تازيون خبرون

Daily Archives: May 8, 2015

شرڌا ڪپور بولي ووڊ جي نئين ڊريم گرل

ممبئي: شرڌا ڪپور بولي ووڊ ۾ تيزي سان اڀرندڙ اداڪارا آهي جنهن جون فلمون پرستارن سان گڏوگڏ فلمي تنقيد نگارن کي به وڻيون ۽ هاڻي کيس ڊريم گرل جو خطاب به مليو آهي.بوليووڊ اداڪارا تازو ئي هڪ تقريب ۾ بولي ووڊ جي ڊريم گرل هيما مالني سان ملي جتي هيما مالني پان شرڌا ڪپور کي بالي ووڊ جي نئين ڊريم گرل جو لقب ڏنو.ڀارتي ميڊيا مطابق ٻنهي اداڪارائن ملاقات ۾پنهنجين فلمن ۽ انهن ۾ ڪيل اداڪاري جي حوالي سان ڳالهه ٻولهه ڪئي جنهن کانپوءِ هيما مالني شرڌا ڪپور کي بالي ووڊ جي نئين ڊريم گرل جو لقب ڏنو.

 

عينڪ والا جن کان مقبوليت ماڻيندڙ زڪوٽا حڪومتي مدد جي اوسئڙي ۾

لاهور(شوبز نيوز): ٻارن کي وڻندڙ ڊرامي عينڪ والا جن جي اهم ڪردار زڪوٽا جن کي غربت ۽ بيماري بيوس بڻائي ڇڏيو آهي.اداڪار جو مطالبو آهي ته حڪومت گهر ۽ علاج جي سهولت ڏئي.جادو ۽ طلسماتي منظرن تي ٻڌل مشهور ۽ مقبول ڊرامي عينڪ والا جن کان مقبوليت ماڻيندڙ اداڪار منا لاهوري گذريل هڪ سال کان اڌ رنگي ۾ ورتل آهي، بيماري سندس جسم جو ساڄو حصو متاثر ڪيو آهي، انڪري اداڪاري ته هڪ پاسي پر فنڪار کائڻ پيئڻ کان به محتاج آهي. شاهد ره جي ويجهو هڪ ڳوٺ ۾ رهندڙ ناليواري زڪوٽا جن جي گهر ٻاهران ويراني ۽ گندگي آهي، جڏهن ته گهر اندر بجلي، گئس ۽ پاڻي جي سهولت به ناهي. فنڪار جي اپيل آهي ته حڪومت شهر ۾ گهر ڏئي ته جيئن زندگي جا آخري ساهه هو سڪون سان پورا ڪري سگهي. پنجاب حڪومت پاران منا لاهوري لاءِ 25هزار ماهوار جو وظيفو مقرر ڪيو ويو آهي پر فنڪار چوي ٿو ته کين اهي پئسا وقت تي نٿا ملن جنهن جي ڪري پريشاني کي منهن ڏيڻو پوي ٿو.

 

بپاشا جي هالي ووڊ فلم “ دي لورز ” ڊي وي ڊي تي رليز ٿي وئي

لاس اينجلس(شوبز نيوز) رينالڊ جوفي جي هدايتڪاري ۾ ٺهندڙ فلم جو نالو شروعات ۾ ڪجهه ٻيو هو بعد ۾ “ دي لورز ” ڪيو ويو، هي فلم يورپين سائنس فڪشن فلم فيسٽيول 2013ع ۾ پيش ڪئي وئي هئي ۽ ان کي هلندڙ سال خاص سئنيما گهرن ۾ رليز ڪرنو هو، جڏهن ته هاڻي ڪيترا ڀيرا ٻيهر شوٽ ڪرڻ کان پوءِ ڊي وي ڊي تي رليز ڪرڻ جو فيصلو ڪيو ويو، ذريعن جي مطابق ڊي وي ڊي تي انهن فلمن کي رليز  ڪيو ويندو آهي، جن کي باڪس آفيس تي مڪمل طور تي ناڪام رهڻ جو يقين هجي.

