تازيون خبرون

Daily Archives: April 15, 2015

ن ليگ جي سياست عوام جي خدمت ڪرڻ آهي: نواز شريف

گلگت بلتستان (مانيٽرنگ ڊيسڪ) وزيراعظم نواز شريف چيو آهي ته هـُو   گلگت بلستان ۾ ڪنٽينر واري سياست ڪرڻ نه پـَر عوام جي خدمت ڪرڻ آيو آهي، ڪجهه ماڻهن جي سياست گارين تي ٻڌل آهي پر ن ليگ جي سياست عوام جي خدمت ڪرڻ آهي، گلگت ۾ 40 ارب رپين جا منصوبا شروع ڪيا ويا آهن، ايترو پئسو پاڪستان تي به خرچ ناهي ٿيندو.  گلگت بلستان ۾ عوامي ميڙ کي خطاب ڪندي وزيراعظم نواز شريف چيو ته هتان جي عوام ۽ سندس دل گڏ ڌڙڪندي آهي، ماضي ۾ گلگت ڪائونسل جو اجلاس اسلام آباد ۾ ٿيندو هو پر هاڻي هتي ٿيندو آهي. هـُن چيو ته اڄ گلگت جي 12 شاگردياڻين کي ليپ ٽاپ ڏئي کيس وڏي خوشي ٿي آهي، گلگت جي شاگردن کي هاڻي هڪ هزار کان وڌيڪ ليپ ٽاپ فراهم ڪيا ويندا.  وزيراعظم نواز شريف چيو ته هــُو گلگت بلستان ۾ ڪنٽينر واري سياست ڪرڻ نه پر عوام جي   خدمت ڪرڻ آيو آهي، ڪجهه ماڻهن جي سياست گارين تي ٻڌل هوندي آهي پر ن ليگ جي سياست عوام جي خدمت آهي. وزيراعظم چيو ته کيس ڪنٽينر تي ويهي گهڻو گهٽ وڌ ڳالهايو ويو پر نواز شريف ڪڏهن به گار جو جواب گار سان ناهي ڏيندو، جيڪي ماڻهو اهڙي زبان استعمال ڪندا آهن، عوام کين چڱي ريت سڃاڻي ٿو. نواز شريف چيو ته گلگت کان اسڪردو تائين روڊ ٺاهيو ويندو، جڏهن ته ٻنهي شهرن جي هوائي سروس لاءِ وڌيڪ جهاز پڻ فراهم ڪيا ويندا. وزيراعظم وڌيڪ چيو ته حڪومت گلگت بلتستان ۾ 40 ارب رپين جي منصوبن تي ڪم ڪري رهي آهي، ايترو رقم پاڪستان تي به خرچ ناهي ٿيندي، جڏهن ته خطي جو سڀ کان وڏو منصوبو ديا مير ڀاشا ڊيم به گلگت ۾ ئي ٺهندو، جنهن تي 14 سئو ارب رپيا خرچ ايندو. وزيراعظم چيو ته پاڪ چين اقتصادي راهدري منصوبي تحت خطي ۾ خوشحالي ايندي، سندس نظر وڏن منصوبن تي آهي، جيئن عوام خوشحال ٿئي. ان موقعي تي وزيراعظم گلگت جي شهرن هنزه، نگر، شگر ۽ خرمند کي ضلعا بڻائڻ ۽ شاهراهه قراقرم وٽ بلستان يونيورسٽي ٺاهڻ جو به اعلان ڪيو.

 

