تازيون خبرون

Daily Archives: May 19, 2015

ڪراچي جي مختلف علائقن مان عورت سميت 4 ڄڻن جا لاش هٿ

ڪراچي (اسٽاف رپورٽر) ڪراچي جي مختلف علائقن مان عورت سميت 4 ڄڻن جا لاش مليا آهن تفصيل مطابق اورنگي ٽائون جي علائقي سيڪٽر 12 ايل بروهي هوٽل ڀرسان هڪ شخص جو لاش مليو آهي پوليس مطابق نوجوان تي تشدد کان پوءِ کيس قتل ڪيو ويو آهي جڏهن ته مقتول جي اڃا تائين سڃاڻپ نه ٿي سگهي آهي، لاش ايڌي سرد خاني پهچايو ويو آهي سائيٽ بي ٿاڻي جي حد غني چورنگي لک فلپس ڪمپني ويجهو انم ٽريڊ سينٽر فليٽ 302 مان مرد ۽ عورت جو لاش مليو آهي.پوليس مطابق ٻنهي جو موت زهريلي شئي کائڻ سان ٿيو آهي. ڇوڪري جي سڃاڻپ بلال ولد محمد حنيف جي نالي سان ٿي آهي جڏهن ته عورت جي سڃاڻپ اڃا تائين نه ٿي سگهي آهي. جاچ کان پوءِ ئي اصل حقيقتون سامهون اينديون منگهوپير ٿاڻي جي حد سلطان آباد قبرستان مان هڪ شخص جو تشدد ٿيل لاش مليو جيڪو اسپتال منتقل ڪيو ويو آهي مقتول جي اڃا تائين سڃاڻپ نه ٿي سگهي آهي موت جو اصل سبب پوسٽ مارٽم کان پوءِ ئي معلوم ٿي سگهندو.

 

سلمان خان سان گڏ ڪنهن به فلم ۾ ڪم نه ڪري رهي آهيان، دپيڪا پڊوڪون

ممبئي:(شوبز نيوز) دپيڪا پڊوڪون جي پهرين فلم ان جي لاءِ لڪي ثابت ٿي، جڏهن ته ان بالي ووڊ ۾ انٽري شاهه رخ خان سان گڏ فلم “اوم شانتي اوم” سان ڪئي، شاهه رخ خان، علي خان سيف، رنبير ڪپور ۽ ٻين مآهور اداڪارن سان گڏ جوڙي ٺاهڻ واري دپيڪا پڊوڪون اڄ تائين دبنگ خان سان گڏ نظر ناهي آئي ۽ نه ئي ڪڏهن هو سلمان خان سان گڏ نظر اچڻ جو ارادو رکي ٿي، اداڪاره جو چوڻ هو ته هو فلم شڌي يا سلطان ۾ سلمان خان سان گڏ اداڪاري نه ڪري رهي آهي، واضح رهي ته دپيڪا پڊوڪون ان ڏينهن فلم تماشا ۽ باجي رائو مستاني جي شوٽنگ ۾ مصروف آهي.

 

جنهن ڪشمير نه ڏٺو هن ڪجهه به نه ڏٺو: سلمان خان

ممبئي(شوبز نيوز) بالي ووڊ اداڪار سلمان خان پنهنجي پرستارن جو شڪريو ادا ڪيو آهي ته هنن عدالت طرفان جاري ڪارروائي دوران هر لمحي سندس ساٿ ڏنو. سلمان خان هاءِ ڪورٽ مان سزا جي معطليءَ کانپوءِ گذريل ڏينهن پهريون ڀيرو هڪ تقريب ۾ شرڪت ڪئي. ان موقعي تي ڳالهائيندي هن چيو ته هو پرستارن جو قرضدار ٿي ويو آهي جن انتهائي محبت سان هر لمحي سندس ساٿ ڏنو ۽ هنن جي دعائن سان هو سزا کان بچي ويو. هن چيو ته هو پنهنجن چاهيندڙن جو تمام گهڻو احترام ڪندو آهي. ان موقعي تي هڪ سوال جي جواب ۾ هن چيو ته جنهن ڪشمير ناهي ڏٺو هن ڪجهه به ڏٺو آهي. هن چيو ته ڪشمير جي مقابلي ۾ سوئٽزرلينڊ جو حسن به ڪجهه ناهي. هن ٻُڌايو ته سندس نانا جو تعلق پڻ ڄمون سان هو.

