تازيون خبرون

Monthly Archives: March 2015

آءِ پي ايل ۾ اظهر محمود ڪلڪتا نائٽ رائيڊرز ٽيم جي نمائندگي ڪندو

لاهور: اڳوڻو پاڪستاني آل رائونڊر اظهر محمود انڊين پريميئر ليگ 2015ع جي ايڊين ۾ پنهنجين صلاحيتن جو مظاهرو ڪندو ان کي ٽورنامينٽ ۾ دفاعي چيمپيئن ڪلڪتا نائٽ رائيڊرز ٽيم جي نمائندگي جو موقعو ڏنو آهي اظهر محمود کي نيوزيلينڊ  جي ان فٽ رانديگر جيمي نيشم جي جاءِ تي ٽيم ۾ شامل  ڪيو ويو آهي آءِ پي ايل ۾ شموليت تي 40 سالا آل رائونڊر جو چوڻ آهي ته دفاعي چيمپيئن ٽيم ۾ کيڏڻ هڪ اعزاز جي ڳالهه آهي آءِ پي ايل جو اٺون ايڊين اپريل کان ڀارت  ۾ شروع ٿيندو.

 

آءِ سي سي ورلڊ ڪپ اليون جو اعلان ڪري ڇڏيو، پاڪستان جي ڪنهن به رانديگر کي شامل نه ڪيو ويو

دبئي(اسپورٽس نيوز)انٽرنيشنل ڪرڪيٽ ڪائونسل بهترين رانديگرن تي ٻڌل ورلڊ ڪپ اليون جو اعلان ڪري ڇڏيو آهي جڏهن ته 12 رڪني اسڪواڊ ۾ ڪوبه پاڪستاني رانديگر شامل ناهي، آءِ سي سي طرفان اعلان ڪيل ورلڊ ڪپ اليون ۾ نيوزيلينڊ جا 5، آسٽريليا جا 3 ۽ ڏکڻ آفريڪا جا 2 رانديگر جڏهن ته سريلنڪا ۽ زمبابوي جو هڪ هڪ رانديگر شامل ڪيو ويو آهي جڏهن ته پاڪستان، ڀارت، ويسٽ انڊيز، انگلينڊ ۽ بنگلاديش جو ڪوبه رانديگر ٽيم ۾ شامل نه ٿي سگهيو، آءِ سي سي جي ورلڊ ڪپ ٽيم ۾ نيوزلينڊ مان برينڊن مڪلم، مارٽن گپٽل، ڪوري اينڊرسن، ٽرينٽ بولٽ ۽ ڊينيئل ويٽوري کي شامل ڪيو يوو آهي جڏهن ته آسٽريليا مان اسٽيون سمٿ، مچل اسٽارڪ ۽ گلين ميڪسويل کي چونڊيو ويو آهي، ڏکڻ آفريڪا مان اي بي ڊويليئرز ۽ مورني مورڪل جڏهن ته سريلنڪا مان ڪمار سنگاڪارا کي شامل ڪيو ويو آهي، ميڪلم کي ٽيم جو ڪپتان مقرر ڪيو ويو آهي جڏهن ته برينڊن ٽيلر کي 12 رانديگر جي طور تي شامل ڪيو ويو آهي.

 

يمن ۽ سعودي عرب ۾ امن لاءِ ٽياڪڙي جي ضرورت

 

