تازيون خبرون

Daily Archives: April 11, 2015

ٽياڪڙي جي قرارداد منظور، يمن جنگ ۾ فوج نه موڪلڻ جو اعلان

اسلام آباد (بيورو) پاڪستان يمن جنگ ۾ فوج نه موڪلڻ ۽ معاملو ڳالهين ذريعي حل ڪرڻ جو اعلان ڪري ڇڏيو، پارليامينٽ جي گڏيل اجلاس ۾ قرارداد اتفاق راءِ سان منظور ڪئي وئي، قرارداد جي متن ۾ چيو ويو آهي ته يمن صورتحال تي پاڪستان کي ڳڻتي آهي پاڪستان ان جو پر امن حل چاهي ٿو، اقوام متحده ۽ او آءِ سي يمن جنگ ختم ڪرائڻ لاءِ ڪردار ادا ڪن. اسپيڪر اياز صادق جي صدارت هيٺ پارليامينٽ جي گڏيل اجلاس ۾ ناڻي واري وزير اسحاق ڊار يمن جنگ بابت قرارداد پيش ڪئي. يمن جنگ جي معاملي تي حڪومت ۽ تحريڪ انصاف پنهنجون پنهنجون قراردادون آنديون جن کي گڏائي هڪ مسودو تيار ڪيو ويو. اسحاق ڊار قرارداد تي اتفاق راءِ کانپوءِ پارليامينٽ جي گڏيل اجلاس ۾ قرارداد پيش ڪئي جنهن جي اتفاق راءِ سان منظوري ڏني وئي. قرارداد جي متن ۾ چيو ويو آهي ته سعودي عرب جي سلامتي کي خطرو ٿيو ته ان جو دفاع  ڪيو ويندو، پاڪستان کي يمن جنگ تي سخت ڳڻتي آهي، معاملي جو پر امن حل ڪڍيو وڃي. متن ۾ وڌيڪ چيو ويو آهي ته پاڪستان نار جي ملڪن سان گڏجي ڪم ڪندو، اقوام متحده ۽ اسلامي ملڪ گڏجي يمن سعودي عرب جنگ ختم ڪرائڻ لاءِ ڪردار ادا ڪن. گڏيل پارليامينٽ متفقه ٺهراءَ کي اتفاقِ راِءِ سان منظور ڪندي يمن ۾ فوري جنگبندي جو مطالبو ڪندي بحران جي نبيري لاءِ اڻ ڌريو ڪردار ادا ڪرڻ جو عزم ورجايو آهي، اهو به واضح ڪيو ويو آهي ته سعودي عرب يا حرمين شريفين جي سلامتي کي خطرو پيش آيو ته پاڪستان سعودي عرب سان نه رڳو ڪلهو ڪلهي ۾ ملائي بيهندو پر اُن صورت ۾ ان ويڙهه ۾ اڳيان اڳيان به هوندو. يمن جنگ بابت پاڪستان جي ڪردار جي حوالي سان گڏيل پارليامينٽ جو اجلاس گذريل ڪجهه ڏينهن کان جاري هو، جيڪو اڄ گڏيل ۽ متفقه ٺهراءُ جي منظوري تي مڪمل ٿيو. اجلاس ۾ اسحاق ڊار گڏيل ٺهراءُ پيش ڪيو، جنهن جا اهم نقطا ڪجهه هن ريت آهن. پارليامينٽ اتفاق ڪيو آهي ته يمن جنگ ۾ پاڪستان اڻ ڌريو رهي سفارتي ڪردار ادا ڪندو. پاڪستان سمجهي ٿو ته يمن جي صورتحال خطي جي استحڪام لاءِ سڀ کان وڏو خطرو آهي. ٺهراءُ ۾ او آءِ سي ۽ گڏيل قومن کان جنگبندي جو مطالبو ڪيو ويو آهي، ٺهراءُ ۾ پاڪستانين سميت ڦاٿل ٻين ملڪن جي ماڻهن جي خيريت سان پنهنجي ماڳن ڏانهن واپسي جو به مطالبو ڪيو ويو آهي. ٺهراءُ ۾ سعودي عرب کي خاطري ڪرائي وئي آهي ته جيڪڏهن سعودي عرب يا حرمين شريفين جي سلامتي کي ڪو خطرو پيش آيو ته پاڪستان نه رڳو اهو ته سعودي عرب سان ڪلهو ڪلهي ۾ ملائي بيهندو، پر ضرورت پوڻ تي ان ويڙهه ۾ اڳيان اڳيان به هوندو. ٺهراءُ ۾ يمن جي باغين جي به مذمت ڪئي وئي، قرارداد جي منظوري وقت وزيراعظم نواز شريف به ايوان ۾ موجود هيو، اجلاس ختم ٿيڻ بعد وزيراعظم سمورن ميمبرن کي مبارڪ باد پيش ڪئي.. تجزئي نگارن جو چوڻ آهي ته اتفاق راءِ سان جيڪو ٺهراءُ منظور ڪيو ويو آهي، ان جو متن سٺو سنوڻ آهي ۽ ان سان قوم جي اتحاد کي تقسيم ڪرڻ واريون ڪوششون ناڪام ٿي ويون آهن.

