تازيون خبرون

Daily Archives: May 1, 2015

ڏکئي وقت ۾ پاڙيسري ملڪ سان گڏ آهيون: نواز شريف

اسلام آباد (بيورو) وزيراعظم نوازشريف ڀارتي هم منصب نريندر مودي سان ٽيليفونڪ ڳالهه ٻولهه ۾ زلزلي سان ٿيل جاني نقصان تي افسوس جو اظهار ڪيو ذريعن مطابق وزيراعظم نوازشريف ڀارتي عوام سان ايڪي اتحاد جو اظهار ڪندي چيو ته هن ڏکئي وقت ۾ پاڙيسري ملڪ جي عوام سان گڏ آهيون ان موقعي تي ڀارتي وزيراعظم چيو ته نوازشريف اڻ مندائتي برساتن ۽ ان سان ٿيندڙ جاني نقصان کان علاوه فصلن کي ٿيندڙ نقصانن تي به ڳالهائيندي نيپال ۾ ڀارتي امدادي ڪارروائين کي ساراهيو نريندر مودي چيو ته هن وزيراعظم نوازشريف کي تجويز ڏني ته سارڪ ملڪ گڏجي آفت سٽيل ملڪن ۾ امدادي ڪارروائي ڪن ۽ خطي جي سمورن ملڪن کي گڏجي قدرتي آفتن کان بچڻ جون مشقون ڪرڻ گهرجن. ٽوئيٽر تي پنهنجي پيغام ۾ نريندر مودي ٻڌايو ته پاڪستان جي وزيراعظم نيپال ۾ ڀارت پاران ڪيل ريسڪيو آپريشن جي تعريف ڪئي جنهن تي هن نوازشريف جو شڪريو ادا ڪيو.

 

ٽمبر مارڪيٽ سانحي جي متاثرن سان ڪيل واعدو پورو ڪري ڇڏيو: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه ٽمبر مارڪيٽ باهه جي متاثر 220 ماڻهن ۾ 97.730 ملين رپيا خميس تي وزيراعليٰ هائوس ۾ رٿيل هڪ تقريب دوران ورهايا. ٽمبر مارڪيٽ جي باهه جي متاثر تجارتي طبقي جي 151 متاثرن ۾ 86.084 ملين رپيا، جڏهن ته 69 رهائشي متاثرن ۾ 11.464 ملين رپيا رقم ورهائي وئي. هن تقريب ۾ صوبائي وزير ڄام مهتاب ڏهر، جاويد ناگوري، سنڌ جي وڏي وزير جا خاص معاون راشد حسين رباني، وقار مهدي، صديق ابو ڀائي، بزنس ڪميونٽي جو سربراهه سراج قاسم تيلي، صدر ايوان صدر تجارت ۽ ايوان افتخار وهرا، ايڊيشنل آءِ جي ڪراچي غلام قادر ٿيٻو، ڪمشنر ڪراچي شعيب صديقي، سنڌ حڪومت جا ٻيا آفيسر، تاجر برادري جا نمائندا ۽ متاثر ماڻهن شرڪت ڪئي. اجلاس کي خطاب ڪندي سنڌ جي وڏي وزير چيو ته هن ٽمبر مارڪيٽ جي سانحي جي موقعي تي متاثرن سان ڪيل واعدو اڄ پورو ڪيو آهي. هن چيو ته اسان ايوانِ صنعت تجارت ڪراچي ٽمبر مارڪيٽ ايسوسيئيشن جي صلاح مشوري سان متاثر ماڻهن جي سروي ڪري ٽن مرحلن ۾ رپورٽ پيش ڪرڻ لاءِ هڪ ڪميٽي جوڙي هئي جنهن ۾ جلد نوعيت جي مالي سپورٽ، ملڪيتن ۽ تجارتي نقصان، دڪانن ۽ عمارتن کي پهچندڙ نقصان شامل هيو. هن وقت تائين ٻه مرحلا مڪمل ٿي چڪا آهن ۽ اسان ڪميٽي جي سفارشن تي عملدآمد ڪيو آهي. وڏي وزير ڪميٽي کي دڪانن ۽ عمارتن کي پهچندڙ نقصان جو ٽئين مرحلي تحت سروي مڪمل ڪرڻ جون هدايتون ڏنيون. ۽ چيو ته اڳ وانگر سنڌ حڪومت هاڻي به ڪميِٽي جي سفارشن تي عمل ڪندي. هن چيو ته پاڪستان پيپلز پارٽي جي ڪو چيئرمين آصف علي زرداري جي خواهش آهي ته ٽمبر مارڪيٽ ۾ تجارتي سرگرميون ٻيهر بحال ٿين. هن چيو ته پاڪستان پيپلز پارٽي جي حڪومت ۽ پ پ قيادت هميسه مختلف وقتن ۾ تاجر برادري جي مڪمل مدد ۽ تعاون ڪيو آهي. هن وڌيڪ چيو ته اسان بولٽن مارڪيٽ سانحي ۾ به 3 ارب رپيا مالي مدد ڪئي هئي. ان موقعي تي بزنس ڪميونتي جي سربراهه سراج قاسم تيلي خطاب ڪندي ٽمبر مارڪيٽ، بولٽن مارڪيٽ ۽ ٻين سانحن ۾ حڪومت سنڌ پاران متاثر ماڻهن جي رليف ۽ بحالي وارين ڪاوشن جي ساراهه ڪندي چيو ته بولٽن مارڪيٽ واقعي جي متاثر 1751 ماڻهن جي مالي مدد ڪئي وئي ۽ هن وقت 200 کان وڌيڪ ٽمبر مارڪيٽ متاثرن کي سنڌ حڪومت پاران مالي مدد فراهم ڪئي پئي وڃي جنهن تي اسان سنڌ حڪومت جا ٿورائتا آهيون.

