڪيو ويو. ايوان کي ٻڌايو ويو ته ڪراچي آپريشن دوران 713 مفرور، 118 دهشتگرد ۽ پنج سئو سترنهن ڀتي خورن کي گرفتار ڪيو ويو آهي. تحريڪ انصاف جي شيرين مزاري افغان طالبان جي سربراهه مــُـلا عمر جي مارجڻ واري معاملي بابت پارليامينت کي آگاهه ڪرڻ جو مطالبو ڪيو. هن چيو ته حڪومت ايوان کي آگاهه ڪري ته ملا عمر جو واقعو ڪڏهن ۽ ڪيئن پيش آيو، قوم گمراهه ڪرڻ بدران حقيقت سامهون آندي وڃي. هن چيو ته پرڏيهي وزير ملڪ ۾ موجود ئي ناهي، افغان طالبان اڳواڻ ملا عمر جي معاملي تي حڪومت قومي اسيمبلي کي اعتماد ۾ ناهي ورتو، جيڪو مذمت جوڳو عمل آهي. پيپلز پارٽي جي رميش لال چيو ته چترال ۾ ٻوڏ تباهي مچائي ڇڏي آهي، حادثي ۾ لاڙڪاڻي واسي چار ڄڻا ٻڏي ويا آهن، جن مان رڳو ٽن جا لاش ملي سگهيا آهن. رميش لال وڌيڪ چيو ته مقامي حڪومت ٻڏي ويل ڊرائيور جي ڳولا ۾ مدد نه پئي ڪري جيڪا وڏي ناانصافي آهي.

 

جيڪڏهن ملڪ ۾ ايڌي جهڙا ادارا نه هجن ها ته ماڻهن جا لاش روڊن تي پيا هجن ها: سپريم ڪورٽ

ڪراچي (اسٽاف رپورٽر) سپريم ڪورٽ ٿرپارڪر ۾ گذريل مهيني ڏڪار ۽ بيمارين واري صورتحال ۾ مري ويندڙ 100 کان وڌيڪ ٻارڙن واري ڪيس جي ٻڌڻي ڪئي. عدالت ۾ سيڪريٽري صحت پاران عدالت ۾ رپورٽ پيش ڪئي وئي. عدالت رپورٽ تي عدم اعتماد ظاهر ڪري ڇڏيو. سپريم ڪورٽ ڪراچي رجسٽري ۾ جسٽس امير هاني مسلم جي سربراهي ۾ جسٽس مشير عالم ۽ جسٽس مقبول باقر تي ٻڌل 3 رڪني بينچ  ريمارڪس ڏيندي چيو ته اوهان اسان کي سبز باغ ڏيکاري رهيا آهيو، اهي سبز باغ نه ڏيکاريو. عدالتي بينچ پنهنجي ريمارڪس ۾ وڌيڪ چيو ته ٿر اندر اسپتالن ۾ ڊاڪٽر نه آهن نه ئي دوائون آهن، ٻيو ته ٺهيو پر ڪراچي جي جناح اسپتال جي اهڙي حالت آهي جو هت گٽر پيا وهن، ماڻهو اسپتال مان پٽي نٿا ڪرائي سگهن. عدالت جو چوڻ هو ته ماڻهو مرن پيا انهن لاءِ اوهين ڪفن نٿا ڏيئي سگهو، هاڻ مري ويلن کي اوهين ته زمين به نٿا ڏئي سگهو، جيڪڏهن ملڪ ۾ ايڌي جهڙا ادارا نه هجن ها ته ماڻهن جا لاش روڊن تي پيا هجن ها. عدالت حڪم جاري ڪندي چيو ته ايندڙ ٻڌڻي تي سنڌ جي سموري اسپتالن جي بجيٽ بابت تفصيلي رپورٽ سان گڏ اسپتالن کي ڪيتريون دوائون ڏنيون وڃن ٿيون ان لاءِ ڪيتري رقم ڏني وڃي ٿي، مڪمل تفصيلي رپورٽ پيش ڪئي وڃي.

