تازيون خبرون

Daily Archives: May 11, 2015

وفاقي گهرو وزارت پاران هٿيارن جي لائسنس بابت جلد نئين پاليسي جوڙڻ جو اعلان

اسلام آباد (بيورو) وفاقي گهرو وزير نثار علي خان چيو آهي ته جي آءِ ٽي عمران فاروق قتل ڪيس ۾ جاچ مڪمل ڪري ورتي، گرفتار شخص بابت هڪ ٻن ڏينهن ۾ اهم اڳڀرائي ٿيندي، چونڊن ڌانڌلين جو فيصلو نادرا يا ٻئي ڪنهن اداري کي ناهي ڪرڻو، نادرا جي رپورٽ ۾ خامي آهي ته ڪڍي وڃي، ايگزيڪيوٽو ڪنٽرول لسٽ بابت ڪجهه نون قانون جو ڊرافٽ تيار ڪيو ويو آهي، مشاورت کانپوءِ 4 کان 6 هفتن ۾ رائج ڪيو ويندو، بلٽ پروف گاڏين بابت قانون به هڪ مهيني ۾ جوڙيو ويندو، هٿيارن جا سمورا لائسنس 31 ڊسمبر تائين توثيق ڪرايا وڃن نه 31 جنوري کان اهي رد سمجهيا ويندا، 25 سالن کان گهٽ عمر ماڻهن کي اصلحو لائسنس جاري نه ڪيو ويندو، ايگزڪيوٽو ڪنٽرول لسٽ ۾ نالو عدالت ۽ جاچ ادارن جي سفارشن تي وڌو ويندو، آچر تي پريس ڪانفرنس کي خطاب ڪندي هن چيو ته عمران فاروق قتل ڪيس جي حوالي سان گرفتار شخص بابت هڪ ٻن ڏينهن ۾ اهم اڳڀرائي ٿيندي، ڪيس ۾ جي آءِ ٽي جي جاچ مڪمل ٿي چڪي آهي، چونڊ ڌانڌلين جو فيصلو نادرا يا ڪنهن ٻئي اداري کي ناهي ڪرڻو، نادرا جي رپورٽ ۾ خامي آهي ته ڪڍي وڃي، ڪجهه ماڻهن وڏيون رڙيون ڪيون هنيون ۽ شروع ڪري رهيا هئا ته نادرا جي چيئرمين تي سرڪاري جو دٻاءُ آهي، جيڪڏهن 93 هزار ووٽن جي تصديق ناهي ٿي سگهي ته ان جو مطلب اهو ناهي ته اهي جعلي آهن پر تصديق نه ٿيندڙ آڱوٺن جا سڃاڻپ ڪارڊ صحيح آهن، وفاقي گهرو وزير سيڪيورٽي بابت چئين پاليسن جو اعلان ڪيو، جنهن ۾ ايگزڪيوٽو ڪنٽرول لسٽ، هٿيارن جا لائسنس، بلٽ پروف گاڏيون ۽ سيڪيورٽي ايجنسيون شامل آهن. هن چيو ته هن وقت 7500 سئو پاڪستانين جا نالا اي سي ايل ۾ آهن ۽ ڪيترائي نالا گذريل سالن کان اي سي ايل ۾ آهن، جڏهن ته موجوده حڪومت جي دور ۾ ڪو به نالو اي سي ايل ۾ ناهي وڌو ويو، هن چيو ته پاڪستان ۾ ٺهندڙ بلٽ پروف گاڏيون لائسنس تحت ٺهڻ گهرجن ۽ بلٽ پروف گاڏيون دهشتگردن ۽ ڏوهارين وٽ نه هجن، هن چيو ته سيڪيورٽي ايجنسين ۾ ڀرتي لاءِ ڪليئرنس هئڻ گهرجي ۽ انهن جي سال ۾ هڪ ڀيرو تربيت ٿيڻ گهرجي.

