تازيون خبرون

Daily Archives: June 9, 2015

آءِ سي سيءَ نئين ٽيسٽ رينڪنگ جاري ڪري ڇڏي،ڪنهن به ٽيم جي درجا بنديءَ ۾ ڪو بدلاءُ نه اچي سگهيو

دبئي (اسپورٽس نيوز) آءِ سي سيءَ نئين ٽيسٽ رينڪنگ جاري ڪري ڇڏي آهي، جنهن ۾ ڪنهن به ٽيم جي درجا بنديءَ ۾ ڪو بدلاءُ ناهي آيو، پر ڀارتي ٽيم جي چوٿين پوزيشن کي خطرا پيدا ٿي ويا آهن. آءِ سي سيءَ هلندڙ مهيني جي نئين ٽيسٽ رينڪنگ جاري ڪري ڇڏي آهي جنهن ۾ ڪنهن به ٽيم جي درجا بندي ۾ ڪا تبديلي ناهي آئي، ٽيم رينڪنگ ۾ ڏکڻ آفريڪا اڳ جيان 130 پوائنٽن سان پهرين پوزيشن جي تي موجود آهي، جڏهن ته 108 پوائنٽن سان آسٽريليا ٻي پوزيشن تي موجود آهي. آءِ سي سيءَ رينڪنگ ۾ ڀارت ٽين پوزيشن تي آهي، جنهن کي هلندڙ مهيني بنگلاديش خلاف هڪ ٽيسٽ تي ٻڌل سيريز کيڏڻي آهي. جيڪڏهن ڀارت ٽيسٽ کٽي ويو ته هڪ پوائنٽ جي واڌ سان ٽين پوزيشن تي برقرار رهندو پر شڪست جي صورت ۾ چار پوائنٽون وڃائي 95 پوائنٽن سان ستين پوزيشن تي هليو ويندو. پاڪستان بنگلاديش کي ٽيسٽ سيريز هارائڻ باوجود ڇهين پوزيشن تي موجود آهي، پر آءِ سي سي پليئر رينڪنگ ۾ يونس خان به بيٽنگ جي شعبي ۾ ڇهين نمبر تي موجود آهي. ٽيسٽ رينڪنگ ۾ نيوزيلينڊ چوٿين، انگلينڊ پنجين، پاڪستان ڇهين، سريلنڪا ستين، ويسٽ انڊيز اٺين، بنگلاديش نائين ۽ زمبابوي ٽيم 5 پوائنٽن سان ڏهين نمبر تي آهي.

 

ڪوئٽا ۾ ٿيل قتل عام ۽ قانون لاڳو ڪندڙ ادارا

 

ڪوئيٽا ۾ اڻڄاتل هٿياربندن جي فائرنگ ۾ هزاره برادري سان تعلق رکندڙ پيءُ پٽ سميت 6 ڄڻا مارجي ويا آهن. ڪوئيٽا جي باچا خان چوڪ واري علائقي ۾ دهشتگردي جو واقعو پيش آيو، جتي اڻڄاتل هٿياربند هڪ چانهه جي دڪان تي فائرنگ ڪري فرار ٿي ويا. فائرنگ جي نتيجي ۾ پيءُ پٽ سميت پنج کان وڌيڪ ماڻهو زخمي ٿي پيا، جن کي اسپتال منتقل ڪيو ويو، جتي پنج ئي ڄڻا زخمن جا سور نه سهندي فوت ٿي ويا جڏهن ته واقعي کانپوءِ پوليس واقعي واري هنڌ پهچي وئي، جنهن ٿڏي تان ثبوت گڏ ڪيا. چئن ڄڻن جي مارجڻ واري واقعي کانپوءِ علائقي ۾ خوف ٿي ويو جڏهن ته سڄي شهر ۾ ڪاروبار بند ٿيڻ شروع ٿي ويو. هوڏانهن بلوچستان جي وڏي وزير ڊاڪٽر عبدالمالڪ بلوچ واقعي جو نوٽيس وٺندي جوابدارن جي گرفتاري جو حڪم ڏنو آهي. وزير اعليٰ هائوس جي ترجمان موجب وڏي وزير ڊاڪٽر عبدالمالڪ بلوچ چيو آهي ته قانون لاڳو ڪندڙ ادارا امن امان جي صورتحال بهتر ڪرڻ لاءِ قدم کڻن. هن چيو ته ڪوئيٽا ۾ دهشتگردي جا واقعا افسوس جوڳا آهن، هڪ سازش تحت صوبي جو امن خراب ڪيو پيو وڃي. ٻئي پاسي ميڊيا رپورٽن موجب مارجي ويلن ۾ ٻارڙا به شامل آهن جڏهن ته اهي هزاره برادري سان تعلق رکندڙ آهن.  مجلس وحدت المسلمين ڪوئيٽا واقعي جي مذمت ڪئي آهي. علامه ناصر عباس جو چوڻ آهي ته 10 ڏينهن ۾ هزارن برادري جا 8 ماهو شهيد ڪيا ويا آهن. بلوچستان ۾ به ضرب عضب طرز تي آپريشن ڪيو وڃي. جڏهن ته ويراعظم واقعي جي مذمت ڪندي لاڳاپيل اختيارين کان رپورٽ طلب ڪري ورتي آهي ۽ جوابدارن جي گرفتاري جو حڪم ڏنو آهي.ضرورت ان ڳالهه جي آهي ته ڏوهارين جو مڪمل خاتمو ڪرڻ لاءِ پاڪ فوج کي پنهنجو آپريشن اڃان وسيع ڪرڻو پوندو ته جيئن هر ننڍي وڏي شهر مان دهشتگرديءَ جو مڪمل خاتمو ڪري سگهجي.

