تازيون خبرون

Monthly Archives: May 2015

ڪوئٽه: مستونگ ويجهو ٻه مسافر ڪوچون اغوا، هٿيار بندن 20 مغوين کي ماري ڇڏيو

ڪوئٽه (م.ڊ) بلوچستان جي ضلعي مستونگ ۾ دهشتگردن مسافرن سوڌو ٻن بسن کي يرغمال ڪري 20ماڻهن ۾مغوين کي فائرنگ ڪري ماري ڇڏيو.  بلوچستان جي گهرو وزير سرفراز بگٽي مطابق دهشتگردن پشين مان ڪراچي ايندڙ ٻن مسفر بسن کي اغوا ڪيو، جنهن ۾ 20 ڄڻن کي موت جي ننڊ سمهاريو ويو.اهو  دهشتگردي جو واقعو مستونگ جي علائقي کڊ ڪوچا ۾ پيش آيو. سيڪيورٽي فورسز اطلاع ملڻ تي علائقي ۾ پهتي ته دهشتگردن فائرنگ شروع ڪري ڏني جنهن جي نتيجي ۾ 20ماڻهو ٿڏي تي ئي فوت ٿي ويا ۽ 12 ڄڻا زخمي ٿي پيا.فورسز جو مغوين کي بازياب ڪرائڻ لاءِ علائقي ۾ آپريشن هلندڙ آهي ۽ ڊي سي مستونگ به آپريشن ۾ موجود آهي.ٻئي پاسي وزيراعظم نوازشريف مستونگ ۾ بسن جي اغوا ٿيڻ واري واقعي جو ڻوٽيس وٺندي بلوچستان حڪومت کان رپورٽ گهري ورتي آهي.بلوڇستان جي گهرو وزير مطابق دهشتگردن کي سيڪيورٽي فورس جي وردي پاتل هئي.

 

 

وڏي وزير ايس پي صدر۽ ايس ايس يو جي 15 اهلڪارن کي معطل ڪري ڇڏيو

ڪراچي(اسٽاف رپورٽر) سنڌ جي وڏي وزير قائم علي شاهه، ايس پي صدر ۽ ايس پي اسپيشل سيڪيورٽي يونيٽ کي سنڌ هاءِ ڪورٽ کي تحفظ نه ڏيڻ سبب معطل ڪري ڇڏيو. جڏهن ته ڊاڪٽر ذوالفقار مرزا جي پيشي واري ڏينهن منهن ڍڪيل پوليس وارن ميڊيا کي تشدد جو نشانو بڻائي هاءِ ڪورٽ جي توهين ڪئي،  جنهن کان پوءِ سنڌ هاءِ ڪورٽ ان معاملي جو سختي سان نوٽيس ورتو.ڪالهه واري پيشي ۾ سنڌ هاءِ ڪورٽ سنڌ جي وڏي وزير کي نوٽيس موڪليو ته منهن ڍڪيل پوليس وارن خلاف  سخت ڪارروائي ڪئي وڃي.ان معاملي تي اڄ وڏي وزير هڪ ميٽنگ گهرائي جنهن ۾ ايس يو جي، جي 15 اهلڪارن کي معطل ڪري ڇڏيو

 

