تازيون خبرون

Daily Archives: March 27, 2015

ضرب عضب ۽ ڪراچي آپريشن جا مثبت نتيجا اچي رهيا آهن: نواز شريف

پشاور (م.ڊ) وزيراعظم نواز شريف چيو آهي ته نئون پاڪستان ٺاهڻ جي ڳالهه ڪندڙ 2 سال گذرڻ باوجود صوبي کي نئون نه بڻائي سگهيا جڏهن ته اسان نئون خيبرپختونخواهه نه پر بهترين خيبرپختونخواهه بڻائينداسين، پشاور ۾ مسلم ليگ ن جي ورڪرز ڪنوينشن کي خطاب ڪندي نواز شريف چيو ته خيبرپختونخواهه مسلم ليگين جو مرڪز رهيو آهي پر اسان جنهن وٽ وڌيڪ ووٽ هئا انهن کي چيو ته حڪومت ٺاهين، مسلم ليگ ن پشاور مان 8 لک 56 هزار ووٽ کنيا ۽ جن جي حڪومت آهي انهن 10 لک 39 هزار ووٽ کنيا هو هر هر چوندا آهن ته اسان نئون پاڪستان ٺاهينداسين پر حڪومت کي 2 سال گذرڻ باوجود صوبي ۾ ڪابه تبديلي نه آئي جڏهن ته اسان نئون خيبرپختونخواهه نه پر بهترين خيبرپختونخواهه بڻائينداسين، هن چيو ته اسان ترقياتي ڪم ڪري نئين پاڪستان جو بنياد رکي ڇڏيو آهي  اسان کانپوءِ ڪوبه نئون موٽر وي نه ٺاهيو ويو پر اسان لاهور کان پشاور تائين موٽر وي ٺاهيو جڏهن ته ڪراچي لاهور موٽر وي ٺهڻ کانپوءِ ماڻهو گاڏي تي ڪراچي وڃڻ کي ترجيح ڏيندا ۽ ماڻهن جون دليون هڪ ٻئي جي ويجهو اينديون، لواري ٽنل تي به ڪم جاري آهي جيڪو ايندڙ 2 سالن ۾ مڪمل ٿي ويندو، وزيراعظم جو چوڻ هو ته اڄ دهشتگردي ڀڄي رهيا آهن ۽ اسان ان جي چيلهه ڀڃي ڇڏي آهي فرقيواريت جي نالي تي قتل ڪندڙن لاءِ پاڪستان ۾ ڪابه جاءِ ناهي اسان پاڪستان کي هڪ پرامن ملڪ بڻائينداسين ۽ دهشتگردي جي ڪابه شئي نه رهندي ان کان اڳ گورنر هائوس پشاور ۾ مسلم ليگ ن جي سينيٽرن ۽ قومي اسيمبلي جي ميمبرن کي خطاب ڪندي وزيراعظم جو چوڻ هو ته پاڪستان جو تاثر دنيا ۾ بهتر ٿي رهيو آهي ۽ ملڪي معيشت ۾ بهتري اچي رهي آهي جنهن جو اعتراف پوري دنيا ۾ ٿي رهيو آهي هن چيو ته آپريشن ضرب عضب ۽ ڪراچي آپريشن اسان شروع ڪيو جڏهن ته بجلي ۽ گيس جي بحران کي ٺيڪ ڪرڻ لاءِ به ڏينهن رات ڪم ڪري رهيا آهيون جنهن جاسٺا نتيجا جلد عوام جي سامهون هوندا.

 