 

 

نيپال جي زلزلي متاثر علائقن ۾ پاڪستاني امداد تي ڀارتي ميڊيا جي تنقيد افسوسناڪ آهي:پرڏيهي ترجمان

اسلام آباد (بيورو) پاڪستان، نيپال جي زلزلي متاثر علائقن ۾ پاڪستاني امدادي تي ڀارتي ميڊيا جي تنقيد کي افسوسناڪ قرار ڏئي ڇڏيو، پرڏيهي ترجمان تسنيم اسلم جو چوڻ آهي ته پاڪستاني ڊاڪٽر ۽ امدادي ڪارڪن نيپال ۾ موجود آهن، امدادي سرگرمين تي نيپالي حڪومت به ساراهه ڪئي آهي. پرڏيهي آفيس اسلام آباد ۾ هفتيوار بريفنگ دوران تسنيم اسلم چيو ته پاڪستان نيپال ۾ امداد پهچائيندڙ ڪجهه ملڪن ۾ شامل آهي. پرڏيهي ترجمان چيو ته ڀارتي ميڊيا پاران نيپال جي زلزلي متاثر علائقن ۾ پاڪستاني امداد تي تنقيد افسوسناڪ آهي،نيپالي حڪومت پاڪستان جي امداد کي ساراهيو آهي. هن چيو ته پاڪستاني ڊاڪٽر ۽ امدادي ڪارڪن نيپال ۾ موجود آهن،جڏهن ته بختاپور پاڪستاني فيلڊ اسپتال ۾ عورت هڪ ٻار کي جنم پڻ ڏنو. سعودي وليعهد شهزادي مقرن ۽ پرڏيهي وزير سعود الفيصل کي هٽائڻ واري معاملي تي تسنيم اسلم چيو ته قيادت ۾ تبديلي سعودي عرب جو اندروني معاملو آهي. سندس چوڻ هو ته ڀارت ۽ افغانستان جي لاڳاپن سان پاڪستان تي ڪو به فرق نه ٿو پوي، هـُو ٻين ملڪن جي لاڳاپن تي تبصرو نه ڪندا. هن چيو ته والاريل ڪشمير هڪ تڪراري علائقو آهي،ڀارت طرفان اتي هندو وسنديون آباد ڪرڻ مذمت جوڳو قدم آهي. پرڏيهي ترجمان تسنيم اسلم چيو ته ڪا به شمارياتي تبديلي ڪشميرين جي راءِ بدلائي نه ٿي سگهي،ڪشمير جو مسئلو حق ڏيڻ سان ئي حل ٿيندو.