 

زمبابوي ڪرڪيٽ ٽيم 19 مئي تي پاڪستان جو دورو ڪندي، تياريون شروع

لاهور(اسپورٽس نيوز) زمبابوي ڪرڪيٽ ٽيم جي جي اعليٰ  آفيسرن دوره پاڪستان لاءِ سيڪيورٽي انتظامن تي اطمينان جو اظهار ڪيو، مهمان ٽيم 19 مئي تي پاڪستان ايندي. پاڪستان ۾ هڪ ڀيرو وري ڪرڪيٽ جو رونقون وري بحال ٿي وينديون. زمبابوي ٽيم جي استقبال لاءِ ڀرپور تياريون  ڪيون پيون وڃن. گذريل ڏينهن پاڪستان جي سيڪيورٽي صورتحال جو جائزو وٺڻ لاءِ زمبابوي ڪرڪيٽ بورڊ سيڪيورٽي وفد هڪ  ڏينهن جي دوري تي پاڪستان آيو هو، جيڪو رات دبئي  ايئرلائين ذريعي واپس روانو ٿي ويو. سيڪيورٽي وفد پنهنجي هڪ ڏينهن جي دوري دوران جتي سيڪيورٽي صورتحال جو جائزو ورتو، اتي قذافي اسٽيڊيم جي چئوطرف صورتحال جو پڻ تفصيلي جائزو ورتو. چار رڪني سيڪيورٽي وفد واپس وڃي زمبابوي ڪرڪيٽ بورڊ کي پاڪستان ۾ پنهنجي دوري ۽ سيڪيورٽي صورتحال کان آگاهه ڪندو.

 

زمبابوي کي پاڪستان جي دوري لاءِ سيڪيورٽي ڪليئرنس ملي وئي

لاهور:(اسپورٽس نيوز) اڳوڻي ڪرڪيٽر ۽ زمبابوي ڪرڪيٽ جي مئنيجنگ  ڊائريڪٽر ايلسٽر ڪيمبل جي اڳواڻي ۾ سيڪيورٽي جي صورتحال جو جائزو وٺڻ لاءِ وفد لاهور پهتو ۽ پاڪستان ڪرڪيٽ بورڊ ( پي سي بي ) جي طرفان ڪيل انتظامن تي اعتماد جو اظهار ڪيو، ڪيمبل لاهور جي قذافي اسٽيڊيم ۾ ميڊيا جي نمائندن سان ڳالهائيندي چيو ته زمبابوي پاڪستان ۾ عالمي ڪرڪيٽ جي بحالي کي ڪامياب بڻائيندي، اسين ٻنهي ملڪن جي وچ ۾ ٻطرفا لاڳاپا بهتر  بنائڻ  جي لاءِ پاڪستان جو دورو ڪري رهيا آهيون.

 

ايشين سنوڪر چيمپيئن حمزا اڪبر جي لاهور پهچڻ تي شاندار استقبال

لاهور(اسپورٽس نيوز) : ايشين سنوڪر چيمپيئن حمزه اڪبر ايئرپورٽ کان پنهنجي سنوڪر ڪلب چهتو ته ان جو شاندار استقبال ڪيو ويو، ان موقعي تي ميڊيا سان ڳالهائيندي،ايشين چيمپيئن حمزه اڪبر جو چون هو ته مان ايشين چيمپيئن بڻجڻ تي تمام خوش آهيان، ان چيو ته ڀارت جي رانديگر پنڪج آڏواڻي کي هارائڻ مشڪل هو، پر اڳوڻي ورلڊ چيمپيئن آصف ۽ سينيئرز جي حوصلا  افزائي جي ڪري هي ٽائيٽل حاصل ڪري سگهيس، حمزه اڪبر شڪايت ڪئي ته ان جي ڪاميابي تي حڪومت جي طرفان کان نه ڪو ئي انعام ڏنو ويو ۽ نه ئي حوصلا افزائي جي لاءِ ڪنهن مبارڪ ڏني.

