تازيون خبرون

Daily Archives: June 17, 2015

ڪراچي ۾ گرين لائين منصوبي لاءِ 5 ارب رپيا جاري ڪري ڇڏيا آهن: وزير اعظم

اسلام آباد(بيورو) وزيراعظم نواز شريف ڪراچي ۾ مک مرڻ بابت ڏنل بيان جي وضاحت ڪندي چيو آهي ته مک مرڻ جي ڳالهه گورنر شروع ڪئي هئي، هُن صرف ان ڳالهه کي ورجائيندي گورنر کي چيو ته هاڻ هڙتالون نه ٿيڻ گهرجن، ڪي فور منصوبي لاءِ سنڌ حڪومت سان گڏ وفاق به گرانٽ ڏيندو. قومي اسيمبلي ۾ خطاب ڪندي وزيراعظم نواز شريف چيو ته ڪراچي ۾ مک مرڻ جي ڳالهه هن شروع نه ڪئي هئي، گورنر کيس چيو هو ته ڪراچي ۾ مک مري ٿي ته به احتجاج ڪيو وڃي، جنهن تي هن گورنر کي چيو ته هاڻ هڙتال نه ٿيڻ گهرجي، اميد آهي ته سندس وضاحت سان رشيد گوڊيل مطمئن ٿي ويو هوندو. وزيراعظم نواز شريف چيو ته وفاق ڪراچي جي منصوبن تي ڌيان ڏئي رهيو آهي، گرين لائين منصوبي لاءِ 5 ارب رپيا جاري ڪري ڇڏيا آهن، منصوبي تي 25 ارب رپيا لاڳت ايندي، پاڻي جي منصوبي لاءِ 2 ارب رپيا رکيا آهن،ڪراچي کان حيدرآباد موٽروي جو ڪم به شروع ٿي چڪو آهي، جيڪو ٻن سالن ۾ مڪمل ٿي ويندو. نواز شريف جو چوڻ هو ته ڪي فور منصوبو مڪمل طور تي سنڌ حڪومت جي ذميواري آهي، پر وفاق پوءِ به سنڌ حڪومت کي رقم ڏيندو، گرين لائين منصوبو سنڌ جي عوام لاءِ وفاق جو تحفو آهي. وزيراعظم جو چوڻ هو ته هو پاڪستان کي وچ ايشيائي رياستن سان ملائڻ چاهين ٿا، ملڪ ۾ ترقي جو نئون دور شروع ٿي چڪو آهي، وفاقي حڪومت صوبن سان گڏجي منصوبا شروع ڪري رهي آهي.

 