 

مڪاني ادارن ۾ روينيو آفيسرن جي مقرريءَ وارو معاملو؛ايم بي عرساڻي

پروٽوڪول جو تصور ڏيندڙ اداري مان به وڃي ٿو پروٽوڪول ختم ٿيندو

گذريل ستن سالن کان سنڌ ۾ پاڪستان پپلز پارٽي حڪومت ڪري رهي آهي پهريان پنج سال آغا سراج خان دراني وزير رهيو ڇهه مهينن کان اويس مظفر هاشمي ۽ ڏيڍ سال کان شرجيل انعام ميمڻ وزير بڻيل آهي اويس مظفر ڪا نمايا تبديلي ڪا نه آندي ۽ انجو عرصو به ٿورو هيو، انڪري ان جي بجاءِ صرف آغا سراج خان دراني ۽ شرجيل انعام ميمڻ جي د‎ؤر ۾ جو تقابلي جائرو وٺبو.

آغا سراج خان درانيءَ جو دؤر :

آغا صاحب انتهائي طاقتور ۽ بادشاهه ماڻهو هو، سندس دؤر جي شروعات عوام جا چونڊيل ماڻهو بطور ناظم ڪم رهيا هئا، جن جو مدو پورو ٿيڻ بعد کين هٽايو ويو ۽ سنڌ اسيمبليءَ مان ايڊمنسٽريٽرن جي مقرريءَ جو بل پاس ڪرايو ويو، ان سان مڪاني ادارن جي آفيسرن جي اهميت وڌي وئي ۽ هن صاحب اڌ سنڌ ۾ ماستر، ڊاڪٽر، بئنڪر، سئي گئس، يونيورسٽين ۽ ٻين ادارن جا آفيسر گهرائي مقرر ڪرايا، جنهن تي گهڻو راضي هوندو هو اهو ايڊمنسٽريٽر به هوندو هو ته ٽي ايم او مقرر ڪرائيندو هو. هن دؤر ۾ ايگريڪلچر کاتي سان واسطو رکندڙ سندس پرائيوٽ سيڪريٽري ذوالفقار علي ڏهر عرف ڍولڻ ۽ تعليم کاتي سان واسطو رکندڙ سيڪريٽري سنڌ لوڪل گورنمينٽ بورڊ طور ڪم ڪندڙ عبدالحق ابڙو ڏاڍا مشهور ٿيا، جن کي بعد ۾ 19هين گريڊ سان نوازي سينئرن کان سينئر بڻايو ويو هن صاحب پنهنجي آخري ڏينهن ۾ مڪاني ادارن ۾ بي پناهه ڀرتيون ڪري کين تباهه ڪري ڇڏيو، ڪن ڪن ٽائون ڪميٽن ۾ ايترا ته ڪلرڪ آهن جيترا سنڌ سيڪريٽريٽ ۾ سروس جنرل ايڊمنسٽريشن ۽ ڪوآرڊنيشن، فناس، تعليم ۽ صحت جهڙن وڏن کاتن ۾ به نه آهن ڪن ڪن ڪائونسلن ۾ ته چاليهه- چاليهه ،               پنجاهه –پنجاهه ڊرائيور آهن، ان لاءِ صرف ايترو چئبو ته.

