تازيون خبرون

Daily Archives: April 10, 2015

جيڪڏهن عمران خان ڪراچي مان سيٽ کٽي ويو ته ان کي پنهنجي چادر ڏيندس: محمود اچڪزئي

اسلام آباد (بيورو) پشتونخواهه ميپ جي سربراهه محمود اچڪزئي چيو آهي ته جيڪڏهن عمران خنا ڪراچي مان سيٽ کٽي ويو ته ان کي پنهنجي چادر ڏئي ڇڏيندس، پارليامينٽ جي گڏيل اجلاس ۾ خيالن جو اظهار ڪندي محمود اچڪزئي چيو ته پارليامينٽ تي حملو ڪندڙن خلاف سخت ڪارروائي ٿيڻ گهرجي جڏهن ته عمران خان کي منهنجي چادر ڏاڍي پسند آهي جيڪڏهن هو ڪراچي جي ضمني چونڊن ۾ سيٽ  کٽي ويو ته ان کي پنهنجي چادر ڏيندس، محمود اچڪزئي جو چوڻ هو ته ملڪ فوج ۽ بمن سان نه پر عوام جي طاقت سان بچايا ويندا آهن يمن جو مسئلو انتهائي حساس آهي ان معاملي ۾ جذباتي فيصلو ڪرڻ کان پاسو ڪرڻو پوندو جڏهن ته حتمي فيصلو جو اختيار پارليامينٽ کي هجڻ گهرجي.

 

عمران خان جي جناح گرائونڊ آمد، ايم ڪيو ايم ۽ پي ٽي آءِ ۾ ڇڪتاڻ ٻيهر تيز، ڪارڪنن اٽڪي پيا، 3زخمي

ڪراچي (اسٽاف رپورٽر) ڪراچي جي چونڊ دنگل اين اي 246 تي ڇڪتاڻ هڪ ڀيرو وري تيز ٿي وئي، عمران خان جي جناح گرائونڊ آمد جي موقعي تي پي ٽي آءِ ۽ ايم ڪيو ايم ڪارڪنن ۾ جهيڙو ٿي پيو، ان دوران لٺيون لڳڻ سبب 3 ڪارڪن زخمي ٿي ويا، جڏهن ته ڪپتان ايم ڪيو ايم جو استقبال وٺڻ کانسواءِ ئي واپس هليو ويو. تحريڪ انصاف جي چيئرمين عمران خان جلوس جي صورت ۾ ڪارساز کان سوڪ سينٽر پهتو. سوڪ سينٽر تان عمران خان جي قيادت ۾ پي ٽي آءِ ڪارڪن غريب آباد کان حسين آباد ۽ مڪا چوڪ کان جناح گرائونڊ پهتا. ان موقعي تي ايم ڪيو ايم جي اڳواڻن ۽ ڪارڪنن عمران خان جي گل نڇاور ڪري آجيان ڪئي. عمران خان پنهنجي زال ريحام خان ۽ ٻين اڳواڻن سان گڏ جناح گرائونڊ ۾ پهتو ته شهيدن جي يادگار تي نه ويو. جناح گرائونڊ مان واپسي دوران تحريڪ انصاف ۽ ايم ڪيو ايم جي ڪارڪنن ۾ جهيڙو ٿيو. ان دوران ڪارڪنن ٻئي ڏينهن تي لٺيون وسايون ۽ هڪٻئي خلاف سخت نعريبازي ڪئي. ان موقعي تي پوليس ٻنهي جماعتن جي ڪارڪنن کي پوئتي هٽايو ۽ صورتحال کي وڌيڪ خراب ڪرڻ کان بچائي ورتو. ريلي جي موقعي تي پوليس سخت حفاظتي انتظام ڪندي لالو کيت کان واٽر پمپ تائين هڪ هزار اهلڪار مقرر ڪيا. ان کانسواءِ بم ڊسپوزل عملي به ڪنهن اڻوڻندڙ واقعي کي منهن ڏيڻ لاءِ علائقي جي سوئيپنگ ڪئي. لالو کيت کان واٽر پمپ تائين شاهراهه پاڪستان کي ٽريفڪ لاءِ بند ڪري متبادل روٽ طور ٽريفڪ کي پـُل تان گذرڻ جي هدايت ڪئي وئي هئي.