عرب شهزادن کي سنڌ ۾ شڪار جي اجازت نه ڏيو: سنڌ اسيمبلي ميمبرن جو مطالبو

ڪراچي (اسٽاف رپورٽر) سنڌ اسيمبلي جو اجلاس ڪالهه صبح جو ساڍي ڏهين وڳي اسپيڪر آغا سراج دراني جي صدارت هيٺ شروع ٿيو. اجلاس ۾ سوالن جوابن جي وٿي بعد تحريڪ التوا اڪلائي وئي. ان کانپوءِ اڳوڻي وزير اعليٰ سنڌ سيد عبدالله شاهه جي ورسي جي ڪري اجلاس جمعي ڏينهن صبح جو 10 هين وڳي تائين ملتوي ڪيو ويو. سنڌ اسيمبلي جي اجلاس ۾ ڪيترن ئي ميمبرن حڪومت تي زور ڏنو ته عرب شهزادن کي سنڌ ۾ شڪار جي اجازت ڏيڻ جو سلسلو هاڻ بند ڪيو وڃي ڇو ته ڪجهه پکين ۽ جانورن جو نسل ختم ٿي رهيو آهي، جنهن تي سنڌ حڪومت پاران چيو ويو ته اهي اجازت ناما وزارت خارجه جاري ڪندي آهي پر 18هين   آئيني ترميم بعد سنڌ ۾ جلد قانونسازي ڪئي ويندي، جنهن تحت غير ملڪين کي شڪار جي اجازت وٺڻ جي لاءِ صوبن سان رابطو ڪرڻو پوندو. جهنگلي جيوت کاتي بابت سوالن جوابن جي وٿي دوران ميمبرن جهنگلي جيوت بابت خطرن جي حوالي سان سخت ڳڻتي جو اظهار ڪيو. جهنگلي جيوت کاتي جي وزير پاران کاتي جي پارلياماني سيڪريٽري سيد ناصر حسين شاهه ميمبرن جي لکت ۽ ضمني سوالن جا جواب ڏنا سيد ناصر شاهه ٻڌايو ته تتر پوري دنيا ۾ شڪار ڪيو ويندڙ پکي آهي، ان جي آبادي ۾ قدرتي طور تي تيزي سان واڌ ٿيندي آهي پر ان جي شڪار به هڪ ضابطو هوندو آهي. شڪار جي موسم ۾ صرف آچر ڏينهن هڪ لائيسنس تي هڪ ڏينهن ۾ صرف 10 تترن جو شڪار ڪري سگهجي ٿو. هڪ سوال جي تحريري جواب ۾ ٻڌايو ويو ته تلور جي شڪار جي لاءِ سال 13- 2012 ۾ مختلف عرب شهزادن جي ذريعي 518 باز در آمد ڪيا ويا هئا انهن مان سعودي مان 33 باز، خطر مان 222، متحده عرب امارات مان 133، بحرين مان 120 ۽ ڪويت مان 10 عقاب در آمد ڪيا ويا هئا. هن چيو ته هڪ شڪاري 100 تلور جو شڪار ڪري سگهي ٿو، شڪاري واپس وڃڻ کان اڳ باز کي آزاد ڪري ڇڏيندو آهي. ايم ڪيو ايم جي پارلياماني ليڊر سيد سردار احمد چيو ته تلور جي آبادي تمام گهٽ ٿي رهي آهي، ان جا ڪجهه قسم ناياب ٿي ويا آهن، غير ملڪين کان پيسا وٺي انهن کي شڪار جي اجازت ڏني ٿي وڃي. اهو سلسلو هاڻ بند ٿيڻ گهرجي، ٻيلا ختم ٿي ويا آهن، ان سان جهنگلي جيوت به ختم ٿي رهيو آهي. سيد ناصر حسين شاهه چيو ته شڪار جي اجازت وزارت خارجه ڏيندي آهي، تلور هڪ خاص موسم ۾ سائيبيريا کان هجرت ڪري ايندا آهن ۽ پوءِ اهي واپس هليا ويندا آهن، جنهن تي اسپيڪر آغا سراج دراني چيو ته توهان انهن کي ڇڏيندا ته هو واپس ويندا نه. سيد سردار احمد چيو ته هڪ زماني ۾ منڇر ڍنڍ ۾ وڏي تعداد ۾ پکي ايندا هئا جڏهن اهي اڏندا هئا ته ائين لڳندو هو ته آسمان تي ڪارا ڪڪر ڇائنجي ويا آهن. مسلم ليگ فنڪشنل جي ميمبر نند ڪمار چيو ته متحده عرب امارات جي وزير جيڪو بيان ڏنو آهي ان کان پوءِ اسان جي غيرت جاڳي آهي يا نه؟ ناصر شاهه چيو ته اسان ان بيان جي مذمت ڪيون ٿا توهان کي به مذمت ڪرڻ گهرجي. هن چيو ته شڪار لاءِ ايندڙ غير ملڪي هتي اچي سماجي ڪم به ڪن ٿا ۽ علائقي جي ترقي جي لاءِ به منصوبا مڪمل ڪن ٿا، انهن ڪيترائي منصوبا مڪمل ڪيا آهن. لياقت علي جتوئي چيو ته عرب شهزادا جڏهن به شڪار تي اچن ٿا ته اسان جي حڪومت انهن کي سڪيورٽي فراهم ڪندي آهي، اسان جي علائقن ۾ ته انهن ڪو به ڪم ناهي ڪرايو. ناصر شاهه چيو ته لياقت علي جتوئي پنهنجي دور حڪومت ۾ غير ملڪين کي پاڻ شڪار جي اجازت ڏني هئي، جنهن تي لياقت علي جتوئي چيو ته مون وڏي وزير جي حيثيت ۾ ڪنهن کي به اجازت نه ڏني هئي. مسلم ليگ فنڪشل جي مهتاب اڪبر راشدي چيو ته ماحوليات ۽ جهنگلي جيوت جي تحفظ لاءِ حڪومت ڪهڙا قدم کڻي رهي آهي، شڪار جي ڪري پکين ۽ جانورن جا نسل ختم ٿي رهيا آهن. جيلن جو نسل پڻ ختم ٿي رهيو آهي، جنهن تي ناصر حسين شاهه چيو ته 18هين ترميم بعد بلوچستان ۽ سنڌ جي حڪومت وفاقي حڪومت کي چيو آهي ته اڳتي غير ملڪين کي شڪار جي اجازت ڏيڻ کان اڳ صوبن کان رضامندي حاصل ڪئي وڃي، اهو مسئلو گڏيل مفادن واري ڪائونسل ۾ به کنيو ويندو. هن چيو ته جي قومي مفادن کي نظر ۾ رکيو وڃي ته لکين پاڪستاني خليجي رياستن ۾ ڪم ڪندا آهن ۽ غير ملڪي جڏهن هتي شڪار جي لاءِ ايندا آهن ته هتي به ڪيترن ئي نوجوانن کي روزگار ملندو آهي. جهنگلي جيوت جي تحفظ لاءِ ڪيترائي قدم کنيا ويا آهن. اسپيڪر آغا سراج دراني چيو ته بنگالي طوطن جو نسل ڪيئن ختم ٿي ويو. پارلياماني وزير ڊاڪٽر سڪندر مينڌرو چيو ته 18هين آئيني ترميم بعد اسان هڪ قانوني مسودو تيار ڪيو آهي، جنهن جي منظوري بعد غير ملڪين جي لاءِ اهو ضروري هوندو ته هو شڪار جي اجازت وٺڻ جي لاءِ صوبن سان رجوع ڪندا. پاڪستان تحريڪ انصاف جي ميمبر ڊاڪٽر سيما ضياءُ چيو ته ايوان ۾ سنجيدگي جو مظاهرو نٿو ڪيو وڃي، هر ڳالهه کي مذاق ۾ ٽاريو ٿو وڃي. حڪومت پاران جنهن ريت سوالن جا جواب ڏنا پيا وڃن، انهن مان ميمبرن مطمئن نٿا ٿين. ناصر حسين شاهه چيو ته اسان تفصيلي جواب ڏئي رهيا آهيون، عورت ميمبر ٻڌائي ته اسان کيس ڪئين مطمئن ڪيون؟ هڪ سوال جي جواب ۾ ناصر حسين شاهه چيو ته جهنگلي جيوت جي تحفظ لاءِ جلد هڪ قانون آندو پيو وڃي، جنهن تحت غير قانوني شڪار ڪرڻ وارن جي ڏنڊ ۽ سزائن ۾ واڌ ڪئي ويندي. ان دوران ڊاڪٽر سيما ضيا ايوان ۾ اٿي هلي وئي ته سينيئر وزير نثار احمد کهڙو اسپيڪر کي چيو ته عورت ميمبر ايوان تي ايترو وڏو الزام لڳائي پاڻ ايوان مان ٻاهر هلي وئي آهي، ڇا ان جو اهو رويو اسيمبلي تي عدم اعتماد جي برابر ناهي. سوالن جواب جو وقفو ختم ٿيڻ بعد مسلم ليگ فنڪشنل جي نند ڪمار تحريڪ التوا پيش ڪئي، جنهن ۾ چيو ويو ته ڪڻڪ جي خريداري جي لاءِ مرڪز ناهن کوليا ويا. ان تي صوبائي وزير ڊاڪٽر سڪندر مينڌرو چيو ته پوري صوبي ۾ مرڪز کوليا ويا آهن ۽ خوراڪ وارو وزير پاڻ سڀني ضلعن جو دورو ڪري رهيو آهي، ان جي باوجود به اسان يقين دهاني ٿا ڪرايون ته جيڪي به مرڪز بند آهن اهي به جلد کوليا ويندا. پي پي جي ميمبرن درخواست ڪئي ته اڳوڻي وڏي وزير عبدلله شاهه مرحوم جي ورسي ۾ انهن کي وڃڻو آهي، تنهنڪري اجلاس جي باقي ڪارروائي ملتوي ڪئي وڃي. ان کان اڳ ايوان تحريڪ التوا اتفاق راءِ سان منظور ڪري ورتي جنهن موجب اجلاس جي باقي ايجنڊا ايندڙ پرائيويٽ ڊي تي کنئي ويندي. ان بعد اسپيڪر اجلاس جمٿي ڏينهن صبح جو 10 وڳي تائين ملتوي ڪري ڇڏيو.