 

چارسده ۾ اڳوڻي گهرو وزير آفتاب شيرپائو تي آپگهاتي حملو، پوليس آفيسر سميت ٻه ڄڻا شهيد، 3 زخمي

چارسده (مانيٽرنگ ڊيسڪ) چارسده ۾ عمر زئي ٽائون ۾ اڳوڻي گهرو وزير آفتاب شيرپائو تي آپگهاتي حملي جي نتيجي ۾ پوليس آفيسر سميت ٻه ڄڻا فوت ۽ ٽي ڄڻا زخمي ٿي پيا، آفتاب شيرپائو بچي ويو، صدر ممنون حسين، وزيراعظم محمد نواز شريف حملي جي مذمت ڪندي واضح ڪيو آهي ته دهشتگردي خلاف جنگ جاري آهي بزدلاڻيون ڪارروائيون حڪومتي عزم کي ڪمزور نه ٿيون ڪري سگهن جڏهن ته وفاقي گهرو وزير چوڌري نثار علي خان واقعي جي رپورٽ طلب ڪري ورتي آهي. اطلاعن مطابق قومي وطن پارٽي جي سربراهه آفتاب شيرپائو چارسده جي علائقي عمر زئي ٽائون ۾ اڳوڻي ايم پي اي عالم زيب عمر زئي جي ورسي جي تقريب کانپوءِ واپس وڃي رهيو هو ته هڪ آپگهاتي بمبار قافلي ۾ موجود سندس گاڏي ڀرسان اچڻ جي ڪوشش ڪئي جنهن تي آفتاب شيرپائو جي سيڪيورٽي تي مقرر پوليس اهلڪارن ان تي فائرنگ ڪئي جنهن جي نتيجي ۾ بمبار ٿڏي تي ئي فوت ٿي ويو جڏهن ته سندس جسم تي لڳل بارودي مواد ڦاٽي پيو، بمبار جو بارودي مواد ڦاٽڻ سبب هڪ پوليس آفيسر سميت ٻه ڄڻا فوت ۽ ٽي زخمي ٿي پيا جن جي حالت ڳڻتي جوڳي آهي. اڳوڻو گهرو وزير حملي ۾ بچي ويو، پوليس مطابق حملي آور پهريان فائرنگ ڪئي جنهن کانپوءِ هو پوليس جي جوابي فائرنگ ۾ زخمي ٿيو پوليس بمبار کي گرفتار ڪرڻ جي ڪوشش ڪئي جنهن تي هن پاڻ کي ڌماڪي سان اڏائي ڇڏيو بمبار وٽان ٽي دستي بم به هٿ ڪيا ويا آهن مبينا بمبار جي عمر 22 يا 23 سال جي لڳ ڀڳ هئي حملي وقت شيرپائو جو پٽ سڪندر خان شيرپائو ۽ خيبر پختونخواهه اسيمبلي جو هڪ ميمبر به قافلي ۾ شامل هو. ٻئي پاسي صدر ممنون حسين ۽ وزيراعظم محمد نواز شريف آفتاب شيرپائو حملي جي سخت لفظن ۾ مذمت ڪئي آهي.