 

جاويد شيخ فلمن ۾ ڪم ڪرڻ جو معاوضو 17 لک روپيا ڪري ڇڏيو

لاهور (شوبز نيوز) بالي ووڊ جي ناليواري اداڪار ۽ هدايتڪار فلم ۾ ڪم ڪرڻ جو معاوضو 7 لک روپيا ڪري ڇڏيو آهي. ذريعن موجب اداڪار جاويد شيخ فلم ڊائريڪٽر اقبال ڪاشميري کان فلم ۾ ڪم ڪرڻ جا 17 لک روپيا گهري ورتا آهن جنهن تي ڪاشميري کيس رعايت ڪرڻ لاءِ چيو آهي پر جاويد شيخ صاف انڪار ڪري ڇڏيو آهي جنهن تي اقبال ڪاشميري کيس فلم ۾ ڪاسٽ ڪرڻ تان هٿ کڻي ڇڏيو آهي. واضح رهي ته جاويد شيخ هدايتڪار اقبال ڪاشميري سان گڏ فلم ”ڀاڀي ديان چوڙيان“ ۽ ٻين فلمن ۾ انتهائي گهٽ معاوضي تي ڪم ڪيو هو

 

في الحال شادي جو ڪو ارادو ناهي: رنبير ڪپور/ ڪترينا ڪيف

ممبئي(شوبز نيوز) بالي ووڊ اداڪار رنبير ڪپور ۽ ڪترينا ڪيف تي 2016ع ۾ شادي ڪرڻ  واري حوالي سان شايع ٿيڻ وارين خبرن جي ترديد ڪري ڇڏي. رنبير ڪپور  انٽرويو ڏيندي چيو ته منهنجي ۽ ڪترينا جي شادي متعلق شايع ٿيڻ  واري خبر صحيح ناهي، في الحال شادي جو ڪو ارادو ناهي. ڇو جو اسان پنهنجي ڪيريئر کي ٺاهڻ ۾ مصروف آهيون. رنبير ڪپور وڌيڪ چيو ته هو شادي جهڙي وڏي خبر ميڊيا کان نه لڪائيندي . ٻئي پاسي ڪترينا ڪيف جو چوڻ هو ته هن به اڃا تائين شادي جو ڪو فيصلو ناهي ڪيو.

 

آءِ سي سيءَ پاڪستان زمبابوي سيريز جي لاءِ پنهنجا ميچ آفيسر پاڪستان موڪلڻ کان انڪار ڪري ڇڏي

دبئي (اسپورٽس نيوز) انٽرنيشنل ڪرڪيٽ ڪائونسل (آءِ سي سيءَ) پاڪستان زمبابوي سيريز جي لاءِ پنهنجا ميچ آفيسر پاڪستان موڪلڻ کان انڪار ڪندي پاڪستان کي هڪ مفت صلاح ڏيندي مقامي امپائر مقرر ڪرڻ جو چيو آهي، پاڪستان ڪرڪيٽ بورڊ آءِ سي سيءَ جي فيصلي کان پوءِ سيريز جي لاءِ امپائرن ۽ ميچ ريفريءَ جو اعلان ڪري ڇڏيو آهي. زمبابوي جي ٽيم 3 ون ڊي ۽ ٻِن ٽي ٽوئنٽي سيريز کيڏڻ جي لاءِ 19 مئي تي پاڪستان پهچي رهي آهي جنهن کان پوءِ پاڪستان ۾ ڇهن سالن کان پوءِ ڪرڪيٽ بحال ٿي ويندي، پر آءِ سي سيءَ سيريز ۾ پنهنجا آفيسر نه موڪلڻ جو اعلان ڪري سيريز جو مزو خراب ڪيو آهي. آءِ سي سيءَ اهڙو فيصلو پنهنجي سڪيورٽي ماهرن جي رپورٽ کي نظر ۾ رکي ڪيو هو، جن پاڪستان ۾ سڪيورٽي جي صورتحال تي کٽڪن جو اظهار ڪيو. آءِ سي سيءَ اپريل ۾ ئي فيصلو ڪيو هو ته جيڪڏهن ميچ آفيسر پاڪستان نه موڪليا ويا ته پاڪستان ڪرڪيٽ بورڊ کي مقامي آفيسر مقرر ڪرڻ جي اجازت ڏني ويندي. هتي ان ڳالهه کي خاص طور واضح ڪيو ويو آهي ته ان ميچ کي آفيشل ڪرڪيٽ ميچ جي حيثيت حاصل هوندي. پاڪستان ڪرڪيٽ بورڊ سيريز جي لاءِ ميچ آفيسرن جو اعلان ڪري ڇڏيو آهي، اظهر خان سڀني ميچن جو ميچ ريفري هوندو. پاڪستان ڪرڪيٽ بورڊ ميچن جي امپائرن جو اعلان به ڪيو آهي ۽ پاڪستان سان گڏوگڏ زمبابوي جو رسل ٽفن به ميچن ۾ امپائرنگ ڪندي نظر ايندو. پي سي بيءَ موجب عليم ڊار، احسن رضا، شوزيب رضا ۽ زمبابوين امپائر رسل ٽفن فيلڊ امپائر هوندا. ٻنهي ٽيمن وچ ۾ 22 مئي تي ٿيندڙ پهرين ٽي ٽوئنٽي ۾ احنس رضا ۽ شوزيب رضا فيلڊ امپائر هوندا، جڏهن ته ٻي ٽي ٽوئنٽي ۾ امپائرنگ جي ذميواري احسن رضا ۽ احمد شهاب حوالي ڪئي وئي آهي. ٽنهي ون ڊي ميچن ۾ زمبابوين امپائر رسل ٽفن کي امپائرنگ جي ذميواري ڏني وئي آهي، جڏهن ساڻس پهرين ميچ ۾ عليم ڊار، ٻين ميچ ۾ شوزيب رضا ۽ ٽيءَ ۾ احسن رضا امپائرنگ جا فرض نڀائيندا.

