تازيون خبرون

Daily Archives: May 13, 2015

ڪرپشن جي ڪيسن جي انڪوائري جلد مڪمل ڪري ملوث ماڻهن جي خلاف ڪيس داخل ڪيا وڃن: منظور وساڻ

ڪراچي  (اسٽاف رپورٽر) سنڌ جي صوبائي وزير منظور حسين وساڻ کي اڱاري تي سندس دفتر سنڌ سيڪريٽريٽ ڪراچي ۾ چيئرمين انٽي ڪرپشن انڪوائريز اينڊ اسٽبيلشمينٽ سنڌ سيد ذاڪر حسين پنهنجي ماتحت آفيسرن سان گڏ انڪوائريز اينڊ اينٽي ڪرپشن اسٽيبلشمينٽ جي هن وقت تائين جي ڪارڪردگي بابت بريفنگ پيش ڪئي ان موقعي تي منظور حسين وساڻ چيئرمين انڪوائري اينڊ انٽي ڪرپشن سنڌ کي هدايت ڪئي ته ڪرپشن ۾ ملوث ملازمن جي خلاف انڪوائريزجلد مڪمل ڪئي وڃي ۽ غير قانوني ڪارروائين ۾ ملوث ماڻهن جي خلاف ڪيس داخل ڪري انهن جي خلاف ڪارروائي ڪئي وڃي هن هدايت ڪئي ته انڪوائري دوران ڪنهن قسم جو دٻاءُ قبول نه ڪيو وڃي ۽ نه ئي ڪنهن سان زيادتي ٿيڻ ڏني وڃي جڏهن ته ڪرپشن ۾ ملوث ماڻهن کي قانون مان سزا ڏياري وڃي ان موقعي تي سيد ذاڪر حسين چيو ته تمام انڪوائريز کي جلد کان جلد مڪمل ڪري ڪرپشن ڪندڙن خلاف قانوني ڪارروائي لاءِ آفيسرن کي ڪارروائي تيز ڪرڻ جي هدايت جاري ڪئي ويئي آهي.

 

ڏوڪري جي مشهور سماجي ڪارڪن ماما رمضان ساريو کي سماجي ڪم ڪرڻ تي بااثر ماڻهون ڌمڪيون ڏيڻ لڳا

ڏوڪري(نمائندو)ڏوڪري جي مشهور سماجي ڪارڪن ماما رمضان ساريو کي سماجي ڪم ڪرڻ تي بااثر ماڻهن جون ڌمڪيون، ماما رمضان ساريو طرفان ڊي آءِ جي ۽ ايس ايس پي لاڙڪاڻو کي نوٽيس وٺڻ جو مطالبو. تفصيل مطابق ڏوڪري جي مشهور سماجي ڪارڪن ۽ انسان دوست شخصيت ماما رمضان ساريو کي ڳوٺ ٻلهڙيجي ۾ عيد گاهه ٺهرائڻ تان ابڙا برادري جي بااثر ماڻهن طرفان موتمار ڌمڪيون ڏنيون. ان موقعي تي نيشنل پريس ڪلب ۾ صحافين اڳيان دانهيندي مشهور سماجي ڪارڪن ماما رمضان ساريو چيو ته ڳوٺ ٻلهڙيجي ۾ عيد گاهه جي سخت ضرورت هئي، جنهن لاءِ چندو ڪري عيدگاهه ٺهرائڻ واري معاملي تان ابڙا برادري جي اعجاز علي ابڙو، عبدالغفار، محمد آچر ۽ علي گل ابڙوساڻس بداخلاقي ڪندي کيس موتمار ڌمڪيون ڏنيون آهن. هن چيو ته سماجي ڪارڪن جي زندگي جو مقصد عوام جي خدمت آهي، کيس عوام جي خدمت ڪرڻ کان ڪير به روڪي نه ٿو سگهي. هن ڊي آءِ جي لاڙڪاڻو ۽ ايس ايس پي لاڙڪاڻو کان مطالبو ڪيو ته کيس موتمار ڌمڪيون ڏيندڙن خلاف ڪارروائي ڪري کيس انصاف مهيا ڪيو وڃي.

