تازيون خبرون

Daily Archives: April 6, 2015

يمن ۾ اتحادي فوجن جي بمباري جو سلسلو جاري، 14 ڄڻا مارجي ويا

صنعا (م.ڊ) يمن ۾ اتحادي فوجن جي بمباري جو سلسلو جاري آهي اڄ رات ٿيندڙ حملن ۾ 14 ڄڻا مارجي ويا يمن جي شهر مڪلا ۾ سخت جهڙپن جو سلسلو رات به جاري رهيو، سعودي عرب ۽ اتحادي فوجن جون حوثي باغين خلاف ڪارروايون جاري آهن يمني گادي واري شهر صنعا ۾ 11 ڏينهن به اتحادين طرفان هوائي بمباري ڪئي وئي، حملن ۾ وڌيڪ 14 ڄڻن جي مارجڻ جا اطلاع آهن گذريل ڏينهن ريڊ ڪرسنٽ طرفان امدادي ڪمن لاءِ هڪ ڏينهن جي جنگبندي جي اپيل به ڪئي وئي هئي، جنهن تي يمني اختيارين طرفان غور ڪيو پيو وڃي يمن جي شهر مڪلا ۾ باغين ۽ يمني فوج وچ ۾ سخت جهڙپون جاري آهن تازين جهڙپن جي نتيجي ۾ سيڪيورٽي اهلڪار مارجي ويو، هوڏانهن يمني پرڏيهي وزير رياض ياسين دعويٰ ڪئي آهي ته اڳوڻو صدر علي عبدالصالح يمن کان روس فرار ٿي ويو آهي يمن ۾ گذريل ٻن هفتن کان جاري ويڙهه ۾ ساڍا 5 سئو ماڻهو مارجي چڪا آهن ۽ 17 سئو کان وڌيڪ ماڻهو زخمي آهن.

 

تحريڪ انصاف اين اي 246 تي چونڊ دوران فوج مقرر ڪرڻ جو مطالبو ڪري ڇڏيو

ڪراچي (اسٽاف رپورٽر) پاڪستان تحريڪ انصاف ۽ ايم ڪيو ايم جي وفد ڪمشنر ڪراچي سان ملاقات ڪئي. ذريعن موجب پي ٽي آئي 246 جي ننڍي چونڊ دوران فوج مقرر ڪرڻ جو مطالبو ڪري ڇڏيو آهي. تحريڪ انصاف ڪمشنر ڪراچي کان مطالبو ڪيو آهي ته چونڊ کان اڳ اين اي 246 کي فوج حوالي ڪيو وڃي. ٻئي پاسي ايم ڪيو ايم جي اڳواڻ ڪنور نويد جميل جو چوڻ هو ته هو اين اي 246 ۾ ضابطه اخلاق تي عملدرآمد لاءِ مڪمل تعاون ڪندو، پي ٽي آئي کي به مدد فراهم ڪئي ويندي. هن چيو ته اليڪشن ڪميسن چونڊن لاءِ فوج، رينجرز يا پوليس کي گهرائي ته اسان کي ڪوبه اعتراض ناهي، شفاف چونڊ ٿي ته پي ٽي آئي کي 10، 12 هزار ووٽ ملندا.

 

ٿر ۾ موت جو راڄ برقرار، وڌيڪ 6 ٻارڙا فوت

مٺي (نمائندو) ٿر ۾ ڏڪار سبب موت جو راڄ برقرار آهي، خوراڪ جــِي کوٽ ۽ بيمارين سبب وڌيڪ 6 ٻارڙا فوت ٿي ويا. مٺي سول اسپتال ۾ داخل ٽن ڏينهن جو رزاق، ٻن مهينن جي ڪنول، چئن مهينن جو حسن، زبيده ۽ هڪ ڏينهن جو ٻارڙو فوت ٿي ويا. هوڏانهن ڇاڇري ۾ به هڪ ٻار غذائي کوٽ سبب فوت ٿي ويو. مٺي، اسلام ڪوٽ، ڇاڇرو، ننگرپارڪر ۽ ڏيپلو تعلقن جي اسپتالن ۾ سوين ٻار ۽ عورتون خوراڪ جي کوٽ ۽ بيمارين سبب داخل آهن.