 

شهيد پوليس اهلڪارن جي قاتلن کي قانون جي ڪٽهڙي ۾ آڻينداسين: بلال اڪبر

ڪراچي(اسٽاف رپورٽر) ڊي جي رينجرز سنڌ ميجر جنرل بلال اڪبر چيو آهي ته پوليس ڪراچي جي امن جي قيام لاءِ قربانيون ڏنيون آهن، پوليس جي قربانين کي قدر جي نگاهه سان ڏسون ٿا، هن چيو ته رينجرز شهيد پوليس اهلڪارن جي قاتلن کي جلد قانون جي ڪٽهڙِي ۾ آڻيندي، ڊي ايس پي ذوالفقار زيدي جي قتل جي بعد جاري ڪيل بيان ۾ ڊي جي رينجرز سنڌ ميجر جنرل بلال اڪبر چيو آهي ته رينجرز سنڌ پوليس ڏنل ڪيترين ئي قربانين کي قدر جي نظر سان ڏسي ٿي، پوليس قانون لاڳو ڪندڙ هڪ اهم قومي ادارو آهي، پوليس ڪراچي جي امن جي قيام لاءِ بي پناهه قربانيون ڏنيو آهن جيڪي رائيگان ٿيڻ نه ڏينداسين،سنڌ رينجرز امن امان قائم ڪرڻ جي لاءَ پوليس سان گڏ ملي ڪري ڪم ڪري رهي آهي، شهيد اهلڪارن جي قاتلنکي کي جلد قانون جي ڪٽهڙي ۾ آڻي بيهارينداسين. ڊي جي رينجرز وڌيڪ چيو ته دهشتگردن جا ڏينهن ڳڻجي چڪا آهن، هاڻي ڪراچي سميت ملڪ ۾ ڪٿي به قتل و غارت جي اجازت نه ڏني ويندي,

 

اهل علم ۽ قلم ڌڻي اردو کي ٻيهر تدريس جو ذريعو بڻائڻ ۾ پنهنعجو ڪردار ادا ڪن: صدر

ڪراچي (اسٽاف رپورٽر) صدر مملڪت ممنون حسين قلم ڌڻين ۽ علم وارن کي اپيل ڪئي آهي ته اعليٰ تعليمي ۽ تحقيقي سطح تي اردو کي ٻيهر تدريس جو ذريعو بڻائڻ ۾ مدد ڪن، انجمن ترقي اردو پاڪستان تحت ”اردو باغ“ جي رٿا جو پيڙهه جو پٿر رکڻ جي تقريب کي خطاب ڪندي صدر مملڪت چيو ته اهي قومون جن جون پاڙون ثقافت ۽ ٻولي ۾ کتل آهن اهي سماجي، معاشي ۽ ٽيڪنالاجي جي ترقي جي ميدان ۾ بلندين کي ڇهندي نظر اينديون آهن، هن چيو ته اسان وٽ علم جو وڏو خزانو ۽روايتون عثمانيه يونيورسٽي حيدرآباد (ڀارت) جي انهن هزارين ڪتابن وسيلي پهتو، جن جو سٺي نموني ترجمو ڪيو ويو هو، جيڪي ڊگري سطح تي ڪورس بشمول ايم بي بي ايس جي ڊگري ۾ پڙهايا ويندا هئا، صدر مملڪت چيو ته انجمن ترقي اردو کي گهرجي ته نه رڳو اردو کي هڪ مشن طور هٿي وٺرائڻ پر ان کي هڪ چيلينج سمجهندي نوجوان نسل لاءِ قومي ٻولي ۾ تعليم حاصل ڪرڻ جو ذريعو بڻائڻ لاءِ به ڪوششون ڪن، هن چيو ته اردو کي سمورن هم وطنن ۾ گڏيل رابطي جو ذريعو بڻائڻ لاءِ فوري ڌيان جي ضرورت آهي، ان قسم جون ٻوليون علائقائي ٻولين کي هٿي وٺرائڻ وسيلي مضبوط ڪرڻ جي به ضرورت آهي. ان موقعي تي سنڌ جي گورنر انجمن ترقي اردو جي سالياني گرانٽ 10 لک مان وڌائي 50 لک رپيا ڪرڻ جو اعلان ڪيو، تقريب ۾ ڪراچي جي ڪمشنر شعيب احمد صديقي، انجم ترقي اردو جي اعزازي سيڪريٽري ڊاڪتر فاطمه حسن ۽ ٻين به خطاب ڪيو. ان موقعي تي مشتاق احمد يوسفي، زاهده حنا ۽ اردو ادب سان تعلق رکندڙ ٻين شخصيتن به شرڪت ڪئي.

