تازيون خبرون

Daily Archives: April 20, 2015

ويسٽ انڊيز ۽ انگلينڊ وچ ۾ ٻين ٽيسٽ (سڀاڻي) کان شروع ٿيندي

سينٽ جارجز (اسپورٽس نيوز) ويسٽ انڊيز ۽ انگلينڊ جي ڪرڪيٽ ٽيمن وچ ۾ 3 ٽيسٽ ميچن تي ٻڌل سيريز جي ٻين ٽيسٽ (سڀاڻي) اڱاري تي سينٽ جارجز ۾ شروع ٿيندي، ٻنهي ٽيمن وچ ۾ اينٽيگا ۾ کيڏيل سيريز جي پهرين ٽيسٽ ميچ ڊرا ٿي وئي هئي.

 

قومي سيلنگ ٽيم نيشنز ڪپ ڪواليفائر ۾ شرڪت لاءِ اڄ بحرين رواني ٿيندي

اسلام آباد (اسپورٽس نيوز) 6 ميمبرن تي ٻڌل سيلنگ ٽيم نيشنز ڪپ ڪواليفائر ۾ شرڪت لاءِ (اڄ)  سومر تي بحرين رواني ٿيندي، ڪوالفائر ٽورنامينٽ 24 اپريل کان شروع ٿيندي، پاڪستان ان کان اڳ 2011ع ۾ ٿيل نيشنز سيلنگ ڪپ لاءِ ڪواليفاءِ ڪيو هو، قومي ٽيم عبدالحميد، مزمل حسن، محمد اڪرم ۽ قاسم تي ٻڌل آهي جڏهن ته خالد حسين مينيجر طور ٽيم سان گڏ هوندو، سيلنگ اسٽار ۽ انٽرنيشنل ميڊل ونر محمد اڪرم چيو آهي ته سمورا سيلرز باصلاحيت آهن ۽ مون کي پورو يقين آهي ته ٽيم انٽرنيشنل سيلنگ فيڊريشن نيشنز ڪپ ۾ جڳهه ٺاهيندي، هن چيو ته سيلرز ايونٽ لاءِ ڀرپور تياري ڪئي آهي ۽ اميد آهي ته ٽيم بهترين نتيجن سان واپس وطن موٽندي.

 

يمن مسئلي تي پاڪستان جو يوٽرن : بادل ملاح

يمن ۾ جنگ اڃا بند ناهي ٿي، سعودي عرب اڃا به پاڪستان کان گهُريل دفاعي مدد جو منتظر آهي، اها ڳالهه واضح آهي ته جيئن ئي سعودي عرب ۾ بادشاهي جي تخت تي تبديل آئي ته ان کان ترت ئي پوءِ يمن جي مسئلي ڪَرُ کنيو، سعودي عرب پاران پاڪستان کي فوج گهرڻ کانپوءِ پارليامينٽ جو گڏيل اجلاس گهرائي ان حوالي سان قرارداد پاس ڪئي وئي، مطلب ته حڪمران اهو ڄاڻين ٿا ته جيڪڏهن سعودي عرب جي پارلياماني راءِ کانسواءِ مدد ڪئي وئي ته ملڪ ۾ حالتون خراب ٿي وينديون، اتي اهو سوال به اڀري ٿو ته ڇا يمن سانحو پاڪستان ۽ ڪراچي سميت سندس ٻين شهرن تي ڪي منفي اثر ڇڏيندو؟ جيڪڏهن اثر ڇڏيندو ته ڪنهن ۽ ڪهڙي حد تائين ڇڏيندو؟ جيڪڏهن پاڪستاني حڪمرانن ۽سياستدانن جي بيانن ۽ حالتن کي سامهون رکنداسين ته اهو اندازو ٿيندو ته يمن سانحي جي اثرن بجاءِ مقامي 7 قومي حالتون وڌيڪ اهميت اختيار ڪنديون وڃن پيون. اهي ڪيئن؟ سنڌ جي وزير منظور حسين وساڻ ڀٽو جي گادي ۽ ان جي بااختيار گادي نشين جو ويجھي ۾ ويجھو ساٿي آهي، هن 2 اپريل تي چيو هو ته هي هڪ مهينو تمام اهم ۽ ڪافي آهي، هن اهم مهيني ۾ ڪي ماڻهو جيل ويندا ته ڪي وري ملڪ کان ئي ٻاهر هليا ويندا، ڪن ماڻهن مان هن جي مراد عام ماڻهو نه بلڪه خاص ماڻهو هئا، سوال اهو آهي ته اهي خاص ماڻهو ڪهڙا آهن؟

