تازيون خبرون

Daily Archives: May 18, 2015

اسماعيلي برادريءَ تي حملي ۾ “را” جي ملوث هئڻ جا ثبوت مليا آهن: وڏو وزير

سکر (بيورو) سنڌ جي وڏي وزير سيد قائم علي شاهه سکر ڊويزن ۾ ڌاڙيل فيڪٽر سميت هر قسم جي ڏوهارين خلاف آپريشن تيز ڪرڻ ۽ امن امان جي صورتحال بهتر بڻائڻ جي هدايت ڏيندي چيو آهي ته ڏوهاري ڀل ڪيڏا به پاور فُل ڇونه هُجن کين آخري انجام تائين پهچايو ويندو ۽ لينڊ مافيا، ڀتا خوري، منشيات، اغوائن ۽ ٻين سنگين ڏوهن ۾ ملوث ڏوهارين خلاف ڪارروائي جو پوليس ۽ قانون لاڳو ڪندڙ ادارن کي فري هينڊ ڏئي ڇڏيو آهي، عوام کي سُک ۽ امن ڀريو ساهه کڻڻ جي راهه ۾ رڪاوٽ هرگز برداشت نه ڪئي ويندي. هن اهڙيون هدايتون ڪمشنر آفيس سکر ۾ سکر ڊويزن اندر امن امان جي صورتحال خاص طور تي ڌاڙيلن خلاف هلندڙ آپريشن جي سلسلي ۾ ڪوٺايل اعليٰ سطحي اجلاس جي صدارت ڪندي ڏنيون. اجلاس ۾ ڪمشنر، ڊي آءِ جي سکر، سکر، خيرپور ۽ گهوٽڪي جي ڊپٽي ڪمشنرن، ايس ايس پيز ۽ ٻين قانون لاڳو ڪندڙ ادارن جي عملدارن شرڪت ڪئي. ان موقعي تي گهوٽڪي جي ايس ايس پي ثاقب سلطان گهوٽڪي ضلعي ۾ هلندڙ پوليس آپريشن جي سلسلي ۾ تفصيلي بريفنگ ڏيندي ٻڌايو ته آپريشن ۾ هڪ اهلڪار شهيد ۽ 10 زخمي ٿيا آهن، جڏهن ته 4 ڌاڙيل ماريا ويا آهن، آپريشن ۾ خيرپور، سکر ۽ گهوٽڪي ضلعن جي پوليس حصو وٺي رهي آهي جڏهن ته بڪتربند گاڏين جي مدد پڻ ورتي پئي وڃي. ايس ايس پي وزيراعليٰ کان آپريشن ڪامياب بڻائڻ لاءِ هيليڪاپٽر ۽ جديد هٿيار فراهم ڪرڻ جي گهر ڪئي. سنڌ جي وڏي وزير سيد قائم علي شاهه اجلاس دوران هدايت ڪئي ته ڌاڙيلن خلاف آپريشن کي وڌيڪ طاقتور بڻائڻ لاءِ پوليس کي هر سهڪار فراهم ڪيو ويندو، ڊي آءِ جي آپريشن لاءِ گهربل جديد هٿيارن ۽ ٻئي سامان جي لسٽ فراهم ڪري ته جيئن اُهي جلد مهيا ڪري سگهجن. هن چيو ته جيڪي هٿيار سنڌ وٽ موجود نه هوندا اُنهن بابت پاڪ آرمي ۽ وفاقي گهرو وزير سان به ڳالهايو ويندو. وزيراعليٰ هدايت ڪئي ته ڏوهارين خلاف آپريشن هر حال ۾ ڪامياب ٿيڻ گهرجي، ان ڏس ۾ ڪابه رعايت نه ڪئي وڃي. هن هدايت ڪئي ته ڌاڙيلن جي وائيٽ ڪالر مددگارن ۽ ساٿين جون