تازيون خبرون

Daily Archives: June 6, 2015

برما ۾ مسلمانن جي نسل ڪشي ڪئي پئي وڃي، پر عالمي برادري اکيون ٻوٽي ويٺل آهي:سراج الحق

اسلام آباد (بيورو) جماعت اسلامي جي امير سراج الحق چيو آهي ته برما ۾ مسلمانن جي نسل ڪشي ڪئي پئي وڃي، پر عالمي برادري اکيون ٻوٽي ويٺل آهي. اسلام آباد ۾ گڏيل قومن جي آفيس ۾ برما جي مسلمانن تي ظلم خلاف يادداشت نامون جمع ڪرائڻ بعد ميڊيا سان ڳالهائيندي سراج الحق چيو ته برما ۾ مسلمانن جو قتل عام جاري آهي. هن چيو ته برما ۾ ٻڌ ڀڪشوئن هٿان هن وقت تائين 10 لک کان وڌيڪ مسلمانن بيدردي سان قتل ٿي چڪا آهن پر عالمي برادري ان معاملي تي پنهنجون اکيون ٻوٽي ويٺل آهي. سراج الحق چيو ته برما ۾ مسلمانن جي نسل ڪشي ڏسي او آءِ سي جو وجود ئي بي معنيٰ لڳي رهيو آهي. سندس چوڻ هو ته اسلامي دنيا جا حڪمران مسلمانن مٿان ظلم تي گونگا، ٻوڙا ۽ انڌا ٿي ويا آهن. سراج الحق اعلان ڪيو هو ته 14 جون تي اسلام آباد ۾ برما جي مسلمانن جي حق ۾ احتجاج ڪيو ويندو

 

علي امين گنڊاپور سان زيادتي ڪئي وئي آهي، اهو ڌانڌلي روڪرائڻ ويو هو: عمران خان

اسلام آباد (بيورو) تحريڪ انصاف جي سربراهه عمران خان چيو آهي ته علي امين گنڊاپور سان زيادتي ڪئي وئي آهي، اهو ڌانڌلي روڪرائڻ ويو هو، ميان افتخار تسليم ڪيو آهي ته پوليس ساڻس ڪا به زيادتي ناهي ڪئي، نئين مالي سال جي بجيٽ ۾ عوام کي نظر انداز ڪيو ويو آهي. اسلام آباد ۾ ميڊيا سان ڳالهائيندي عمران خان چيو ته جسٽس ريٽائرڊ وجيهه الدين پارٽي ٽربيونل کي سپريم ڪورٽ سمجهي هلائي رهيو آهي. هن چيو ته جسٽس ريٽائرڊ وجيهه الدين جيڪو ڪجهه چيو،  اهو ڪريبه ڏيکاريو، ٽربيونل کي سپريم ڪورٽ سمجهي هلايو پيو وڃي. سندس چوڻ هو  ته علي امين گنڊاپور کي ڌانڌلين خلاف آواز اٿارڻ تي کيس گرفتار ڪري مٿس بدنامي جو داغ لڳايو ويو، جڏهن ته ميان افتخار تسليم ڪيو ته پوليس ساڻس زيادتي ناهي ڪئي. عمران خان چيو ته بيت المال جو پئسو گلگت اليڪشن تي استعمال پيو ٿئي، وفاق رڳو پنجاب کي پاڪستان سمجهي شهباز شريف تي مهرباني ڪري رهيو آهي. پي ٽي آءِ سربراهه پنجاب جي اڳوڻي نگران وڏي وزير  تي تنقيد ڪندي چيو ته نجم سيٺي ڀاڻيجي ذريعي ڏيڍ ڪروڙ ٽيڪس معاف ڪرايو. عمران خان چيو ته پنجاب حڪومت جي پٺڀرائي سبب طاهر القادري جي ڪارڪنن کي قتل ڪندڙن کي ڇڏيو ويو، جڏهن ته طاهر القادري سان زيادتي ٿي آهي. عمران خان وڌيڪ چيو ته ماڊل ٽائون ۾ پرامن مظاهرين کي گولين جو کاڄ بڻايو ويو، پر اڃا تائين متاثر کي انصاف نه ملي سگهيو آهي. عمران خان ڪي پي ڪي ۾ مڪاني چونڊن دوران بدنظمين جي تصديق ڪندي چيو آهي ته جيڪڏهن سموريون ڌريون ڌانڌلين جون دانهون ڪري رهيون آهن ته پوءِ ٿيون هونديون. هن چيو ته ڪي پي ڪي ۾ مڪاني چونڊن ۾ انتظامن جي ذميواري اليڪشن ڪميشن جي هئي، حڪومت تي الزامبازي بند ڪئي وڃي. عمران خان نئين مالي سال جي بجيٽ جي حوالي سان ڳالهائيندي چيو ته بجيٽ ۾ عوام کي رليف ملڻ جي ڪا اميد ناهي، اميرن کي نوازڻ لاءِ رٿابندي ڪئي وئي آهي.

