تازيون خبرون

Daily Archives: May 12, 2015

وزير اعظم جو نلتر ۾ فوت ٿيل سفارڪارن کي ”ستاره پاڪستان“ ڏيڻ جو اعلان

اسلام آباد (بيورو) وزير اعظم نوازشريف چيو آهي ته نلتر سانحي سبب پاڪستان جا سچا دوست هنن کان وڇڙي ويا،سموري قوم ڏک ۾ ورتل آهي. اسلام آباد ۾ پرڏيهي آفيس ۾ تعزيتي ريفرنس کي خطاب ڪندي وزير اعظم نوازشريف چيو ته هنن جون دليون ڏکايل ڪٽنبن سان گڏ آهن. هن چيو ته نلتر سانحي سبب پاڪستان جا سچا دوست هنن کان وڇڙي ويا. هن چيو ته فوج جي بهترين پائليٽن آخري وقت تائين مسافرن کي بچائڻ جي ڪوشش ڪئي. نوازشريف چيو ته ڏکئي وقت ۾ سڀ متحد آهيون. هن چيو ته عوام هالينڊ ۽ انڊونيشيا جي سفيرن جي صحتيابي لاءِ دعاگو آهي. وزير اعظم متاثر ڪٽنبن کي خاطري ڪرائي ته فوتين جا مڙهه جلد سندن ڏيهه اماڻيا ويندا. تعزيتي ريفرنس کي خطاب ڪندي پرڏيهي سيڪريٽري اعزاز چوڌري چيو ته پولينڊ جي سفير ۽ سندس زال کي اسپتال مان گهر منتقل ڪيو ويو آهي. هن چيو ته پاڪستان پنهنجن حقيقي ۽ سچن دوستن کان محروم ٿي ويو آهي. ان موقعي تي سانحي نلتر تي هڪ منٽ جي خاموشي اختيار ڪئي وئي. وزير اعظم نوازشريف ناروي ۽ فلپائين جي سفير لاءِ ستاره پاڪستان ۽ انڊونيشيا ۽ ملائيشيا جي سفيرن جي گهروارين لاءِ ستاره امتياز جو اعلان ڪيو.

 

سنڌ اسيمبلي ميمبرن پاران پروموشن پاليسي تي عملدرآمد لاءِ وفاق سان رابطي جو مطالبو