پاڪ فوج جي سربراهه جنرل راحيل شريف 28 مارچ تي پنهنجي فوجي جوانن کي خطاب ڪندي چيو هو ته ”هڪ مضبوط قوم جي لاءِ جسماني، ذهني ۽ سماجي صحت تمام گھڻي ضرروري آهي،“ هاڻي اهي ڪهڙا ماڻهو آهن، جن جي ذهني صحت قوم کي مضبوط بڻائڻ ۾ سڀ کان وڏي رنڊڪ بڻيل آهن؟ ۽ سماجي صحت به سڀ کان وڌيڪ خراب آهي، پر اها ڇو خراب آهي؟ ڇا جنرل راحيل شريف پنهنجي فوجي جوانن کي، انهيءَ سماجي خرابيءَ جي اصلاح ۽ ضرورت ته نه ٻڌائي رهيو هو؟ انهيءَ ئي خطاب ۾ هن اهو به ٻڌايو هو ته دهشتگردي کي ختم ڪرڻ جي لاءِ آخري حد تائين به وڃڻو پيو ته وينداسين. انهيءَ ڏينهن ماڊل ايان علي ڪسٽم عدالت ۾ اهو بيان ڏنو هو ته لکين ڊالرز، جيڪي هوءَ ملڪ کان ٻاهر کڻي وڃي رهي هئي، اها هن جي پنهنجي آهي، پر ڪسٽم انٽيليجنس اها رپورٽ ڏني هئي ته هڪ سال جي مدي ۾ ايان علي نه ئي ڪا ملڪيت وڪرو ڪئي آهي ۽ نه ئي وري هن ڪو ٽئڪس ادا ڪيو آهي، هوءَ 41 ڀيرا ملڪ کان ٻاهر وڃي چڪي آهي. هوءَ ڪهڙي مشن تي پاڪستان کان ٻاهر ويئي آهي؟ ڪنهن جي خدمت سان هن وٽ ايتري ڪروڙن جي رقم آئي؟ ان حوالي سان تفصيل ڪسٽم وارن ۽ ٻين ادارن جمع ڪرائي ورتا آهن، اوهان اهو به پڙهي چڪا هوندئو ته سنڌ حڪومت درخواست ڪئي هئي ته ايان علي جي ميزباني جو شرف ان کي بخشيو وڃي.