“Absolute Power Corrupts Absolutely”

مطلب ته مڪمل اختيار مڪمل طور سان خراب ڪندو آهي هن دور ۾ مڪاني ادارن جي آفيسرن جي امير بڻجڻ جي شهرت ان حد تائين پهتي جو ڊي ايم جي ۽ ايڪس پي سي ايس آفيسرن جو وات به پاڻي ٿيڻ لڳو ۽ انهن مڪاني ادارن جي سربراهيءَ لاءِ چيف سيڪريٽري ۽ وزير اعليٰ تائين ڊڪ ڊوڙ ڪئي، اهڙا آرڊر به جاري ٿيا، پر آغا صاحب ان تي عمل ٿيڻ نه ڏنو.

شرجيل انعام ميمڻ جو دؤر

شرجيل صاحب ڏٺو ته مڪاني ادارن جا ايڊمنسٽريٽر کيس آغا صاحب واري اهميت نه ٿا ڏين ۽ سندس بجاءِ حد جي ايم پي اي ۽ ايم اين اي کي اهميت ڏئي رهيا آهن، پر بدنام هو ٿي رهيو آهي ان ڪري هن پاڻ پهريائين ڊپٽي ڪمشنر ۽ ڪمشنر کي مڪاني ادارن جا خرچ منظور ڪرڻ جا اختيار ڏياريا، بعد ۾ ٻئي گروپ مان ڊي ايم جيءَ ۾ مرج ٿيل ۽ سنڌ ۾ ڊيپوٽيشن جي ڪڌي ڪم ۾ ملوث هڪ آفيسر جي چوڻ تي کين ڪنٽرولنگ اٿارٽي ۽ ايڊمنسٽريٽر جا اختيار ڏئي ڄڻ ته ان ڳالهه جو اعتراف ڪيو ويو ته وزير صاحب کان کاتو نه ٿو هلي ان ڪري ان کي ”اڌ تتر ۽ اڌ بٽير“ يعني اڌ روينيو ۽ اڌ لوڪل گورنمينٽ بڻايو ويو. اصل ۾ هن اهو کاتي کي سڌارڻ جي نيت سان نه پر پنهنجون ڪوتاهيون ۽ نااهلي روينيو وارن جي کاتي ۾ وجهڻ جي ارادي سان ڪيو آهي، ڇو ته جيڪڏهن کيس کاتي کي سڌارڻو هيو ته کاتي کي رموٽ ڪنٽرول ذريعي ڪراچيءَ مان هلائڻ بجاءِ کاتي جي ڊئريڪٽرن اسسٽنٽ ڊئريڪٽر کي اختيار، گاڏيون ۽ ٻيون سهولتون ڏياري ۽ سندن تجربي مان فائدو وٺي اصلاحي فيصلا ڪري هان، ٻئي کاتي جي آفيسرن، جن جون ترقيون ٿين پنهنجي اصلي کاتي جي ڪارڪردگيءَ جي بنياد تي وڏي ڳالهه ته جن کي تجربو به نه هجي اهي ڪهڙو انقلاب آڻيندا، سو به وري روينيو وارا! جن جا تپيدار ڪروڙ پتي، جن جي وڏن آفيسرن جي هائوسن ۾ ماني پچي رشوت جي يعني اهي ماني به پرائي جي کائن، جن جي کاتي کي گذريل سال ٽرانسپرينسي انٽرنيشنل ڪرپٽترين کاتو قرار ڏنو!! ان سان ته سندس جان ڇڏائڻ جو منصوبو به پورو ڪو نه ٿيندو، ڇو ته جيڪو ڪجهه سيڪريٽريٽ سطح تي ٿي رهيو آهي، ڪنهن به آفيسر کي ٽن مهينن کان وڌيڪ نه ٿو رهڻ ڏنو وڃي، سينئارٽي لسٽون نه ٿيون شايع ڪيون وڃن، جيڪو ڪجهه چيف ميونسپل آفيسر، چيف آفيسر ۽ ٽائون آفيسر ڪري رهيا آهن انهن جو جواب ته کائنس پچيو ويندو. وزير موصوف جي جان ته تڏهن آجي ٿيندي جڏهن هو پنهنجي ۽ سيڪريٽري جي موڪل ڪرائي بورڊ آف روينيو ۾ هڪ ميمبر جو اضافو ڪرائي، کيس لوڪل گورنمينٽ جا معاملا ڏسڻ جي ذميواري سونپرائي يا صوبي سطح جا معاملا سروسز کاتي