 

اوگرا جي سمري رد, حڪومت ايندڙ مهيني پيٽروليم شين جا اگهه برقرار رکڻ جو فيصلو ڪري ڇڏيو

اسلام آباد (بيورو) حڪومت، ايندڙ مهيني پيٽروليم شين جا اگهه برقرار رکڻ جو فيصلو ڪندي  پيٽرول جي قيمت ۾ هڪ رپيو گهٽائڻ وارا اوگرا جي سمري رد ڪري ڇڏي. اوگرا، پيٽروليم شين جي اگهن ۾ گهٽتائي جي تجويز ڏني هئي. ناڻي واري وفاقي وزير اسحاق ڊار، اوگرا جي سمري رد ڪندي چيو آهي ته ايندڙ مهيني پيٽروليم شين جي اگهن ۾ ڦير ڦار نه ڪئي ويندي ۽ ان بابت اوگرا جي تجويز قبول ناهي.

 

ايم ڪيو ايم جا “را“ سان لاڳاپا آهن، پابندي مڙهيل وڃي: رائو انوار

ڪراچي (اسٽاف رپورٽر) پوليس گذريل ڏينهن گرفتار ڪيل 2 دهشتگردن کي ميڊيا آڏو پيش ڪري ڇڏيا آهن جڏهن ته ايس ايس پي ملير رائو انوار دعويٰ ڪئي آهي ته گرفتار دهشتگردن جو تعلق ايم ڪيو ايم سان آهي ۽ اُنهن پاڪستان ۾ دهشتگردي لاءِ ڀارتي ايجنسي ”را“ کان تربيت حاصل ڪئي. ڪراچي ۾ پريس ڪانفرنس ڪندي ايس ايس پي ملير رائو انوار ٻڌايو ته پوليس گذريل رات احسن آباد ۾ ڪارروائي ڪري 2 اهم دهشتگردن طاهر عرف لمبا ۽ جنيد کي گرفتار ڪيو آهي جن جو تعلق ايم ڪيو ايم سان آهي، ٻئين جوابدار ڪي ايم سي جا ملازم آهن ۽ سندن قبضي مان بارودي مواد ۽ هٿيار هٿ ڪيا ويا آهن جڏهن ته جوابدارن پاڪستان ۾ دهشتگردي لاءِ ڀارتي ايجنسي”را“ کان تربيت حاصل ڪئي. انهن ٻڌايو ته ايم ڪيو ايم جي هر سيڪٽر جا ماڻهو ٽريننگ لاءِ ڀارت ويندا آهن جوابدار بئنڪاڪ ذريعي دهلي ويندا رهيا، ايم ڪيو ايم ڇوڪرن کي نوڪريون ڏئي انهن کان دهشتگرد ڪارروايون ڪرائي ٿي. رائو انوار موجب جوابدارن ٻڌايو آهي ته لنڊن مان ملندڙ هدايت موجب نائين زيرو ذريعي دهشتگردي ڪئي ويندي آهي جڏهن ته الطاف حسين جو ويجهو ساٿي محمد انور جا ”را“ سان ويجها لاڳاپا آهن، فاروق سليم ۽ نديم نصرت به دهشتگردن جي مدد ڪندا آهن، ايم ڪيو ايم پاڪستان خلاف ڪم ڪري رهي آهي ۽ ملڪ ۾ بي چيني پکيڙي رهي آهي. هن چيو ته ايم ڪيو ايم تحريڪ طالبان کان به وڌيڪ خطرناڪ آهي هيءَ سياسي پارتي جي نالي تي ملڪ دشمن پارٽي آهي اُن جو نيٽ ورڪ سڄي پاڪستان  آهي، ايم ڪيو ايم خلاف سمورا ثبوت گڏ ڪري ورتا آهن اُن تي پابندي لڳڻ گهرجي جنهن جي تجويز به حڪومت کي ڏيندس. ايس ايس پي ملير چيو ته ايم ڪيو ايم پرتشدد ڪارروائين ۾ ملوث آهي، ڪراچي ۾ ڊاڪٽرز ۽ پروفيسرز جهڙا ماڻهو ڳولي ڳولي قتل ڪيو پيو وڃي. فاروق سليم ۽ نديم نصرت دهشتگردن جي مدد ڪندا آهن، گرفتار جوابدارن جنيد جو ڀاءُ جاويد لنگڙا الطاف حسين جو اص ماڻهو آهي جنهن کي پاڪستان ۾ دهشتگردي لاءِ ڀارتي شهريت ملي. انهيءَ موقعي تي جڏهن گرفتار جوابدارن کي ميڊيا آڏو چهرن تي ڪپڙو وجهي پيش ڪيو ويو ته جوابدار طاهر لمبا پنهنجي بيان ۾ چيو ته ايم ڪيو ايم جو ڪارڪن آهي ۽ منهنجو تعلق لياري سيڪٽر سان آهي، مان 1992 جي آپريشن ۾ گرفتاري کان بچڻ لاءِ بئنڪال ويس ۽ اُتان کان ڀارت روانو ٿيس جتي دهلي ايئرپورٽ تي ڀارتي آفيسر اسانکي ڪليئر ڪرايو، دهلي ۾ هڪ ڪارڪن سني اسانکي فارم هائوس وٺي ويو جتي هڪ ڪيمپ ۾ ”را“ جي ماڻهن اسانکي تربيت ڏني. ٻئي طرف  ايم ڪيو ايم جي اڳوان واسع جيل چيو ته ايس ايس پي ملير جي الزامن تي پنهنجو سخت ردِ عمل طاهر ڪندي چيو ته رائو جي پريس ڪانفرنس سڄو ڊرامو آهي.هن وڌيڪ چيو ته ايس ايس پي  ملير رائو انوار جي پريس ڪانفرنس هن سال جي مزاحيا ترين پريس ڪانفرنس ۽ ڊرامو آهي ڪراچي پوليس پاران ميڊيا اڳيان پيش ڪيل طاهر نالي ماڻهو طوطي جيان رٽايل انداز واري ڳالهه ٻولهه  ڪري رهيو هو.