 

سنڌ اسيمبلي سول سرونٽ ترميمي بل اتفاق راءِ سان منظور ڪري ورتو

ڪراچي (اسٽاف رپورٽر) سنڌ اسيمبلي ۾ سنڌ سول سرونٽ ترميمي بل، مينٽل هيلٿ ترميمي بل، ڪوسٽل ڊيولپمينٽ اٿارٽي ترميمي بل  ۽ لائوڊ اسپيڪر ڪنٽرول سسٽم بل منظور  ڪيا ويا آهن، سنڌ حڪومت ڪوٽڙي ڊائون اسٽريم  ۾ پاڻي ضايع ٿيڻ بابت ارسا جي موقف کي رد  ڪري ڇڏيو آهي، صوبائي وزير سڪندر منڌري  چيو آهي ته ارسا جي موقف جي مذمت ڪيون ٿا ارسا پاڻي ڇوڙ بابت غلط انگ اکر پيش ڪيا آهن. سنڌ اسيمبلي جو اجلاس اسپيڪر آغا سراج دراني جي صدارت هيٺ ٿيو، جنهن دوران پارلياماني معاملن واري  وزير سڪندر منڌري سنڌ سول سرونٽ ترميمي بل 2015 پيش ڪيو، جنهن جي اڪثريت راءِ سان منظوري ڏني وئي. منظور ٿيل بل تحت وفاق ۽ ٻين صوبن جي آفيسرن کي سنڌ سرڪار ۾ ضم ڪيو ويندو ۽ وڏي وزير کي ڪيڊر سسٽم ختم ڪري ڪنهن به آفيسر کي ڪٿي به مقرر ڪرڻ جو اختيار ملي ويو آهي. بل تحت وڏي وزير کي اهو به اختيار حاصل هوندو ته ڪنهن به ڪيڊر جي آفيسر کي صوبي ۾ ڊي سي، سيڪريٽري ۽ ڪمشنر لڳائي سگهي ٿو، جڏهن ته وڏو وزير آئوٽ آف ٽرن پروموشن آفيسرن جي مٿين گريڊ تي ڊيپوٽيشن تي مقرري سان گڏ انهن آفيسرن کي ضم ڪري سگهي ٿو. سپريم ڪورٽ اهڙن سمورن آفيسرن جي مقرري کي غير قانوني قرار ڏئي هٽائڻ جو حڪم ڏنو هو پر سنڌ حڪومت سنڌ سول سرونٽس ترميمي بل منظور ڪري اهڙن آفيسرن جي مقرري کي قانوني تحفظ فراهم ڪيو آهي. ايم ڪيو ايم ميمبرن اهڙي بل جي حمايت ڪئي، جڏهن ته فنڪشنل ليگ جي عورت ميمبرن مهتاب اڪبر راشدي ۽ نصر سحر عباسي مخالفت ڪندي چيو ته بل جي منظوري سان اهل آفيسرن جا حق غضب ٿيندا. اجلاس دوران صوبائي وزير سڪنڌر منڌري سنڌ ڪوسٽل ڊيولپمينٽ اٿارٽي ترميمي بل پيش ڪيو، جنهن جي  به منظوري ڏني وئي. ڪوسٽل ڊيولپمينٽ اٿارٽي ترميمي بل  ۾ ٺٽي ۽ بدين سان گڏ سجاول ضلعي  کي شامل ڪيو ويو آهي، جنهن تحت سجاول مان چونڊيل نمائندا اٿارٽي جا ميمبر هوندا. ايم ڪيو ايم ميمبرن سنڌ ڪوسٽل ڊيولپمينٽ اٿارٽي ۾ ڪراچي کي شامل ڪرڻ جو مطالبو ڪيو پر ان کي شامل اجلاس دوران مينٽل هيلٿ ترميمي بل جي به منظوري ڏني وئي، جنهن تحت آپگهات جي ڪوشش ڪندڙ ماڻهن جي ذهني حالت جي تپاس ڪري سندن سزا تجويز ڪئي ويندي. اجلاس دوران لائوڊ اسپيڪر ڪنٽرول سسٽم بل به منظور ڪيو ويو، صوبائي وزير شرجيل ميمڻ چيو ته اهو بل قومي پلان جو حصو آهي. اجلاس دوران سنڌ مالياتي ترميمي بل ۽ شهيد بينظير ڀٽو يونيورسٽي نوابشاهه بل به پيش ڪيا ويا پر انهن تي بحث ملتوي ڪيو ويو. ايم ڪيو ايم ايم پي هيرسوهو ڌيان ڇڪايو نوٽيس تي ڳالهائيندي چيو ته ارسا ڪوٽڙي ڊائون اسٽريم ۾122ملين ايڪڙ فوٽ پاڻي ضايع ٿيڻ جي ڳالهه ڪئي آهي، جنهن تي سڪندر منڌري ارسا جي اهڙي بيان جي مذمت ڪندي چيو ته ارسا ڊائون اسٽريم ۾ پاڻي جي ڇوڙ بابت غلط انگ اکر پيش ڪري رهي آهي.