ڪراچي (اسٽاف رپورٽر) سنڌ اسيمبلي ۾ وفاق جي 19“ 20 ۽ هين 21 هين گريڊ جي  ڪامورن ترقي لاءِ  پروموشن پاليسي تي  عملدر آمد لاءِ ٺهراءُ منظور ڪيو ويو، بجيٽ تجويزن تي بحث دوران ايم پي ايز  فنڊز جاري ۽ خرچ نه ٿيڻ جون شڪايتون ۽ روڊن جي خراب صورتحال تي ڳڻتي ظاهر ڪئي ، اپوزيشن ميمبرز  ترقياتي رٿائن لاءِ رکيل رقمن مان رڳو 35 سيڪڙو خرچ ٿيڻ تي افسوس جو اظهار ڪيو. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو،جنهن دوران پ پ ايم پي ناصر شاه 19، 20 ۽ 21 گريڊ جي ڪامورن کي ترقيون ڏيڻ لاءِ  پروموشن پاليسي تي عملدرآمد يقيني بڻائڻجو ٺهراءُ پيش ڪيو، جنهن جي اڪثريت سان منظوري ڏني وئي. ٺهراءُ ۾ تازو ٿيل ترقين کي پاليسي جي  ڀڃڪڙي قرار ڏيندي سنڌ سرڪار کان مطالبو ڪيو ويو  ته پروموشن پاليسي تي عملدرآمد لاءِ وفاقي حڪومت سان رابطو ڪيو وڃي. اجلاس دوران سنڌ حڪومت جي 9 مهينن جي خرچن ۽ بجيٽ تجويزن تي بحث دوران پ پ ايم پي اي الله بخش ٽالپر چيو ته 2010 جي ٻوڏ کانپوءِ تباهه ٿيل روڊ ٻيهر تعمير نه ٿيا آهن، خبر ناهي اربين رپين جي بجيٽ ڪٿي خرچ ڪئي وئي آهي. فنڪشنل ليگ ايم پي مهتاب اڪبر راشدي چيو ته سنڌ ۾ 7500اسڪول بنا عمارت جي هلي رهيا آهن،سنڌ جي عوام جي ڀلائي تي پئسا خرچ نه ڪرڻ ويڌن آهي. هن چيو ته 200ارب رپين جي ترقياتي بجيٽ مان رڳو 81 ارب رپيا جاري ڪيا ويا آهن،آبپاشي بجيٽ جو 95سيڪڙو رقم خرچ ڪئي وئي، اضافي بجيٽ به جاري ٿي آهي، ان جو جواب ڪنهن نه ڪنهن کي ڏيڻو آهي. پ پ ايم پي اي احمد علي پتافي چيو ته گهوٽڪي ضلعي لاءِ ترقياتي بجيٽ نه رکي وئي، سندس ضلعو تمام گهڻو ٽيڪس ڏئي ٿوان باوجود نظر انداز ڪيو پيو وڃي. ناڻي واري وزير مراد علي شاهه چيو ته سنڌ ۾ بجلي بحران تي ضابطي لاءِ 5هزار ميگا واٽ واري منصوبي جي ضرورت آهي، جنهن لاءِ 500ارب گهرجن پر پئسا نه آهن. فنڪشنل ليگ جي سعيد خان نظاماڻي چيو سانگهڙ ضلعي ۾ روڊن جي حالت خراب آهي ۽ سنڌ حڪومت مخالف ڌر کي مڪمل طور نظر انداز ڪري رهي آهي. سيد سردار احمد چيو ته وفاق کان 355ارب رپيا ملڻا هئا، جنهن مان رڳو283 ارب مليا۽ وفاقي حڪومت گهٽ رقم جاري ٿيڻ جو سبب به نه ٻڌايو آهي. پ پ ايم پي اي محمد نواز چانڊئي به روڊن جي خراب حالت جو ذڪر ڪندي چيو ته شڪايتن باوجود فنڊز جاري نٿا ڪيا وڃن. ايم ڪيو ايم جي سليم ٻنڌاڻي سکر لاءِ اسپيشل پئڪيج جو مطالبو ڪندي چيو ته غلام محمد مهر ميڊيڪل ڪاليج جي عمارت جو 12 سال اڳ پيڙهه پٿر رکيو ويو پر اها عمارت مڪمل نه ٿي سگهي آهي. سنڌ اسيمبلي ۾ مختلف معاملن تي بحث جاري هو ته اسپيڪر ڪارروائي ايندڙ خميس تائين ملتوي ڪري ڇڏي.

 