 

اسلام آباد پوليس جو ڪارنامو اڳوڻي سي آءِ اي اسٽيشن جي سربراهه تي ڪيس داخل، ٿوري دير بعد ختم

اسلام آباد (بيورو) وفاقي پوليس عدالت جي حڪم تي اڳوڻي سي آءِ اي اسٽيشن اڳواڻ جوناٿن بينڪس خلاف ڪيس داخل ڪري ڪجهه دير بعد ختم به ڪري ڇڏيو.عدالتي حڪم تي اسلام آباد جي  سيڪريٽريٽ ٿاڻي تي اڳوڻي سي آءِ اي اسٽيشن جي اڳواڻ تي مير علي جي  هڪ اسڪول تي ڊرون حملي ۾ مري ويلن جي وارثن جي درخواست تي ڪيس داخل ڪيو. ڪيس داخل ڪري وري ختم ڪري پوليس اهو چيو ته لاڳاپيل ٿاڻو ڊرون حملي واري هنڌ جي  حد ۾ نه ٿو اچي تنهن ڪري ڪيس رد ڪري ڇڏيوآهي . آءِ جي پوليس سي آءِ اي چيف جوناٿن بينڪس خلاف داخل ڪيل ڪيس جي ڪاپي عدالت ۾ پيش ڪندو.

