تازيون خبرون

Daily Archives: May 22, 2015

نواز شريف جي ڪرعزستان جي وزير اعظم سان ملاقات، مختلف ٺاهن تي صحيحون

بشڪڪ (م.ڊ) پاڪستان ۽ ڪرغزستان توانائي جي شعبي ۽ علائقائي رابطي ۾ تعاون کي سگهه ڏيڻ تي ڌيان ڏيندي واپار، معيشت، عوامي سطح تي رابطن ۽ سياحت سميت مختلف شعبن ۾ پنهنجي ٻطرفن لاڳاپن کي وڌيڪ بهتر ۽ مستحڪم بڻائڻ تي اتفاق ڪيو آهي. وزيراعظم محمد نواز شريف ڪالهه خميس ڏينهن هتي پنهنجي ڪرغز هم منصب تيمر سريوف سان نويڪلائي ۾ ملاقات ۽ وفدن جي سطح تي ڳالهين کانپوءِ صحافين سان ڳالهائيندي چيو ته اسان جا ٻطرفا لاڳاپا بهترين آهن، اسان پنهنجي اقتصادي لاڳاپن، عوامي سطح تي رابطن، سياحت ۽ توانائي کي وڌيڪ بهتر بڻائڻ تي اتفاق ڪيو آهي. ٻنهي اڳواڻن مختلف شعبن ۾ لاڳاپن کي وڌيڪ مضبوط بڻائڻ جي لاءِ مفاهمت جي ياداشتن تي صحيحون به ڪيون. وزيراعظم محمد نواز شريف چيو ته پاڪستان ۽ ڪرغزستان جي لاڳاپن ۾ تيزي سان بهتري اچي رهي آهي. هن چيو ته اهي لاڳاپا گڏيل احترام، گڏيل عقيدي، گڏيل مفادن تي ٻڌل آهن، اسان جي وچ ۾ خوشگوار لاڳاپا آهن ۽ ٻئي ملڪ اهم علائقائي ۽ عالمي معاملن تي هڪ جهڙو موقف رکن ٿا. هن چيو ته اسان درپيش گڏيل چئلينجن بابت اشوز ۽ دستياب موقعن تي جامع مشاورت ڪئي آهي. هن چيو ته ٻنهي ملڪن جو توانائي جي استحڪام، دهشتگردي جي خاتمي، منشيات جي اسمگلنگ، انتهاپسندي، واپار، معاشي تعاون ۽ علائقائي يڪجهتي سميت جامع معاملن تي گڏيل مفاد آهي. وزيراعظم چيو ته پاڪستان ڪرغزستان سان تعاون جي سمورن شعبن ۾ لاڳاپن کي وڌيڪ مضبوط ۽ وسيع بڻائڻ چاهي ٿو. هن چيو ته ڳالهين دوران ڪرغز وزيراعظم ۽ منهنجي وچ ۾ ٻطرفن لاڳاپن جي سمورن اهم رخن جو جائزو ورتو ويو، اسان پاڪستان ۽ ڪرغزستان جي وچ ۾ اعليٰ سطحي دورن سميت باقاعده سياسي وفدن جي مٽاسٽا جي ضرورت تي ڌيان ڏنو. وزيراعظم چيو ته ٻنهي ملڪن واپار ۽ سيڙپڪاري ۾ اضافي، انفراسٽرڪچر جي بهتري، رستن ۽ ريل رابطن جي تعمير ۽ توانائي جي شعبن ۾ تعاون ۾ ڀرپور انساني ۽ معدني وسيلن مان مڪمل فائدو حاصل ڪرڻ جو جائزو ورتو. هن چيو ته پاڪستان ۽ ڪرغزستان توانائي جي منصوبن تي تيزي سان اڳڀرائي جي ضرورت تي زور ڏنو. هن چيو ته اها ڳالهه اطمينان جوڳي آهي ته ڪاسا – 1000 جي منصوبي جي حوالي سان سمورا اهم معاهدا طئي ٿيا آهن. وزيراعظم چيو ته پاڪستان