 

ريحام خان سان گاڏي ۾ گڏ ويهڻ تان ناز بلوچ ۽ ڊاڪٽر سيما ضياءَ وڙهي پيون

ڪراچي (اسٽاف رپورٽر) عمران خان جِي گهرواري ريحام خان سان گاڏي ۾ گڏ ويهڻ تان تحريڪ انصاف جون عورت اڳواڻ ناز بلوچ ۽ ڊاڪٽر سيما ضياءِ وڙهي پيون. ڪراچي ايئرپورٽ تي ناز بلوچ، ناديه رباني ۽ ڊاڪٽر سيما ضياءِ سميت پي ٽي آءِ جِي عورت اڳواڻن ريحام خان جو استقبال ڪيو. عمران خان طرف روانگي  لاءِ ريحام خان گاڏي ۾ ويٺي ته ناز بلوچ سان گڏ ڊاڪٽر سيما ضياءِ به گاڏي ۾ ويهڻ جِي ڪوشش ڪئي پر ناز بلوچ کيس گاڏي ۾ ويهارڻ کان انڪار ڪري ڇڏيو. اهڙَي انڪار تي پي ٽي آءِ جي عورت اڳواڻ ناز بلوچ ۽ ڊاڪٽر سيما ضياءَ وچ ۾ سخت جملن جي ڏي وٺ ٿي. ان موقعي تي ڊاڪٽر سيما ضياءِ ڳالهائيندي چيو ته هوءَ ريحام خان جَي استقبال لاءِ گذريل 24 ڪلاڪن کان تيارين ۾ رڌل هئي ۽ هن ڪيتريون ئي عورت ڪارڪن پڻ پاڻ سان گڏ آنديون هيون. هـُن چيو ته ريحام خان سان گڏ گاڏي ۾ نه ويهاري ساڻس ناانصافي ڪئي وئي آهي.

 

پاڪستان کي يمن جنگ ۾ شريڪ نه ٿيڻ گهرجي: شيخ رشيد

ڪراچي(اسٽاف رپورٽر) عوامي مسلم ليگ جي سربراهه شيخ رشيد پارليامينٽ جي گڏيل اجلاس کي خطاب ڪندي چيو آهي ته پاڪستان  کي هر مشڪل وقت ۾ سعودي عرب جو ساٿ ڏيڻ گهرجي يمن جي صورتحال تي پارليامينٽ جي گڏيل اجلاس ۾ شيخ رشيد جو چوڻ هو ته پاڪستان کي يمن جي جنگ ۾ شامل نه ٿيڻ گهرجي ڇو ته اها پاڪستان جي پنهنجي جنگ ناهي هن واضح ڪيو ته يمن ۽ سعودي عرب جي جنگ کي آمريڪا ۽ افغانستان جي جنگ نه سمجهيو وڃي ۽ ان معاملي ۾ پاڪستان کي ٽياڪڙي جو ڪردار ادا ڪرڻ گهرجي  هن وڌيڪ ٻڌايو ته سعودي عرب جي چوڌاري 5 ملڪ آهن ۽ هر ملڪ ۾ انتشار ۽ جنگ جاري آهي شيخ رشيد احمد جو چوڻ هو ته گڏيل عرب امارات مطابق ٻڌايو ويو آهي ته هلندڙ سال پاڪستانين 4.8 بلين جي ملڪيت ٺاهي آهي پر اسان جو ناڻو ڪمزور آهي ان لاءِ اسان کي ڪشڪول کڻي ڦرڻو پوي ٿو، پاڪستاني ميڊيا جي حوالي سان عوامي مسلم ليگ جي سربراهه جو چوڻ هو ته جيتري طاقتور پاڪستان جي ميڊيا آهي ايترو پوري دنيا ۾ ڪوبه ناهي، ايوان ۾ موجود ميمبرن طرفان سخت تنقيد جي حوالي سان انهن جو چوڻ هو ته هو ڪنهن کان معافي نه گهرندا جيڪڏهن هو ڪنهن کان معافي گهرن ٿا ته اها صرف الله جي ذات آهي.