 

پاڪستانيو اسان اچون پيا، زمبابوي رانديگرن جو ٽوئيٽر تي بيان

دبئي: پاڪستان ۾ عالمي ڪرڪيٽ جي شروعات ڪندڙ زمبابوي جي ٽيم دبئي ۾ موجود آهي جيڪا اڄ رات پاڪستان پهچندي، زمبابوي رانديگر پاڪستان اچڻ لاءِ بيتاب آهن.مهمان ٽيم پاڪستان جي دوري لاءِ هراري کان دبئي ايئرپورٽ تي پهتي آهي جتان زمبابوي رانديگر برين ويٽوري ۽ رچمونڊ موتمبامي سماجي رابطن واري ويب سائيٽ ٽوئٽر تي بيان ڏنو آهي ته پاڪستانيو اسان اچون پيا، جنهن جي جواب ۾ هزارين پاڪستانين کين ڀيلڪار ڪئي آهي.

 

سخي تاج محمد شاهه جي عرس جي موقعي تي ملاکڙو

جھڏو (اسپورٽس نيوز) جھڏي جي مشهور بزرگ سخي تاج محمد شاهه جي عرس جي موقعي تي ملاکڙي ۾ پهلوان جان محمد بگٽي نور احمد سان مقابلو ڪيو. غلام فريد شاهاڻي، محمد خاصخيلي کي ۽ لالو لاشاري، علي محمد هالائي مقابلا کٽي ورتا ۽ شوقينن کان داد حاصل ڪيو. ملاکڙي جا کٽيندڙ اڄ پاڻ ۾ ملاکڙو وڙهندا. ملاکڙو وڌيڪ ٻه ڏينهن جاري رهندو. ملاکڙي جو ڪمپيئرنگ اڳوڻو مشهور ملهه پهلوان آچر هري ڪري رهيو هو.

 

ملير درساڻو ڇنو ۾ يوسف شاهه جي ميلي جي پڄاڻي، ٽن ڏينهن کان هلندڙ ميلي ۽ ملهه ملاکڙي ۾ هزارين ملير واسين جي شرڪت

