تازيون خبرون

Daily Archives: April 2, 2015

صنعا ۾سعودي اتحادين جي فيڪٽري تي بمباري، 37 مزدور مارجي ويا

رياض/صنعا(م.ڊ) يمن جي گادي واري شهر صنعا ۾ فيڪٽري تي ٿيل بمباري ۾ مارجي ويلن جو انگ 37 ٿي ويو، مارجي ويلن ۾ پاڪستاني شهري به شامل هئڻ جا اطلاع آهن، صنعا ۾ ڦاٿل 178 پاڪستانين جي رجسٽريشن مڪمل، کين چين جي سامونڊي جهاز ذريعي جبوتي پهچايو ويندو… يمن ۾ شديد ويڙهه جاري آهي، صنعا ۾ فيڪٽري تي ٿيل بمباري ۾ مارجي ويلن جو انگ 37 ٿي ويو آهي، مارجي ويلن ۾ پاڪستاني به شامل هئڻ جا اطلاع مليا آهن، اطلاع آهن ته مارجي ويلن ۾ اڪثريت مزدورن جي آهي. بمباري سبب هر طرف تباهي ۽ بربادي آهي پرڏيهي خابرو اداري مطابق يمن جي سرحد تي سعودي سيڪيورٽي فورسز ۽ حوثي باغين وچ ۾ سخت جهڙپون جاري آهن علائقو زوردارڌماڪن ۽ سخت فائرنگ جي آوازن سان گونجي رهيو آحي عدن ۾ باغين ۽ سرڪاري فوج وچ ۾ جهڙپن ۾ 36 ڄڻن جي مارجڻ جا اطلاع آهن ڌالي شهر ۾ به رتوڇاڻ ۾ 30 باغي مارجي ويا، يمن صوبي شبوه ۽ معارب جي سرحد تي باغين ۽ مقامي قبيلي ۾ ويڙهه جاري آهي ميڊيا رپورٽن مطابق تازين جهڙپن ۾ 15 باغي مارجي ويا گادي واري شهر صنعا ۾ به سعودي جهاز باغين جي ٺڪاڻن کي نشانو بڻائي رهيا آهن يمني پرڏيهي وزير چيو آهي ته يمني شهرين ۽ انفراسٽرڪچر کي بچائڻ لاءِ جيترو جلدي ممڪن ٿئي يمن ۾ زميني ڪارروائي به شروع ڪئي وڃي  جڏهن ته سعودي جي گادي واري شهر رياض ۾ ميڊيا بريفنگ دوران برگيڊيئر جنرل احمد عصيري  ٻڌايو ته زميني رستي کان يمن ۾ مداخلت جي في الحال ضرورت ناهي عدن ۾ بمباري جو مقصد باغين کي ڏاکڻين شهرن طرف اڳڀرائي کان روڪڻ آهي، هن وڌيڪ چيو هت يمن کي فراهم ڪيل هر قسم جي مدد کي ڀليڪار چئون ٿا  جڏهن ته اهو سفارتي ذريعن سان ئي ممڪن ٿيڻ گهرجي، جنرل عصيري ٻڌايو ته باغين هن وقت ڳوٺاڻن علائقن ۾ پناهه وٺي رکي آهي جڏهن ته انهن علائقن تي بمباري جو ارادو ناهي ان جي نتيجي ۾ بيگناهه شهرين جي مارجڻ جو خدشو آهي باغين خلاف سعودي عرب ۽ ان جا اتحادي فوج جو آپريشن ستين ڏينهن ۾ داخل ٿي ويو سعودي عرب ۽ يمن جي سرحد سان لاڳاپيل علائقن ۾ سخت جهڙپون جاري آهن يمني پرڏيهي وزير سعودي عرب کان زميني ڪارروائي جو مطالبو ڪيو آهي.