چوندا آهن ته جڏهن ڪنهن ملڪ ۾ امن هوندو آهي تڏهن اهو ملڪ جنگ جي تيارين ۾ رڌل هوندو آهي ۽ جڏهن جنگ لڳي ويندي آهي ته ان کانپوءِ امن قائم ڪرڻ لاءِ هٿ پير هڻڻ شروع ڪيا و يندا آهن. اهڙي ريت سياست جي ڪتابن ۾ ”اڻ ڌريو“ هجڻ کي مختلف معنائون ڏيئي هر ڪنهن ان لفظ کي پنهنجي پنهنجي فائدي لاءِ استعمال ڪرڻ جي ڪوشش ڪئي آهي. جڏهن ڪنهن ملڪ جي اندر يا ڪجهه ملڪن ۾ ڪو تڪرار شروع ٿيندو آهي تڏهن اڻ  ڌريو هجڻ جون ڌار ڌار معنائون ڪيون وينديون آهن. هڪ معنيٰ موجب ته جيڪڏهن ڪي ٻه ملڪ پاڻ ۾ ڪنهن ڪالهه تي تڪرار ڪري رهيا آهن ته ٻيا ملڪ اهو چئي پاڻ کي ان تڪرار کان پاسيرو ڪرڻ جي ڪوشش ڪندا آهن ته اهو تڪرار ٻن ملڪن جو پنهنجو مسئلو آهي، ان ڪري اسان اڻ ڌريا رهنداسين. اهڙي صورتحال ۾ جيڪڏهن ٻيا ملڪ اڻ ڌريا رهن ٿا  ته پوءِ انهن ٻنهي ملڪن وچ۾ هلندڙ تڪرار يا جنگ جو فيصلو ڪرڻ  آسان  ٿي پوندو آهي پر اڻ ڌرڻو هجڻ جي هڪ ٻي معنيٰ  اها به آهي ته جڏهن ڪو سگهارو ملڪ ڪنهن اڀري ملڪ تي حملو ڪري ۽ اهڙي صورتحال ۾ جيڪڏهن سگهارا ملڪ اها ڳالهه ڪن ته اهي ان ويڙهه ۾ اهي اڻ ڌريو ڪردار ادا ڪندا، تنهن جي ٻي معنيٰ اها ٿيئي ٿي ته سگهارا ملڪ چاهين ٿا ته اهو اڀرو ملڪ سگهاري ملڪ جو نشانو بڻجي وڃي ۽ اهي پنهنجي اخلاقي ڏوهه کي لڪائڻ لاءِ اڻ ڌريو هجڻ وارو راڳ  الاپيندا رهن. اسان اها ڳالهه يمن ملڪ جي صورتحال کي  آڏو رکي لکي آهي. جنهن ۾ هن وقت ڪجهه ملڪ پاڻ کي اڻ ڌريو رکڻ جي ڳالهه ڪري رهيا آهن ته ڪجهه ملڪ سعودي عرب جو پاسو وٺي جنگ کي اڃا به وڌيڪ پکيڙڻ جي ڪوشش ڪري رهيا آهن. اسان يمن جي صورتحال تي ڳچ جيترو مواد پڙهندڙن آڏو اڳ ئي پيش ڪري چڪا آهيون ۽ ان سڄي صورتحال کي ڪنهن جذباتي اک سان ڏسڻ بجاءِ ان کي ٻن اسلامي ملڪن وچ ۾ هلندڙ تڪرار جي اک سان ڏسندي ان جي نبيري لاءِ تجويزون ڏيندا رهيا آهيون. هيلتائين جيڪي به بحث مختلف ٽي وي چئنلز ۽ ميڊيا ذريعي عوام تائين پهتا آهن، تن ۾ ٻه ڳاليهون خاص طور تي سامهون آيون آهن، هڪ ته يمن ۾  هلندڙ ويڙهه شيعا ۽ سني فرقن وچ ۾ هلندڙ آهي ۽ شيعا باغين جي اڳواڻ محمد الحوثي جي سربراهي ۾ وڙهندڙ هٿياربندن سني فرقي سان تعلق رکندڙ صدر  عبدالربوهه منصور هادي کي ملڪ مان فرار ٿيڻ تي مجبور ڪري ڇڏيو آهي. ۽ اهو هاڻي سعودي عرب ۾ پناهه وٺي ويٺل آهي. اسان جي خيال ۾ جيتوڻيڪ ان ويڙهه کي شيعا سني تڪرار جي حوالي سان جهڙي ريت پيش ڪرڻ جي ڪوشش  ڪئي وئي آهي، اها ڳالهه ائين هرگز ناهي. شيعا اڪثريت رڳو صنعا شهر ۾ رهي ٿي، جڏهن ته يمن جي باقي شهرن ۽ علائقن ۾ سني آبادي اڪثريت ۾ رهندڙ آهي. هونئن به جيڪڏهن اها سني ۽ شيعا ويڙهه هجي ها ته پوءِ يمن جي اندر ٻنهي فرقن جي  وڏي رتوڇاڻ ٿي چڪي هجي ها،ليڪن هيلتائين جيڪي رپورٽون مليون آهن تن جو جائزو وٺڻ کانپوءِ اها ڳالهه سامهون اچي ٿي ته يمن ۾ شيعا سني فرقا ته ضرور آهن. پر حقيقت ۾ يمن جو سڄو ملڪ ننڍن وڏن هٿياربند گروپن جي هٿن ۾ يرغمال بڻجي چڪو آهي ۽ هر ڪنهن گروپ پنهنجا پنهنجا علائقا ائين ورهائي ورتا آهن جيئن اسان وٽ لياري ۾ گينگ وار ۾ شريڪ ڏوهارين ڪجهه علائقا قبضي هيٺ آندا آهن. هن وقت به جيڪڏهن فرار ٿيل صدر عبدالربوهه منصور هادي کي طاقت جي زور تي جيڪڏهن يمن ۾ اقتدار جي ڪرسيءَ تي ويهاريو به وڃي تڏهن به يمن ۾ رتوڇاڻ جاري رهندي ۽ هٿياربند گروپ هڪٻئي خلاف جنگ جاري رکندا. هتي اها ڳالهه  به ياد رکڻ جي  آهي ته يمن جي صدر جي فرار ٿيڻ کانپوءِ يمن جي فوج به مختلف ڌڙن ۾ ورهائجي چڪي آهي ۽  يمني فوج جو هڪ وڏو حصو حوثي باغين سان ملي ويو آهي، انهن فوجين ۾سعودي عرب جا مخالف سني فوجي به گهڻي تعداد ۾ شامل  آهن. اسان هتي ان ڳالهه سان متفق آهيون ته يمن ۾ جيڪي هٿياربند گروپ آهن اهي نه رڳو يمن جي گهروويڙهه ۾ ملوث آهن پر اهي سعودي عرب لاءِ پڻ خطرو بڻيل آهن. هن وقت سعودي عرب کي اهو خطرو هرگز ناهي ته يمن جا حوثي باغي حملو ڪري سعودي  عرب ۾ داخل ٿي ويندا  ۽ سعودي عرب جي سلامتي کي ڪو خطرو درپيش ٿي پوندو، بهرحال عام طور تي ائين ٿيندو آهي ته جڏهن به ڪنهن ملڪ ۾ ڪا رتوڇاڻ يا گهرو ويڙهه ٿيندي آهي ته پوءِ ان جنگ کان متاثر ٿيندڙ ماڻهو  لڏپلاڻ ڪري ڀرواري ملڪ ڏانهن هليا ويندا آهن ۽ اتي وڃي پناهه وٺندا آهن، جڏهن ته يمن ملڪ جي صورتحال اها آهي جو اهو هڪ اهڙي  هنڌ تي قائم آهي، جنهن جي ٽن پاسن کان عربي سمنڊ آهي ۽ رڳو هڪ پاسي کان ان جون سرحدون سعودي عرب سان ملن  ٿيون، هاڻ جيڪڏهن ڪي ماڻهو مهاجر بڻجڻ چاهين، تڏهن به انهن لاءِ پناهه وٺڻ جو رستو صرف سعودي عرب ئي آهي. جڏهن ته سعودي عرب ڪنهن به يمني شهري کي پوءِ کڻي اهو سني ئي ڇو نه هجي ان کي پنهنجي ملڪ اندر داخل ٿيڻ جي هرگز اجازت نه ڏيندو، ڇاڪاڻ ته سعودي عرب کي ماضيءَ ۾ يمن جي سنين به  وڏو نقصان ڏنو آهي،ماضيءَ ۾ يمني دهشتگردن جنرل ضياءُالحق جي دور ۾ حملو ڪري ڪعبته الله شريف تي قبضو ڪرڻ جي ڪوشش ڪئي هئي، ان ڪري يمن جا شيعا هجن يا سني سعودي عرب لاءِ ٻئي قابل قبول ناهن. ڏٺو وڃي ته سعودي عرب کي ظاهري طرح ته ڪنهن به جنگي صورتحال جو ڪو به خطرو ناهي پر خطرو انهن ويڙهاڪ گروپن مان آهي، جيڪي سعودي عرب ۾ داخل ٿي، وڏيون تخريبي ڪارروايون ڪري سگهن ٿا.

 

سنڌ، سياسي دل ۽ سياسي شعور جي کوٽ ؛وينگس

”اسان سڀئي اڄڪلهه ڪجهه اهڙي ئي ٻوساٽيل سماج ۾ ساهه کڻون پيا، جڏهن به تون سچائي ۽ اصولن تي هلندي، ان وقت تون اِهو سمجهي وٺ، تون اڪيلو هوندي ۽ تنهنجي آواز کي ڪير به ٻڌڻ پسند نه ڪندو.“

مون کي هي لفظ ڇو ياد اچن پيا، شايد سماج ۾ انهن ٻنهي جو کوٽ ڏسي هي لفظ منهنجي اندر مسلسل زور سان دستڪ ڏئي رهيا آهن، لفظن کي ڳالهائڻ انتهائي آسان آهي توهان ڪنهن کي به اسٽيج تي گهرائي سچائي ۽ اصولن تي ڳالهرائي سگهو ٿا پر اصل ۾ انهن جا چهرا ڏسو، توهان کي ڀيانڪ نظر ايندا، جن وٽ سچائي ۽ ايمانداري جو ڪو وجود ئي ناهي.