پاڪستان بيلاروس سان واپارسوڌوسمورن شعبن ۾ ويجها لاڳاپا چاهي ٿو: نواز شريف

اسلام آباد (بيورو) وزيراعظم محمد نواز شريف چيو آهي ته پاڪستان بيلاروس سان واپار، معيشت، دفاع ۽ ثقافت سميت سمورن شعبن ۾ ويجهن لاڳاپن جو خواهشمند آهي. ڪالهه جمعي ڏينهن هتي بيلاروس جي صدر اليگزينڊر  لوڪاشينڪو سان ملاقات ۾ هن چيو ته سندس دورو ٻنهي ملڪن جي وچ ۾ ٺوس سياسي ۽ اقتصادي لاڳاپن کي فروغ وٺرائڻ لاءِ لاڀائتو ثابت ٿيندو. ان کان اڳ وزيراعظم محمد نواز شريف بيلاروس جي صدر جو وزيراعظم هائوس پهچڻ تي شاندار استقبال ڪيو ۽ ساڻس خصوصي ۽ وفدن جي سطح تي ڳالهيون ڪيون جنهن ۾ ٺوس ٻطرفا معاملا شامل هئا. وزيراعظم ٻنهي ملڪن جي وچ ۾ تازي ماضي ۾ وڌندڙ مٽاسٽا تي اطمينان جو اظهار ڪيو ۽ چيو ته ٻطرفن دورن جي مٽاسٽا ۾ وڌيڪ اضافي جي ضرورت آهي. هن چيو ته اسان کي پنهنجي پارليامينٽرينز جي وچ ۾ رابطن جي حوصلا افزائي جي ضرورت آهي ڇو ته انهن جي وچ ۾ باقاعده رابطا ٻنهي ملڪن جي عوام جي وچ ۾ خوشگوار ۽ دوستاڻو ماحول قائم ڪرڻ جي لاءِ وڏا فائديمند آهن. هن چيو ته ٻنهي ملڪن جي وچ ۾ تازو ٻطرفو واپار 60 ملين ڊالر آهي جيڪو اصل واپاري صلاحيت موجب نه آهي. هن چيو ته واپار ۾ وڌيڪ اضافي جي ضرورت آهي اسان کي ٻنهي ملڪن جي لاڳاپيل واپاري ايوانن جي وچ ۾ ويجهي رابطن جي ضرورت آهي جنهن سان ٻطرفي واپار ۽ سيڙپڪاري ۾ اضافو ٿيندو. هن چيو ته ٽيڪسٽائيل، زرعي اوزار، هيوي مشينري، ٽائيلز، فارماسيوٽيڪل، ڊيري پراڊڪٽس ۽ ٽرانسپورٽ جي شعبن ۾ اقتصادي لاڳاپن ۾ اضافي جا وڏا امڪان آهن. وزيراعظم چيو ته پاڪستان بيلاروس سان دفاعي شعبي ۾ پنهنجي تعاون ۾ اضافو چاهي ٿو. هن چيو ته اسان کي تعليم ۽ ثقافت جي شعبن ۾ تعاون جي امڪانن جو جائزو وٺڻ گهرجي. وزيراعظم بيلاروس جي صدر جي والده جي لاڏاڻي تي پڻ تعزيت جو اظهار ڪيو جيڪا ڪجهه ڏينهن اڳ لاڏاڻو ڪري وئي هئي ۽ ان سبب ئي بيلاروس جي صدر جي دوري جي ٻيهر تاريخ مقرر ڪئي وئي. بيلاروس جي صدر جو پاڪستان جو هي پهريون دورو آهي. بيلاروس جي صدر سان گڏ هڪ وڏو وفد دوري تي آيل آهي جنهن ۾ نائب وزيراعظم سيماشڪو ولادي مير، پرڏيهي وزير مڪي ولادي مير، بيلاروس جي صدر جو معاون برليوف ويلري، نيشنل اڪيڊمي آف سائنس جو سربراهه گساڪوف ولادي مير، صنعت وارو وزير ووڪ ويٽالي، زراعت وارو وزير زياٽس ليونڊ، ملٽري انڊسٽري ڪميٽي جو سربراهه گروليو سرگئي شامل هئا. سندس وفد ۾ بيلاروس جي سفير ارمولوچ اندري، مشينري هولڊنگ جي ڊائريڪٽر شاڪوتن اليگزينڊر، بيلاروس چيمبر آف ڪامرس اينڊ انڊسٽري جي ڊائريڪٽر مياتلي ڪوف ميخائل، ريجنل ايگزيڪيوٽو ڪميٽي جو ڊپٽي چيئرمين نيڪرا شيووچ وڪٽر، بيلاروس رشين لائٽ انڊسٽري ڪنسرن جي ڊائريڪٽر ايفيم چڪ نيڪولائي، منسڪ ٽريڪٽر ورڪس جي ڊائريڪٽر ڊوموٽيڪو فيڊل به شامل هئا. وفدن جي سطح تي ڳالهين دوران وزيراعظم نواز شريف جي رهنمائي واپار واري وفاقي وزير انجنيئر خرم دستگير خان، دفاعي پيداوار واري وفاقي وزير رانا تنوير حسين، ناڻي واري وزير محمد اسحاق ڊار، اطلاعات واري وزير پرويز رشيد، قومي سلامتي بابت صلاحڪار سرتاج عزيز، پرڏيهي معاملن بابت خصوصي معاون طارق فاطمي، سيڙپڪاري بورڊ جي چيئرمين مفتاح اسماعيل ۽ پرڏيهي سيڪريٽري اعزاز احمد ڪئي.