 

اظهر علي جي شاندار ڊبل سينچري، خوب داد حاصل ڪيو

ڍاڪا:(اسپورٽس نيوز) پاڪستاني بئٽسمينن اظهر علي ۽ اسد شفيق جي جارحانه بئٽنگ ڪئي،  جنهن جي نتيجي ۾ ٻئين ٽيسٽ ۾  پاڪستان پنهنجي پوزيشن وڌيڪ مضبوط ڪري ڇڏي. پاڪستان 8 وڪيٽن جي نقصان تي 557  رنسون ٺاهيون. پاڪستان پنهنجي  ٻئين ڏينهن 323 رنسن  تان پنهنجي اننگ ٻيهر شروع ڪئي ته شقيب الحسن ڪپتان مصباح الحق جي وڪيٽ ڪيرائي وڌي. ڪپتان رڳو 9 رنسون ٺاهي سگهيو. هن کانپوءِ ڪريز تي اسد شفيق ۽ اظهر علي پنهنجون ذميواري واري بئٽنگ ڪئي. پنجين وڪيٽ لاءِ 207 رنسن جي پارٽنر شپ پاڪستان لاءِ وڏي راهه هموار ڪئي. اظهر علي ٽيسٽ ڪرڪيٽ ۾ پنهنجي ڊبل سينجري اسڪور ڪرڻ کانپوءِ پويلين موٽيو. هن 2 ڇڪن ۽ 20 چڪن جي مدد سان 224 رنسون ٺاهي خوب داد حاصل ڪيو. اسد شفيق 107 رنسون ٺاهي آئوٽ ٿي ويو. ٻين آئوٽ ٿيڻ وارن رانديگرن ۾ وهاب رياض ۽ ياسر شاهه شامل آهن. جڏهن چانهه جو وقفو ٿيو ته پاڪستان 8 وڪيٽن جي نقصان تي 557 رنسون ٺاهيون ۽ ڪپتان انضمام الحق اننگ ڊڪليئر ڪرڻ جو  اعلان ڪيو.

 

آثار قديمه جا ڪٽ چڙهيل سنڌ جا ادارا ڪجهه ڪري سگهندا

 

ڀارت ۾ آثارِ قديمه جي ماهرن اهو سوچڻ ۽ سمجهڻ شروع ڪيو آهي ته ”سنڌو سڀيتا“ جو بُڻ بڻياد ڀارتي علائقن کان شروع ٿيو هوندو. اها ڳالهه ڀارتي شهر پونا ۾ قائم ” دکن ڪاليج پوسٽ گريجوئيٽ  ۽ ريسرچ انسٽيٽيوٽ“ جي ماهرن چيو آهي ته ڀارتي علائقي ”هريانه“ جي پراڻي آثاري مرڪز ” راکي ڳڙهي“ جي کوٽائيءَ مان مليل انساني ڍانچا انهن جون ڄمارون 4000 کان ساڍا چار هزار سال پراڻا آهن. ان جاءِ تان کين ٻن مردن، هڪ عورت ۽ هڪ ٻار جا بدني ڍانچا مليا آهن، جن جي DNA ٽيسٽ ڪرائي، ان ڳالهه جي امڪان کي ڳوليو ويندو ته هنن جا اوائلي مائٽ ڪير ڪير ٿي سگهن ٿا. انهن چئني ڍانچن ۾ ڪنهن به قسم جي بيماري لڳل ڪانهي، اهي صاف سُٿرا آهن ۽ انهن منجهان ڪيئي نوان اصرار سامهون اچي سگهن ٿا.

ڪاليج جي وائيس چانسلر ۽ ڊائريڪٽر ڊاڪٽر ”وسنت شنڊي“ چيو آهي ته ايندڙ جولاءِ ۾ اسان دنيا کي ٻڌائي سگهنداسين ته انهن آثارن منجهان نيون سچايون ڪهڙيون لڌيون آهن. هن چيو آهي ته ٻن هڏاون ڍانچن جي چهري جا پڃرا سلامت آهن. ان سان ” هڙپا“ جي حوالي سان نيون نيون ڳالهيون ملي سگهنديون. هن وڌيڪ چيو آهي ته ڏکڻ ڪوريا ۾ انساني ڍانچن پرکڻ جو شاندار سافٽويئر پن ان سلسلي ۾ سندن رهنمائي ڪري سگهندو ته انهن چئني انسانن جي چمڙي، وار، رنگ وغيره ڪهڙا آهن. ڇوته اهي انساني پڃرا ”هڙپا “ مان مليل انساني جسمن وانگر آهن.