کوکرا پار (اسپورٽس نيوز) ملير درساڻو ڇنو ۾ يوسف شاهه جي ميلي جي پڄاڻي، ٽن ڏينهن کان هلندڙ ميلي ۽ ملهه ملاکڙي ۾ هزارين ملير واسين جي شرڪت، ملاکڙي ۾ 60 پهلوانن حصو ورتو، سخت مقابلي کان پوءِ ڪيترن ئي پهوانن کي ڏندڻ پئجي ويا، پهريون نمبر مختيار عالماڻي، ٻيو نمبر اياز علي شاهه ۽ ٽيون نمبر حسين مغيري جي حصي ۾ آيو، ملاکڙي جي خاص مهمان حليم عادل شيخ طرفان ملهه پهلوانن ۾ انعام ورهايا، ملير جي درساڻي ڇني ۾  واقع حضرت يوسف شاهه جي ٽن ڏينهن کان هلندڙ ميلي جي ڪالهه پڄاڻي ٿي، جنهن ۾ ملهه ملاکڙي کان سواءِ، بازارون گهمڻ ۽ خريداري لاءِ ڪيترائي اسٽال لڳايا ويا هئا، جتي هزارين ماڻهن توڙي عورتن دلچسپي سان حصو ورتو ۽ باسون باسيون، ان موقعي تي سنڌ جي ثقافتي راند ملهه ملاکڙو پڻ ٿيو، جنهن کي ڏسڻ لاءِ بسن، ٽرڪن ۽ ٻين گاڏين ۾ سوار ٿي هزارين شوڪين پهتا، جڏهن ته خاص مهمان طور مسلم ليگ (ق) جي حليم عادل شيخ ۽ اعزازي مهمان حاجي ظفر علي درس، منظور علي درس، فيض محمد درس، سيد انور شاهه، مجاهد جوکيو، مرتضيٰ درس، عبدالقادر بلوچ ۽ ٻين شرڪت ڪئي، ان موقعي تي ملاکڙي ۾ ملير سميت سڄي سنڌ مان 60 کان وڌيڪ پهلوانن حصو ورتو، ملاکڙي ۾ پهريون انعام پهلوان مختيار عالماڻي، ٻيو انعام پهلوان اياز علي شاهه ۽ ٽيو انعام پهلوان حسين مغيري کي مليو، ان موقعي تي حليم عادل شيخ پهلوانن ۾ انعام ورهايا ۽ چيو ته سياسي گهٽ ٻوسٽ واري ماحول ۾ سنڌ جون شاهوڪار روايت ميلا ۽ ملاکڙا ماڻهن ۾ جئيڻ جو اتساهه پيدا ڪري رهيا آهن، هن چيو ملاکڙي ۾ سنڌ نوجوانن ۾ سهپ، بُردباري، طاقت ۽ صلاحيتون ڏسي تمام گهڻي خوشي ٿي آهي. ملهه پهلوانن ۽ ملاکڙي جي راند کي سرڪاري جي ڪابه سر پريستي ناهي ان باوجود ماڻهن جي دلچسپي ۽ پهلوانن جي همت افزائي ان ثقافتي راند کي جيئرو رکندي پئي اچي، اهڙين صحت مند سرگرميون جاري رهڻ گهرجن.

 

ڪراچي ۾ مفت پاڻي ٽينڪر فراهم ڪرڻ لاءِ ڪميٽي قائم

 