 

حڪومت کي پي ٽي آءِ جي حق ۾ ووٽ ڏيڻ گهرجي، ٻي صورت ۾ اهو معاملو حڪومت جي ڳچيءَ ۾ پئجي سگهي ٿو: خورشيد شاهه

اسلام آباد (بيورو) پيپلزپارٽي ، تحريڪ انصاف جي ميمبرز کي نااهل قرار ڏيڻ واري رٿ جي پارليامينٽ ۾ مخالفت جو اعلان ڪري ڇڏيو، اپوزيشن ليڊر خورشيد شاهه چيو آهي ته حڪومت کي پي ٽي آءِ جي حق ۾ ووٽ ڏيڻ گهرجي، ٻي صورت ۾ اهو معاملو حڪومت جي ڳچيءَ ۾ پئجي سگهي ٿو. پارليامينٽ هائوس ٻاهران ميڊيا سان ڳالهائيندي اپوزيشن ليڊر خورشيد شاهه چيو ته تحريڪ انصاف جي ميمبرز  کي نااهل قرار ڏيڻ بابت رٿ جي پارليامينٽ ۾مخالفت ڪئي ويندي. هن چيو ته سياسي پارٽي کي پارليامينٽ مان نيڪالي نه ڏيڻ گهرجي، تحريڪ انصاف جا ميمبر حڪومت سان ٿيل معاهدي تحت ايوان ۾ واپس اچي پنهنجو ڪردار ادا ڪن. خورشيد شاهه چيو ته پي ٽي آءِ ميمبرز جي نااهلي واري رٿ تي اتفاق راءِ پيدا نه ڪرڻ حڪومت جي ڪوتاهي آهي. هڪ سوال جي جواب ۾ اپوزيشن ليڊر چيو ته حڪومت کي تحريڪ انصاف جي ميمبرز جي حق ۾ ووٽ ڏيڻ گهرجي، ٻي صورت ۾ اهو معاملو حڪومت جي ڳچيءَ ۾ پئجي سگهي ٿو.

 

ڪور ڪمانڊر ڪراچي ليفٽيننٽ جنرل نويد مختار وڏي وزير سيد قائم علي شاهه سان ملاقات

ڪراچي (اسٽاف رپورٽر) ڪور ڪمانڊر ڪراچي ليفٽيننٽ جنرل نويد مختار وڏي وزير سيد قائم علي شاهه سان ملاقات ڪري اپيڪس ڪميٽي جي فيصلن تي عملدرآمد بابت خيالن جي ڏي وٺ ڪئي. ڪور ڪمانڊر ڪراچي ليفٽيننٽ جنرل نويد مختار سي ايم هائوس ۾ وڏ وزير سيد قائم علي شاهه سان ملاقات ڪري ڪراچي ۾ جاري آپريشن، امن امان جي صورتحال ۽ اپيڪس ڪميٽي جي فيصلن تي عملدرآماد بابت ڳالهه ٻولهه ڪئي. ملاقات دوران وڏي وزير قائم علي شاهه  بندن جي نگراني/ڪندڙ پاڪ فوج جي جوانن جي واکاڻ ڪئي.

 