 

حڪومت معيشت ۾ سڌارن کي چيلينج سمجهي قبول ڪيو آهي: صدر ممنون حسين

اسلام آباد (بيورو) صدر ممنون حسين چيو آهي ته حڪومت معيشت ۾ سڌارن کي چيلينج سمجهي قبول ڪيو آهي، معيشت جي بهتري لاءِ هاڻي حڪومت جا قدم پوئتي نه هٽندا. اسلام آباد ۾ زرعي ۽ قدرتي وسيلن جي پاليسي ۾ سڌارن بابت ڪانفرنس کي خطاب ڪندي صدر ممنون حسين چيو ته پاڪستان به ٻين ترقي يافته ملڪن جيان معيشت جهڙي چيلينجز کي منهن ڏئي رهيو آهي. هن چيو ته آمريڪي حڪومت جي امداد سان ميڪرو اڪنامڪ تي ڌيان ڏنو پيو وڃي، غربت ۾ گهٽتائي، معاشي ۽ سماجي سڌارا به حڪومت جي اولين ترجيحن ۾ شامل آهن. صدر ممنون حسين چيو ته خوراڪ کاتي ۾ جاچ ۽ سڌارن تي به ڌيان ڏنو پيو وڃي. صدر وڌيڪ چيو ته حڪومت معيشت جي سڌارن واري چيلينج کي قبول ڪيو آهي، هاڻي معيشت جي بهتري لاءِ حڪومتي جا قدم اڳتي وڌندا رهندا.

 

چوڌري نثار سان برطانوي هاءِ ڪمشنر جي ملاقات، عمران فاروقي قتل ڪيس تي اڳڀرائي بابت ڳالهيون

اسلام آباد(بيورو)  وفاقي گهرو وزير چوڌري نثار عي خان سان برطانوي هاءِ ڪمشنر فلپ هارٽن ملاقات ڪئي جنهن م  چوڌري  نثار چيو ته حڪومت برتانيا سان قانوني سهڪار جاري رکندي،ملاقات دوران چوڌري نثار فلپ هارٽن کي عمران فاروقي قتل ڪيس ۾ هاڻي تائين هلندڙ ڪارروائي ۽ ڪيس جي مرڪزي ڪردار معظم علي جي گرفتاري جي ڄاڻ ڏني.ان موقعي تي ملڪن جي وچ ۾ سهڪار جو به جائزو ورتو ويو. ان موقعي تي چوڌري نثار جو چوڻ هو ته پاڪستان جي حڪومت  برتانيا سان قانوني  معاملن تي سهڪار جاري رکندي جڏهن ته برتانوي هائي ڪمشنر فلپ هارٽن جو چوڻ هو ته سندس حڪومت به پاڪستان پاران قانوني سهڪار کي قدر جي نگاهه سان ڏسي ٿي.

 

نواز ليگ عام چونڊن ۾ مبينا ڌانڌلين جي جاچ لاءِ جڊيشل ڪميشن جي قيام کانپوءِ ليگل ڪميٽي قائم ڪري ڇڏي