پهرين اپريل تي اهو به پتو پيو ته اڳوڻي صدر جو هڪڙو تمام مک ساٿي اهم ادارن کي اهم ترين معلومات ڏيندو ڦرندو رهي ٿو.   اهو پنهنجي لاءِ ميڙون منٿون ڪري رهيو آهي، پر انهن مان هن جي ڪنهن به ميڙ منٿ تي ڌيان ناهي ڏنو. پهرين اپريل تي اڳوڻي صدر آصف علي زرداري جي ڪراچي واري بلاول هائوس جي روڊن ۽ قبضي هيٺ آيل ملڪيتن مٿاڻ تعمير ڪيل ڀتيون وڏي مشينري جي ذريعي ٽوڙيون ويون ۽ ستن سالن کان بعد بلاول هائوس جي اڳيان بيريئرز ۽ رنڊڪون هٽايون ويون آهن. اها ڳري مشينري ڪنهن آندي هئي؟  چيو ته اهو ويو هو ته بلديا عظمي ڪراچي جو عملو مشينري کڻي آيو هو. بلديا عملي جي ايڏي جرئت؟ 14 مارچ تي اڳوڻي صدر آصف علي زرداري پنهنجي قائم ۽ دائم وڏي وزير کي گھرائي پڇيو هو ته بلديا عظمي جون حد دخليون هٽائڻ واري مشينري مٿان ڪنهن قبضو ڪري ڇڏيو هو ۽ شاهه جي ٻڌائڻ کان پوءِ خبر هلائي ويئي هئي؟ آصف علي زرداريءَ قائم علي شاهه کي گھرائي هدايت ڪئي هئي ته بلاول هائوس جي اڳيان رنڊڪون هٽايون وڃن، ستن سالن بعد هن کي پنهنجي محل جي چوگرد رنڊڪن جو علم پيو هو؟ ايترو باخبر ۽ سڀني تي ڀاري آصف علي زرداري؟ رحمان ملڪ 29 مارچ تي آصف علي زرداري جن جو هڪڙو بيان پريس ڪانفرنس ۾ پڙهي ٻڌايو هو، جنهن ۾ هن چيو هو ته پاڪستان پيپلزپارٽي سعودي عرب سان ڪلهو ڪلهي ۾ ملائي بيٺي آهي ۽ يمن ۾ باغين جي خلاف سعودي آپريشن جي مڪمل طور تي حمايت ڪري ٿي. پهرين اپريل تي پنهنجي ئي گھرايل مخالف ڌر جي اجلاس بعد هن يمن مسئلي تي آل پارٽيز ڪانفرنس ۽ پارليامينٽ جو گڏيل اجلاس گھرائڻ جو مطالبو ڪندي چيو هو ته ڪنهن هڪ فرد کي فيصلو ڪرڻ جو اختيار ناهي. ڇو نه آهي ڪنهن فرد واحد يعني وزير اعظم نواز شريف کي سعودي عرب فوج موڪلڻ جو اختيار مليل آهي، ڇو ته هن جي فيصلي سان آصف علي زرداري کي ڪو به ڪريڊٽ نه ملندو. اصل ۾ يمن جي بحران جي معاملي ۾ آصف علي زرداريءَ جيڪو يو ٽرن ورتو آهي، ان جو سڀ کان وڏو ڪارڻ ڪريڊٽ ملڻ ئي آهي. ڇو ته آصف علي زرداري جن بذات خود اهو ڪريڊٽ حاصل ڪرڻ جا خواهشمند آهن. سڀني کي خبر آهي ته دبئي ۾ هن جي به ملڪيت آهي، اتي هن جو به ڪاروبار هلندڙ آهي، اسفنديار ولي ۽ ان جي ڀاڻج جو به ۽ ايان علي اڪثر قطر ۽ دبئي به ويندي رهي آهي. يمن معاملي ۾ سمورا عرب ملڪ ۽ رياستون متحد آهن، پوءِ ڇا ٿو ڪري سگھي ڪو به پاڪستاني سياستدان ۽ حڪمران، عرب ملڪن ۽ رياستن کي ناراض نٿو ڪري سگهي. پارليامينٽ جي گڏيل اجلاس ۾ به انهن رياستن پنهنجي خدمت، جذبو ۽ ڪارڪردگي ڏيکاري. جيڪا سڀني جي ڪاروباري مجبوري آهي. صدر مملڪت انهيءَ معاملي ۾ پارليامينٽ جو گڏيل اجلاس گھرايو، يمن ۾ جنگ جاري آهي، اتان جي حوثي آبادي ۽ صدر هادي جي وچ ۾ ۽ ٻئي فريق عرب آهن. ايران حوثي باغين جي حمايت ۾ چيلهه ڇڪي ٻڌي ڇڏي آهي ۽ ايٽمي جهيڙي تي ايران جو آمريڪا سان مفاهمتي معاهدو ٿي چڪو آهي، ايراني صدر انهيءَ معاهدي کي ٽي اپريل تي قومي يادگار قرار ڏنو هو. انهيءَ ڏانهن وزير اعظم ميان محمد نواز شريف ترڪي جي دوري ويل هو ۽ اتي يمن معاملي تي ترڪي حڪمرانن کان مشورا وٺي رهيو هو، ته هن جھيڙي کي ڪيئن ٿڌو ڪيو وڃي، ترڪي ۽ پاڪستان عرب ليگ جا رڪن ناهن ۽ عرب ليگ ۾ شامل اڪثر عرب ملڪ حوثي باغين جي خلاف متحد ٿي چڪا آهن، نواز شريف انهيءَ اتحاد جي حوالي سان سعودي عرب جي سالميت جي تحفظ جي لاءِ فوج موڪلڻ جو اعلان ته ڪري سگھي ٿو، پر اڪيلي سر ڪو به ڪجھ به ڪري نه ٿو سگھي، انهيءَ حوالي سان هن جو ترڪي وڃڻ ئي مناسب قدم هو، پر ان جا اثر ڪهڙا نڪرندا؟