حوالي ڪرائي، ايڊيشنل سيڪريٽري سروسز-III مقرر ڪرائي. اڃا به بهتر اٿس ته استعفا ڏئي کاتي مان پنهنجي ۽ پاڻ مان کاتي جي جان ڇڏرائي باقي جيتري قدر کاتي ۾ سڌاري اچڻ جي ڳالهه آهي ته اهو بلڪل نه اچي سگهيو آهي، بلڪه SCUG آفيسرن کي ايڊمنيسٽريٽر جي روپ ۾ طاقتور گروپ جي” ڇٽي“ ملي وئي آهي، ڇو ته هو اهي آفيسر آهن جيڪي اينٽي ڪرپشن جي ٽنهي يعني ضلعي، ڊويزن ۽ صوبي سطح جي ڪميٽين جا سربراهه آهن، اينٽي ڪرپشن جا چيئرمن ۽ ڊائريڪٽر اهي ٿين، جڏهن ته کين نيب وارا به ايم اين ايز ۽ ايم پي ايز وانگر ”مقدس ڳئون“ سمجهندا آهن، جنهن ڪري هر هڪ ڪائونسل ۾ جيڪو لک ٻن جو ڪم ٿيندو هو سو به حصو پتي ٿيو وڃي صفا ”لڪڙ هضم پٿر هضم“ وارو ڪم لڳو پيو آ، ان سبب ڪري ضلع ۽ ڊويزن سطح جي آفيسرن جي ته ٺهيو، پر پاڻ کي اداس، غمگين ۽ پريشان سڏائيندڙن جي به ڪير ٻڌڻ لاءِ تيار نه آهي. هن عمل سان نه صرف مڪاني ادارن واري کاتي جو رهيو کهيو ڪم لهي ويو آهي، پر روينيو جو به ڊسيپلين وڃي ٿو ختم ٿيندو، ڇو ته اسسٽنٽ ڪمشنر ۽ ڊپٽي ڪمشنر ڪروڙن جي ماهوار بجيٽ جا مالڪ ٿيڻ ڪري وزيرن، مشيرن، ايم اين ايز ۽ ايم پي ايز جي اکين جا تارا بڻجي ويا آهن، جنهن ڪري اهي صرف مرضيءَ جا اسسٽنٽ ڪمشنر مقرر ڪرائڻ ۾ پورا آهن. عوامي نمائيندن جي بي جا لفٽ هجڻ ڪري نه صرف اهي مڪاني ادارن کي ٻنهي هٿن سان لٽي رهيا آهن، پر ڊپٽي ڪمشنرن سان به هُدرا پيا ڏين ۽ ڊپٽي ڪمشنر ڪمشنرن تي سندن موجودگيءَ ۾ ٽوڪيون ڪري رهيا آهن گورنمينٽ طرفان موڪليل آفيسرن جي جوائننگ به تڏهن ٿيندي آهي جڏهن ايڊمنسٽريٽر يعني اسسٽنٽ ڪمشنر ۽ ڊپٽي ڪمشنر جي مقرري ڪرائيندڙ عوامي نمائندو راضي ٿئي. ڇو ته اهي ايڊمنسٽريٽر جيڪي پنهنجي اصلي کاتي جي بالا آفيسرن کي اهميت ڏيڻ لاءِ تيار نه آهن، سي بلديات جي آفيسرن کي ڪهڙي اهميت ڏيندا، جن کي نه هو بدلي ڪري سگهن ٿا ۽ نه ڪا ٻي سزا ڏيڻ جا مجاز آهن. جنهن ڪري ڊسٽرڪٽ ڪائونسلن ۽ ميونسپل ڪاميٽين جا ايڊمنسٽريٽر، جيڪي يونين ڪائونسلن ۽ ٽائون ڪميٽين جا ڪنٽرول اٿارٽي به آهن، سي سيڪريٽري ۽ وزير بلديات جي مٽيننگ ۾ وڃڻ پنهنجي شاهي عزت ۽ وقار جي خلاف سمجهندي ايڊيشنل ڊپٽي ڪمشنر-II کي موڪلي ڇڏيندا آهن، انهن پاران حاضرين تي به مڪاني ادارن جا آفيسر ويندا آهن. پوءِ به انهن کان گهٽين ۾ ٻهارا ڏيارڻ جي اميد رکڻ خام خيالي نه ته ٻيو ڇا آهي؟!. اهي ته صرف چيڪ ڪڍي ڄاڻن ٻيو ته جيڪڏهن روينيو وارا سڌارا آڻن به ها ته به ڪريڊيٽ وزير موصوف کي نه، پر روينيو عملدارن کي ملي ها.

