تازيون خبرون

Monthly Archives: April 2015

سنڌ هاءِ ڪورٽ ڊاڪٽر ذوالفقار مرزا کي سڪيورٽي ڏيڻ بابت فيصلو محفوظ ڪري ڇڏيو

ڪراچي (اسٽاف رپورٽر) سنڌ هاءِ ڪورٽ،اڳوڻي صوبائي گهر وزير ڊاڪٽر ذوالفقار مرزا کي سڪيورٽي ڏيڻ بابت فيصلو محفوظ ڪري ڇڏيو، ڊاڪٽر ذوالفقار مرزا، آصف زرداري ۽ الطاف حسين کي دشمن قرار ڏيندي چيو آهي ته کيس طالبان، لشڪر جهنگوي ۽ ايم ڪيو ايم جي هٿياربند ونگ مان جان جو خطرو آهي. سنڌ هائيڪورٽ ۾ ڊاڪٽر ذوالفقار مرزا کي سڪيورٽي ڏيڻ بابت داخل درخواست جي ٻڌڻي ٿي. ڊاڪٽر ذوالفقار مرزا درخواست ۾ موقف اختيار ڪيو ته سندس گهرواري ۽ هن جي حياتي خطري ۾ آهي،پر عدالتي حڪم باوجود کين سيڪيورٽي ناهي ڏني وئي، جيڪو عمل عدالت جي توهين آهي. ڊاڪٽر ذوالفقار مرزا عدالت کي استدعا ڪئي ته کيس خانگي سڪيورٽي گارڊ فراهم ڪيا وڃن. ان موقعي تي عدالت رمارڪس ڏنا ته اڳوڻي صوبائي گهرو وزير کي خانگي سڪيورٽي نه پر آءِ جي سنڌ کي چئي پوليس جي سڪيورٽي فراهم ڪرائي ويندي. انکانپوءِ عدالت درخواست تي فيصلو محفوظ ڪري ڇڏيو. ٻڌڻي بعد عدالت ٻاهران ميڊيا سان ڳالهائيندي ڊاڪٽر ذوالفقار مرزا چيو ته الطاف حسين ۽آصف علي زرداري هن جا دشمن آهن، کيس طالبان،لشڪري جهنگوي ۽ ايم ڪيو ايم جي هٿياربند ونگ مان جان جو خطرو آهي. هن سواليه انداز ۾ چيو ته کيس سڪيورٽي فراهم نه ڪندڙ سنڌ جا حڪمران ٻڌائن ته ماڊل گرل ايان علي کي چئن سالن کان ڪهڙي بنياد تي سڪيورٽي فراهم ڪئي وئي. ڊاڪٽر ذوالفقار مرزا جو چوڻ هو ته وسيم اختر ٿاڻا وڪڻي سنڌ جي خدمت ڪئي،جڏهن ته پ پ مان نااميد ٿي هن انصاف لاءِ عدالت جو دروازو کڙڪايو آهي. هن الزام مڙهيو ته آءِ جي سنڌ ڪمزور انسان آهي، سندس پٽ حيدرآباد ۾ قبضا ڪري ٿو، جڏهن ته سندس گهرو وزارت جي زماني ۾ آءِ جي غلام حيدر جمالي کيس پيرين پوندو هو. سنڌ جي اڳوڻي گهرو وزير ڊاڪٽر ذوالفقار مرزا وڌيڪ چيو ته ايس ايس پي رائو انوار سنڌين ۽ بلوچن تي ظلم ڪري رهيو آهي،اڳوڻي ڊي رينجرز کيس هٽائڻ لاءِ چيو پر آصف زرداري جي حڪم تي کيس نه هٽايو ويو

 

شاديءَ کان پوءِ منهنجي مشهوري ۾ تمام گھڻي واڌ ٿي آهي: مٿيرا

لاهور (شوبز نيوز) پاڪستان جي ناليواري اداڪارا ۽ ماڊل مٿيرا چيو آهي ته شاديءَ کان پوءِ منهنجي مشهوري ۾ تمام گھڻي واڌ ٿي آهي، مان دلي سڪون لاءِ ماڻهن جي دل کولي مدد ڪندي آهيان. هڪ انٽرويوءَ ۾ هن چيو ته ماڻهن جي اها سوچ بلڪل غلط آهي ته فنڪارن جي شاديءَ کان سندن ڊمانڊ گھٽ ٿي ويندي آهي، مان شاديءَ کان پوءِ اڃا وڌيڪ خوداعتماد ٿي وئي آهيان، جنهن کي منهنجي ضرورت هوندي اهو پاڻ ئي مون کي ڪاسٽ ڪري وٺندو.