پرڏيهي آفيس گورداس حملي ۾ پاڪستان جي ملوث هئڻ جي ڀارتي الزامن کي رد ڪري ڇڏيو

اسلام آباد(اي پي پي) پرڏيهي آفيس گورداس حملي ۾ پاڪستان جي ملوث هئڻ جي ڀارتي الزامن کي رد ڪندي چيو آهي ته جاچ کان سواءِ الزام هڻڻ ڪو صحتمند رجحان ناهي. پرڏيهي آفيس جي ترجمان قاضي خليل الله خميس ڏينهن هتي هفتيوار پريس بريفنگ دوران چيو ته پاڪستان پاڻ دهشتگردي جو شڪار ٿيو آهي. اها ڳالهه افسوس ناڪ آهي ته ڀارتي ميڊيا پاڪستان تي الزام هڻڻ شروع ڪري ڇڏيا آهن جڏهن ته حملو ڪندڙن خلاف ڪارروائي اڃا جاري آهي. هن چيو ته پاڪستان گرداس پور حملي جي سخت لفظن ۾ مذمت سان اڳ ۾ ئي هڪ بيان جاري ڪيو آهي. هن چيو ته پاڪستان گڏيل احترام تي ٻڌل ناتن کي معمول تي آڻڻ لاءِ سڀني قدمن جو پڪو عزم ڪيو آهي ۽ جٽادار ڳالهين جي عمل ذريعي سڀني حل طلب معاملن جي نبيري جو ٺوس عزم رکي ٿو. ترجمان چيو ته ڀارت طرفان سيز فائر جي خلاف ورزي تي پاڪستان ٻه بيان جاري ڪيا جنهن ۾ پاڪستان جي هوائي حدن ۾ داخل ٿيل هڪ ڊرون کي ڪيرائڻ بابت بيان به شامل آهي. هن چيو ته جڏهن به ڪنٽرول لائين يا ورڪنگ بائونڊري تي سيز فائر جي خلاف ورزي ٿي ته اسان ڳڻتي جو اظهار ڪنداسين. پرڏيهي ترجمان چيو ته ڀارت ۾ پاڪستان جي هاءِ ڪمشنر ڀارتي پنجاب ۽ هريانه جو پنهنجو دورو ملتوي ڪيو ڇو ته ڀارت هاءِ ڪميشن جي ٻن آفيسرن ۽ هڪ ڊرائيور کي دوري جي اجازت ڏيڻ کان انڪار ڪيو هو جيڪي هاءِ ڪمشنر سان گڏ وڃي رهيا هئا. طالبان اڳواڻ ملا عمر جي مارجڻ جي خبرن بابت ترجمان چيو ته پاڪستان انهن خبرن جي تصديق ڪري رهيو آهي. گڏيل قومن جي جنرل اسيمبلي جي ايندڙ اجلاس ۾ پاڪستان جي موقف بابت ترجمان چيو ته پاڪستان پنهنجي قومي مفاد جي تحفظ لاءِ ڪنهن به ايشو تي پنهنجي ڳڻتي جي اظهار جو حق رکي ٿو ۽ ان سلسلي ۾ سڀئي ضروري قدم کڻندو.

 

ڪا به سياسي ٻوڏ نه پئي اچي، عمران خان ڪالاباغ ڊيم وارو خواب ڏسڻ ڇڏي ڏي: نثارکهڙو

ڪراچي (اسٽاف رپورٽر) سماءَ ۽ آبپاشي واري صوبائي وزير نثارکهڙي چيو آهي ته صوبي ۾ ٻوڏ واري  صورتحال آهي پر ڪا به سياسي ٻوڏ نه پئي اچي، عمران خان ڪالاباغ ڊيم وارو خواب ڏسڻ ڇڏي ڏي. نثار کهڙي پنهنجي جاري ڪيل بيان ۾ چيو آهي ته ملڪ ۾ جمهوريت آهي ۽ رهند، جڏهن ته هاڻ سونامي چوندڙن جي به هوا نڪري وئي آهي. صوبائي وزير چيو ته عمران خان اڳ اسلام آباد کي فريز ڪيو ۽ هاڻ هو پاڻ بند گهٽي ۾ ڦاسي پيو آهي. نثار کهڙي چيو ته عمران خان جو ڪالاباغ ڊيم وارو خواب ڪڏهن به پورو نه ٿيندو، ڊيم جي ڳالهه عمران خان ڪري يا ڪو ٻيو پر ڪنهن به صورت ۾ ٺهڻ نه ڏبو.  آبپاشي واري صوبائي وزير چيو ته ڪالاباغ ڊيم بجاءِ ڀاشا ڊيم تعمير ڪيو وڃي. هن چيو ته سنڌ جي سمورن بندن تي نگراني وارو عمل تيز ڪيو ويو آهي، 6 کان ست لک ڪيوسڪ پاڻي اچي سگهي ٿو.

 

افغان طالبان شوريٰ مُلا عمر جي مارجڻ جي تصديق ڪري ڇڏي، مُلا اختر محمد منصور نئون امير مقرر

ڪابل (مانيٽرنگ ڊيسڪ) افغان طالبان شوريٰ مُلا عمر جي مارجڻ جي تصديق ڪري ڇڏي، مُلا عمر جي جاءِ تي مُلا اختر محمد منصور افغان طالبان جو نئون امير مقرر، مُلا اختر طالبان سربراهه مُلا عمر جو نائب هو.. افغان طالبان جي شوريٰ جو اجلاس گذريل شام ٿيو، جنهن ۾ طالبان شوريٰ جي اهم اڳواڻن شرڪت ڪئي. افغان طالبان جي هڪ اهم اڳواڻ پرڏيهي خابرو اداري سان ڳالهائيندي مُلا عمر جي مارجڻ جي تصديق ڪئي، جڏهن ته اجلاس ۾ اتفاق راءِ سان ملا اختر محمد منصور کي ملا عمر جي جاءِ تي نئون امير مقرر ڪيو ويو. افغان طالبان جو موقف سامهون آيو آهي ته مُلا عمر 2013 ۾ دل جي دوري سبب فوت ٿي ويو هو. مُلا اختر محمد منصورر 1996 کان 2001 تائين افغانستان ۾ طالبان جي حڪومت دوران سول ايوي ايشن جو وزير رهي چڪو آهي، طالبان جو اهم ڪمانڊر مُلا اختر مُلا عمر جو نائب هو. ڪنڌار واسي مُلا اختر مُلا عمر جي تمام ويجهو هو، جنگ سميت سمورن فيصلن ۾ مُلا اختر جي رضامندي اهم سمجهي ويندي هئي، اهم فيصلا سندس رضامندي سان ٿيندا هئا