 

يمن بحران: اپوزيشن پارٽين اي پي سي گهرائڻ جو مطالبو ڪري ڇڏيو

ڪراچي (اسٽآف رپورٽر) بلاول هائوس ڪراچي ۾ اپوزيشن تنظيمن جي اجلاس ۾ اڳوڻي صدر آصف علي زرداري، اسفند يار ولي، ڊاڪٽر فاروق ستار، سيد سردار، راشد محمود سومرو ۽ اسرار الله زهري شريڪ ٿيا، اجلاس ۾ پارليامينٽ جو گڏيل اجلاس ۽ اي پي سي گهرائڻ جي سفارش ڪئي وئي جنهن کي اتفاق راءِ سان منظور ڪيو ويو آصف زرداري اجلاس کي خطاب ڪندي چيو ته يمن جي صورتحال تي سمورين تنظيمن کي اعتماد ۾ وٺڻ جو فيصلو ڪيو وڃي جنگ ۾ شموليت ۽ فوجي دستا موڪلڻ جو فيصلو سوچي سمجهي ڪرڻو پوندو ان اهم مسئلي تي تحريڪ انصاف سان به مشاورت چاهيون ٿا،  آصف زرداري جو چوڻ هو ته  سعودي عرب جي سالميت عزيز  آباد پر خطي جو امن به قائم رکڻ گهرجي اجلاس کانپوءِ ميڊيا کي بريفنگ ڏيندي اڳوڻي صدر زرداري چيو ته اسلامي ملڪن ۾ باهه لڳل آهي يمن صورتحال ۽ خطي جي سيڪيورٽي خطري ۾ آهي يمن جي صورتحال تي پاڪستان اهم ڪردار ادا ڪري سگهي ٿو  ان موقعي تي ميڊيا سان ڳالهائيندي ايم ڪيو ايم اڳواڻ فاروق ستارچيو ته يمن جي معاملي تي قومي پاليسي واضح ڪرڻ لاءِ حڪومت کي سڀني کي گڏ ويهارڻ گهرجي، قومي پاليسي کانپوءِ جيڪڏهن ڪوبه نتيجو نڪرندو ته پوءِ سڀ ئي ذميوار هوندا، يمن جي صورتحال تي پوري قوم کي ڳڻتي آهي ذميواري سان قومي پاليسي واضح ڪرڻ گهرجي.

 

سعودي حڪومت پاڪستان کان فوجي مدد گهري ورتي

رياض(م.ڊ) سعودي عرب يمن جنگ ۾ پاڪستان کان فوجي مدد گهري ورتي، اهڙي مدد سعودي اختيارين پاڪستان جي سعودي ويل وفد کان گهري آهي، ذريعن جو چوڻ آهي ته خواجه آصف جي سربراهي ۾ وفد اڄ ڏيهه واپس پهچي وزيراعظم کي سعودي جي مدد گهرڻ بابت آگاهي ڏيندو، سعودي ويب سائيٽ دعويٰ ڪئي آهي ته پاڪستان فوج جو هڪ دستو سعودي عرب موڪليندو. ذريعن جو چوڻ آهي ته بچاءَ واري خواجه آصف جي سربراهي ۾ سعودي عرب ويل وفد رياض ۾ سعودي اختيارين سان ملاقات ڪئي ۽ يمن جنگ ۾ هر ممڪن سهڪار جي خاطري ڪرائي. ذريعن موجب سعودي اختيارين يمن ۾ باغين کي منهن ڏيڻ لاءِ پاڪستان کان فوجي مدد گهري ورتي آهي، جڏهن ته سعودي ويب سائٽ به دعويٰ ڪئي آهي ته پاڪستان پنهنجو هڪ فوجي دستو سعودي عرب موڪليندو. ذريعن موجب پاڪستان سعودي اختيارين کي خاطري ڪرائي آهي ته جيڪڏهن سعودي عرب جي سلامتي ۽ جاگرافي کي ڪوبه نقصان پهتو ته پاڪستان پنهنجا سمورا وسيلا استعمال ڪري سعودي عرب جو دفاع ڪندو. پاڪستاني وفد سعودي اختيارين کي وزيراعظم نواز شريف جو خاص پيغام به پهچايو ۽ چيو ته پاڪستان دوست ملڪن سان رابطا ڪري يمن بحران جو پرامن حل ڪڍڻ لاءِ ڪوششون ڪري رهيو آهي. خواجه آصف جي سربراهي ۾ وفد اڄ ڏيهه واپس پهچندو، وفد وزيراعظم کي سعودي عرب طرفان فوجي مدد گهرڻ بابت آگاهي ڏيندو. ذريعن جو چوڻ آهي ته فوج سعودي عرب موڪلڻ جو حتمي فيصلو وزيراعظم نواز شريف ڪندو.

