تازيون خبرون

Daily Archives: June 11, 2015

مودي جي ذهنيت سياسي ناهي ، دهشتگرداڻي سوچ جو مالڪ آهي: سراج الحق

اسلام آباد (بيورو) جماعت اسلامي جي امر سينيٽر سراج الحق چيو آهي ته ڀارتي وزيراعظم نريندر مودي پنهنجي ڏوهه جو اعتراف ڪري ورتو آهي، ڀارتي وزيراعظم جي ذهنيت سياسي ناهي پر هو دهشتگرداڻي سوچ جو مالڪ آهي. اربع ڏينهن پارليامينٽ هائوس ٻاهران صحافين سان ڳالهائيندي هن چيو ته يورپين ملڪن دهشتگردي جي ڪري نريندر مودي جي داخلا بند ڪئي هئي، مودي وزيراعظم بڻجندي ئي ورڪنگ بائونڊري تي حملو ڪيو ۽ ڪشمير ۾ قتل عام جاري رکيو آهي،سينيٽر سراج الحق چيو ته ڀارتي وزيراعظم جي بيان تي پرڏيهي آفيس ڪمزور جواب ڏنو آهي.

 

ڪراچي: بحريه ٽائون اڳيان جسقم جو سنڌ دشمن منصوبن خلاف ڌرڻو، نعريبازي

ڪراچي(اسٽاف رپورٽر) جسقم پاران بحريا ٽائون ۽ سنڌ دشمن منصوبن خلاف صنعان خان قريشي، اڳواڻي ۾ سپر هاءِ وي بحريا ٽائون جي مک گيٽ آڏو ڌرڻو، هزارين ڪارڪن ڌرڻي ۾ شريڪ ٿي سپر هاءِ وي تي ويهي رهيا، ڌرڻي سبب سپر هاءِ وي تي حيدرآباد کان ڪراچي ويندڙ ۽ ايندڙ سوين گاڏيون بيهجي ويون، ڪيترائي ڪلاڪ ٽريفڪ معطل، پوليس جا وڏا اٽالا سپر هاءِ وي جي ٻنهي پاسن کان بيٺا رهيا، جسقم پاران 25 آگسٽ  تي سنڌ دشمن منصوبن خلاف نوابشاهه جي بحريا ٽائون جي مک گيٽ اڳيا هڻڻ جو اعلان. خبر موجب جيئي سنڌ قومي محاذ پاران بحريا ٽائون، ذوالفقار آباد، ڊي ايڇ اي سٽي ۽ ٻين سنڌ دشمن منصوبن ۽ سنڌ ۾ وڌندڙ ڌاري آبادڪاري خلاف جسقم چيئرمين صنعان خان قريشي، سينيئر وائيس چيئرمين ڊاڪٽر نياز ڪالاڻي جي اڳواڻي ۾ هزارين ڪارڪنن گلشن حديد ۾ بشير خان قريشي جي رهائشگاهه کان ريلي جي صورت ۾ بحريا ٽائون ڏانهن روانا ٿيا، ريلي ۾ سڄي سنڌ جي مختلف هنڌن کان آيل ڪارڪنن ۾ هڪ وڏو جوش ۽ جذبو هيو، جيڪي ڌاري آبادڪاري، بحريا ٽائون، ڊي ايڇ اي سٽي ۽ ذوالفقار آباد خلاف نعرا لڳائي رهيا هئا، ريلي جڏهن بحريا ٽائون جي مک گيٽ اڳيان پهتي ته ڪارڪنن سپر هاءِ وي کي بلاڪ ڪري روڊ تي ڌرڻو هڻي ويهي رهيا، ڌرڻي ۾ جسقم چيئرمين صنعان خان قريشي، سينيئر وائيس چيئرمين ڊاڪٽر نياز ڪالاڻي، وائيس چيئرمين ڪيهر انصاري، ساگر حنيف بڙدي، ڏاڏو جکراڻي، صفدر تنيو، سرفراز ميمڻ، الاهي بخش بڪڪ، محبوب ابڙو، ناياب سرڪش سنڌي، اداڪار اسد قريشي، ايس يو پي ڪراچي ڊويزن جو صدر محبوب عباسي، کان علاوه مسلم ليگ ن جو اڳواڻ ايم پي اي حاجي شفيع محمد ڄاموٽ، اڳوڻو ٽائون ناظم سيد خدا ڏنو شاهه، ناميارو محقق گل حسن ڪلمتي سميت ملير جي مختلف ڳوٺن جا رهواسي پڻ ڌرڻي ۾ ڪيترائي ڪلاڪ سخت گرمي ۾ روڊ تي ويهي رهيا ۽ احتجاج ڪندا رهيا، ڌرڻي کي خطاب ڪندي جسقم جي چيئرمين صنعان خان قريشي چيو ته سنڌ جي هڪ هڪ انچ جي حفاظت ڪرڻ اسان جي ذميداري آهي جيستائين هڪ به سنڌي جيئرو آهي تيستائين سنڌ ۾ ڌاري آبادڪاري ۽ سنڌ دشمن منصوبن خلاف ڀرپور احتجاج جاري رکنداسين. هن چيو ته هڪ سازش تحت سنڌ جا حڪمران سنڌ کپائي رهيا آهن ۽ ملڪ رياض جهڙي پنجاب مان تڙيل بلڊر کي سنڌ جون زمينون ڀڳڙن جي مٺ تي نيلام ڪري لکين ڌارين کي هتي آباد ڪري سنڌ کي بين الاقوامي يتيم خانو بنائي رهيا آهن. هن چيو ته آصف زرداري ۽ ملڪ رياض جي دوستي صرف سنڌ کي کپائڻ تائين محدود آهي. مان سنڌ جي سمورن قومپرست ڌرين کي اپيل ٿو ڪريان ته هو پنهنجا سمورا ويڇا وساري سنڌ ۾ وڌندڙ ڌاري آبادڪاري ۽ سنڌ دشمن منصوبن خلاف گڏجي جدوجهد ڪريون ۽ سنڌ کي بچائڻ خاطر سمورا اختلاف ختم ڪري هڪ ٿي دشمنن کي ٻڌايون ته سنڌ جا وارث سنڌي متحد آهن. هن چيو ته اڄ بحريا ٽائون جي گيٽ اڳيان هي هزارين سنڌي ماڻهو گڏ ٿي اهو پيغام ڏئي رهيا آهن ته هي سنڌ دشمن منصوبا اسان ڪنهن به صورت ۾ قبول نه ڪنداسين. ان موقعي تي 25 آگسٽ تي نوابشاهه ۾ ٺهندڙ بحريا ٽائون جي مين گيٽ اڳيان ٻيهر ڌرڻو هڻڻ جو اعلان ڪيو. ان موقعي تي جسقم جي سينيئر وائيس چيئرمين ڊاڪٽر نياز ڪالاڻي خطاب ڪندي چيو ته سنڌي پر امن قوم آهي جيڪا مذهبي انتها پسندي کي رد ڪري ٿي. هتي ڌارين جي آبادڪاري سان مذهبي انتها پسندي کي هٿي ملي آهي ۽ صوفين جي سرزمين تي اڄ دهشتگردن جو راڄ قائم آهي. هن چيو ته ڌاري آبادڪاري ڪرائي ڌرتي ڌڻين کي اقيلت ۾ تبديل ڪرڻ جو منصوبو جوڙيو ويو آهي. جنهن خلاف جسقم اڄ کان احتجاجي تحريڪ جي شروعات ڪئي آهي. جسقم ڪنهن به صورت ۾ سنڌ دشمن منصوبن جي اڏاوت تي خاموش نه ويهندي. هي منصوبا ڪالا باغ ڊيم کان وڌيڪ خطرناڪ آهن. هنن منصوبن جي ڪري اسان جي ڌرتي اسان جي پيرن هيٺان کسڪائي پئي وڃي. ان موقعي تي وائيس چيئرمين ڪيهر انصاري، ساگر حنيف بڙدي، ڏاڏو جکراڻي، صفدر تنيو، سرفراز ميمڻ، الاهي بخش بڪڪ، محبوب ابڙو، ناياب سرڪش سنڌي، اداڪار اسد قريشي، ايس يو پي ڪراچي ڊويزن جو صدر محبوب عباسي، کان علاوه مسلم ليگ ن جو اڳواڻ ايم پي اي حاجي شفيع محمد ڄاموٽ، اڳوڻو ٽائون ناظم سيد خدا ڏنو شاهه، ناميارو محقق گل حسن ڪلمتي ۽ ٻين پڻ خطاب ڪيو. جسقم طرفان بحريا ٽائون جي مين گيٽ وٽ ڌرڻي هڻڻ وقت ايس ايس پي ملير ڊاڪٽر نجيب خان پوليس جي وڏن اٽالن سان گڏ موجود هيو جيڪو بحريا ٽائون جي گيٽ طرف وڌندڙ ڪارڪنن کي گيٽ کان اندر اچڻ کان روڪي رهيو هو. ۽ پوليس جي نفري بحريا ٽائون جي چئني پاسن تي موجود هئي. جسقم جي جوشيلن ڪارڪنن بحريا ٽائون جي مين گيٽ اڳيان لڳل بجلي جي ٿنڀن تي چڙهي جسقم جا جهنڊا هنيا. هڪ جوشيلي ڪارڪن پنهنجي شرٽ ڦاڙي جيئي سنڌ جو جهنڊو پول تي مٿي چڙهي لڳائي ان سان مضبوطيءَ سان ٻڌي ڇڏيو. جنهن تي جسقم جي ڪارڪنن ۽ اڳواڻن ان جوشيلي ڪارڪن جو اٿي بيهه تاڙين سان استقبال ڪيو. ان دوران ڪيترائي جسقم ڪارڪن بحريا ٽائون گيٽ اڳيان جيئي سنڌ جا جهنڊا لڳائيندا نظر آيا.