 

ٽنڊومحمد خان ۾ نائين ڪلاس جي شاگردياڻي کي اغوا ڪرڻ جي ڪوشش، رڙين تي پاڙيوارن بچائي ورتو

ٽنڊو محمد خان(رپورٽر) :  نائين ڪلاس جي شاگردياڻي کي زبردستي اغوا ڪرڻ وارو مامرو ، 14 ورهين جي شاگردياڻي ڪرن ڪنڀار عدالت ۾ کيس زبردستي اغوا ڪرڻ جي ڪوشش ڪندڙن امين ٿهيم ، الهورايو ٿهيم ۽ اڪبر ڪنڀار تي زبردستي اغوا ڪرڻ ۽ ڌمڪائڻ بابت بيان رڪارڊ ڪرايو ، جنهن بعد ميڊيا سان متاثر شاگردياڻي ڪرن ڪنڀار  ڳالهائيندي چيو ته هاڻ منهنجي مائٽن کي مختلف فونن تان جان کان مارڻ جون ڌمڪيون ملن پيون ، هن چيو ته مون کي پنهنجي تعليم پوري ڪرڻ ۾ وڏو خوف ٿي رهيو آهي خدارا مون کي تحفظ ڏياري منهنجي تعليم بچائي وڃي ، هن چيو ته اڪبر ڪنڀار ، الهورايو ٿهيم ڏوهي قسم جا ماڻهو آهن جن مان مون کي جان جو خطرو آهي ۽ اهي انتهائي بااثر آهن جن کي وڏي پٺڀرائي حاصل آهي جنهن ڪري پوليس به ٻيا جوابدار گرفتار نٿي ڪري ، هن چيو ته آئون چيف جسٽس آف پاڪستان ، انساني حقن جون تنظيمون ۽ اعلى اختيارين کي اپيل ٿي ڪريا ته منهنجي اغوا ۾ ملوث ماڻهن کي گرفتار ڪيو وڃي ته جيئن مون سان انصاف ٿئي . ان موقعي تي چوڪري جي چاچي عبدالغفور ڪنڀار چيو ته وقت به وقتن نياڻي کي مارڻ جون ڌمڪيون ملن پيون اسان سان انصاف ٿيڻ گهرجي . ياد رهي ته هڪ ڏينهن اڳ پنهنجي پڦي جي گهر ويندي 9 ڪلاس جي شاگردياڻي کي جوابدارن گهٽي مان اغوا ڪرڻ جي ڪوشش ڪئي ته رڙين تي پاڙي وارن کيس بچائي ورتو .

 

فلم “ رئيس ” جي شوٽنگ مائرا خان جون ننڍون ڦٽائي ڇڏيون

ممبئي(شوبز نيوز): پاڪستاني اداڪارا مائره خان اڄڪلهه بالي ووڊ جي نئين ايندڙ  فلم “رئيس”  جي شوٽنگ ۾ مصروف آهي، ان پنهنجي هڪ بيان ۾ چيو ته فلم جي شوٽنگ ۾ ايتري قدر مصروف آهيان، جو ننڍ ڪرڻ جو به ٽائيم ناهي، فلم ۾ مائره سان شاهه رخ خان به ڪم ڪري رهيو آهي، جنهن مائره جي ڪم جي تعريف ڪئي، هن فلم کي عيد جي موقعي تي رليز ڪرڻ جا امڪان آهن.

 

سونم ڪپور پاڪستان مان آيل تحفي تي ٻهڪي پئي

ممبئي (شوبز نيوز) ڀارت جي سينيئر اداڪار  انيل ڪپور  جي اداڪارا ڌيءُ سونم ڪپور جيڪا اسٽائلش گرل طور به سڃاتي ويندي آهي، ڇو ته کيس نوان نوان اسٽائل تمام گھڻا وڻدا آهن، پاڪستاني تحفي تي ٻهڪي پئي، جنهن خوشيءَ جو اظهار هن سماجي رابطن جي ويب سائيٽ ٽوئيٽر تي ڪيو، ڳالهه اصل ۾ هينئن هئي ته اداڪارا سونم ڪپور جي هڪ سهيلي پاڪستان آيل هئي، جنهن اداڪارا لاءِ پاڪستاني جوتن جو جوڙو خريد ڪري ڀارت وڃي اداڪارا کي تحفي ۾ ڏنو، جنهن تي فيشن ايبل اداڪارا کي تمام گھڻي خوشي ٿي، جنهن جو اظهار هن ٽوئٽر ذريعي ڪيو، هن پنهنجي سنگتاڻيءَ جا ٿورا مڃيندي جوتن جي ان جوڙي کي پسند ڪيو

 