جي اقتصادي ترقي جو دارومدار ڪاسا – 1000 منصوبي جي بجلي تي آهي جنهن سان پاڪستان جي توانائي جي کوٽ ختم ڪرڻ ۾ مدد ملي سگهي ٿي. هن چيو ته اسان کي ان منصوبي تي گڏيل طور تي جلد کان جلد ڪم ڪرڻ جي ضرورت آهي. هن چيو ته پاڪستان مواصلاتي رابطن جي جامع نيٽ ورڪ جو فروغ چاهي ٿو، اسان گوادر پورٽ ۽ پاڪ چين اقتصادي لنگهه جي ترقي لاءِ قدم کنيا آهن جن سان علائقائي رابطن کي سهولت ملندي ۽ وچ ايشيائي رياستون اسان جون بندرگاهون استعمال ڪري سگهنديون اهڙي طرح هن خطي ۾ اسان جي پهچ هوندي. وزيراعظم چيو ته ڪرغز هم منصب سان ملاقات دوران ٻنهي ملڪن گڏيل قومن، جي – 77، غيروابسته تحريڪ ۽ اي سي او جهڙن عالمي فورمن تي تعاون جو جائزو ورتو. هن چيو ته اسان گڏيل قومن جي سلامتي ڪائونسل جي سڌارن جي لاءِ ڪرغزستان سان ويجهي تعاون تي ڪم ڪرڻ چاهيون ٿا جنهن جي لاءِ سمورن ميمبر ملڪن جي امنگن کي نظر ۾ رکڻو پوندو. هن چيو ته استحقاق جا وڌيڪ مرڪز قائم ڪرڻ بدران ننڍن ملڪن جي مفادن تي خاص ڌيان ڏيڻ گهرجي ۽ سلامتي ڪائونسل کي وڌيڪ جمهوري بڻائڻ گهرجي. وزيراعظم چيو ته پاڪستان شنگهائي تعاون تنظيم جو ميمبر بڻجڻ جو خواهشمند آهي ۽ ان سلسلي ۾ ڪرغزستان پاران تعاون ساراهه جوڳو آهي. هن چيو ته پاڪستان ۽ ڪرغزستان جي وچ ۾ مفاهمت جي ياداشتن تي صحيحن سان ٻنهي ملڪن جي وچ ۾ لاڳاپا وڌيڪ مستحڪم بڻائڻ ۾ مدد ملندي. وزيراعظم چيو ته پاڪستان ڪرغزستان جي شهرين کي تربيتي ڪورس جي فراهمي جاري رکندو، فارن سروس اڪيڊمي اسلام آباد ۾ 60 کان وڌيڪ نوجوان ۽ مڊڪيريئر سفارتڪارن کي تربيت ڏني وئي آهي، جڏهن ته بئنڪاري، ٽپال ۽ ٻين شعبن جي لاءِ به تربيت جي آڇ ڪئي آهي. هن چيو ته گڏيل قدرن ۽ عزم سان علائقائي تعاون ۾ اضافو ٿيندو، جيڪو پاڪستان ۽ ڪرغزستان جي وچ ۾ ويجهن ڀائراڻن لاڳاپن کي يقيني بڻائيندو. هن چيو ته مون کي ڪرغزستان جي دوري تي تمام گهڻي خوشي آهي جيڪو آزادي جي وقت کان اسان جو تمام ويجهو دوست آهي. هن پنهنجي شاندار استقبال ۽ مهمان نوازي تي ڪرغز عوام ۽ حڪومت جا ٿورا مڃيا. وزيراعظم چيو ته هو ڪرغزستان جي ثقافت کان تمام گهڻو متاثر ٿيو آهي ۽ ڪرغزستان جي ڏاهپ واري قيادت تحت ٿيندڙ ترقي ۽ خوشحالي کي ساراهيون ٿا. هن چيو ته آئون ڪرغزستان جي ڀائرن ۽ ڀينرن جي لاءِ پاڪستان جي عوام جي نيڪ خواهشن جو اظهار ڪريان ٿو.