 

يمن جي معاملي تي پاڪستان کي غير جنابدار رهڻ گهرجي: خورشيد شاهه

سکر (بيورو) قومي اسيمبليءَ ۾ مخالف ڌُر جي اڳواڻ سيد خورشيد احمد شاهه چيو آهي ته دُنيا اندر هر شعبي ۾ مقابلا ۽ چئلينجز شروع ٿي چڪا آهن پر اسان رُڳو هڪ ٻئي جي مخالفت ۾ پورا آهيون، پاڪستان جو سڀ کان وڏو مسئلو وڌندڙ آبادي آهي جنهن تي ڪنٽرول لاءِ اسان سڀني کي گڏجي رٿابندي ڪرڻي پوندي. اهڙن خيالن جو اظهار هُن ڊپٽي ڪمشنر سکر آفيس ۾ ڪمپيوٽرائزڊ ڊوميسائيل رجسٽريشن سينٽر جي افتتاح دوران ميڊيا سان ڳالهائيندي ڪيو. هن وڌيڪ چيو ته بنگلاديش به آباديءَ تي ڪنٽرول ڪري ويو آهي پر پاڪستان ۾ آبادي تي ڪنٽرول لاءِ بهتر رٿابندي نه هئڻ ڪري اسان پنهنجي ملڪ کي ترقي جي راهه تي گامزن نه ڪري سگهيا آهيون، ملڪ جو الميو اهو آهي ته اسين 20 ڪروڙ ماڻهن کي صاف پيئڻ جو پاڻي به مهيا نه ٿا ڪري سگهون. هن چيو ته پ پ جي گذريل حڪومت غربت بابت سروي ڪرايو، جنهن ۾ غربت جي ڪل شرح 67 سيڪڙو آهي، جنهن مان 16 سيڪڙو هيٺين سطح جي غربت آهي، 48 کان 70 سيڪڙو تائين ٻار اسڪول وڃن ٿا. سيد خورشيد احمد شاهه چيو ته سکر ۾ هڪ ٻيو پراجيڪٽ به آندو پيو وڃي جيڪو سکر ضلعي جي سمورن سرڪاري ملازمن جي ڊيٽا گڏ ڪري سڃاڻپ ڪندو ته جيئن ٻه ٻه نوڪريون ڪندڙ ۽ جعلي طريقي سان پگهارون کائيندڙن جي نشاندهي ٿي سگهي. هن ميڊيا سان ڳالهائيندي وڌيڪ چيو ته اسان کي پنهنجي پرڏيهي پاليسي ۾ غيرجانبدار رهڻو پوندو، يمن ۽ سعودي عرب جي سرحدن جو احترام ڪرڻ گهرجي ڇاڪاڻ ته اسان اڳ ئي افغانستان جي باهه ۾ سڙي رهيا آهيون. هن وڌيڪ چيو ته سنڌ ۾ امن امان جي صورتحال سٺن آفيسرن جي سخت محنت ڪري بهتر ٿي آهي، ڀنگ لاءِ اغوا جي واقعن جي شرح تمام گهٽجي وئي آهي، ڪار ۽ موٽرسائيڪلن جي ڦر 5 سيڪڙو بچي آهي. افتتاح جي موقعي تي ڊوميسائيل رجسٽريشن سينٽر جي انچارج ٻڌايو ته هن سينٽر تي 4 ملين رپيا خرچ آيو آهي، جيڪو پبلڪ پرائيويٽ پارٽنرشپ تحت تيار ڪيو ويو آهي. هن ٻڌايو ته ڊوميسائيل ۽ پي آر سي لاءِ 520 رپيا فيس مقرر ڪئي وئي آهي ۽ هڪ ڪلاڪ اندر ڊوميسائيل تيار ڪري ڏنو ويندو. بعد ۾ سول سروسز اڪيڊمي جي ڪامياب اُميدوارن جي هڪ وفد ڊي سي آفيس ۾ سيد خورشيد احمد شاهه سان ملاقات ڪئي. هن وفد کي چيو ته اهي غريب آبادي جو دورو ڪن ۽ اُنهن جي مسئلن جي نشاندهي ۽ حل لاءِ پلاننگ ڪن، ڇاڪاڻ ته ملڪ جي سسٽم کي بيورو ڪريسي هلائي رهي آهي ملڪ جي خوشحالي ۽ ترقي ۾ سندن ڪردار اهم آهي. اپوزيشن ليڊر سيد خورشيد احمد شاهه گورنمينٽ اسلاميه سائنس ڪاليج سکر ۾ شهيد ذوالفقار علي ڀٽو ڊجيٽل لائبرري جو افتتاح ڪيو ۽ معائنو پڻ ڪيو. بعد ۾ سيد خورشيد احمد شاهه پوليس لائين سکر ۾ پوليس ڪارڪردگي جي حوالي سان هڪ تقريب ۾ شرڪت ڪئي ۽ سٺي ڪارڪردگي ڏيکاريندڙ اهلڪارن ۽ عملدارن ۾ سرٽيفڪيٽ ورهايا.