 

اتر وزيرستان جي علائقي شوال ۾ فورسز جي بمباري، 9 دهشتگرد مارجي ويا

اُتر وزيرستان (مانيٽرنگ ڊيسڪ) اتر وزيرستان جي علائقي شوال ۾ فورسز جي بمباري جي نتيجي ۾9 دهشتگرد مارجي ويا، جڏهن ته ڪيترن ئي ٺڪاڻن کي تباهه ڪيو ويو آهي.ذريعن موجب، اتر وزيرستان جي علائقي شوال ۾ فورسز دهشتگردن جي ٺڪاڻن تي جيٽ جهازن ذريعي بمباري ڪئي.فورسز جي ڪارروائي دوران پابندي مڙهيل تنظيم سان واسطو رکندڙ 9 دهشتگرد مارجي ويا، جڏهن ته سندن ڪيترن ئي ٺڪاڻن کي تباهه ڪيو ويو آهي.واضح رهي ته اتر وزيرستان جي مختلف علائقن ۾ فورسز جو ڊگهي عرصي کان آپريشن جاري آهي، جنهن دوران ڪيترائي دهشتگرد پڻ مارجي چڪا آهن.

 

ڪراچيءَ ۾ به ميٽروبس سروس جو اعلان

 

وزير اعظم نواز شريف اسلام آباد کان راولپنڊي ميٽرو بس سروس جو افتتاح ڪري ڇڏيو آهي، سندس چوڻ آهي ته ٽن سالن ۾ ملڪ مان لوڊشيڊنگ ختم ڪري ڇڏينداسين، جڏهن ته وفاقي حڪومت ڪراچي ۾ به ميٽرو بس سروس هلائيندي، گذريل ڏينهن اسلام آباد ۾ ميٽرو بس سروس جي افتتاحي تقريب کي خطاب ڪندي وزير اعظم نواز شريف چيو ته آمريتي دور ۾ هميشه جنگون ٿينديون آهن، جمهوري دور ۾ ڪڏهن به جنگ ناهي ٿي.سمورا ادارا جمهوريت جو احترام ڪن. هن چيو ته جمهوري دور ۾ ملڪ ترقي ڪندو آهي. پاڪستان ۾ ترقياتي ڪم جمهوري دور ۾ ٿيندا آهن، وزير اعظم ٽن سالن ۾ بجلي جي لوڊشيڊنگ ختم ڪرڻ جو اعلان ڪندي چيو آهي ته مستقبل ۾ بجلي سستي پڻ ٿيندي. هن چيو ته ساڍا ٽي رپيا في يونٽ بجلي سستي ڪئي آهي، هن وقت تائين ساڍا پنج رپيا في يونٽ بجلي سستي ڪري چڪا آهيون. هن چيو ته بجلي جي کوٽ ختم ڪرڻ لاءِ نوان منصوبا جوڙي رهيا آهيون. الله تعاليٰ ملڪ کي بُري نظر کان بچائي. وزير اعظم چيو ته خنجراب کان وٺي گوادر تائين موٽر وي ٺاهينداسيڪراچي ۾ به وفاقي حڪومت ئي ميٽرو بس سروس هلائيندي. هن چيو ته ڪراچي ۾ امن ٿي رهيو آهي اتي روشنيون بحال ٿي رهيون آهن. ڀنگ لاءِ اغوا ۽ ڀتا خوري مڪمل طور ختم ٿي چڪي آهي.هن چيو ته دهشتگردي خلاف جنگ کٽينداسين. هي بدلجندڙ پاڪستان ۽ نئين صبح جو ڪِرڻو آهي. هن چيو ته شهباز شريف نئون پنجاب ٺاهي رهيو آهي نوان شعر به ٻڌائيندو. وزير اعظم نواز شريف شهباز شريف کي چيو ته هاڻي توهان نوان شعر پڙهندا ڪريو، هاڻي نئون دور اچي ويو آهي. هن چيو ته جيترو پيٽرول هن حڪومت ۾ سستو ٿيو آهي اوترو اڳ ڪڏهن نه ٿيو. ان موقعي تي وزير اعظم ميٽرو بس منصوبي جي ٽيم لاءِ پنج ڪروڙ رپيا انعام ڏيڻ جو اعلان پڻ ڪيو. هوڏانهن وزيراعظم نواز شريف خيبرپختونخواهه ۾ مڪاني چونڊن دوران 18 ڄڻن جي مارجڻ تي افسوس جو اظهار ڪندي چيو آهي ته عام چونڊن کان وڌيڪ خيبرپختونخواهه ۾ مڪاني چونڊن دوران بدنظمي ٿي، ڇا انساني جانين سان کيڏڻ نئون پاڪستان آهي.