وزيراعظم جي افغانستان ۾ 5 پاڪستانين جي قتل جي مذمت، افغان حڪومت کان جوابدارن جي گرفتاري جو مطالبو

اسلام آباد (بيورو) وزيراعظم نواز شريف افغانستان ۾ 5 پاڪستانين جي قتل جي سخت لفظن ۾ مذمت ڪئي آهي وزيراعظم نواز شريف پاران جاري ڪيل بيان ۾ افغانستان ۾ اغوا کانپوءِ قتل ڪيل 5 پاڪستاني شهرين جي سخت لفظن ۾ مذمت ڪئي وئي آهي وزيراعظم نواز شريف چيو آهي ته دهشتگرد پاڪستان ۽ افغانستان ٻنهي جا دشمن آهن  دهشتگردي جي خاتمي لاءِ گڏيل ڪوششون جاري آهن، اميد آهي ته افغان حڪومت معاملي جي جاچ ڪري جوابدارن کي انصاف جي ڪٽهڙي ۾ آڻيندي، ٻئي طرف پرڏيهي وزارت پاڪستان ۾ مقرر نائب افغان سفير کي گهرائي سخت لفظن ۾ پنهنجو احتجاج رڪارڊ ڪرائيندي افغان حڪومت کي معاملي جي جاچ لاءِ چيو آهي.

 

سعودي عرب جي سلامتي کي خطرو ٿيو ته فرض ادا ڪنداسين: پرويز رشيد

اسلام آباد (بيورو) سڌ سماءَ واري وفاقي وزير پرويز رشيد چيو آهي ته سعودي عرب جي سلامتي هر مسلمان کي عزيز آهي، برادر ملڪ جي سلامتي کي خطرو ٿيو ته پنهنجو فرض ادا ڪنداسين، جوڊيشل ڪميسن بڻجي وئي آهي هاڻ ڏسون ٿا ته عمران خان جي ٿيلي مان ڪهڙي ٻلي ٻاهر اچي ٿي، اسلام آباد ۾ ميڊيا سان ڳالهائيندي پرويز رشيد چيو ته سعودي عرب جي سلامتي کي خطرو ٿيو ته پاڪستان پنهنجو فرض ادا ڪندو، يمن ۾ امن جي بحالي لاءِ خطي جا ملڪ ڪوششون ڪري رهيا آهن ۽ ان مسئلي  کي ڳالهه ٻولهه وسيلي حل ڪرڻ گهرجي، يمن جي صورتحال تي ايراني پرڏيهي وزير سان به ڳالهه ٻولهه ٿي آهي ۽سڀني جي خواهش آهي ته ان مسئلي کي ڳالهين وسيلي حل ڪيو وڃي ان لاءِ پاڪستان ٻين ملڪن سان گڏجي ٽياڪڙي جو ڪردار ادا ڪندو،  پرويز رشيد جو چوڻ هو ته عمران خان وڏيون وڏيون دعوائون ڪيون آهن پر ان جون سموريون دعوائون ئي ڪوڙيون ثابت ٿيون هنيئر تائين جيڪي ٿيلها کليا آهن ان مان به عمران خان جي ووٽن ۾ گهٽتائي ٿي آهي هن چيو ته تحريڪ انصاف ڌانڌلي جا ثبوت 2 سالن کان بگلي ۾ بند ڪري رکيا آهن جڏهن ته هاڻ جوڊيشل ڪميشن بڻجي وئي آهي ڏسون ٿا ته عمران خان جي ٿيلهي مان ٻلي ٻاهر اچي ٿي يا نه.