 

ديپيڪا يا سونم ڇو، مان پاڻ نئين ٽهيءَ جي سپر اسٽار آهيان: ڪنگنا راناوت

بمبئي(شوبز نيوز)  بالي ووڊ جي  ناليواري ٻيهر نيشنل فلم ايوارڊ ماڻيندڙ اداڪارا ڪنگنا راناوت هميشه سڌا ۽ بي باڪ بيان ڏيڻ ۾فلم انڊسٽري ۾ مشهور رهي آهي تازو ئي ممبئي ۾ صحافي انوپما چوپڙا جي ڪتاب“فرنٽ رو” ڪنورسيشن آن سينيما” جي  مهورت واري تقريب ۾ به ڪنگنا صحافين سان اهڙيون ئي ڳالهيون ڪيون. ڪنگنا جو چوڻ هو ته جڏهن مان ايتري ڪامياب نه هئس تڏهن ڪو به منهنجو انٽرويو وٺڻ نه ايندو هو ۽ گهڻو ڪري مون کان هڪ ئي سوال ڪيو ويندو هو ته سونم ۽ ديپيڪا مان ڪير ايندڙ ٽهيءَ جي سپر اسٽار بڻجندي، ڪنگنا چيو ته ان جو جواب هوءَ ڪجهه هن ريت ڏيندي هئي ته ،نه ديپيڪا نه سونم، ايندڙ ٽهيءَ جي سپار اسٽار مان پاڻ هوندس. ڪنگنا چيو ته هوءَ ايوارڊ شوز ۾ وڃڻ گهڻو پسند ناهي ڪندي.“مان تمام گهڻي شرميلي آهيان، مون کي ڊپ لڳندو آهي ۽ پگهر وهندا آهن انڪري مان ايوارڊ شوز ۾ نه ويندي آهيان. ڪنگنا اهو به چيو ته ان جو هڪ سبب سندس حساس هجڻ به آهي: مان تمام گهڻي حساس آهيان ۽ تنقيد کي گهڻي گهرائي ۽ سنجيدگي سان وٺندي آهيان ايتري قدر جو هروڀرو تنقيد کان بچڻ لاءِ مان ٽوئٽر جهڙي سوشل نيٽورڪ کان به پري رهندي آهيان.

 

ماضيءَ جي خوبصورت اداڪارا جيابچن67 سالن جي ٿي وئي

ممبئي(شوبز نيوز) جيابچن پنهنجي فلمي ڪيرئير جي شروعات 1963ع ۾ بنگالي فلم کان ڪئي، بالي ووڊ ۾ جيا بچن جي پهرين فلم هيروئن جي رول ۾“گُڏي” هئي.جيابچن اڄ پنهنجي 67هون جنم ڏينهن ملهائي رهي آهي. فلم بنسي برجو ۽ زنجير ۾ اميتا بچن سان گڏ ڪم ڪرڻ کانپوءِ هن جوڙي شادي ڪري ڇڏي. اڀيمان،چپڪي چپڪي،شعلي، ۽ سلسلا جيابچن جون ڪامياب فلمون آهن. فلم ڪل هو نا هو ۽ ڪبهي خوشي ڪبهي غم ۾ جيابچن جو الڳ ڪردار به کيس چاهيندڙن کي گهڻو وڻيو. ڪامياب اداڪارا زال ۽ سياستدان جيابچن کي لائيف ٽائيم اچيومينٽ ايوارڊ ۽ ڀارت جي سولين ايوارڊ پدما شري سان پڻ نوازيو ويو آهي.

 

استاد وحيد علي جي 16 هين ورسي ( سڀاڻي) حيدرآباد ۾ ملهائي ويندي

حيدرآباد (شوبز نيوز) سنڌ جي فوڪ ليجنڊ راڳي مرحوم استاد وحيد علي جي 16 هين ورسي سڀاڻي 10 اپريل 2015ع تي حيدرآباد ۾ ملهائي ويندي _ ان سلسلي ۾ وحيد علي ميوزڪ اڪيڊمي حيدرآباد طرفان 10 اپريل تي رات جو 8 وڳي ڌاري مهراڻ آرٽس ڪائونسل لطيف آباد نمبر 7 ۾ هڪ تقريب رٿي ويندي جنهن ۾ بلڊنگس کاتي جو چيف انجنيئر شفيق الرحمان خاص مهمان جڏهن ته گواليار گهراڻي جو سربراهه استاد فتح علي خان اعزازي مهمان طور شرڪت ڪندو _ تقريب جي پڄاڻي تي محفل موسيقي پڻ ٿيندي جنهن ۾ استاد وحيد علي جا فرزند اقرار وحيد علي ۽ لطيف وحيد کان علاوه سنڌ جا ٻيا ناليوارا فنڪار پڻ پنهنجي فن جو مظاهرو ڪندا.