هوشياري ڪردارڪشي ڪئي وئي ته سڄو ڪچو چٺو کولي ڇڏيندس: آصف زرداري

اسلام آباد(بيورو) پاڪستان پيپلز پارٽي جي شريڪ چيئرمين آصف علي زرداري چيو آهي ته جنهن ڏينهن هو اٿي کڙو ٿيو صرف سنڌ جا رستا ئي نه ڪراچي کان خيبر تائين سڀ ڪجهه بند ڪري ڇڏينداسين. اسلام آباد ۾ پاڪستان پيپلز پارٽي قبائلي علائقن جي عهديدارن کي قسم کڻائڻ واري تقريب کي خطاب ڪندي آصف زرداري چيو ته کين تنگ نه ڪيو وڃي، هو سخت جواب ڏيندا. آصف زرداري چيو ته هو رستن تي نڪتو ته سڀ ڪجهه ٺپ ٿي ويندو. هن چيو ته محترما بينظير ڀٽو جي شهادت تي هن چيو هو ته پاڪستان کپي ، پر صبر جي حد ٿيندي آهي. هن چيو ته سندن معاملن ۾ سڌي مداخلت ڪئي پئي وڃي.هنن وٽ لسٽون ته اسان وٽ به آهن. هن چيو ته آر او اليڪشن ئي سهي پر ملڪ ۾ جمهوريت ته آهي. آصف زرداري چيو ته هن کان طاقت ذريعي ورتل وزير اعظم جي ڪرسي سان ڪو به مطلب ناهي. هن چيو ته سياسي اداڪارن پرويز مشرف کي به کٽرايو هو. هن چيو ته پيپلز پارٽي سدائين سياست ۾ هاڪاري ڪردار ادا ڪيو آهي. زرداري چيو ته هن مشرف جي دور ۾ 5 سال جيل ۾ گذاريا،پر مشرف ٽي مهينا به جيل ۾ رهڻ لاءِ تيار ناهي. هن چيو ته مشرف کي به خبر ناهي ته ملڪ کي ڪهڙا خطرا آهن. هن چيو ته بي آءِ ايس پي جو مقصد اٽو، لٽو ۽ اجهو ئي هو. هن چيو ته ڪجهه ماڻهن کي ٻيهر پاور پاليٽڪس جون امنگون اڀرندي نظر اچن پيون. هن چيو ته هن جو سياست سان نه پر عوام جي خدمت سان واسطو آهي. هن چيو ته ملڪ ۾ جهڙي به آهي پر جمهوريت ته آهي. هن واضح ڪيو ته جيڪڏهن ڪپتان سان گڏ استعيفيٰ ڏيون ها ته ٻيهر چونڊون ٿي وڃن ها. اڳوڻي صدر چيو ته سياسي اداڪار پاڻ ارب پتي بڻجي سياست بدلڻ گهري ٿو. هن چيو ته جنهن ڏينهن هنن لسٽ ڏيکاري ته پوءِ جرنيلن جو ڇا ٿيندو. آصف زرداري چيو ته سندن ڪردار ڪشي بند نه ڪئي وئي ته جرنيل جي پت وائکي ڪنداسين. پيپلز پارٽي جي شريڪ چيئرمين چيو ته فوج سندن ادارو آهي، انهن کي فقط 3 سال رهڻو آهي. هو هر معاملي ۾ مداخلت ڪري رهيا آهن. هن چيو ته هنن وٽ اهڙا ماڻهو آهن، جيڪي نه ڪڏهن وڪامبا ۽ نه وڪيا آهن. زرداري چيو ته سينيٽ جي چونڊ دوران وفاداري تبديل ڪرڻ عيوض آخوند زادهه چٽان کي 24 ڪروڙ رپيا آڇيا ويا هئا.پر هو نه وڪاميو. هن خبردار ڪيو ته کين تنگ نه ڪيو وڃي ،هو ملڪ ٺهڻ کان وٺي جرنيلن جو اڇو چٺو پڌرو ڪندو. هن چيو ته جنگ ڪرڻ ڪنهن ٻئي کي نه صرف کين ايندي آهي. هن اهم ڌر ڏانهن اشارو ڪندي چيو ته بندش پيل تنظيمون ڪنهن جي اشاري تي اينديون رهيو آهن، ان جي کين خبر آهي. هن چيو ته جن جيل جو گرم پاڻي ناهي پيتو، انهن کي جمهوريت جو ڪهڙو قدر؟

 

وفاقي حڪومت پاران پرڏيهي اين جي اوز جي ٽن مهينن اندر رجسٽريشن ڪرائڻ ۽ لاڳاپيل قانون جي تابع آڻڻ جو فيصلو