 

وزيراعظم طرفان برطانيا جي ڪنزرويٽو پارٽي ۽ ان جي قيادت کي عام چونڊن ۾ واضح اڪثريت حاصل ڪرڻ تي مبارڪون

اسلام آباد (اي پي پي) وزيراعظم محمد نواز شريف برطانيا جي ڪنزرويٽو پارٽي ۽ ان جي قيادت کي ملڪ ۾ ٿيل عام چونڊن ۾ واضح اڪثريت سان ڪاميابي حاصل ڪرڻ تي مبارڪون ڏنيون آهن، وزيراعظم هائوس طرفان جاري ڪيل بيان مطابق وزيراعظم محمد نواز شريف برطانوي وزيراعظم ڊيوڊ ڪيمرون کي پنهنجي دل جي گهراين سان پيغام ۾ چيو آهي ته پاڪستانبرطانيا سان ٻه طرفن مضبوط ناتن سان لطف اندوز ٿي رهيو آهي، جنهن ۾ وقت سان گڏوگڏ وڌيڪ اضافو ٿي رهيو آهي، هن اعتماد ظاهر ڪيو ته ڪنزرويٽو پارٽي جي ايندڙ مدي ۾ ٻه طرفن ناتن خاص طور تي واپار ۽ معيشت جي شعبن م ناتا نين بلندين کي ڇهندا، وزيراعظم محمد نواز شريف برطانيا ۾ چونڊ دوران ڪاميابي حاصل ڪندڙ پاڪستاني برادري جي ميمبرن کي به مبارڪون پيش ڪيون، هن اميد ظاهر ڪئي ته هو برطانيا ۽ پاڪستان جي دوستاڻن ناتن کي وڌيڪ هٿي وٺرائڻ لاءِ ڀرپور ڪردار ادا ڪندا.

 

سنڌ ڌرتي جي وحدانيت تي وار ڪنهن به صورت ۾ برداشت نه ڪيو ويندو: خورشيد شاهه

سکر (بيورو) قومي اسيمبلي ۾ مخالف ڌر جي اڳواڻ خورشيد شاهه چيو آهي ته سنڌ جي ورهاڱي جون ڳالهيون ڪندڙ اجائي بحث ڪندڙن مان آهن، ڌرتي جي وحدانيت تي وار ڪنهن به صورت ۾ برداشت نه ڪيو ويندو، ڌرڻو ختم ٿيڻ بعد حڪمران وري پارليامينٽ کي نظرانداز ڪرڻ لڳا آهن.سکر پريس ڪلب ۾ تقريب کي خطاب ڪندي خورشيد شاهه چيو ته ملڪي تاريخ ۾ پهريون ڀيرو پارليامينٽ آئين ٽوڙيندڙن خلاف متحد ٿي بيٺي.هن چيو ته اقتدار کي ويندي ڏسي حڪمرانن پارليامينٽ جو سهارو ورتو پر جيئن ئي ڌرڻو ختم ٿيو ته اهي پنهنجي پراڻي رستي تي هلڻ لڳا آهن.خورشيد شاهه چيو ته ڌرڻن وقت حڪمرانن کي پارليامينٽ سان ماءُ جهڙو پيار نظر ٿيآيو، جيڪو هاڻي ناهي رهيو.سندس چوڻ هو ته عمران خان خلاف پارليامينٽ ۾ ايندڙ ٺهراءُ کي به هن روڪيو ۽ اهو فيصلو درست ثابت ٿيو.خورشيد شاهه چيو ته پاڪستان فيڊريشن آهي، چئني يونٽن جو خيال رکي ان کي پوءِ هلائڻو پوندو.سندس چوڻ هو ته ڪراچي ۾ پيئڻ جي پاڻيءَ جو بحران هڪ سال ۾ حل ڪري سگهجي ٿو، ضرورت رڳو حڪمرانن جي سنجيده ٿيڻ جي آهي.خورشيد شاهه چيو ته ملڪ جي صحافين ۾ اتفاق ۽ اتحاد هجي ته ڪير به کين ويج بورڊ حاصل ڪرڻ کان روڪي نه ٿو سگهي.ان کان اڳ گمبٽ ۾ ميڊيا سان ڳالهائيندي خورشيد شاهه چيو ته سنڌ جي ورهاڱي جون ڳالهيون ڪندڙ اجائي بحث ڪندڙن مان آهن.هن چيو ته سنڌ جي وحدانيت تي وار ڪنهن به صورت ۾ برداشت نه ڪيو ويندو.خورشيد شاهه چيو ته ذوالفقار مرزا غير سياسي ماڻهو آهي ان بابت هو نه ڳالهائيندو.