 

جيڪولين هڪ ڀيرو ٻيهر پنهنجي ئي ديس جي فلم ۾ ڪم ڪندي

ممبئي (شوبز نيوز) بالي ووڊ اداڪارا جيڪولين فرنينڊس جنهن جو تعلق سريلنڪا سان آهي هڪ ڀيرو ٻيهر پنهنجي ئي ديس جي فلم ۾ ڪم ڪندي. اداڪارا ان کان اڳ فلم ”اڪارڊنگ ٽو ميٿيوز“ ذريعي سريلنڪن فلم انڊسٽريءَ ۾ ڊيبيو ڪري چڪي آهي ۽ هاڻي خبرون آهن ته اداڪارا هڪ ڀيرو ٻيهر ”اڪارڊنگ ٽو ميٿيوز“ جي هدايتڪار چندران رتنم سان ڪم ڪندي. هدايتڪار چندران رتنم جو چوڻ هو ته کيس جيڪولين جي اداڪاري ايتري قدر وڻي وئي آهي جو کيس هڪ ڀيرو ٻيهر کيس پنهنجي ايندڙ فلم جي لاءِ چونڊيو آهي. واضح رهي ته فلم ”اڪارڊنگ ٽو ميٿيوز“ هن سال رليز ڪرڻ جا امڪان آهن ۽ ان جي رليز کان پهريان هدايتڪار جيڪولين کي اڳين فلم جي لاءِ سائن ڪري ورتو آهي.

 

پاڪستان ۾ ڳالهائجندڙ سمورين ٻولين ۾ گانا ڳائڻ چاهيان ٿي: حديقه ڪياني

لاهور(شوبز نيوز) مشهور گلوڪاره حديقه ڪياني چيو آهي ته پاڪستان ۾ ڳالهائجندڙ سمورين ٻولين ۾ گانا ڳائڻ چاهيان ٿي. حديقه انگريزي، پشتو، پنجاب ۽ اردو ٻولين ۾ گانا ڳايا آهن. هن چيو ته هاڻي سنڌي، سرائڪي ۽ ٻين ٻولين ۾ پڻ ڳائڻ جو ارادو آهي.

 

سنيل گواسڪر پريميئر ليگ جي ستين ايڊيشن جي صدر جي طور خدمتن جو 1.90 ڪروڙ انڊين رپيا معاوضو طلب ڪري ورتو

ممبئي (اسپورٽس نيوز) اڳوڻي ڪپتان سنيل گواسڪر گذريل سال انڊيا ۽ يو اي اِي ۾ ٿيل پرڪشش انڊين پريميئر ليگ جي ستين ايڊيشن جي صدر طور خدمتن جو 1.90 ڪروڙ انڊين رپيا معاوضو طلب ڪري ورتو ميڊيا رپورٽ مطابق سپريم ڪورٽ گواسڪر کي بي سي سي آءِ، آءِ پي ايل جو صدر بنائڻ جي هدايت ڪندي حڪم ڏنو هو ته بورڊ کيس ذميواري ادا ڪرڻ جو مناسب معاوضو ادا ڪري ڇو ته هو آءِ پي ايل سيزن دوران پنهنجي ٻين ميڊيا مصروفيتن کان پري رهندو ورڪنگ ڪميٽي ۾ ذريعن مطابق گواسڪر هڪ خط لکي معاوضو گهريو ورڪنگ ڪميٽي جي اجلاس ۾ شامل بي سي سي آءِ جي هڪ سينيئر ميمبر پي ٽي آءِ کي ٻڌايو ته گواسڪر خط ۾ 1.90 ڪروڙ رپيا گهريا آهن.

 

آءِ سي سي پاڪستان ۾ ڪرڪيٽ بحال ڪرڻ لاءِ ڪجهه ناهي ڪيو، پي سي بي اڪيلي سر ڪوششون ڪري رهيو آهي: احسان ماني

لنڊن (اسپورٽس نيوز) انٽرنيشنل ڪرڪيٽ ڪائونسل جي اڳوڻي صدر احسان ماني چيو آهي ته آءِ سي سي پاڪستان ۾ بين الاقوامي ڪرڪيٽ بحال ڪرڻ لاءِ ڪجهه به ناهي ڪيو ۽ جيڪي به ڪوششون ٿي رهيون آهن اهي پاڪستان ڪرڪيٽ بورڊ اڪيلي سر ڪري رهيو آهي بي سي سي سان ڳالهائيندي احسان ماني چيو ته هن اڄ تائين اهڙو ڪوبه سيڪيورٽي پروٽوڪول ناهي پڙهيو جنهن ۾ آءِ سي سي پاڪستان ڪرڪيٽ بورڊ کي چيو هجي ته اوهان ته فلاڻي فاڪس تي ٽڪ ڪيو ته هو اهو سمجهندي ته پاڪستان ۾ انٽرنيشنل ڪرڪيٽ بحال ٿي سگهي ٿي احسان ماني چيو ته آءِ سي سي جيڪو ٽاسڪ فورس قائم ڪيو هو ان به صرف پاڪستان ڪرڪيٽ بورڊ جي انتظامي ڍانچي بابت ڦيرڦار بابت ڪجهه بيان ڏنا هئا ان کان وڌيڪ ڪجهه ناهي ڪيو.

 

ڌيءَ جو فلم ۾ اچڻ جي غلط خبر تي ڀارتي اڳوڻو بيٽسمين سچن ٽنڊوالڪر سخت ڪاوڙجي پيو

ممبئي (اسپورٽس نيوز) ڌيءَ جي فلم ۾ اچڻ جي غلط خبر تي سچن ٽنڊوالڪرسخت ڪاوڙجي پيو ميڊيا رپورٽ مطابق اڳوڻي ڀارتي اسٽار ڪرڪيٽر چيو ته هي بي بنياد ڳالهه آهي ان جو حقيقت سان ڪوبه تعلق نه آهي منهنجي ڌيءَ ساره جو سمورو ڌيان پنهنجي تعليم مڪمل ڪرڻ تي آهي 17 سالن جي ساره ٽنڊوڪلر جي ٻارڙن ۾ سڀ کان وڏي آهي هن چيو ته هن جو ننڊو ڀاءُ ارجن پيءُ جي نقش قدم تي هلندي ڪرڪيٽ ۾ سرگرم آهي واضح رهي ته هن کان اڳ ڀارتي ميڊيا پنهنجي رپورٽ ۾ انڪشاف ڪيو هو ته سچن ٽنڊولڪر جي ڌيءَ ساره فلم اسٽار شاهد ڪپور سان گڏ نئين فلم ۾ جوهر ڏيکاريندي.

 

سچن ٽنڊوالڪر بورڊ کان مشاورتي پينل ۾ شموليت تي پنهنجي ڪردار ۽ ذميوارين جي حوالي سان وڌيڪ تفصيل گهري ورتو

ممبئي (اسپورٽس نيوز) اڳوڻي بيٽسمين سچن ٽنڊوالڪر بورڊ کان مشاورتي پينل ۾ شموليت تي پنهنجي ڪردار ۽ ذميوارين جي حُالي سان وڌيڪ تفصيل گهري ورتو آهي ڀارتي ميڊيا مطابق سچن ٽنڊوالڪر ڄاڻايل تفصيل گهري اميد ڪئي پئي وڃي ته ٽنڊوالڪر سارو گنگولي ۽ راهول ڊيوڊ هڪ اعليٰ سطحي مشاورتي پينل ۾ شامل ٿيندا هي پينل اڳئين هيڊ ڪوچ جو فيصلو ڪندو پينل ۾ شامل ٿيڻ جي صورت ۾ گنگولي هيڊ ڪوچ بڻجڻ جي ڊوڙ کان ٻاهر ٿي ويندو.

 

سنڌ، پيپلز پارٽي ۽ ذوالفقار مرزا جا انڪشاف: عاجز جمالي

آسلامي تاريخ ۾ سڀ کان وڌيڪ حڪمراني جو دور عباسي خلافت يا عربن جو دور سڏيو ويندو آهي، جنهن ۾ سڄي دنيا جي مسلمانن تي حڪمراني ڪئي وئي. ان حڪمراني يا اسلامي بادشاهتن جي زوال جا ٻيا به ڪيترائي سبب هئا، پر پڇاڙي ۾ نااهل مسلم حڪمرانن يا عرب حاڪمن جي حد کان وڌيڪ عياشين، عوام سان ٿيندڙ ناانصافين، عوام تي ڳرا ٽيڪس مڙهڻ، سون جي تعداد ۾ ڪنيزون يا غلام خريد ڪرڻ، مسلمانن جون هڪ ٻئي سان جنگيون ڪرڻ شامل آهي. عرب حاڪمن خلاف سندن ئي مُلڪ ۾ جڏهن به ڪنهن عالم، درويش، صوفي يا الله جي ٻانهي سچ ڳالهايو ته انهيءَ کي ڪوڙو ثابت ڪرڻ لاءِ جتن ڪري، وقت جي مولوين ۽ قاضين (ججن) کي ساڻ ڪري حاڪم انهن سچن ماڻهن خلاف فتوائون ڏياري انهن کي قتل ڪرايو. انهن مٿان طرحين طرحين جا ظلم ڪرايا. تاريخ ٻڌائي ٿي ته اهڙن ظلمن جي نتيجي ۾ مضبوط کان مضبوط بادشاهتون به ڊهي پيون.

