تازيون خبرون

Monthly Archives: April 2015

جيڪڏهن ڌانڌلين جا ثبوت ٿيلهن ۾ آهن ته پوءِ الزام هڻندڙ وٽ ڇا آهي : نواز شريف

لنڊن (مانيٽرنگ ڊيسڪ) وزيراعظم نواز شريف چيو آهي ته جيڪڏهن ڌانڌلين جا ثبوت ٿيلهن ۾ موجود آهن ته پوءِ الزام لڳائيندڙن وٽ ڇا آهي؟، پاڪستان ۾ اهڙي قسم جي سياست نه ٿيڻ گهرجي، جنهن سان ملڪ کي نقصان پهچي، ڇانوڻي بورڊ جي نتيجن مان خوش آهي، مڪاني چونڊن ۾ به ن ليگ اڪثريت سان ڪاميابي ماڻيندي. لنڊن  ميڊيا سان ڳالهائيندي وزيراعظم نواز شريف چيو ته برطانيه پاڪستان جو سٺو دوست آهي، جنهن هر ڏکي وقت ۾ پاڪستان جو ساٿ ڏنو آهي ۽ مختلف شعبن ۾ سيڙپڪاري ڪري رهيو آهي. هن چيو ته ڪينٽونمينٽ بورڊز ۾ ن ليگ جي ڪاميابي سٺو عمل آهي، مڪاني چوندن ۾ به نواز ليگ اڪثريت سان ڪاميابي ماڻيندي. هڪ سوال جي جواب ۾ وزيراعظم نواز شريف چيو ته  چين جي سيڙپڪاري پاڪستان جي معيشت جي بحالي لاءِ انتهائي اهم آهي، چيني سيڙپڪاري سان رستا ۽ گوادر ۾ نئون ايئرپورٽ ٺهندو، جڏهن ته چين بجلي جي شعبن ۾ به سيڙپڪاري ڪري رهيو آهي.  ڌانڌلين بابت سوال جي جواب ۾ وزيراعظم چيو ته جيڪڏهن ڌانڌلين جا ثبوت ٿيلهن ۾ موجود آهي ته پوءِ الزام لڳائيندڙن وٽ ڇا آهي، پاڪستان ۾ اهڙي قسم جي سياست نه ٿيڻ گهرجي. سبين محمود جي قتل بابت سوال جي جواب ۾ وزيراعظم چيو ته واقعو افسوسناڪ آهي، قاتلن کي ڪٽهڙي ۾ آندو ويندو.

 

ڪراچي ۾ ٽارگيٽيڊ آپريشن منطقي انجام تائين جاري رهندو: آرمي چيف

ڪراچي(اسٽاف رپورٽر) آرمي چيف جنرل رحيل شريف رينجرز ۽ انٽيليجينس ايجنسين کي هدايت ڪئي ته ٽارگيٽ ڪلرز ۽ انهن جو ساٿ ڏيندڙن کي هر حال ۾ پڪڙيو وڃي، هن ان ڳالهه جو به سڪ ظاهر ڪيو ته ڪراچي ۾ ٿيندڙ هاڻوڪن قتلن جي پويان جيڪي مقصد آهن اهي ٻين ڪاررواين کان مختلف آهن، جن کي هر حال ۾ بينقاب ڪري پنهنجي انجام تائين پهچايو ويندو.آرمي چيف جنرل راحيل شريف ڪور هيڊ ڪواٽرز ڪراچي جو دورو پڻ ڪيو، ان موقعي تي ڪور ڪمانڊر ڪراچي ليفٽيننٽ جنرل نويد مختيار ۽ ڊي جي ريجنرز سنڌ مير جنرل بلال اڪبر ڪراچي آپريشن جي حوالي سان ارمي چيف کي وضاحت ڏني ۽ امن امان جي تازي صورتحال جي باري ۾ پڻ ڄاڻ ڏني. آرمي چيف آپريشن تي اطمينان جو اطهار ندي چيو ته آپريشن بنا فرق ۽ وڏي پئماني تي ٿي رهيو آهي جنهن سان ٽارگيٽ ڪلنگ ۽ ڀتي جي واقعن ۾ گهٽتائي ٿي آهي. ڪراچي آپرشن کي منطقي انجام تائين جاري رهندو. جنرل راحيل شريف جو چوڻ هو ته معيشت ۾ بهتري لاءِ ڪراچي ۾ امن امان پهرين ترجيح آهي، شهر مان سموري مافيا جي خاتمي تائين ڪم ڪندا رهنداسين، ڪراچي ۾ قتل جا تازا واقعا هڪ مخصوص پيٽرن تحت ٿي رهيا آهن جن جي منصوبابندي ڪندڙن جو ايجنسيون ۽ رينجرز سراغ لڳائين، ان موقعي تي آرمي چيف اين اي 246 جي پرامن چونڊن تي رينجرز جي ڪردار کي به ساراهيو.