 

ملڪ محمد رفيق رجوانا پنجاب جي 36 هين گورنر جي حيثيت سان حلف کڻي ورتو، چيف جسٽس لاهور حلف ورتو

لاهور (اين اين آءِ) ملڪ محمد رفيق رجوانا پنجاب جي 36 هين گورنر جي حيثيت سان حلف کڻي ورتو، چيف جسٽس لاهور هاءِ ڪورٽ جسٽس منظور احمد ملڪ رفيق رجوانا کان حلف ورتو، گورنر هائوس لاهور ۾ هڪ تقريب ۾ محمد شهباز شريف، اسپيڪر رانا محمد اقبال، راجا ظفر الحق، اقبال ظفر جهڙا، صوبائي وزير، اعليٰ فوجي ۽ سول عملدارن سميت ٻين شرڪت ڪئي، نامزد گورنر پنجاب محمد رفيق رجوانا جي حلف کڻڻ جي تقريب جي موقعي تي سيڪيورٽي جا فول پروف انتظام ڪيا ويا، مال روڊ تي احتجاجي استادن پاران گورنر هائوس ڏانهن امڪاني اڳڀرائي سبب احتجاج کي منهن ڏيڻ لاءِ پوليس جا وڏا اٽالا مال روڊ ۽ گورنر هائوس جي مرڪزي دروازي تي بيٺا رهيا.

 

ڊاڪٽر ذوالفقار مرزا تي هڪ ٻيو ڪيس داخل ڪرڻ جي تياري مڪمل

ڪراچي(اسٽاف رپورٽر)  اڳوڻي گهرو وزير ڊاڪٽر ذوالفقار مرزا تي هڪ ٻيو ڪيس داخل ڪرڻ جي تياري مڪمل ڪئي وئي آهي، پوليس آفيسرن ذوالفقار مرزا پري ڪورٽ جي ٻاهران بڪتر بند تي چڙهي تقرير ڪرڻ ۽ پوليس  اهلڪارن کي ڌمڪائڻ  تي ڪيس داخل ڪرڻ چاهين ٿا، ذريعن  موجب ڪراچي پوليجي ڊي آئي جي ۽ ٽن ايس ايس پيز فاروق ايڇ نائيڪ سان رابطو ڪيو آهي ۽ ذوالفقار مرزا تي ڪيس جي حوالي سان ڳالهه ٻولهه ڪئي آهي، ذريعن جو چوڻ آهي ته پوليس آفيسرن ذوالفقار مرزا تي پري ڪورٽ ٻاهران بڪتر بند تي چڙهي تقرير ڪرڻ ۽ پوليس اهلڪارن کي ڌمڪائڻ  تي ڪيس داخل ڪرڻ چاهين  ٿا، ذريعن جي دعويٰ آهي ته آفيسرن ڪيس جي قلمن جي حوالي سان فاروق ايڇ نائيڪ سميت ٻين ماهرين سان مشاورت ڪئي آهي، مشاورت مڪمل ڪرڻ کان پوءِ حتمي طور تي ڪو فيصلو ڪيو ويندو.