 

دهشتگردي خلاف ويڙهه ايندڙ نسلن کي بچائڻ لاءِ پيا وڙهون: آرمي چيف

ڪوئيٽا (بيورو) آرمي چيف جنرل راحيل شريف چيو آهي ته محفوظ پاڪستان ئي خوشحال پاڪستان بڻجي سگهي ٿو، دهشتگردي خلاف ويڙهه ايندڙ نسلن کي بچائڻ لاءِ وڙهي پئي وڃي. آرمي چيف جنرل راحيل شريف ڪوئيٽا پهچي ڪمانڊ اينڊ اسٽاف ڪاليج جو دورو ڪيو. ‎ان موقعي تي ڳالهائيندي آرمي چيف جنرل راحيل شريف چيو ته محفوظ پاڪستان ئي خوشحال پاڪستان ٿي سگهي ٿو، دهشتگردي خلاف جنگ ايندڙ نسلن لاءِ آهي هن چيو ته آپريشن ضرب عضب ۾ شاندار ڪاميابيون حاصل ٿيون آهن. پاڪ فوج جي سربراهه چيو ته پاڪستان منجهيل خطرن کي منهن ڏئي رهيو آهي اهڙن خطرن سان روايتي نموني سان منهن نٿو ڏئي سگهجي جنرل راحيل شريف چيو ته ضرب عضب بعد شهري علائقن ۾ به دهشتگردن خلاف ڪامياب آپريشنز ڪيا پيا وڃن.

 

فوج کي جج بڻائي انهن تي وڌيڪ بار وڌو پيو وڃي: سپريم ڪورٽ

اسلام آباد (بيورو) سپريم ڪورٽ جي جج جسٽس قاضي فائز عيسيٰ فوجي عدالتن جي جڙڻ خلاف درخواستن جي ٻڌڻي ۾ ريمارڪس ڏنا آهن ته  قلم 245 جي هيٺ فوج جو ڪم وڙهڻ آهي، فوج تي جج بڻجڻ جي ذميواري ڇو پئي وڌي وڃي. چيف جسٽس ناصر الملڪ جي اڳواڻي ۾ سپريم ڪورٽ جي پوري ڪورٽ 18 ۽ 21  آئيني ترميم خلاف  درخواستن جي ٻڌڻي ڪئي. جسٽس قاضي فائز عيسيٰ ريمارڪس ڏنا ته  فوج کي جج بڻائي انهن تي وڌيڪ بار وڌو پيو وڃي، آرمي چيف عدالتن ۾ فيصلا ڪندو يا پيشيواراڻا معاملا ڏسندو. فوج جو ڪم دهشتگردن سان وڙهڻ آهي،پر انهن کي جج بڻايو ويو، جيڪڏهن هو ميجر هجن ها ۽ جج واري ذميوراي ڏني وڃي ها، تڏهن به قلم 245 هيٺ هو ذميواري نڀائين ها. جسٽس جواد خواجا پنهنجا ريمارڪس ڏيندي چيو ته  عدالت وٽ پاڻ گڏ ٿيڻ  لاءِ سوموٽو جي سگهه آهي، آئيني ترميم جي خلاف درخواستن جي ٻڌڻي سومر تائين روڪي وئي، ايندڙ ٻڌڻي تي درخواست داخل ڪندڙ اي ڪي ڊوگر 18 ترميم تي دليلون ڏيندو.

 

اثاثا ريفرنس ڪيس: احتساب عدالت آصف علي زرداري کي حاضري کان مستقل ڇوٽ ڏئي ڇڏي

اسلام آباد(بيورو) راولپنڊي جي احتساب عدالت اثاثا ريفرنس ۾ اڳوڻي صدر آصف علي زرداري کي حاضري کان مستقل ڇوٽ ڏئي ڇڏي. اڳوڻي صدر آصف علي زرداري  وڪيل سميت احتساب عدالت ۾ پاڻ پيش ٿيو، انهي کي آئنده حاضري کان ڇوٽ ملي وئي ايندڙ حاضري ۾ آصف علي زرداري جو وڪيل فاروق ايڇ نائيڪ هن جي طرفان عدالت ۾ پيش ٿيندو.  اڄ جي ڪارروائي ۾ احتساب عدالت تي ڇوٽ وارا سمن جاري ڪيا. ايندڙ ٻڌڻي 5 شاهدن کي 2 جون تي پيش ٿيڻ جو حڪم.

