تازيون خبرون

Daily Archives: May 26, 2015

سنڌ هاءِ ڪورٽ آءِ جي سنڌ ۽ اي ڊي آءِ جي کي ڪم کان روڪي ڇڏيو

ڪراچي(اسٽآف رپورٽر) سنڌ هاءِ ڪورٽ ٻه ڏينهن اڳ عدالت جي احاطي ۾ نقاب پوش پوليس اهلڪارن جي هٿان صحافين تي تشدد  تي ڪراچي پوليس چيف قادر ٿيٻو ۽ ڊي آءِ جي ڪراچي کي ڪم ڪرڻ کان روڪي ڇڏيو. سنڌ هاءِ ڪورٽ جي جسٽس سجاد علي شاهه ذوالفقار مرزا جي سيڪيورٽي ۽ توهين عدالت جي درخواست جي ٻڌڻي ڪئي. ٻڌڻي دوران آءِ جي سنڌ غلام حيدر جمالي جو چوڻ هو ته امن امان جي صورتحال حال خراب آهي، دهشتگرد ڪارروايون ڪري رهيا آهن. عدالت جي احاطي اندر  جن پوليس اهلڪارن صحافين ۽ سيڪيورٽي گارڊن تي تشدد ڪيو انهن خلاف ڪارروائي ڪئي ويندي. جج آءِ جي سنڌ کي چيو ته ڇا سنڌ هاءِ ڪورٽ ۾ حملو ٿيو ته  ڇا فوج کي گهرائڻو پوندو. ذوالفقار سان گڏ جيڪي دهشتگرد آيا هئا. انهن ڪيتريون گوليون هلايون. عدالت جي اڳيان صحافين تي تشدد ٿيو ۽ توهان ستا پيا هئا. توهان ته فون کڻڻ به ضروري نه سمجهيو، ان کان پهرين به انهن کي توهين عدالت جا نوٽيس جاري ڪيا ويا هئا. اسان کي اهڙو آءِ جي نه کپي، جيڪو عدالتن جي حفاظت نه ڪري سگهي. آءِ جي سنڌ حلف نامو جمع ڪرائي ته جيڪي به فوٽيج ۾ نظر ايندڙ سڀني اهلڪارن جا نالا عدالت کي پيش ڪيا ويندا. عدالت ايڊيشنل آءِ جي، ڊي آءِ جي اتر ۽ ايس ايس پي اتر کي آئنده حڪامات تائين ڪم ڪرڻ کان روڪي ڇڏيو. ڪيس جي وڌيڪ ڪارروائي اڱاري تائين ملتوي ڪئي وئي .

 

وزيراعظم سان آرمي چيف جي ملاقات، ملڪي صورتحال تي ڳالهيون

اسلام آباد(بيورو) وزير اعظم نواز شريف آرمي چيف جنرل راحيل شريف سان ملاقات ڪئي، ملاقات دوران ملڪ ۾ اندروني ۽ بيروني صورتحال تي خيالن جو اظهار ڪيو،  ملاقات ۾ ڀارت جي بچاءِ واري وزير منوهر پاريڪر  پاران دهشتگردي تي ڏنل بيان  تي پڻ ڳالهايو، آرمي چيف ۽ وزير اعظم جي ملاقات ۾ ڪراچي آپريشن ۽ ملڪ ۾ سيڪيورٽي جي صورتحال تي پڻ ڳالهايو. ٻئي طرف وزيراعظم نواز شريف ڊسڪا واقعي جو نوٽيس وٺندي هدايت ڪئي آهي ته ڪنهن کي به قانون هٿ ۾ کڻڻ جي اجازت نه ڏني وڃي. وزيراعظم صوبائي عملدارن کان واقعي جي رپورٽ طلب ڪري ورتي آهي. هن چيو ته ڪنهن کي به قانون هٿن ۾ کڻڻ جي اجازت نه ڏينداسين.