سچائي ۽ اصولن تي هلڻ ڄڻ تلوار جي ڌار تي هلڻ جيان آهي جنهن ۾ هر قدم تي زخمي ٿيڻ پهريون شرط آهي، ان تي اهي ئي هلي سگهن ٿا جن جي دل بهادر ۽ روح هر گهاو جو ڌڪ جهلي سگهي.

اهي، جن وٽ سچائي ۽ اصول صرف زباني خرچ آهن اهڙن کوٽن سڪن سان سماج ڀريل آهي جنهن سماج جا رکوالا، ٺيڪداري ڪرڻ شروع ڪن، جيڪي سچائي ۽ اصولن کي شو پيس ڪري استعمال ڪن، ان سماج جي سياسي دل ڪمزور ٿي ويندي آهي.

انسان اڌ ماني ٽڪر تي گذارو ڪري سگهي ٿو پر انسان جي ذهن تي تالو هنيو وڃي ۽ ان کان سوچڻ جي سگهه کسي وڃي ته پوءِ ان جو نقصان صرف هڪ انسان کي نه پر پوري سماج کي پهچندو آهي. سماج، ان وقت تباهه ٿئي ٿو جڏهن ان جي عوام کي انڌير نگري ۾ ڦٽو ڪري، ان جي سوچ جي جوت کي وساميو وڃي ٿو.

اسان سڀئي انهن شين تي واويلا مچائي رهيا آهيون جيڪي اصل بيماري ڪري پيدا ٿيون آهن اصل مرض تي ڪير به ڳالهائڻ لاءِ تيار ڪونهي، ڇاڪاڻ جو هر هڪ وٽ پنهنجا، پنهنجا ذاتي مفاد آهن. ماضي ۾ جهاتي پائي ڏسون ته اسان جي سامهون اهي ڪردار ايندا جن جو قد وڏو ان ڪري آهي جو انهن سچ جي چيچ نه ڇڏي ۽ جيڪڏهن توهان هاڻوڪي دور ۾ نظر ڦيرائي ڏسو ته توهان کي پتڪڙا ماڻهو نظر ايندا جيڪي بظاهر وڏو ڪردار ٿي پيش ٿيڻ جي ناڪام ڪوشش ڪندا.

سماج آخر اهڙن ناٽڪي ڪردارن ۽ کوٽن سڪن کي ڇو نه پيو ڏسي سگهي؟ ڇا هن سماج جون اکيون نه ٿيون ڏسي سگهن ته سنڌ جي سياسي دل ڪمزور ٿي وئي آهي، هتي اصل مرض سياسي دل جو ڪمزور ٿيڻ آهي.

هينئر جيڪي سياسي پارٽيون، سياست ڪري رهيون آهن انهن جي سياست، رکوالي نه پر ٺيڪداري جو ڪم ڪري پئي ۽ انهيءَ جي ڪري اڪثريت کي نقصان پهچي رهيو آهي. هاڻي جنهن وقت جي گهٽيءَ مان گذريون پيا ان ۾ دنيا گهڻي اڳتي ترقي ڪري چڪي آهي ۽ سنڌ اڳتي وڌڻ بجاءِ وڌيڪ پٺتي ٿيندي پئي وڃي.

سنڌ جي ترقي صرف روڊ رستن واري ترقي ناهي جو تنقيد ڪرڻ لاءِ تنقيدي پٿر کڻي حڪومتن کي هڻي ڏيو پر مسئلو پوءِ به اتي ئي رهندو. سڀاڻي حڪومت پوري صوبي ۾ ترقي ڏياري ڇڏي ۽ ڏيکاءُ واري ترقي عوام جي سامهون اچي وڃي پر مرض سماج جي رڳن ۾ ڊوڙندو رهندو.

آسمان هيٺ انهن قومن ترقي ڪئي آهي جن وٽ سياسي دل مضبوط آهي انهن کي ڪير به ڌوڏي ناهي سگهيو. اهڙي ئي مضبوط سياسي دل سنڌ وٽ ايوب ۽ ضياءَ جي دورن ۾ هئي جن پنهنجي سياسي شعور سان آمريت جو مقابلو ڪيو. انهن جي آڏو اصول ۽ عوام جا مفاد عزيز هئا انهن ڪڏهن به سياسي دل کي ڪمزور ٿيڻ نه ڏنو.

مون کي ياد آهي ته هڪ پنجابي اديب مون کي چيو ته ”مس وينگس آپ ڪا ريهڙي چلاني والا ڀي سياست په بهت اڇي بحث ڪرليتا هي.“ پر اڄ جڏهن سنڌ جي ريهڙي هلائيندڙن کي هڪ پاسي تي رکو، توهان انهن ماڻهن سان ڳالهايو جيڪي سياسي يا سماج ۾ اهم سيٽ تي ويٺل آهن، انهن جي سياسي سوچ کي ڏسي، سنڌ جي قسمت تي ترس ايندو آهي ته واقعي ۾ به هي اُها ئي سنڌ آهي يا هن جي سيني مان خوبصورت آواز مري چڪا آهن…!

سنڌ جي هلندڙ صورتحال سنڌ سياسي طورتي يتيم ٿي چڪي آهي ۽ ڪنهن يتيم ٻار جي بدحالي ائين ئي هوندي آهي جيئن سنڌ جي ٿي چڪي آهي. سنڌ جي سياسي يتيمي جو الزام ڪنهن ٻئي تي نه ٿا هڻي سگهون هميشه گهات هڻندڙ پنهنجا ئي هوندا آهن.

سنڌ جي سياسي ڪمزور تي عذر پيش ڪيو ويندو آهي ته سنڌ صوفي ازم جي پروي ڪندڙ آهي. ان کان ڪير به انڪاري ناهي پر صوفي ازم جو مطلب اهو هرگز ناهي جو دانهه ڪرڻ ڇڏي ڏجي يا سچ تي تالو هڻي خاموشي اختيار ڪجي. صوفي ازم وٽ ٻٽي معيار رکندڙ ماڻهن جي ڪا به گنجائش ناهي. اهي سياسي پارٽيون جيڪي پاڻ کي صوفي ازم جي راهه تي هلندڙ سڏن ٿيون اهي پاڻ ٻٽي معيار يا وري ابن الوقت جهڙن ماڻهن سان سمجهوتو ڇو پيون ڪن؟سنڌ جي سياست ۽ سياسي شعور ختم ٿيندو پيو وڃي هاڻي اها سياسي سگهه ناهي رهي جو سنڌ پنهنجن مسئلن کي رکي سگهي.ها! سنڌ جي سياسي سگهه مضبوط هئي پر هاڻي اها ڪمزور ٿي چڪي آهي. ان جي ذميواري سنڌ جي سياسي پارٽين تي وڃي ٿي پوءِ پارليامينٽري يا قومپرست پارٽيون هجن هي سڀئي سياسي پارٽيون سياست کي ڪمزور ۽ هتان جي سياسي شعور کي زنگ هڻي رهيون آهن.نهن سڀني سياسي پارٽين پهرين مرحلي ۾ سياسي پارٽين مان اسٽيڊي سرڪل کي ختم ڪيو جن جيڪڏهن قائم به رکيو آهي ته نه ان جي ڪا اهميت آهي، صرف نالي ماتر اسٽيڊي سرڪل کي رکيو ويو آهي.