مطلب ته اهو کاتو جنهن تپيدارن لاءِ رئيس، سپروائيزرن لاءِ ميان صاحب ۽ اسسٽنٽ مختيارڪارن لاءِ   خان صاحب جا لفظ ايجاد ڪيا تن ۾ به وڃي ٿو پروٽوڪول ختم ٿيندو ۽ اسسٽنٽ ڪمشنر ايم پي ايز جي زور تي ڊپٽي ڪمشنرن جي ٻڌڻ لاءِ تيار نه آهي، جڏهن ته ڊپٽي ڪمشنر وري ضلع جي بااثر وزير يا سياسي شخصيتن جي زور تي ڪمشنر تي ٺٺوليون پيا ڪن.

 

 برما انسانن جي قتل گاھه؛مسرورسيال

دنيا ۾ ازل کان وٺي ظلم ۽ بربريت جو دور هلندو پيو اچي. ڌرتي کي بيگناھن جي رت سان  رنڱيو وڃي ٿو، ظالم پنهنجي شيطانيت واري هوڏ تي هلندو پيو اچي ۽ پنهنجي ظلم جا نت نوان طريقا استعمال ڪندو پيو اچي. ڪٿي رنگ، نسل جي صورت ۾ ته ڪٿي ننڍ وڏائي واري غرور هيٺ ته ڪٿي وري مذهبن جي جنونيت کي هٿيار بڻائي وٺي ٿو. دنيا ڏسندي پئي اچي  ته ڪهڙي نه نموني انسان ڪٺا پيا وڃن ۽ هر دور ۾ ڪربلا برپا ڪئي پئي وڃي ، مظلوم ڪهڙي طرح هردور۾ انسانيت جي دشمنن هٿان ظلم، ستم، ڏاڍ، ڏمر هيٺ هلندا پيا اچن، دنيا جو ڪهڙو خطو آهي جتي انسانيت کي نه لڄايو ويو هجي، ڌرتيءِ جو ڪوبه اهڙو ٽڪڙو خالي نه هوندو جتي انسانيت جي تذليل جا داستان نه ملندا هجن پر افسوس اهو آهي ته هردور ۾ ظلم خلاف به پسند نا پسند جي بنياد تي آواز بلند ٿيندا رهيا آهن، انساني حقن وارا ادارا ، گڏيل قومن وارو ادارو ، دنيا ۾ آمريت ۽ ظلم بربريت خلاف آواز بلند ڪرڻ جو ٺيڪو کنيل عالمي طاقتن جون اکيون هر وقت کليل ته رهن ٿيون، پر ڏسن اتي ٿيون جتي سندن مفاد سلهاڙيل هجن ٿا عراق، افغانستان ، پاڪستان ، لبيا ، شام سميت اهڙن ملڪن ۾ جتي سندن جائز ناجائز مفاد آهن، اتي مداخلت ڪري اتان جي آزادي کي کسي وٺن ٿا پر بحرين ، يمن ، فسلطين ، برما ۾ ٿيندڙ ظلم نظر نٿا اچڻ ڇو ته اهو ظلم ڪرڻ وارا سندن ويجھا دوست آهن ۽ سندن جائز ، ناجائز ها ۽ نه ۾ ساٿ ڏيڻ وارا آهن برما ۾ جيڪو ٻڌ مت  عقيدي سان تعلق رکندڙن جن  ٻڌ مت جي فڪر کي هاڃو رسائيندي انسانيت کان ڪريل حرڪتون ڪيون آهن اتي انهن انساني حقن جي تنظيمن جي خاموشي ، گڏيل قومن جي داري جي غير ذميواري ، عالمي   طاقتن پاران اک چورائڻ وارو انداز ، عالمي ميڊيا پاران مجرماڻي خاموشي ۽ خود مسلمان ملڪن پاران زبانن کي لڳايل تالن تي ڪيترائي سوال ذهن ۾ اڀرن ٿا … ته ڇا برما جو خطو هن دنيا جو حصو ناهي ، هتي بيدردي سان ڪسجندڙ ، ڦاهي چڙهندڙ ، زنده جلايا ويندڙ ، اجتماعي طور هڪ جاءِ تي گولين جو کاڄ بڻجندڙ برمي مسلمان ڇا هن دنيا جي مخلوق ناهن ……..؟ آخر هتي معصوم ٻارڙن جا ڪسجندڙ ڳلا ڪنهن کي نظر ڇو نٿا اچن ، عورتن سان ٿيندڙ زيادتيون ۽ سندن حساس عضويٰ ڪٽجندي ڪنهن کي نظر ڇو نٿا اچن ، هڪ مسلمان هجڻ جي جرم هيٺ جيڪو ڪجھه انهن سان ٿي رهيو آهي اهي اسان جا دانشور ليکڪ ، ڏاها ڇو تڙپي نٿا اٿن جيڪي خارجين جي ظلمن تي اٿي اسلام تي ته ڇتي تنقيد ڪن ٿا جيڪي اسلام جي حقيقي فڪر کي بيان ڪرڻ بدران پنهنجي دانشوري جو استعمال اسلام جي اڻائن کي ظاهر ڪرڻ ۾ ڪن ٿا ، برما جيڪو 7 ڪروڙ آبادي وارو ملڪ آهي جنهن جي اڪثريتي آبادي ٻڌ مت مذهب سان تعلق رکن ٿا جنهنجا 14 صوبا آهن 1996 ع ۾ هن جو سرڪاري نالو تبديل ڪري ميانماررکيو ويو ٿين سين هڪ فوجي جرنيل آهي جيڪو وڏي عرصي کان آمريت قائم ڪيل آهي ڪنهن زماني ۾ دنيا جي انهن ملڪن ۾ شمار ٿيندڙ جيڪو دنيا کي چانور مهيا ڪندو هو اهو اڄ فوجين جي لٽ مار ۽ بيڊ گورننس ڪري دنيا جي غريب ترين ملڪن ۾ سڃاتو وڃي  ٿو سندس اقتصادي حالت اِها آهي جو سندس جي ڊي پي جي شرح دنيا ۾ گھٽ مان گھٽ واري آهي هن ملڪ جو هڪ وڏو صوبو اراڪان آهي جنهن ۾ مسلمانن جي اڪثريت آهي جيڪو اڳ مسلمانن جي الڳ آزاد رياست هئي 1784ع  برما جي هڪ راجه حملو ڪري ان تي ناجائز قبضو ڪري ورتو هو ۽ برما جو حصو ٻڻائي ڇڏيو هو 1886ع کان 1986ع تائين برٽش راڄ ۾ رهيو صوبو اراڪان بنگلاديش جي ساحلي پٽي جي شهر چاٽگام سان گڏ آهي 2010ع جي آخر ۾  فوجي آمر عالمي دٻاءُ کان پوءِ ملڪ ۾ چونڊون ڪرايون جنهن جي نتيجي ۾ مخالف ڌر جي عورت  اڳواڻ آنگ سانگ سوچي ڪامياب ٿي ۽ اقتدار ۾ آئي جنهن لاءِ چيو پئي ويو ته هن جو رويو مسلمانن لاءِ ڪافي نرم  آهي پر اڪثر مبصرن جو چوڻ آهي ته اِها سندس سياست آهي جيڪا صرف بيانن تائين محدود آهي پر انهن لاءِ عملي طور ڪوبه قدم نه کڻي سگھي