 

ذوالفقار مرزا جو معاملو نئون ناهي، اُن جو پارٽي سان پراڻو جهيڙو آهي: يوسف رضا گيلاني

ملتان (بيورو) اڳوڻي وزيراعظم يوسف رضا گيلاني چيو آهي ته ذوالفقار مرزا جو معاملو نئون ناهي، اُن جو پارٽي سان پراڻو جهيڙو آهي، فهميده مرزا قومي اسيمبلي جي اڳوڻي اسپيڪر آهي، کيس عهدي مطابق سيڪيورٽي ملڻ گهرجي. ملتان ۾ ميڊيا سان ڳالهائيندي اڳوڻي وزيراعظم يوسف رضا گيلاني چيو ته ذوالفقار مرزا جو معاملو عدالت ۾ آهي، ان لاءِ هو اُن تي وڌيڪ تبصرو نٿو ڪري سگهجي. يوسف رضا گيلاني چيو ته سندس ۽ سلمانتاثير جا پٽ افغانستان ۾ آهن، پ پ جي دور ۾ افغانستان سان بهتر لاڳاپا رهيا آهن. هن چيو ته پ پ ڌانڌلين باوجود عام چونڊن جي نتيجن کي قبول ڪيو، ڌانڌلين جي معاملو عدالت ۾ آهي، هو شاهه محمود قريشي کي جواب ڏيڻ مناسب نٿو سمجهي. يوسف رضا گيلاني جو چوڻ هو ته عام چونڊن ۾ ڌانڌلين بابت فيصلو جڊيشل ڪميشن کي ڪرڻو آهي، ان ڪري في الحال ان معاملي تي بحث ڪرڻ صحيح ناهي

 

خيرپور: مختلف حادثن ۽ واقعن ۾ 4 ڄڻا مارجي ويا 6 ڄڻا زخمي

خيرپو (ڊ.ر) مختلف حادثن ۽ واقعن ۾ 4 ڄڻا مارجي، 6 ڄڻا زخمي ٿي پيا، ڳوٺ ڪليري  ۾ وڏي عمر جي شخص خودڪشي ڪري ڇڏي،  فيض بنڊو ۾ نوجوان ناراض ٿي زهر پي ڇڏيو، ڪنڌرا ۾ ڀاءُ جي هٿان وڏي ڀاءُ جو قتل، حادثن ۾ ٻه مارجي ويا، ٻار گهر ۾ سڙي ويو، خبر موجب  گمبٽ ويجهو ڳوٺ ڪليري ۾ 65 سالن جي محمد پيرل ولد حاجي ميران ڪليري  بيماري ۽ حالات کان تنگ اچي پسٽولجا فائر ڪري خودڪشي ڪري ڇڏي، اطلاع تي پوليس لاش تحويل ۾  وٺي اسپتال منتقل ڪري ڇڏيو ۽ پوسٽ مارٽم  کان پوءِ لاش وارثن  حوالي ڪري ڇڏيو، پوليس موجب واقعو خودڪشي ئي لڳي ٿو، وڌيڪ ميڊيڪل  رپورٽ ۽ پوسٽ مارٽم  اچڻ تي صورتحال واضع ٿيندي، خيرپور جي ڪچي واري علائقي فيض بنڊو ٿاڻي جي حد ڪي ٽي پير پاڳارا ۾ 18 سالن جي ٽيڪم ولد چترال ڪولهي  دڙڪا  ملڻ تي مايوس ٿي زهريلي دوا پي خودڪشي جي ڪوشش ڪئي، جنهن کي ڳڻتي جوڳي حالت ۾ اسپتال خيرپور آندو ويو، جتان ان جي حالت خطري کان ٻاهر ٻڌائي پئي وڃي، خيرپور ويجهو ڪنڌرا  ۾ جوابدار سنتوش  ڪمار رقم جي تڪرار  تي پنهنجي وڏي ڀاءُ 35 سالن جي ڪرشن چند کي چاڪن  جا وار ڪري  سخت زخمي ڪري ڇڏيو، جيڪو روهڙي جي سرڪاري اسپتال ۾ علاج دوران فوت ٿي ويو، وارثن اسپتال جي عملي تي لاپرواهي جو الزام لڳايو آهي، گمبٽ بائي پاس سوڪ سينٽر ۽ پپري موڙ قومي شاهراه  تي 3 حادثن  ۾ موٽر سائيڪل سوار 23 سالن  جي سڌير ولد ليمو جوڳي ۽ 60 سالن جو سڀاگو خان  جوڻيجو مارجي ويو، جڏهن ته غلام مصطفيٰ چانڊيو، رياض احمد اڄڻ، ۽ غلام حيدر چنا زخمي ٿي پيا، جن کي اسپتال منتقل ڪيو ويو، حادثي جو شڪار ماڻهن جو تعلق گمبٽ جي مختلف علائقن سان ٻڌايو پيو وڃي،  خيرپور ويجهو داري ڳوٺ ۾ ٽن سالن جو ٻار اياز علي ولد شاهد حسين شاهه گهر ۾ اٻرندڙ چانهن  جسم تي ڪرڻ سان بري طرح سڙي ويو، جنهن کي سول اسپتال خيرپور آندو ويو، ڊاڪٽرن موجب جسم جو 25 سيڪڙو متاثر ٿيو آهي، گمبٽ جي ڳوٺ گلوراهن ۾ پراڻي تڪرار تي فائرنگ ڪري اوشاق ڪلهوڙو کي سخت زخمي ڪيو ويو.

