تازيون خبرون

Daily Archives: April 15, 2015

حوثي باغين تي پابندين لاءِ  سلامتي ڪائونسل جو اجلاس، ٺهراءَ پيش

گڏيل قومون(م.ڊ) گڏيل قومن جي سلامتي ڪائونسل ۾ اڄ يمن جي حوثي باغين ۽ انهن جي حامي اڳواڻڻ تي پابندي لاڳو ڪرڻ بابت ٺهراءُ تي گڏيل راءِ ورتي ويندي.خابرو اداري اي پي ڪي مطابق اردن جيڪو يمن جي حوثي باغين خلاف آپريشن عظمِ طوفان ۾ سعودي عرب جو حصو آهي، پنهنجي ٺهراءُ ۾ مطالبو ڪيو آهي ته باغي قبضي هيٺ آيل علائقا ڇڏي ڏين. ٺهراءُ ۾ يمني باغين کي هٿيارن تان پهچ تي به پابندي لاڳو ڪرڻ جي درخواست ڪئي وئي آهي.انکانسواءِ حوثي باغين جي اڳواڻ  عبدالمالڪ الحوثي ۽ ان جو حامي اڳوڻو صدر علي عبدالله صالح جي پٽ احمد علي جي ملڪيت ضبط ڪرڻ ۽ ان تي سفري پابندي لاڳو ڪرڻ جو پڻ مطالبو ڪيو ويو آهي.واضع رهي ته يمن جي اڳوڻي صدر عندالله ۽ حوثي باغين جي ڪيترن ئي اڳواڻن تي گذريل سال نومبر ۾ به انهيءَ قسم جون پابنديون لاڳو ڪيون ويون هيون. اهو ٺهراءُ گڏيل قومن جو پهريون ٺهراءُ هوندو جنهن ۾ يمن ۾ سعودي عرب ۽ ان جي حامي خليجي ملڪن جي مداخلت کانپوءِ ووٽنگ ڪئي ويندي. جيتوڻيڪ اهو خدشو آهي ته سلامتي ڪائونسل جو مستقل ميمبر روس ان ٺهراءُ جي مخالفت ۾ ووٽ ڏيندو.

 

اين اي 226 جي چونڊ: رينجرز پولنگ اسٽيشن ۾ بائيويٽرڪ سسٽم ۽ سي سي ٽي وي ڪيمرائون لڳائڻ جو مطالبو ڪري ڇڏيو

ڪراچي (اسٽاف رپورٽر) قومي اسيمبلي جي تڪ اين اي 246 جي ننڍي چونڊ کي شفاف بڻائڻ لاءِ رينجرز سمورين پولنگ اسٽيشنن جي اندر ۽ باهر سي سي ٽي وي ڪيمرا ۽ بائيوميٽرڪ سسٽم لڳائڻ جو مطالبو ڪري ڇڏيو آهي. رينجرز ترجمان موجب شفاف چونڊن لاءِ رينجرز گهرو کاتي سنڌ کي خط لکيو آهي جنهن جي هڪ نقل ڊي جي نادرا سنڌ کي به موڪلي وئي آهي. خط ۾ رينجرز درخواست ڪئي آهي ته 2 ڏينهن اندر هر پولنگ اسٽيشن تي بائيو ميٽرڪ سسٽم لڳايو وڃي. جڏهن ته 55 حساس عمارتن سميت سمورين پولنگ اسٽيشنز اندر ۽ ٻاهر ڪيمرائون لڳايون وينديون. خط موجب رينجرز گهرو کاتي کان 213 پولنگ اسٽيشنز ۾ قائم ٿيندڙ 769 پولنگ بوٿن لاءِ بائيو ميٽرڪ مشين ۽ 55 حساس عمارتن سميت سمورين پولنگ بوتن لاءِ 1037 سي سي ٽي وي ڪيمرائون لڳائڻ جو مطالبو ڪيو آهي.

 