 

قانون ڪالعدم قرار ڏيڻ لاءِ عدالت ان کي آئين جي ڪسوٽي تي پرکيندي آهي: سپريم ڪورٽ

اسلام آباد (بيورو) سپريم ڪورٽ آف پاڪستان 18 ۽ 21 آئيني ترميم ڪيس جي ٻڌڻي دوران چيو ته قانون ڪالعدم قرار ڏيڻ لاءِ عدالت ان کي آئين جي ڪسوٽي تي پرکي ٿي اسان ان علائقي ۾ داخل ٿيڻ جي ڪوشش ڪري رهيا آهيون جنهن جو دروازو بند آهي وڪيل معاملي تي عدالت جي مدد ڪن جڏهن ته ڪيس ۾ لاهور هاءِ ڪورٽ بار جي وڪيل حامد خان پنهنجي دليلن ۾ چيو آهي ته عدالت رياست جو اهم ٿنڀ آهي جنهن کي نظرانداز نٿو ڪري سگهجي پي سي او جي تحت عدليه جا ڪافي اختيار کسيا ويا هئا اربع تي چيف جسٽس آف پاڪستان مسٽر جسٽس ناصرالملڪ جي سربراهي ۾ سپريم ڪورٽ جي 17 رڪني بئنچ ڪيس جي ٻڌڻي ڪئي ٻڌڻي دوران لاهور هاءِ ڪورٽ راولپنڊي بينچ 18هين آئيني ترميم بابت داخل درخواست واپس وٺي ڇڏي جڏهن ته لاهور هاءِ ڪورٽ بار جي وڪيل حامد خان دليل ڏيندي چيو ته عدالت رياست جو اهم ٿنڀ آهي جنهن کي نظرانداز نٿو ڪري سگهجي پي سي او جي تحت عدليه جا ڪافي اختيار کسيا ويا هئا جسٽس ثاقب نثار پڇا ڪئي ته ڇا اوهان جا سمورا دليل آئين جي بنيادي ڍانچي بابت آهن جڊيشل ڪميشن کي ججز مقرري جا اختيار ڏنا وڃن ته اهي به ادارن کان رپورٽون وٺي سگهن ٿا جسٽس ثاقب نثار ريمارڪس ۾ چيو ته اٽارني جنرل سميت ڪيترن ئي اعليٰ عهدن جي منظوري وزيراعظم ڏي ٿو ته پوءِ ججز مقرري ڪميٽي جي ڪهڙي ضرورت هئي جسٽس آصف سعيد کوسا چيو ته ڪجهه معاملن تي آئين دروازا بند ڪري ڇڏيا آهن ان تي عدالت ڪجهه نٿي چئي سگهي. ان کان پوءِ ٻڌڻي سومر تائين ملتوي ڪئي ويئي.