 

ڪور ڪمانڊر ڪانفرنس، يمن صورتحال تي ڳڻتي ظاهر

راولپنڊي (م.ڊ) آرمي چيف جنرل راحيل شريف جي صدارت هيٺ ڪور ڪمانڊر ڪانفرنس ۾ ملڪ جي اندروني، ٻاهرين سيڪيورٽي صورتحال ۽ فوج جي پيشيوراڻن معاملن جو جائزو ورتو ويو عسڪري قيادت آپريشن ضرب عضب تي ڪاميابين تي اطمينان جو اظهار ڪيو ڪانفرنس ۾ وچ اوڀر ۽ خاص طور تي يمن جي صورتحال تي به تفصيلي غور ڪيو ويو عسڪري قيادت پاران يمن جي صورتحال تي گهري ڳڻتي جو اظهار ڪندي چوڻ هو ته مسئلو ايئن ئي جاري رهيو ته ان سان خطي تي گهرا اثر پوندا آرمي چيف جنرل راحيل شريف پاران ڪانفرنس کي خطاب ۾ چوڻ هو ته نيشنل ايڪشن پلان تي نئين جذبي سان ڪم ڪرڻ جي ضرورت آهي، بهترين نتيجن لاءِ نيشنل ايڪشن  پلان تي ان جي روح مطابق عمل ڪرڻو پوندو آرمي چيف هدايت ڪئي ته انٽيليجنس جي بنياد تي جاري آپريشنز کي وڌيڪ تيز ڪندي دهشتگردن ۽ ان جو ساٿ ڏيندڙن خلاف ڪارروائي ڪئي وڃي ۽ شهرن ۾ دهشتگردن جي ٺڪاڻن کي ختم ڪيو وڃي.

 

وزير اعظم نواز شريف 26 لک 11 هزار ۽ عمران خان 2 لک 81 هزار رپيا ٽيڪس ادا ڪيو: ايف بي آر انگ اکر جاري ڪري ڇڏيا

اسلام آباد (بيورو) فيڊرل بورڊ آف ريوينيو پارليامينٽ جي ميمبرن جي ٽيڪس ڊائريڪٽري ٻه هزار چوڏهن جاري ڪري ڇڏي آهي. ڊائريڪٽري ۾ ڄاڻايو ويو آهي ته وزير اعظم نواز شريف ڇهويهه لک يارهن هزار رپين جي آمدني ٽيڪس ادا ڪئي. جڏهن ته خزاني جي وزير اسحاق ڊار ٻاويهه لک ڇهاسي هزار رپين جي ٽيڪس ادا ڪئي. حمزا شريف اٺيتاليهه  لک اٺاسي هزار رپين،فاٽا جي تاج آفريدي ٻه ڪروڙ چاليهه لک رپين جي آمدني ٽيڪس ادا ڪئي. جڏهن ته پنجاب جي وڏي وزير شهباز شريف ايڪونجاهه لک پنجويهه هزار رپيا انڪم ٽيڪس ادا ڪئي. ان سان گڏ شاهد خاقان عباسي ٻاويهه لک تيرهن هزار رپين جي آمدني ٽيڪس ادا ڪئي. چوڌري نثار علي ڇهه لک ايڪيتاليهه هزار، عمران خان ٻه لک ايڪاسي هزار رپين جي ٽيڪس ادا ڪئي ۽ شاهه محمود قريشي پندرهن لک ٽيٽيهه هزار رپين جي ٽيڪس ادا ڪئي. نواز ليگ جي سيڪريٽري جنرل اقبال ظفر جڳهڙا هڪ ٽڪو به ٽيڪس نه ادا ڪيو. جڏهن ته سينيٽ ۾ مخالف ڌر جي اڳواڻ بيريسٽر اعتزاز احسن هڪ ڪروڙ چوويهه لک چوويهه هزار رپين جي ٽيڪس ادا ڪئي. سڌ سماءَ جي وفاقي وزير پرويز رشيد ٽي لک پندرهن هزار رپين جي ٽيڪس ادا ڪئي . مولانا فضل الرحمان پندرهن هزار ڇهه سو اٺاسي رپيا ۽ سيد خورشيد شاهه رڳو ٻاهٺ هزار ٽيڪس ادا ڪئي.