به لسٽون تيار ڪري اُنهن خلاف ڪارروائي ڪئي وڃي، جڏهن ته رينجرز سان گڏجي آپريشن واري علائقي جي سمورن گهٽن ۽ گهاڙن تي ناڪابندي ڪئي وڃي. هن هدايت ڪئي ته عوام کي امن جي فضا فراهم ڪرڻ لاءِ ڪابه ڪسر نه ڇڏي وڃي ۽ عوام کي مڪمل رليف فراهم ڪرڻ لاءِ ڏوهارين جو جيئڻ جنجال بڻايو وڃي، ان ڏس ۾ ڪابه سوديبازي نه ڪئي ويندي، ڏوهاري ڀل ڪيڏو به پاور فُل يا اثر رسوخ رکندڙ ڇونه هجي اُن خلاف ڪارروائي ڪئي وڃي. وزيراعليٰ سنڌ نيشنل هاءِ وي سميت ٻين رستن ۽ روڊن تي خوف واري فضا ختم ڪرڻ ۽ امن قائم ڪرڻ لاءِ پوليس کي پيٽرولنگ وڌائڻ ۽ چوڪسي سخت ڪرڻ جي هدايت پڻ ڪئي. وزيراعليٰ هدايت ڪئي ته ڊويزن اندر ٻيلي کاتي سميت ٻين سرڪاري زمينن تان قبضا فوري طور ختم ڪرايا وڃن ۽ حد دخليون ختم ڪرائي روڊ رستا ڪشادا ڪيا وڃن ته جيئن عوام کي ڀرپور رليف ملي سگهي. ان موقعي تي ڊي آءِ جي سکر ڪامران فضل سکر، خيرپور ۽ گهوٽڪي ضلعن ۾ امن امان جي مجموعي صورتحال بابت بريفنگ ڏني ته وستي جيوڻ شاهه ۾ 40 ڏينهن کان آپريشن هلندڙ آهي، آپريشن جو علائقو 11 اسڪوائر ڪلوميٽرن تي ٻڌل آهي، جتي 7 چيڪ پوسٽون قائم ڪيون آهن، آپريشن ۾ پنجاب پوليس کان به مدد ورتي وئي آهي. اجلاس کان پوءِ ڪمشنر آفيس سکر۾ ميڊيا جي نمائندن سان ڳالهائيندي وزيراعليٰ سنڌ سيد قائم علي شاهه چيو ته ڪراچيءَ ۾ اسماعيلي برادريءَ تي حملي سڄي قوم کي ڏُک پهچايو آهي، ان حملي ۾ “را” جي ملوث هئڻ جا ثبوت مليا آهن، جن تي جاچ هلي رهي آهي ۽ جلد اصل ڏوهارين تائين پهچي کين پڪڙي انصاف جي ڪٽهڙي ۾ آندو ويندو. هن چيو ته سنڌ ۾ مجموعي طور امن امان جي صورتحال بهتر آهي، تنهن هوندي به ڏوهارين خلاف ڪراچي سميت سڄي سنڌ ۾ ڀرپور ڪارروائي ڪئي پئي وڃي. هن هڪ سوال جي جواب ۾ چيو ته هو جمهوريت پسند آهن ۽ ڪنهن جي به خلاف ڪوڙو ڪيس داخل نه ٿا ڪرائي سگهون، تنقيد براءِ اصلاح هئڻ گهرجي، تنقيد ڪندڙن کي پنهنجي گريبان ۾ جهاتي پائڻ گهرجي. وڏي وزير سيد قائم علي شاه وڌيڪ چيو ته سنڌ کان وڌيڪ ته ٻين صوبن ۾ ڏوهه ٿي رهيا آهن جتان جان حڪمران اسان تي تنقيد ڪرڻ بدران پنهنجي ڪارڪردگي تي ڌيان ڏين.