مون يارهن سؤ سال اڳ عباسي خلافت ۾ سچ جو آواز بُلند ڪندڙ درويش، صوفي، انالحق جو نعرو هڻندڙ حسين بن منصور حلاج بابت لکيل ڪتاب ٽيون ڀيرو پڙهي انهي کي سمجهڻ جي ڪوشش ڪئي، ته اندازو ٿيو ته سچ ڪڏهن به برداشت ناهي ڪيو ويو. حسين بن منصور حلاج کي سنگسار ڪرڻ، کيس ڪوڙا هڻڻ، سندس جسم کي ڳترا ڳترا ڪرڻ جي سزا به اسلامي خلافت جي دور جي قاضي ڏني هئي. اڄ تاريخ ۾ يزيد وانگر ان خليفي جو نالو نشان ئي ڪونهي، پر انالحق جو نعرو زنده آهي، جيئن حسينيت زنده آهي، يزيديت تي ڦٽڪار آهي.

هر دور جي حاڪمن سان ائين ئي ٿيو، ڇو ته حاڪم جڏهن انڌ جي گهوڙي تي سواري ڪندو آهي ته کيس هر ظلم جائز لڳندو آهي، هو تاثر اهو ڏيندو آهي ته هر ظلم عوام جي ڀلائي ۾ ڪري پيو، پر ظلم کان بيزار مخلوق جڏهن حاڪمن خلاف نڪرندو آهي ته سڀ تاج تخت اُڏامي ويندا آهن.

سب تاج اڇالي جائين گي

سب تخت گرائي جائين گي

بس نام رهيگا الله ڪا

سنڌ ۾ جمهوريت ۽ شهيدن جي نالي تي گذريل ستن سالن کان حڪمراني جو جيڪو دور هلي رهيو آهي، ان بابت سچ لکڻ ۽ ڳالهائڻ به ائين ئي آهي جيئن ڪاريهر تي پير رکيو هجي. حاڪمن لاءِ هر شيءِ مارڪيٽ ۾ وڪامندڙ شيءِ آهي. ڪرپشن جي خزاني مان هو اسان جا آقا بڻجي نه رُڳو اسان جا جسم ۽ ذهن خريد ڪري رهيا آهن پر هو اسان جي ضميرن جي خريداري لاءِ واڪ ڏئي رهيا آهن. اڄ جي دور ۾ ضمير ۽ ذهن به روڊن جي ٺيڪن وانگر ٽينڊرز تي نيلام ٿي رهيا آهن. بُک، بدحالي، ضمير فروشي، غربت، ٻچا وڪڻڻ جو رواج ائين ئي وڌي رهيو آهي، جيئن عباسي خلافت ۾ غلامن جو وڪرو ٿيندو هو.

حاڪم وٽ عوام جو پئسو آهي، جيڪو عوام تي خرچ ڪرڻ بدران پنهنجي محلاتن تي خرچ ڪري رهيو آهي يا چند ذهن چند ضمير، چند درٻاري، ٻولڙيا، ڪجهه ڪوڙا ليڊر خريد ڪري سڄو ڏينهن ڪوڙ جي دهل جي ڊم ڊم ڪرائي عوام کي ڀولڙي وانگر نچائڻ يا خيرات گهرڻ تي مجبور ڪيو پيو وڃي.

اخبارن ۾ اهي تصويرون روز ٿيون ڇپجن ته بينظير انڪم سپورٽ پروگرام جا هزار رپيا وٺڻ لاءِ ڪيئن نه مسڪين عورتون لٺيون کائينديون آهن يا ڀتين تي چڙهي ماتم ڪنديون آهن.

هن سرڪار جي ستن سالن ۾ سڀ بُرا ڪم بينظير ڀُٽو جي نالي تي ٿي رهيا آهن، ڪٿي بينظير بستي آهي ته ڪٿي بينظير اسڪول آهي. ڪٿي بينظير ڪاليج آهي ته ڪٿي بينظير يونيورسٽي، نوابشاهه جو نالو بدلائي بينظيرآباد رکيو ويو. لينڊ مافيا، بلڊر مافيا، ٺيڪيدار مافيا، سڀ جو سڀ ڪرپٽ مافيائون بينظير ڀٽو جو ئي نالو استعمال ڪري رهيون آهن. ڇو ته اهو رواج سرڪاري طور تي بينظير جي پارٽي ۽ وقت جي حاڪمن رائج ڪيو آهي.