 

وفاق جي چوڻ تي سنڌ سي اين جي مان سڄي ملڪ کي حصو ڏنو، هاڻي ايل اين جي مسئلو پيدا ڪيو ويو آهي: قائم علي شاهه

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته وفاقي سرڪار جي چوڻ تي  سنڌ سي اين جي مان  سڄي ملڪ کي حصو ڏنو، هاڻي، ايل اين جي جو مسئلو پيدا ڪيو ويو آهي. ڪراچي جي ايڪسپو سينٽر ۾ ماءِ ڪراچي نمائش جي افتتاحي تقريب ۾ شرڪت دوران وڏو وزير ٿاٻڙجي پيو، ايس ايم منير، سراج قاسم تيلي ۽ ٻين کيس سنڀالي ورتو. تقريب کي خطاب ڪندي وڏي وزير سيد  قائم علي شاهه چيو ته  ايل اين جي انهن صوبن کي ڏني وڃي جتي گئس جي کوٽ آهي. هن چيو ته هڪ منصوبو جيڪو 20 – 25 سالن کان رولڙي جو شڪار هيو ان کي مڪمل ڪيو آهي. وڏي وزير جو چوڻ هو ته ڪي 4 واٽر   پراجڪيٽ لاءِ وفاق ۽ صوبي 50 -50سيڪڙو فنڊ فراهم ڪندو. هن چيو ته ڪراچي ۾ نه رڳو ملڪ جي مختلف حصن پر ٻين ملڪن مان به مختلف رنگ ۽ نسل جا ماڻهو اچي آباد ٿيا آهن . سيد قائم علي شاهه چيو ته ڪراچي ايڪسپو سنيٽر ۾  ماءِ ڪراچي نمائش ۾ انڊو نيشيا ترڪي ۽ جاپان سميت 3 سئو کان وڌيڪ ڏيهي ۽ پرڏيهي ڪمپنيون شامل آهن. سيد قائم علي شاهه   جو چوڻ هو ته مائي ڪراچي جهڙي نمائش ملڪ جي بهتر تصوير عالمي سطح تي پيش ڪري ٿي واپارين شهر جي بهتري لاءِ حڪومت جو هميشه ساٿ ڏنو آهي شهر کي صرف امن امان ئي نه پر ٻيا مسئلا به سامهون آهن هن جو چوڻ هو ته شهر ۾ پاڻي جي مسئلي تي وفاق کان مدد وٺنداسين، سنڌ کي ايل اين جي جي ضرورت ناهي صوبي ۾ ضرورت کان وڌيڪ گيس پيدا ٿئي ٿي گيس جي مسئلي کي گڏيل مفادن واري ڪائونسل  ۾ کڻي وينداسين.

 

حڪومت يمن جنگ واري معاملي تي ٽياڪڙي جو ڪردار ادا ڪري: خورشيد شاهه

اسلام آباد (بيورو) اپوزيشن ليڊر خورشيد شاهه يمن جي صورتحال تي قرارداد جي گڏيل منظوري تي چيو آهي ته پنجن ڏينهن جي محنت کانپوءِ ان جو نتيجو سامهون آيو آهي، حڪومت يمن جنگ جي معاملي تي ٽياڪڙي جو ڪردار ادا ڪري، پارليامينٽ ٻاهران ميڊيا سان  ڳالهائيندي اپوزيشن ليڊر خورشيد شاهه جو چوڻ هو ته ماضي ۾ به سعودي عرب سنا گڏ بيٺل هئاسين هن جو چوڻ هو ته جيڪڏهن سعودي عرب تي ٻيهر ڪابه مشڪلات آئي ته پاڪستان ضرور ساٿ ڏيندو، هڪ سوال جي جواب ۾ هن چيو ته اسان به چيو هو ته هي آر اوز جي اليڪشن آهي چونڊ سڌارن تي ڪم ڪيو ته جيئن ايندڙ اليڪشن ۾ ڌانڌلي نه ٿئي خورشيد شاهه جو چوڻ هو ته حڪومت کي پنج سال مڪمل ڪرڻ گهرجن.

