تازيون خبرون

Daily Archives: April 17, 2015

سياسي ۽ عسڪري قيادت يمن بحران جو حل سلامتي ڪونسل جي قراداد موجب ڪڍڻ تي اتفاق

اسلام آباد (بيورو) وزيراعظم نواز شريف جي سربراهي ۾ اهم اجلاس ٿيو جنهن ۾ پرڏيهي معاملن جي وزيراعظم جي صلاحڪار سرتاج عزيز، پنجاب جي وڏي وزير شهباز شريف، جوائنٽ چيفس آف اسٽاف ڪاميٽي چيئرمين جنرل راشد محمود، آرمي چيف جنرل راحيل شريف، پاڪ هوائي فوج جي سربراهه ايئر چيف مارشل سهيل امان، پاڪستان نيوي جي سربراهه ايڊمرل محمد ذڪاءُ الله ، وزيراعظم جي پرڏيهي امور جي خاص مددگار طارق فاطمي سميت ٻين اعليٰ حڪام شرڪت ڪئي. اجلاس ۾ قومي سلامتي جي معاملن ۽ يمن جي صورتحال جو تفصيلي جائزو ورتو ويو. ذريعن موجب اجلاس ۾ پنجاب جي وڏي وزير شهباز شريف ۽ سرتاج عزيز پنهنجي هنگامي سعودي عرب دوري جي حوالي سان بريفنگ ڏني. سعودي پرڏيهي وزير سعود الفيصل ۽ گهرو وزير محمد بن نائف سميت ٻين اعليٰ حڪام سان ٿيل ملاقاتن جي حوالي سان اعتماد ۾ ورتو. اجلاس ۾ سعودي عرب طرفان فوج موڪلڻ جي درخواست جو جائزو ورتو ويو. هوڏانهن اجلاس کان پهريان آرمي چيف جي وزيراعظم سان الڳ ملاقات ٿي، اها 4 2  ڪلاڪن ۾ وزيراعظم سان آرمي چيف جي ٻي ملاقات هئي جنهن ۾ يمن جي صورتحال ۽ قومي سلامتي جي معاملن تي ويچاريو ويو. وزيراعظم جي صدارت ۾ ٿيندڙ اجلاس جي پڌرنامي ۾ چيو ويو آهي ته پاڪستان حڪومت سعودي عرب جي سان گڏ بيهڻ جي عزم جو اظهار ڪيو آهي، اجلاس ۾ يمن بحران جي پرامن حل لاءِ حڪومتي ڪوششن تي اطمينان جو اظهار ڪيو ويو جڏهن ته سياسي ۽ عسڪري قيادت پاران ڌرين کي يمن بحران جي حل لاءِ سلامتي ڪونسل جي قراداد موجب ڳالهين ذريعي حل ڪڍڻ تي زور ڏنو ويو آهي. پڌرنامي موجب پنجاب جي وڏي وزير شهباز شريف اجلاس ۾ بريفنگ ڏيندي چيو آهي ته دوري جو مقصد سعودي عوام ۽ حڪومت سان يڪجهتي جو اظهار هو، پاڪستاني عوام هميشه حرمين شريف جي تحفظ لاءِ اڳتي هوندي جڏهن ته سعودي قيادت کي به يقين ڏياريو آهي ته پاڪستان حرمين شرييفين جي تحفظ لاءِ تيار آهي. شهباز شريف جو چوڻ هو ته سعودي حڪومت اُن جي سالميت جي خطري جي صورت ۾ دفاع ڪرڻ لاءِ وزيراعظم نوازشريف جي بيان جي آجيان ڪئي آهي جڏهن ته پڌرنامي موجب شهباز شريف دوري ۾ سعودي عرب جي سلامتي ۽ علاقائي خودمختياري جي تحفظ جي عزم جو اظهار ڪيو.