پيپلز پارٽي جي سرڪار ۾ پنج سال اڳ سڀني عهدن، وزارتن کي واپس ڪندڙ ڊاڪٽر ذوالفقار مرزا اڄڪلهه پنهنجي پڳ مٽ يار جي خلاف ميدان تي لٿل آهي. سنڌ ۾ ذوالفقار مرزا اهو پهريون ماڻهو آهي جنهن سرڪار جي اهم وزارت ۾ هوندي مُلڪي صدر جو سگهارو دوست هوندي به ايم ڪيو ايم جي خلاف آواز اُٿاريو هو. سندس اها بغاوت اڄ تائين جاري آهي ۽ بغاوت جي سزا به جاري آهي. ڪير نه ٿو ڄاڻي ته ڪمال چانگ، نثار مورائي، پير فريد جان، امير ڀنڀرو سميت هڪ ڊگهي لسٽ آهي، انهن ماڻهن جي ذوالفقار مرزا سان ڇا نسبت رهي. اهو سچ آهي ته جهڙي طرح آصف زرداري ذوالفقار مرزا سان ياري نڀائي کيس اڳتي آندو، تيئن وري مرزا سوين ماڻهن کي اڳيان ڪيو. منهنجي ذاتي راءِ ۾ مرزا جي اها ئي غلطي هُئي، خبر ناهي ته سندس يارن ۾ ڪيترا مڙس ماڻهو هوندا، پر في الحال ائين پيو لڳي ته هڪ هڪ ڪري سندس سمورا يار سرڪار جي کاتي ۾ اچي ويا. ذوالفقار مرزا جون تازيون ڳالهيون هڪ دفعو وري ميڊيا ۾ بحث جو موضوع آهن، پر مرزا کان سندس ڪراچي ۽ بدين جي گهرن تان سيڪيورٽي واپس وٺڻ، پوليس موبائيلون واپس گهرائڻ عجيب ڳالهه هئي.

ڪراچي ۾ اهڙا کوڙ فضول ماڻهو به آهن جن وٽ نه سرڪاري عهدو آهي نه ڪو منصب، نه وزارت نه مشيري، نه آفيسر نه صحافي پر پوءِ به سندس گاڏي اڳيان پوليس موبائيل ٽران ٽران ڪندي ويندي آهي. هڪ وزير موصوف جي سيڪيورٽي قافلي ۾ 10 کان وڌيڪ پوليس جون گاڏيون هونديون آهن. هڪ محترمه کي ته ان کان به وڌيڪ سيڪيورٽيءَ جون گاڏيون آهن. شهري پارٽي جي هر ايم اين اي، ايم پي اي کي پوليس موبائيلون مليل آهن. هاڻي هتي عجيب ڳالهه آهي ته هڪ اڳوڻو گهرو وزير، هڪ ايم اين اي، هڪ ايم پي اي، هڪ اهڙو ماڻهو جنهن سان دشمنيون به تمام گهڻيون هجن، جنهن کي خطرا به هجن، صرف انهيءَ کان سيڪيورٽي واپس ورتي وڃي ته…. حاڪمن جي نيت جو اندازو ٿئي ٿو، سندن ذاتيات نظر اچي رهي آهي. ذوالفقار مرزا جڏهن سڌي ريت پنهنجي قتل جو خدشو ظاهر ڪري ٿو ۽ ڪراچي ۾ بي درديءَ سان مارجي ويل مير مرتضيٰ ڀُٽو جي قتل جي نشاندهي ڪري ٿو ته ڳالهه اڃا به خطرناڪ بڻجي وڃي ٿي. مير مرتضيٰ ڀُٽو جي قتل جي واقعي جي شاهدن ۾ مان شامل آهيان، ان زماني ۾ سڄي واقعي کي رپورٽ ڪيو هو. مير مرتضيٰ به سڌي ريت سنڌ سرڪار جو مخالف هو، هُن به ڪيترائي ڀيرا اهو چيو هو ته سندس حياتي کي ڪجهه به ٿيو ته ان جي ذميواري ادي جي سرڪار (بينظير حڪومت) تي هوندي. اڄ لڳ ڀڳ ساڳي ڳالهه ذوالفقار مرزا پيو ڪري. خدا نه ڪري پر ڏاڍي خوفائتي ڳالهه آهي. مرزا به مير وانگر سڌو سڌو الزام هنيو آهي. مرزا چوي پيو ته سندس گهر ۽ مل تي انور مجيد ذريعي قبضو ڪرايو ويو. هو چوي ٿو کانئس زمينون ڦريون ويون آهن، هو چوي ٿو ته سندس زندگي کي خطرو آهي. هن مُلڪ جي سمورن اهم ادارن کي خط به لکيو آهي. عدالت ۾ به ويو آهي. سرڪار کي به لکيو آهي، پر پوءِ به اڄ انهيءَ ساڳئي ذوالفقار مرزا کي سرڪار پوليس موبائيل ڏيڻ لاءِ تيار ناهي، جنهن جي هٿ ۾ سڄي سنڌ جي پوليس هُئي، سبب صرف اهو ته هو اختلاف رکي ٿو، هو سچ چوي ٿو، هو جهڪي نه ٿو.