اسلام آباد (بيورو) حـُڪمران جماعت مسلم ليگ نـُون عام چونڊن ۾ مبينا ڌانڌلين جي جاچ لاءِ جڊيشل ڪميشن جي قيام کانپوءِ ليگل ڪميٽي قائم ڪري ڇڏي آهي، ڪميٽي 16 اپريل تي رٿيل جڊيشل ڪميشن جي ڪارروائي کانپوءِ معاملن جو  جائزو  وٺندي.  مئي 2013 جي عام چونڊن ۾مبينا ڌانڌلين جي جاچ لاءِ جڊيشل ڪميشن جو قيام عمل ۾ اچڻ بعد حڪمران جماعت مسلم ليگ ان حوالي سان هڪ ليگل ڪميٽي قائم ڪئي آهي. ڪميٽي ۾ سينيئر وڪيل خواجه حارث، مصطفيٰ رمدي ۽ مخدوم علي خان قانوني معاونت ڪندا، جڏهن ته پوليٽيڪل ميمبرز ۾ روحيل اصغر، طلال چوڌري ۽ رياض ملڪ شامل آهن. ذريعن موجب، ڪميٽي 16 اپريل تي رٿيل جڊيشل ڪميشن جي ڪارروائي کانپوءِ جو جائزو وٺندي. ڪميٽي، معاملن جو جائزو وٺي پارٽي جي اعليٰ قيادت کي پڻ آگاهه ڪندي.

 

مني لانڊرنگ ڪيس: الطاف حسين پوليس اڳيان پيش، ضمانت ۾ هڪ ڀيرو ٻيهر جولاءِ تائين واڌ

لنڊن (مانيٽرنگ ڊيسڪ) مني لانڊرنگ ڪيس ۾ ايم ڪيو ايم جي سربراهه الطاف حسين  جي ضمانت ۾ هڪ ڀيرو ٻيهر جولاءِ تائين واڌ ڪئي وئي آهي. ايم ڪيو ايم سربراهه الطاف حسين لنڊن ۾ مني لانڊرنگ ڪيس ۾ صمانت جو مدو ختم ٿيڻ کانپوءِ پوليس آڏو پيش ٿيو جتي سدرڪ پوليس اسٽيشن ۾ 2 جانچ ڪندڙ اهلڪارن الطاف حسين کان 5 ڪلاڪن کان وڌيڪ پڇا ڳاڇا ڪئي. جڏهن ته انهيءَ موقعي تي الطاف حسين جي معاونت لاءِ سندس وڪيل پڻ پوليس اسٽيشن ۾ موجود هو. الطاف حسين جي جانچ مڪمل ٿيڻ کانپوءِ ڪرائون پراسيڪيوشن سروس صمانت ۾ هڪ ڀيرو ٻيهر جولاءِ تائين واڌ ڪري ڇڏي.

 

عمران فاروق قتل ڪيس: اسڪاٽ لينڊ يارڊ جاچ ٽيم پاڪستان ايندي

ڪراچي (مانيٽرنگ ڊيسڪ) معظم علي جي گرفتاري لنڊن پوليس پاران فراهم ڪيل معلومات تي ٿي جوابدار کان وڌيڪ جاچ لاءِ برطانوي پوليس جي ٽه رڪني ٽيم پاڪستان ايندي خانگي ٽي وي مطابق ڪراچي مان گرفتار مڱ جوابدار معظم علي خان کان جاچ لاءِ برطانوي پوليس پاڪستاني حڪومت کي براهه راست درخواست موڪلڻ جو فيصلو ڪيو آهي ان سلسلي ۾ اسڪاٽ لينڊ يارڊ جي ٽه رڪني ٽيم پاڪستان ايندي برطانوي حڪومت ڊاڪٽر عمران فاروق قتل کيس جي مک جوابدار کي گرفتار ڪرڻ ۽ ڪيس کي آخري انجام تائين پهچائڻ لاءِ اسڪاٽ لينڊ يارڊ کي پاڪستاني حڪومت سان وڌيڪ تعاون جي هدايت ڪئي ذريعن دعويٰ ڪئي ته ڊاڪٽر  عمران فاروق قتل ڪيس ۾ پهريان کان حراست هيٺ جوابدارن کان برطانوي پوليس ٻيهر کان وڌيڪ جاچ ڪري چڪي آهي.