ڇا ترڪي ۽ پاڪستان ايران کي مفاهمتي منصوبي ۾ شامل ڪري سگھندا؟ ظاهري طور تي ته تمام گھڻو مشڪل ۽ ڏکيو آهي، پاڪستان ۽ ڪراچي مٿان يمن سانحي جا ڪي منفي اثر يا مثبت اثرن جو دارومدار انهيءَ فيصلي تي آهي ۽ پاڪستان جي اندروني استحڪام ۽ فوجي قيادت جي عزم ۽ ارادن تي به آهي. جيڪو ملڪ ۽ قوم جي مضبوطيءَ جي لاءِ جسماني، ذهني ء۽ سماجي صحت کي ضروري قرار ڏيڻ لڳي آهي، اها ڪراچي ۾ امن لاءِ پرعزم آهي، جيل ۾ ڪير ڪير ويندو؟ ۽ ٻاهر ڪير ڪير رهندو؟ ڏسڻ ۽ ٻڌڻ ۾ اهو اچي پيو ته وارو سڀني جو ايندو.

 

چين جي ترقيءَ ۾ دور انديش قيادت جو ڪردار : ڊاڪٽر مويانگ پينگ

چين ترقيءَ جون منزلون طئي ڪندي اڄ جنهن سطح تي پهتو آهي، سو ڪنهن شارٽ ڪٽ نه پر چيني قيادت جي دور رس پاليسين جو ئي نتيجو آهي. خاص ڪري چين جي موجوده صدر زي جن پنگ جيڪو ”جامع چار نقاطي“ پروگرام متعارف ڪرايو آهي، تنهن ته چين جي ترقيءَ کي چار چنڊ لڳائي  ڇڏيا آهن. هن جامع پروگرام جو بنيادي مقصد اهڙي وچٿري خوشحال معاشري کي جنم ڏيڻ آهي، جيڪو ترقيءَ جون راهون طئي ڪندو اڳتي وڌندو رهي. هن جامع چار نقاطي پروگرام ۾ وچٿري خوشحال معاشري جي قيام سان گڏوگڏ سڌارن وارو عمل تيز ڪرڻ، قانون جي بالادستيءَ کي پختو بڻائڻ توڙي تنظيمي نظم و ضبط کي ويتر مضبوط بڻائڻ وارا نقطا به شامل آهن. ڪميونسٽ پارٽي آف چائنا جي ارڙهين قومي ڪانگريس يا 18 هين سينٽرل ڪميٽيءَ جي ابتدائي نشستن جي گرائونڊ ورڪ کانسواءِ هن چار نقاطي جامع پروگرام کانسواءِ ٻي ڪا وڏي نظرياتي اڳڀرائي نظر نه ٿي اچي. هاڻي ته عامُ چيني شهري به سياسي نظريي ۽ ملڪي حقيقت وچ ۾ لاڳاپي کي آسانيءَ سان سمجھي سگهي ٿو. چين جي موجوده قيادت خاص ڪري چيني صدر زي جن پنگ ملڪي معيشت کي به نئون رخ ڏنو آهي. 2014ع ۾ نومبر جي وچ ڌاري چين جي گاديءَ واري هنڌ بيجنگ ۾ ٿيل اجلاس ۾ صدر زي جن پنگ نئين معاشي معمول کي ڪجهه هن طرح بيان ڪيو هو”خطرناڪ ۽ تڙ تڪڙ واري معاشي ترقيءَ کان وچٿري ۽ تيز رفتار ترقيءَ  ڏانهن وِک ذريعي ملڪ جي معاشي ڍانچي جي بهتريءَ ڏانهن مسلسل اڳڀرائي سان ئي مقرر هدف ماڻي سگهجن ٿا. گڏوگڏ سيڙپ تي ڀاڙيندڙ معيشت بجاءِ نت نئين ۽ ترقيءَ  جي نوعيت واري معيشت ڏانهن وڌڻ ئي اسان جو مکيه مقصد آهي.