مون ڪجهه ڏينهن اڳ اخبارن ۾ سنڌ جي وڏي وزير جو هڪ بيان پڙهيو هو. سيد سڳورو چوي ٿو ته، ”ذوالفقار مرزا جي زال ۽ پُٽ کي پنهنجي پوزيشن واضح ڪرڻي پوندي.“ ڏاڍي عجيب ڳالهه آهي، جڏهن اهو چئو ٿا ته هڪ زال آهي، ٻيو پُٽ آهي، وري سوال ڪجي ته پوزيشن واضح ڪريو. مطلب هو ڇا چون؟ ته اسين زال يا پُٽ ناهيون. سچ ته ڳالهه ٻُڌي به ڪنڌ جهڪي ٿو وڃي. واقعي به سياست ڏاڍي بي رحم شيءِ بڻجي وئي آهي، سياسي اخلاقيات مري وئي آهي يا انهي به سياسي غربت ۾ آپگهات ڪري ڇڏيو آهي، پر حاڪمن لاءِ مڙئي خير آهي. هنن سڀني افعالن منجهان ته ائين پيو لڳي ته سنڌي عوام کي پاڻ پنهنجو دوست ڪرڻو پوندو. هڪ نئين سياسي جماعت تشڪيل ڏيڻي پوندي. سنڌي عوام جي دعويدار جماعت پنهنجي انجام طرف وڃي رهي آهي. سڄي مُلڪ جي ڪينٽونمينٽ جي چونڊن جو نتيجو سامهون آهي. ڪراچي ته مڪمل طور تي سندس هٿن منجهان نڪري چُڪي آهي يا هن پاڻ لکي ڏني آهي، جيڪڏهن بلدياتي چونڊون شفاف ٿيون، تڏهن به ڏسجو، لياري ۾ جلسو ڪرڻ لاءِ سڄي لياري کي سيل ڪيو ويو، لياري بدران سڄي ڪراچي ۽ سنڌ جي مختلف ضلعن منجهان عوام کي گڏ ڪيو ويو. ستن سالن ۾ لياري کي پاڻي نه مليو، هاڻي ٽن مهينن ۾ ڏيڻ جو واعدو ڪيو ويو آهي. لياري کان وٺي لاڙڪاڻي تائين، شهيدن جي پارٽي جا حال پورا ٿي ويا آهن. 4 اپريل جو ڏهاڙو ياد ڪريو جو ڳڙهي خدا بخش ۾ ذوالفقار علي ڀُٽو جي ورسي تي جلسو ڪونه ٿي سگهيو، قصا کوڙ آهن، بس ائين پيو لڳي ته ڪڏهن سنڌ وارن کي ائين نه چوڻو پئجي وڃي ته هئي پيپلز پارٽي به ڪا سنڌ ۾. مسلم ليگ جو مثال سامهون آهي، جيڪا بس اسٽبلشمينٽ جي جماعت رهجي وئي آهي ۽ هڪ درجن کان وڌيڪ مسلم ليگون موجود آهن. سڀ جون سڀ پاڪستان جي خالق جماعت جون دعويدار آهن. ٽي چار پيپلز پارٽيون به نظر اچي رهيون آهن، سڀ جا سڀ ڀُٽو جا پيروڪار سڏائن ٿا. ڏسون ته اڳتي ڇا ٿو ٿئي؟

 