 

ن ليگ کي پ پ بچايو، هاڻي ڌانڌلي ٿي ته حڪومت بچي نه سگهندي: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته نون ليگ کي پيپلز پارٽي بچايو هو، جيڪڏهن هاڻي ڌانڌلي ٿي ته حڪومت نه بچي سگهندي ۽ نتيجا آر اوز کي ڀوڳڻا پوندا. گلگت بلتستان جي شهر استور ۾ تقريب کي خطاب ڪندي خورشيد شاهه چيو ته جعلي بيلٽ پيپرز ۽ بوگس ووٽن جي منصوبابندي جا اطلاع مليا آهن. هن چيو ته نون ليگ کي پيپلز پارٽي بچايو هو، جيڪڏهن هاڻي ساڳئي روايت برقرار رکي وئي حڪومت کي ڪير به بچائي نه سگهندو. خورشيد شاهه پاڪ-چين اقتصادي راهداري منصوبي تي ڳالهائيندي چيو ته راهداري منصوبي تي پ پ جي شريڪ چيئرمين آصف زرداري ڳالهين جي شروعات ڪئي هئي، سياسي پارٽين جو اجلاس سٺو سنوڻ آهي. هن چيو ته اقتصادي راهداري منصوبي جو چئني صوبن کي فائدو ملڻ گهرجي، وفاقي حڪومت روٽ بابت نثر ناثي ڪري. خورشيد شاهه وڌيڪ چيو ته بينظير انڪم سپورٽ جا وڌيڪ پيسا گلگلت ۾ خرچ ٿيا آهن، جڏهن ته پيپلز پارٽي گلگلت بلتستان کي سيٽ اپ ۽ نالو ڏنو.

 