نئين معمول واري پروگرام تحت اڳڀرائي: پنج هزار  سال قديم تاريخ ۽ تقريب هڪ ارب 30 ڪروڙ آبادي رکندڙ هن ملڪ آخرڪار پنهنجو پاڻ کي عالمي صورتحال جي مرڪز منجھان پٺتي ڪيو آهي ۽ گذريل هڪ ڏهاڪي ۾ ٻيڻي معاشي ترقي به ڏسي چڪو آهي. جيتوڻيڪ هيءُ ته سوشلزم جو ابتدائي مرحلو آهي ۽ ايندڙ ڳچ عرصي تائين به ائين ئي رهڻو آهي، ڇو ته ان جي في ڪَس قومي ترقيءَ جي شرح عالمي طرح سئو نمبر تي آهي. حالانڪه ان جي معيشت کي تازو ئي دنيا جو ٻيو نمبر معيشت هئڻ جو اعزاز به مليو آهي، ڏٺو وڃي ته ترقي چين جو مکيه ۽ اهم معاملو رهيو آهي. چين علائقائي ۽ عالمي سطح تي ٻين خطن ۽ ملڪن سان پاڻ کي ڳنڍي رکڻ لاءِ کوڙ سارا منصوبا شروع ڪيا آهن، جنهن ۾ سلڪ روڊ معاشي بيلٽ ۽ 21 هين صدي ميري ٽائيم سلڪ روڊ وارا منصوبا قابل ذڪر آهن.

ايشيائي بحرالقاهل سان چين کي ڳنڍي رکڻ جو خواب: چين جو خواب پاڻ کي دنيا کان الڳ ٿلڳ رکڻ ناهي، چين جي قيادت عالمي برادريءَ سان ٻنهي لاڳاپن کي هٿي وٺرائڻ لاءِ اهم قدم پئي کنيا آهن. گذريل ڪجهه سالن ۾ صدر زي جنگ پنگ تقريبن 30 ملڪن جي سربراهن کي چين دعوت ڏئي گهرايو آهي، جن جو تعلق دنيا جي پنجن کنڊن سان هو، ڏٺو وڃي ته چين جي ترقيءَ وارو خواب ايشيا بحرالڪاهل جي ترقيءَ جو خواب آهي، چين جي سفارتڪاري لاءِ ايشيا بحرالڪاهل وارو خطو وڏي اهميت رکي ٿو.