 

 

چوڌري نثار پاڪستان ۾ داعش جي وجود کي رد ڪري ڇڏيو

اسلام آباد (اين اين آءِ) وفاقي گهرو وزير چوڌري نثار علي خان پاڪستان ۾ داعش جي وجود کي رد ڪندي چيو آهي ته هر حال ۾ امن امان بحال ڪيو ويندو، دهشتگردن کي شڪست ڏيڻ لاءِ اتحاد قائم ڪرڻ سمورين سياسي پارٽين جي ذميواري آهي، وزيراعظم سان ڪنهن قسم جا ڪي به اختلاف نه آهن، بيماري سبب ڪراچي نه وڃي سگهيس، هن چيو ته قانون لاڳو ڪندڙ ادارن شهرين کي خوف ۽ حراس ۾ مبتلا ڪندڙ دهشتگردن جو گهيرو تنگ ڪري ڇڏيو آهي، هي سڄي قوم ۽ سياسي جماعتن جي ذميواري آهي ته اهي پنهنجن صفن ۾ اتحاد قائم ڪن ۽ دهشتگردن کي شڪست ڏين، هن چيو ته دهشتگردن خلاف آپريشن کانپوءِ امن امان بهتر ٿيو آهي، هڪ سوال جي جواب ۾ هن چيو ته سندس ۽ وزيراعظم نواز شريف وچ ۾ ڪي به اختلاف نه آهن، صفوران ڳوٺ سانحي تي ڪراچي ۾ وزيراعظم جي آمد ۽ گهرو وزير جي غير موجودگي تي ڪيل سوال جي جواب ۾ هن چيو ته هو بيماري سبب ڪراچي نه وڃي سگهيو هو.

 

تخريبڪاري جا واقعا دهشتگردن ۽ ”را“ جي سمجهوتي جو نتيجوآهي: خواجه آصف

سيالڪوٽ (مانيٽرنگ ڊيسڪ) بچاءُ واري وفاقي وزير خواجه آصف چيو آهي ته ملڪ ۾ دهشتگردي خلاف جنگ جاري اهي پر ڀارت پاڪستان ۾ تخريبڪارن جي حمايت ڪري رهيو آهي. سيالڪوٽ ۾ تقريب کي خطاب ڪندي خواجه آصف جو چوڻ هو ته پاڪستان جو دشمن هڪ آهي اُن جا چهرا 2 آهن جنهن ۾ هڪ ملڪ جي اندر ۽ ٻيو سرحد پار آهي ۽ ٻنهي وچ ۾ وطن عزيز خلاف سمهجوتي جو نتيجو آهي. هن چيو ته فوج ملڪ اندر ۽ پرڏيهي دشمنن سان هڪ ئي وقت وڙهي رهي آهي جنهن ۾ هٿياربند فوج ضرور ڪامياب ٿيندي ۽ دهشتگردي خلاف جنگ کٽڻ کانسواءِ ٻيو ڪوبه آپشن موجود ناهي. وفاقي وزير چيو ته حڪومت سمورن ملڪي مسئلن جي حل لاءِ قدم کڻي رهي آهي، ايندڙ سال ۾ ملڪ مان لوڊيشنگ جي اوندهه ختم ڪئي ويندي. هن چيو ته 56 ارب روپين جي لاڳت سان سيالڪوٽ کان لاهور ايڪسپريس بڻايو ويندو جڏهن ته ترقياتي منصوبن تي 120 ملين روپيا خرچ ٿيندا.

 

وفاقي ناڻي وزير اسحاق ڊار 5 جون تي بجيٽ پيش ڪرڻ جي منظوري ڏئي ڇڏي

اسلام آباد (اين اين آءِ) وفاقي ناڻي وزير اسحاق ڊار 5 جون تي بجيٽ پيش ڪرڻ جي منظوري ڏئي ڇڏي آهي، آچر تي ناڻي وزارت جي بيان مطابق بجيٽ کان هڪ ڏينهن اڳ 4 جون تي اقتصادي سروي جاري ڪيو ويندو، بجيٽ جي منظوري آچر تي ناڻي وزير جي سربراهي ۾ هڪ اجلاس ۾ ڏني وئي، اجلاس ۾ مالياتي سال جو پروگرام ۽ بجيٽ جي حوالي سان مختلف معاملن جي منظوري ڏني وئي، اجلاس ۾ ختم ٿيندڙ مالياتي سال دوران رٿائن تي اڳڀرائي ۽ نئين مالي سال جي منصوبن تي به غور ڪيو ويو، وفاقي وزير کي ٻڌايو ويو ته بجيٽ جي حوالي سان جلد فنانس جي پارلياماني اسٽيڊنگ ڪميٽي کي به آگاهه ڪيو ويندو ۽ بعد ۾ منظوري لاءِ مسودو ڪابينا ۾ پيش ڪيو ويندو، ان موقعي تي اسحاق ڊار چيو ته بجيٽ جي تياري ۾ عوامي فائدي کي نظر ۾ رکيو ويندو.