 

ايشوريا ، دپيڪا ۽ سوناڪشي کانپوءِ هاڻ وديا بالن به رجني ڪانت سان عشق جا پيچ اڙائيندي

ممبئي(شوبز نيوز)ايشوريا راءِ، دپيڪا پدوڪون ۽ سوناڪشي سنها کانپوءِ هاڻ بالي ووڊ جي اولالا گرل وديا بالن به اسڪرين تي ليجنڊ اداڪار رجني ڪانت سان عشق جا پيچ اڙائيندي نظر ايندي، ڀارتي ميڊيا مطابق ناليوارو تامل هدايتڪار پي اي رجنيٿ نئين فلم ٺاهي رهيو آهي، جنهن ۾ مرڪزي ڪردار رجني ڪانت نڀائيندو، جڏهن ته سندس هيروئن طور وديا بالن کي ڪاسٽ ڪيو ويو آهي. ڪروڙين رپين جي خرچ سان ٺهندڙ اها فلم تامل سان گڏ هندي ٻولي ۾ به رليز ڪئي ويندي. واضح رهي ته 64 ورهين جو رجني ڪانت ڏکڻ ڀارت ۾ ڪنهن به فلم جي ڪاميابي جي ضمانت سمجهيو وڃي ٿو، وديا بالن کان پهرين ايشوريا راءِ، دپيڪا پدوڪون ۽ سوناڪشي سنها به ساڻس گڏ ڪم ڪري چڪيون آهن.

 

فلم شڌي اميش ٿرپاٺيءَ جي ڪتاب تي ٻڌل نه پر مختلف موضوع تي ٺهيل آهي:ورن

ممبئي (شوبز نيوز) اداڪار رون ڌون پنهنجي نئين ايندڙ فلم ”شڌيءَ“ بابت چيو آهي ته فلم بابت جيڪي ڳالهيون ٿي رهيو آهن ته فلم ليکڪ اميش ٿرپاٺيءَ جي ڪتاب ”امورشلز آف ملوحا“ جي موضوع تي ٺاهي وئي آهي، اهي سڀ ڳالهيون غلط آهن، هن فلم جي مشهوري تقريب ۾ صحافين جي سوالن جا جواب ڏيندي چيو ته فلم اميش ٿرپاٺيءَ جي ڪتاب تي ٻڌل نه پر مختلف موضوع تي ٺهيل آهي. ياد رهي ته ڀارت جي مشهور ترين فلسماز ڪرن جوهر جي هدايتن ۾ ٺهندڙ شُڌي ۾ سڀ کان پهريان اداڪار ريتڪ روشن ۽ ڪرينا ڪپور خان کي چونڊيو هو، جن جي جواب کان پوءِ دبنگ اسٽار سلمان خان کي ان فلم جي هيرو طور سائن ڪيو ويو هو، پر ان جي به جواب کان پوءِ آخرڪار ڪرن جوهر اداڪار ورن ڌون سان رابطو ڪيو ۽ کيس فلم جي لاءِ سائين ڪيو. فلم 19 جون تي رليز ٿيندي.