فلم ”ويلڪم ٽو ڪراچي“ هاڻي 28 مئي تي سئنيما گھرن ۾ رليز ڪئي ويندي

ممبئي (شوبز نيوز) ڀارتي اداڪار ارشد وارثي ۽  جيڪي ڀاگناني جي نئين ايندڙ فلم ”ويلڪم ٽو ڪراچي“ هاڻي 28 مئي تي سئنيما گھرن ۾ رليز ڪئي ويندي، جڏهن ته فلم ”ويلڪم ٽو ڪراچي“ کي 21 مئي تي رليز ٿيڻو هو. فلم تي سياسي تنقيد کان پوءِ رليز ملتوي ڪئي وئي، جڏهن ته ان ئي ڏينهن تي آنند ايل راءِ جي ”تنو ويڊز منو ريٽرنس“ پڻ رليز ٿيڻي آهي، جيڪي ڀاڳناني ٽوئيٽ ڪيو ته فلم جي رليز جي نئين تاريخ رکي وئي آهي،  هاڻي توهان 28 مئي تي فلم ڏسي سگھندا. اشيش آر موهن پاران ڊائريڪٽر ڪيل فلم جي ڪاسٽ ۾ آمريڪي ڊانس اسٽار لورين گوٽليب، ٻه پاڪستاني اداڪار ايوب کوسو ۽ عدنان شاهه به اداڪاريءَ جا جوهر ڏيکاريندا. فلم ”ويلڪم ٽو ڪراچي“ کي جيڪي ڀاڳنانيءَ جي پيءُ واشو ڀاگنانيءَ پروڊيوز ڪيو آهي.

 

سلطان راهي کرو ۽ سچو انسان هو: مصطفيٰ قريشي

لاهور(ڪلچر نيوز):  اداڪار مصطفيٰ قريشي چيو آهي ته پنجابي وڏي مٺي زبان آهي. هن چيو ته منهنجي مادري زبان سنڌي آهي. پر فلمن ۾ ڪم ڪرڻ لاءِ مون کي پنجابي ٻولي سکڻي پئي. هن وڌيڪ چيو ته پنجابي فلمن ۾ پنجابي ٻولي جو جاندار استعمال ڪيو ويندو آهي. سلطان راهي پنجابي ٻولي کي وڏي زور ۽ وڏي آواز سان ڳالهائيندو هو ۽ هو پنجاب جي ثقافت جو حصو هو. مصطفيٰ قريشي چيو ته سلطان راهي جي وفات کانپوءِ اسان جي جوڙي ٽٽي وئي. مرحوم حقيقي زندگي ۾ وڏو کرو ۽ بهترين انساني هو ، مرحوم جي ڪمي ڪير پوري نه ٿو ڪري سگهي.

 

سعيد اجمل جي انٽرنيشنل ڪيريئر تي “فل اسٽاپ” لڳي ويو

ڪراچي(اسپورٽس نيوز) سعيد اجمل جي انٽرنيشنل ڪيريئر  تي “فل اسٽاپ” لڳي ويو. هو زمبابوي جي خلاف هوم سيريز ۾ حصو نه وٺي سگهندو. عملي هن کي ڪائونٽي ڪرڪيٽ کيڏي فارم بحال ڪرڻ جو مشورو ڏيڻ جو فيصلو ڪيو آهي. بولنگ ايڪشن صحيح ٿيڻ کانپوءِ سعيد اجمل کي بنگلاديش لاءِ اسڪواڊ ۾ جاءِ ڏني وئي هئي پر ان ۾ ماضي جهيڙو دم نظر نه آيو  ۽ هو 11 هين رانديگر کان به آئوٽ ٿي ويو. زمبابوي سان ٿيندڙ مئچن ٽي ٽوئنٽي ۽ ون ڊي ميچن ۾ سعيد اجمل کي شامل نه ڪيو ويندو. سعيد اجمل کي مشورو ڏنو ويندو ته اهو انگلش ڪائونٽي ڪرڪيٽ کيڏي پنهنجي فام بحال ڪرڻ جي ڪوشش ڪري. اتي ڊگهي بالنگ اسپيل انهي کي بولنگ ورائٽيز ٺاهڻ ۾ مدد ڏئي سگهي ٿو. ياد رهي ته اسپنر جو ووسٽر شائر سان معاهدو به آهي. گذريل سيزن ۾ هن 9 ميچن ۾ 93 وڪيٽون حاصل ڪيون هيون. ذريعن جو چوڻ آهي ته سعيد انور 37 سال جو ٿي ويو آهي. هاڻي هن وٽ گهٽ وقت رهجي ويو آهي. چيف سليڪٽر هارون رشيد سومر جي ڏينهن سريلنڪا کان وطن واپس ايندو، هو سريلنڪا اي ٽي جو جائزو وٺڻ لاءِ ويو هو. سابق ٽيسٽ بئٽسمين ۽ ٻين سليڪٽرن سان گڏ اڱاري تي فيصل آباد وڃي ويندو. جتي ٽي ٽوئنٽي ايونٽ ۾ رانديگرن جي فارم ۽ فٽنيس معلوم ڪندو.