 

ڪميشن بابت ميڊيا تي غلط رپورٽس هلي رهيون آهن: چيف جسٽس

اسلام آباد (بيورو) جڊيشل ڪميشن، عام چونڊن ۾ مبينا ڌانڌلين بابت سياسي جماعتن کان 5 مئي تائين شاهدن جي لسٽ طلب ڪري ورتي،جڏهن ته تحريڪ انصاف ڪميشن پاران پڇيل سوالنامي جي جواب ۾ شاهد پيش ڪرڻ کان معذرت ڪري ڇڏي. جـُڊيشل ڪميشن جو اجلاس چيف جسٽس ناصر المــُلڪ جي سربراهي ۾ سـُپريم ڪورٽ جي عمارت ۾ ٿيو. اجلاس دوران ڳالهائيندي چيف جسٽس ناصرالملڪ چيو ته ڪميشن بابت ميڊيا تي غلط رپورٽس هلي رهيون آهن ۽ ميڊيا جيتبصرن سبب ڪارروائي متاثر ٿي رهي آهي. جسٽس ناصر المـُلڪ چيو ته ميڊيا احتياط کان ڪم نه ورتو ته ڪميشن جي ڪارروائي اِن ڪئمرا هلائي ويندي. چيف جسٽس چيو ته ڪنهن به جماعت جواب داخل نه ڪرايو، ته به ڪميشن ڪم جاري رکندي، سوالنامو ڪميشن جي سهڪار لاءِ جاري ڪيو ويو. انکانپوءِ جڊيشل ڪميشن، پنج مئي تائين شاهدن جي لسٽ طلب ڪندي اجلاس ملتوي ڪري ڇڏيو. اجلاس دوران پيپلز پارٽي، تحريڪ انصاف، جماعت اسلامي ۽ مهاجر قومي موومينٽ سوالنامي تي جواب پڻ جمع ڪرايا. مبينا ڌانڌلي جي جاچ ڪندڙ جڊيشل ڪميشن ۾ جمع ڪرايل جواب ۾ تحريڪ انصاف چيو آهي ته نون ليگ هر صورت ۾ چونڊون کٽڻ چاهي پئي جنهن لاءِ حڪمران جماعت ڌانڌلي لاءِ باقاعده سيل ٺاهيو. تحريڪ انصاف جي جواب ۾ چيو ويو ته 2013ع وارين عام چونڊن ۾ منظم ڌانڌلي جو منصوبو جوڙيو ويو آهي،جيڪو پنجاب، سنڌ ۽ بلوچستان تائين محدود هو. جواب ۾ وڌيڪ چيو ويو ته ڌانڌلي جي منصوبي تي عملدرآمد بابت نون ليگ جي قيادت کي آگاهه ڪيو ويو هو. تحريڪ انصاف موجب مسلم ليگ نون جي منظم ڌانڌلي جي منصوبي ۾ ريٽرننگ آفيسرن هر ممڪن مدد فراهم ڪئي، باقي جماعتون ۽ ماڻهو به ڌانڌلي ۾ شريڪ ٿي سگهن ٿا پر ڌانڌلي جو اصل منصوبو نون ليگ جو آهي. پي ٽي آءِ پاران جواب ۾ چيو ويو ته هــُو ڌانڌلي جي الزامن بابت 74 تڪن جو مواد جمع ڪرائي چـُڪا آهن،جــُڊيشل ڪميشن نجم سيٺي ۽ ان وقت جي چيف سيڪريٽري پنجاب کي طلب ڪري پـُڇاڻو ڪيو وڃي. تحريڪ انصاف پنهنجي لکت واري جواب ۾ ڌانڌلين بابت شاهدين فراهم ڪرڻ کان معذرت ڪري ڇڏي ۽ موقف اختيار ڪيو ته هـُو امڪاني حد تائين ثبوت فراهم ڪري چـُڪا آهن، چونڊ رڪارڊ جي معائني واري رپورٽ ۽ خاص ٽيم جي نتيجن تي به ڀاڙي سگهبو. جماعت اسلامي پاران پنهنجي جواب ۾ چيو ويو آهي ته چونڊون ڪرائڻ جي اصل ذميواري اليڪشن ڪميشن جي هئي ۽ ضابطا اخلاق جي ڀڃڪڙي تي ڪارروائي جو اختيار به ان جو ئي آهي پر اها ناڪام رهي. جماعت اسلامي جي جواب ۾ چيو ويو ته ڪراچي ۽ حيدرآباد ۾ ڌانڌلي جو منصوبو ايم ڪيو ايم جوڙيو ۽ ان تي عملدرآمد به متحده ئي ڪرايو. جماعت اسلامي موجب پولنگ عملو ايم ڪيو ايم جي يونٽ ۽ سيڪٽر انچارج جي مرضيءَ سان مقرر ٿيو. جماعت اسلامي جي جواب ۾ وڌيڪ چيو ويو ته فاٽا ۾ ڌانڌلي واري منصوبي تي عملدرآمد خيبر پختونخواهه جي گورنر ڪرايو. مهاجر قومي موومينٽ پاران جمع ڪرايل جواب ۾ قومي اسيمبلي جي 11 ۽ سنڌ اسيمبلي جي 16 سيٽن بابت ڌانڌليءَ جون شڪايتون ڪيون ويون آهن..