ڀارتي علائقي ”هريانه“ جي ضلعي ”حصار“ جي وسندي راکي ڳڙهيءَ ۾ 21 خندقون ۽ چار پوريل جايون مليون آهن. انهن ۾ هڙپا مان مليل ٿانون، جنگلي سوئر، ڪتا وغيره مليا آهن.

ان جديد تحقيق تي وفاقي توڙي سنڌ جي سرڪار ۽ اڃا به ايئن چئجي ته ملڪ ۾ قديم آثارن جي باري ۾ جيڪي به ماهر آهن انهن سمورن کي ان سلسلي ۾ پنهنجون پنهنجون سچايون سامهون آڻن گهرجن. ”هڙپا“ جو بنياد ڀارت جا مختلف پرڳڻا آهن يا اها ڌار تهذيب آهي يا اهي هڪ ئي تهذيب جا ٽڙيل پکڙيل سلسلا آهن، ان جي باري ۾ پاڪستاني ماهرن کي پنهنجي موقف جي باري ۾ دنيا کي ٻڌائڻ گهرجي. ايندڙ ٻن مهينن ۾ جڏهن مليل ڍانچن جي ڏکڻ ڪوريا مان ”ڊي اين اي“ ٽيسٽون ٿي اينديون ته انهن جي روشني ۾ پڻ اهي ماهر وري سڀيتائن ۽ ان جي اوائلي زمانن تي سوچڻ شروع ڪن.

پاڪستان سرڪار کي ۽ خاص طور سنڌ سرڪار جي قديم آثارن جي کاتي کي گهرجي ته ڀارت ۾ ملندڙ انهن آثارن جي باري ۾ پنهنجي تحقيق کي جديد بڻائين ۽ جيڪي جيڪي نيون ڳالهيون، نشانيون ۽ آثار مليا آهن انهن جو سنڌو سڀيتا سان سٻنڌ پڻ ڳوليو وڃي ۽ جيئن ڀارت جا ماهر چون ٿا انهن جي باري ۾ سرڪاري سطح تي اسان جي ملڪ ۾ به تحقيق کي نئون ڪرڻ شروع ڪجي. ان سان هڪ پاسي آثار قديمه جا ڪٽ چڙهيل سنڌ جا ادارا ڪجهه ڪري سگهندا، ساليانيون بجيٽون سجايون ڪري سگهندا ۽ دنيا ۾ جيڪي نيون نيون سچايون سامهون اچي رهيون آهن انهن مان پاڻ به سکي سگهندا ۽ دنيا کي پڻ پنهنجي خيالن توڙي ڪيل کوجنائن جي باري ۾ ٻڌائي سگهندا.

 

خبرون ئي خبرون؛حسن نثار

ڳالهه هڪ تڪ جي ناهي…..ٻه نمبر جمهوريت جي نڙي ۾ چنهب واري هڏي ڦاسڻ جي آهي.ٽريبونل پاران ايڪشن ري پلي ٿي ويو ته اڳڪٿي شيخ رشيد جي ئي سچ ثابت ٿيندي ته هي چار تڪ ناهن جنازي جا چار پاوا آهن ۽ جنازو ڪنهن جو هوندو؟ سياڻا سچ چوندا هئا ته سو ڏينهن چور جا، هڪ ڏينهن ساڌ جو.ٻئي خبر جو تعلق کٽمنڊو سان آهي جتي پاڪستان آرمي فيلڊ اسپتال ۾ پيدا ٿيندڙ ٻئي ٻار جو نالو “ پاڪستان” رکيو ويو آهي.“ محبت فاتح عالم” پر الائي ڇو کٽمنڊو ۾ ٻه ٻه پاڪستان ڏسي مون کي اهي ڏينهن ڇو ياد اچي وياجڏهن اسان به“ٻه” ئي هوندا هئاسين. هڪ اولهه پاڪستان ٻيو اوڀر پاڪستان جيڪو هاڻي بنگلاديش سڏرائي ۽ اسان کان ڪرڪٽ ميچ کٽي ضرورت کان وڌيڪ خوش ٿيندو آهي.جڏهن ته “ڪبهي هم بهي تم بهي تهي آشنا” ڪڏهن ڪڏهن سوچيندو آهيان ته هڪ کان ٻه ٿي وڃڻ واري هي تڪليف ڏيندڙ راند آهي ڇا؟ ته شايد هي ننڍڙو نظم ان سوال جو جواب ڏئي سگهي.