عذير بلوچ تي ڪرڙي نظر آهي، کيس ڀڄڻ نه ڏنو ويندو: چوڌري نثار

اسلام آباد (بيورو) اسلام آباد: وفاقي گهرو وزير چوڌري نثار علي خان جو چوڻ آهي ته ايگزيڪٽ واري معاملي جي جاچ تيزي سان هلي رهي آهي، قانوني مدد لاءِ ايف آءِ اي، ايف بي آر  ۽ برطانيا  ڏانهن  خط لکي ڇڏيا آهن، جڏهن ته لياري گينگ وار جي بدنام ڏوهاري عزير بلوچ جي حوالي سان گهرو وزير جو چوڻ هو ته عزير بلوچ ۽ حامد صديقي جو گهيرو تنگ ڪيو ويو آهي، ٻئين ڏوهاري نظر ۾ آهن، اهي  ڪيڏانهن به ڀڄي نٿا سگهن، اسلام آباد جي علائقي چڪ بيلا ۾ خطاب دوران گهرو وزير چوڌرينثار علي خان جو چوڻ هو ته ايگزيڪٽ جي معاملي تي جاچ تيزي سان هلي رهي آهي ۽ ايف آءِ اي قانوني  مدد لاءِ ايف بي آر کي خط لکي ڇڏيو آهي، جڏهن ته ايف آءِ اي انٽرپول سان به رابطي ۾ آهي، پراسيڪيوشن جو معاملو پوءِ ٿيندو.سندس  چوڻ هو ته ايف آءِ اي گڏيل عرب عمارات کي خط لکڻ لاءِ گهرو وزارت کي درخواست ڏني آهي، ۽ ايندڙ  هڪ ٻن ڏينهن ۾ يو اي اي جي اختيارين کي خط لکيو ويندو، ايگزيڪٽ انتظاميه جي خلاف ايف آءِ آر آخري نه آهي، ان حوالي سان ثبوت سامهون اچڻ کان پوءِ وڌيڪ ڪيس به داخل ڪري سگهجن ٿا، جڏهن ته بول جي رجسٽريشن لاءِ صحيح طريقيڪار نه چونڊيو ويو هو، سيڪيورٽي ڪليئرنس لاءِ قانون ۽ ضابطه پورا نه ڪيا ويا هئا، جنهن جي بنياد تي بول  سيڪيورٽي  ڪليئرنس رد ڪئي وئي. سندس چوڻ هو ته عزير بلوچ ۽ حامد صديقي تي اسان جي نظر آهي، انهن  کي ڀڄڻ نه ڏينداسين، عمران فاروق قتل ڪيس جي حوالي سان گهرو وزير چيو ته گرفتار ڏوهاري معظم علي بابت جاچ اثرائتي انداز ۾ اڳتي وڌي رهي آهي، جاچ جي حوالي سان طريقيڪار واضع ڪيو ويو آهي، هن اهم اڳڀرائي ڏانهن اشارو ڏيندي چيو ته ايندڙ ڪجهه هفتن ۾ برطانيا سان سهڪار جي سطح  مٿي هوندي.     سامهون اچي ويندا. گهرو وزير چيو ته ايگزيڪٽ اسڪينڊل جي جاچ شروعاتي مرحلي ۾ آهي. چوڌري نثار چيو ته بول ٽي وي جي حوالي سان سيڪيورٽي ادارن کان ڪليئرنس نه ورتي وئي آهي. چوڌري نثار چيو ته نگران دور ۾ تڪڙ ۾ بول ٽي وي جو لائيسنس جاري ڪيو ويو هو.

 