 

قوم دهشتگردي خلاف پاڪ فوج سان گڏ بيٺل آهي: آرمي چيف

راولپنڊي (م.ڊ) آرمي چيف جنرل راحيل شريف جهلم ويجهو ٽلا فائرنگ رينج جو دورو ڪيو ۽ نوجوانن جي قابليت کي ساراهيو، آءِ ايس پي آر مطابق جنرل راحيل شريف پنهنجي ٽلا فائرنگ رينج جو دوور ڪندي مشقن ۾ شريڪ نوجوانن کي ساراهيو  آرمي چيف جو چوڻ هو ته قوم دهشتگردي خلاف پاڪ فوج سان گڏ بيٺل آهي ۽ پاڪ فوج هر خطري کي منهن ڏيڻ لاءِ تيار آهي ، هن جو وڌيڪ چوڻ هو ته پاڪ فوج هڪ منظم فوج آهي ۽ هو دهشتگردن کي ختم ڪرڻ جو پنهنجو مشن مڪمل ڪندي.

 

سنڌ ۽ پنجاب ۾ مڪاني چونڊن لاءِ 42 ڪروڙ بيلٽ پيپرن جي ڇپائي جو ڪم پرنٽنگ ڪارپوريشن حوالي

اسلام آباد (بيورو) اليڪشن ڪميشن آف پاڪستان پنجاب ۽ سنڌ ۾ 20 سيپٽمبر تي ٿيندڙ مڪاني چونڊن لاءِ 42 ڪروڙ بيلٽ پيپرن جي ڇپائي وارو ڪم پرنٽنگ ڪارپوريشن آف پاڪستان کي سونپي ڇڏيو آهي. اربع ڏينهن سيڪريٽري اليڪشن ڪميشن شير افگن صحافين کي ٻڌايو ته پرنٽنگ ڪارپوريشن آف پاڪستان مقرر مدي ۾ بيلٽ پيپرن جي ڇپائي مڪمل ڪرڻ لاءِ 40 نيون مشينون خريد ڪندي. هن چيو ته سيڪريٽري اليڪشن ڪميشن، ڊائريڪٽر پوسٽ  آفيس، ايڊيشنل سيڪريٽري ڪابينه ڊويزن، ايم ڊي پرنٽنگ ڪارپوريشن آف پاڪستان ۽ ڊي جي بجيٽ تي ٻڌل 5 رڪني ٽيم جوڙي وئي آهي. جيڪا ڇپائي واري عمل جي نگراني ڪندي. سيڪريٽري اليڪشن ڪميشن چيو ته مڪاني چونڊن جو شيڊيول 28 جولاءِ تي جاري ڪيو ويندو. ۽ اميدوارن جي قطعي فهرست 24 آگسٽ تي جاري ٿيندي. خيبر پختونخواه، پنجاب ۽ بلوچستان ۾ مڪاني چونڊن لاءِ مجموعي طور 52 ڪروڙ بيلٽ پيپر ڇاپيا ويندا جن ۾ پنجاب ۽ سنڌ جي ڇپجندڙ بيلٽ پيپرن جو تعداد 42 ڪروڙ ۽ ڪي پي ڪي لاءِ 10 ڪروڙ هوندو.