“مان ۽ تون

مان جي حد کان ٻاهر نڪتاسين، هڪ ٿياسين

مان واري حد ئي

ختم نه ٿيندڙ حد هئي”

مان واري حد انصاف تي ختم ٿئي ٿي ۽ جتي انصاف ختم ٿي وڃي اتي“ مان ۽ تون” جي هڪ اهڙي ورهاست شروع ٿي ويندي آهي، جنهن تي لڳل رت جا چٽا ڪيترين ئي برساتن کانپوءِ به ناهن ڌوپجندا ، پر هر رت جي داغ تي هڪ ڦاهي گهاٽ جوڙيو ويندو آهي،جو ايترن سالن کان پوءِ به بنگلاديش ۾ ڦاهي گهاٽ مصروف آهن. پاڪستان جي ٻن حصن ٿيڻ تي مون  گهڻو ڪجهه پڙهيو پر سچي ڳالهه اها آهي ته سڪون نه مليو. پورو جواب نه مليو ته ان وڏي المئي جا حقيقي سبب ڪهڙا هئا؟  ڄاڻڻ جو مطلب پنهنجا زخم کوٽڻ ناهي، سبق سکڻ آهي ته ڪا غلطي ، ڪا بيوقوفي ورجائي نه وڃي. ان موضوع تي آخري ڪتاب شريف الحق واليم(بيراتم) جي هئي.جنهن جو عنوان “ANBANGLA UNTOLD STORY”پر هن ڪتاب مان به پوري طرح مطمئن نه ٿي سگهيس. تازا ترين خبرن ۾ سڀ کان وزنائتي ۽ شاندار خبر پاڪستانين لاءِ ڪنهن چئلينج کان گهٽ ناهي.ٻوڙن،گونگن ماڻهن پنجاب اسيمبلي جي اڳيان 6 ڪلاڪ ڌرڻو هنيو آهي. مظاهرو ڪندڙ خاص اشارن سان پنهنجو حق بلڪي حقَ گهرندا رهيا.

جلدي ئي سرڪاري نوڪريون ڏيڻ  جو مطالبو ڪيو ويو  ۽ مال روڊ تي ٽريفڪ بند ڪري ڇڏي. ان کان اڳ اکين کان معذور ماڻهو به هڪ کان وڌيڪ ڀيرا مظاهرا ڪري چڪا آهن ۽ لٺين جي صورت ۾ “جمهوريت جو حسن” به ڏسي چڪا آهن ته ان سموري صرتحال ۾ ٻه ڳالهيون غور ڪرڻ جهڙيون آهن. پهرين ڳالهه ته ٻوڙن ، گونگن۽ اکين کان وانجهيل ماڻهن   جي نوڪرين جي ڪوٽا هجڻ ئي غلط آهي ڇو ته اڳ ۾ ئي سرڪاري نوڪرين ۾ انڌا، ٻوڙا ۽ گونگا موجود آهن. سرڪاري نوڪرين تي ته قبضو ئي اسپيشل ماڻهن جو آهي، ته انهن کي ڪهڙي “ڪوٽا” جي ضرورت آهي. خبر جو ٻيو رخ اهو آهي ته اسان نامنهاد نارمل پاڪستانين کان ته اهي گونگا، ٻوڙا ۽ انڌا ماڻهو گهڻا بهتر آهن، جيڪي پنهنجي حقن جو نه رڳو شعور رکن ٿا پر ٻڌي ۾ به آهن ۽ سڀ کان اهم ڳالهه اها ته احتجاج ڪرڻ جي همت ۽ حوصلو به رکن ٿا. سي ٽي او طيب حفيظ چيما 11 مئي کان پوري لاهور ۾ سيٽ بيلٽ نه ٻڌڻ وارن خلاف  ڪريڪ ڊائون جو اعلان ڪندي چيو ته سفر جي دوران سيٽ بيلٽ جي استعمال جو شعور پيدا ڪرڻ لاءِ اسان سڀني کي گڏجي ڪوشش ڪرڻي پوندي.اسان ڪهڙي عجيب ۽ غريب قسم جي“ عقلمند ۽ باشعور” عوام آهيون،