اسلام آباد(بيورو) وفاقي حڪومت سڄي ملڪ ۾ ڪم ڪندڙ پرڏيهي اين جي اوز جي ٽن مهينن اندر رجسٽريشن ڪرائڻ ۽ کين لاڳاپيل قانون جي تابع آڻڻ جو فيصلو ڪيو آهي. وزيراعظم نواز شريف جي صدارت هيٺ ملڪ ۾ ڪم ڪندڙ پرڏيهي اين جي اوز جي حوالي سان اهم اجلاس ٿيو، جنهن ۾ وفاقي گهرو وزير چوڌري نثار، ناڻي واري وزير اسحاق ڊار ۽ وزيراعظم جي خصوصي معاون طارق فاطمي سميت ٻين عملدارن شرڪت ڪئي. اجلاس ۾ فيصلو ڪيو ويو ته ڪنهن به پرڏيهي اين جي اوز کي 6 مهينن تائين ڪم ڪرڻ ڏنو ويندو، سمورين اين جي اوز کي ٽن مهينن اندر رجسٽريشن ڪرائڻي پوندي اجلاس ۾ فيصلو ڪيو ويو ته اين جي اوز لاڳاپيل اٿارٽي کان اجازت ورتل معاملن تي ئي ڪم ڪري سگهنديون. اجلاس ۾ اين جي اوز جي مانيٽرنگ جو طريقڪار به واضح ڪيو ويو، جڏهن ته وزيراعظم جي خصوصي معاون طارق فاطمي جي سربراهي ۾ هڪ ڪميٽي پڻ جوڙي وئي جيڪا اين جي اوز جي نگراني ڪندي.

 

جسٽس رٽائرڊ وجيهه الدين احمد جي فيصلن تي عمل ڪرائڻ عمران خان لاءِ امتحان آهي: پرويز رشيد

اسلام آباد(بيورو) وفاقي وزير پرويز رشيد چيو آهي ته جسٽس رٽائرڊ وجيهه الدين احمد جي فيصلن تي عمل ڪرائڻ عمران خان لاءِ امتحان آهي.پنهنجي بيان ۾ پرويز رشيد چيو ته عمران خان پنهنجي ئي ٺاهيل ٽربيونل کي به نه ٿو مڃي.سندس چوڻ هو ته عمران خان ٽربيونل جي ان حصي کي مڃيو آهي، جتي کيس فائدو نظر آيو.پرويز رشيد چيو ته تحريڪ انصاف جي سياست ڏڦيڙ واري آهي

 

ڪميشن انهن تڪن کي فوڪس ڪيو آهي جتي وڌيڪ بيلٽ پيپر ڇاپيا ويا: چيف جسٽس

اسلام آباد(بيورو) عام چونڊن ۾ مبينا ڌانڌلين جي جاچ ڪندڙ عدالتي ڪميشن 11 تڪن جي آر اوز کي اڄ طلب ڪري ورتو، نادرا کان 40 تڪن جي پري اسڪين رپورٽ به طلب ڪئي وئي آهي. چيف جسٽس ناصرالملڪ جي سربراهي ۾ 3 رڪني جڊيشل ڪميشن عام چونڊن ۾ مبينا ڌانڌلين بابت درخواستن جي ٻڌڻي ڪئي، جنهن ۾ قومي ۽ صوبائي اسيمبلين جي تڪن جي فارم 15 بابت غور ويچار ڪيو ويو. عدالتي ڪميشن جي سربراهه چيف جسٽس ناصرالملڪ چيو ته ڪميشن انهن تڪن کي فوڪس ڪيو آهي جتي وڌيڪ بيلٽ پيپر ڇاپيا ويا، انهن 11 تڪن جي آر اوز کي طلب ڪيو آهي جتي 10 سيڪڙو وڌيڪ بيلٽ پيپر جاري ڪيا وياچيف جسٽس چيو ته انهنتڪن جي آر او کي پهرين ئي الرٽ ڪيو وڃي ته انهن کي سڏايو ويندو، نادرا کان انهن 40 تڪن جي پري اسڪين رپورٽ گهرائي آهي جن تي اليڪشن ٽربيونل فيصلا ڏنا آهن چيف جسٽس چيو ته انهن 11 تڪن جا فارم 15 به گم آهن، ٽن تڪن ۾ 25 سيڪڙو وڌيڪ بيلٽ پيپر ڇاپڻ سٺو سنئوڻ ناهي، جنهن تي وڪيل سلمان اڪرم چيو ته اليڪشن ڪميشن مطابق سعد رفيق جي تڪ تي 30 سيڪڙو وڌيڪ بيلٽ پيپز ڇاپيا ويا عبدالحفيظ پيرزادي جو چوڻ هو ته ڪائونٽر فائل به ووٽن جي تصديق لاءِ اهميت رکن ٿا، ن ليگ جي وڪيل شاهد حامد جو چوڻ هو ته بائيو ميٽرڪ نظام 2013 جي اليڪشن وقت فعال نه هو، سڃاڻپ ڪارڊ نمبر ۽ فوٽو سان به ووٽن جي تصديق ڪري سگهجي ٿي اليڪشن ڪميشن جي وڪيل چيو ته 11 تڪن مان 2 تڪن جو رڪارڊ ريٽرننگ آفيسرن کان به نه مليو آهي، جنهن تي چيف جسٽس چيو ته رڪارڊ ملڻ ۾ مشڪل آهي ته ڪميشن کي ٻڌايو، ڪميشن پاڻ رڪارڊ گهرائي وٺندي، جيڪو رڪارڊ ڪميشن کي کپي اهو جمع ڪرايل رڪارڊ ۾ شامل ناهي، 11 تڪن جو رڪارڊ سياسي جماعتن کي به فراهم ڪيو وڃي.