سنڌ جي اطلاعات ۽مڪاني کاتن واري وزير ۽ ڪراچي واٽراينڊ سيوريج بورڊ جي چيئرمين شرجيل انعام ميمڻ چيو آهي ته پاڻي جي بحران کي منهن ڏيڻ لاءِ وارا بندي ،ڪراچي جي شهرين کي روزانوهڪ هزارمفت واٽر  ٽئنڪرز جي فراهمي سومر کان شروع ڪرڻ ۽ رمضان  المبارڪ دوران انهن ٽئنڪرن جو تعداد 3000 تائين وڌائڻ جو فيصلو ڪيو آهي ،جڏهن ته چئن منصوبن جي شروعات هن مهيني کان ڪئي ويندي.واٽر بورڊ جي مين سپلاءِ جي 18 لائنن تي ميٽر به لڳايا ويا آهن۽ وڌيڪ 24 ميٽر به ايندڙ هڪ مهيني ۾ لڳايا ويندا، جنهن سان پاڻي جي چوري ۽ ان ۾ليڪيج کي روڪڻ ۾ مدد ملي سگهندي. مفت ٽئنڪرن کي شفاف طريقي سان عوام تائين پهچائڻ ۽ انهن جي خرچن تي مڪمل نگراني لاءِ ڪمشنر ڪراچي ۽ ايم ڊي واٽر بورڊ جي نگراني ۾ هڪ ڪميٽي جوڙي ويئي آهي ۽ انهن مفت ٽئنڪرن کي شفاف طريقي سان عوام تائين پهچائڻ لاءِ لاڳاپيل ڊي سيز، واٽر بورڊ جي چيف انجنيئرز ۽ ايڪس اي اين ملي ڪم ڪندا. هاڻي تائين 62 واٽر پارڪ جي غير قانوني ڪنيڪشنز کي ڪاٽيو ويو آهي ۽ هاڻي سڀني واٽر پارڪ ۽ صنعتن ۾ موجود غير قانوني پاڻي جي ڪنيڪشنن خلاف مهم کي وڌيڪ  تيز ڪيو ويو آهي.اهڙن خيالن جو اظهار هن آچر ڏينهن ڪراچي واٽر ۽ سيوريج بورڊ جي مرڪزي آفيس ۾ منعقد ڪيل اجلاس کانپوءِ پريس ڪانفرنس ڪندي ڪيو.ان موقعي تي ڪمشنر ڪراچي شعيب احمد صديقي،ايم ڊي واٽر بورڊ سيد هاشم رضا زيدي، ڊي ايم ڊيز،چيف انجنيئرز،۽ ٻيا اعليٰ آفيسر موجود هئا.ان کان اڳ اجلاس ۾ ايم ڊي واٽر بورڊ ۽ ٻين آفيسرن صوبائي وزير کي شهر ۾ پاڻي جي کوٽ کي منهن ڏيڻ لاءِ کنيل قدمن شارٽ ۽ لانگ ٽرم پروگرام جي حوالي سان مڪمل بريفنگ ڏني.ان بعد پريس ڪانفرنس ڪندي هن چيو ته هن وقت به اسان کي شهر ۾ هڪ هزار ملين گيلن (ايم جي ڊي) پاڻي جي مقابلي ۾ 550 ايم جي ڊي پاڻي دستياب آهي۽ ان جي مئنيجمينٽ کي بهتر کان بهتر بڻائڻ لاءِ واٽر بورڊ جي سڀئي آفيسر ڏينهن رات ڪوششون ڪري رهيا آهن ۽ ان لاءِ واٽر بورڊ جي سڀني ملازمن جون موڪلون رمضان تائين ختم ڪيون ويون آهن. هن چيو ته نارٿ ايسٽ ڪراچي (اين اي ڪي)پمپنگ اسٽيشن تي موجود خراب مشين کي به ٺهرايو ويو آهي۽ ايندڙ 24 ڪلاڪن اندر ان مان وڌيڪ 22 ايم جي ڊي پاڻي جي فراهمي شروع ڪئي ويندي.هن ٻڌايو ته واٽر بورڊ جي مين سپلاءِ جي 18 لائينن تي ميٽر هنيا ويا آهن ۽ وڌيڪ 24 ميٽر به ايندڙهڪ مهيني اندر لڳايا ويندا جنهن سان پاڻي جي چوري ۽ پاڻي جي ليڪيج کي روڪڻ ۾ مدد ملندي.هن چيو ته ڌاٻيجي کان شهر کي پاڻي جي فراهمي کي وڌائڻ لاءِ ٻن منصوبن تي ڪم شروع ڪيو ويو آهي.جنهن سان  شهر کي 165 ايم جي ڊي پاڻي ۾ اضافو ٿيندو. هن چيو ته هن وقت پاڻي جي کوٽ وارن علائقن خاص ڪري بلديا ٽائون، سرجاني،نيو ڪراچي،اورنگي ٽائون، ميٽرول،سائيٽ ۽ ڪامياڙي ۾ هڪ هزارمفت ٽئنڪرن ذريعي عوام کي پاڻي فراهم ڪيو پيو وڃي ۽ انهن جو سڀ خرچ واٽر بورڊ خود برداشت ڪندي ۽ ان سلسلي ۾وڏي وزير  واٽر بورڊ کي 4 چئن مهينن لاءِ 16 ڪروڙ روپين جي خاص گرانٽ به ڏني آهي. هن چيو ته پاڻي ۽ سيوريج جي شڪايت ڪرڻ لاءِ واٽر بورڊ جي شڪايتي هيلپ لائين سان گڏوگڏ ڪمشنر ڪراچي جي شڪايتي سيل نمبر 02199203443 تي به عوام پنهنجي شڪايت درج ڪرائي سگهي ٿو.

ضرورت ان ڳالهه جي آهي ته جتي سنڌ حڪومت عوام لاءِ پيدا ٿيل پاڻي جي کوٽ ختم ڪرڻ لاءِ ساراهه جوڳا قدم کڻي رهي آهي اتي عوام کي به گهرجي ته پاڻي جو غير ضروري استعمال بند ڪري ته جيئن پاڻي جي کوٽ کي جلد ختم ڪري سگهجي ۽ ڪراچي جو عوام هن اهم مسئلي کان هميشه لاءِ ڇوٽڪارو حاصل ڪري سگهي.