ايڪيهين صدي وارو ميري ٽائيم سلڪ روڊ: لڳ ڀڳ 2000 سال اڳ ميري ٽائيم سلڪ روڊ چين جي ڏکڻ-اوڀر سامونڊي پٽيءَ کان شروع ٿيو، جيڪو ڏکڻ اوڀر ايشيا، آفريڪا توڙي يورپ جي سمنڊ ۽ ساحلن تائين پکڙجندو ويو. هيءَ واپاري راهداري اوڀر ۽ اولهه کي پاڻ ۾ ڳنڍي ٿي، جنهن جي نتيجي ۾ وکرن جي مٽا سٽا توڙي هن راهداريءَ جي رستي ۾ ايندڙ ملڪن جي ماڻهن ۽ ثقافتن جي مٽا سٽا، اچ وڃ ۽ ڏيتي ليتيءَ کي هٿي وٺرائي آهي. چين جي صدر 2013ع ۾ تجويز ڏني هئي ته چين  هن قديم راهداريءَ سان ڳنڍيل ملڪن کي گڏجي ايڪيهين صديءَ لاءِ ميري ٽائيم سلڪ روڊ تعمير ڪرڻو ۽ ان سان پاڻ کي ڳنڍڻو پوندو. هن خيال جو مقصد باهمي سياسي اعتماد وڌائڻ، ماڻهن جي هڪٻئي ڏانهن اچ وڃ جي ذريعي ثقافت کي هٿي وٺرائڻ توڙي گڏيل ترقي ۽ علائقائي تعاون کي وڌائڻ آهي. ايڪيهين صديءَ واري ميري ٽائيم سلڪ روڊ جو اهم حصو پاڪ-چين معاشي راهداري اهڙي پُلِ ثابت ٿيندي جيڪا چين، پاڪستان ۽ ٻين ملڪن کي پاڻ ۾ ڳنڍيندي، نه رڳو پاڻ ۾ ڳنڍيندي پر عوام لاءِ فائديمند ثابت ٿيندي ۽ خطي ۽ دنيا جي امن ۽ ترقيءَ لاءِ به مددگار ثابت ٿيندي.  24 آڪٽوبر 2014 تي دنيا جي ايڪيهه ملڪن چين جي راڄڌاني بيجنگ ۾ ايشين انفرا اسٽرڪچر ڊولپمينٽ بينڪ (اي آءِ آءِ بي) قائم ڪرڻ لاءِ مفاهمت جي هڪ يادداشتنامي  تي صحيحون ڪيون هيون. هن معاهدي جو مقصد هن خطي ۽ راهداريءَ وارن ملڪن ۾ بنيادي ڍانچي جي تعمير ۾ مدد فراهم ڪرڻ هو، جن ملڪن مفاهمت جي اهڙي يادداشتنامي تي صحيحون ڪيون هيون تن ۾ بنگلاديش، برونائي، ڪمبوڊيا، چين، ڀارت، قازقستان، ڪوويت، لاتوس، ملائيشيا، منگوليا، برما، نيپال، اومان، پاڪستان، فلپائن، قطر، سنگاپور، سري لنڪا، ٿائيلينڊ، ازبڪستان ۽ ويٽنام شامل آهن.

پاڙيسري ملڪن سان چين جي سفارتڪاري: ٻن صدين جي مقصدن کي سمجھڻ خاطر پاڙيسري ملڪن سان سٺي سفارتڪاري وقت جي اهم ضرورت آهي، چين کي پنهنجي پاڙيسري ملڪن سان سفارتڪاريءَ کي هٿي وٺرائڻ لاءِ ڪم ڪرڻ جي ضرورت آهي. چين ۽ ان جي پاڙيسري ملڪن ۾ وڌڻ ويجھڻ ۽ ترقي ڪرڻ جي وڏي صلاحيت موجود آهي. سو چين عالمي ۽ علائقائي سطح تي سفارتي لاڳاپن کي هٿي وٺرائڻ ۽ خطي ۽ دنيا توڙي پنهنجي معاشي ترقي لاءِ پتوڙي رهيو آهي. چين عالمي معيشت کي هٿي وٺرائڻ ۾ به اهم ڪردار ادا ڪيو آهي.

(ليکڪ: ڪراچيءَ چيني قونصليٽ ۾ وائيس ڪائونسلر جنرل آهي)

 