سياسي پارٽين اسٽيڊي سرڪل کي ڇو ڪمزور ڪيو؟

انهن کي چڱي ريت خبر آهي ته جيڪڏهن سياسي شعور کي ڪتابن جي چڻنگ لڳي ته پوءِ انهن (اڳواڻن) جي بوگس سياست هلي نه سگهندي. اسٽيڊي سرڪل کي ختم ڪرڻ مطلب معاشري مان ”سوال“ پڇڻ جي سگهه کي بند ڏئي ڇڏڻ آهي، نه ئي سوال ڪندا ۽ نه ئي جوابده ٿيندا. ”سوال“ جيڪو شعور جي طاقت ۽ بهار ڪردارن کي جنم ڏئي ٿو. اهو سڀ ڪجهه ختم ڪرڻ لاءِ پوري سازش رچائي وئي آهي.

سياسي اسڪولنگ کي سوچي سمجهي ختم ڪيو جو هاڻي سياسي شعور جي کوٽ ٿيندي نظر پئي اچي. سياسي اسڪولنگ، جلسن ۾ نعره هڻڻ ۽ جهنڊا جهلي ٿيڻ سان ناهي ٿيندي.

سنڌ جا نوجوان ڪنهن به مسئلي کي پيش نه ٿا ڪري سگهن، ائين بلڪل به ناهي ته سنڌ جو نوجوان محنتي ناهي، اهي پنهنجي سر محنت ڪن پيا.

انهن (نوجوانن) جو جنم هڪ اهڙي دور ۾ ٿيو جتي موبائيل ملڻ آسان آهي پر سماج مان سياسي اسڪولنگ تي تالو هنيو ويو آهي.

حڪومت ٻارڙن جي لاءِ اسڪول پوري سنڌ ۾ ڪڏهن کوليندي پر سياسي پارٽين کان ڪير پڇي ته انهن پنهنجن پارٽين اندر سياسي اسڪول تي تالو ڇو هنيو آهي؟ سياسي اسڪولنگ – اسٽيڊي سرڪل  جو سياسي پارٽين مان ختم ٿيڻ جو سڌو سنئون ٽارگيٽ سنڌ جي سياسي شعور کي قتل ڪرڻ آهي.

ان جو اهو ئي سبب آهي جو اسان جي سامهون سنڌي شاگرد سياسي پارٽين جا نعره هڻندا پر ڪٿي نه ڪٿي انهن ۾ سياسي کوٽ محسوس ٿيندي. حڪومت يونيورسٽين اندر شاگرد يونين تي پابندي مڙهي سگهي ٿي پر پارٽين اندر اسٽيڊي سرڪل ۽ سياسي اسڪولنگ تي پابندي حڪومت به مڙهي نه ٿي سگهي ان جي باوجود به سياسي پارٽين کي معاشري جي ڪٽهڙي ۾ بيهاري پڇو ته انهن پنهنجن پارٽين مان اسٽيڊي سرڪل کي ڪمزور ڇو ڪيو آهي؟

افسوس سان لکڻو پوي ٿو ته ان جي مٿان بندش خود سياسي پارٽين هنئي آهي جو نوجوان نسل سياسي پارٽي جي اڳواڻن اڳيان اکيون بند ڪري گول دائري ۾ چڪر لڳائيندو رهي. سنڌ جي اهم يونيورسٽين ۾ مذهبي جماعت الدعوه اچي پئي ان تي ڪنهن به سياسي پارٽي هاءِ گهوڙا نه ڪئي ته ان سان سياسي شعور جو قتل ٿيندو ڪنهن ڪجهه به نه ڳالهايو سڀئي هڪ ئي ليڪي تي بيٺل آهن. عوام جي ڳالهه يا اهي جيڪي سنڌ جو نالو کڻن ٿا، سڀئي پنهنجن ذاتي مفادن کي اڳيان رکي هلن پيا.

جيستائين سنڌ پنهنجي سياسي شعور کي ٻيهر نئون جنم نه ٿي ڏئي ۽ سياسي دل کي مضبوط ڪري اڳيان نه ٿي اچي ته پوءِ سنڌ ختم ٿي ويندي. اڄڪلهه سنڌ کي مذهبي انتهاپسندي ۽ دهشتگردي جهڙن مسئلن جي دلدل ۾ ڌڪڻ جي ڪوشش ڪئي پئي وڃي.

جيڪڏهن ڪير به اهو چاهي ٿو ته اهي انتهاپسندي جي ڪينسر کان سنڌ کي بچائڻ گهُرن ٿا ته پوءِ سنڌ جي سياسي سگهه کي نئين سر جنم ڏيڻو پوندو.

سنڌ جي نوجوانن کي سياسي پارٽين اندر اسٽيڊي سرڪل کي ٻيهر کولڻو پوندو جنهن ڏينهن سنڌ جي نوجوان اسٽيڊي سرڪل ۽ سياسي اسڪولنگ ڪرڻ شروع ڪئي ان وقت پارٽين اندر موجود ون مين شو ختم ٿيندو. دلچسپ ڳالهه اِها آهي ته پارليامينٽري پارٽين اندر ون مين شو سمجهه ۾ اچي ٿو ڇو جو اهي پاور پالٽيڪس ڪندڙ آهن پر سنڌ جون قومپرست پارٽيون، پاڻ پارليامينٽري پارٽين جي ڪاپي ڇو پيون ڪن؟ قومپرست پارٽين ۾ اڳواڻ جي چونڊ بنا مقابلي به ٿيڻ لڳي آهي. اهڙي سياست کي ڏسي صرف افسوس ئي ٿئي پيو ته ڇا سنڌ جي سياست ڪڏهن ائين روپ اختيار ڪندي!

اهڙي سياسي انداز سان سياسي پارٽيون سنڌ جي سياست کي هلائينديون ته پوءِ سنڌ جي سياسي دل، موت جي چادر اوڙهي سگهي ٿو.