جن کي پنهنجي زندگين جي حفاظت لاءِ به ڪريڪ ڊائون جي ضرورت آهي.مون آمريڪا جي شهر  ڊيٽر ائيٽ ۾ فورڊ ميوزم هڪ کان وڌيڪ ڀيرا ڏٺو. انسان جيڪا پهرين گاڏي روڊ تي آندي ان جو پيٽرول ٽينڪ ۽ بريڪون ته ڇا…..اسٽئرنگ به نه هو. ترقي ڪندي ڪندي آٽو موبائيل کي ڪٿان کان ڪٿي کڻي آيا، ڪيترا سال پهرين سيٽ بيلٽ متعارف ڪرائي ڇڏي ۽ هڪ اسان آهيون جو 2015ع ۾ به سيٽ بيلٽ ٻڌڻ جو طريقو ناهي، ته فرق صاف ظاهر آهي.

آخر ۾ پنجاب حڪومت کي درخواست آهي ته ڊي آئي جي اپريشنز ڊاڪٽر حيدر اشرف جون فوٽو ڪاپيون ڪرائي ٻين شهرن ۾ ورهائي ڇڏي ته جيئن هر شهر ڊاڪٽر صاحب جي “علاج” مان فائدو وٺي سگهي.منهنجي لاءِ اها ننڍڙي خبر يقين نه ايندڙ  حد تائين وڻندڙ آهي ته لاهور ۾ ڏوهه جي شرح تيزي سان هيٺ اچي رهي آهي ۽ پوليس ڪلچر جو ڏيک مٽجي رهيو آهي. پوليس ۾ نه رڳو جديد انداز ۾ آئي ٽي ڪلچر متعارف ڪرايو ويو آهي پر ريسڪيو15 جي اپ گريڊيشن به ڪئي وئي آهي. پوليس شڪايت سيل سان گڏ ئي نئون ايس ايم ايس“ميسيج،نياپي”  وارو نظام اچي ويو آهي ۽ نئين پيٽرولنگ نظام سان گڏو گڏ ترڪي جي انداز ۾ “ ڊولفن فورس” به بيهاريون ويون آهن. ڊاڪٽر حيدر اشرف فيم پوليس سينٽر پهرين ئي پوري صوبي ۾ شروع ٿي چڪو آهي ته حيرت ان ڳالهه تي آهي ته جيڪڏهن اهو“ “حيدر ماڊل” لاهور ۾ ايترو اثرائتو ثابت ٿيو آهي ته ان کي ٻين شهرن ۾ ڇو نٿو استعمال ڪري سگهجي؟؟؟

اوورهيدز،انڊر پاسز ۽ روڊن تي ته لاهور جي حڪومت آهي ته ڇا بهتر گورننس ۽ ڏوهه جي حوالي سان به باقي پورو پنجاب ئي اهم رهندو؟ اهو تاثر رهيو ته ايندڙ چونڊون گهڻيون ڏکيون ٿي وينديون ته هاڻي ته انڌا، ٻوڙا، گونگا به احتجاج ڪرڻ سکي ويا آهن.

 

ذوالفقار کان فهميده مرزا وڌيڪ ڏکي ثابت ٿيندي ؛عاجز جمالي

سنڌ ۾ ڳچ عرصي کان لڳل دنگل ۾ هر ماڻهو اهو سوال ڪندي نظر اچي رهيو هو ته آخر ڊاڪٽر ذوالفقار مرزا جي گهرواري ۽ پُٽ سامهون ڇونه ٿا اچن. ڇا اهي ساڻس گڏ آهن؟ خود سنڌ سرڪار جا اڪثر وزير اهو ئي چوندا رهيا ته فهميده مرزا ۽ حسنين مرزا کي چٽو ٿيڻو پوندو ته پٽ پيءُ سان يا زال مُڙس سان گڏ آهن يا پارٽي سان گڏ آهن؟