”اٿي هن اونداهيءَ ۾ ٻارڻ ڪو ٻار“: ڊاڪٽر پروين موسيٰ ميمڻ

سنڌيءَ ۾ عام چوڻي آهي ته ”ويٺي شينهن به بک مرن، اٿي گدڙ به ڍؤ“ معنيٰ ته ويٺي، ڏاڍي ماڻهوءَ کي به ڪجهه ڪو نه ملندو پر هٿ پير هڻڻ سان هيڻو به ڪجهه نه ڪجهه حاصل ڪري وٺندو. زندگي مستقل ۽ مسلسل جدوجهد جو نالو هئڻ سان گڏ اڻ مئيءَ محنت جو سبق آهي. جنهن سبب کان ئي نيون نيون ايجادون عمل ۾ آيون آهن، جو هن ترقي جي رفتار تي خود انساني ذهن پڻ حيران آهي. زندگيءَ ۾ محنت ئي ڪاميابيءَ جو معراج ۽ مقصد جو حاصل آهي. ڪوشش سان مشڪل نصب العين به ضرور حاصل ٿيندو آهي. ثابت قدمي، مستقل ۽ اڻ ورچ ڪوشش ڪڏهن به لاحاصل نه ٿيندي آهي. محنت انسانيت جي ڪمال جو اهڃاڻ، هن جهان جو جنسار ۽ سنسار جو سينگار آهي، جنهن سان برپٽ ۾ بازارون ۽ جهنگلن ۾ گاهه ۽ گلزاريون نظر اچن ٿيون. اها محنت انساني چرپر آهي، واندي ويهڻ سان آخرڪار نامرادي نصيب ٿيندي آهي.

انسان پنهنجي اوائلي دؤر کان سبق سکي ۽ سوچي ته هڪ معمولي ڦيٿي ٺاهڻ وارو انسان جنهن جي کاڌي جي ابتدا وڻن جي پنن سان ٿي، جنهن جي رهائش جبلن جي غارن کان شروع ٿي. اڄ هو اڀ ڇهندڙ عمارتن جو مالڪ ۽ مستقل و مسلسل نين ايجادن جي ڪوششن ۾ ڪوشان آهي.

تتيءَ ٿڌيءَ ڪاهه، ڪانهي ويل وهڻ جي،

متان ٿيئي اونداهه، پير نه لهين پرينءَ جو.

اڄ جو انسان ڀٽ ڌڻيءَ جي مٿئين بيت تي عمل پيرا آهي. هو ڄاڻي ٿو ته زندگي محدود آهي ۽ کيس لامحدود ڪري ڪامياب ٿيڻو آهي ۽ اهو تڏهن ئي ممڪن آهي، جڏهن هو حرڪت ۾ هجي. انهيءَ ڪري چوندا آهن ”حرڪت ۾ برڪت آهي.“ جيڪو حرڪت ۾ هوندو، ڪڏهن ڏکيو ڏينهن نه ڏسندو. الله تعاليٰ کي به اهو عمل، جو  مسلسل ۽ مستقل ڪيو وڃي، وڌيڪ پسند آهي. بنسبت انهيءَ عمل جي جيڪو ڪڏهن ڪڏهن ڪجي. عبادت مان ئي مثال وٺون. علم جي نعمت کي ئي ڏسون، انهن کي مستقل حاصل ڪرڻ جي ڪوشش ئي اُڪاري پار ٿي ڪري.

هن دنيا ۾ جيئڻ جي جياپي لاءِ اسين ان جا محتاج آهيون. انهيءَ ڪري ئي چوندا آهن ته ”اَنَ آهي ته ايمان آهي.“ سنسار جي سڄي ڊوڙ ۽ ڪوششون رزق جي ڳولها لاءِ آهن. بک ته بدحالي، هيڻائي ۽ نيستي آهي. اڪثر ڏٺو ويو آهي ته بک جي ڪري ڪڌا ڪرتوت به عمل ۾ اچن ٿا. اها به چوڻي آهي ته ”بک بڇڙو ٽول داناهه ديوانا ڪري.“ بک ۾ نيڪن ۽ ڏاهن کان به سمجهه موڪلائي ويندي آهي ۽ هو غلط ڪمن جا مرتڪب ٿي ويندا آهن. صرف بدحالي ۽ بک جي ڪري، معنيٰ ته ان ايمان جي سلامتيءَ جي نشاني آهي ۽ انهيءَ جي لاءِ ڪوشش، جستجو ۽ محنت جي ضرورت آهي.