 

جسٽس جواد ايس خواجه وقتي چيف جسٽس طور حلف کڻي ورتو

اسلام آباد(بيورو) سپريم ڪورٽ جي سينيئر ترين جج جسٽس جواد ايس خواجه جمعي ڏينهن وقتي چيف جسٽس آف پاڪستان جو حلف کڻي ورتو آهي. چيف جسٽس ناصر الملڪ جي پرڏيهي دوري دوران جسٽس جواد ايس خواجه چيف  جسٽس آف پاڪستان جي حيثيت سان فرض سرانجام ڏيندو. سپريم ڪورٽ ۾ ان سلسلي ۾ هڪ پروقار تقريب ٿي جنهن ۾ سينيئر جج جسٽس انور ظهير جمالي جسٽس جواد ايس خواجه کان وقتي چيف جسٽس جي عهدي جو حلف ورتو. تقريب ۾ سپريم ڪورٽ آف پاڪستان جي جج صاحبان، سينيئر وڪيلن، اٽارني جنرل آف پاڪستان ۽ ٻين عملدارن شرڪت ڪئي. ايڊيشنل رجسٽرار جڊيشل سپريم ڪورٽ محمد علي تقريب هلائي. ان موقعي تي سپريم ڪورٽ جو عملو پڻ موجود هو.

 

پيپلز پارٽي لياري ۾ جلسي جو اعلان ڪري ڇڏيو، نبيل گبول واپس اچڻ جا پر پيو هڻي: شرجيل ميمڻ

ڪراچي (اسٽاف رپورٽر) پپپلز پارٽي لياري ۾ جلسي جو اعلان ڪيو آهي، صوبائي وزير شرجيل انعام ميمڻ چيو آهي ته نبيل گبول پاران ٻيهر پ پ ۾ شامل ٿيڻ لاءِ رابطا ٿيا آهن ۽ ڪراچي ۾ غير قانوني شادي هالز مالڪ پاڻمرادو هال ڊاهن سرڪار ڪارروائي ڪئي ته سامان به ضبط ڪيو ويندو. بلاول هائوس ۾ پريس ڪانفرنس  ڪندي شرجيل انعام ميمڻ چيو ته نبيل گبول پاران ٻيهر پ پ ۾ شامل ٿيڻ لاءِ  رابطا ٿيا آهن پر پارٽي قيادت اڃا ڪوبه فيصلو ناهي ڪيو. هن چيو ته پ پ تمام جلد لياري ۾ جلسو ڪندي ، جنهن کي پارٽي جي سينيئر قيادت خطاب ڪندي. شرجيل انعام ميمڻ چيو ته ڪراچي ۾ حد دخلين خلاف ڪارروائي جاري رهندي ۽ اهڙي ڪارروائي تي ڪوبه دٻاءُ برداشت نه ڪيو ويندو. هن چيو ته پبلڪ پارڪس، راندين جي گرائونڊز  ۽ ڀلائي وارن پلاٽن تي شادي هالز ڪنهن به صورت ۾ برداشت نه ڪيا ويندا. شرجيل انعام ميمڻ چيو ته غير قانوني شادي هالز وارا پاڻمرادو هال ڊاهن ۽ جڏهن سرڪاري ٽيمون آيون ته انهن جو سامان به ضبط ڪيو ويندو. صوبائي وزير چيو ته گذريل ڏينهن عمران خان جي سيڪيورٽي لاءِ اڌ شهر جي پوليس لڳائي وئي ۽ اين اي 246 تي ننڍي چونڊ دوران مڪمل سيڪيورٽي فراهم ڪئي ويندي. شرجيل انعام ميمڻ چيو ته پ پ مڪاني چونڊن جي تياري ڪري رهي آهي ۽ مختلف پارٽين سان واسطو رکندڙ 28 ڄڻن پ پ ۾ شموليت جو فيصلو ڪيو آهي.