تازيون خبرون

Daily Archives: May 21, 2015

ترڪمانستان پاران دهشتگردي ۽ شدت پسندي کي منهن ڏيڻ لاءِ پاڪستان جي ڪوشش جي حمايت

اشڪ آباد (م.ڊ/اي پي پي) پاڪستان ۽ وچ ايشيائي رياست ترڪمانستان ٽرانسپورٽيشن ۽ ڪميونيڪشن رابطن ۾ اضافو ڪرڻ ۽ ترجيحي بنيادن تي رستي، ريل ۽ هوائي رابطن کي قائم ڪرڻ تي خاص ڌيان ڏيڻ جو فيصلو ڪيو. ترڪمانستان جي ٻن ڏينهن جي سرڪاري دوري جي موقعي تي وزيراعظم محمد نواز شريف ۽ صدر قربان گلي بردي ممدوف جي وچ ۾ گڏيل دلچسپي جي معاملن سميت علائقائي ۽ عالمي معاملن تي خيالن جي ڏي وٺ ڪئي وئي. ڪالهه اربع ڏينهن اشڪ آباد ۾ جاري گڏيل پڌرنامي موجب ٻنهي ملڪن گڏيل تعاون ۽ پارٽنرشپ وڌائڻ جو عزم ظاهر ڪيو جيڪو ٻنهي ملڪن جي عوام ۽ حڪومتن جي گڏيل مفاد ۾ آهي. ان سان خطي ۾ امن، استحڪام ۽ خوشحالي کي فروغ ملندو. ترڪمانستان دهشتگردي ۽ شدت پسندي جي خطري کي منهن ڏيڻ جي لاءِ پاڪستان جي ڪوشش جي حمايت ڪئي. ٻنهي ملڪن سيڪيورٽي، دهشتگردي جي خاتمي، منشيات، اسمگلنگ جي روڪٿام، منظم ڏوهن ۽ ٻين خطرن کي منهن ڏيڻ لاءِ تعاون وڌائڻ جو به فيصلو ڪيو ويو. ٻنهي ملڪن جي جيو اڪنامڪ ۽ جيو پوليٽيڪل اهميت کي نظر ۾ رکندي پاڪستان ۽ ترڪمانستان ان ڳالهه تي اتفاق ڪيو ته سمورن شعبن ۾ ٻطرفي تعاون جي تمام گهڻي صلاحيت موجود آهي. ٻنهي ملڪن جي اڳواڻن واپار، معيشت، فنانشل منصوبن جي لاءِ سازگار ماحول پيدا ڪرڻ ۽ انفراسٽرڪچر، مائننگ، زراعت، مينوفيڪچرنگ، ملٽي ميڊيا ٽيڪنالاجي، بئنڪنگ، ماحوليات ۽ انرجي سيڪٽر ۾ تعاون کي فروغ ڏيڻ تي پڻ اتفاق ڪيو. ان ڏس ۾ ٻنهي ملڪن تاپي منصوبي جي اهميت تي زور ڏنو ۽ ان اهم علائقائي منصوبي تي جلد کان جلد عملدرآمد جي لاءِ قدم کڻڻ جو فيصلو ڪيو آهي. اهو به فيصلو ڪيوويو ته ٻنهي ملڪن جي وچ ۾ ثقافت، سائنس، آرٽ، سياحت ۽ راندين جي شعبن ۾ ٻطرفي تعاون کي فروغ ڏنو ويندو. گڏيل پڌرنامي ۾ چيو ويو آهي ته ٻئي ملڪ گڏيل قومن، غيروابسته تحريڪ، جي 77، ايڪو ۽ اسلامي سربراهه ڪانفرنس سميت سمورن علائقائي ۽ عالمي فورمن تي تعاون ڪندا. ٻنهي ملڪن علائقائي ۽ عالمي معاملن کي گڏيل ڳالهين ۽ مشاورت ذريعي حل ڪرڻ تي اتفاق ڪيو. ان کانسواءِ پاڪستان ۽ ترڪمانستان 2017ع ۾ اشڪ آباد ۾ پنجين ايشيائي انڊور ۽ مارشل آرٽس گيمز کي ڪامياب ڪرائڻ جي لاءِ گڏيل تعاون تي اتفاق ڪيو. ٻنهي اڳواڻن چيو ته پاڪستان ۽ ترڪمانستان جي وچ ۾ خصوصي لاڳاپا گڏيل عزت ۽ احترام جي بنياد تي قائم آهن. وزيراعظم محمد نواز شريف ترڪمانستان جي صدر جي ڏاهپ کي ساراهيو جنهن ترڪمانستان کي خوشحالي تي پهچايو. گڏيل پڌرنامي موجب ترڪمانستان گوادر پورٽ جي انفراسٽرڪچر جي صلاحيتن جو جائزو وٺڻ لاءِ جلد هڪ وفد پاڪستان موڪليندو. وفد ايل اين جي/ سي اين جي ڪنورزن پلانٽ قائم ڪرڻ جي آپشنز جو جائزو پڻ وٺندو. وزيراعظم محمد نواز شريف شاندار استقبال ڪرڻ تي ترڪمانستان جي صدر ۽ عوام جا ٿورا مڃيا. هن ترڪمانستان جي صدر کي پاڪستان جي دوري جي دعوت پڻ ڏني.