ايم ڪيو ايم کي دهشتگرد تنظيم قرار ناهي ڏنو: قائم علي شاهه

ڪراچي (اسٽاف رپورٽر) وڏي وزير سيد قائم علي شاهه چيو آهي ته ڪراچي آپريشن ڪنهن جماعت نه پر ڏوهارين خلاف آهي، آپريشن ذريعي ٽارگيٽ ڪلنگ جي واقعن ۾ 60 سيڪڙو تائين گهٽتائي آئي، هــُو ايم ڪيو ايم کي دهشتگرد جماعت نه ٿا چون پر جيڪڏهن وفاق چوي ٿو ته اهو ان جو مسئلو آهي. سي ايم هائوس ڪراچي ۾ پريس ڪانفرنس ڪندي وڏي وزير قائم علي شاهه چيو ته ڪراچي ۾ آپريشن جي سخت ضرورت هئي، جنهن لاءِ هنن پنهنجي ئي فورسز تي ڀاڙيو ۽ انهن کي سهولتون فراهم ڪيون. هن چيو ته صوبي ۾ امن لاءِ گڏيل پاليسي جوڙي وئي جنهن تي هنن عملدرآمد ڪيو ۽ وفاقي حڪومتان ۾ سندن مدد ڪئي. وڏي وزير چيو ته گڏيل آپريشن ذريعي ٽارگيٽ ڪلنگ، ڀنگ لاءِ اغوا، ڀتي خوري ۽ دهشتگردي کي ختم ڪرڻ ٽاسڪ هو جنهن جا سٺا نتيجا سامهون اچي رهيا آهن ۽ ڪراچي ۾ ٽارگيٽ ڪلنگ 60 سيڪڙو تائين گهٽجي وئي آهي. سيد قائم علي شاهه چيو ته وزيراعظم ڪراچي آپريشن تي سمورين جماعتن کي اعتماد ۾ ورتو هو. وڏي وزير چيو ته هـُنن ايم ڪيو ايم کي دهشتگرد جماعت ناهي چيو پر جيڪڏهن وفاق وٽ ثبوت آهي اها چئي سگهي ٿي. وڏي وزير چيو ته کيس گورنر جي تبديلي جي ڄاڻ ناهي، جڏهن ته ايم ڪيو ايم کي سنڌ حڪومت ۾ شامل ڪرڻ جو فيصلو ناهي ڪيو، پر جيڪڏهن متحده حڪومت ۾ شامل ٿي ته سڀني کي خبر پئجي ويندي. هن چيو ته پهريون ڀيرو امن امان لاءِ 60 ارب رپيا بجيٽ رکي آهي، جڏهن ته ترقياتي بجيٽ مان ڪٽوتي ڪري امن امان قائم ڪرڻ لاءِ خرچ ڪئي آهي. سيد قائم علي شاهه ٻڌايو ته ڪراچي ۾ آپريشن دوران 122 اهلڪار شهيد ٿيا، جڏهن ته ڏيڍ سئو ٽارگيٽ ڪلرز، دهشتگرد 539 ۽ 487 ڀتي خور گرفتار ڪيا آهن. سندس چوڻ هو ته القاعده جي ڇهن دهشتگردن کي ماريو ويو ۽ ڇهن دهشتگردن کي گرفتار ڪيو ويو، جڏهن ته تحريڪ طالبان جا 152 دهشتگرد گرفتار ڪيا آهن. سيد قائم علي شاهه چيو ته امن امان قائم ڪرائڻ صوبي جي ذميواري آهي ۽ صوبي ۾ وڏو مسئلو امن امان بحال ڪرائڻ آهي. هن چيو ته ڪراچي ۾ صالح مسجد تي حملي جي جوابدارن جي نشاندهي ٿي چـُڪي آهي. سيد قائم علي شاهه چيو ته شڪارپور سانحي ۽ شهيد خالد محمود سومري جا قاتل گرفتار ڪيا آهن. هن چيو ته شاهدن کي تحفظ ڏيڻ لاءِ سنڌ حڪومت قانون سازي ڪئي. ملٽر ڪورٽس جي حوالي سان سيد قائم علي شاهه چيو ته ضرورت تحت فوجي عدالت جو انگ وڌايو ويندو. وڏي وزير چيو ته فوجي عدالتن بابت مشاورت صوبي جي ليگڪ ايڊ ڪميٽي ڪري رهي آهي ۽ هن وقت تائين 64 ڪيس ملٽري ڪورٽس ۾ موڪليا ويا آهن.

 

قومي اسيمبلي ۾ بلدياتي چونڊون غير جماعتي بنيادن تي ڪرائڻ وارو بل منظور، پ پ جي مخالفت