 

عمران فاروق جا قاتل قانون جي ڪٽهڙي ۾ آندا ويندا، اميد آهي ته سنڌ سرڪار به ڊي جي رينجرز جي سفارشن تي قدم کڻندي: چوڌري نثار

اسلام آباد(بيورو) گهرو وزير چوڌري نثار علي خان چيو آهي ته ڪراچيءَ ۾ امن قائم ڪرڻ ۾ رينجرز جي مثالي ڪارڪردگيءَ جي ڪري شهرين جو اعتماد بحال ٿيو آهي، رينجرز سرحدن ۽ ملڪ اندر ملڪ جي استحڪام جي جنگ وڙهي رهي آهي، قومي اهميت وارن معاملن تي سياست ڪرڻ قومي خدمت ناهي، سڄي ملڪ ۾ ضلعي جي سطح تي 70 نيون پاسپورٽ آفيسون قائم ڪيون وينديون، اسان 2 هزار بليو پاسپورٽ ضبط ڪيا آهن، پاسپورٽ حاصل ڪرڻ لاءِ ايندڙن کي هر ممڪن سهولتون فراهم ڪرڻ اسان جو مشن آهي، پاسپورٽ آفيس مان رشوت ۽ مافيا جو خاتمو ڪري ئي ساهه پٽينداسين. اڱاري ڏينهن اميگريشن اينڊ پاسپورٽ هيڊ ڪوارٽرز ۾ بريفنگ ۽ بعد ۾ ميڊيا سان ڳالهائيندي هن چيو ته رينجرز پاڪستان جي سرحدن جي حفاظت ڪري رهي آهي، دهشتگرديءَ خلاف جنگ وڙهي رهي آهي ۽ امن امان لاءِ شهرن ۾ ڪارروايون ڪري رهي آهي. ڪراچيءَ ۾ سنڌ رينجرز مثالي ڪارڪردگيءَ جو مظاهرو ڪيو آهي جنهن سان شهرين جو اعتماد بحال ٿيو آهي. سنڌ پوليس جي ڪارڪردگي پڻ سٺي آهي پر ڪنهن کي ان خلاف خراب بيان نه ڏيڻ گهرجي. ڪراچي آپريشن جو ڪمانڊر سنڌ جو وڏو وزير آهي جيڪڏهن ڪنهن کي رينجرز کان شڪايت آهي ته وڏي وزير يا اپيڪس ڪميٽيءَ ۾ ڳالهه ڪري جيڪو ان جو لاڳاپيل فورم آهي. هن چيو ته قومي اسيمبليءَ ۾ پاڪستان آرمي ترميمي آرڊيننس ۾ توسيع ڪئي وئي آهي، اهو آرڊيننس ان کان پهرين سمورين سياسي پارٽين اتفاق راءِ سان منظور ڪيو هو، اهو آرڊيننس قومي ايڪشن پلان جو حصو آهي، قومي معاملن کي سياست جي ور چاڙهڻ قومي خدمت ناهي. هن چيو ته عمران فاروق جي قاتلن جي گرفتاريءَ لاءِ اسڪاٽ لينڊ يارڊ سان تعاون جاري آهي ۽ اسان جو مقصد قاتلن کي انصاف جي ڪٽهڙي ۾ آڻڻ آهي. گورنر سنڌ جي تبديلي جي ڪابه تجويز غور هيٺ ناهي. هن چيو ته پاڪستان خلاف هٿيار کڻندڙن خلاف ڪارروائي ٿيندي، جڏهن ته بلوچستان ۾ وزيراعليٰ کي ڳالهين جو مينڊيٽ مليو آهي. هن چيو ته اسان 2 هزار کان وڌيڪ بليو پاسپورٽ ضبط ڪيا آهن، جنهن سان ملڪ جو تشخص مجروح ٿي رهيو هو، اسان پاسپورٽ سسٽم ۾ وڌيڪ بهتري آڻڻ چاهيون ٿا. ان کان اڳ اميگريشن اينڊ پاسپورٽ جي ڊائريڪٽر جنرل عثمان اختر باجوا، گهرو وزير کي آٽو پاسپورٽ ڊليوري ايس ايم ايس سروس بابت بريفنگ ڏني.