 

قومي وسيلا رڳو ڪجهه خاندانن تي خرچ ڪيا پيا وڃن:سراج الحق

لاهور (بيورو) جماعت اسلامي جي امير سراج الحق چيو آهي ته حڪمران ووٽ وٺڻ بعد عوام کي وساري ويهن ٿا، قومي وسيلا رڳو ڪجهه خاندانن تي خرچ ڪيا پيا وڃن. لاهور ۾ جماعت اسلامي جي مرڪز منصورا ۾ پارٽي جي مجلس شوريٰ جي اجلاس بعد ميڊيا سان ڳالهائيندي سراج الحق چيو ته هنن اسٽيٽس ڪو خلاف منظم جدوجهد ڪرڻ جو فيصلو ڪري ورتو آهي، ڪينٽونمينٽ بورڊز ۾ ٿيل مڪاني چونڊن ۾ سندن پارٽي بهتر ڪارڪردگي ڏيکاري آهي. هن چيو ته ترڪي ۽ پاڪستان کي يمن معاملي تي ٽياڪڙي ڪرڻ گهرجي،سعودي عرب تڪرار کي يمن ۾ ئي دفن ڪري بهتر ٿيندو. سندس چوڻ هو ته نوجوان ملڪ جو مستقبل روشن ڪرڻ لاءِ ووٽ جو صحيح استعمال ڪن. سراج الحق چيو ته هو نوجوانن جو مستقبل روشن بڻائڻ چاهين ٿا.

 

عمران خان انٽرا پارٽي چونڊن جي جاچ ڪندڙ ٽربيونل جي سربراهه جسٽس ( ر ) وجيهه الدين کي عهدو ڇڏڻ لاءِ خط لکي ڇڏيو

اسلام آباد (بيورو) پي ٽي آءِ چيئرمين عمران خان، انٽرا پارٽي چونڊن جي جاچ ڪندڙ ٽربيونل جي سربراهه جسٽس رٽائرڊ وجيهه الدين کي عهدو ڇڏڻ ۽ وڌيڪ اجلاس نه گهـُرائڻ لاءِ خط لکي ڇڏيو. عمران خان طرفان جسٽس رٽائرڊ وجيههالدين احمد کي لکيل خط ۾ چيو ويو آهي ته ٽربيونل کي معطل ڪيو ويو هو پر ان باوجود اجلاس گهـُرايو ويو، جيڪو عمل پارٽي ڊسيپلين جي ڀڃڪڙي آهي. ڪپتان چيو ته سندس هدايت باوجود وجيهه الدين پارٽي مان نيڪالي ڏنل ميمبرن سان گڏ اجلاس گهـُرائي اليڪشن ٽربيونل جي غير قانوني ڪارروائي هلائي. عمران خان جو چوڻ آهي ته غير قانوني ڪارروائي هلائڻ سان پارٽي جي بدنامي ٿي،انڪري وجيهه الدين احمد عهدو ڇڏي ڏي ۽ ٽربيونل جو وڌيڪ اجلاس نه گهـُرائي

 

ساهيوال ۾ ساٿين کي ڇـَڏائي فرار ٿيندڙ 5 جوابدارمقابلي ۾ مارجي ويا

ساهيوال (م.ڊ) ساهيوال ۾ ساٿين کي ڇـَڏائي فرار ٿيندڙ 5 جوابدار مبينا پوليس مقابلي ۾ مارجي ويا، پوليس جو چوڻ آهي ته مارجي ويل ۾ پوليس حراست مان فرار ٿيل 2 جوابدار به شامل آهن. ساهيوال ويجهو کسوال واري علائقي ۾ پوليس ٻن جوابدارن کي پيشيءَ لاءِ عدالت ۾ کڻي وڃي رهي هئي ته ٽن جوابدارن پوليس مٿان فائرنگ ڪري جوابدارن کي ڇڏائي ورتو. واقعي جي اطلاع تي ساهيوال جي مختلف ٿاڻن جي پوليس فرار ٿيندڙ جوابدارن کي گيهيري هيٺ آڻي ڇڏيو، جنهن بعد مقابلي ۾ ئي جوابدار مارجي ويا. پوليس جو چوڻ آهي ته مارجي ويل ۾ حراست مان فرار ٿيندڙ 2 جوابدار پڻ شامل آهن.