منهنجو خيال آهي ته سنڌ سرڪار کي اڱاري جي شام جو انهيءَ سوال جو اُن وقت جواب ملي ويو، جڏهن فهميده مرزا ڪراچي ۾ پريس ڪانفرنس ڪئي، جنهن ۾ هُن سرڪار ۽ پوليس جي خلاف ڳالهايو. نه رُڳو پريس ڪانفرنس ڪئي، بلڪه رات جي پوئين پهر ۾ هوءَ بدين پهچي وئي. فهميده مرزا پنهنجي طبيعت جي خرابي هوندي نيٺ بدين پهتي ۽ هُن ڏٺو ته سوين پوليس وارا گهيرو ڪيو بيٺا آهن. مون ٽي وي تي ٻُڌو ته فهميده مرزا سپريم ڪورٽ ۽ سنڌ هاءِ ڪورٽ کي تحفظ ڏيڻ جي اپيل پئي ڪئي.

فهميده مرزا هڪ عام سياسي خاتون يا رُڳو پيپلز پارٽي جي ايم اين اي ناهي. هوءَ هڪ سياسي حيثيت رکي ٿي. قومي اسيمبلي جي اڳوڻي اسپيڪر، اڳوڻي وقتي صدر رهندڙ ۽ سڀ کان وڏي ڳالهه ته بينظير ڀُٽو جي ويجهو رهندڙ خاتون آهي. اسان خود ڏٺو بينظير ڀُٽو، فهميده مرزا کي ڏاڍو ڀائيندي هُئي. ذوالفقار مرزا جي دوستي جي ناطي اڳوڻو صدر آصف زرداري کيس ڀاڀي چوندو هو، ۽ بلاول ڀُٽو کيس آنٽي پُڪاريندو آهي.

گهڻو پري ڪونه ٿا وڃون. بلاول ڀُٽو جي سياست ۾ سرگرم ٿيڻ کان پوءِ ذوالفقار مرزا کي به سرگرم ٿيڻ جو اشارو ڏنو ويو. حسنين مرزا بلاول جي ويجهو رهڻ لڳو. بلاول جي قائداعظم جي مزار وٽ ٿيل جلسي ۾ ذوالفقار مرزا بدين کان قافلو وٺي پهتو هو ۽ کيس اسٽيج تي ويهاريو ويو هو. مون اُن وقت به ڏٺو ته پيپلز پارٽي جي گهڻن اڳواڻن، وزيرن کي اها ڳالهه ڪانه وڻي، جڏهن مرزا اسٽيج تي پهتو.

هڪ ٻي اهم ڳالهه ٻُڌايان ته بلاول جا به پارٽيءَ اندر اختلاف ان ڪراچيءَ واري جلسي کان پوءِ سامهون آيا. جڏهن بلاول پنهنجي جلسي جي ناڪاميءَ تي ڪجهه ماڻهن جي بلاول هائوس ۾ داخلا بند ڪرائي هُئي ۽ ڪجهه وزيرن کي ڇنڊ پٽي هُئي. جڏهن کيس خبر پئي ته سڄو جلسو ٺيڪيداري سسٽم تحت ڪرايو ويو هو. اتان کان زرداري وڏي جو موڊ به خراب ٿيو هو. ناراضگيون وڌي ويون، ڇو ته بلاول ٻين ڪجهه سگهارين شخصيتن کي پارٽيءَ مان پاسيرو ڪرڻ پئي چاهيو. اها صلاح کيس ذوالفقار مرزا ڏني هوندي، اهو وڏي همراهه جو خيال هو، پر حقيقت ۾ بلاول خود سڀ ڪجهه ڏسي رهيو هو.

۽ ناراض بلاول مُلڪ کان ٻاهر هليو ويو، جڏهن مرزا دبئي ويو ته هروڀرو افواهون اٿاريون ويون ته هو بلاول سان ملڻ ويو. ائين مرزا جو مسئلو وڌندو ويو. مرزا جو مسئلو رُڳو شگر مل تي قبضي يا ملڪيت جو ناهي، ڳالهيون تمام گهڻيون آهن. مرزا جا ڪجهه ذاتي مسئلا به هوندا، ڇو ته هو خود چوي ٿو ته 45 سالن جي ياري آهي.