 

ڀارتي عدالت جو اداڪار سلمان خان خلاف سماجي ڪارڪن تي تشدد ۽ کيس ڌمڪيون ڏيڻ جي الزام ۾ ڪيس داخل ڪرڻ جو حڪم

ممبئي(شوبز نيوز) ڀارتي عدالت بالي ووڊ اداڪار سلمان خان خلاف سماجي ڪارڪن تي تشدد ۽ کيس ڌمڪيون ڏيڻ جي الزام ۾ ڪيس داخل ڪرڻ جو حڪم ڏئي ڇڏيو. ڀارتي ميڊيا مطابق ڀارت ۾ بدعنواني خلاف آواز اٿاريندڙسماجي تنظيم اکل ڀارتيه ڀرشٽا چار رمولن سميتي جي ڪارڪن رويندر ديويدي طرفان ممبئي جي مقامي عدالت ۾ درخواست داخل ڪئي وئي ته سلمان خان ۽ سندس محافظ گذريل سال 4 نومبر تي ايئر پورٽ تي کيس ڌمڪيون ڏنيون جنهن بعد دهلي ويندڙ اڏام ۾ به سلمان خان کيس گهٽ وڌ ڳالهايو جڏهن ته سندس محافظ مٿس حملو ڪري اهم دستاويز کسي ورتا. رويندر جو چوڻ هو ته هن واقعي جي شڪايت لاڳاپيل پوليس اسٽيشن کي ڏني پر ان طرفان ڪا ڪارروائي نه ڪئي وئي. عدالت درخواست گذار جو موقف ٻڌڻ کان پوءِ ممبئي ايئر پورٽ پوليس کي سلمان خان ۽ سندس محافظ خلاف ڪيس داخل ڪري جاچ جو حڪم ڏئي ڇڏيو آهي. واضح رهي ته سلمان خان تي اڳ ۾ ئي 2 ڪيس عدالت ۾ هلي رهيا آهن جن ۾ کيس 15 سالن تائين سزا اچي سگهي ٿي.

 

قومي ٽيم بنگلاديش جي دوري دوران هڪ نئين روپ ۾ نظر ايندي: سرفراز احمد

لاهور(اسپورٽس نيوز)قومي ڪرڪيٽ ٽين جي ٽي ٽوئنٽي فارميٽ جي ڪپتان سرفراز احمد جو چوڻ آهي ته بنگلاديش جي دور ي۾ ٽيم هڪ نئين روپ ۾ نظر ايندي لاهور ۾ ميڊيا سان ڳالهائيندي سرفراز احمد چيو ته قوميٽيم جو نائب ڪپتان بڻجڻ منهنجي لاءِ پاڻ کي بهترين ثابت ڪرڻ جو موقعو ۽ هڪ اعزاز آهي جڏهن ته ون  ڊي فارميٽ جو ڪپتان اظهر علي بهترين دوست آهي ۽ اسان گڏجي پاڪستان کي اڳتي کڻي هلنداسين، سرفراز احمد جو چوڻ هو ته بنگلاديشي ٽيم هن وقت بهترين فارم ۾ آهي ان لاءِ ان کي آسان مخالف طور تي نه پيا وٺون جڏهن ته انهن کي شڪست ڏيڻ لاءِ اسان کي بهترين پرفارمنس ڏيڻي پوندي هن چيو ته شاهد آفريدي ۽ مصباح الحق تيم ۾ ڪرنگهي جي هڏي جي حيثيت رکندا هئا.

 

سنگاڪارا ٻيون ڀيرو وزڊن جي ٽاپ ڪرڪيٽر جو ايوارڊ ماڻي ورتو

لنڊن(اسپورٽس نيوز) سريلنڪن اسٽار ڪمار سنگاڪارا ٻيون ڀيرو وزڊن ٽاپ ڪرڪيٽر جو اعزاز حاصل ڪري ورتو، آسٽريليا جي ميگ ليننگ کي دنيا جي بهترين عورت ڪرڪيٽر قرار ڏنو ويو آهي، 5 ڪرڪيٽرز آف دي ايئر ۾ معين علي ۽ اينجلو ميٿيوز به شامل آهن ڏيڍ سئو سال پراڻي ڪرڪيٽ ميگزين جي ايڊيٽر لارنس بوٿ ڪيون پيٽرسن جو معاملو درست انداز ۾ هينڊل نه ڪرڻ تي انگلش بورڊ کي سخت تنقيد جو نشانو بڻايو تفصيل مطابق سريلنڪا جي سپر اسٽار بيٽسمين ڪمار سنگاڪارا ٽوئنٽي 20 ۽ ون ڊي انٽرنيشنل تان رٽائرمينٽ وٺي چڪو ۽ سال جي آخر ۾ هو ٽيسٽ فارميٽ کي به الوداع چوڻ جو ارادو رکي ٿو.