رب پاڪ هر شيءِ تي قادر ۽ رزاق آهي. ”ماڪوڙيءَ کي ڪِڻ ۽ هاٿيءَ کي مڻ“ ڏيندڙ آهي. سندس قدرت کان عبث ڪونهي ته هو گهر ويٺي انسان کي رزق نه ڏئي. آسمان مان ”من و سلويٰ“ ”آخر ڪنهن لاٿو“ اهو رب رحيم هر شيءِ تي قادر هئڻ جي باوجود، انسان کي رزق آسمان مان ڇو نٿو موڪلي؟ زمين تي مهيا ڇو ٿو ڪري؟ سڄي جڳ کي خلقيندڙ پالڻهار وٽ ته ڪنهن شيءِ جي کوٽ ناهي، هو چاهي ته جبلَ ان جا ٺاهي، ماکيءَ ۽ کير جون نهرون جاري ڪري پر هو چاهي ٿو ته جيئن سندس قدرت جي ڪارسازي هلندڙ ۽ جاري ساري آهي، تيئن انسان به محنت ۾ مشغول رهي ۽ محنت جي عظمت سان سلطاني سهاڳ ماڻي.

جدوجهد، چرپر ۽ ڪوششن ۾ جيڪو اهو جذبو ڪارفرما آهي سو آهي دل جي مضبوطيءَ جو، جيئن:

”سهسين سائر ٻوڙيون، منڌ ٻوڙيو مهراڻ“

ڪڏهن ڪڏهن طاقتور انسان به مقصدن ۾ حائل رڪاوٽن تي ڊڄي ارادن کان هٽي پري ٿي ويندا آهن، پر ڪي ناتوان به سهڻيءَ وانگيان ارادي جا اٽل هئڻ سان نيٺ وڃي توڙ رسندا آهن. اهڙيءَ ريت مشڪلاتون خود ئي حل ٿي ۽ رڪاوٽون راهه مان هٽي وينديون آهن. انهيءَ ڪري مشڪل ۽ مهل محنت جو مرڪ آهي ۽ محنت ۾ ئي عظمت آهي. حيلي سان وسيلو پيدا ٿيندو ۽ ڌڻي ئي واهر ڪندو آهي. انهيءَ تي شاهه سائين فرمائي ٿو ته:

مَ رُو، رڙ، مَ ڪي هنجون هار،

اٿي هن اونداهيءَ ۾ ٻارڻ ڪو ٻار.

آڙ جي هن آزار ۾، حيلا ڪر هزار،

ته پاڻيهي پالڻهار، واهر ڪنديئي وچ ۾.

هٿ پير هڻڻ سان قومون ويل وقت ورائي اوج ۽ ڪمال حاصل ڪنديون آهن. ٻي مهاڀاري لڙائيءَ جپان ۽ جرمنيءَ ۾ وڏي تباهي آندي پر انهن قومن کي صد آفرين آهي جو هو صرف ماضيءَ جي شان جو سوچي اڪتفا ڪري ڪونه ويٺا. پنهنجي هيڻي حال جو احساس ڪري مستقبل جي ايتري ته زبردست پلاننگ ڪيائون جو شاندار صنعتي ۽ زرعي ترقي حاصل ڪري، اڄ اهي ملڪن دنيا جي ترقي يافته ملڪن ۾ شمار ٿين ٿا. اسان کي انهيءَ مان سبق حاصل ڪرڻ گهرجي. اسين عظيم تهذيب يافته خطن جا والي ۽ وارث آهيون، جنهن جا قديم آثار شاهد آهن پر هاڻي اسان جي عظمت ماضيءَ کي مانائتو بيان ڪرڻ ۾ نه پر حال کي مضبوط بنائي شاندار مستقبل لاءِ اڳيان وڌڻ ۾ آهي، جنهن لاءِ شرط صرف محنت جو سچو جذبو آهي.

انهيءَ جذبي جي سنڌي قوم کي سخت ضرورت آهي. شاندار ماضي انهيءَ جي ضمانت ڪانهي ته اسان جو مستقبل به شاندار هوندو. مستقبل اسان جي حال سان ٿو ٺهي ۽ حال کي مضبوط بنائڻ ۽ اڳيان جو سوچڻ ۽ رٿون رٿڻ اسان جو فرض آهي. وقت ۽ وير ڪنهن جو به انتظار نه ڪندا آهن. وقت هلندڙ شيءِ آهي جنهن کي روڪي نٿو سگهجي. ائين نه ٿئي ته وقت کي اسين واريءَ وانگر هٿن جي وٿين مان وڃائي ويهون ۽ ترقي پذير قوم سڏايون. اڃا وقت ويو نه آهي ۽ سجاڳي ضروري آهي. اچو ته گڏجي عهد ڪريون. اسان کي عملي طور محنت ڪري، پنهنجي ۽ پنهنجيءَ ايندڙ نسل لاءِ جدوجهد ڪري ڪاميابي حاصل ڪرڻي آهي. تقدير کي ڏوهه ڏيڻ بجاءِ تدبير تي ڀاڙڻو آهي.