 

سونم ڪپور کي ڪپور خاندان پاران سالگره جون واڌايون ڏنيون ويون

ممبئي (شوبز نيوز) بالي ووڊ جي ڪپور خاندان جي لاڏُلي سونم ڪپور 30 ورهين جي ٿي وئي، ان موقعي تي اداڪارا جي سئوٽ ارجن ڪپور کيس جنم ڏينهن جون واڌايون ڏنيون، ارجن ڪپور انسٽاگرام تي جاري ڪيل تصوير ۾ چيو ته سونم کي جنم ڏينهن جو واڌايون ڏيان ٿو ۽ کيس ياد ڏيارڻ ٿو چاهيان ته هاڻي هو هڪ ٻئي کان ڪيترو پري ٿي ويا آهن. ان موقعي تي ڪپور خاندان جي هڪ ٻي نينگري ڪرشما ڪپور به سونم ۽ ارجن سان گڏ جاري ڪيل ڦوٽو ۾ سونم ڪپور کي جنم ڏينهن جون واڌايون ڏنيون. ساڳي ريت اداڪارا ۽ آئٽم گرل ملائڪا اروڙا خان به مڙس ارباز خان ۽ سونم جي تصوير جاري ڪندي سونم کي جنم ڏينهن جون واڌايون ڏنيون. شاهد ڪپور، شرڌا ڪپور، رتيش ديشمڪ، منيش پائول ۽ ٻين پاران به سونم کي جنم ڏينهن جو واڌايون ڏنيون ويون.

 

اداڪارا هما قريشي اظهرالدين جي گرل فرينڊ جو ڪردار ادا ڪندي

ممبئي (شوبز نيوز) اڳوڻي ڀارتي ڪپتان اظهرالدين جي زندگيءَ تي ٺهندڙ فلم ۾ اداڪارا هما قريشي اظهرالدين جي گرل فرينڊ جو ڪردار ادا ڪندي، اظهرالدين جو مرڪزي ڪردار ڀارتي چاڪليٽي هيرو عمران هاشمي ادا ڪندو، پروڊيوسر ايڪتا ڪپور اڳوڻي ڀارتي ڪپتان اظهرالدين جي زندگيءَ فلم ٺاهي رهي آهي، جنهن جي لاءِ هن عمران هاشميءَ کي اظهرالدين جو ڪردار ادا ڪرڻ جي لاءِ چونڊيو آهي، اداڪار عمران هاشمي ڏينهن رات اڳوڻي ڀارتي ليجنڊ ڪرڪيٽر محمد اظهرالدين سان گڏ رهي ان کان گُر سکي رهيو آهي، ڪرڪيٽر اظهرالدين جي پهرين گھر واريءَ جي چونڊ اڳ ئي ڪئي وئي هئي، جڏهن ته هما قريشي هاڻي عمران هاشميءَ سان فلم ۾ نظر ايندي، جيڪا فلم ۾ اظهرالدين جي پهرين گھر واريءَ جو ڪردار ادا ڪري رهي آهي.

 

ڀارت جو پاڪستاني رانديگرن کي ويزا ڏيڻ کان انڪار

لاهور(اسپورٽس نيوز) ڀارتي هاءِ ڪميشن پاڪستان جي 17 سالن جي اندر واري عمر وارن ريسلرز کي ويزا ڏيڻ کان انڪار ڪري ڇڏيو .پاڪستان ريسلنگ  فيڊريشن جي ترجمان مطابق 11 رڪني انڊر 17 ريسلنگ ٽيم ايشيا ڪيڊٽ ريسلنگ چئمپئين شپ ۾ حصو وٺڻو هو، چئمپئين شپ 10 کان 14 جون تائين دهلي ۾ ٿيڻي هئي، جنهن لاءِ پاڪستاني ٽِم هڪ مهيني کان تياري ڪري رهي هئي، پر اوچتو سفارتخاني ڀارتي حڪومت پاران ڪلئيرنس نه ملڻ جو بهانو ڪري ويزا ڏيڻ کان انڪار ڪري ڇڏيو آهي.