ماتلي لڳ انسانيت لڄائيندڙ واقعو

ماتلي لڳ ڳوٺ شفيع محمد نظاماڻي ۾ گذريل ڏينهن انسانيت کي لڄائيندڙ واقعو پيش آيو، وحشي جوابدارن 35   ورهين جي عورت ملوڪان سامي سان جنسي ڏاڍائي ڪرڻ کانپوءِ ڳلو وڍي بيدردي سان قتل ڪري لاش واهه ۾ لوڙهي ڇڏيو.وارثن کي  ڳولا ڪرڻ تي عورت جو ڪپڙن کان آجو لاش واهه مان مليو،جنهن کانپوءِ پوليس کي اطلاع ڏنو ويو، ايڌي رضاڪارن لاش کي اسپتال پهچايو، پوليس مارٽم رپورٽ ۾ عورت سان ڏاڍائي جي تصديق ڪئي وئي آهي،مقتولا جو مڙس نبو سامي گم ٿي ويو آهي، مقتولا عورت جي ڀاءُ پالاري سامي جي فرياد تي اڻ ڄاتل ماڻهن خلاف ڪيس داخل ڪيو ويو آهي. رابطو ڪرڻ تي مقتولا عورت جي امڙ صحافين کي ٻڌايو ته ملوڪان اربع ڏينهن گهر جو سامان وٺڻ وئي هئي، جيڪا واپس نه موٽِي ۽ گذريل ڏينهن ڳولاتي واهه مان لاش مليو، هن چيو ته اسان جي ڪنهن سان به دشمني ناهي،هن مطالبو ڪيو ته جوابدارن کي جلد گرفتار ڪري سزا ڏني وڃي ، ٻئي پاسي پوليس کي لاش وٽان ڳلي وڍڻ لاءِ استعمال ڪيل  ڇري به هٿ آئي آهي

 

قانوني چهرا؛خرم“سمير” سنديلو

پوليس وارا صاحب مونسان ظلم ٿي ويو…قهر ٿي ويو، منهنجي فرياد ٻڌو…..

اڙي ڇا ٿيو.؟

سائين مونکان ڦر ٿي وئي.

ڪٿان ڦر ٿي ويئي.

سائين صدر مان گهر پيو وڃا رستي تان ڦر ٿي وئي.

ڇا ڇا ڦرجي ويو اٿئي.

سائين 30 هزارن جي موبائيل ڪجهه روڪ رقم ڦر ٿي وئي آهي

اڇا، گهڻا ڄڻا هيا ڦر ڪندڙ….