شرجيل ميمڻ نجي ٽي وي کي 2 ارب روپين جي هرجاڻي جو نوٽيس موڪلي ڇڏيو

ڪراچي (اسٽاف رپورٽر)  سنڌ جي اطلاعات ۽ بلديات واري صوبائي وزير شرجيل انعام ميمڻ ڊان نيوز (ٽي وي چينل) کي سندس خلاف ڪوڙي، بي بنياد ۽ من گھڙي خبر نشر ڪرڻ تي 2 ارب روپين جي هرجاڻي جو نوٽيس جاري ڪري ڇڏيو. 14 ڏينهن اندر اندر جيڪڏهن ڊان نيوز ٽي وي چينل کائنس غير مشروط معافي نه گھري، ته نه فقط ان خلاف دعوه داخل ڪيو ويندو پر ان خلاف ڪيس به داخل ڪيو ويندو. صوبائي وزير شرجيل انعام ميمڻ جي وڪيل ڊان نيوز جي چيف ايگزيڪٽيو آفيسر(سي اي او) کي اُماڻيل نوٽيس ۾ چيو آهي ته سندس موڪل پاڪستان جو قانون پسند، تعليم يافته ۽ معزز شهري هجڻ سان گڏوگڏ سنڌ اسيمبلي ۽ ڪابينا جو معزز ميمبر آهي، نوٽيس ۾ چيو ويو آهي ته ڊان نيوز 29 مئي 2015 تي پنهنجي چينل تي هڪ ڪوڙي ۽ من گھڙي خبر ان جي موڪل شرجيل انعام ميمڻ جي نالي سان نشر ڪئي، جنهن ۾ چيو ويو ته اهلڪارن شرجيل ميمڻ جي پرائيويٽ سيڪريٽري کي گرفتار ڪري ورتو آهي ۽ ان جو وڊيو بيان رڪارڊ ڪيو ويو آهي”۽“ ڳجھن ادارن جا اهلڪار رقم به پاڻ سان کڻي ويا آهن. هيءُ هڪ نهايت غير ذميواراڻو ۽ بي هودا الزام آهي ۽ ان سان نه فقط سندس ڪلائينٽ شرجيل انعام ميمڻ جي ساخ کي نقصان رسيو آهي پر ان خبر سان پيمرا قانون جي به خلاف ورزي ٿي آهي. شرجيل انعام ميمڻ جي وڪيل چيو آهي ته شرجيل انعام ميمڻ جي گھر تي نه ئي ڪنهن قسم جو ڪو ڇاپو لڳو ۽ نه ئي سندس پرائيويٽ سيڪريٽري کي گرفتار ڪيو ويو آهي. شرجيل انعام ميمڻ جي وڪيل جي معرفت ڊان نيوز جي سي اي او کي اُماڻيل نوٽيس ۾ واضع ڪيو ويو آهي ته هو ان ڪوڙي ۽ بي بنياد خبر جي حوالي سان فوري طور تي پنهنجي نيوز چينل تي معزت ڪري، جيڪڏهن 14 ڏينهن اندر اندر ائين نه ڪيو ويو ته 2 ارب روپين جي هرجاڻي جي نوٽيس سان گڏ وگڏ ٻي قانوني ڪارروائي کي به منهن ڏيڻو پوندو جيڪو سندس ڪلائينٽ جو قانوني حق آهي.

 

مهانگائي بم: پهرين جون کان تيل 13رپين تائين مهانگو ٿيڻ جو امڪان

اسلام آباد(بيورو) حڪومت عوام تي هڪ ڀيرو وري مهانگائي بم ڪيرائڻ جو فيصلو ڪيو آهي ،جنهن هيٺ تيل جا اگهه 13 رپين تائين وڌائڻ جو امڪان آهي. آئل اينڊ گئس ريگيوليٽري اٿارٽي(اوگرا) تيل جي اگهن ۾ واڌ جي سمري پيٽروليم واري وزارت ڏانهن اماڻي آهي. ذريعن مطابق اوگرا پيٽرول 6رپيا 19پئساڊيزل 7رپيا91 پئسا، هاءِ آڪٽين 13رپيا62پئسا في ليٽر مهانگو ڪرڻ جي سفارش ڪئي آهي.پيٽروليم شين جي اگهن ۾ واڌ جو آخري فيصلو پيٽروليم واري وزارت کي ڪرڻو آهي جنهن جي منظوري کان پوءِ سڄي ملڪ ۾ پهرين جون کان تيل جا نوان اگهه لاڳو ٿي ويندا.

 

ڊاڪٽر ذوالفقار مرزا گهر واري سميت رينجرز جي سيڪيورٽي ۾ بدين روانو اڄ عدالت ۾ پيش ٿيندو

ڪراچي(اسٽاف رپورٽر) ڊاڪٽر ذوالفقار مرزا  پنهنجي گهر واري سميت رينجرز جي سيڪيورٽي ۾ بدين روانو، اڳوڻي گهرو وزير ذوالفقار مرزا  گهر واري سميت رينجرز جي سيڪيورٽي ۾ بدين لاءِ روانو ٿي ويو. ڊاڪٽر ذوالفقار مرزا بدين جي عدالت ۾ ضمانت کان اڳ گرفتاري لاءِ پيش ٿيندو. ذوالفقار مرزا رينجرز جي سيڪيورٽي ۾ ڪراچي کان بدين لاءِ روانو ٿي ويو. ذوالفقار  مرزا بدين جي عدالت ۾ اڄ پنهنجي  گرفتاري کان اڳ ضمانت  لاءِ پيش ٿيندو. سندس سان گڏ ان جي گهر واري  اسپيڪر قومي اسيمبلي فهميدا مرزا به هئي. ٻئي طرف ذوالفقار مرزا کي ڪراچي کان ٺٽي ۽ پوءِ ٺٽي کان بدين تائين رينجرز جي سيڪيورٽي فراهم هوندي.