 

صدر ممنون جو پروفيسر وحيدالرحمان جي قتل جو نوٽيس، وزيراعليٰ سنڌ کان رپورٽ جي گهر

اسلام آباد(بيورو) صدر ممنون حسين جامعه ڪراچي جي پروفيسر ڊاڪٽر وحيدالرحمان جي قتل جو نوٽيس وٺندي وزيراعليٰ سنڌ کان رپورٽ جي گهر ڪري ڇڏي.ايوان صدر جي ترجمان مطابق صدر ممنون  حسين وحيدالرحمان جي خاندان سان ڏک جو اظهار ڪيو، صدر ممنون حسين  پروفيسر وحيدالرحمان جي قاتلن جي ترت گرفتاري ۽ سندن انجام  تائين پڄائڻ جي هدايت ڪئي. صدر جو چوڻ هو ته حڪومت ڪراچي ۾ امن کي يقيني بڻائيندي، دهشتگردن  خلاف بنا فرق جي ڪارروائي جاري رکندي ، هن ڪراچي ۾ دهشتگردن خلاف ڪارروائي تيز ڪرڻ جي پڻ هدايت ڪئي.

 

ايم ڪيو ايم الزامن جي سياست بجائي تعميري ۽ هاڪاري ڳالهين تي ڌيان ڏئي ته وڌيڪ بهتر هوندو: شرجيل ميمڻ