 

سلمان بٽ جي معاملي تي پاڪستان ڪرڪيٽ بورڊ جا آفيسر ورهائجي وڃڻ جو کٽڪو

لاهور (اسپورٽس نيوز) پاڪستان ڪرڪيٽ بورڊ جا آفيسر ورهائجڻ جي ڪري کٽڪو آهي ته اڳوڻو ڪپتان سلمان بٽ پهرين سيپٽمبر جي ڊيڊ لائين کان اڳ پنهنجي بحاليءَ وارو پروگرام مڪمل ڪرڻ ۾ ناڪام رهندو. پرڏيهي خابرو اداري جي رپورٽ ۾ ٻڌايو ويو ته ڊيڊ لائين ختم ٿيڻ جي صورت ۾ کيس اسپاٽ فڪسنگ ڪرڻ تي لڳل 10 سالن جي پابندي مڪمل ڪرڻي پوندي. مقرر وقت جي اندر بحالي پروگرام مڪمل ڪرڻ جي صورت ۾ سندس سزا ۾ 5 سال گھٽتائي ٿي ويندي. پروگرام مڪمل ڪرڻ جي لاءِ اڳوڻي ڪپتان کي پي سي بيءَ جا ليڪچر وٺڻا پوندا، پر ايئن محسوس ٿي رهيو آهي ان کي ڪليئر ڪرڻ بابت بورڊ ورهائجي ويو آهي. رپورٽ موجب بورڊ امڪاني هڪ نقطي تي ورهايو آهي ته بٽ ڪرڪيٽ ۾ ڪرپشن بابت معلومات شيئر ڪندي رشوت ٽوڙ ايجنسين جي مدد ڪئي؟ پي سي بي عملدار ان مامري تي تبصرو ڪرڻ کان پرهيز ڪري رهيا آهن. ٻئي طرف پاڪستان ڪرڪيٽ بورڊ ڪرڪيٽرن کي 6 مهينن جو نئون سينٽرل ڪانٽريڪٽ پهرين جولاءِ کان ڏيندو. اپريل کان جون تائين سينٽرل ڪانٽريڪٽ ۾ ڪهڙا ڪهڙا رانديگر شامل هوندا، ان جو اعلان اڃا ناهي ڪيو ويو. ڪرڪيٽرن جو ساليانو ڪانٽريڪٽ 31 ڊسمبر 2014ع تي ختم ٿي ويو هو، پر ورلڊڪپ لاءِ روانو ٿيڻ کان اڳ 3 مهينن جي لاءِ سينٽرل ڪانٽريڪٽ جي مُدي ۾ واڌ ڪئي وئي هئي، پر هاڻي هڪ ڀيرو ٻيهر ڊيڊ لاڪ پيدا ٿي ويو آهي. سينٽرل ڪانٽريڪٽ جو اعلان اڃا تائين ناهي ٿي سگھيو، ملڪي ٽيم جا رانديگر ڪنهن ڪانٽريڪٽ جي آخري اعلان کان سواءِ سريلنڪا پهچي ويا آهن. بورڊ جي ذميوار آفيسر جي دعويٰ آهي ته سڀ مامرا طئي ٿي چڪا آهن، نئين سينٽرل ڪانٽريڪٽ جو اعلان پهرين جولاءِ کان 31 ڊسمبر 2015ع تائين ڪيو ويندو، ان تي سڀ متفق آهن، ڪپتان سميت سڀني ڪرڪيٽرن صحيح به ڪري ڇڏي آهي، پر اپريل مئي ۽ جون بابت ڪا وضاحت ناهي ڪئي وئي ته 3 مهينا ڪهڙي کاتي ۾ داخل ٿيندا ۽ اهو فيصلو به ناهي ٿي سگھيو ته ڪهڙو رانديگر ڪهڙي ڪيٽيگريءَ ۾ شامل ڪيو ويندو.