 

انٽرنيشنل ڪرڪيٽ ڪائونسل سال جي نئين ٽيسٽ رينڪنگ جاري ڪري ڇڏي

دبئي (اسپورٽس نيوز) انٽرنيشنل ڪرڪيٽ ڪائونسل سال جي نئين ٽيسٽ رينڪنگ جاري ڪري ڇڏي آهي، جنهن موجب پاڪستان ٽيم 3 درجا هيٺ لهڻ کان پوءِ ٽين کان ڇهين پوزيشن تي اچي وئي آهي. نئين رينڪنگ موجب ڏکڻ آفريڪا 21 ميچن ۾ 130 ريٽنگ سان سڀ کان اڳتي آهي، جڏهن ته آسٽريليا 23 ميچن ۾ 108 ريٽنگ سان ٻئي نمبر تي آهي ۽ پاڪستان ٽيم بنگلاديش کان ٽيسٽ سيريز کٽڻ باوجود 3 درجا هيٺ ڪري ٽين کان ڇهين پوزيشن جي تي اچي وئي آهي، گرين ڪيپس ٽين پوزيشن تي 103 ريٽنگ حاصل هئي، جيڪا گھٽ ٿي 97 ٿي وئي آهي. فهرست ۾ پاڪستان جي جڳهه سنڀاليندڙ نيوزيلينڊ 26 ميچن ۾ 99 ريٽنگ سان ٽئين، ڀارت 22 ميچن ۾ 99 ريٽنگ سان چوٿين، انگلينڊ 27 ميچن ۾ 97 ريٽنگ سان پنجين نمبر تي آهي، سريلنڪا ستين، ويسٽ انڊيز اٺين، بنگلاديش نائين ۽ زمبابوي ڏهين نمبر تي آهن.

 

سريلنڪن بورڊ پاڪستاني دوري جو شيڊيول جاري ڪري ڇڏيو

ڪولمبو (اسپورٽس نيوز) سريلنڪن ڪرڪيٽ بورڊ پاڪستان ٽيم پاران سريلنڪن دوري جي تصديق ڪندي شيڊيول جاري ڪري ڇڏيو آهي، پاڪستان ٽيم سريلنڪن دوري ۾ ٽي ٽيسٽ، 5 ون ڊي ۽ ٻه ٽي ٽوئنٽي ميچون کيڏندي. پاڪستان ٽيم دوري جي لاءِ 8 جون تي سريلنڪا پهچندي، جتي هوءَ 11 جون کان 3 ڏينهن واري پريڪٽس ميچ ذريعي پنهنجي دوري جي شروعات ڪندي. ٻنهي ٽيمن وچ ۾ پهريون ٽيسٽ گال ۾ 17 جون کان شروع ٿيندو، ٻيون ٽيسٽ 25 جون کان ڪولمبو جڏهن ته پالي ڪيلي ۾ ٿيندر ٽيون ۽ آخري ٽيسٽ ميچ ۾ ٻئي ٽيمون 3 جولاءِ تي آمهون سامهون ٿينديون. پنجن ون ڊي ميچن جي سريز جو پهريون مقابلو 11 جولاءِ تي دمبولا ۾ ٿيندو، سيريز جو ٻيون ميچ 15 جولاءِ تي پالي ڪيلي، ٽيون ۽ چوٿون ميچ ترتيبوار 19 ۽ 22 جولاءِ تي ڪولمبو، جڏهن ته سيريز جي آخري ميچ همنٽوٽا ۾ 26 جولاءِ تي کيڏي ويندي. پاڪستاني ٽيم 30 جولاءِ تي پهريون ٽي ٽوئنٽي ميچ ۾ سريلنڪا جي سامهون ٿيندي، جڏهن ته پهرين آگسٽ تي آخري ٽي 20 ميچ سان دوري جي پڄاڻي ٿيندي