آهي جڏهن ته برمي مسلمانن کي هڪ صوبي کان ٻئي صوبي وڃڻ توڙي هڪ شهر کان ٻئي شهر وڃڻ پنهنجي جان جوکم ۾ وجھڻ برابر هوندو آهي هن وقت ته ظلم جي انتها ٿيل آهي جيڪو برما ۾ ڪيو پيو وڃي دنيا جي ڪنهن به ملڪ ۾ اقليت سان اهڙو ظلم نٿو ٿئي جھڙو هتي ڪيو وڃي ٿو ۽ هي ظلم اهي ڪري رهيا آهن جيڪي ٻڌ مت جي ڌرم جا قائل آهن ٻڌ مت جي عقيدي وارا پنهنجي وات ۽ نڪ کي به ڪپڙي سان بند رکن ٿا اهو ان ڪري ته ٻڌمت جو فڪر آهي ته متان سندن وات يا نڪ ۾ به ڪو جيت جڻيو وڃي  مري نه وڃي جنهن ڌرم ۾ جيت جڻئي جي زنگي جو ايترو خيال ٻڌايو ويو هجي اتي انسانيت جو بيدردي سان قتل ڪيو وڃي معصوم ٻارڙن جي ڳلن ۾ ڦاها وڌا وڃن سندن لاشن کي ٽنگيو وڃي سندن ڳلا ڪٽيا وڃن ، سندن جسمن تي ڏنڀ ڏنا وڃن ۽ خنجرن ، ڇرين سان جھير ڏنا وڃن مٿن فائر ڪري اجتماعي قتلِ عام ڪيو وڃي اتي ٻڌمت  ڌرم ضرور شرمندو ٿيندو هوندو پر شرم نٿو اچي ته انهن کي نٿو اچي جيڪي پاڻ کي ٻڌمت ڌرم جا سڏائي اهڙا انسانيت کان ڪريل عمل ڪن ٿا اسين سمجھون ٿا ته اهڙا انسانيت جا ويري ڪنهن به ڌرم جا پوئلڳ نٿا ٿي سگھن نه ئي ڪو ڌرم کين پنهنجو ڪندو پر جيڪي انسانيت کي سمجھن ٿا پوءِ اهي ڪهڙي به ڌرم سان تعلق رکن ٿا اهي برما جي بيگناھه ڪسجندڙ انسانن جي لاءِ آواز اٿارين ۽ سندن مدد ڪن اسان جا حڪمران جيڪي اگھور ننڊ ۾ ستل آهن جن کي پنهنجي ملڪ ۾ ٿيندڙ ظلمن تي سوچڻ ۽ ان کي روڪڻ لاءِ وقت ڪونهي اهي ڪنهن جي ڪهڙي مدد ڪري سگھندا پر جي کين جاڳ به ٿيندي آهي ته صرف پريس بيانن تائين محدود هجن ٿا ان ڪري اسان جي حڪمرانن سميت سمورن مسلمان ملڪن توڙي عالمي انساني حقن جي تنظيمن کي پنهنجا فرض نڀائڻ گھرجن گڏيل قومن جي اداري کي جاڳايو وڃي ، عالمي طاقتن کي پڻ برما ۾ ٿيندڙ ظلم تي اکيون کولڻ گھرجن  هتان جي مظلومن جي مدد ڪرڻ گھرجي برما جا مظلوم جيڪي دنيا جي مدد جا منتظر اهن جيڪي مظلومن جي مدد ڪرڻ وارن ڏانهن وانجھائي رهيا آهن ، ڏسجي ته برما جي مظلوم مسلمانن جي ڪا واهر ٿئي ٿي کين ظلم ۽ ستم جي چنبي مان  آزاد ڪرا يو وڃي ٿو يا نه يا ائين ئي کين ظلم کي برداشت ڪرڻ جو عادي بڻايو ويندو