پاڻي مسئلو…………

ا67سالن پڄاڻان سنڌي ماڻهو ويچاري ٿو ته آزاديءَ واري آسري تي کانئس ڇا ڇا ڦُريو ويو آهي ته کيس سکڻي پانڌ سواءِ وٽس باقي ڪجهه بچيل نظر نه ٿو اچي. تاريخ، تمدن، ٻولي، ثقافت توڙي وسيلن جي جهڙيءَ ريت انهيءَ سڄي عرصي دوران ڀيل ٿي آهي، تنهن جو مثال ماضيءَ جي سمورين ڪاهُن دؤران نه ٿو ملي. حالت هيءَ آهي جو ماڻهو پنهنجي ئي ڌرتيءَ تي بي وطنو بڻجي ويو آهي، نه ته شهر انهن جي هٿ وَس آهن نه وري حالتون! سنڌ جا ماڻهو ڪيترو ئي چڱو چاهيندا هجن، پر پوءِ به ٿئي اُهوئي ٿو، جيڪو مقتدر ڌريون چاهينديون اچن ٿيون. جيڪڏهن ائين نه هجي ها ته ڪيترائي ڀيرا متفقه طور ٺهراءَ منظور ڪرڻ باوجود به ڪالاباغ جهڙي ڪروڌ ۽ نفرتون وڌائيندڙ منصوبي تان هٿ کڻڻ جو نانءُ نه ٿو ورتو وڃي. ويتر سنڌ کي سزا ڏيڻ لاءِ مختلف بهانن سان نت نوان ڪئنال جوڙي سنڌ جي پاڻيءَ تي ڌاڙو هنيو ويندو رهي ٿو. تازو اهڙو ڌاڙو ارسا پاران تڪراري چشما- جهلم لنڪ ڪئنال کولڻ واري فيصلي سان هڻڻ جي ڪوشش ٿي رهي آهي. انهيءَ فيصلي خلاف جمعي ڏينهن سنڌ اسيمبليءَ ۾ متفقه طور ٺهراءُ به منظور ڪيو ويو آهي. سينئر وزير نثار کهڙي اهڙو ٺهراءُ پيش ڪيو، جنهن جي ايم ڪيو ايم، مسلم ليگ فنڪشنل ۽ مسلم ليگ (ن) به حمايت ڪئي. ٺهراءُ ۾ چيو ويو آهي ته هي ايوان ارسا جي چشما لنڪ ڪئنال کولڻ واري فيصلي تي سخت احتجاج ڪري ٿو ۽ ان کي صوبن سان ڪيل ٺاهه جي ڀڃڪڙي قرار ڏئي ٿو. ايوان مطالبو ڪري ٿو ته چشما لنڪ ڪئنال کي کولڻ جو فيصلو تيستائين واپس ورتو وڃي، جيستائين سنڌ ان تي اتفاق نٿي ڪري. ٺهراءُ تي ڳالهائيندي ميمبرن ارسا ۽ وفاق تي تنقيد پڻ ڪئي. سينئر وزير نثار کهڙي جو چوڻ هو ته 1970ع ۾ چشما لنڪ ڪئنال جڏهن ٺهيو، تڏهن فيصلو ڪيو ويو هو ته اهو ڪئنال صرف ٻوڏ دوران کوليو ويندو ۽ ان ۾ ٻوڏ جو پاڻي وڌو ويندو پر بدقسمتيءَ سان آمرن جيئن آئين جي ڪتاب کي اهميت نه ڏني، تيئن ئي هن فيصلي کي به پٺي ڏئي ڇڏي. ان کانپوءِ 1991ع ۾ جيڪو پاڻي ٺاهه ٿيو، ان ۾ به اهو ڄاڻايو ويو ته چشما لنڪ ڪئنال صرف اضافي پاڻي دوران کوليو ويندو پر خريف جي مند ۾ اهو ڪئنال کولي تڪراري فيصلو ڪيو آهي، جنهن سان سنڌ کي وڏو نقصان ٿيندو. سينئر وزير جو چوڻ هو ته پاڻي ٺاهه ۽ عالمي قانونن موجب پاڻي تي سڀ کان پهرين پڇڙي وارن جو حق هوندو آهي، ان ڪري پاڻي جا اهڙا فيصلا سنڌ جي منظوري کانسواءِ نٿا ٿي سگهن. ايم ڪيو ايم جي سيد سردار احمد جو چوڻ هو ته ارسا کي اهڙو فيصلو ڪرڻ جو ڪو به اختيار ناهي، ان ۾ سنڌ جي اتفاق کان سواءِ ڪو به فيصلو نٿو ٿي سگهي. ڇو ته سنڌ پڇڙي واري آهي، ارسا ۾ فيصلا اتفاق راءِ سان ٿيڻ گهرجن يا وري اهڙو طريقيڪار هجي جو متاثر ٿيندڙ صوبو فيصلي کي ويٽو ڪري سگهي. اجلاس دوران ميمبرن ڳالهائيندي چيو ته وفاق ۽ ارسا جي اهڙي پاليسي سنڌ دشمني کي ظاهر ڪري ٿي. ارسا تڪراري ڪئنال کولي 91ع واري پاڻي ٺاهه جي ڀڃڪڙي ڪئي آهي، اهو فيصلو واپس نه ورتو ويو ته سنڌ جو عوام ڀرپور ردعمل ظاهر ڪندو.