ڌانڌلين جي جاچ لاءِ جوڙيل جڊيشل ڪميشن جو اجلاس،ڌانڌلين ۾ ملوث ناهيان: محبوب انور

اسلام آباد (بيورو) پنجاب جـي اڳوڻي اليڪشن ڪمشنر محبوب انور، جوڊيشل ڪميشن آڏو هڪ ڀيرو ٻيهر ايم ڊي پرنٽنگ پريس سان فون تي ڳالهائڻ واري الزام کي رد ڪري ڇڏيو، سندس چوڻ آهي ته هــُو ڌانڌلين ۾ ملوث ناهي. چيف جسٽس ناصر الملڪ جِي صدارت هيٺ سپريم ڪورٽ ۾ جڊيشل ڪميشن جو اجلاس ٿيو. اجلاس ۾ پنجاب جـَي اڳوڻي اليڪشن ڪمشنر محبوب انور ۽ پرنٽنگ پريس جَي مئنيجنگ ڊائريڪٽر مظفر چانڊيو سميت 5 عملدار شريڪ ٿيا. ان موقعي تي حڪمران ليگ جَي وڪيل شاهد حامد محبوب انور کان پڇا ڪئي ته ڇا 10 مئي تي سمورن تڪن پولنگ جو سامان پهچايو ويو هو؟ محبوب انور جواب ڏنو ته پنجاب جَي راولپنڊي، قصور نارووال ۽ سرگوڌا سميت 8 تڪن تي سامان نه پهتو هو. شاهد حامد محبوب انور کان ٻيو سوال ڪيو ته ڇا ڊي سي اوز کين اهڙي شڪايت ڪئي هئي، جنهن تي اڳوڻي اليڪشن ڪمشنر جواب ڏنو ته ڊي سي اوز لکت ۾ ڪا به شڪايت نه ڪئي هئي. اليڪشن ڪمشنر جي وڪيل سلمان راجا محبوب انور کان آڏي پڇا ڪئي ته بيلٽ پيپر ڇاپڻ لاءِ اليڪشن ڪميشن کي 2 سئو مان 78 ماڻهو مليا، ڇا انهن ڪم ڪيو؟ محبوب انور جواب ڏيندي چيو ته کيس ان حوالي سان ڪا به خبر ناهي. سلمان راجا جي ٻئي سوال جو جواب ڏيندي محبوب انور چيو ته ايم ڊي پرنٽنگ پريس جي ڄاڻايل ڏينهن سندس ڪا به ڳالهه ٻولهه ناهي ٿي.

 

سپريم ڪورٽ اليڪشن ٽربيونل جي خواجه سعد رفيق واري تڪ اين اي 122 بابت ٻڌايل فيصلي کي معطل ڪري ڇڏيو

اسلام آباد (بيورو) سپريم ڪورٽ اليڪشن ٽربيونل جي خواجه سعد رفيق واري تڪ اين اي 122 بابت ٻڌايل فيصلي کي معطل ڪري ريلوي واري وفاقي وزير کي نئون جيئدان ڏئي ڇڏيو آهي، سپريم ڪورٽ جي فيصلي جي روشني ۾ نه رڳو خواجه سعد رفيق بحال ٿي ويو آهي پر پي پي 155 تان ڪامياب ميان نصير به بحال ٿي ويو آهي. اليڪشن ٽربيونل اين اي 125 تان خواجه سعد رفيق جي ڪاميابي کي ڪالعدم قرار ڏيندي اتي ٻيهر چونڊون ڪرائڻ جو حڪم ڏنو هو، جنهن خلاف خواجه سعد رفيق سپريم ڪورٽ ۾ درخواست داخل ڪرائي انهي فيصلي کي چيلينج ڪيو. خواجه سعد رفيق موقف اختيار ڪيو هو ته اليڪشن ٽربيونل جيڪو فيصلو ٻڌايو آهي ان ۾ اليڪشن ڪميشن جي عملي جي نا اهلي ثابت ٿي آهي، مٿس ڌانڌلي ثابت نه ڪئي وئي آهي، تنهنڪري سندس معطلي کي ختم ڪيو وڃي. سپريم ڪورٽ آف پاڪستان خواجه سعد رفيق جي درخواست تي اليڪشن ٽربيونل جي فيصلي کي معطل ڪري ڇڏيو آهي. اليڪشن ٽربيونل جو فيصلو معطل ٿيڻ سان خواجه سعد رفيق جي اسيمبلي واري ميمبر شپ بحال ٿي وئي آهي، انهي تڪ تي ٻيهر چونڊن وارو حڪم معطل ٿي ويو آهي، گڏوگڏ پ پ 155 تان ميان نصير جي جيڪا ڪاميابي معطل ٿي هئي اها به پاڻمرادو بحال ٿي وئي آهي. جسٽس انور سعيد جي سربراهي ۾ سپريم ڪورٽ جي 3 رڪني بينچ خواجه سعد رفيق جي درخواست جي ٻڌڻي ڪئي. جسٽس انور سعيد اليڪشن ٽربيونل جو فيصلو معطل ڪندي اليڪشن ڪميشن کان اين اي 125 واري تڪ جو سمورو رڪارڊ به طلب ڪري ورتو آهي.