ڪراچي (اسٽآف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ  چيو آهي ته شهرين کي پاڻي جي کوٽ جي مسئلي جي حل لاءِ سمورا اُپاءُ ورتا پيا وڃن اسان شهرين جي مسئلن کي چڱي ريت سمجھون ٿا ۽ انهن جي مسئلن جي حل لاءِ ڪوششون ڪري رهيا آهيون. ڪمشنر ڪراچي جي سربراهي ۾ پاڻي جي منصفاڻي ورڇ لاءِ اڳ ۾ ئي ڪميٽي جوڙي وئي آهي جڏهن ته ڪجھ مهينا پهرين سياسي جماعتن، واپارين ۽ صحافين تي ٻڌل هڪ خودمختيار مانيٽرنگ ڪاميٽي جوڙي وئي هئي پر افسوس آهي ته ايم ڪيو ايم ان ڪاميٽي ۾ ڪو به ڪردار ادا نه ڪيو. ايم ڪيو ايم الزامن جي سياست جي بجائي تعميري ۽ هاڪاري ڳالهين تي ڌيان ڏئي ته وڌيڪ بهتر هوندو. فاروق ستار پاڻ ان ڳالهھ کي مڃيو آهي ته شهر ۾ پاڻي جي طلب جي مقابلي ۾ دستيابي 50 سيڪڙو آهي ان بعد  الزامن جو ڇا مقصد ڇا ورتو وڃي؟ ڪي فور منصوبي ۽ ڌاٻيجي کان شهرين کي 65 ايم جي ڊي واڌو پاڻي جي منصوبي تي حڪومت ڪم شروع ڪيو آهي. ماضي ۾ پاڻي جي منصفاڻي ورڇ ۽ ڪنهن به اسڪيم تي ڪو به ڪم نه ٿيڻ جو نقصان اڄ عوام برداشت ڪري رهيو آهي. اهڙن خيالن جو اظهار هن اربع واري ڏينهن ايم ڪيو ايم جي اڳواڻ فاروق ستار پاران سنڌ حڪومت ۽ بلديات کاتي تي لڳايل الزامن جي جواب ۾ ڪيو. شرجيل انعام ميمڻ چيو ته هاڻ هن ملڪ مان الزامن واري سياست جو خاتموٿيڻ گھرجي. هن چيو ته حقيقت سامهون هوندي ڪو الزام لڳائي ڇا ٿو ثابت ڪرڻ چاهي؟ ان کي هاڻ عوام چڱي ريت سمجھي ٿو. هن چيو ته اسان ڪراچي ۾ عوام کي پاڻي جي فراهمي جي مسئلن کان چڱي ريت واقف آهيون ۽ ان جي خاتمي ۾ مڪمل سنجيده آهيون. شرجيل انعام ميمڻ چيو ته ڪجهه ڏينهن پهرين  ڪمشنر ڪراچي جي اڳواڻي ۾ هڪ ڪاميٽي جوڙي وئي هئي جنهن ۾ سمورن ضلعن جا ڊپٽي ڪمشنر ۽ واٽر بورڊ جا آفيسر شامل آهن ۽ اها ڪاميٽي ڪيترن ئي ڏينهن کان شهر ۾ پاڻي جي منصفاڻي فراهمي، پاڻي جي فراهمي ۾ درپيش مسئلن ۽ ٽينڪر مالڪن پاران مقرر ڪيل قيمت کان وڌيڪ اگھن جي وصولي بابت شڪايتن جي خاتمي لاءِ ڪم ڪري رهي آهي. هن چيو ته اسان کي ان ڳالھ جو افسوس آهي ته ايم ڪيو ايم جي اڳواڻ ڊاڪٽر فاروق ستار پاڻ پنهنجي هڪ پريس ڪانفرنس ۾ اها ڳالھ تسليم ڪئي آهي ته شهر ۾ پاڻي جي هڪ هزار ايم جي ڊي جي طلب جي مقابلي ۾ اسان وٽ صرف 520 ايم جي ڊي پاڻي دستياب آهي ته ان کان پوءِ هو ڪهڙي ڳالھ جي ڪري اسان تي ان جي ذميواري جو الزام لڳائي رهيو آهي. شرجيل انعام ميمڻ چيو ته موجوده حڪومت ڪراچي ۾ پاڻي جي فراهمي کي بهتر بڻائڻ ۽ ان ۾ واڌاري لاءِ نه فقط ڪي فور منصوبي تي ڪم جو آغاز ڪيو آهي پر ڌاٻيجي کان ڪراچي کي 65 ايم جي ڊي واڌو فراهمي جي منصوبي جو آغاز  به ڪيو ويو آهي. هن چيو ته ماضي ۾ ڪراچي ۾ پاڻي جي غير منصفاڻي ورهاست ۽ ڪنهن به اسڪيم جي نه هجڻ جو نقصان اڄ ڪراچي جو عوام ڀوڳي رهيو آهي ۽ ان جو ذميوار اڳوڻو آمر صدر مشرف ۽ ان جا حواري آهن. شرجيل انعام ميمڻ چيو ته ڪراچي ۾ پاڻي جي منصفاڻي ورهاست ۽ عوام کي درپيش مسئلن ۽ ٻين شڪايتن جي پورائي لاءِ واٽر بورڊ ۾ شڪايتي سيل به قائم ڪيو ويو آهي ، جيڪو 24 ڪلاڪ عوامي مسئلن جي حل لاءِ ڪوششون ڪري رهيو آهي. شرجيل انعام ميمڻ چيو ته پيپلز پارٽي ۽ سنڌ حڪومت شهر ۾ پاڻي جي کوٽ سبب عوام کي پيش ايندڙ مسئلن ۽ تڪليفن جو احساس آهي ۽ ان کي منهن ڏيڻ لاءِ سمورا وسيلا ڪتب آندا پيا وڃن.