 

10 هزار پوليس اهلڪار سنڌ پبلڪ سروس ڪميشن وسيلي ڀرتي ڪيا ويا آهن: قائم علي شاهه

ڪراچي (اسٽاف رپورٽر)سنڌ جي وڏي وزير سيد قائم علي شاهه چيو آهي ته صفوران سانحي سوڌو ڪراچي ۾ دهشت گردي جي ڪيترن ئي وڏن ڏوهن جو ڪاميابي سان پتو لڳائي هزارن جي تعداد ۾ دهشت گرد گرفتار ڪري صوبي ۾ سنگين ڏوهن کي هيٺين سطح تي آڻڻ پي پي حڪومت جي بهترين حڪمراني جو ثبوت آهي۽ ان سلسلي ۾ پاڪستان جي سول ۽ ملٽري قيادت کان مبارڪون ملڻ اعزاز آهي. تنقيد ڪندڙ حڪومت کان اڳ ڪراچي ۾ ڪورڪمانڊر تي حملي،آمريڪن قونصل خاني تي حملي ۽ ان وقت جي شيرٽن هوٽل وٽ سب ميرين جي انجنيئرن تي حملي ۽ ايستائين جو ان وقت جي ملڪي صدر تي ٻه ڀيرا ٿيل حملي جي واقعن کي به ڏسن. جن ۾ سوين ماڻهن جون جانيون ضايع ٿيون. احڙو اظهار هن خميس ڏينهن انساني حقن بابت سينيٽ جي اسٽينڊنگ ڪاميٽي جي هڪ وفد سان ڳالهائيندي ڪيو، اسٽينڊنگ ڪاميٽي جي چيئرپرسن نسرين جليل ۽ ٻين سينيٽرن پاران پڇيل سوالن جو حوالو ڏيندي سنڌ جي وڏي وزير چيو ته ڪراچي ۾ سنگين ڏوهن جي خاتمي لاءِ سيپٽمبر 2013 ۾ سڀني سياسي پارٽين جي رضامندي ۽ وزيراعظم پاڪستان جي منظوري سان ٽارگيٽيڊ آپريشن شروع ڪيو ويو هو جنهن تي لڳايل ڪاٿي موجب 28 ارب رپين جو خرچ اچڻو هو گڏيل فيصلي موجب 50 سيڪڙو خرچ وفاق ۽ 50 سيڪڙو صوبائي حڪومت کي ادا ڪرڻو هو. هن چيو ته گذريل سال ميرٽ تي 10 هزار پوليس اهلڪار ڀرتي ڪيا ويا ۽ اهڙي ريت هلندڙ سال به 10 هزار پوليس اهلڪار ميرٽ تي ڀرتي ڪري رهيا آهيون. هن چيو ته هڪ به اي ايس آءِ يا سب انسپيڪٽر سفارش تي ڀرتي نه ڪيو ويو ، سڀني کي سنڌ پبلڪ سروس ڪميشن وسيلي ڀرتي ڪيو ويو آهي. هن چيو ته انهن اهلڪارن کي پاڪ آرمي جي ٽرينرز وسيلي تربيت ڏياري رهيا آهيون ان سان گڏ کين جديد هٿيار ۽ ٻيو سامان به فراهم ڪري رهيا آهيون. وفد ۾ سينيٽر فرحت الله بابر ، سينيٽر جهانزيب جمال الدين، سينيٽر مير ڪبير ايم شاهي ،سينيٽر نثار محمد ،سينيٽر سحر ڪامران ۽ ثمينا عابد شامل هئا.