سائين ٽي ڄڻا هيا…

رنگ جا ڪيئن هيا….

سائين سڀن جو ڪارو رنگ هيو لائيٽن جي روشني ڪري مٿون چمڪين پيو.

سائين وار به ڪو نه هين….ٽئي ٺوڙها هيا.

اڇا….قد جا ڪيترا هيا…

سائين هيا ته مونکان وڏا پر قد ننڍڙو هين..

اڙي اهيو وري ڪيئن؟…توکان وڏا به هيا ۽ قد ننڍڙو به هين…

سائين هونئن ته وڏا پيا لڳن پر ويٺا موٽر سائيڪل تي هيا انڪري مونکان ننڍا پيا لڳن…

اڇا…چهرا ڪيئن هين..

سائين ٽئي هڪ جهڙا هيا….

اڙي ٽئي ڪارا به هيا، ٽنهي جي ٽڪڻ به هئي. وري هاڻي ٽئي لڳن به هڪجهڙا پيا….

سائين امان جو قسم ڪوڙ نه ٿو ڳالهايان ٽئي هڪجهڙا هيا.

اڙي اهيو ڪيئن ٿو ٿي سگهي….

سائين ٽنهي کي قانوني چهرا هيا نه…!

اڙي ڪهڙا قانوني چهرا…. ڇورا شراب پي آيو آهين ڇا….

سان امان جو قسم مان موالي ناهيان.. سچ ٿو ڳالهايان ٽنهي کي قانوني چهرا هيا….

ڇورا،،،، اهي وري ڪهڙا قانوني چهرا آهن… ڀلا ٽنهي کي منهنجي تي ڳورنمينٽ جا ٺپا لڳل هيا ڇا؟

نه سائين ٺپا ته نه هين…..

اڙي پوءِ ڪيئن قانوني چهرا ٿيا….

سائين اهي توهان وارا هيلميٽ پاتل هين…..

سائين ويندي ويندي چئي ويا ته جيئن ڪو ڪيس داخل ڪرايئي ته ماري ڇڏيندا مونکي….

اڙي پو توکي خوف نه ٿيو جو وري ٿاڻي تي آيو آهين….

سائين مونکي به قانوني چهرو…مطلب هيلميٽ پاتل هيو نه……

اڙي پو انهن جي ڳولها ڪجي ڪيئن…. هاڻي ته هيلميٽ پائڻ جو قانون لاڳو ٿي ويو آ… هاڻي ته سڀئي هيلميٽ پيا پائين ايتري قدر جو عورتن کي به هيلميٽ پائڻ ضرور ٿي ويو آ….

سائين مونکي نه چور کپن، نه چوري ٿيل موبائيل ۽ پئسه…

اڙي پوءِ آيو ڇو آهين اسان جو مٿو کائڻ يا اسان جو ٽائيم تباهه ڪرڻ…

سائين مان ان ڪري آيو آهيان ته اسان جي الله جي واسطي اسان کي پنهنجا چهرا موٽائي ڏيو…. اسان کي قانوني چهرا نه کپن…. گهٽ ۾ گهٽ ڪا وارڌات ٿئي ٿي يا ڪا دهشتگردي ٿئي ته انهن دهشتگردن جي سڃاڻپ ته ڪري سگهون نه؟ قانوني چهرن ۾ ته سڀ هڪجهڙا پيا لڳن. توهان مهرباني ڪري اسان کي پنهنجا چهرا موٽائي ڏيو ۽ جيئن توهان کي اسان جو ايترو خيال آهي ته توهان اڳين قانونن يعني گاڏين جي تيز رفتاري تي پابندي لڳايو. ننڍي عمر جي ٻارن جي ڊرائيورنگ تي پابندي لڳايو…بائيڪرس گينگ تي بندش هڻو…ڦورن ۽ دهشتگردن جي سهولت لاءِ ته قانون نه جوڙيو. هاڻي ته ڪڌيون ڪاررواين ڪرڻ به ڄڻ آسان ٿي ويون آهن. هيلميٽ پائي ڪجهه به ڪر، دهشتگرد گاڏين جا نمبر هون به جالي پيا لڳائن هاڻي ته انهن جي سڃاڻپ ڪرڻ به مشڪل ٿي وئي آهي.