 

سيالڪوٽ ۾ ايس ايڇ او جي فائرنگ ڪري بار صدر سميت 2 وڪيل ماري ڇڏيا رينجرز طلب

سيالڪوٽ (م.ڊ) سيالڪوٽ جي تعلقي ڊسڪا جي اسٽيشن هائوس آفيسر ( ايس ايڇ او)  شهزاد وڙائچ سان گڏ ميونسپل ايڊمنسٽريشن ( ٽي ايم او) طرفان حد دخلين خلاف آپريشن ڪيو جنهن تي علائقي واسين ۽ وڪيلن احتجاج ڪيو  ۽ مطالبو ڪيو ته ڪجهه ڏينهن ڏنا وڃن جنهن کان پوءِ حد دخليون هٽايون وڃن. مظاهرين کي ڇڙوڇڙ ڪرڻ لاءِ ايس ايڇ او فائرنگ ڪري ڏني  جنهن ۾ صدر بار ايسوسيئيشن جو صدر راڻا خالد جان سميت ٽي ڄڻا سخت زخمي ٿي پيا جن کي اسپتال نيو INP 25-14ويو  جنهن دوران صدر بار ايسوسيئيشن جو صدر راڻا خالد جان ۽ هڪ ٻئي وڪيل زخمن جا سور نه سهندي دم ڌڻي حوالي ڪيو.  وڪيلن تي فائرنگ ڪندڙ ايس ايڇ او کي حراست ۾ وٺي ڇڏيو آهي.سيالڪوٽ جي علائقي ڊسڪا ۾ ايس ايڇ جي فائرنگ ۾ وڪيلن جي مارجڻ کان پوءِ وڪيل سراپا احتجاج اسپتال ۾ هنگاما آرائي، وڪيلن اسپتال ۾ ٽوڙ ڦوڙ ڪري درين جا شيشا ٽوڙي ڇڏيا، روڊن تي نڪري ٽائرن کي باهيون ڏيئي روڊ بند ڪري ڇڏيو، جنهن کان پوءِ ٿاڻي جو گهيراءُ ڪيو ويو جنهن تي پوليس وڪيلن  کي ڇڙو ڇڙ ڪرڻ لاءِ آنسو گئس جو استعمال ڪيو، جنهن سبب ڊسڪا وارو علائقو ميدان جنگ بنجي ويو.  سيالڪوٽ ۾ به  وڪيلن احتجاج ڪندي ٿاڻي جو گهيراءُ ڪري پوليس جي گاڏين جا شيشا ٽوڙي ڇڏيا. ائين ئي لاهور ۾ به وڪيل مال روڊ تي نڪري آيا ۽ پنجاب اسيمبلي جو گهيراءُ ڪيو  جنهن دوران اسيمبلي ۾ موجود ميمبرن ۽ عملي کي ٻئي دروازي کان ٻاهر ڪڍيو ويو.  ملتان جي ڪچهري  چوڪ تي پڻ وڪيلن احتجاج ڪيو  ۽ روڊ بند ڪري ڇڏيو جنهن سبب ٽرئفڪ جام ٿي وئي، وڪيلن پوليس اهلڪارن کي ڌڪا ڏئي ڀڄايو  ۽ سندن گاڏين جا شيشا ٽوڙي ڇڏيا.ٻئي طرف چيف جسٽس لاهور هائي ڪورٽ جسٽس منظور ملڪ ڊسڪا واقعي جو نوٽيس وٺندي، فوري طور تي رينجرز  طلب ڪرڻ جو حڪم ڏيئي ڇڏيو . ڊي پي او سيالڪوٽ ڊاڪٽر آصف شهزاد چيو ته وڪيل تعلقه ميونسپل  ايڊمنسٽريشن جي آفيس ۾ ٽوڙ ڦوڙ ڪئي جنهن تي  پوليس کين روڪڻ لاءِ فائرنگ ڪئي جنهن ڪري معاملو سنگين ٿي ويو، جڏهن ته وڪيلن تي فائرنگ ڪندڙ ايس ايڇ او کي گرفتار ڪيو ويو آهي.ڊسڪا ۾ ٻن وڪيلن جي مارجي وڃڻ کان پوءِ  گوجرانوالا ڊسٽرڪٽ بار ايسوسيئيشن اڄ هڙتال جو اعلان ڪري ڇڏيو، وڪيلن جي مارجي وڃڻ ڪري ملتان بار ايسوسيئيشن به اڄ ڪارو ڏينهن ملهائڻ جو اعلان ڪيو آهي جڏهن ته  اسلام آباد بار ايسوسيئيشن به اڄ عدالتي ڪارروائي جو بائيڪاٽ جو اعلان ڪيو آهي.