پر هن وقت سياسي وايومنڊل بدلجي پيو، پيپلز پارٽي جي وزيرن جي ڪرپشن، غلطيون، ضد، انائون ۽ پارٽي اندر وڏيرڪي سوچ قائم ڪرڻ، فردِ واحد جي اهميت هجڻ سبب پيپلز پارٽي اندر به ڪيترائي مايوس، ڪاوڙيل ۽ پاسيرا ٿيل ماڻهو موجود آهن. اُن سياسي وايومنڊل ۾ پيپلز پارٽي ۽ سندس سرڪار جي کاتي ۾ زوال ئي نظر پيو اچي. پيپلز پارٽي جي زوال سبب سنڌ ۾ جيڪو خال پيدا پيو ٿئي، اُن کي خبر ناهي ته ڪير ڀريندو، پي ٽي اي، ايم ڪيو ايم، ذوالفقار مرزا، فنڪشنل ليگ، قومپرست يا اڃا اسٽبلشمينٽ جي هٿان ڪا نئين ڌر تيار ٿيندي؟ان نئين سياسي منڊل ۾ ڪجهه نوان چهرا، ڪجهه نوان لوٽا ۽ ڪجهه پُراڻا کلاڙي ميدان ۾ لهندا، جن ۾ ڪيترائي پيپلز پارٽي جا پنهنجا هوندا. اها ڳالهه ڪنهن حد تائين صحيح ثابت ٿيندي ته جنهن پيپلز پارٽيءَ کي جنرل ضياءَ جي آمريت ختم نه ڪري سگهي، انهيءَ پارٽيءَ کي پنهنجن ختم ڪري ڇڏيو. ان جا ذميوار ڪير آهن؟

ان نئين سياسي منڊل ۾ ڪجهه نوان چهرا، ڪجهه نوان لوٽا ۽ ڪجهه پُراڻا کلاڙي ميدان ۾ لهندا، جن ۾ ڪيترائي پيپلز پارٽي جا پنهنجا هوندا. اها ڳالهه ڪنهن حد تائين صحيح ثابت ٿيندي ته جنهن پيپلز پارٽيءَ کي جنرل ضياءَ جي آمريت ختم نه ڪري سگهي، انهيءَ پارٽيءَ کي پنهنجن ختم ڪري ڇڏيو. ان جا ذميوار ڪير آهن؟ پارٽي جي قيادت، پارٽي جي سرڪار، ڪرپٽ وزير مشير، لٽ مار ڪندڙ مافيا، سڀ جو سڀ ذميوار هوندا پر جڏهن اختيار جا سڀ مرڪز هڪ فرد وٽ هوندا ته ان جي ذميواري سڀني کان وڌيڪ هوندي.

هن صورتحال ۾ ذوالفقار مرزا جي گهرواري ۽ بينظير ڀٽو جي ساٿي ڊاڪٽر فهميده مرزا جي اهميت کي معمولي نه سمجڻ گهرجي. فهميده مرزا سياسي طور تي ذوالفقار مرزا جي ڀيٽ ۾ ڳرو پٿر ثابت ٿي سگهي ٿي. ۽ خود پيپلز پارٽيءَ لاءِ وڌيڪ مٿي جو سور به ثابت ٿي سگهي ٿي. سياسي حوالي سان ڊاڪٽر فهميده مرزا سيٽ خالي ڪري اليڪشن وڙهندي، تڏهن به سرڪار لاءِ ڪٺن مرحلو هوندو ۽ ذوالفقار مرزا جي دفاع ۾ فهميده مرزا سنڌ ۾ جلسا ڪرڻ لڳندي، تڏهن به پيپلز پارٽي لاءِ هوءَ ڏکي ثابت ٿيندي.

سنڌ هاءِ ڪورٽ جي ڊپ کان مرزا جي بدين واري فارم تان پوليس ته هٽائي وئي، پر ڇا هن مسئلي جو ڪو حل آهي؟ حل اهوئي آهي ته مرزا سان ويهي ڳالهائي سگهجي ٿو. هر ڪنهن کي جهڪائڻ جو بادشاهاڻو تصور ئي بادشاهن جي زوال جو سبب بڻبو آهي.