 

پ پ اڻڌريو ڪردار ادا ڪندي، اين اي 246 جي سيٽ ايم ڪيو ايم جي آهي: وڏو وزير

ڪراچي (اسٽآف رپورٽر) سنڌ جي وڏي وزير سيد قائم علي شاهه تڪ اين اي 246 ۾ ضمني چونڊن جي حوالي سان چيو آهي ته پيپلز پارٽي هن اليڪشن ۾ پنهنجو اميدوار نه بيهاريندي، ميڊيا سان ڳالهائيندي سنڌ جي وڏي وزير جو چوڻ هو ته اين اي 246 جي سيٽ ايم ڪيو ايم جي آهي ۽ پيپلز پارٽي انهن چونڊن ۾ غير جانبدار رهندي، هن واضح ڪيو ته پيپلز پارٽي ان تڪ جي اليڪشن ۾ انتظامي ۽ پارٽي جي حوالي سان غير جانبدار ڪردار اد اڪندي ۽ ان جي پارٽي طرفان تڪ اين اي 246 ۾ ڪوبه اميدوار نه بيهاريو ويندو. چاهيون ٿا ته اليڪشن امن امان سان ۽ جمهوري انداز ٿي ٿي وڃي، ٻئي پارٽيون بردباري جو مظاهرو ڪن.

 