آئي جي سنڌ اين اي 246 جي ضمني چونڊ لاءِ سيڪيورٽي پلان کي حتمي شڪل ڏئي ڇڏي

ڪراچي (اسٽاف رپورٽر) آءِ جي سنڌ غلام حيدر جمالي جي صدارت هيٺ اڱاري تي سينٽرل پوليس آفيس ۾ اعليٰ سطحي اجلاس ٿيو اجلاس ۾ تڪ اين اي 246 جي ضمني چونڊ لاءِ سيڪيورٽِ پلان کي حتمي شڪل ڏني ويئي اجلاس ۾ ايڊيشنل آءِ جي ڪراچي ڊي آءِ جي آر آر ايف ٽريفڪ اسپيشل برانچ ايس آڙ ٽي سي آءِ سميت زونز جا ڊي آءِ جيز ايس ايس پيز ۽ ايس پيز شرڪت ڪئي تڪ اين اي 246 جي ضمني چونڊن جي موقعي تي 5500 پوليس اهلڪار سيڪيورٽي تي مقرر هوندا اليڪشن جي سيڪيورٽي ڊيوٽي 15 ايس ايس پيز ۽ ايس پيز 9 ڊي ايس پيز ۽ 18 ايس ايڇ اوز شامل هوندا تڪ اين اي 246 ۾ 55 عمارتن کي سيڪيورٽي لاءِ منتخب ڪيو ويو آهي جنهن تي اهلڪار مقرر هوندا اجلاس ۾ فيصلو ڪيو ويو ته علائقي ۾ چونڊيل سمورن پوائنٽس تي بختربند بلٽ پروف گاڏيون ۽ مانيٽرنگ گاڏيون موجود هونديون پوليس ڪمانڊوز ۽ اينٽي ٽيريزم فورس جا اهلڪار هاءِ الرٽ هوندا آءِ جي سنڌ جي حڪمن تي آر آر ايف ۽ ايس ايس يوز جا ڪمانڊوز به سيڪيورٽِ نڀائيندا آءِ جي سنڌ غلام حيدر جمالي ان موقعي تي اعليٰ آڦيسرن کي هدايتون ڪيون ته ضمني چونڊ ۾ سيڪيورٽِ ڊيوٽي تي مقرري کان اڳ آفيسرن ۽ اهلڪارن سان ملاقات ڪن ۽ کين ڀرپور نموني سان سيڪيورٽِ ڊيوٽي نڀائڻ جون هدايتون ڪن جڏهن ته ان دوران اليڪشن ۾ ڪنهن به قسم جي لاپرواهي ڪندڙ آفيسرن ۽ اهلڪارن جي خلاف سخت ڪارروائي ڪئي ويندي.

 

مورو جي ڪچي لنڪ روڊ ڀرسان پوليس جو ڌاڙيلن سان مقابلو، هڪ ڌاڙيل مارجي ويو

مورو(نمائندو) مورو ڀرسان ڪچي جي لنڪ روڊ ڀرسان بيٺل فصل ۾ مورو پوليس کي ڌاڙيلن جي موجودگي جو خفيه اطلاع ملڻ تي مورو ڊي ايس پي مورو فدا حُسين چانڊيو، ايس ايڇ او مورو علي اڪبر کوکر جي اڳواڻي ۾ پوليس جا وڏا اٽالا ساڻ ڪري ڪچي جي هڪ لنڪ روڊ وٽ پهتا ته ڀرسان ڪمند جي فصل ۾ لڪل ڌاڙيل پوليس مٿان انڌا ڌند فائرنگ ڪري ڏني بعد ۾ پوليس پاران ڌاڙيلن مٿان جوابي فائرنگ ڪري ڏني ۽ فائرنگ جو سلسلو ڪافي دير تائين جاري رهڻ دوران هڪ ڌاڙيل مارجي ويو ۽ جڏهن ته ٻيا فرار ٿيڻ ۾ ڪامياب ٿي ويا بعد ۾ پوليس مارجي ويل ڌاڙيل جو لاش کڻائي تعلقي اسپتال مورو آندو جتي سوين شهري گڏ ٿي ويا ٻئي پاسي ڊي ايس پي مورو فدا حسين چانڊيو ۽ ايس ايڇ او مورو علي اڪبر کوکر مورو ٿاڻي تي پريس ڪانفرنس مورو ميڊيا پريس ڪلب جي صحافين کي ٻڌايو ته اسان کي خفيه اطلاع مليو ته مختلف ڏوهن ۾ گهربل بدنام ڏوهاري وڏي ڏوھ جي ارادي سان ڪچي جي علائقي ۾ ويٺل آهن جتي پوليس جا اٽالا ساڻ ڪري ڏوهارين سان مقابلو ڪيو ويو مقابلي دوران هڪ ڏوهاري گاجي عرف غازي رند ٿڏي تي مارجي ويو ۽ باقي ڏوهاري فرار ٿيڻ ۾ ڪامياب ٿي ويا جڏهن ته مارجي ويل ڏوهاري گاجي عرف غازي رند ضلعي جي مختلف ٿاڻن تي سنگين ڪيسن ۾ گهربل هو ۽ پڻ ڪنڊيارو ٿاڻي جي پوليس جمعدار نياز ڪلهوڙي کي مقابلي دوران پڻ شهيد ڪرڻ ۾ ملوث هو جڏهن ته مارجي ويل ڏوهاري وٽان هڪ ڪلاشنڪوف سميت ٽي گولين جون ميگزينون پڻ هٿ آيون آهن پوليس وڌيڪ ٻڌايو ته مارجي ويل ڏوهاري پوري ضلعي ۾ موٽر سائيڪل جي ڦرن چورين ڌاڙن ۽ قتل ۾ ملوث رهيو آهي جڏهن ته باقي فرار ٿيل ڏوهارين پٺيان پوليس ويل آهي جن کي جلد گرفتار ڪيو ويندو انهي موقعي تي ايس ايڇ او درس سڪندر چانگ، ايس ايڇ او نوان جتوئي محمد حيات چانڊيو، ايس ايڇ او سڌوجا غلام شبير سميت مختلف ٿاڻن جا پوليس آفيسر موجود هئا. اطلاع ملڻ تي ايس ايس پي نوشهروفيروز نياز احمد چانڊيو مورو ٿاڻي تي پهچي ڏوهارين سان مقابلو ڪندڙ پوليس ٽيم کي شاباس ڏني.