 

فوجي عدالتن پاران ڏنل سزائون  معطل، حڪومت صبر ڇو نه ٿي ڪري؟: سپريم ڪورٽ

اسلام آباد(بيورو) سپريم ڪورٽ فوجي عدالتن طرفان ڏنل موت جي سزا تي عمل روڪي ڇڏيو، فوجي عدالتن طرفان شدت پسندي جي 7 جوابدارن کي ڏنل سزا خلاف منع نامو جاري ڪيو ويو، عدالت چيو آهي ته فوجي عدالتن جي آئيني حيثيت چئيلنج ٿيل آهي حڪومت فيصلي جو انتظار ڇو نه ٿي ڪري، اٽارني جنرل دليل ڏيندي چيو ته موت جي سزا تي عمل روڪڻ آئين تي اسٽي آهي. سپريم ڪورٽ ۾ چيف جسٽس ناصرالملڪ جي سربراهي ۾ 17 رڪني بئنچ فوجي عدالتون قائم ڪرڻ، 18 هين ۽ 21 هين ترميمن خلاف داخل 14 درخواستن جي ٻڌڻي ڪئي، درخواست گذارن جا وڪيل، اٽارني جنرل ۽ ٻيا عدالت ۾ پيش ٿيا. اٽارني جنرل فوجي عدالتن ۽ آئيني ترميمن جي حق ۾ دليل ڏيندي چيو ته فوجي عدالتون حڪمت عملي تحت سزائون ڏئي رهيون آهن، انهن خلاف فيصلو آئين تي اسٽي هوندو. جسٽس آصف سعيد کوسه رمارڪس ڏيندي چيو ته شيخ لياقت ڪيس ۾ عدالت فوجي عدالتن خلاف فيصلو ڏئي چڪي آهي، جسٽس جواد چيو ته رياست جو ڪهڙو مفاد آهي جو موت جي سزا به ڏني وڃي ۽ اها به هڪ مهيني کانپوءِ ڏني وڃي، فيصلي جو انتظار ڇو نه پيو ڪيو وڃي. جسٽس جواد وڌيڪ چيو ته ڪيس ٻڌڻ ڏنو وڃي هو هفتي يا مهيني ۾ ڪنهن نتيجي تي پهچي ويندا، فوجي عدالتن خلاف آئيني درخواست داخل آهي، آئين جي آرٽيڪل 9 تي ڳالهائڻو آهي، موت جي سزا معمولي سزا ناهي. اٽارني جنرل چيو ته آئيني ترميمن تي فيصلي تائين فوجي عدالتن جي آئيني حيثيت برقرار آهي. عدالت ڌرين جا دليل ٻڌڻ کانپوءِ فوجي عدالتن طرفان ڏوهارين کي ڏنل موت جي سزا تي عمل روڪي ڇڏيو، فوجي عدالتن 6 ڏوهارين کي موت جي سزا ۽ هڪ کي عمر قيد جي سزا ڏني هئي.. ٻڌڻي دوران هڪ جج جسٽس اعجاز جي گهرواري کي دل جو دورو پئجي ويو جنهن بعد ڪيس جي ٻڌڻي 22 اپريل تائين ملتوي ڪئي وئي……

 

اقتصادي رستي جي حوالي سان عوام کي ڀٽڪايو پيو وڃي: ممنون حسين

پشاور(م.ڊ) ملڪ جي صدر ممنون حسين چيو آهي ته اقتصادي رستي جي معاملن تي غير ضروري ڳالهيون ڪري ماڻهن کي ڀٽڪايو پيو وڃي، عوام ان مسئلي جي وچ ۾ ايندڙ رڪاوٽن کي رد ڪري ڇڏي.صدر ممنون حسين سرحد يونيورسٽي آف سائنس ۽ انفارميشن ٽيڪنالاجي جي 11 ڪنوينشن سان خطاب ڪندي چيو ته  پرائمري تعليم ۾ بهتري آڻڻ لاءِ اهو شعبو عورتن جي حوالي ڪيو وڃي ته جيئن اهي هڪ بهتر نسل تيار ڪري سگهن. عورتن جي شخصي سگهه شامل ٿيڻ سان پاڪستان کي علائقي ۾ غير معمولي اهميت ملندي.صدر ممنون حسين چيو ته  بجلي جي پيداوار جا 15 منصوبا تعمير هيٺ آهن. ان موقعي تي نمايان پوزيشن حاصل ڪرڻ وارن شاگردن ۽ شاگردياڻين ۾ ڊگريون پڻ ورهايون ويون

 