 

ڪرپشن جا الزام: نيب طرفان ايف بي آر جي 3 اڳوڻن چيئرمينن، سنڌ يونيورسٽي جي اڳوڻي وي سي خلاف جاچ جو حڪم

اسلام آباد(بيورو) قومي احتساب بيورو (نيب) مبينه ڪرپشن جي الزامن تي ايف بي آر جي 3 اڳوڻن چيئرمينن سلمان صديق، عبدالله يوسف، علي ارشد حڪيم ۽ اڳوڻي ڪليڪٽر ڪسٽم ميان اظهر مجيد سميت ٻين ماڻهن خلاف انڪوائريءَ جو حڪم ڏنو آهي. نيب جي ايگزيڪيوٽو بورڊ جو اجلاس چيئرمين نيب قمر الزمان چوڌري جي صدارت ۾ نيب هيڊ ڪوارٽر اسلام آباد ۾ ٿيو. نيب جي ايگزيڪيوٽو بورڊ ايف بي آر ۾ هڪ پرڏيهي ڪمپني جي ڪمپيوٽرائزيشن لاءِ اختيارن جي ناجائز استعمال ۽ ڪرپشن ۾ ملوث هجڻ تي ايف بي آر جي 3 اڳوڻن چيئرمينن سلمان صديق، عبدالله يوسف، علي ارشد حڪيم ۽ اڳوڻي ڪليڪٽر ڪسٽم ميان اظهر مجيد، ايڊيشنل ڪليڪٽر ڪسٽم اشعر عظيم گل خلاف انڪوائري جي منظوري ڏني، جنهن سان قومي خزاني کي هڪ ڪروڙ 10 لک ڊالر نقصان پهچڻ کان علاوه 65 ڪروڙ پرڏيهي ڪمپني جا ڪليم واجب الادا آهن، ڪمپنيءَ کي غير قانوني طريقي سان ڪانٽريڪٽ ملڻ تي ڪراچي پورٽ تي شين جي ڪليئرنس دوران ڪسٽم جي مد ۾ ڳرو مالي نقصان ٿيو. بورڊ ميسرز تاندليا نواله شوگر ملز ۽ ٻين خلاف پڻ انڪوائري جي پڻ منظوري ڏني. ان کان علاوه بورڊ فراڊ ۽ دوکي سان عوام جو پئسو لٽيندڙ ڪمپني ايم ايس اَي سي اِي سيڪيورٽيز خلاف پڻ جاچ جي منظوري ڏني. بورڊ جي اجلاس دوران ٻين اهم نوعيت جي معاملن جي جاچ جو پڻ فيصلو ڪيو ويو. بورڊ سنڌ يونيورسٽي ڄامشوري جي اڳوڻي وائيس چانسلر ڊاڪٽر نذير مغل، اڳوڻي رجسٽرار محمد نواز ناريجو، اڳوڻي رجسٽرار محمد حسين شيخ ۽ ٻين خلاف پڻ تحقيقات جي منظوري ڏني، مٿن اختيار اورانگهڻ ۽ سرڪاري فنڊن جو غلط استعمال ڪرڻ جا الزام آهن. ايگزيڪيوٽو بورڊ ڊي جي نيب ڪراچيءَ کي ان معاملي جي 6 هفتن ۾ رپورٽ پيش ڪرڻ جي هدايت ڪئي. اجلاس ۾ اڳوڻي ايم ڊي پي ٽي وي يوسف بيگ مرزا خلاف غير قانوني مقررين ۽ سامان جي خريداريءَ ۾ ڪرپشن جي مبينه الزامن تي ثبوت نه ملڻ تي وڌيڪ ڪارروائي نه ڪرڻ جو فيصلو ڪيو ويو. ان موقعي تي ڳالهائيندي قمر الزمان چوڌري چيو ته نيب ملڪ مان ڪرپشن جي خاتمي لاءِ پُرعزم آهي. هن نيب آفيسرن کي هدايت ڪئي ته هو ميرٽ ۽ شفافيت جي بنياد تي انڪوائريون ڪن.