 

ماضيءَ جي ڪري بالي ووڊ ۾ ڪنهن ايوارڊ لاءِ پنهنجي نامزدگي يا ايوارڊ ملڻ جي ڪا توقع نه آهي: سني ليون

نئين دهلي(شوبز نيوز) بالي ووڊ اداڪار سني ليون چيو آهي ته کيس پنهنجي ماضيءَ جي ڪري بالي ووڊ ۾ ڪنهن ايوارڊ لاءِ پنهنجي نامزدگي يا ايوارڊ ملڻ جي ڪابه توقع ناهي. ڀارتي ميڊيا رپورٽن مطابق 33 ساله اداڪاره پنهنجي هڪ تازي انٽرويو ۾ چيو ته انڊسٽريءَ ۾ ڪافي اهڙا ماڻهو آهن جيڪي کيس پسند نٿا ڪن ۽ اهي نٿا چاهين ته هن کي ايوارڊ ڏنو وڃي. مونکي ايوارڊ جي تقريبن ۾ وڃڻ سٺو لڳندو آهي ۽ ڊينيئل ويبر پڻ ايوارڊ شوز ۾ شريڪ ٿيڻ پسند ڪندو آهي. هن چيو ته ٻين اداڪارن کي ايوارڊ وٺندو ڏسي کيس خوشي ٿيندي آهي ۽ کيس ايوارڊن جي حوالي سان ڪڏهن حسد ناهي ٿيو.

 

فلم نگريءَ ۾ ماڻهو اداڪار کي ان جي ڪردار جي ڪري سڃاڻندا آهن: ڪنگنا

ممبئي (شوبز نيوز) بالي ووڊ اداڪارا ڪنگنا رناوت چيو آهي ته فلم نگريءَ ۾ ماڻهو اداڪار کي ان جي ڪردار جي ڪري سڃاڻندا آهن. ڀارتي خابرو اداري موجب هڪ انٽرويوءَ ۾ ڪنگنا چيو ته فلم نگريءَ ۾ هر اداڪار کي پنهنجي ڪردارن جي ڪري سڃاتو ويندو آهي ۽ مخصوص ڪردار تي خاص ڇاپ به لڳي ويندي آهي. اداڪارا جو چوڻ هو ته ان تي به بولڊ ڪردارن جي ڇاپ لڳي وئي هئي ان لاءِ هن فلم ”ڪوئين“ ۾ سادي ڇوڪريءَ جو ڪردار نڀايو، جيئن مون مٿان اهڙي ڇاپ هٽي وڃي جنهن ۾ مان ڪامياب به وئي آهيان. ڪنگنا فلمي ڪيريئر جي شروعات سال 2006ع ۾ فلم ”گينگسٽر“ سان ڪئي هئي، سندس هٽ فلمن ۾ فيشن ۽ ڪوئين شامل آهن. اهي ئي فلمون سندس مشهوريءَ جو سبب بڻيون.

 

صرف 17 سالن جي عمر ۾ بالي ووڊ ۾ انٽري ڏني هئي: پريانيڪا

ممبئي (شوبز نيوز) اداڪارا ۽ ڳائڻي پريانڪا چوپڙا کي بالي ووڊ نگريءَ ۾ قدم رکندي 12 سال مڪمل ٿي ويا. اداڪارا پنهنجي ڪاميابيءَ تي شوقينن ۽ چاهيندڙن جا ٿورا مڃيا آهن. ميري ڪوم، فيشن ۽ برفي جھڙيون ڪامياب فلمن جي هيروئن پريانڪا چوپڙا بالي ووڊ نگريءَ ۾ 12 سال پورا ڪري ورتا آهن. پريانڪا ٽوئٽر تي پنهنجي چاهيندڙن جا ٿورا مڃيندي چيو ته هن صرف 17 سالن جي عمر ۾ بالي ووڊ ۾ انٽري ڏني هئي، پريانڪا بالي ووڊ فلم انڊسٽريءَ کي ڪامياب فلمون ڏنيون آهن، جڏهن ته هن موسيقي البم جي لاءِ ڳائڻ جا جوهر به ڏيکاريا آهن.