 

 

صفوران، سبين محمود ۽ آمريڪي عورت تي حملن جا جوابدار گرفتار ڪري ورتا آهن: وڏو وزير

ڪراچي(اسٽاف رپورٽر) وزيراعليٰ سنڌ سيد قائم علي شاهه چيو آهي ته صفورا واقعي جا ڏوهاري ۽ سبين ۾محمود جا قاتل گرفتار ڪيا ويا آهن، جن ۾ سعد عزيز نالي ڏوهاري سبين محمود جي قتل جو مک ماڻهو آهي جڏهن ته صفورا واقعي جي ڏوهارين کان انهن ڳالهين جا اهم ثبوت پڻ مليا آهن.وزير اعليٰ هائوس ۾ پريس ڪانفرنس دوران قائم علي شاهه  اهي سموريون پڌرايون ڪيون. هن وڌيڪ چيو ته سبين محمود جو قاتل انجنيئر هو جڏهن ته قتل جو مک ماڻهو سعد عزيز آهي ۽ ڏوهارين اهي سمورا اعتراف به ڪيا آهن. هن چيو ته هڪ ڏوهاري جا ڪيترا ئي نالا آهن جيڪو دهشتگردي جي واقعن ۾ ملوث رهيو آهي، ڏوهاري  کي بم ٺاهڻ ۽ استعمال ڪرڻ تي وڏي مهارت آهي.ڏوهارين جو هڪ وڏو گروهه آهي جن جا نالا هنن ٻڌايا آهن.قائم علي شاهه وڌيڪ چيو ته ڏوهاري ريجنرز جي برگيڊيئر تي خودڪش بم حملي ڪرڻ کي به قبولي چڪا آهن،اسڪولن تي ڌماڪا،پوليس حملن سوڌو آمريڪي ڊاڪٽر ڊيبرا لوبو تي حملي ۾ به اهو ئي گروهه ملوث آهي.وزيراعلي سنڌ چيو ته صفورا واقعي جي ڏوهارين مان ناصر نالي ڏوهاري 2013ع ۾ دهشتگردي جي ڪيترين ئي وارداتن ۾ ملوث رهيو آهي، طاهر منهاس نالي دهشتگرد به انهن جو مک ماڻهو آهي. ڏوهارين کان وڌيڪ جاچ هلي رهي آهي.

 

آصف علي زرداري جو وڏي وزير سان رابطو، صفوران سانحي جي جوابدارن جي گرفتاري تي شاباش

ڪراچي(اسٽاف رپورٽر) پ پ جي شريڪ چيئرمين ۽ اڳوڻي صدر آصف علي زرداري سيد قائم علي شاهه سان فون تي ڪراچي جي صورتحال تي ڳالهه ٻولهه ڪري جوابدارن جي گرفتاري تي تعريف ڪئي. آصف علي زرداري صفوران سانحي ۾ ملوث چئن جوابدارن جي گرفتاري تي سڪيورٽي ادارن کي ساراهيو. آصف علي زرداري وڏي وزير سيد قائم علي شاهه کي هدايت ڏيندي چيو ته ڪراچي ۾ ڏوهارين خلاف ڪارروائي جاري رکي وڃي.