سنڌ جي سياسي شعور کي نئون ساهه ۽ سوچ تي قدم رکڻو پوندو ان ڪري سنڌ واسين کي پاڻ پنهنجي بنيادي مسئلن تي نظرثاني ڪرڻ گهرجي، سنڌ جي سياسي دل جو علاج نه ڪيو ويو ته پوءِ سنڌ ڪيئن قدم کڻي سگهندي؟ جنهن جسم مان شعور ۽ دل کي ڪڍي ڇڏجي ته پوءِ ان جسم ۾ ڇا باقي رهندو؟

سنڌ جي سياسي پارٽين کي ٺيڪداري واري سياست کان ٻاهر نڪري، سياست کي وڌيڪ ڪمزور ٿيڻ کان بچائڻ گهرجي. سنڌ کي ايڪڙ ٻيڪڙ احتجاجن جي ضرورت ناهي جيتري سنڌ کي سياسي پارٽين اندر اسٽيڊي سرڪل ۽ سياسي اسڪولنگ جي سخت ضرورت آهي.

سنڌ وڌيڪ سياسي شعور جي کوٽ برداشت نه ٿي ڪري سگهي. سنڌ جي نوجوانن مٿان ذميواري اچي پئي ته اهي پاڻ کي ڪهڙي پاسي رکڻ چاهين ٿا، ڇا اهي ٻوساٽيل ماحول ۾ اکيون بند ڪري گول دائري ۾ چڪر کائيندا رهندا يا وري پنهنجي دور کي بهادر سياسي دل جي ڌڙڪن ڏيندا؟

 