 

حڪومت پاران مالياتي ايوارڊ جو مدو وڌائڻ افسوسناڪ آهي: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه چيو آهي ته حڪومت پاران مالياتي ايوارڊ جو مدو وڌائڻ افسوسناڪ آهي، جيڪڏهن اين ايف اي ايوارڊ وقت سان جاري نه ٿيو ته حڪومت مٿان وڏو داغ هوندو. قومي اسيمبلي جي اجلاس ۾ خطاب ڪندي خورشيد شاهه چيو ته پيپلزپارٽي جي حڪومت 20 سالن بعد اين ايف سي ايوارڊ ڏنو، موجوده حڪومت پ پ سرڪار جي پاليسي کي اڳتي وڌائي ها. هن چيو ته صوبن ۾ هڪ تڪرار کي حل ڪيو ويو، حڪومت صوبن جي مطالبي تي ٻيهر غور ڪري وقت تي اين ايف سي ايوارڊ جاري ڪري. خورشيد شاهه چيو ته ناڻي وارو سيڪريٽري چئي رهيو آهي ته اين ايف سي ايوارڊ جاري نه ڪيو ويندو، کيس اهڙو اختيار ڪنهن ڏنو آهي. اپوزيشن ليڊر چيو ته جيڪڏهن حڪومت وقت سر اين ايف سي ايوارڊ جاري نه ڪيو ته ان مٿان وڏو داغ هوندو.

 

ڌانڌلي جا تمام گهڻا ثبوت مليا آهن، غلط پروپيگنڊه نه ڪئي وڃي: عمران خان

اسلام آباد (بيورو) پاڪستان تحريڪ انصاف جي چيئرمين عمران خان اسلام آباد ۾ ميڊيا سان ڳالهائيندي چيو آهي ته قوم کي مبارڪون هجن ته جوڊيشل ڪميشن جي قيام سان ڌانڌلي جو رستو رُڪجي ويو آهي. اسانکي اميد آهي ته فيصلو اسانجي حق ۾ ايندو ۽ هن ئي سال چونڊون ٿينديون. عمران خان دعويٰ ڪئي ته اسان وٽ 2013 جي چونڊن ۾ ڌانڌلي جا تمامگهڻا ثبوت موجود آهن. انهيءَ حوالي سان غلط پروپيگنڊاه نه ڪئي وڃي. جوڊيشل ڪميشن جي ايندڙ ٻڌڻي تي 70 تڪن ۾ ڌانڌلي جا ثبوت کڻي وينداسين. عمران خان اسسٽنٽ پروفيسر وحيد الرحمان جي قتل جي مذمت ڪندي چيو ته ڪراچي ۾ ٽارگيٽ ڪلرز خلاف پوري قوت سان آپريشن ٿيڻ گهرجي. ڪراچي ۾ ايم ڪيو ايم جي کٽڻ تي نه پر خوف جي فضا تي اعتراض آهي. سرمائيڪار خوف سبب دبئي ۽ بنگلاديش منتقل ٿي رهيا آهن. جنهن به پارٽي خلاف هٿياربند ونگز هجي اُن خلاف ايڪشن ٿيڻ گهرجي. بني گاله ۾ سندس رهائشگاهه باهران احتجاج ڪندڙن جي باري ۾ هن چيو ته پنهنجي مطالبن جي حقن لاءِ بيهڻ ۽ بليڪ ميل ڪرڻ ٻه الڳ شيون آهن. اصل مسئلو اُهو آهي ته مظاهرين ٽيسٽ کانسواءِ ڀرتي ٿيڻ چاهيندا هئا. واضح ڪرڻ چاهيان ٿو ته ٽيسٽ پاس ڪرڻ کانسواءِ ڪوبه خيبرپختونخواهه ۾ ٽيچر نٿو ٿي سگهي.