 

سنڌ اسيمبلي 3 بل منظور ڪري ورتا، ميمبرن جي تجويزن کي نئين بجيٽ ۾ شامل ڪرڻ جو ٺهراءُ به منظور

ڪراچي (اسٽاف رپورٽر) سنڌ اسيمبليءَ صوبائي ٽربيونل ۾ ٽئين ترميم، ڪراچي ۾ باريٽ هوگسن انٽرنيشنل يونيورسٽي قائم ڪرڻ سميت 3 بل منظور ڪري ورتا،پري بجيٽ بحث دوران ميمبرن جي تجويزن کي نئين بجيٽ ۾ شامل ڪرڻ وارو ٺهراءُ به پاس ڪيو ويو. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو. اجلاس دوران صوبائي وزير ڊاڪٽر سڪندر مينڌري، سنڌ سرورسز ٽربيونل ٽئين ترميم وارو بل ايوان ۾ پيش ڪيو جيڪو اتفاق راءِ سان منظور ڪيو ويو. بِل ۾ سروسز ٽربيونل جي چيئرمين کي بااختيار بڻائڻ جي ترميم شامل آهي جڏهن ته چيئرمين کي ضرورت تحت بجيٽ موجب ملازم ڀرتي ڪرڻ جو به اختيار هوندو. صوبائي وزير ڊاڪٽر سڪندر مينڌري، ڪراچي ۾ باريٽ هوگسن انٽرنيشنل يونيورسٽي قائم ڪرڻ وارو بل پڻ پيش ڪيو. بل جي متن موجب يونيورسٽي جو قيام سليم حبيب يونيورسٽي تحت عمل ۾ ايندو جڏهن ته يونيورسٽي ۾ نوجوانن کي مفت اعليٰ تعليم جي سهولت حاصل هوندي. ايوان ڪجهه دير بحث بعد اهو بل به پاس ڪري ورتو. جناح سنڌ ميڊيڪل يونيورسٽي بل پڻ پيش ڪيو ويو، جيڪو ايوان اتفاق راءِ سان منظور ڪري ورتو. بل جي متن ۾ چيو ويو ته جناح يونيورسٽي ۾ ٽيچنگ اسپتال قائم ڪئي ويندي، هائير ايجوڪيشن جي شرط آهي ته ميڊيڪل يونيورسٽي سان گڏ ٽيچنگ اسپتال جو قائم ضروري آهي. اجلاس دوران لياقت جتوئي چيو ته تعليمي ادارا قائم ڪرڻ سٺي ڳالهه آهي، پر معياري تعليم تي به ڌياڻ ڏنو وڃي. هن چيو ته خانگي يونيورسٽيز قائم ڪرڻ جي اجازت ڏيڻ کان اڳ معيار چيڪ ڪيو وڃي، خانگي ادارن مان جعلي ڊگرين جا به انڪشاف سامهون آيا آهن. ان موقعي تي تعليم واري وزير نثار کهڙي چيو ته خانگي يونيورسٽيز قائم ڪرڻ جا قانون موجود آهن، جن ۾ ڪوالٽي ايجوڪيشن جا شرط شامل آهن. نثار کهڙي چيو ته خانگي يونيورسٽين تي شرط لاڳو ڪيو ويو آهي ته اهي صوبي جي ٻين ٻن ضلعن ۾ ڪئمپس قائم ڪن. ان کان اڳ صوبائي وزير ڊاڪٽر سڪندي مينڌري، پري بجيٽ بحث دوران ميمبرن جون تجويزون نئين بجيٽ ۾ شامل ڪرڻ وارو ٺهراءُ پيش ڪيو، جيڪو منظور ڪيو ويو. ايوان ۾ مختلف معاملن تي بحث جاري هو ته اسپيڪر اجلاس جي وڌيڪ ڪارروائي سڀاڻي تائين ملتوي ڪري ڇڏي.

 