ڪراچي آپريشن دهشتگردن ۽ ڏوهارين جو گهيرو تنگ ڪري ڇڏيو آهي: وڏو وزير

حيدرآباد (بيورو) سنڌ جي وڏي وزير سيد قائم علي شاهه  چيو آهي ته  پشاور سانحي ۽ 21 ترميم جي منظوري کانپوءِ آپريشن ۾ تيزي سان سنڌ اندر  امن امان جي صورتحال ۾  غير معمولي بهتري آئي آهي  جيتوڻيڪ ڪراچي ۾ دهشتگردي جي تازن ٻن اڻوڻندڙ واقعن باوجود پوليس ۽ رينجرز ، پاڪستان آرمي جي سهڪار سان ڀرپور ڪارروايون ڪندي ڏوهارين جو گهيرو تنگ ڪري ڇڏيو آهي  جنهن دوران سوين دهشتگردن، ٽارگيٽ ڪلرز ۽  ڀتا خورن کي گرفتار ڪري  جيل اماڻيو ويو آهي ۽ تمام جلد ڏوهاري عنصرن کي گرفتار ڪري کين قانون جي ڪٽهڙي ۾ آندو ويندو  . هن اهڙو اظهار اڄ  صوبائي وزير لائيواسٽاڪ ۽ فشريز ڄام خان شورو جي ڳوٺ ڪرن شورو ۾ رهائشگاهه تي شهيد ذوالفقار علي ڀٽو جي 4 اپريل تي ٿيندڙ ورسي جي حوالي سان پ پ پ حيدرآباد ڊويزن جي اجلاس کانپوءِ پريس ڪانفرنس کي خطاب ڪندي ڪيو _ وڏي وزير سيد قاعلي شاهه وڌيڪ چيو ته  ملڪ جي سمورين سياسي پارٽين جي گڏيل فيصلي سان 21 ترميم منظور ڪئي وئي جنهن کانپوءِ ملڪ ۾ دهشتگردي خلاف جاري  آپريشن  کي تيز ڪيو ويو جنهن جي نتيجي ۾ سنڌ اندر امن امان جي صورتحال ۾ غير معمولي بهتري آئي آهي ۽ ڏوهاري سرگرمين تي پڻ ضابطو آندو ويو آهي . هن چيو ته ڪراچي ۾ شروع ڪيل ٽارگيٽيڊ آپريشن  سان پڻ امن امان جي صورتحال بهتر ٿي آهي جنهن دوران ٽارگيٽ ڪلنگ  ۽ ڀتا خوري جي واقعن ۾  پڻ گهٽائي آئي آهي . هن ٻڌايو ته ڪيترائي ٽارگيٽ ڪلرز ۽ 500 کان وڌيڪ ڀتا خور گرفتار ڪيا ويا آهن  جيتوڻيڪ ڪراچي ۾ دهشتگردي جا ٻه اڻوڻندڙ واقعا پڻ پيش آيا آهن پر ان سان قانون لاڳو ڪندڙ ادارن ۽ عوام جا حوصلا گهٽيا ناهن ۽ ڏوهاري عنصرن خلاف آپريشن ۾ وڌيڪ تيزي ڪئي وئي آهي _ هن چيو ته پشاور سانحي ۽ مذهبي اڳواڻ خالد محمود سومرو  جي قتل جي جوابدارن کي پڻ  گرفتار ڪري عدالت ۾ پيش ڪيو ويو آهي ۽ اها  سنڌ حڪومت جي امن امان بابت سنجيده قدمن جي ڪاميابي آهي _ هن دعويٰ ڪئي ته هن وقت سنڌ جو امن امان گذريل 20 کان 25 سالن جي ڀيٽ ۾ بهتر آهي _ وڏي وزير  هڪ سوال جي جواب ۾ چيو ته سنڌ حڪومت قدرتي وسيلن سان مالا مال آهي  ۽ اهڙن وسيلن کي عوام جي فلاح بهبود لاءِ پڻ ڪتب آندو پيو وڃي _جيتوڻيڪ سنڌ مان نڪرندڙ گئس جو 40 سيڪڙو ٻين صوبن ڏانهن موڪليو وڃي ٿو ۽ 35 سيڪڙو مقامي ماڻهن جي فلاح بهبود لاءِ استعمال ڪيو پيو وڃي _ هن وڌيڪ چيو ته  گئس جو اسم آئين مطابق گڏيل مفادن واري ڪائونسل  جو  معاملو آهي جنهن بابت ڪائونسل ئي فيصلا ڪري سگهي ٿي تنهن باوجود به سنڌ گئس ۽ بجلي جي لوڊشيڊنگ بابت ڪائونسل جي هر اجلاس ۾ پنهنجو احتجاج رڪارڊ ڪرايو آهي ۽ مستقبل ۾ پڻ احتجاج رڪارڊ ڪرائيندي رهندي_ سندس مطابق ڇاڪاڻ ته  هن وقت سنڌ جي ٻهراڙي وارن علائقن ۾ 18 ڪلاڪن کان وڌيڪ لوڊشيڊنگ ڪئي پئي وڃي _ هن وڌيڪ چيو ته گئس جي کوٽ وارن علائقن ۾ آئين مطابق ايل اين جي استعمال ڪري سگهجي ٿي پر جتان قدرتي گئس  نڪري ٿي اتي مقامي ماڻهن کي گئس جي سهولت ڏيڻ سندن آئيني حق آهي _ان کان اڳ  پ پ پ حيدرآباد ڊويزن جي اجلاس کي خطاب ڪندي وڏي وزير سيد قائم علي شاهه جيڪو پ پ پ سنڌ جو صدر پڻ آهي  چيو ته شهيد ذوالفقار علي ڀٽو جي 4 اپريل تي ورسي انتهائي عقيدت ۽ احترام سان ملهائي ويندي ڇاڪاڻ ته 4 اپريل ۽ شهيد محترمه بينظير ڀٽو جي شهادت وارو ڏهاڙو 27 ڊسمبر پارٽي لاءِ وڏي اهميت رکن ٿا ۽ ان ڏهاڙن تي سڄي ملڪ جو عوام  ڳڙهي خدا بخش وڏي انگ ۾ شرڪت ڪري پنهنجي قائدين کي خراج عقيدت پيش ڪندو آهي _ هن چيو ته هن سال پراڻي روايت کي برقرار رکندي ۽ ملڪي حالتن کي نظر ۾ رکندي ورسي جي تقريب صبح جو 9 وڳي شروع ڪئي ويندي جنهن جي ابتدا قرآن خواني سان ڪئي ويندي ۽ مزار تي منجهند  جو اڍائي وڳي دعا گهري ويندي جنهن کانپوءِ لنگر شروع ڪيو ويندو جڏهن ته  شام جو 4 کان 6 وڳي تائين پارٽي جي اعليٰ قيادت  خطاب ڪندي جنهن بعد ساڍي 6 وڳي دعا گهري ويندي _ سنڌ جي وڏي وزير سيد قائم علي شاهه چيو ته شهيد ذوالفقار علي ڀٽو ۽ شهيد محترمه بينظير ڀٽو  جهڙي ريت عوام جي خدمت ڪئي آهي ان جو مثال ماضي ۾ ڪٿي به نٿو ملي ۽ سندن نقشي قدم تي هلندي اسان ملڪ کي درپيش بحرانن مان ڪڍي سگهون ٿا_ هن چيو ته هن وقت پارٽي جو شريڪ چيئرمين آصف علي زرداري جهڙي ريت دانشمندي سان پارٽي هلائي رهيو آهي ان جي ڪاميابي جو مثال هي آهي ته اڄ  ملڪ جا سياستدان پنهنجي مسئلن جي حل لاءِ ساڻس صلاح مصلحت ڪن ٿا _ قائم علي شاهه پ پ پ ڪارڪنن سان مخاطب ٿيندي چيو ته سپريم ڪورٽ جي فيصلي تحت اليڪشن ڪميشن 20 سيپٽمبر 2015 تي سنڌ ۾ مڪاني چونڊون ڪرائڻ جو اعلان ڪيو آهي  ۽ پ پ پ جي سمورن ڪارڪنن کي هن وقت کان ئي چونڊن جي سلسلي ۾ تياريون شروع ڪرڻ گهرجن _ان سان گڏوگڏ تڪبندين جو سلسلو پڻ هلندڙ آهي _ هن چيو ته هن وقت ٿيل تڪبندين  تحت شهري علائقن ۾ هڪ يو سي جي آبادي 40 هزار جڏهن ته ٻهراڙي ۾ يو سي جي آبادي 10 هزار آهي ۽ آبادي جي مناسبت سان هر يو سي ۾ 5 کان 10 وارڊ ٺاهيا ويندا _ هن وڌيڪ چيو ته پ  پ  پ حڪومت ئي قومي اسيمبلي ۾ قرارداد آڻي  مڪاني چونڊن ۾ عورتن کي 33 سيڪڙو نمائندگي جو حق ڏنو _ هن مڪاني چونڊن جي حوالي سان پ پ پ ڪارڪنن وچ ۾ اختلافن واري تاثر کي رد ڪندي چيو ته ڪارڪنن وچ ۾ ان حوالي سان ڪي به اختلاف منظر عام تي نه آيا آهن ۽ نه ئي ڪارڪن اهڙي  عمل جو حصو بڻجندا ڇاڪاڻ ته پ پ پ قيادت ايندڙ مڪاني چونڊن ۾ ڪارڪنن کي ترجيح ڏئي رهي آهي ۽ مڪاني چونڊن ۾ ڪارڪن ٻڌي ۽ اتحاد سان تاريخي ڪاميابي حاصل ڪري دنيا ۾ اهو ثابت ڪندا ته  عوام  پ پ پ سان هر وقت گڏ آهي _ ان کان اڳ اجلاس کي خطاب ڪندي  پ پ پ سنڌ جي جنرل سيڪريٽري تاج حيدر چيو ته ملڪ ۾ اڄ قائم جمهوريت ڀٽو خاندان جي قربانين جو نتيجو آهي ۽ ڀٽو خاندان جي نياڻي شهيد محترمه بينظير ڀٽو  ٻن بدترين آمريتن سان وڙهي انهن کي هميشه لاءِ دفن ڪري ڇڏيو _ هن چيو ته پ پ پ ڪارڪن آمريتن جي دور ۾ پابندين ۽ رڪاوٽن باوجود ذوالفقار علي ڀٽو جي ورسي ۾ شرڪت لاءِ ڳڙهي خدا بخش پهچندا هئا ۽ اڄ به سندن اهو جذبو برقرار آهي _ان موقعي تي پ پ پ حيدرآباد جي ضلعي صدر  زاهد علي ڀرڳڙي خطاب ڪندي چيو ته اڄ غير جمهوري عنصر آمريت جي چادر پائي پ پ پ خلاف سازشون ڪري رهيا آهن پر اسان کين ٻڌائڻ چاهيون ٿا ته اسان  آصف علي زرداري جي دانشمندي ۽ بي مثال قيادت ۾ سندن ناپاڪ ارادا خاڪ ۾ ملائي ڇڏينداسين _ اجلاس کي خطاب ڪندي صوبائي وزير ۽ پ پ پ حيدرآباد جي جنرل سيڪريٽري ڄام خان شورو چيو ته  شهيد ذوالفقار علي ڀٽو اسانجو سياسي مرشد آهي جنهن جي ورسي ۾ حيدرآباد جو عوام وڌ کان وڌ شرڪت ڪندو _اجلاس ۾ سينيٽر سسئي پليجو ، عبدالطيف انصاري ، اڳوڻي سينيٽر مولابخش چانڊيو ، ايم اين اي امير علي شاهه ڄاموٽ ، صوبائي وزير ڊاڪٽر سڪندر علي منڌرو ، پ پ پ اڳواڻن صادق ميمڻ ، ضياعباس رضوي ، پير امجد شاهه جيلاني ، عبدالجبار خان ، امين لاکو ،  ڊاڪٽر تحسين شيخ ، فياض شاهه ، عاجز ڌامراهه ، حنا دستگير ، پاشا قاضي ، سهراب خان مري ، صنم ٽالپر ، شگفته جماڻي ،  فرحين مغل ، احسان ابڙو ، امداد پتافي ، سردار ڪمال خان چانگ ، غلام شاهه جيلاني  ۽  حيدرآباد ڊويزن جي سمورن ضلعي ، تعلقي  ۽ يو سي سميت ذيلي تنظيمن جي عهديدارن ۽ ڪارڪنن وڏي انگ ۾ شرڪت ڪئي . ان کان اڳ وڏي وزير سيد قائم علي شاهه پريس ڪانفرنس جي موقعي تي حيدرآباد پريس ڪلب جي گورننگ باڊي جي ميمبر ۽ سينيئر صحافي علي حسن کي سنڌ حڪومت طرفان پريس ڪلب حيدرآباد لاءِ  20 لک رپين جي گرانٽ جو چيڪ پڻ ڏنو .