 

صفوران سانحو: سنڌ اسيمبلي ۾ پوليس کي ڀيٽا پيش ڪرڻ جو ٺهراءُ منظور

ڪراچي (اسٽاف رپورٽر) سنڌ اسيمبليءَ صفوران سانحي جي جوابدارن کي گرفتار ڪرڻ تي پوليس کي ڀيٽا پيش ڪرڻ وارو گڏيل ٺهراءُ منظور ڪري ورتو، جڏهن ته ايوان سنڌ سروسز ٽربيونل بل 2015ع ۾ چوٿين ترميم به پاس ڪري ڇڏي. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو. صفوران سانحي ۾ ملوث جوابدارن کي گرفتار ڪرڻ تي سنڌ پوليس کي ڀيٽا پيش ڪرڻ وارو گڏيل ٺهراءُ پ پ جي نصرت سلطانا پيش ڪيو. اپوزيشن ليڊر خواجا اظهار الحسن چيو ته ڪراچي يونيورسٽي ۽ پنجاب يونيورسٽي ۾ مائيڊ سيٽ موجود آهن. هن چيو ته جنرل ضياءَ الحق جي باقيات اڄ به موجود آهي، اڳوڻي آمر جي باقيات سندس علائقي ۾ به آهي. خواجا اظهار الحسن چيو ته قربانيون پيپلز پارٽي، ايم ڪيو ايم ۽ اي اين پي ڏنيون آهن. صوبائي وزير شرجيل ميمڻ چيو ته حڪومت ۽ سنڌ پوليس تي الزام لڳايا ويا. هن چيو ته وڏي وزير طرفان کين غلط هدايتون ناهن ڏنيون وينديون، بيڊ گورننس جا طعنا ڏيندڙن کي چيلينج آهي، سنڌ پوليس ملڪ جي سٺي پوليس آهي. شرجيل ميمڻ چيو ته سنڌ پوليس شڪارپور سانحي توڙي ٻين هاءِ پروفائل ڪيسز جي نشاندهي ڪئي ۽ صفوران سانحي ۾ استعمال ٿيل هٿيار به پڪڙيا، هاڻي عدالتن وٽ ڪا گنجائش ناهي ته اهي دهشتگردن کي سزا نه ڏين. صوبائي وزير ڊاڪٽر سڪندر مينڌري سنڌ سروسز ٽربيونل بل 2015ع ۾ چوٿين ترميم پيش ڪئي جيڪا ايوان منظور ڪري ورتي. ان کان اڳ سوالن جوابن جي وقفي دوران فنڪشنل ليگ ميمبر نصرت سحر عباسي ۽ صوبائي وزير نثار کهڙي وچ ۾ سخت جملن جي ڏي وٺ ٿي. نصرت سحر عباسي چيو ته ملڪ اندر عورتن جو حشر ٿي رهيو آهي، سڄي دنيا ڏسي پئي. ان موقعي تي نثار کهڙي سيٽ تان اٿي نصرت سحر عباسي تي اعتراض ڪيو جنهن تي ٻنهي ميمبرن وچ ۾ سخت جملن جي ڏي وٺ ٿي. نوڪرين ۾ ڪوٽا سسٽم تي بحث دوران متحده ميمبر ارم عظيم فاروقي چيو ته ڪوٽا سسٽم نه هئڻ گهرجي، ميرٽ تي نوڪريون ڏنيون وڃن. ارم عظيم فاروقي چيو ته رڳو سنڌ ۾ ڪوٽا سسٽم آهي باقي ملڪ جي ٻين حصن ۾ ناهي، ڪوٽا سسٽم تي سوال نه ٿي رهيا آهن. صوبائي وزير شرجيل ميمڻ چيو ته ارم عظيم فاروقي به عورتن جي ڪوٽا تحت ايوان ۾ ويٺل آهي. ان موقعي تي اپوزيشن ليڊر خواجا اظهار الحسن چيو ته ايوان ۾ صوبي مان ڪوٽا سسٽم ختم ڪرڻ لاءِ ٺهراءُ آندو وڃي. محمد حسين چيو ته جيڪڏهن قانون سڀني لاءِ برابر آهي ته خيبر پختون خواهه ۽ بلوچستان ۾ ڪوٽا سسٽم ڇو ناهي؟ رڳو سنڌ ڪوٽا سسٽم تي عمل ڇو ڪري رهي آهي. متحده جي خالد احمد، ڪراچي جي ايڊمنسٽريٽر طرفان 105 ماڻهن جي عارضي ڀرتين خلاف التوا واري رٿ پيش ڪئي. صوبائي وزير سڪندر مينڌري چيو ته التوا وارِي رٿ رڳو اخبار جي خبر تي پيش ڪئي وئي، جيڪو آئوٽ آف آرڊر آهي. اجلاس دوران صوبائي وزير سڪندر مينڌري جي وضاحت دوران پي ٽي آءِ ميمبر حفيظ الدين پيرزادو بيهي رهيو، جنهن کي اسپيڪر ڳالهائڻ کان روڪي ورتو. مختلف معاملن تي بحث کانپوءِ اسپيڪر اسيمبلي جو اجلاس اڻڄاڻايل مدي تائين ملتوي ڪري ڇڏيو.