ذوالفقار مرزا سرعام دهشتگردي پيو ڪري، عدالتون نوٽيس وٺن:شرجيل ميمڻ

ڪراچي (اسٽاف رپورٽر) اطلاعات واري صوبائي وزير شرجيل ميمڻ چيو آهي ته ذوالفقار مرزا سرعام دهشتگردي ڪري رهيو آهي، نالي ماتر شينهن پاران حڪومتي رٽ کي چيلينج ڪرڻ واري عمل کي نه قبوليو ويندو،سپريم ڪورٽ ۽ سنڌ هاءِ ڪورٽ اڳوڻي صوبائي وزير جي غنڊه گردي جو نوٽيس وٺن. سنڌ اسيمبلي جي اجلاس کانپوءِ ميڊيا سان ڳالهائيندي شرجيل ميمڻ چيو ته ذوالفقار مرزا بدين ۾ زبردستي دڪان بند ڪرايا ۽ ٿاڻي ۾ ڀڃ ڊاهه ڪئي،سندس قدم دهشتگردي برابر آهن. هن چيو ته غنڊه گردي باوجود ذوالفقار مرزا کي رليف ڇو حاصل آهي؟ سپريم ڪورٽ ۽ سنڌ هاءِ ڪورٽ کي گذارش آهي ته سندس ضمانتون رد ڪيون وڃن. شرجيل ميمڻ چيو ته نالي ماتر شينهن قانون جا بکيا اڊيڙي رهيو آهي، وٽس ثبوت آهن ته عدالت ۾ پيش ڪري. هن چيو ته پيمرا کي خط لکڻ باوجود هڪ شخص ميڊيا تي پ پ قيادت خلاف گٿا لفظ ڳالهائي رهيو آهي،پر ڪوبه نوٽيس نه ٿو ورتو وڃي. صوبائي وزير شرجيل ميمڻ چيو ته ذوالفقار مرزا جا پرڪار سڀني جي سامهون آهن، حڪومتي رٽ چيلينج ڪرڻ وارو عمل ڪنهن به ريت نه قبوليو ويندو.

 

ايگزيڪٽ واري معاملي تي چينلن کي ايتري واويلا نه ڪرڻ کپي، جاچ هلي پئي مهينو لڳي ويندو: چوڌري نثار

اسلام آباد (بيورو) وفاقي گهرو وزير ميڊيا سان ڳالهائيندي چيو ته ايگزيڪٽ وارو معاملو تمام حساس آهي، انڪري ان کي ڪجهه وقت گهرجي، عوام کي ۽ ميڊيا کي اپيل آهي ته جاچ مڪمل ٿيڻ ڏيو، ان کان پوءِ ڪو فيصلو ڪيو ويندو،هڪ ڏينهن ۾ توهان ڪنهن کي به ڏوهي يا بي ڏوهي نٿا چئي سگهو.مان مڃان ٿو ته اهو منهنجو ئي فيصلو هو ته ايگزيڪٽ جي جاچ ٿيڻ گهرجي، پر مون کي اندازو نه هو ته ان ۾ ميڊيا ايتري دلچسپي وٺندي. ايگزيڪٽ جي حوالي سان ڪا به گرفتاري اڃان نه ٿي آهي، ها پڇا ڳاڇا جاري آهي. هن اسڪينڊل سان پاڪستان جو نالو تمام خراب ٿي رهيو آهي اڃان لڳ ڀڳ مهينو لڳندو پوري جاچ ۾. هن چيو ته ڪوشش ڪنداسين ته جاچ جلد پوري ٿئي، ۽ عوام کي جلد ئي حقيقت جي ڄاڻ ڏني ويندي. چوڌري نثار ميڊيا کي اپيل ڪئي ته ان معاملي کي رڳو ميڊيا جو مسئلو نه سمجهيو وڃي پوري پاڪستان جي عزت جو مسئلو آهي. ۽ هن چينلن کي اپيل ڪئي ته بنا ڪنهن ثبوت جي ايتري واويلا ٺيڪ ناهي، هن چيو ته اسان ان مسئلي جي جڙ تائين وينداسين. ايگزيڪٽ جاچ لاءِ 7 رڪني ڪميٽي جوڙي وئي آهي ۽ ميڊيا تي اهو هلي رهيو آهي ته ميبر مٽايا ويا آهن يا گهٽا، وڌايا ويا آهن ائين بلڪل ناهي اها ئي 7 رڪني ڪميٽي آهي.  ايگزيڪٽ جي 10 ڊائريڪٽرس کي نوٽيس موڪليو ويو آهي.صفورا واقعي جي حوالي سان هن چيو ته واقعي ۾ ملوث مک ماڻهو کي گرفتار ڪيو ويو آهي.

 

اُتر وزيرستان ۾ سڪيورٽي فورسز جي جيٽ جهازن ذريعي بمباري، 13 دهشتگرد مارجي ويا

اُتروزيرستان (مانيٽرنگ ڊيسڪ) اُتر وزيرستان جي علائقي دتا خيل ۾سڪيورٽي فورسز جي جيٽ جهازن ذريعي بمباري جي نتيجي ۾ 13 دهشتگرد مارجي ويا، آءِ ايس پي آر چيو آهي ته بمباري ۾ دهشتگردن جا 5 ٺڪاڻا پڻ تباهه ڪيا ويا آهن. ڊي جي آءِ ايس پي آر موجب، اتر وزيرستان جي تعلقي دتا خيل ۾ سڪيورٽي فورسز دهشتگردن کي ٺڪاڻن تي بمباري ڪري ڏني. بمباري جي نتيجي ۾ ٺڪاڻن اندر پناهه ورتل 13 دهشتگرد مارجي ويا. آءِ ايس پي آر جو چوڻ آهي ته بمباري جي نتيجي ۾ دهشتگردن جا 5 ٺڪاڻا پڻ تباهه ڪيا ويا آهن.