غيرقانوني شادي هالن کان دهشتگردن کي به سهولتون فراهم ڪرڻ جا به اطلاع آهن: شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات کاتي واري وزير شرجيل انعام ميمڻ چيو آهي ته سرڪاري زمينن تي هڪ منظم مافياقبضو ڪري اتي شادي هال ۽ ٻيون تجارتي سرگرميون ڪري نه صرف هن  شهر جي عوام ۽ ٻارن کان انهن جون خوشيون کسي ورتيون آهن پر اتان حاصل ڪيل آمدني مان دهشتگرد سرگرمين ۾ مدد ورتي پئي وڃي. سرڪار زمينن تي قبضا ۽ اتي قائم غيرقانوني شادي هال، تجارتي سرگرمين ۽ ٻين آفيسن ۽ سرگرمين خلاف ان وقت تائين ايڪشن جاري رهندو جيستائين ان جو مڪمل خاتمو نه ٿو ڪيو وڃي. اڃان تائين سمورن غيرقانوني هالن جي حوالي سان منهنجي سامهون ڪو نالو نه آهي ۽ اهي نامعلوم آهن. البته جيئن ئي انهن جون شاهديون ملنديون ته ان پٺيان ڪنهن جو هٿ آهي ته ان کي ميڊيا جي سامهون بي نقاب ڪيو ويندو. ايڊمنسٽريٽر ڪراچي ۽ سمورن ڊي ايم سيز جي ايڊمنسٽريٽرن کي هدايت ڪئي وئي آهي ته اهي پنهنجي پنهنجي ضلعي ۾ غيرقانوني شادي هالن ۽ قبضن خلاف آپريشن کي وڌيڪ تيز ڪن ۽ جيڪڏهن ڪو ايئن نه ڪندو ته مان ان کي به ان ۾ شريڪ سمجهندس. ناجائز شادي هالن ۽ ٻين قبضن کي قائم ڪرڻ ۾ ڪي ايم سي جي آفيسرن جي ملوث هئڻ جون شاهديون مليون آهن ان حوالي سان به ايڊمنسٽريٽر ڪراچي کي هدايتون جاري ڪيون آهن ته انهن خلاف ڪارروائي ڪندي انهن کي نوڪرين تان معطل ڪيو وڃي. اهڙن خيالن جو اظهار هن اڄ ڊسٽرڪٽ ايسٽ ۾ قائم ڪشمير لان تي اي  بي سي ۾ قائم غيرقانوني شادي لان کي ڊاهڻ بعد ميڊيا سان ڳالهائيندي ڪيو. ان موقعي تي ايڊمنسٽريٽر ڪراچي ثاقب سومرو، ميٽروپوليٽن ڪمشنر ڪراچي مسعود عالم، ڊي سي ايسٽ ۽ ٻيا اعليٰ آفيسر به موجود هئا.  صوبائي وزير ڪي ايم سي جي زمين تي موجود راند جي ميدان ۾ اڏيل غير قانوني شادي هال کي پنهنجي نگراني ۾ ڊهرايو ۽ اتي موجود اعليٰ آفيسرن کي سمورو سامان ضبط ڪرڻ جو حڪم جاري ڪيو. هن ڊي جي پارڪ کي هدايتون ڏنيون ته ڄاڻايل پارڪ مان سامان کڻائي هتي پارڪ قائم ڪيو وڃي ۽ ان کي عوام جي حوالي ڪيو وڃي. ان موقعي تي ميڊيا سان ڳالهائيندي صوبائي وزير شرجيل انعام ميمڻ چيو ته هڪ منظّم مافيا سالن کان عوامي پارڪن، راندين جي ميدانن سميت ٻين فلاهي زمينن تي قبضو ڪري اتي غيرقانوني شادي هال ۽ ٻيون تجارتي سرگرميون شروع ڪيون آهن. هن چيو ته افسوس ته ماضي ۾ ناظمن ۽ ٽائون ناظمن پنهنجن اختيارن جو تجاوز ڪندي هن زمين جي الاٽمينٽ ڪئي. ڄاڻايل شادي لان 12 سالن کان راندين جي ميدان بجاءِ شادين لاءِ استعمال ٿيندو رهيو ۽ ان ۾ ڪي ايم سي جي ڪجهه آفيسرن جي ملوث هجڻ جون شاهديون به مليون آهن. هن چيو ته انهن آفيسرن خلاف جاچ جا حڪم ايڊمنسٽريٽر ڪراچي کي ڏنا ويا آهن ۽ کين هدايتون ڏنيون آهن ته ملوث آفيسرن خلاف قانوني ڪارروائي ڪندي انهن کي نوڪريون مان ڪڍيو وڃي. شرجيل انعام ميمڻ چيو ته سرڪاري زمينن تي قبضا ۽ انهن تي غيرقانوني شادي هالن ۽ ٻيون ڪمرشل سرگرميون ڏوهه آهي ۽ اسان هاڻ سرڪاري زمينن تي ڏوهه ڪندڙن کي ڪنهن صورت ۾ نه ڇڏينداسين. هن چيو ته غيرقانوني شادي هالن کان دهشتگردن کي به سهولتون فراهم ڪرڻ جا به اطلاع آهن  ان سلسلي ۾ سمورن معاملن تي غور ڪري ان ۾ ملوث ماڻهن جو گهيرو تنگ ڪيو پيو وڃي. هڪ سوال جي جواب ۾ هن چيو ته جتي جتي به ماسٽر پلان جي خلاف ڪنهن قسم جي ڪابه تجارتي، رهائشي يا ٻيون سرگرميون ڪيون پيون وڃن اهو غيرقانوني آهي ۽ ان ۾ سمورن سياسي جماعتن کي به وارننگ ڏيان ٿو ته هو فوري طور تي سرڪاري زمينن، پارڪن راندين جي ميدانن، رفاحي ۽ فلاحي زمينن تي قائم پنهنجن آفيسن کي فوري طور تي هٽائين ٻي صورت ۾ اسان انهن کي مسمار ڪري ڇڏينداسين ۽ انهن خلاف ڪيس به داخل ڪرايا ويندا. هڪ ٻي سوال جي جواب ۾ شرجيل انعام ميمڻ چيو ته ايستائين ڪجهه ڏينهن دوران 40 کان وڌيڪ غيرقانوني شادي هالن کي مسمار ڪيو ويو آهي ۽ اڳتي به اهو ايڪشن جاري رهندو ۽ ان کي ان وقت تائين جاري رکيو ويندو جيستائين پوري صوبي جو هڪ هڪ غيرقانوني شادي هال کي مسمار نٿو ڪيو وڃي.