 

صفوران سانحي جي جوابدارن جي گرفتاري سنڌ پوليس جي ڪارڪردگي جو چٽو ثبوت آهي: شرجيل ميمڻ

ڪراچي(اسٽاف رپورٽر) اطلاعات ۽ بلديات واري وزير شرجيل انعام ميمڻ  چيو آهي ته دهشتگردي جا واقعا پنجاب سميت هر جاءِ تي ٿيا، پر دهشتگردن جو پتو لڳائڻ جي حوالي سان سنڌ پوليس جي ڪارڪردگي بهترين آهي. پوليس وارا ٽارگيٽ ڪلنگ جو شڪار ٿين ٿا. انهن تي تنقيد سان پوليس جي شهيدن جي توهين ٿئي ٿي. ريمارڪس ڏيندي ان ڳالهه جو خيال رکيو وڃي ته ڪنهن جا جذبات مجروح نه ٿين. ٻين صوبن سان ڀيٽ ڪئي وڃي ته سنڌ پوليس ٻين صوبن کان بهترين پوليس آهي ۽ هُن بهترين نتيجا ڏنا آهن. اسان سياسي انتقام جي روايت کي ختم ڪيو. ان جو ڪريڊٽ پيپلز پارٽي جي شريڪ چيئرمين آصف علي زرداري جي مفاهمت جي پاليسي کي وڃي ٿو. سانحو صفوران چورنگي کان پوءِ ايوان سان گڏوگڏ ميڊيا جي ڪجهه اينڪرز طرفان پوليس تي زبردست تنقيد ڪئي وئي هئي. سياسي ڀرتين، سياسي مداخلت سميت ڪافي ڳالهيون ڪيون ويون. اسان جو موقف اهو هو ته وزيراعليٰ سنڌ پوليس کي فري هينڊ ڏنو آهي. ڪنهن قسم جي ان کي غلط ڊڪٽيشن نٿي ڏني وڃي ۽ اڄ اسان جي اها ڳالهه درست ثابت ٿي چڪي آهي. اهڙن خيالن جو اظهار هن خميس تي سنڌ اسيمبلي ۾ سانحي صفوران چورنگي جي جوابدارن جي گرفتاري تي وزيراعليٰ سنڌ، سنڌ پوليس ۽ امن امان جي بحالي جي ادارن کي خراج تحسين پيش ڪرڻ لاءِ پيش ڪيل قرارداد تي ڳالهائيندي ڪيو. شرجيل انعام ميمڻ چيو ته هن ئي اسيمبلي ۾ صفوران چورنگي سانحي تي ڏک جي اظهار لاءِ قرارداد منظور ڪئي وئي هئي. ايوان سان گڏوگڏ ميڊيا جي ڪجهه اينڪرز طرفان پوليس تي زبردست تنقيد ڪئي وئي هئي. سياسي ڀرتين، سياسي مداخلت سميت ڪافي ڳالهيون ڪيون ويون. اسان جو موقف اهو هو ته وزيراعليٰ سنڌ پوليس کي فري هينڊ ڏنو آهي. ڪنهن قسم جي ان کي غلط ڊڪٽيشن نه ٿي ڏني وڃي. وزيراعليٰ پوري سنڌ ۾ سٺي ساک رکندڙ آفيسرن کي مقرر ڪيو آهي ۽ انهن کي مڪمل اختيار ڏنا ويا آهن. هن چيو ته ٻين صوبن سان ڀيٽ ڪئي وڃي ته سنڌ پوليس ٻين صوبن