 

ريلوي جي هر شعبي تي ڌيان ڏئي رهيا آهيون: خواجه سعد رفيق

لاهور (بيورو) ريلوي واري وفاقي وزير خواجه سعد رفيق چيو آهي ته ريلوي کاتو آخري پساهن ۾ پهچي چڪو هو جنهن کي هاڻ پنهنجي پيرن تي بيهاريو آهي. لاهور ۾ ميڊيا سان ڳالهائيندي خواجا سعد رفيق چيو ته هو ريلوي جي هر شعبي تي ڌيان ڏئي رهيا آهن. هن چيو ته ڊيپوٽيشن تي ويل سمورن ملازمن واپس  آندو ويندو. وفاقي وزير چيو ته ريلوي جو ترقي، بهتري ۽ بحالي وارو سفر جاري آهي ۽ عوام جو پڻ اعتماد بحال ٿيو آهي. هن چيو ته ريلوي جي ترقي جو ڪريڊٽ کاتي جي ملازمن ڏانهن وڃي رهيو آهي. خواجه سعد رفيق چيو ته هزاره ايڪسپريس حويليان کان ڪراچي تائين ويندي. ريلوي واري وفاقي وزير جو چوڻ هو ته  ريلوي نظام ۾ وڌيڪ 75 نيون انجڻيون شامل ڪيون ويون آهن.

 

عمران فاروق قتل ڪيس: جوابدار معظم علي خان 90 ڏينهن لاءِ رينجرز حوالي

ڪراچي (اسٽاف رپورٽر) ڪراچيءَ جي دهشتگردي ٽوڙ عدالت عمران فاروق قتل ڪيس جي مـُک جوابدار معظم علي خان کي 90 ڏينهن لاءِ رينجرز حوالي ڪري ڇڏيو. رينجرز سخت سڪيورٽي ۾ عمران فاروق قتل ڪيس ۾ گرفتار جوابدار معظم علي خان کي دهشتگردي ٽوڙ عدالت ۾ پيش ڪيو. ان موقعي تي رينجرز معظم علي جي چهري تي ڪپڙو  ڍڪيو هو. رينجرز طرفان عدالت کان دهشتگردي خلاف ايڪٽ تهت جوابدار جي ريمانڊ جي درخواست ڪئي جيڪا عدالت منظور ڪندي معظم علي خان کي 90 ڏينهن لاءِ رينجرز حوالي ڪري ڇڏيو. ياد رهي ته معظم علي کي ڪراچي جي علائقي عزيز آباد مان حراست ۾ ورتو ويو هو جڏهن ته ايم ڪيو ايم طرفان جوابدار کان لاتعلقي جو اظهار ڪيو ويو هو.

 

چونڊ سڌارا ڪيس: سپريم ڪورٽ اليڪشن ڪميشن کي جواب داخل ڪرڻ جو حڪم ڏئي ڇڏيو

اسلام آباد (بيورو) سپريم ڪورٽ، چونڊ سڌارن واري ڪيس ۾ اليڪشن ڪميشن کي جواب  داخل ڪرڻ جو حڪم ڏئي ڇڏيو، جسٽس ثاقب نثار ريمارڪس ڏنا آهن ته آرٽيڪل 218 تحت اليڪشن ڪميشن چونڊون ڪرائڻ جو پابند آهي، عدالت پارليامينٽ کي قانونسازي جو حڪم نٿي ڏئي سگهي. جسٽس ثاقب نثار جي سربراهي ۾ سپريم ڪورٽ جي 2 رڪني بينچ چونڊ سڌارن بابت ڪيس جي ٻڌڻي ڪئي. ٻڌڻيءَ دوران جسٽس ثاقب نثار ريمارڪس ڏنا ته چونڊ سڌارن بابت سپريم ڪورٽ جي حڪمن تي عمل ڪرڻ اليڪشن ڪميشن جي ذميواري آهي. اليڪشن ڪميشن جي وڪيل چيو ته هو عدالتي حڪمن تي عمل ڪري رهيا آهن پر چونڊ سڌارن بابت ڪجهه قانونسازي جي ضرورت آهي، جيڪا پارليامينٽ کي ڪرڻي آهي. جسٽس ثاقب نثار ريمارڪس ڏنا ته اليڪشن ڪميشن حڪومت جي ماتحت ناهي، آزاد ۽ خودمختيار ادارو آهي ۽ آئين جي آرٽيڪل 218 تحت اليڪشن ڪميشن چونڊون ڪرائڻ جو پابند آهي. جسٽس ثاقب نثار ريمارڪس ۾ چيو ته عدالت، پارليامينٽ کي قانونسازي جو حڪم نٿي ڏئي سگهي، قانونسازي پارليامينٽ جو ڪم آهي. عدالت، اليڪشن ڪميشن کي چونڊ سڌارن بابت لکت ۾ جواب داخل ڪرڻ جو حڪم ڏيندي ٻڌڻي ملتوي ڪري ڇڏي.