 

 

آغا شهاب الدين سنڌ جو نبض شناس؛فوزيا آغا

آغا شهاب الدين سنڌ جو اهو حلالي پٽ آهي جنهن پنهنجي سڄي ڄمار بي لوث خدمت ڪئي، پر سنڌ ۽ سنڌ جي عوام ۾ ترقي، سجاڳي، حقن جي حاصلات ۽ بااختيار زندگي گذارڻ جي طور طريقن سان گڏ سنڌ جي تاريخ جيڪا هن پنهنجي اکين سان ڏٺي ، ڪنن سان ٻڌي يا اهو جيڪو سندس اڳيان وهيو واپريو آهي انهن حقيقتن کي اهڙي انداز سان بيان ڪيو ويو آهي. جو هڪ پڙهندڙ سندس لفظن جي سحر ۾ جڪڙجي وڃي ٿو. ۽ سندس مضمون جون به چار سٽون پڙهي ته اهو نه چاهيندي به آغا صاحب جو اهو ليک پڙهي پورو ڪري ٿو. هر لکڻي سچ، ۽ سٽ سٽ ڏاهپ، دانش ۽ عقلمندي جو ڀنڊار محسوس ٿئي ٿي. هو سنڌ جي ويجهڙائي واري تاريخ جا اهي باب کولي ٿو جنهن جا ڪردار سنڌ واسين جي اڳيان باوجود اهم شخصيتن جا گهڻ پاسائا ۽ ان ڪردار جا اڃا به وڌيڪ کوجنائو ۽ ڳولائا آهن. آغا صاحب پنهنجي لکڻين ۾ اهڙيون حقيقتون بيان ڪيون آهن جيڪي عوام جي اکين کان اوجهل رهيون آهن سنڌ ۾ وڏا وڏا ڪم ٿي رهيا آهن پر اڄ تائين نه سنڌ جي تاريخ تي باقائدي سان ڪم ٿي سگهيو آهي نه ٻولي تي ڪي ڪم ٿي سگهيا آهن ۽ نه وري سنڌ جي تاريخ تي سائنس پتاندر ڪا تحقيق ٿي سگهي آهي، نه وري سنڌ بابت ڪو اهڙو مواد آيو آهي. جنهن کي اسين عالمي سطح تي پيش ڪري سنڌ جو حق ادا ڪري سگهون. پر جهڙي طرح جي ايم سيد، پير علي محمد راشدي ۽ اديبن ساروڻيون لکيون آهن آغا شهاب الدين به ڄڻ انهن جي تقليد ڪئي آهيجيڪي اهم انڪشافات آغا شهاب الدين پنهنجي لکڻين ۾ ڪيا آهن اهي ٻين ليکڪن وٽ گهٽ ملن ٿا. مثال طور علامه آءِ آءِ قاضي سنڌ يونيورسٽي جي بنياد وجهندڙن مان نه هو، ۽ آءِ آءِ قاضي کي سنڌ يونيورسٽي جو وائيس چانسلر مقرر ٿيڻ کان پوءِ علامه جو خطاب ڏنو ويو هو. ذوالفقار علي ڀٽو، ايوب خان جي دور ۾ نه پر اسڪندر مرزا جي دور ۾ وزير ٿيو هو. ٻيو ته ذوالفقار علي ڀٽي اهڙن ماڻهن کي پنهنجي پارٽي ۾ آندو ۽ انهن کي اهميت ڏئي وزير ڪيائين جن کان اڳ عوام اڻ واقف هو. مٿال طور مير رسول بخش تالپر کي سنڌ جو گورنر بنائڻ جيڪو ڪڏهن حيدرآباد ميونسپل ڪميٽي جو چيئرمئن به نه رهي چڪو هو، ممتاز علي ڀٽي کي سنڌ جو وڏو وزير ڪرڻ ، غلام مصطفيٰ جتوئي کي سنڌ جو وڏو وزير ڪرڻ، ڊاڪٽر مبشر کي آڻڻ، عبد الحفيظ پيرزادي، ڄام