کان بهترين پوليس آهي ۽ ان بهترين نتيجا ڏنا آهن. دهشتگردي جا واقعا پنجاب سميت هر هنڌ ٿيا، پر دهشتگردن جو پتو لڳائڻ جي حوالي سان سنڌ پوليس جي ڪارڪردگي بهترين آهي. شڪارپور کان صفوران ڳوٺ جي سانحي تائين ڪيترن واقعن ۾ ملوث ماڻهن ۽ گروپن جو پتو لڳايو ويو آهي ۽ کين گرفتار به ڪيو ويو آهي. هن چيو ته سانحو صفوران ڳوٺ جي جوابدارن کان اهو اسلحو هٿ آيو آهي جنهن سان بي گناهه اسماعيلين کي شهيد ڪيو ويو هو. اهڙا ثبوت موجود آهن جن مان انهن دهشتگردن کي سزا ٿي سگهي ٿي. هن چيو ته ڪنهن اداري خلاف هروڀرو ريمارڪس ۽ بيان نه ڏنا وڃن. پوليس وارا ٽارگيٽ ڪلنگ جا شڪار ٿين ٿا. انهن تي تنقيد سان پوليس جي شهيدن جي توهين ٿئي ٿي. ريمارڪس ڏيندي ان ڳالهه جو خيال رکيو وڃي ته ڪنهن جا جذبات مجروح نه ٿين. هن چيو ته سنڌ ۾ ڀنگ لاءِ اغوا جون وارداتون ناهن. اهو زمانو به ياد ڪيو وڃي، جڏهن سنڌ ۾ ڌاڙيلن جو راڄ هو. اڄ امن امان جي بهتري جو ڪريڊٽ وزيراعليٰ سنڌ سيد قائم علي شاهه ڏانهن وڃي ٿو، جيڪو ٽارگيٽ آپريشن جو ڪپتان آهي. هن چيو ته پيپلز پارٽي خلاف پوليس کي استعمال ڪيو ويندو هو. اسان سياسي انتقام جي روايت ختم ڪئي. ان جو ڪريڊٽ پيپلز پارٽي جي شريڪ چيئرمين آصف علي زرداري جي مفاهمت جي پاليسي کي وڃي ٿو. هن چيو ته دهشتگردن جي گرفتاري تي آئون وزيراعليٰ سنڌ، پوليس ۽ قانون لاڳو ڪندڙ ادارن کي خراج تحسين پيش ڪريان ٿو. سنڌ حڪومت جي ڪوشش آهي ته اڳتي دهشتگردي جا واقعا نه ٿين.

 

سهيل انور سيال سنڌ جي گهرو وزير جو حلف کڻي ڇڏيو

ڪراچي (اسٽاف رپورٽر) پيپلز پارٽي جي اسيمبلي جي ميمبر سهيل انور سيال سنڌ جي گهرو وزير جو حلف کڻي ڇڏيو. سنڌ جي نئين گهرو وزير سهيل انور سيال جي حلف کڻڻ واري تقريب  گورنر هائوس ڪراچي ۾ ٿي جتي گورنر سنڌ  ڊاڪٽر عشرت العباد سهيل انور سيال کان صوبائي وزير جو حلف کڻايو. حلف برداري جي تقريب ۾ وزير اعليٰ سنڌ سيد قائم علي شاهه، صوبائي وزير شرجيل انعام ميمڻ ۽ پيپلز پارٽي جا ٻيا ميمبر پڻ شامل هئا.ا