 

شهيد سورهيه بادشاهه کي ڦاهي ڏيڻ وارو ڪيس ٻيهر کولڻ جو مطالبو

حيدرآباد (بيورو) سنڌ جي سياسي، مذهبي اڳواڻن، ليکڪن، حر جماعت جي معززين ۽ مسلم ليگ فنڪشنل جي اڳواڻن مطالبو ڪيو آهي ته شهيد سورهيه بادشاهه جي ڦاهي ڏيڻ وارو ڪيس ٻيهر کوليو وڃي، 20 مارچ تي ملڪ ۾ عام موڪل جو اعلان ڪري سرڪاري سطح تي پروگرام ڪرايا وڃن. اهڙو اظهار حيدرآباد ۾ مسلم ليگ فنڪشنل قاسم آباد طرفان سنڌ ميوزيم جي ممتاز مرزا هال ۾ پير سيد صبغت الله شاهه شهيد سورهيه بادشاهه جي 72 هين ورسي جي حوالي سان منعقد ڪيل تقريب ۾ خطاب ڪندي ۽ قراردادون پاس ڪندي ڪيو. ان موقعي تي مسلم ليگ فنڪشنل ليڊيز ونگ سنڌ جي صدر ۽ ايم پي اي نصرت  سحر عباسي اعلان ڪيو آهي ته سنڌ اسيمبلي مان پاس ٿيل حر ايڪٽ کي ختم ڪرائڻ لاءِ تمام جلد اسيمبلي ۾ قرارداد آندي ويندي ۽ تعليمي نصاب ۾ شهيد سورهيه بادشاهه بابت سبق شامل ڪرائڻ لاءِ ڪردار ادا ڪيو ويندو. هن چيو ته پير سيد صبغت الله شاهه شهيد سورهيه بادشاهه اسان سڀني جو آئيڊيل شخصيت جو مالڪ هئو. هن چيو ته شيهد سورهيه بادشاهه جي سوچ ۽ نظرئي تي هلي ڪري اسان وطن جي حفاظت ڪرڻ ڄاڻون ٿا. سورهيه بادشاهه ۾ بهادري ۽ شجاعت هئي جنهن ڪري انگريز به سامهون ڪنڌ کڻي نه ڳالهائيندو هو. ناليواري ليکڪ، محقق ۽ پير سيد صبغت الله شاهه شهيد سورهيه بادشاهه ۽ حر تحريڪ تي ڪتاب لکندڙ پرو فيسر الهورايو بهڻ چيو ته شهيد سورهيه بادشاهه کي جڏهن انگريزن گرفتار ڪري حيدرآباد سينٽرل جيل ۾ قيد رکي ڪيس هلايو ته شهيد سورهيه بادشاهه جي طرفان ڪير به شاهدي ڏيڻ لاءِ تيار نه هو ۽ انگريزن جن ماڻهن کي خريد ڪيو انهن شهيد سورهيه بادشاهه جي خلاف شاهديون ڏنيون ۽ انگريز 6 مهينا ڪئمپ قائم ڪري رکي هئي. هن چيو ته اسان کي تاريخ ۾ اڪيلو ڪيو ويو. ڇو ته انگريز جيڪا تاريخ لکرائي اڄ به انهن جي ريڪارڊ ۾ موجود آهي ۽ حرن کي ڌاڙيلن سان سڏيو ويندو هو ان حوالي سان 1940 ۾ سنڌ اسيمبلي ۾ به حرن جي خلاف ايڪٽ پاس ڪرايو جنهن ۾ ڪنهن به ميمبر مخالفت نه ڪئي جيڪا سراسر نا انصافي آهي. مسلم ليگ فنڪشنل ضلعي حيدرآباد جي صدر محمد افضل گجر چيو ته پاڳارا خاندان جي تاريخ 200 سال پراڻي جن پنهنجي دور ۾ اسلام سان گڏ وطن جي خدمت ڪئي ۽ وطن جي آزادي لاءِ جدوجهد جاري رکي. هن چيو ته اسان اڄ به ذهني غلام آهيون جنهن مان نڪرڻ لاءِ شهيد سورهيه بادشاهه جي ڏسيل راهه تي هلڻ جي ضرورت آهي. سينئير صحافي ۽ حر جماعت جي معزز شخصيت فقير منٺار مڱريو چيو ته شهيد سورهيه بادشاهه جهڙو عظيم هيرو ايشيا ۾ نه ملندو جنهن وطن يا ڪفن آزادي يا موت جو نعرو هڻي ملڪ آزاد ڪرايو. هن مطالبو ڪيو ته شهيد سورهيه بادشاهه جو ڪيس ٻيهر هلايو وڃي. جي يو آءِ حيدرآباد جي امير مولانا تاج ۾ محمد ناهيون چيو ته شهيد سورهيه بادشاهه انگريزن سان ٽڪر کاڌو پر سر نه جهڪايو. هن چيو ته اهڙا بهادر ماڻهون صدين ۾ پيدا ٿيندا آهن هن ڌرتي به اسان کي سورهيه بادشاهه جهڙا ماڻهون ڏنا جن وطن جي آزادي لاءِ جنگ وڙهي پنهنجي جان قربان ڪئي. ان موقعي تي جماعت اسلامي سنڌ جي اڳواڻ مولانا عبدالوحيد قريشي، ايم ايس ايف فنڪشنل سنڌ جي صدر وقار جٽ، عبدالوهاب منشي، محمد امين احمداڻي، استاد نظاماڻي، ناظر حسين نظاماڻي، سيد اسد شاهه راشدي، فقير غلام نبي پنهيار ۽ ٻين خطاب ڪيو