صادق، پيار علي الانا، عبد الله شاه ۽ ٻين کي اڳتي آندائي پر جي ايم سيد ۽ رسول بخش پليجي جهڙين شخصيتن کي پوئتي ڌڪي ڇڏيائين، ۽ اهو ته تاشقند ٺاهه وقت هندستان جي سياستدانن شاسستري کي قائل ڪيو هو ته جنرل ايوب خان سان ڳالهين دوران ذوالفقار علي ڀٽو کي نه ويهاريو وڇي ڇو ته ذوالفقار علي ڀٽو جي موجودگيءَ ۾ هندستان پاڪستان کان پنهنجا مطالبا نه مڃرائي سگهي ها. ڇو ته هندستانين خود مڃي ورتو هو ته هندستان وٽ ڀٽي جي پائي جو ليڊر موجود نه هو. خود شاسستري جو تاشقند ۾ مري وڃڻ ڇا ظاهر ڪري ٿو ان جا ڪارڻ ڪهڙا هئا. آغا شهاب الدين پنهنجي لکڻين ۾ اهو ذڪر ڪيو آهي ته بنگال جا اُهي بهاري جيڪي الشمس ۽ البدر جا تربيت ورتل ويڙهاڪ غير قانوني طريقن سان سنڌ جي لطيف آباد ۽ لياقت آباد ڪراچي ۽ ٻين شهرن ۾ آباد ٿيا آهن آغا شهاب الدين پنهنجي لکڻين ۾ سڌي طرح ڪيئي اهم انڪشاف ڪري ويو، هو حڪمران ڌر ۽ سنڌ جي عوام کي سجاڳ ڪندي سمجهائي ويو ته اهي الشمس ۽ البدر وارا بنگالين سان سڄا نه ٿيا اهي ويڙهاڪ سنڌ ۾ پهتل آهن، اُهي ويڙهاڪ جيڪي بنگال ۾ ضم نه ٿي سگهيا ۽ بنگال کي انهن ڪڏهن به پنهنجي ڌرتي نه سمجهو ته اهي لوڌيل سنڌ کي پنهنجي ڌرتي ڪيئن سمجهندا ۽ سنڌين ۾ ڪيئن ضم ٿي سگهندا. اها آغا شهاب الدين جي فن جي بلندي آهي ته هو وڏيون وڏيون تاريخي ۽ سبق آموز ڳالهيون انتهائي سادن ۽ عام فهم لفظن ۾ چئي پنهنجو حقيقي ڪردار ادا ڪري ويو آهي.آغا شهاب الدين پنهنجي لکڻيبن ۾ ان ڳالهه جو به ذڪر ڪيو آهي ته شيخ مجيب الرحمان 1970 وارين چونڊن کان اڳ ئي بنگلاديش جو نعرو هڻڻ شروع ڪيو هو، جڏهن ته عام طور تي اهو چيو ويندو آهي ته شيخ مجيب جو مينڊيٽ تسليم نه ڪيو ويو هو انهيءَ ڪري شيخ مجيب آزاديءَ جو نعرو هنيو هو. آغا صاحب پنهنجي لکڻين ۾ انڪشاف ڪيو آهي ته شيخ مجيب، ذوالفقار علي ڀٽي جو مخالف نه هو، ٻيو ته شيخ مجيب الشمس ۽ البدر وارن کي اها آڇ به ڪئي هئي ته انهن سان گڏ جيڪي به غير بنگالي آهن جيڪڏهن اهي بنگالي بنجي رهن ته انهن کي بنگلاديش ۾ اهي سڀ حق ڏنا ويندا جيڪي حق بنگالين کي ميسر هوندا پر الشمس ۽ البدر وارن شيخ مجيب جي انهيءَ آڇ کي ٺڪرائي چيو ته اهي پنهنجي سڃاڻپ برقرار رکڻ پيا چاهين ۽ بنگالي ٿيڻ لاءِ تيار نه هئا. ڪجهه