 

انڪوائري ڪميشن جي رپورٽ تي اعتماد آهي، پر ڪرپٽ آر اوز خلاف ڪارروائي نه ٿيڻ تي ڏک پهتو: عمران خان

اسلام آباد (بيورو) تحريڪ انصاف جي سربراهه عمران خان چيو آهي ته انڪوائري ڪميشن جي رپورٽ تي اعتماد آهي، پر ڪرپٽ آر اوز خلاف ڪارروائي نه ٿيڻ تي کيس ڏک پهتو آهي. لاهور ۾ ميڊيا سان ڳالهائيندي عمران خان چيو ته انڪوائري ڪميشن پي ٽي آ ءِ مطالبي تي قائم ٿي، پر جاچ درست طريقي سان نه ٿي سگهي. هن چيو ته تحريڪ انصاف جڊيشل ڪميشن ۾ ڌانڌلين بابت جوڳا ثبوت پيش ڪيا، ڪميشن اهو واضح نه ڪيو ته آر اوز اختيارين جو غلط استعمال ڪيو يا نه؟. هن چيو ته انڪوائري ڪميشن جو فيصلو جمهوريت جي مضبوطي جو ثبوت آهي، کين ماضيءَ جي غلطين مان سبق سکڻو پوندو. عمران خان چيو ته دنيا جي تاريخ ۾ ڪڏهن به 126 ڏينهن ڌرڻو ناهي لڳو، پي ٽي آءِ واحد پارٽي آهي، جنهن ڪي پي ڪي ۾ مڪاني چونڊون شفاف طريقي سان ڪرايون عمران خان وڌيڪ چيو ته الزام مڙهيندڙن جي تسلي لاءِ ڪي پي ڪي ۾ ٻيهر چونڊ ڪرائي پئي وڃي، جمهوريت جي مضبوطي لاءِ پي ٽي آءِ هر قدم کڻڻ لاءِ تيار آهي.

 

ايان علي جي ذريعي ٻاهرين ملڪ موڪلي ويندڙ رقم دهشتگردي ۾ استعمال ٿيڻ جا ڳجها اطلاع

راولپنڊي (بيورو) ماڊل ايان علي جي ذريعي ٻاهرين ملڪ موڪلي ويندڙ رقم دهشتگردي يا ان ۾ معاونت ۾ استعمال ٿيڻ جا ڳجها اطلاع مليا آهن حساس ادارن ماڊل گرل کي مني لانڊرنگ ڪيس جي جاچ ۾ ڌر بنائڻ لاءِ گهرو وزارتکي خط لکي ڇڏيو خانگي ٽي وي مطابق حساس اداري خدشو ظاهر ڪندي گهرو وزارت کي خط اماڻيو ته سپر ماڊل ايان علي ذريعي ٻاهرين ملڪ موڪلي ويندڙ رقم سان دهشتگردي يا دهشتگردن جي مدد جا ڳجها اطلاع مليا اهن ان سبب ايان علي جي خلاف تفتيش هيٺ ڪيس جي جاچ وڌائيندي حساس اداري کي جاچ ۾ در بڻايو وڃي. گهرو وزارت پاران ايان علي جو نالو ايگزٽ ڪنٽرول لسٽ ۾ نه هئڻ تي ملڪ جي سمورن ايئرپورٽس کي آگاهه ڪيو ته ايان علي ٻاهرين ملڪ وڃڻ جي ڪوشش تي فوري طور تي گهرو وزارت کي آگاهه ڪيو وڃي اعليٰ عملدارن جي منظوري بنا ايان علي کي ٻاهرين ملڪ نه وڃڻ ڏنو وڃي.