 

يمن ۾ باغين خلاف سعودي آپريشن جي مڪمل حمايت ڪريون ٿا: آصف زرداري

ڪراچي (اسٽاف رپورٽر) اڳوڻي صدر ۽ پيپلزپارٽي جي شريڪ چيئرمين آصف علي زرداري چيو آهي ته پيپلزپارٽي سعودي عرب سان ڪُلهو ڪُلهي ۾ ملائي بيٺل آهي ۽ يمن ۾ باغين خلاف سعودي عرب آپريشن جي مڪمل حمايت ڪري ٿي. ڪراچي ۾ يمن جي صورتحال جي حوالي سان پريس ڪانفرنس دوران رحمان ملڪن آصف علي زرداري جو بيان پڙهي ٻڌايو جنهن ۾ هن جو چوڻ هو ته باغين سبب يمن ۾ جمهوري حڪومت کي خطرا آهن انهيءَ لاءِ پيپلز پارٽي سعودي عرب سان گڏ آهي ۽ يمن ۾ باغين خلاف سعودي آپريشن جي مڪمل حمايت ڪري ٿي. پنهنجي پيغام ۾ اڳوڻي صدر آصف علي زرداري جو چوڻ هو ته ڪوبه مسلمان سعودي عرب ۾ مقصد جاين تي آنچ به اچڻ نه ڏيندو ۽ ڪنهن به ڏکئي وقت ۾ سمورا اسلامي ملڪ سعودي عرب سان گڏ آهن. انهيءَ موقعي تي رحمان ملڪ جو چوڻ هو ته پارليامينٽ ۽ پيپلزپارٽي يمن ۾ جمهوريت جي بقا لاءِ ٿيندڙ ڪارروائي سان گڏ آهي، سعودي عرب اسان جي تمام گهڻي مدد ڪئي آهي ۽ اڄ جيڪڏهن ڏکئي وقت ۾ آهي ته پاڪستان اُن سان گڏ آهي. هن چيو ته ايران ۽ سعودي عرب وچ ۾ ڇڪتاڻ کي گهٽائڻ لاءِ اسان کي پنهنجو ڪردار ادا ڪيو پر موجوده حڪومت ڪڏهن به سعودي عرب سميت ڪنهن به مڪ سان لاڳاپن جي باري ۾ پارليامينٽ کي آگاهه ناهي ڪيو انهيءَ لاءِ اسان کي وزيراعظم نوازشريف جي سعودي عرب سان لاڳاپن جي نوعيت معلوم ناهي، سعودي عرب جي صورتحال تي نوازشريف آصف زرداري جي اعتماد ۾ ناهي ورتو انهيءَ لاءِ پيپلزپارٽي وزيراعظم سان رابطو کانپوءِ پنهنجو واضح موقف جو اعلان ڪندي.

 

يمن جي معاملي تي پارليامينٽ کي اعتماد ۾ ورتو وڃي: خورشيد شاهه

سکر(بيورو) قومي اسيمبلي ۾ مخالف ڌر جي اڳواڻ ۽ پيپلز پارٽي جي سينيئر اڳواڻ سيد خورشيد شاهه چيو آهي ته وزيراعظم نواز شريف کي يمن جي معاملي تي ڪنهن به فيصلي کان اڳ پارليامينٽ کي اعتماد ۾ وٺڻ گهرجي، سکر  ۾ ميڊيا سان ڳالهائيندي خورشيد شاهه چيو ته سعودي عرب سان اسان جا ڀائيپي وارا لاڳاپا آهن جڏهن ته اسان جنگ حالت ۾ آهيون ۽ ملڪ ۾ سيڪيورٽي جي صورتحال نازڪ آهي، ان لاءِ يمن جي معاملي تي ڪنهن به فيصلي کان اڳ وزيراعظم نواز شريف کي پارليامينٽ کي اعتماد ۾ وٺڻ گهرجي، هن چيو ته ڪراچي ۾ دهشتگردن خلاف بنا فرق ڪارروائي جاري آهي نائن زيرو مان پڪڙيل جوابدار حراست ۾ آهن ۽ آپريشن ۾ ڪنهن مخصوص   سياسي تنظيم کي نشانو نه پيو بڻايو وڃي.

 

پاڪستانين جي واپسي لاءِ 2 ٻيڙا يمن موڪلي رهيا آهيون: پرڏيهي وزارت

اسلام آباد (بيورو) پرڏيهي وزارت چيو آهي ته 2 ننڍا ٻيڙا يمن روانا ٿيندا، ٻئي جهاز چار سئو ماڻهن کي واپس آڻيندا، سعودي سالميت کي خطرو پاڪستان لاءِ ڳڻتي جو سبب هوندو، حالتن جو جازو وٺڻ لاءِ حڪومتي وفد به سعودي عرب ويندو، اسلام آباد ۾ پريس ڪانفرنس ڪندي پرڏيهي سيڪريٽري اعزاز احمد چوڌري ٻڌايو ته ايندڙ ٻن ڏينهن ۾ 2 ننڍا ٻيرا يمن روانا ڪنداسين، ٻئي ٻيڙا چار سئو ماڻهن کي آڻي سگهن ٿا، عدن ۾ خراب صورتحال سبب پاڪستانين کي ويڙهه رڪجڻ کانپوءِ  ڪڍنداسين حالتن جو جائزو وٺڻ لاءِ حڪومتي وفد به سعودي عرب ويندو، پرڏيهي سيڪريٽري جو چوڻ هو ته جيڪڏهن سعودي عرب جي داخلي سيڪيورٽي کي خطرو ٿيو ته پاڪستان لاءِ ڳڻتي جو سبب هوندو سمورا فيصلا قوم کي اعتماد ۾ وٺي ڪيا ويندا.

 

گلگت بلتستان جي آئيني حيثيت بحال ڪئي وڃي:الطاف حسين

لنڊن(م.ڊ) متحده قومي موومينٽ جي قائد الطاف حسين مطالبو ڪيو آهي ته گلگت بلتستان جي آئيني حيثيت بحال ڪئي وڃي، الطاف حسين پنهنجي جاري ڪيل بيان ۾ چيو آهي ته گلگت بلستان جي ائيني حيثيت بحال ڪري آزاد ڪشمير جي طرز تي اسيٽيٽ سبجيڪٽ رول جي سهولت ڏني وڃي، هن چيو ته عوامي جي حقن لاءِ جدوجهد ڪري رهيا آهيون،ايم ڪيو ايم ملڪ جي واحد لبرل، جمهوري ۽ ترقي پسند پارٽي آهي جيڪا ملڪ مان فرسوده جاگيرداري نطام جو خاتمو چاهي ٿي.