 

ايف آءِ اي ايگزيڪٽ اسڪينڊل جي شروعاتي جاچ رپورٽ چوڌري نثار ڏانهن اماڻي ڇڏي، ڪمپيوٽر جو رڪارڊ ۽ ملازمن جا بيان به شامل

اسلام آباد (بيورو) ايف آءِ اي، ايگزيڪٽ اسڪينڊل جي شروعاتي جاچ رپورٽ وفاقي گهرو وزير چوڌري نثار ڏانهن اماڻي ڇڏي آهي ، جنهن ۾ ايگزڪٽ ڪمپني جي آفيس مان قبضي ۾ ورتل ڪمپيوٽرز جو رڪارڊ ۽ ملازمن جا بيان به شامل آهن، جڏهن ته، چوڌري نثار ان حوالي سان اڄ شام ڇهين وڳي اهم پريس ڪانفرنس ڪندو. وفاقي گهرو وزير چوڌري نثار جي هدايتن تي ايف آءِ اي پاران ايگزيڪٽ ڪمپني جي جعلي ڊگرين واري اسڪينڊل جي جاچ جاري آهي. ايف آءِ اي راولپنڊي ۾ ايگزيڪٽ ڪمپني جي آفيس سيل ڪري ڇڏي آهي، جڏهن ته هن وقت تائين 23 ملازمن جا بيان پڻ رڪارڊ ڪيا ويا آهن. ايف آءِ اي سائبر ڪرائيم ايگزيڪٽ آفيس جي قبضي مان ورتل چاليهه ڪمپيوٽرزڊ جو فرانزڪ تجزيو شروع ڪري ڇڏيو ڇڏيو آهي، جنهن جي نگراني ايف آءِ اي سائبر ڪرائيم جا 2 ماهر ڪري رهيا آهن. ذريعن موجب، فرانزڪ تجزئي ۾ هفتي کان 10 ڏينهن لڳي سگهن ٿا پر ايف آءِ اي شروعاتي جاچ رپورٽ مڪمل ڪري وفاقي گهرو وزير چوڌري نثار جي حوالي ڪري ڇڏي آهي. رپورٽ ۾ ايف آءِ اي پاران هن وقت تائين ڪيل جاچ بابت گهرو وزير کي آگاهي ڏني وئي آهي، جڏهن ته ايگزڪٽ ڪمپني جي آفيسز مان قبضي ۾ ورتل ڪمپيوٽرز جو رڪارڊ ۽ ملازمن جا بيان به شامل آهن.  وفاقي گهرو وزير چوڌري نثار ان حوالي سان اڄ شام ڇهين وڳي پريس ڪانفرنس پڻ ڪندو. ايف آءِ اي ايگزڪٽ ڪمپني جي اعليٰ عملدارن کي به طلب ڪري ورتو آهي، جڏهن ته ڪمپني جي سي اي او شعيب شيخ جو سڀاڻي بيان رڪارڊ ٿيڻ جو امڪان آهي.

 

ماڊل ٽائون واقعو: الزام ثابت نه ٿيا، جي ٽي آءِ وزير اعظم ۽ وزيراعليٰ پنجاب کي بي ڏوهي قرار ڏيئي ڇڏيو، پوليس ذميوار قرار