 

جوڊيشل ڪمشن جو اجلاس، اليڪشن ڪميشن جي سيڪريٽري بيان قلمبند ڪرائي ڇڏيو

اسلام آباد(بيورو) اليشڪن ڪميشن آف پاڪستان جي سيڪريٽري بابر يعقوب عام چونڊن ۾ مبينه ڌانڌلين جي جاچ لاءِ قائم عدالتي ڪميشن آڏو سومر ڏينهن پنهنجو بيان قلمبند ڪرايو. چيف جسٽس آف پاڪستان جسٽس ناصر الملڪ جي سربراهيءَ ۾ قائم ٽه رڪني جاچ ڪميشن 2013ع جي عام چونڊن ۾ مبينه ڌانڌلين جي حوالي سان جاچ جي سلسلي ۾ سومر ڏينهن پنهنجي ڪارروائي جاري رکي. عدالتي ڪميشن ۾ پاڪستان تحريڪ انصاف جي وڪيل عبدالحفيظ پيرزادي چيو ته پي ٽي آءِ فارم 14 ۽ 15 فراهم ڪرڻ لاءِ درخواست ڏني هئي پر اهو عوامي دستاويز هجڻ جي باوجود اڃا تائين فراهم نه ڪيو ويو آهي. اليڪشن ڪميشن جي وڪيل سلمان اڪرم راجه چيو ته ڪميشن رٽرننگ آفيسرن کي هدايت ڪئي هئي ته فارم 15 فراهم ڪيو وڃي ۽ ڪميشن فارم 15 وصول ڪرڻ بعد پنهنجو جواب داخل ڪرائيندي. ڪميشن جي ميمبر جسٽس امير هاني مسلم چيو ته ڪهڙ قانون تحت رٽرننگ آفيسرن واڌو بيلٽ پيپرز پاڻ وٽ رکيا. ڪميشن اليڪشن ڪميشن کي هدايت ڪئي ته فارم 15 بابت اڱاري ڏينهن (اڄ) تائين جواب داخل ڪرايو وڃي. پي ٽي آءِ جي وڪيل حفيظ پيرزادي چيو ته اليڪشن ڪميشن اعتراف ڪري چڪي آهي ته ان وٽ سمورو چونڊ ريڪارڊ موجود آهي. هن چيو ته بيلٽ پيپرز جو تعداد ٽيڻ تي وڌايو ويو هو، اهو ضروري هوندو آهي ته واڌو بيلٽ پيپرز جو استعمال فارم 15 تي نوٽيس بورڊ تي لڳائڻو هوندو آهي. هن چيو ته گواهن کان آڏي پڇا لاءِ فارم 15 هجڻ ضروري آهي. جسٽس امير هاني مسلم چيو ته چونڊن جو سمورو ريڪارڊ حڪومت جي حوالي ڪرڻ لازمي آهي. پيرزادي چيو ته فارم 15 وارا تفصيل اليڪشن ڪميشن جي حوالي ڪيا ويا آهن. سلمان اڪرم راجه چيو ته سمورو ريڪارڊ اليڪشن ڪميشن جي اسٽورن ۾ سيل ٿيل موجود آهي. هڪ سوال جي جواب اليڪشن ڪميشن جي سيڪريٽري بابر يعقوب ٻڌايو ته هن 2013ع جي عام چونڊن بابت اليڪشن ڪميشن جي رپورٽ نه ڏٺي آهي. هن چيو ته اليڪشن ڪميشن جي ڪنهن ميمبر سان به هن ان ڏس ۾ صلاح مشورو نه ڪيو آهي. هن چيو ته هن ايڊيشنل سيڪريٽري، ڊائريڪٽر ليگل ۽ وڪيل سان عدالتي ڪميشن ۾ جواب داخل ڪرڻ جي حوالي سان صلاح مشورو ڪيو آهي. هن چيو ته هو ڄاڻايل چونڊن دوران بلوچستان ۾ چيف سيڪريٽري جي حيثيت سان ذميواريون نڀائي رهيو هو. هڪ سوال جي جواب هن چيو ته کيس اهڙي ڪا به ڄاڻ نه هئي ته 100 سيڪڙو واڌو بيلٽ پيپر ڇپايا ويا آهن. هن چيو ته چونڊن واري ڏينهن تمام گهڻيون شڪايتون موصول ٿيون هيون. بعد ۾ عدالتي ڪميشن جي ٻڌڻي اڱاري ڏينهن (اڄ) تائين ملتوي ڪئي وئي.