 

خيبر ايجنسي ۾ فورسز جو آپريشن، 4 دهشتگرد مارجي ويا

خيبر ايجنسي (مانيٽرنگ ڊيسڪ) خيبر ايجنسي ۾ سڪيورٽي فورسز جي هوائي ڪارروائي دوران وڌيڪ 4 دهشتگرد مارجي ويا جڏهن ته سندن پنج ٺڪاڻا تباهه ٿي ويا. سڪيورٽي ذريعن موجب خيبر ايجنسي جي تيره ماٿري ۾ دهشتگردن جي ٺڪاڻن تي بمباري ڪئي وئي. بمباري ۾ چار دهشتگرد مارجي ويا ۽ 5 ڄڻا زخمي ٿي پيا، جڏهن ته سندن 3 ٺڪاڻا تباهه ٿي ويا. سڪيورٽي ذريعن موجب مارجي ويل ۽ زخمي ٿيل دهشتگردن جو تعلق پابندي مڙهيل تحريڪ طالبان پاڪستان ۽ لشڪر اسلام سان آهي. ياد رهي ته سڪيورٽي فورسز گذريل ڏينهن به گن شپ هيليڪاپٽرن جي مدد سان پنجن دهشتگردن کي ماري ڇڏيو هو.

 

سونم ڪپور ڪينسر جي باري ۾ شعور اڀارڻ لاءِ ميدان ۾  اچي وئي

ممبئي(شوبز نيوز)بالي ووڊ جي چلولي ۽ خوبصورت اداڪارا “سونم ڪپور” ڇاتيءَ جي ڪينسر جهڙي موضي مرض بابت عورتن ۾ شعور  ڏيڻ واري مهم جو حصو بڻجي وئي. ڀارتي ميڊيا مطابق ڀارت ۾ ڇاتيءَ جي ڪينسربابت  ڄاڻ ڏيڻ ۽ عورتن کي ان موضي مرض کان بچائڻ لاءِ چندو گڏ ڪرڻ واري تنظيم “ايلي بريسٽ ڪينسر ڪئمپين جي برانڊ” جي ايمبيسٽر آهي. اها فلاحي تنظيم  انهيءَ مقصد جي لاءِ ڪم ڪرڻ واري ٻي تنظيم اوگان ڪينسر فائونڊيشن سان گڏ ان حوالي سان ڪم ڪندي. ٻنهي تنظيمن جي گڏيل ڪم جي حوالي سان سونم ڪپور جو چوڻ هو ته هن مشن جو حصو ٿيڻ تي هو پاڻ کي  تمام گهڻي خوشنصيب سمجهي ٿي.  اسان مان هر ڪو ڪنهن نه ڪنهن ڇاتيءَ جي ڪينسر ۾ ورتل عورت کي ضرور سڃاڻيندو هوندو،  اسان کي ان ڳالهه جي تمام ضرورت آهي ته هن مرض بابت عورتن ۾ ڄاڻ ۽ شعور ڏيون ڇو ته هن مرض جي جلد سڃاڻپ سان ئي علاج ممڪن آهي. هوءَ ان مهم ۾ ڀرپور سهڪار ڪري عورتن ۾ “ ڇاتيءَ جي ڪينسر” جي حوالي سان وڌ کان وڌ حصو وٺندي جنهن لاءِ هو تمام گهڻي پُر اميد نظر اچي ٿي.