ثبوت نه رکندڙ عمران خان قوم کي ڌانڌلين جي نالي تي گمراهه پيو ڪري: پرويز رشيد

اسلام آباد (بيورو) سـُڌ سماءَ واري واري وفاقي پرويز رشيد چيو آهي ته عمران خان قوم کي ڌانڌلين جي نالي تي گمراهه ڪري رهيو آهي، جيڪا پارٽي هڪ سال اندر ثبوت پيش نه ڪري سگهي، اها 45 ڏينهن اندر ڪيئن پيش ڪري سگهي.  هڪ جاري ڪيل بيان ۾ وفاقي وزير پرويز رشيد چيو ته عمران خان اڄ به جڊيشل ڪميشن ۾ ثبوت پيش ڪرڻ ۾ ناڪام ويو آهي. هـُن چيو ته عمران خان وٽ ثبوت ناهن، پي ٽي آءِ سربراهه ڌانڌلين جي نالي تي قوم کي گمراهه ڪري رهيو آهي، کيس وقت ضايع نه ڪرڻ  گهرجي. پرويز رشيد وڌيڪ چيو ته  عمران خان کي پنهنجي واويلا بند ڪرڻ گهرجي، پي ٽي آءِ هڪ سال ۾ ثبوت پيش نه ڪري سگهي، اها 45 ڏينهن ۾ ڪهڙا ثبوت پيش ڪري سگهندي؟  پرويز رشيد سوال ڪيو ته جيڪڏهن عمران خان وٽ ثبوت ئي نه هئا ته ان اسلام آباد تي چڙهائي ڇو ڪئي؟، ڪنٽينر جي سياست سبب ملڪ ڪي ناقابلي تلافي نقصان پهتو آهي جنهن جو ازالو ممڪن ئي ناهي.

 

چوڌري نثار جو گورنر عشرت العباد سان فون تي رابطو، عمران فاروق قتل ڪيس ۾ اڳڀرائي تي اعتماد ۾ ورتو

ڪراچي (اسٽاف رپورٽر) وفاقي گهرو وزير چوڌري نثار سنڌ جي گورنر ڊاڪٽر عشرت العباد سان فون تي رابطو ڪري عمران فاروق قتل ڪيس ۾ ٿيل اڳڀرائي تي اعتماد ۾ ورتو. وفاقي گهرو وزير چوڌري نثار سنڌ جي گورنر ڊاڪٽر عشرف العباد سان فون ڪيو. رابطي دوران ٻنهي اڳواڻن عمران فاروق قتل ڪيس تي خيالن جي ڏي وٺ ڪئي، جڏهن ته گهرو وزير گورنر کي ڪيس ۾ ٿيل اڳڀرائي تي اعتماد ۾ ورتو. ان موقعي تي عشرت العباد جو چوڻ هو ته عمران فاروق جي قاتلن کي هر صورت ۾ انصاف جي ڪٽهڙي ۾ آڻڻ گهـُرجي.

 

پي ٽي آءِ کي ثابت ڪرڻو پوندو ته چونڊن ۾ منظم ڌانڌلي ڪئين ڪئي وئي؟: چيف جسٽس

اسلام آباد (بيورو) عام چونڊن ۾ مبينا ڌانڌلين جي جاچ لاءِ جوڙيل جڊيشل ڪميشن،اليڪشن ڪميشن ۽ نادرا کان هڪ هفتي اندر 37 تڪن بابت رپورٽون طلب ڪري ورتيون، چيف جسٽس ناصرالملڪ رمارڪس ڏنا آهن ته پي ٽي آءِ کي ثابت ڪرڻو پوندو ته اليڪشن ۾ منظم ڌانڌلي ڪيئن ڪئي وئي؟. چيف جسٽس آف پاڪستان جسٽس ناصر الملڪ جِي سربراهي ۾ جوڙيل 3 رڪني جڊيشل ڪميشن جو پهريون باضابطه اجلاس سپريم ڪورٽ ٿيو. عدالتي ڪميشن،تحريڪ انصاف جي درخواست تي اليڪشن ڪميشن ۽ نادرا کان هڪ هفتي اندر 37 تڪن بابت رپورٽون طلب ڪري ورتيون، جڏهن ته پي ٽي آءِ کي به وڌيڪ شاهديون پيش ڪرڻ جو حڪم ڏنو ويو  . اجلاس دوران تحريڪ انصاف جي وڪيل عبدالحفيظ پيرزادي عدالتي ڪميشن آڏو پيش ٿي موقف اختيار ڪيو ته 2013ع جي عام چونڊن ۾ شفاف اليڪشن بابت آئين جي آرٽيڪل 218 تي عمل ناهي ٿيو. عبدالحفيظ پيرزادي چيو ته عام چونڊن ۾ ٿيل ڌانڌلين بابت هزارين صفحن تي ٻڌل مواد موجود آهي. ان موقعي تي چيف جسٽس ناصر الملڪ چيو ته جڊيشل ڪميشن نتيجن جي پرواهه ڪرڻ کانسواءِ قانون موجب ڪم ڪري ڌانڌلين بابت رپورٽ تيار ڪري سرڪار حوالي ڪندي. سپريم ڪورٽ جي چيف جسٽس جو چوڻ هو ته تحريڪ انصاف کي ثابت ڪرڻو پوندو ته عام چونڊن ۾ منظم ڌانڌليءَ جا بنياد ڪهڙا هئا؟ هـُن چيو ته ڌنڌلين بابت سياسي جماعتن جي شڪايتن ۽ تجويزن جو جائزو ورتو ويندو. چيف جسٽس چيو ته ميڊيا ڪوريج ٿيڻ جي صورت ۾ جوڊيشل ڪميشن جي ڪارروائي جِي ميرٽ تي سوال نه اٿاريا وڃن نه ئي اهو تاثر ڏنو وڃي ته ميڊيا ڪارروائي تي اثرانداز ٿي رهي آهي. انکانپوءِ عدالتي ڪميشن جو اجلاس هڪ هفتي لاءِ ملتوي ڪيو ويو.