 

سعودي عرب جي شهر دمام ۾ مسجد ٻاهران ڌماڪو، 4 ڄڻا مارجي ويا، ڪيترائي زخمي

رياض (مانيٽرنگ ڊيسڪ) سعودي عرب جي شهر دمام ۾ مسجد ٻاهران بم ڌماڪي ۾ 4 ڄڻا مارجي ويا ۽ ڪيترائي زخمي ٿي پيا. پرڏيهي خابرو اداري موجب دمام شهر ۾ جمعي نماز دوران برقعو پهريل آپگهاتي بمبار مسجد جي دروازي آڏو پاڻ کي ڌماڪي سان اڏائي ڇڏيو. ڌماڪي جي نتيجي ۾ 4 ڄڻا مارجي ويا ۽ ڪيترائي زخمي ٿي پيا. امدادي ٽيمن مارجي ويلن جي لاشن ۽ زخمين کي ڀرپاسي واري اسپتال پهچايو جتي ڪجهه زخمين جي حالت نازڪ هئڻ سبب فوتين جو انگ وڌڻ جو خدشو آهي. ياد رهي ته گذريل هفتي پڻ سعودي عرب جي صوبي القطيب ۾ پڻ مسجد اندر بم ڌماڪو ٿيو جنهن ۾ 21 ڄڻا مارجي ويا ۽ ڪيترائي زخمي ٿي پيا هئا.

 

ايگزيڪٽ جي نقلي سرٽيفڪيٽن جي حقيقت اڳيان اچي وئي، اڪائونٽس ضبط

اسلام آباد(بيورو) ايگزيڪٽ جي خلاف نقلي سرٽيفڪيٽ اسڪينڊل جي جاچ ۾ هڪ اهم اڳڀرائي ڏسڻ ۾ آئي آهي. ايف آئي اي نقلي سرٽيفڪيٽ ڇپڻ وارن کي ڳولي ورتو آهي، ايگزيڪٽ آفيسن مان هن وقت تائين هڪ لک نقلي سرٽيفڪيٽ هٿ ڪيا ويا آهن، جڏهن ته ڏوهارين کي ڪجهه ڏينهن ۾ عدالت ۾ پيش ڪيو ويندو. ٻئي پاسي ڪمپني جا سمورا اڪائونٽ ضبط ڪيا ويا آهن. ايف آئي اي ذريعن مطابق ايگزيڪٽ جي مالڪ شعيب شيخ ۽ ٻين ملازمن جي سڃاڻپ تي نقلي سرٽيفڪيٽ ڇپڻ وارن کي ڳوليو ويو آهي، ملازمن اها پڌرائي ڪئي آهي ته  نقلي سرٽيفڪيٽ ڇاپڻ واري مشين مان روزانو 100سرٽيفڪيٽ ڇاپيا ويندا هئا، ملازمن ٻڌايو ته کين نقلي سرٽيفڪيٽن واري ڪاروبار جي ڄاڻ هئي پر وڏي پگهار جي لالچ ۾ ايگزيڪٽ سان لاڳاپيل هئاسين.ايف آئي اي ذريعن مطابق ايگزيڪٽ  آفيس مان ايگزيڪٽ ڪمپني جا رڳو ٻه اسڪول ۽ هڪ يونيورسٽي اصلي آهي.