 

علي ظفر پاڪستاني فلم جي ڪري ٽي ڀارتي فلمون ٿڏي ڇڏيون

لاهور(شوبز نيوز) مشهور ڳائڻي ۽ اداڪار علي ظفر پاڪستان ۾ ڪم ڪرڻ جي ڪري بالي ووڊ جي ٽن فلمن ۾ ڪم ڪرڻ جي آڇ کي رد ڪري ڇڏيو.  تازو ئي ڀارت جو دورو ڪرڻ دوران کيس بالي ووڊ جي ناليوارن فلمسازن پاران  اهم ڪردارن جي لاءِ  رابطو ڪيو هو پر علي ظفر پاڪستان ۾ پنهنجي پهرين فلم ۾ مصروف هجڻ ڪري ٽنهي فلمن جي ملندڙ آڇ کي رد ڇڏيو. علي طفر ميڊيا کي ٻڌايو ته هلندڙ سال جي شروعات ۾ ئي مان ان ڳالهه جو اعلان ڪري چڪو آهيان ته هن سال مان پاڪستان ۾ ڪم ڪندس ۽ پنهنجي فلم ٺاهيندس. ان جي ڪري مون ڪيترن ئي نوجوان ليکڪن کان اسڪرپٽ به ورتو هو ۽ هاڻي  مون پنهنجي پهرين فلم جي ڪاغذي ڪارروائي پوري ڪري ڇڏي آهي، مون پنهنجو فوڪس هن وقت پاڪستان ۾ پنهنجي فلم تي ئي رکيو آهي.

 

ناليواري قوال غلام فريد صابري کي چاهيندڙن کان وڇڙئي 21سال ٿي ويا

لاهور(شوبز نيوز) غلام فريد صابري، قوالي جي شروعات مبارڪ شاهه جي عرس تي ڪئي“بهر دي جهولي ميري يا محمد” پاڪستان کانسواءِ سموري دنيا ۾ مقبوليت جا رڪارڊ ٽوڙي ڇڏيا.کيس پنهنجي چاهيندڙن کان وڇڙئي 21سال ٿي چڪا آهن پر سندس قواليون اڄ به ماڻهن کي ياد آهن.1930ع ۾ ڀارت جي صوبي اولهه پنجاب ۾ هن پنهنجي اک کولي. ننڍپڻ کان ئي کيس قوالي ڳائڻ جو شوق هو.  قواليءَ جي باقائده تربيت پنهنجي پيءُ عنايت صابري کان حاصل ڪيائين. هن پنهنجي پهرين قوالي هزارين ٻڌندڙن جي سامهون مبارڪ شاهه جي عرس تي ڳائي.سندس قوالي ڳائڻ جو انداز پنهنجي هم عصرن کان مختلف  ۽ اثر رکندڙ هو جنهن جي ڪري کيس هڪ قوال جي حيثيت سان وڏي سڃاڻپ ۽ سٺي موٽ ملي. غلام فريد صابري پنهنجي ڀاءُ مقبول صابري سان گڏ قوالي ڳائيندو هو. 70 ۽ 80جي ڏهاڪي ۾ سندس عروج جو سونهري دور هو.  انهي زماني ۾ هن“بهر دي جهولي ميري يا محمد” جهڙي ڳوالي ڳائي پوري دنيا ۾ پنهنجي فن کي مڃرايو. اردو کانسواءِ پنجابي، سرائڪي ۽ سنڌي زبان ۾ به هن قواليون ڳايون. 5اپريل 1994ع تي  دنيا جوهي چمڪندڙ ستارو پنهنجي چاهيندڙن کان هميشه لاءِ وڇڙي ويو پر اڄ به قوالي جو ذڪر غلام محمد صابريءَ بنا اڻپورو آهي.