 

بالي ووڊ اداڪار ارشد وارثي پنهنجي ايندڙ نئين فلم ”ويلڪم ٽو ڪراچي“ ۾ 60 سالا بزرگ جو روپ به ڌاريندو

ممبئي (شوبز نيوز) بالي ووڊ اداڪار ارشد وارثي پنهنجي ايندڙ نئين فلم ”ويلڪم ٽو ڪراچي“ ۾ 60 سالا بزرگ جو روپ به ڌاريندو، ڪجھه ڏينهن اڳ فلم جو پوسٽر جاري ڪيو ويو هو، ڪالهه فلمي ٽيم پاران ”ويلڪم ٽو ڪراچي“ جو ٽريلر رليز ڪيو ويو هو، ڀارتي ميڊيائي رپورٽن موجب ايشش آر موهن جي ڪاميڊي فلم ”ويلڪم ٽو ڪراچي“ ۾ ارشد وارثي ۽ جيڪي ڀنگناني 2 ڀارتي شهرين جو ڪردار ادا ڪري رهيا آهن، جيڪي دستاويزن کان سواءِ پاڪستان ايندا آهن ۽ پاڻ کي ڀارتي شهري ثابت ناهن ڪري سگھندا. فلم ۾ ارشد وارثي پنهنجا روپ بدلائيندو رهندو آهي ۽ هڪ موقعي تي 60 سالن جي بزرگ جو روپ به ڌاريندو آهي جيڪو ڏسڻ ۾ ذهين ۽ پڙهيل لکيل محسوس نظر ايندو آهي.

 

آءِ پي ايل جي اٺين ايڊيشن ۾ اڄ هڪ ميچ کيڏي ويندي

پوني(اسپورٽس نيوز) انڊين پريميئر ليگ (آءِ پي ايل) جي اٺين ايڊيشن ۾ (اڄ) اربع تي هڪ ميچ کيڏي ويندي، جنهن ۾ ڪنگز اليون پنجاب ۽ دهلي ڊيئر ڊيولز جي ٽيمن وچ ۾ پونا ۾ مقابلو ٿيندو. ميچ ڊي اينڊ نائيٽ هوندي جيڪا پاڪستاني وقت مطابق شام 7:30 وڳي شروع ٿيندي. ڪنگز اليون پنجاب، جاري بيلي جي اڳواڻيءَ ۾ ميدان ۾ لهندي، جڏهن ته دهلي ڊيئر ڊيولز جي اڳواڻي ڏکڻ آفريڪا جو پال ڊومني ڪندو. ايونٽ ۾ 8 ٽيمون حصو وٺنديون.

 

نيوزيلينڊ جي ڪرڪيٽ ٽيم ايندڙ مهيني انگلينڊ جو دؤرو ڪندي

ويلنگٽن(اسپورٽس نيوز) نيوزيلينڊ جي ڪرڪيٽ ٽيم ايندڙ مهيني انگلينڊ جو دؤرو ڪندي، جتي ٽيم 2 ٽيسٽ، 5 ون ڊي ۽ هڪ ٽي 20 ميچ کيڏيندي. نيوزيلينڊ ٽيم دؤري جي شروعات سمرسيٽ خلاف 4 ڏينهن جي ٽور ميچ سان ڪندي. اها ميچ 8 کان 11 مئي تائي ٽائونٽن ۾ کيڏي ويندي. ڪيوي ٽيم پنهنجي ٻي وارم اپ ميچ 14 کان 17 مئي تائين وار سيسٽر شائر خلاف کيڏندي. انگلينڊ ۽ نيوزيلينڊ وچ ۾ 2 ٽيسٽ ميچن تي مشتمل سيريز جي پهرين ٽيسٽ 21 کان 25 مئي تائين لنڊن، جڏهن ته ٻي ٽيسٽ 29 مئي کان 2 جون تائين ليڊز ۾ کيڏي ويندي. ٻنهي ٽيمن وچ ۾ 5 ون ڊي ميچن جي سيريز جي پهرين ميچ 9 جون تي برمنگهم، ٻي ون ڊي 12 جون تي لنڊن، ٽئين ون ڊي 14 جون تي سائو ٽمپٽن، چوٿين ون ڊي 17 جون تي نوٽنگهم جڏهن ته پنجين ۽ آخري ون ڊي 20 جون تي چيسٽرلي اسٽريٽ ۾ کيڏي ويندي. جڏهن ته واحد ٽي 20 ميچ 23 جون تي مانچيسٽر ۾ کيڏي ويندي.