 

وفاقي ڪابينا جو اجلاس اڄ ٿيندو، ايندڙ مالي سال جي بجيٽ جي منظوري ڏني ويندي

اسلام آباد (بيورو) وفاقي ڪابينا جو اجلاس اڄ گهرايو ويو آهي، جنهن ۾ ايندڙ مالي سال جِي بجيٽ جِي منظوري ڏني ويندي. وزيراعظم ميان نواز شريف، وفاقي ڪابينا جو اجلاس اڄ طلب ڪري ورتو آهي. اجلاس ۾ ايندڙ مالي سال جي بجيٽ جي منظوري ڏني ويندي، جنهن کان اڳ ناڻي وارو وفاقي وزير اسحاق ڊار ڪابينا کي بريفنگ پڻ ڏيندو. ذريعن جو چوڻ آهي ته ايندڙ مالي سال جي بجيٽ جو ڪاٿو 43 کرب رپيا لڳايو ويندو، جنهن مان 7 سئو 70 ارب بچاءَ لاءِ رکيا ويندا. ذريعن موجب، ملڪ اندر دهشتگردنخلاف هلندڙ آپريشن ضرب عضب لاءِ الڳ 45 ارب رپيا مختص ڪيا ويندا. وفاقي حڪومت جي خرچن جي مد ۾ 3 سئو 10 ارب رپيا رکيا ويندا. وفاقي ڪابينا جي اجلاس ۾ گئس جي قيمتن ۾ پهرين جون کان واڌ ڪرڻ يا نه ڪرڻ بابت پڻ فيصلو ٿيندو.

 

ايندڙ بجيٽ مجموعي معيشت جي بهري لاءِ همٿائيندڙ ۽ مراعتن واري هوندي: اسحاق ڊار

اسلام آباد (بيورو) ناڻي واري وفاقي وزير سينيٽر اسحاق ڊار چيو آهي ته ايندڙ مالي سال جي بجيٽ مجموعي معيشت جي بهتري لاءِ همٿائيندڙ ۽ مراعتن واري هوندي، ان بجيٽ جي نتيجي ۾ عوام پاڪستان مسلم ليگ (ن) جي حڪومت جي ترقي تي ٻڌل ڪوششن جو اعتراف ڪندو، هو سومر ڏهاڙي فيڊرل بورڊ آف روينيو جي هڪ اجلاس جي صدارت ڪري رهيو هو، جنهن ۾ ايندڙ مالي سان 16-2015ع جي بجيٽ متعلق تجويزون غور هيٺ آهن، ايف بي آر جي چيئرمين مختلف اسٽيڪ هولڊرز ۽ واسطيدار وزارتن جي مشاورت سان تيار ڪيل تجويزن بابت ناڻي واري وزير کي آگاهه ڪيو، سينيٽر اسحاق ڊار چيو ته نئين مالي سال جي بجيٽ ۾ مجموعي طور معاشي بهتري لاءِ قدم کنيا ويندا ۽ اسان معيشت جي مختلف شعبن کان تجويزن کي بجيٽ ۾ شامل ڪرڻ جي ڪوشش ڪئي آهي، هن چيو ته هي موقعو آهي ته انهن شعبن ۾ سيڙپڪاري ڪئي وڃي جن ۾ ترقي ڪرڻ جا وڌيڪ موقعا آهن، وياج جي شرح هن وقت تاريخ جي گهٽ ترين سطح تي آهي ۽ اسان وٽ ترقياتي ڪمن لاءِ وڌيڪ گنجائش آهي، هن ايف بي آر کي هدايت ڪئي ته وزيراعظم جي گهٽ لاڳت واري هائوسنگ اسڪيم متعلق ڪميٽي سان پڻ مشاورت ڪئي وڃي ۽ بجيٽ کي قطعي شڪل ڏين کان پهرين ان جي راءِ کي تجويزن ۾ شامل ڪيو وڃي.