 

ايم ڪيو ايم سربراهه پاران ڀيرو وري پارٽي قيادت ڇڏڻ جو فيصلو، اسيمبلين ۾ مهاجرن جو مذاق اڏايو پيو وڃي: الطاف حسين

لنڊن(م.ڊ) ايم ڪيو ايم سربراهه الطاف حسين هڪ ڀيرو وري پارٽي قيادت ڇڏڻ جو اصولي فيصلو  ڪري ڇڏيو آهي، سندس چوڻ آهي ته اسيمبلي ۾ قربانيون ڏيندڙ مهاجرن جو مذاق اڏايو پئي ويو ته سمورو ايوان خاموش تماشائي بڻيل رهيو، ڪارڪنن پڻ مايوس ڪيو، هو هاڻي پارٽي قيادت نه سنڀاليندو.لنڊن ڪارڪنن کي ٽيليفونڪ خطاب ڪندي الطاف حسين چيو ته خواجه آصف چيو ته اصل مهاجر اهي آهن، جيڪي جالنڌر ۽ لڌيانيا مان هجرت ڪري آيا.هن چيو ته اهو چئي وفاقي وزير ٻين جي ڏنل قربانين تي پاڻي هاري ڇڏيو، سندس بيان تي اسيمبلي پڻ خاموش تماشائي بڻيل رهي.الطاف حسين چيو ته مهاجرن جو مذاق اڏايو ويو پر ڪنهن به آواز نه اٿاريو، ڪارڪنن به کي مايوس ڪيو آهي.متحدا سربراهه چيو ته ورهاڱي وقت 20 لک ماڻهن هجرت ڪئي هئي، جيڪي يوپي، سي پي، بهار، حيدر آباد دڪن، علي ڳڙهه، لکنئو ۽ آگرا مان آيا هئا.سندس چوڻ هو ته ڪجهه چور پنجاب جي لڌيانيا واري علائقي مان به آيا هئا، جن پاڻ کي خواجه سڏرايو.ايم ڪيو ايم سربراهه الطاف حسين چيو ته هاڻ برداشت کان ٻاهر آهي، هو ڪڏهن به پارٽي قيادت نه سنڀاليندو

 