 

پاڪ چين اقتصادي راهداري تي ڪجهه ماڻهو ڀارتي ٻولي ڳالهائي رهيا آهن: احسن اقبال

لاهور(بيورو) رٿابندي ۽ ترقي جي وفاقي وزير احسن اقبال جو چوڻ آهي ته ملڪ ۾ موجود ڪجهه ماڻهو پاڪ چين اقتصادي راهداري منصوبي تي ڀارت جي ٻولي ڳالهائي رهيا آهن. لاهور ۾ بجيٽ کان اڳ سيمينار سان خطاب کانپوءِ ميڊيا سان ڳالهائيندي احسن اقبال چيو ته پاڪ چين اقتصادي راهداري منصوبي سان پاڪستان اڀرندڙ معيشت جي قطار ۾ شامل هوندو ۽ ان ۾ سڀني صوبن کي شامل ڪيو ويندو. پاڪستان جا دشمن هروڀرو پاڪ چين اقتصادي راهداري تي گوڙ ڪري رهيا آهن۽ اها بدنصيبي آهي ته ملڪ ۾ موجود ڪجهه ماڻهو ڀارتي ٻولي ڳالهائي رهيا آهن، حقيقت ۾ ان جي روٽ ۾ ڪابه تبديلي ناهي ڪئي وئي، جيڪڏهن روٽ ۾ ڪا تبديلي ثابت ٿي وڃي ته هو سياست ڇڏي ڏيندو.

 

صولت مرزا ۽ عزير بلوچ رڳو مورا آهن اصل ۾ انهن جي پويان سياسي پارٽيون آهن: پرويز مشرف

ڪراچي(اسٽاف رپورٽر) اڳوڻي صدر جنرل پرويز مشرف جو چوڻ آهي ته صولت مرزا ۽ عزير بلوچ رڳو مورا آهن انهن جي پويان ته سياسي پارٽيون آهن جڏهن ته ڪراچي، بلوچستان ۽ خيبرپختونخواهه ۾ جيڪو ڪجهه ٿي رهيو آهي اُهو ڀارتي خفيه ايجنسي ”را“ جو به هٿ آهي. ڪارگل  واري ويڙهه هڪ عظيم فوجي فتح هئي، جنهن کي سياسي هار ۾ تبديل ڪيو ويو.آل پاڪستان مسلم ليگ جي يوٿ ڪنوينشن سان خطاب ڪندي پرويز مشرف جو چوڻ هو ته پاڪستان جي حالت اڄ اهڙي آهي جهڙي مون پنهنجي صدر هجڻ واري دور ۾ پنهنجي آخري خطاب ۾ چئي هئي، پر مون سوچيو به نه هو ته حالتون ايتري حد تائين خراب ٿي وينديون. هن جو چوڻ هو ته پاڪستان جي بدقسمتي آهي جو پاڪستان کي سچا، مخلص ۽ ايماندار سياتدان نه مليا آهن.هن وڌيڪ چيو ته ملڪ ۾ پاڻي، بجلي، گئس، تعليم نه هجڻ جي برابر آهن.ڪارگل واري ويڙهه تي ڳالهائيندي هن چيو ته ڪارگل ۾ اسان 5 اهم اسٽريٽجڪ هنڌن تي ڀارتي علائقن ۾ گهڻو اندر تائين داخل ٿي قبضو ڪري چڪا هئاسين جن مان رڳو هڪ علائقي ۾ اهي 50 سيڪڙو علائقا واپس وٺي سگهيا هئا باقي 4 جي انهن کي خبر به نه هئي.اڳوڻي صدر اسمائيلي برادري تي حملي خلاف سخت مذمت ڪئي.