 

ڪراچي ۾ فائرنگ ۾ ڊي ايس پي محافظ سميت مارجي ويو ، جناز نماز بعد مڙهه مٽيءَ ماءُ حوالي

ڪراچي (اسٽاف رپورٽر) ڪراچي جي علائقي شاهه فيصل ڪالوني ۾ نامعلوم هٿياربندن جي فائرنگ ۾ ڊي ايس پي ذوالفقار زيدي محافظ سميت مارجي ويو آهي. ڪراچي جي علائقي شاهه فيصل ڪالوني ۾ نمبر 2 ۾ فائرنگ ۾ ڊي ايس پي ذوالفقار ۽ سندس محافظ شعيب مارجي ويا آهن. پوليس موجب ڊي ايس پي ذوالفقار زيدي شاهه فيصل ڪالوني ۾ هڪ هوٽل تي ويٺو هو ته 2 موٽرسائيڪلن تي سوار 4 دهشتگردن مٿس فائرنگ ڪئي جنهن کي پوءِ ٻئي ڄڻا موقعي تي ئي مارجي ويا. ايسايس پي ڪورنگي جنيد شيخ موجب واقعي واري هنڌ تي نائين ايم ايم پسول جا 16 خول مليا آهن ۽ ڊي ايس پي ذوالفقار زيدي کي 6 گوليون لڳيون جڏهن ته ڊي آئي جي ايسٽ جو چوڻ هو ته مقتول پوليس آفيسر جي دوست موجب کيس قتل جون ڌمڪيون ملير هيون هيون. ڊي ايس پي ذوالفقار زيدي سنڌ هاءِ ڪورٽ جو سيڪيورٽي انچارج ۽ شاهه فيصل ڪالوني جو رهواسي هو. ڊي ايس پي جي قتل کانپوءِ آئي جي سنڌ غلام حيدر جمالي ۽ ايڊيشنل آئي جي ڪراچي غلام قادر ٿيٻو واقعي واري هنڌ پهچي ويا ۽ واقعي بابت معلومات ورتي. هوڏانهن وزيراعظم نوازشريف پوليس آفيسر جي قتل جي مذمت ڪندي واقعي جي رپورٽ طلب ڪري ورتي آهي، وزيراعظم نوازشريف پوليس جو مورا بلند ڪرڻ تي زور ڏنو جڏهن ته سنڌ حڪومت کي سيڪيورٽي قدم کڻڻ جي هدايت ڪئي آهي. ٻئي پاسي سنڌ هاءِ ڪورٽ به ڊي ايس پي ذوالفقار زيدي جي قتل جو نوٽيس وٺندي آئي جي سنڌ کان سومر تائين رپورٽ طلب ڪري ورتي آهي. سنڌ جي وڏي وزير واقعي جو نوٽيس وٺندي آئي جي سنڌ کان رپورٽ طلب ڪئي آهي، جڏهن ته سنڌ جي گورنر به واقعي جي مذمت ڪندي قاتلن جي گرفتاري جي هدايت ڪئي آهي.