 

پاڪ سعودي لاڳاپا خراب ڪرڻ جي سازش ڪندڙ ڪامياب نه ٿيندا: امام ڪعبه

اسلام آباد (بيورو) ڪعبي جي امام شيخ خالد الغامدي چيو آهي ته پاڪستان ۽ سعودي عرب جا رشتا تمام گهڻا مضبوط آهن جنهن ۾ ڪو ڏار نه ٿو اچي سگهي، ٻنهي ملڪن وچ ۾ لاڳاپا خراب ڪرڻ جي سازش ڪندڙ ڪامياب نه ٿيندا. اسلام آباد ۾ تقريب کي خطاب ڪندي شيخ خالد الغامدي چيو ته هـُن پاڪستان ۾ حرمين شريفين لاءِ تمام گهڻي محبت ڏٺي ۽ ملاقاتن دوران محسوس ڪيو ته صدر کان وٺي عام شهري سڀ سعودي عرب سان گڏ آهن. هن چيو ته پاڪستان ۽ سعودي عرب جا لاڳاپا تمام گهڻا مضبوط آهن جن ۾ ڪو به ڏار نه ٿو اچي سگهي. ڪعبي جي امام چيو ته پاڪ سعودي لاڳاپا خراب ڪرڻ جي سازش ڪندڙ ڪامياب نه ٿيندا. سندس چوڻ هو ته پاڪستاني قوم هڪ عظيم قوم آهي، هتان جي عوام جي محبت کي هن اکين سان ڏٺو ۽ دل سان محسوس ڪيو آهي. هن چيو ته پاڪستان جو هــِي سندس پهريون دورو آهي پر آخري ناهي، پاڪستانين جي محبت سندس لاءِ عزت افزائي آهي. شيخ خالد الغامدي جو چوڻ هو ته نعمتن ۾ سڀ کان وڏي نعمت اسلام آهي ۽ مسلمان هڪ قوت آهي جن ۾ ڪي اختلاف ناهن.

 

ڌانڌلي ثابت ٿي ته وزيراعظم کي استيعفيٰ ڏيڻي پوندي: شاهه محمود قريشي

ملتان (بيورو) تحريڪ انصاف جي مرڪزي اڳواڻ شاهه محمود قريشي چيو آهي ته جڊيشل ڪميشن جي فيصلي کانپوءِ حڪومت کي ڀڄڻ نه ڏنو ويندو، ڌانڌلي ثابت ٿي ته وزيراعظم نواز شريف کي استيعفيٰ ڏيڻي پوندي ۽ اهو اسيمبلي ٽوڙڻ جو پابند هوندو. ملتان ۾ ميڊيا سان ڳالهائيندي تحريڪ انصاف جي اڳواڻ شاهه محمود قريشي چيو ته پي ٽي آءِ ڌانڌلين جا ثبوت جڊيشل ڪميشن ۾ جمع ڪرائي ڇڏيا آهن، ڪميشن جي ڪارروائي مان هو مطئمن آهن ۽ وٽن اطمينان جوڳا ثبوت آهن. هن چيو ته ڌانڌلين جي ثبوت کانپوءِ حڪومت کي ڀڄڻ نه ڏنو ويندو، ڪميشن جو فيصلو اچڻ بعد وزيراعظم کي استيعفيٰ ڏيڻي پوندي ۽ اهو اسيمبليون ٽوڙڻ جو پابند هوندو. هڪ سوال جي جواب ۾ شاهه محمود قريشي چيو ته پي ٽي آءِ جي پارليامينٽ ۾ واپسي تي ن ليگ جي ڪجهه ماڻهن کي تڪليف آهي پر اسپيڪر استعيفائن بعد رولنگ ڏئي انهن ميمبرز جو موقف رد ڪيو آهي. شاهه محمود قريشي چيو ته پي ٽي آءِ جو مطالبو جڊيشل ڪميشن جو قيام هو، جنهن جي عمل ۾ اچڻ بعد هـُو پارليامينٽ ۾ واپس آيا آهن.