 

لاهور ۾ گهر کي باهه، 6 ٻارڙا سڙي فوت، علائقي ۾ سوڳ

لاهور (م.ڊ) شاد باغ  جي علائقي مان گهر کي باهه لڳڻ سبب هڪ ئي خاندان جا 6 ٻارڙا سڙي فوت ٿي ويا. لاهور جي علائقي شاد باغ ۾ شير شاهه روڊ تي واقع هڪ گهر  جي پهرين منزل ۾ باهه لڳي وئي، جيڪا ڏسندي ئي ڏسندي مٿي منزلن کي پنهنجي لپيٽ ۾ آندو، باهه سبب 3 ٻار موقعي تي ئي فوت ٿي ويا. جڏهن ته 3 کي ٻارن کي انتهائي نازڪ حالت ۾ اسپتال آندو ويو، جتي هنن دم ڌڻي حوالي ڪيو. باهه ۾ سڙي ويل ٻارڙن جون عمرون 12 کان ڏيڍ سال جي وچ ۾ هيون، ٻارڙين جي والدين کي بيهوشي جا دورا پوندا رهيا، معصومن جي جنازي نماز ۾ به ماڻهن جي وڏي انگ شرڪت ڪئي، هر اک آلي نظر آئي،. پاڙي وارن جو چوڻ آهي ته ريسڪيو ٽيم واقعي واري هنڌ دير سان  آئي، تڏهن ايڏو وڏو نقصان ٿيو.

 

چيف جسٽس ذوالفقار مرزا طرفان حڪومتي رٽ کي چئلينج ڪرڻ جو فوري نوٽيس وٺي: شرجيل ميمڻ