تاريخدانن جو خيال آهي، الشمس ۽ البدر ٻن حصن ۾ هئي هڪ حصو اوڀر پاڪستان موجوده بنگال ۽ ٻيو حصوسنڌ ۾ موجود هو، هڪ حصو شيخ مجيب کي پسند نه پيو ڪري ته ٻيو حصو ذوالفقار علي ڀٽو کي قبولڻ لاءِ تيار نه هو، جنهن لطيف آباد، ڪراچي ۾ ذوالفقار علي ڀٽي سان کلم کلا بغاوت ڪئي هئي، انهن ڌرين ان وقت نه صرف جي ايم سيد تي حملا ڪرايا هئا، پر انهن ڌرين 100 ڄڻن گڏجي عبد الرزاق سومري جي جسم تي ڇرين جا وار ڪري کيس شهيد ڪيو هو، سنڌ يونيورتي (موجوده اولڊ ڪئمپس) کي باهه ڏئي ڇڏي هئي، ڪجهه ڌرين جو اهو به خيال آهي ته الشمس۽ البدر جا نالا تبديل ضرور ڪيا ويا پر انهن پنهنجا ڪم ۽ ڪرتوت تبديل نه ڪيا ۽ اهي ڪنهن نه ڪنهن شڪل ۽ ڪنهن نه ڪنهن روپ ۾ سنڌ تي شهيد عبدالرزاق سومري جهڙا وار ڪندا رهيا آهن. آغا صاحب پنهنجي لکڻين ۾ کوڙ ساريون نروار ۽ چٽيون ڳالهيون چيون آهن جن کي سمجهڻ ۽ انهن کي اڳتي وڌائڻ جي ضرورت آهيآغا صاحب جتي سياست ۽ سنڌ جي مسئلن جي چڱيءَ طرح اپٽار ڪئي آهي ته اتي هن سماجي مسئلن تي به گهري نظر رکي آهي، ۽ هن چٽيءَ طرح ئي چيو آهي ته آخر سنڌ جا ماڻهو وڃن ته ڪيڏانهن وڃن، وڏيرا ڳوٺڻ جون نياڻيون تاڙين، ڪامورا عرضدارن ۽ مجبورن کي بري نظر سان ڏسن، هاري ٻج ڀاڻ، جيت مار دوا ۾ ڦاٿل آهن، استاد شاگردن کي پڙهائڻ بجاءِ گسائڻ، ڪاپي ڪلچر جا ڪردار ٿين، ڊاڪٽر او پي ڊي ۾ وڃڻ کان ڪترائين، ڊاڪٽر شاگردياڻاين، مريضياڻين ۽ نرسن کي بدنيتي سان ڏسن، انجنيئر واٽر ڪورس ڀڃي عوام جو پاڻي وڪڻي هر ڪم ۾ ڪميشن وٺن ۽ هڻي سرڪاري ادارن جي ڀينگ ڪري ڇڏين ۽ عوام ويچارو اهو ئي درخواستون لکارائي پنهنجي حقن لاءِ هڙتالون ڪندو ٻاڪاريندو رهي ٿو. آغا صاحب جو چوڻ آهي ته ڏاها خاموش تماشائي آهن اهي قوم جي رهبري ۽ دلبري نه ٿا ڪن، اهي عوام کي صحيح دڳ نه ٿا ڏيکارين، ملڪ مسئلن جي ڌٻڻ ۾ ڦاسندو ۽ مستقل الجهندو رهي ٿو پر سياستدانن سميت هر ماڻهو عوام جي بدنصيبي ۽ هٿ وٺي سندس قسمت سان کيڏڻ وارو تماشو ڏسندو رهي ، ڪوبه اڳتي وڌي عوام جي مرض جي دوا ڪرڻ لاءِ تيار نه آهي. آغا صاحب سنڌ جي ڳوٺن، ٻهراڙين، شهرن ۾ هر هنڌ ويو ۽ هن سماجي مسئلن جو چڱي طرح جائزو ورتو ۽ مطالعو ڪيو ته سنڌ جي عوام جا اصل مسئلا، گهرجون ڪهڙيون آهن ۽ هن پنهنجي حال سارو انهن