 

ڀارتي فوج چين ۽ پاڪستان کي ڀارت جي سلامتي لاءِ خطرو قرار ڏئي ڇڏيو

سرينگر (م.ڊ) ڀارتي فوج جي نائب سربراهه ليفيننٽ جنرل فليپ ڪيمپوس چين کي ڀارت جي سلامتي لاءِ سڀ کان وڏو خطرو قرار ڏيندي چيو آهي ته ٻنهي ملڪن وچ ۾ هلندڙ صدي ڪهڙي به وقت جنگ ٿي سگهي ٿي. ليفيننٽ جنرل فليپ نيويڊا ۾ آرمي انسٽيٽيوٽ جي هڪ پروگرام ۾ ڳالهائيندي چيو  ڀارت ۽ چين تيزي سان اڀري رهيا آهن، جنهن جو اثر سرحد تي به ڏٺو وڃي ٿو. ٻنهي ملڪن وچ ۾ سرحدي تڪرار  هلندڙ آهي. جنهن سبب چين هندستان جي سلامتي جي لاءِ وڏو خطرو آهي. نائب سربراههچيو ته ڀارت کي ٻين ملڪن کان هٿيار خريد ڪرڻ بدران ميڪ ان انڊيا مهم تحت  پنهنجي ملڪ ۾ ئي هٿيارن جي پيداوار تي زور ڏيڻ کپي. ليفٽيننٽ جنرل فليپ ڪيمپوس پنهنجي تقرير ۾ پاڪستان کي به ڀارت جي سلامتي جو وڏو خطرو قرار ڏيندي چيو ته طالبان، داعش ۽ القاعده جهڙيون تنظيمون ڪنهن به وقت انڊيا جي دروازي تي نظر اچي سگهن ٿيون.

 

ايم ڪيو ايم گورنر سنڌ کي عهدي تان هٽائڻ جو مطالبو ڪري ڇڏيو

ڪراچي (اسٽاف رپورٽر) متحدا قومي موومينٽ گورنر سنڌ ڊاڪٽر عشرت العباد کي عهدي تان هٽائڻ جو مطالبو ڪري ڇڏيو آهي.  ڪراچي نائن زيرو تي  ڊاڪٽر فاروق ستار پريس ڪانفرنس ڪندي چيو ته پاڪستان پيپلز پارٽي جي  دور ۾  متحدا جي ڪارڪنن کي سري عام قتل ڪيو ويو ۽ گهر ساڙيا ويا اها سڄي حقيقت اسان گورنر سنڌ ڊاڪٽر عشرت العباد جي سامهون رکي. فاروق ستار چيو ته اسان گورنر جو علامتي عهدو سنڌ جي امن امان  لاءِ قبول ڪيو هو. عشرت العباد ڪارڪنن جي قتل ۾ ملوث ماڻهن کي گرفتار ڪرائڻ ۾ ناڪام رهيو. هن چيو ته امن امان لاءِ ٽارگيٽڊ آپريشن جو فيصلو ڪيو ويو اسان جي ته دعا آهي ته انهي آپريشن سان ٽارگيٽ ڪلنگ ختم ٿي ۽ ڪراچي ۾ امن امان قائم ٿي. ڪراچي آپريشن مان اهو محسوس ٿو ٿئي ته اهو آپريشن صرف ايم ڪيو ايم لاءِ ڪيو پيو وڃي، ڪيترائي ڪارڪن بي گناهه گرفتار ڪيا ويا آهن ڪيترائي بيگناهه ماريا ويا آهن اهو سڀ ڪجهه اسان گورنر جي سامهون رکيو پر گورنر ڪجهه به نه ڪيو، ڪيترائي دفعا اسان جي مطالبي باوجود اڄ تائين   مانيٽرنگ ڪميٽي قائم ناهي ٿي جنهن هدايت وزير اعظم نواز شريف پاڻ ڏني هئي. ڊاڪٽر فاروق ستار چيو ته توجه ڏيارڻ جي باوجود به ڊاڪٽر عشرت العباد اسان تي ٿيندڙ ظلم نه روڪرايو نه ئي ڪو نوٽيس ورتو،  اسان جي بي گناهه ڪارڪنن کي گرفتار ڪري ڏوهن ۾ ملوث ڄاڻايو پيو وڃي. جڏهن ته اسان جا  1200 ڪارڪنن جا قاتل اڄ تائين آزاد گهمي رهيا آهن