 

افغانستان ۾ امن ۽ سلامتيءَ کي يقيني بڻائڻ لاءِ مربوط ڪوششن جي ضرورت آهي: سرتاج عزيز

اسلام آباد(بيورو) وزيراعظم جي قومي سلامتي ۽ پرڏيهي معاملن بابت صلاحڪار سرتاج عزيز افغانستان ۾ امن ۽ سلامتيءَ کي يقيني بڻائڻ لاءِ مربوط ڪوششن جي ضرورت تي زور ڀريندي چيو آهي ته پاڙيسري ملڪ افغانستان ۾ امن ۽ ترقيءَ لاءِ پنهنجا وسيلا استعمال ڪن. سومر ڏينهن هتي پرڏيهي آفيس ۾ هارٽ آف ايشيا استنبول پراسيز جي سينيئر اختيارين جي پهرئين اجلاس کي خطاب ڪندي چيو ته ترقي لاءِ امن ضروري آهي. هن چيو ته افغانستان پاڪستان لاءِ وڏي اهميت وارو آهي، ڇاڪاڻ ته ٻنهي ملڪن جي گڏيل سرحد آهي ۽ نسلن کان هڪٻئي سان جڙيل آهيون. ٻئي ملڪ صدر اشرف غني جي وزن مطابق علائقائي رابطن ۽ سهڪار جي هڪ نئين دؤر جي شروعات ڪري سگهن ٿا. هن چيو ته وزيراعظم نواز شريف جو افغانستان جو دؤرو ٻنهي ملڪن جي ناتن کي وڌيڪ مضبوط بڻائيندو. هن چيو ته ٻنهي ملڪن ان ڳالهه تي اتفاق ڪيو آهي ته افغانستان جا دشمن پاڪستان جا دشمن آهن ۽ اسان امن ۽ ترقيءَ لاءِ اڳتي وڌڻ جي سلسلي ۾ گڏيل سهڪار وسيلي درپيش چئلينجن کي اثرائتي نموني سان ضابطو آڻي سگهون ٿا

 

وڏي وزير سان الطاف حسين جو ٽيليفونڪ رابطو، پاڻي بحران تي ڳالهيون

ڪراچي (اسٽاف رپورٽر) متحده قومي موومينٽ جي قائد الطاف حسين  وزير اعليٰ سنڌ سيد قائم علي شاهه سان فون تي ڳالهه ٻولهه ڪئي، ڳالهه ٻولهه دوران ڪراچي جي امن جي  صورتحال ۽ ڪراچي ۾ پاڻي جي قلت تي خيالن جي ڏي وٺ ڪئي وئي. الطاف حسين چيو ته سنڌ پوليس سانحه صفوران ڳوٺ ۾ ملوث دهشتگردن کي گرفتار ڪري وڏو ڪارنامو ڪيو آهي. اهي دهشتگرد ڪراچي ۾ وڏي پيماني تي دهشتگردي ۽ ٽارگيٽ ڪلنگ جي مختلف وارداتن ۾ ملوث هئا. انهن دهشتگردن جي گرفتاري تي وزير اعليٰ سنڌ، حڪومت سنڌ سان گڏ گڏ آءِ جي سنڌ ۽ پوليس  جي تمام آفيسر ۽ سپاهين کي مان زبردست خراج تحسين، مبارڪباد ۽ شاباش پيش ڪريان ٿو. پاڻي بحران بابت ڳالهائيندي الطاف حسين چيو ته پاڻي نه هئڻ سبب ڪراچي شهرين ۾ تمام وڏي بيچيني آهي. پاڻي جي فراهمي کي يقيني بڻايو وڃي. پاڻي مسئلي جي حل لاءِ  ايم ڪيو ايم جي قائد  تجويز ڏني ته ايم ڪيو ايم جي  چونڊيل ميمبرن سان ملاقات ڪري اهو مسئلو ترت حل ڪرايو وڃي. وزير اعليٰ سنڌ ايم ڪيو ايم ميمبرن سان ملاقات ڪرڻ جي آمادگي ظاهر ڪئي. ڳالهه ٻولهه دوران اهو طئه ڪيو ويو ته اڄ منجهند ايم ڪيو ايم جي چونڊيل ميمبرن جي وفد سان وزير اعليٰ سنڌ ملاقات ڪندو.