مسئلن جا حل به ڏسيا آهن، انهيءَ چوڻ ۾ ڪوبه وڌاءُ نه آهي ته آغا صاحب سنڌ جي عوام جي اڻ کٽ مسئلن جي حل لاءِ تڙپندو ۽ لڇندو رهيو،جنهن جو جا بجا ذڪر سندس لکڻين ۾ ملي ٿو. پر آهي ڪو آغا شهاب جي ڏسيل راه تي سنڌ جي عوام کي وٺي هلي، سنڌ جي عوام جاڏک درد دور ڪري، هن اڏوهي کاڌل ڪرپٽ نطام کي تبديل ڪري،سنڌ جي سينڌ سنواري عوام جي قسمت تبديل ڪري، جڏهن تو موجوده نبض شناس بدنيت، منافق ۽ فريب جي دائري ۾وڌندڙ ويجهندڙ پنهنجن پنهنجن مفادن سان سچا ، پنهنجا ڀڀ ڀرڻ ۾ پورا ، سنڌ جي اٻوجهه عوام کي فقط معجزن ۽ آسرن تي ڇڏڻ سان ڪابه قوم سڌري سگهندي؟ ڏکايل ۽ اهنجن ۾ ورتل قوم کي خوشحالي جا سبق ڪير ڏيندو، ڪير انهن جي داد رسي ڪندو، سنڌ ۾ سم جو پاڻي 24 فوٽن بجاءِ 4 فوٽن تي اچي پهتو آهي ٽيڪنيڪل ۽ ميڊيڪل ڌنڌي واپار ۽ ڊگرين وارا ماڻهون ۽ ادارا به هڏڪين ۾ پهتا آهن ڇو ته جنهن ملڪ ۾ ڪامورا ۽ ڪاردار رشوت کي ايمان سمجهن، وڏيرا غريبن جا حق ته ٺهيو پر انهن جي امداد ۽ زڪوات به کايو وڃن، اهي رشوت جي پئسن مان عمرو ، خيراتون، حج ڪن ۽ رشوت ۾ فراواني لاءِ دعائون گهرن. اها ئي اسانجي وڏيرن، سياستدانن ۽ ڪامورن جي سماجي حيثيت آهي. جتي رشوت حق ۽ جائز ڪاروبار سمجهو وڃي، اتي عوام جا حقيقي حق ڪٿي وڃي بيهن ٿا. جيڪڏهن هن ملڪ جي عوام کي نفرت ۽ ڪروڌ جي ڪن ۾ ڦاسايو ويو ته اهو وقت پري نه آهي جو عوام جي نفرت ڪنهن نئين انقلاب کي جنم ڏئي، انهن ڊوهي وڏيرن ۽ بدبوءِ دار ڪردار روارن سياستدانن مان ڇوٽڪارو حاصل ڪن. اڄ به تعليم يافته نوجوان مڙسي ڪن ته اهي ذوالفقار علي ڀٽي جيان آمريڪا جي ڳچيءَ ۾ پئجي سگهن ٿا، نوجوان آيت الله خميني جهڙو ڪردار ادا ڪندي سماجي ڄورن مان عوام جي جان آجي ڪرائي سگهن ٿا، سنڌ کي روشن راهه تي آڻي سگهن ٿا ۽ سنڌ جو مستقبل ترقي يافته ڪرڻ لاءِ ڪردار ادا ڪري سگهن ٿا.آغا شهاب الدين اهو واحد اديب آهي جنهن نه صرف عوام جي اهنجن جي اپٽار ڪئي آهي پر انهن مسئلن جا حل به ڏسيا آهن، جيڪڏهن عوام اڄ به آغا شهاب الدين جي ڪتابن جو مطالعو ڪري انهيءَ جي ڏسيل راهن تي هلڻ جي همت ڪري نڪري پوي ته اهو وقت پري نه آهي سنڌ جا ماڻهون پنهنجا حق ماڻي سگهندا،پنهنجي تقدير پاڻ تبديل ڪري سگهندا ۽ سنڌ ماءُ جي سينڌ سنواري سگهندا.