ڀارت کي پاڪستان خلاف پراڪسي ويڙهه بند ڪرڻي پوندي: پرويز مشرف

ڪراچي(م.ڊ) اڳوڻي صدر پرويز مشرف چيو آهي ته ڀارت کي پاڪستان خلاف پراڪسي ويڙهه بند ڪرڻي پوندي، ٻنهي ملڪن جا اڳواڻ ڪمشير تڪرار گڏجي حل ڪن.ڀارتي ٽي وي کي انٽرويو ڏيندي پرويز مشرف چيو ته پاڪستان برما نه آهي، پاڙيسري ملڪ ايئن سمجهيو ته هو برداشت نه ڪندا.سندس چوڻ هو ته پاڪستان ائٽمي طاقت آهي، ڀارت حملو ڪرڻ جي همت نه ٿو ڪري سگهي.پرويز مشرف چيو ته ڀارتي وزيراعظم نريندر مودي هڪ پاسي پاڪستاني وزيراعظم کي دعوت ڏي ٿو ته ٻئي طرف پاڪستان خلاف بيان ڏيندو آهي.پرويز مشرف چيو ته نريندر مودي انتهاپسند تنظيم آر ايس ايس جو نمائندو آهي، ساڳي تنظيم سجمهوتا ايڪسپريس حملي جي ذميواري قبولي هئي.هن چيو ته نريندر مودي بنگلاديش ۾ جيڪو ڪجهه چيو، پاڪستاني شهرين کي اهو قبول نه آهي، ڀارتي وزيراعظم پاڻ ڳالهين کي ڏکيو بڻائي رهيو آهي.پرويز مشرف چيو ته ڪمشير بابت پاڪستان جو موقف واضح آهي، ٻنهي ملڪن جي اڳواڻن کي گهرجي ته گڏجي مسئلو حل ڪن.سندس چوڻ هو ته ڀارت افغانستان ۾ داخل ٿي ان کي غير مستحڪم بڻايو، هاڻي پاڪستان خلاف پراڪسي ويڙهه ڪري رهيو آهي.پرويز مشرف چيو ته پاڪستان وٽ پڪا ثبوت آهن ته را جا ايجنٽ افغانستان مان داخل ٿين ٿا، بهتر آهي ته نريندر مودي مداخلت ختم ڪري.اڳوڻي صدر چيو ته پاڪستان کي افغانستان جي اڳوڻي صدر حامد ڪرزئي تي به اعتبار نه آهي.ان کان اڳ هڪ ٽي وي انٽرويو ۾ پرويز مشرف چيو ته نائن زيرون تان  گرفتار ڪيل دهشتگرد هئا، سندس ايم ڪيو ايم جي قيادت سنڀالڻ جو سوال ئي پيدا نه ٿو ٿئي.اڳوڻي صدر چيو ته ڪراچيءَ ۾ 12 مئي تي طاقت ڏيکارڻ جو هن نه چيو هو.پرويز مشرف چيو ته 12 مئي جي قتل عام جون ذميوار ايم ڪيو ايم، اي اين پي ۽ ٻيون پارٽيون آهن

 

عمران خان جسٽس (ر) وجيهه الدين ٽربيونل جي فيصلن کي قبول ڪرڻ کان انڪار ڪري ڇڏيو

اسلام آباد(م.ڊ) تحريڪ انصاف جي سربراهه عمران خان جسٽس رٽائرڊ وجيهه الدين ٽربيونل جي فيصلن کي قبول ڪرڻ کان انڪار ڪري ڇڏيو آهي.جسٽس وجيهه الدين احمد ٽربيونل جي فيصلي تي رد عمل ظاهر ڪندي عمران خان چيو ته ٻيهر پارٽي چونڊون ڪرائڻ جي فيصلي کانپوءِ ٽربيونل ختم ٿي چڪو آهي.هن چيو ته ختم ٿيل ٽربيونل وٽ فيصلا ڪرڻ جا ڪي به اختيار نه آهن.سندس چوڻ هو ته ٽربيونل کي اختيار ناهي ته پارٽي جي سينئر عهديدارن کي نشانو بڻائي.عمران خان چيو ته جسٽس وجيهه الدين احمد جي ٽربيونل جي فيصلن کي قبول نه ڪيو ويندو.