 

تحريڪ انصاف کي جناح گرائونڊ ۾ جلسي جي آڇ، ٻئي پارٽيون هر قسم جي ٽڪراءُ کان پاسو ڪن: الطاف حسين

ڪراچي (اسٽآف رپورٽر) متحده قومي موومنٽ (ايم ڪيو ايم) جي سربراهه الطاف حسين چيو آهي ته پاڪستان تحريڪ انصاف جناح گرائونڊ سميت ڪراچي ۾ هر هنڌ جلسو ڪري سگهي ٿي. پنهنجي هڪ بيان ۾ متحده جي اڳواڻ چيو ته کيس اڱاري واري ڏينهن ڪراچي جي قومي اسيمبلي جي تڪ اين اي 246 جي رهواسين ۽ پاڪستان تحريڪ انصاف جي اڳواڻن ۽ ڪارڪنن وچ ۾ پيش آيل واقعي تي انتهائي ڏک ٿيو آهي. هن چيو ته هو ان واقعي ۾ ڪنهن کي به ملوث قرار ڏيڻ نه ٿو چاهي ۽ خواهش آهي ته ان تڪ تي ضمني چونڊ صاف ۽ شفاف نموني ٿئي. الطاف حسين چيو ته جمهوريت ۾ ٻن پارٽين وچ ۾ زباني تڪرار، تنقيد ۽ حمايت معمول جي ڳالهه آهي. هن چيو ته پاڪستان تحريڪ انصاف ڪراچي ۾ ڪنهن به هنڌ جلسو ڪري سگهي ٿي ۽ ايم ڪيو ايم اهو جلسو ڪرڻ ۾ پي ٽي آءِ سان سهڪار ڪندي پر پي ٽي آءِ کي شهداءِ يادگار جي حفاظت کي يقيني بڻائڻو پوندو. هن متحده جي اڳواڻن ۽ ڪارڪنن کي هدايت ڪئي ته اهي هر صورت صبر ۽ تحمل کان ڪم وٺن ۽ پاڻ کي ڪنهن به ڇڪتاڻ کان پاسيرو رکن.ا

 

پيٽروليم شين جي قيمتن ۾ اضافو ڀتاخوري آهي: عمران خان

اسلام آباد (بيورو) پاڪستان تحريڪ انصاف جي چيئرمين عمران خان چيو آهي ته پيٽروليم شين جي قيمتن ۾ اضافي جي مذمت ڪندي ان کي ڀتاخوري قرار ڏنو آهي هڪ بيان ۾ تحريڪ انصاف جي چيرئمين عمران خان پيٽروليم شين جي قيمتن ۾ اضافي کي بلاجواز قرار ڏنو آهي عوام تي اضافي مالي ٻوجهه جي فيصلي کي واپس وٺڻ جو مطالبو ڪندي چيو ته وفاقي حڪومت پاران پيٽرول چار رپيا ۽ ڊيزل 3 رپيا في ليٽر مهانگو ڪري ورتو جيڪا عوام سان وڏي ناانصافي ۽ ڀتاخوري جي مترادف آهي.