 

ڀارتي سپر اسٽارز پاران پنهنجن ٻارن سان گڏ ريمپ تي واڪ

ممبئي(شوبز نيوز) بالي ووڊ ۾ ٿيو انوکو ۽ دلچسپ فيشن ويڪ جتي فلمي ستارن پنهنجن اسٽار ٻارن سان گڏجي ريمپ تي واڪ ڪيو وومين امپاورمينٽ جي پيغام کي عام ڪرڻ لاءِ فلاحي تنظيم طرفان منعقد ميجوان فيشن ويڪ ۾ منيش ملهوترا جا ڪپڙا پائي بالي ووڊ جي قدرآور شخصيتن ريمپ تي جوهر ڏيکاريا ۽ شو کي چار چنڊ لڳائي ڇڏيا ميجوان فيشن ويڪ بالي ووڊ اداڪاره شبانه عظمي منعقد ڪيو، شو ۾ امتاڀ بچن پنهنجي ڌيءَ شويتا ڪپور سان گڏ ريمپ تي واڪ ڪيو ته جيا بچن پنهنجي پٽ اڀيشيڪ سان گڏ واڪ ڪري اسٽيج جي رونق وڌائي اتي ئي ايڪٽر ۽ ڊائريڪٽر فرحان اختر پنهنجي والد مشهور شاعر جاويد اختر سان گڏ ريمپ تي آيو شو جي رونق ان وقت عروج تي نظر آئي جڏهن سونم ڪپور پنهنجي اسٽار پيءُ انيل ڪپور سان گڏ اسٽيج تي آئي اتي ئي سوناڪشي سنها جي پنهنجي والد شتروگهن سنها سان گڏ اسٽيج تي آمد ڪيترن ئي جي دلين جون ڌڙڪنون تيز ڪري ڇڏيون.

 

پاڪ بنگلاديش ڪرڪيٽ سيريز 17 اپريل کان 10 مئي تائين هوندي

ڍاڪا(اسپورٽس نيوز) بنگلاديش ڪرڪيٽ بورڊ پاڪستان خلاف هوم سيريز جي شيڊول کي حتمي شڪل ڏئي ڇڏي آهي گرين شرٽس 13 اپريل تي پهچندي 3 ون ڊي ميچون 17، 19 ۽ 22 اپريل تي ميرپور شير بنگلا نيشنل اسٽيڊيم۾ ئي کيڏيون وينديون واحد ٽي ٽوئنٽي ميچ 20 کان 24 تاريخ  تي ٿيندي جنهن کانپوءِ 2 ٽيسٽ ميچن جي سيريز 28 اپريل کان کلنا ۾ شروع ٿيڻي آهي ٻئين ٽيسٽ جي ميرپور ۾ 6 مئي کان شروعات ٿيندي.

 

ويسٽ انڊيز جي اسپنر سنيل نارائڻ جو بالنگ ايڪشن ڪليئر قرار

جميڪا(اسپورٽس نيوز)ويسٽ انڊيز جي اسپنر سنيل نارائڻ جو بالنگ ايڪشن ڪليئر قرار ڏنو ويو آهي جنهن کانپوءِ هن لاءِ عالمي ڪرڪيٽ جا دروازا هڪ ڀيرو ٻيهر کلي ويا آهن، سنيل نارائڻ گذريل هفتي انٽرنيشنل ڪرڪيٽ ڪائونسل جي منظور ڪيل چنائي جي ليبارٽري ۾ بالنگ ايڪشن جي بائيو مڪينڪ ٽيسٽ ڪرائي هئي ٽيسٽ رپورٽ مطابق بالنگ ڪرائڻ وقت سنيل نارائڻ جي ٻانهن جو موڙ 15 ڊگري جي قانوني حد ۾ اچي ويو آهي سنيل نارائڻ بالنگ ايڪشن جي رپورٽ بي سي سي آءِ جي شڪي بالنگ ايڪشن جي حوالي سان قائم ڪميٽي کي جمع ڪرائي ڇڏي جنهن رپورٽ کي قبول ڪندي ان کي آءِ پي ايل ۾ بالنگ جي اجازت ڏئي ڇڏي آهي.