لاهور(بيورو) ماڊل ٽائون واقعي جي جاچ لاءِجوڙيل گڏيل جاچ ٽيم پنهنجي جاچ مڪمل ڪندي، رپورٽ حڪومت کي موڪلي ڇڏي جنهن ۾ وزيراعظم ، وزيراعليٰ پنجاب ۽ اڳوڻي قانون واري وزير تي الزام ثابت نه ٿي سگهيا آهن. جاچ ٽيم جاچ مڪمل ڪري وزيراعظم ، وزيراعليٰ پنجاب ۽ اڳوڻي قانون واري وزير کي ڪلين چٽ ڏئي ڇڏي ۽  رپورٽ ۾ ايس پي سيڪيورٽيسلمان خان ۽ 10 پوليس اهلڪارن کي واقعي جو ذميوار قرار ڏنو ويو آهي. رپورٽ ۾ چيو ويو آهي ته  صوبائي حڪومت پاران منهاج القرآن جي ٻاهران ٽي ايم اي ۽ پوليس حددخليون هٽائڻ کانسواءِ ٻيو ڪو ڪم ناهي ڏنو ويو. رپورٽ مطابق 15 جون2014ع تي عوامي تحريڪ جي 2 کان3 هزار ڪارڪنن جي وچ ۾ چڪريون ٿيون جڏهن ته ٻنهي پارٽين هڪٻئي تي فائرنگ ڪئي .

 

نوازشريف ۽ زرداري گڏجي نيب جو سربراهه لڳايو جنهن سندن ڪيسز ختم ڪيا: عمران خان

ڪراچي (اسٽاف رپورٽر) تحريڪ انصاف جي چيئرمين عمران خان چيو آهي ته آصف علي زرداري ۽ نوازشريف پنهنجي مفاد خاطر هڪ ٿي وڃن ٿا جنهن سان پاڪستان کي نقصان پهتو آهي جڏهن ته ٻنهي جي مشاورت سان نيب جو سربراهه لڳايو ويو جنهن سندن سمورا ڪيسز ختم ڪري ڇڏيا. اسلام آباد ۾ پريس ڪانفرنس ڪندي عمران خان چيو ته چيف جسٽس آف پاڪستان تي مڪمل اعتماد آهي ۽ جوڊيشل ڪميشن جيڪو به فيصلو ڪندي اُهو اسان کي منظور هوندو، ثبوتن سبب ئي اين اي 125 جو فيصلو عوام آڏو آيو ۽ اين اي 122 جو فيصلو به اسانجي حق ۾ ايندو جڏهن ته 2015 چونڊن جو سال آهي. هن چيو ته ايف آئي اي منهنجي اختيار ۾ هجي ها ته ذوالفقار مرزا جي الزامن جي جانچ ضرور ڪرايا ها. هن چيو ته ملڪ ۾ ڪابه اپوزيشن ناهي آصف زرداري ۽ نوازشريف پنهنجي مفاد خاطر هڪ ٿي ويندا جنهن سان پاڪستان کي نقصان پهتو آهي، ٻنهي جي مشاورت سان نيب جو سربراهه لڳايو جنهن نوازشريف ۽ آصف زرداري جا سمورا ڪيسز ختم ڪري ڇڏيا. هن چيو ته گيس انفراسٽڪچر ڊيولپمينٽ بل جي منظور ٿيڻ سان سمورن صوبن ۾ احساس محرومي وڌندي ۽ حڪومت جي اهڙي قدم سان پنجاب خلاف نفرت ۾ اضافو ٿيندو ۽ جيڪڏهن حڪومت کي گيس انفراسٽڪچر ڊيولپمينٽ سيس بل منظور ڪرائڻو آهي ته اُن کي گڏيل مفادن واري ڪونسل ذريعي آندو وڃي. هن چيو ته ان بل سان مهانگائي ۾ وڌيڪ اضافو ٿيندو ۽ صنعتون وڌيڪ تباهي ڏانهن وينديون جڏهن ته خيبرپختونخواهه جي صنعتن کي گهڻو نقصان ٿيندو جتي پهريان ئي 70 سيڪڙو انڊسٽريون بند آهن، هن چيو ته حڪومت ٽيڪس جو نظام ڪري ها ته گيس مهانگي نه ٿئي ها، اميرن کان ڪابه ٽيڪس وصول نه پئي ڪئي وڃي. پاڪ چائنا اقتصادي راهداري جي حوالي سان عمران خان جو چوڻ هو ته هي پروجيڪٽ پاڪستان جي ڪاميابي لاءِ تمام ضروري آهي ۽ ٻنهي ملڪن وچ ۾ 2013ع ۾ مفاهمتي يادداشت جي معاهدي تي صحيح ٿي هئي پر ڪنهن کي راهداري روٽ جو علم نه هو، جڏهن ته انهيءَ روٽ ذريعي بلوچستان جي عليحدگي پسند تنظيمون به پاڪستان کي تسليم ڪرڻ تي راضي ٿي وينديون انهيءَ روٽ ذريعي پوئتي پيل علائقن جي ڊيولپمينٽ ڪئي ويندي.