 

ايگزيڪٽ سان لاڳاپيل آمريڪا ڪنهن به ڳڻتي جو اظهار ناهي ڪيو: پاڪستان

اسلام آباد(بيورو) پرڏيهي وزير جو چوڻ آهي ته آمريڪا پاڪستاني آئي ٽي ڪمپني ايگزيڪٽ جي نقلي سرٽيفڪيٽ اسڪينڊل جي حوالي سان ڪنهن به ڳڻتي جي ڄاڻ ناهي ڏني. اسلام آباد ۾ هفتيوار ميڊيا بريفنگ دوران پرڏيهي آفيس جي ترجمان قاضي خليل الله جو چوڻ هو ته ايگزيڪٽ جي حوالي سان آمريڪا سوڌو ڪنهن به ملڪ ڪنهن به  قسم جي شڪن جو اظهار ناهي ڪيو. هن وڌيڪ چيو ته آمريڪي اخبار نيويارڪ ٽائيمز جي الزامن کانپوءِ ايگزيڪٽ جي معاملي تي گهرو وزير جي هدايت تي پاڪستاني ايجنسيون جاچ ڪري رهيون آهن. اسان کي ايگزيڪٽ بابت جاچ پوري ٿيڻ جو انتظار ڪرڻ گهرجي.

 

صفوران سانحي ۾ پرڏيهي قوتون ملوث آهن، ثبوت وفاق ڏانهن اماڻي ڇڏيا آهن:ڊي جي رينجرز بلال اڪبر

ڪراچي (اسٽاف رپورٽر) ڊي جي رينجرز سنڌ ميجر جنرل بلال اڪبر چيو آهي ته صفوران ڳوٺ سانحي ۾ پرڏيهي قوتون ملوث آهن، ثبوت وفاق ڏانهن اماڻي ڇڏيا،مک جوابدار ماضيءَ ۾ گرفتاري بعد آزاد ٿيو، جيڪڏهن کيس آزاد نه ڪيو وڃي ها ته سانحو پيش نه اچي ها. صفوران سانحي بابت سينيٽ جي انساني حقن واري اسٽينڊنگ ڪميٽي جو اجلاس سينيٽر نسرين جليل جي صدارت هيٺ ڪراچي ۾ شروع ٿيو، اجلاس ۾ ڊي جي رينجرز ميجر جنرل بلال اڪبر،آءِ جي سنڌ غلام حيدر جمالي۽ چيف سيڪريٽري صديق ميمڻ شرڪت ڪئي. ‎ ڊي جي رينجرز ميجر جنرل بلال اڪبر بريفنگ ڏيندي ٻڌايو ته صفوران ڳوٺ سانحي ۾ پرڏيهي هٿ ملوث آهن، هنن ان حوالي سان ثبوت وفاق ڏانهن اماڻي ڇڏيا آهن. هن انڪشاف ڪيو ته صفوران ڳوٺ سانحي ۾ ملوث مک جوابدار ماضيءَ ۾ گرفتاري بعد آزاد ٿيو هو. ڊي جي رينجرز جو چوڻ هو ته جيڪڏهن جوابدار کي آزاد نه ڪيو وڃي ها ته صفوران ڳوٺ سانحو پيش نه اچي ها. هن ٻڌايو ته ان معاملي جي جاچ ڪئي پئي وڃي ته جوابدار ڪيئن آزاد ٿيو. ڊي جي رينجرز ميجر جنرل بلال اڪبر ٻڌايو ته صفوران ڳوٺ سانحي ۾ 10 جوابدار ملوث آهن، جڏهن ته سندن ٽولو 125 ڏوهارين جو گروهه ملوث آهي. ميجر جنرل بلال اڪبر وڌيڪ ٻڌايو ته صفوران ڳوٺ سانحي ۾ پرڏيهي هٿ ملوث هئڻ جا ثبوت مليا آهن،جڏهن ته امن امان جي قيام لاءِ هٿيارن جي لائيسنس جي جاچ ڪئي وڃي.