 

وڏي وزير قائم علي شاهه آءِ جي سنڌ کي اعجاز خواجه جي قتل واري واقعي جي فوري جاچ جو حڪم ڏئي ڇڏيو

ڪراچي (اسٽاف رپورٽر) وڏي وزير سيد قائم علي شاهه  آءِ جي سنڌ کي ايس ايڇ او پريڊي اعجاز  خواجه جي قتل  واري واقعي جي فوري جاچ ڪرڻ جو حڪم ڏنو آهي، ايڊيشنل آءِ جي غلام قادر ٿيٻو چيو آهي ته ايس ايڇ او جو قتل ٽارگيٽ ڪلنگ آهي ۽ جوابدار کي جلد گرفتار ڪيو ويندو.وڏي وزير سيد قائم علي شاهه ايس ايڇ او پريڊي اعجاز خواجه جي قتل جي سخت لفظن  ۾ مذمت ڪندي آءِ جي سنڌ کي  پوليس موبائلن تي حملن کي نظر ۾ رکندي سخت حفاظتي اپاءُ وٺڻ جي هدايت ڪئي آهي. وڏي وزير آءِ جي سنڌ کي  واقعي جي فوري جاچ ڪرڻ ، ان جا  سبب معلوم ڪرڻ ۽ سيڪيورٽي اهلڪارن جي لاپرواهي جي صورت ۾ ڪارروائي ڪرڻ جو حڪم ڏنو آهي. وڏي وزير آءِ جي سنڌ کي پوليس اهلڪارن جي  حفاظت لاءِ ناقابل شڪست پلان ترتيب ڏيڻ جي به هدايت ڪئي آهي.   وڏي وزير  قوم خاطر قرباني ڏيندڙ  ايس ايڇ او کي سلام پيش ڪندي چيو ته دهشتگردي خلاف جنگ جاري رهندي. ايڊيشنل آءَ جي غلام قادر ٿيٻو ايس ايڇ جي قتل واري هنڌ جو دورو ڪيو ۽ شهيد ايس ايڇ او جي گهر ويو، جتي ميڊيا سان ڳالهائيندي غلام قادر ٿيٻي چيو ته ايس ايڇ او جو قتل ٽارگيٽ ڪلنگ آهي. ايڊيشنل آءِ جي چيو ته ايس ايڇ او جي قتل ۾ ملوث جوابدارن کي جلد گرفتار ڪيو ويندو ۽ ان معاملي جي جاچ ڪئي ويندي شهيد ايس ايڇ او ڪهڙن ڪيسن جي جاچ ڪري رهيو هو. هن چيو ته ايس ايس او جي قتل اڄ ڪراچي جو وڏو واقعو آهي ۽ جوابدارن کي جڏهن به موقعو ملي ٿو اهڙي قسم جي ڪارروائي ڪن ٿا.