 

سعيد اجمل بالنگ ايڪشن بدلائڻ کان پوءِ بهتر ڪارڪردگي پيش ڪرڻ ۾ مصروف

لنڊن (اسپورٽس نيوز) پاڪستان ڪرڪيٽ ٽيم جي اسپن بالر 37 سالن جي سعيد اجمل بالنگ ايڪشن بدلائڻ کان پوءِ پنهنجي بهتر ڪارڪردگي پيش ڪرڻ جي ڪوششن ۾ مصروف آهي. ووسٽر شائر طرفان کيڏندي گذريل هفتي سعيد اجمل نورٿاپٽنشائر خلاف پنهنجي پهرين ميچ ۾ 53 رنسون ڏئي 3 رانديگرن کي آئوٽ ڪيو ۽ ان ٽيم خلاف ٿيندڙ ٻي ميچ ۾ 26 رنسون ڏئي 2 رانديگرن کي پويلين موٽايو. انگلينڊ جي ڪرڪيٽر معين عليءَ چيو ته پاڪستاني اسپنر اهو ٻڌائي ڇڏيو آهي ته هو ڪاميابيءَ طرف واپس اچي رهيو آهي. هن ووسٽر شائر ڪرڪيٽ ڪلب جي ويب سائيٽ سان ڳالهائيندي چيو ته سعيد اجمل جي واپسي تمام سٺي ڳالهه آهي ۽ مان ان ڳالهه تي يقين ٿو رکان ته هو اڃا به دنيا جو بهترين اسپنر آهي. سندس چوڻ هو ته سعيد اجمل جي ايڪشن ۾ بدلاءُ آيو آهي، پر ڪجھه ئي ڏينهن ۾ سندس ڪارڪردگيءَ ۾ بهتري آئي آهي. معين عليءَ وڌيڪ چيو ته سعيد کي هڪ سٺي چئن ڏينهن واري ميچ ملي وڃي ته سندس فارم بحال ٿي ويندو.

 

ليگ اسپنر ياسر شاهه کي پاڪستاني ڪرڪيٽ ٽيم لاءِ ميچ ونر بالر بڻجڻ جي خواهش

ڪولمبو(اسپورٽس نيوز): پاڪستان ڪرڪيٽ ٽيم جي ليگ اسپنر ياسر شاهه چيو آهي ته هو پنهنجي بالنگ ۾ مختلف ورائٽيز آڻي ميچ ونر بالر بڻجڻ چاهي ٿو، سندس چوڻ آهي ته سريلنڪا جون وڪيٽون اسپنرن لاءِ مددگار آهن. قومي ڪرڪيٽ ٽيم سان گڏ سريلنڪا جي دوري تي پهتل ياسر شاهه هڪ انٽرويو ۾ چيو ته سريلنڪا جو دورو پاڪستاني ٽيم وڏي اهميت رکي ٿو، ڇو ته آئي لينڊ ۾ پاڪستان 10 سالن کان ڪا سيريز ناهي کٽي، سڀ رانديگر اهو سلسلو ختم ڪرڻ چاهين ٿا. سندس چوڻ هو ته سريلنڪا جي وڪيٽن تي سڀ کان وڏي ذميواري ذوالفقار بابر تي آهي، سعيد اجمل جي غيرموجودگي ۾ بابر ۽ مان ٽيم کي مايوس نه ڪنداسين. هن چيو ته گذريل ڪجهه عرصي ۾ انجريز سبب پاڪستاني بالنگ ڪافي متاثر ٿي آهي پر هاڻ سڀ بالر فٽ آهن ۽ سريلنڪا خلاف سيريز ۾ بهترين ڪارڪردگي ڏيکاريندا. ياسر شاهه چيو ته هو پنهنجي بالنگ تي وڏي محنت ڪري رهيو آهي، سندس ڪوشش آهي ته هو وڪيٽون وٺندڙ بالن کي وڌيڪ بهتر بڻائي، سندس گگلي ۾ هاڻ 70 سيڪڙو بهتري اچي وئي آهي.