ڪراچي (اسٽاف رپورٽر) سنڌ جي اطلاعات ۽ بلديات کاتي واري وزير شرجيل انعام ميمڻ چيف جسٽس سپريم ڪورٽ ۽ چيف جسٽس سنڌ هاءِ ڪورٽ کان مطالبو ڪيو آهي ته اهي ذوالفقار مرزا طرفان حڪومتي رٽ کي چئلينج ڪرڻ جو فوري نوٽيس وٺن.صوبي ۾ گوڊگورننس لاءِ وزيراعليٰ سنڌ ۽ سڀني وزيرن ڀرپور ڪوششون ڪري رهيا آهن ۽سٺن ۽ شهرت آفته آفيسرن کي کاتن ۾ مقرر ڪيو پيو وڃي.صفوران چوڪ سانحي ۾ پوليس، رينجرز۽ خفيه ادارن کي شاهديون ملي چڪيون آهن۽ جلد ئي ان سانحي ملوث عنصرن کي ڪيفر ڪردار تائين پهچايو ويندو.ڪراچي آپريشن کي ان وقت تائين جاري رکيو ويندو جيستائين هڪ به دهشتگرد موجود هوندو.دهشتگرد غيرملڪي تربيت آفته آهن ان لاءِ پوليس کي انهن سان وڙهڻ لاءِ جديد طريقي ۽ جديد هٿيارن سان گڏوگڏ فوجي ۽ عسڪري تربيت به ڏني پئي وڃي، جڏهن ته پوليس جي نفري ۾ به اضافو ڪيو پيو وڃي.وزيراعليٰ سنڌ يا ڪنهن به وزير داخله جو ڪم پاليسي ڏيڻ آهي ۽ وزيراعليٰ سنڌ سيد قائم علي شاهه هڪ بهتر ايڊمنسٽريشن هلائڻ جي صلاحيت رکي ٿو۽ هن اسانجي امن و امان جي بحالي جي  هڪ واضح پاليسي ڏني آهي.اهڙن خيالن جو اظهار هن آچر ڏينهن واٽر بورڊ جي مرڪزي آفيس ۾ ميڊيا سان ڳالهائيندي ڪيو.شرجيل انعام ميمڻ چيو ته ذوالفقار مرزا طرفان جهڙي طرح پوليس اسٽيشن ۾ کلي عام پاڻ سان گڏ هٿيارن سان  ماڻهن کي براه راست گوليون هڻڻ جي واضح هدايت ڏيندي چيو ۽ ميڊيا ڏيکاريو آهي، ان مان صاف ظاهر آهي ته هو حڪومتي رٽ کي چئلينج ڪري رهيو آهي.هن چيو ته سنڌ حڪومت ان حوالي سان سنڌ هاءِ ڪورٽ کان ان کي نوٽيس ڏيڻ جي استدعا ڪئي آهي.شرجيل ميمڻ چيو ته مان چيف جسٽس آف پاڪستان ۽ چيف جسٽس سنڌ هاءِ ڪورٽ کي به استدعا  ڪريا ن ٿو ته هو ذوالفقار مرزا طرفان حڪومتي رٽ کي چئلينج ڪرڻ جو فوري نوٽيس وٺن. شرجيل ميمڻ چيو ته ذوالفقار مرزا کي پرائيويٽ سيڪيورٽي گارڊز رکڻ جي اجازت اسانجي معزز عدالت ڏني آهي ۽ زوالفقار مرزا پاڻ سان گڏ 50 کان 60 هٿيارن سان  ماڻهو رکي ٿو ۽ انهن کي پوليس تي براه ارست  گوليون هڻڻ جو حڪم ڏيندي سڀني ڏٺو آهي. هڪ سوال جي جواب ۾ شرجيل انعام ميمڻ چيو ته صفوران چورنگي واروسانحو هڪ قومي سانحو آهي جنهن جو سوڳ ملڪ جي هڪ هڪ گهر ۾ منايو پيو وڃي.هن چيو ته سانحي جي حوالي سان اسانجي امن وامان جي ادارن کي ڪجهه شاهديون مليون آهن ۽ اهي انهن جي روشني ۾اهي دهشتگردن جي چوڌاري پنهنجو گهيرو تنگ ڪري رهيا آهن ۽ هن چيو تن مونکي اميد آهي ته اسانجي ادارن جهڙي طرح ماضي ۾ ڪيترن ئي وڏن وڏن ڪيسن کي حل ڪيو اهڙي طرح هن سانحي جي ڪيس کي به جلد حل ڪندا ۽ ان ۾ ملوث دهشتگردن کي عبرتناڪ سزا ڏني ويندي.هڪ سوال جي جواب ۾ هن چيو ته بدقسمتي سان ماضي ۾ اسانجي ادارن ۾ جيڪي آفيسر مقرر ڪيا ويندا هئا انهن ڪري مشڪلات کي منهن ڏيڻو پوي پيو پر هاڻي پوليس، بلديات کاتي سميت سڀني کاتن ۾ سٺا شهريت جا مالڪ ۽ اهل آفيسرن جي مقرري ڪئي پئي وڃي ۽ هن وقت اسانجي پوليس ۾ 90 سيڪڙو اهڙا آفيسر سنڌ ۾ لڳايا ويا آهن جيڪي سي ايس ايس جو امتحان پاس ڪري آيا آهن انهن کي سڄي صوبي ۾ مقرر ڪيو ويو آهي. پوليس سان گڏوگڏ ايس ايس يو، ريپڊ ريسپانس فورس ۽ ڪائونٽر ٽيررزم فورس جو قيام ڪيو ويو آهي.ان کان علاوه اسانجي پوليس جي جوانن کي فوج جي مدد سان ايس ايس جي، جي به ٽريننگ ڏني پئي وڃي ته جيئن اهي دهشتگردن کان جيڪي غير ملڪي تربيت آفته ۽ جديد هٿيارن سان آهن، انهن جو ڀرپور مقابلو ڪري سگهن ۽ ان سلسلي ۾ صوبائي حڪومت ۽ خاص ڪري وزير اعليٰ سنڌ سيد قائم علي شاهه جيڪو هڪ سٺو ايڊمنسٽريٽر آهي، ان پاران اهڙن ادارن کي مڪمل طور تي فري هينڊ جي پاليسي ڏني ويئي آهي.هن واضح ڪيو ته ڪراچي ۾ هلندڙ آپريشن جا مثبت نتيجا سامهون اچي رهيا آهن ۽ هي آپريشن دهشتگردن ختم ڪرڻ تائين جاري رهندو.