 

ڪراچي ۾ پريڊي ٿاڻي جو ايس ايڇ او اعجاز خواجه قاتلاڻي حملي ۾ شهيد

ڪراچي (اسٽاف رپورٽر) ڊيفنس ۾ ڪورنگي روڊ وٽ فائرنگ سان ايس ايڇ او پريڊي ٿاڻو اعجاز خواجه مارجي ويو،ڪراچي جي علائقي ڊيفنس ۾ ڪورنگي روڊ تي اڻ ڄاتل هٿياربندن ڪار مٿان فائرنگ ڪري ڏني جنهن سان ايس ايڇ او ٿاڻو پريڊي اعجاز چوڌري مارجي ويوهو. جڏهن ته هٿياربندن فرار ٿيڻ ۾ ڪامياب ٿي ويو.  امدادي ٽيمون جي اهلڪار اعجاز چوڌري جو مڙهه جناح اسپتال نيو ويو جتي شعبه ايمرجنسي جي انچارج ڊاڪٽر سيمي جمالي جي موجب ايس ايڇ او کي 3 کان 4 گوليون لڳيون آهن

 

ملڪ ۾ نئين تاريخ ٺهڻ وڃي رهي آهي، جيڪو به فيصلو آيو دل سان قبول هوندو: عمران خان

اسلام آباد (بيورو) تحريڪ انصاف جي سربراهه عمران خان چيو آهي ته جڊيشل ڪميشن جي ڪارروائي مان هو خوش آهي، اها سڄي پاڪستان جي فتح آهي، جيڪو به فيصلو آيو، ان کي خوش دلي سان قبوليو ويندو، جڏهن ته 2015 چونڊن جو سال آهي. 2013 وارين عام چونڊن ۾ مبينه ڌانڌلين جي جاچ لاءِ قائم جڊيشل ڪميشن ۾ پيش ٿيڻ کانپوءِ صحافين  سان ڳالهائيندي عمران خان چيو ته جڊيشل ڪميشن کين ثبوت پيش ڪرڻ لاءِ هڪ هفتي جي  مهلت ڏني آهي، جڏهن ته نادرا ۽ اليڪشن ڪميشن کان  به تفصيل طلب ڪيا ويا آهن. عمران خان چيو ته جڊيشل ڪميشن معاملي جي جاچ ۾ سنجيده آهي ۽ ملڪ ۾ نئين تاريخ ٺهڻ وڃي رهي آهي. عمران خان چيو ته جڊيشل ڪميشن جي رپورٽ منظر عام تي اچڻ سان جمهوريت هڪ ٻي ليول تي هلي ويندي. هن چيو ته ڌانڌلي جي شڪايت هُن ڪئي هئي پر اڄ 21 سياسي پارٽيون ساڳي شڪايت سان سامهون آيون آهن.

 

عدالتن سزائن کان نه ڦاهين کان روڪيو آهي: عاصمه جهانگير

اسلام آباد(بيورو) سپريم ڪورٽ بار جي اڳوڻي صدر عاصمه جهانگير چيو آهي ته عدالت سزائن کان نه پر ڦاهين کان روڪيو آهي، فوجي عدالتن سان مسئلا حل ٿين ها ته گهڻو وقت اڳ حل ٿي چڪا هجن ها. سپريم ڪورٽ ٻاهران ميڊيا سان ڳالهائيندي عاصمه جهانگير چيو ته فوجي عدالتن طرفان ڏنپ موت جي سزا بابت سپريم ڪورٽ مناسب فيصلو ڏنو آهي، بنيادي حق متاثر ٿيا ته ٽرائل به روڪرايو ويندو. هن چيو ته هو ذاتي طور ڦاهين جي خلاف آهي، بنيادي انساني حقن جي لاءِ وڙهي رهيا آهن، بنيادي  حق متاثر ٿيڻ نه ڏنا ويندا، هڪ قيدي کي ڦاهي ڏيڻ جي خبر وارثن کي اخبار ذريعي پئي. هن چيو ته فوجي عدالتن جو مطلب اهو ناهي ته بنيادي حق کسيا وڃن، دهشتگردي خلاف فوجي عدالتون متبادل ناهن، انهن سان مسئلو حل ٿئي ها گهڻو وقت اڳ حل ٿي چڪو هجا ها. هن چيو ته هو ادارن ۾ ڇڪتاڻ نه ٿا چاهن، سپريم ڪورٽ بار ادارن ۾ ڇڪتاڻ ٿيڻ نه ڏيندي…….