 

ذوالفقار مرزا بدين ٿاڻي حملي ڪيس جو جاچ آفيسر بدلائڻ جي استدعا ڪري ڇڏي

ڪراچي (اسٽاف رپورٽر) اڳوڻي گهرو وزير ڊاڪٽر ذوالفقار مرزا ڪراچي جي دهشتگردي ٽوڙ عدالت ۾ درخواست داخل ڪندي بدين ۾ ٿاڻي تي حملي واري ڪيس جي جاچ آفيسر شاهجهان بلوچ مٿان بي اعتمادي جو اظهار ڪندي جاچ آفيسر بدلائڻ جي استدعا ڪئي آهي. ڊاڪٽر ذوالفقار مرزا پاران داخل ڪيل درخواست ۾ موقف اختيار ڪيو ويو آهي ته جاچ آفيسر ايس پي شاهه جهان بلوچ ڌر بڻجي ويو آهي ۽ شفاف جاچ نه ٿو ڪري سگهي. درخواست ۾ عدالت کي استدعا ڪئي وئي آهي ڪيس جي جاچ لاءِ ايماندار آفيسر مقرر ڪيو وڃي. درخواست ۾ چيو ويو آهي ته ڊاڪٽر ذوالفقار مرزا کي بيان لاءِ جمشيد ڪوارٽر گهرائڻ وارو قدم بدنيتي تي ٻڌل هو، ڄاڻايل علائقي ۾ کيس ٽارگيٽ ڪلنگ جو نشانو بڻائڻ جو خدشو موجود هو. درخواست  استدعا ڪئي وئي آهي ته ڪيس جي جاچ آفيسر کي عدالت يا ذوالفقار مرزا گهر ۾ بيان وٺڻ جي هدايت ڪئي وڃي. عدالت ڌرين کي نوٽيس جاري ڪندي 13 اپريل تي جواب طلب ڪري ورتو آهي.

 

ذوالفقار مرزا سڀ ڪجهه ذاتي مفادن لاءِ پيو ڪري: شرجيل ميمڻ

ڪراچي (اسٽاف رپورٽر) صوبائي وزير شرجيل ميمڻ چيو آهي ته ذوالفقار مرزا سيڪيورٽي لاءِ وفاق سان رابطو ڪيو  آهي، وفاق کي صوبائي معاملن ۾ مداخلت نه ڪرڻ گهرجي، مرزا پاران حڪومتي رٽ کي چئلنج ڪرڻ تي عدالتون ڇو خاموش آهن. سنڌ اسيمبلي جي اجلاس بعد ميڊيا سان ڳالهائيندي هن چيو ته ذوالفقار مرزا ٿاڻي تي حملو ڪيو ۽ ڊي ايس پي کي ڌڪا ڏنا، هو جيڪو ڪجهه ڪري رهيو آهي، اها سياست نه پر بيهودگي آهي. هن ذوالفقار مرزا جي بيانن جي مذمت ڪندي چيو ته سندس پٺيان ڪير آهي، کيس خبر ناهي باقي حڪومتي رٽ کي چئلنج ڪرڻ تي عدالتن ذوالفقار مرزا خلاف ڪارروائي ڇو نه ڪئي. هڪ سوال جي جواب ۾ شرجيل ميمڻ چيو ته انور مجيد ڪامياب بزنس مين آهي، سندس ڪاميابين تي ذوالفقار مرزا کي ساڙ ٿيو آهي. هن چيو ته ذوالفقار مرزا آصف زرداري جي مهربانين سبب ان حد تائين پهتو، هاڻ عدالتي حڪمن تي جلد پنگريو شگر ملز جي نيلامي ٿي رهي آهي. شرجيل ميمڻ چيو ته ذوالفقار مرزا سڀ ڪجهه ذاتي مفادن لاءِ ڪري رهيو آهي.