 

محمد مرسي جي موت واري سزا جو فيصلو مصر جي جمهوريت ۽ جي عوام جي لاءِ صحيح نه آهي: عمران خان

اسلام آباد(بيورو) پاڪستان تحريڪ انصاف (پي ٽي آءِ) جي چيئرمين عمران خان چيو آهي ته اڳوڻي صدر محمد مرسي جي سزائي موت وارو فيصلو مصر جي جمهوريت ۽ مصري عوام جي مستقبل لاءِ صحيح   فيصلو ناهي. سماجي ٽوئيٽر تي عمران خان مصر جي اڳوڻي صدر مرسي جي سزائي موت واري سزا تي مذمت ڪندي چيو ته فيصلو مصر جي جمهوريت ۽ مصر جي عوام جي لاءِ صحيح نه آهي. عمران خان وڌيڪ چيو ته  پاڪستان  جي جمهوريت ۽ قوم اڄ تائين ڀٽو جي ڦاهي جا نتيجا ڀوڳي رهيو آهي ۽ صدر مرسي جي سزائي موت وارو فيصلو به مصري عوام لاءِ هڪ برُو شگن آهي.

 

ذوالفقار مرزا جي 47 ساٿين جي ضمانت گرفتاري کان اڳ منظور

ڪراچي(اسٽاف رپورٽر) دهشتگردي جي انت واري عدالت جي جج بشير احمد کوسو بدين ۾ داخل 3 ڪيسن ۾ اڳوڻي گهرو وزير ذوالفقار مرزا جي 47 ساٿين جي في ڪيس هڪ لک روپين تي گرفتاري کان اڳ ضمانت19مئي تائين منظور ڪري ڇڏي آهي.عدالت نوٽيس جاري ڪندي اسپيشل پبلڪ پراسيڪيوٽر ۽ ڪيس جي جاچ ڪندڙ آفيسر ن کي پڻ گهرايو آهي، سمورن ڏوهارين کي جاچ ڪندڙ آفيسرن جي آمهون سامهون پيش ٿيڻ جي هدايت به ڪئي آهي.ڪالهه ڊاڪٽر ذوالفقار مرزا پنهنجي حامين جي گرفتاري کان اڳ واري ضمانت لاءِ ساٿين حاجي خان، مهردين، نديم مغل، مرتضيٰ ميمڻ عيسيٰ ملاح سوڌو 47 ڏوهاري وڪيل اشرف ۽ ٻين وڪيلن سان گڏ عدالت ۾ موجود هئا.بڌڻي دوران ڏوهارين جي وڪيل اشرف سمون ڏوهارين پاران ضمانت واري درخواست داخل ڪندي پنهنجا دليل ڏيندي چيو ته ايف آءِ آر سياسي بنيادن تي داخل ڪرائي وئي آهي، سنڌ جي وزيراعليٰ آصف علي زرداري جي هدايت تي ڊاڪٽر ذوالفقار مرزا ۽ سندس ساٿين خلاف ڪارروائي ۽ انهن خلاف ڪيس داخل ڪرايا آهن، جيڪي سمورا سياسي نوعيت جا آهن. ٻڌڻي کانپوءِ  ذوالفقار مرزا ميڊيا سان ڳالهائيندي چيو ته مان اها ويڙهه پنهنجي گهر وارن يا ساٿين لاءِ نه پيو وڙهان ،مان ملڪ بچائڻ لاءِ اها ويڙهه وڙهي رهيو آهيان.