 

بينظير قتل ڪيس: آمريڪي صحافي جي ويڊيو بيان لاءِ انتظامن جو حڪم

راولپنڊي (بيورو) راولپنڊي جي دهشتگردي جي انت واري عدالت بينظير ڀٽو قتل ڪيس ۾ آمريڪي صحافي مارڪ سيگل جو بيان قلم بند ڪرڻ لاءِ انتظامن جو حڪم جاري ڪري ڇڏيو آهي. راولپنڊي جي دهشتگردي ٽوڙ خاص عدالت اڊياله جيل راولپنڊي ۾ بينظير ڀٽو قتل ڪيس جي ٻڌڻي ڪئي، عدالت کي ٻڌايو ويو ته آمريڪي صحافي مارڪ سيگل ويڊيو لنڪ ذريعي بيان رڪارڊ ڪرائڻ لاءِ راضي ٿي ويو آهي. عدالت ڪمشنر آفيس راولپنڊي ۾ ويڊيو لنڪ جا انتظام ڪرڻ جو حڪم جاري ڪري ڇڏيو. عدالت هدايت ڪئي ته پرڏيهي وزارت آمريڪا ۾ پاڪستاني سفارتخاني ۾ ويڊيو لنڪ جا انتظام، تاريخ ۽ وقت جو تعين ڪري رپورٽ ڏي ۽ گهرو وزارت آمريڪا ۾ نمائندو مقرر ڪري جنهن جي نگراني ۾ بيان رڪارڊ ٿيندو.

 

لانڍي ريلوي اسٽيشن تي قائم فليٽن تان قبضا ختم ڪرائي شهيدن جي وارثن کي ڏيڻ جو اعلان

ڪراچي (اسٽاف رپورٽر) سنڌ جي وڏي وزير سيد قائم علي شاهه لانڍي ۾ ريلوي اسٽيشن جي ويجهو سنڌ حڪومت پاران پي پي جي شهيدن جي وارثن ۽ سرڪاري ملازمن کي الاٽ ڪيل فليٽن تي غير قانوني قبضي جو سختي سان نوٽيس وٺندي ڊِي آءِ جي اوڀر کي سرڪاري فليٽ قبضي خورن کان فوري طور تي خالي ڪرائڻ جو حڪم ڏنو آهي. هن سنڌ رزرو پوليس ( ايس ار پي) کي 368 فليٽ پنهنجي قبضي ۾ وٺي حقيقي الاٽيز کي فول پروف سيڪيورٽي فراهم ڪرڻ جو حڪم ڏنو آهي. وڏي وزير اعلان ڪيو ته غير قانوني قبضا خورن کان سرڪاري فليٽ خالي ڪرائي اهي سنڌ پوليس جي شهيدن جي وارثن کي ڏنا ويندا. هن اهڙا حڪم ۽ اعلان ڪالهه وزير اعليٰ هائوس ڪراچي ۾ لانڍي ريلوي اسٽيشن جي ويجهو سرڪاري فليٽن تي قبضن جي حوالي سان منعقد ڪيل اجلاس جي صدارت ڪندي ڪيا. اجلاس ۾ وڏي وزير جا صلاحڪار راشد رباني، پي پي ضلعي اولهه جو صدر راجا رزاق، بينظير ڀٽو هائوسنگ سيل جي چيئرمين منظر عباس، ڊي آءِ جي اوڀر منير شيخ ۽ ٻين آفيسرن شرڪت ڪئي. ان موقعي تي وڏي وزير چيو ته پي پي هي فليٽ پي پي جي شهيدن جي وارثن ۽ سرڪاري ملازمن جي رهائش جي لاءِ ٺاهيا هئا. هن چيو ته سڀئي 368 فليٽن مان صرف 155 فليٽ 18 آڪٽوبر 2007 ۽ 27 دسمبر 2007 جي پي پي جي شهيدن جي پونئرن کي الاٽ ڪيا ويا هئا جڏهن ته باقي فليٽ اڻ سڃاڻپ ٿيل شهيدن جي وارثن جي لاءِ مختص ڪيا ويا هئا پر بد قسمتي سان انهن جي ڪا به شناخت نه ٿي سگهي. وڏي وزير بينظير ڀٽو هائوسنگ سيل جي چيئرمين کي هدايت ڪئي ته هو فليٽن جي الاٽيز جي لسٽ فوري طور تي فراهم ڪري ۽ اصلي الاٽيز کانسواءِ باقي سڀني قبضا خورن کان فوري طور تي فليٽ خالي ڪرايا وڃن. هن چيو ته سنڌ حڪومت آءِ جي سنڌ کي وڏي رقم فراهم ڪئي آهي ته جيئن هو پوليس اسٽيشن جي حدن ۾ سنڌ پوليس جي فورس لاءِ فليٽس تعمير ڪرائي. هن آءِ جي کي پڻ هدايت ڪئي ته هو فوري طور تي اهي فليٽ تعمير ڪرائڻ جو ڪم شروع ڪري.