 

باجوڙ ايجنسي ۾ بم ڌماڪو، قبائلي اڳواڻ سميت 6 ماڻهو مارجي ويا

باجوڙ ايجنسي (اي پي پي) باجوڙ ايجنسي ۾ رستي تي بم ڌماڪي جي نتيجي ۾ قبائلي اڳواڻ ملڪ محمد جهان سميت 6 ماڻهو مارجي ويا، پوليٽيڪل انتظاميا جي عهديدار اي پي پي کي ٻڌايو ته سومرڏينهن صبح جو ايجنسي تعلقي ماموند جي علائقي بارقر ۾ رستي تي رکي بم زوردار ڌماڪي سان ڦاٽي پيو، جنهن سبب قبائلي اڳواڻ ملڪ محمد جان جي گاڏي جيڪا اتان گذري رهي هئي، ان کي نقصان پهتو، واقعي ۾ ملڪ محمد جان سميت 6 ماڻهو مارجي ويا، سيڪيورٽي فورسز علائقي کي ڪڙو چاڙهي سرچ آپريشن شروع ڪري ڇڏيو.

 

چونڊ ڌانڌلين ۾ اليڪشن ڪميشن به ملوث آهي:عمران خان

اسلام آباد (بيورو) تحريڪ انصاف جي چيئرمين عمران خان چيو آهي ته چونڊ ڌانڌلين ۾ اليڪشن ڪميشن به ملوث آهي، جـُڊيشل ڪميشن جو فيصلو اچڻ کانپوءِ خبر پوندي ته اليڪشن ڪميشن ۽ نادرا ڪيتري حد تائين آزاد آهن، چونڊن ۾ آر اوز جي غلطين جو فائدو ن ليگ کي ٿيو آهي. اسلام آباد ۾ ميڊيا سان ڳالهائيندي عمران خان چيو ته اين اي 125 بابتاليڪشن ٽربيونل جي فيصلي تي نون ليگ قوم کي گمراهه نه ڪري. هن چيو ته اين اي 125 ۾ بي قاعدگيون نون ليگ کي ئي فائدو پهچائڻ لاءِ ڪيون ويون، هن تڪ ۾ هڪ شخص 6 – 6 ووٽ ڪاسٽ ڪيا. سندس چوڻ هو ته جيڪڏهن نون ليگ جي چوڻ تي ڌانڌلي ناهي ٿي ته ڪنهن جي چوڻ تي ٿي؟ عمران خان چيو ته آر اوز جي غفلت جو انهن کي ڪير پـُڇي ها ڇو ته اليڪشن ڪميشن به ڌانڌلين ۾ ملوث آهي، جڊيشل ڪميشن جي ڪارروائي تمام گهڻيو شيون ٻاهر اچي وينديون. پي ٽي آءِ سربراهه چيو ته اين اي 122 ۾ ووٽن جي تصديق لاءِ 26 لک رپيا ڏنا ويا، جڏهن ته هـُو 93 هزار ووٽ گهـُرائيندا ۽ سڃاڻپ ڪارڊ چيڪ ڪندا. عمران خان چيو ته 70 هزار تصديق ٿيل ووٽن مان 15 هزار ڪوڙا آهن، سپريم ڪورٽ خواجا سعد رفيق کي هڪ مهيني جو اسٽي ڏنو آهي.