اسلام آباد (بيورو) قومي اسيمبلي جو اجلاس اسپيڪر سردار اياز صادق جي صدارت هيٺ ٿيو، اجلاس ۾ خيالن جو اظهار ڪندي اپوزيشن ليڊر سيد خورشيد شاهه چيو ته غير جماعتي بنيادن تي بلدياتي چونڊون ڪرائڻ جي بنياد ڊڪٽيٽر رکي ۽ ان سان ڪرپشن جو بنياد پيو نريسري ۾ ڪرپشن جو ٻوٽو لڳائيندو ته اهو وڻ بڻجي ويندو، خورشيد شاهه چيو ته آمريت جي دور ۾ ڪائونسلر کي پئسا ڏئي ووٽ وجهرايا ويا، مسلم ليگ ن کي پنهنجي مٿان اعتماد ناهي، سياسي پارٽين جا ماڻهو ايندا ته هارس ٽريڊنگ نه ٿيندي، پنجاب جون بلدياتي چونڊون به جماعتي بنيادن تي ٿيڻ گهرجن،  حڪومت ڪرپٽ نظام طرف نه وڃي جماعتي بنيادن تي چونڊون ڪرائڻ سان جمهوريت  مستحڪم ٿيندي پارلياميني معاملن بابت مملڪتي وزير شيخ آفتاب چيو ته جيڪڏهن جماعتي بنيادن تي چونڊون ڪرائڻيون آهن ته نوان ماڻهو نه ايندا پيپلز پارٽي کي غير جماعتي بنيادن تي چونڊون ڪرائڻ جي حمايت ڪرڻ گهرجي، شيخ آفتاب جماعتي بنيادن تي چونڊون ڪرائڻ جي پيپلز پارٽي جي ترميم جي مخالفت ڪئي، هن چيو ته بلدياتي چونڊون جمهوريت جي نرسري آهن بلدياتي چونڊون غير جماعتي بنيادن تي ڪرائڻ گهرجن شيخ آفتاب بلدياتي چونڊون غير جماعتي بنيادن تي ڪرائڻ جو بل ايونا ۾ پيش ڪيو اپوزيشن ليڊر خورشيد شآهه بلدياتي چونڊون عير جماعتي بنيادن تي ڪرائڻ جي مخالفت ڪئي جڏهن ته بل اڪثريت سان منظور ڪيو ويو، ان موقعي تي ايم ڪيو ايم عمران خان جي ڪالهه واري تقرير خلاف قومي اسميبلي مان واڪ آئوٽ ڪيو.

 

پ پ ڪنٽومينٽ بورڊ ۾ غير جماعتي بنيادن تي مڪاني چونڊن کي سپريم ڪورٽ ۾ چئلينج ڪري ڇڏيو

اسلام آباد (بيورو) پيپلزپارٽي ڪنٽومينٽ بورڊ ۾ غير جماعتي بنيادن تي مڪاني چونڊن کي سپريم ڪورٽ ۾ چئلينج ڪري ڇڏيو، درخواست پيپلزپارٽي جي جنرل سيڪريٽري ۽ اڳوڻي وزيراعظم راجا پرويز اشرف پاران سپريم ڪورٽ ۾ داخل ڪئي ويئي راجا پرويز اشرف پاران داخل درخواست ۾ موقف اختيار ڪيو ويو ته مڪاني چونڊون غير جماعتي بنيادن تي نٿيون  ٿي سگهن هن چيو ته مڪاني چونڊن ۾ سمورين پارٽين جو حصو وٺڻ ضروري آهي ان لاءِ غير جماعتي بنيادن تي چونڊون نه ٿيڻ گهرجن راجا پرويز اشرف مطابق جمهوريت جو مطلب اهو ئي اهي ته سياسي پارٽيون جمهوري عمل ۾ شامل ٿين سياسي پارٽيون وفاق صوبي ۽ مقامي سطح تي ٿيندڙ ڇونڊن ۾ حصو وٺڻ جي اهل آهن اڳوڻي وزيراعظم پاران درخواست ۾ در وفاق کي بڻايو ويو هن عدالت کي درخواست ڪئي ته اليڪشن ڪميشن کي حڪم ڏنو وڃي ته ڪنٽومينٽ بورڊز ۾ جماعتي بنيادن تي مڪاني چونڊون ڪرايون وڃن غير جماعتي بينادن کان روڪيو وڃي درخواست جي پيروي به پيپلزپارٽي جي اڳاوڻ ۽ سپريم ڪورٽ بار ايسوسيئيشن جو اڳوڻو صدر اعتزازاحسن ڪندو واضح رهي ته سڄي ملڪ ۾ 43 ڪنٽومينٽ بورڊز آهن جن ۾ 25 اپريل تي مڪاني نمائندن جي چونڊ ٿيندي هوڏانهن لاهور هاءِ ڪورٽ ۾ ڪنٽومينٽ بورڊ ۾ مڪاني چونڊون غير جماعتي بنيادن تي ڪرائڻ جي خلاف وڌيڪ درخواستون داخل ڪيون ويون آهن جن ۾ موقف اختيار ڪيو ويو ته هاءِ ڪورٽ جو 2 رڪني بئنچ غير جماعتي بلدياتي چونڊن کي ڪالعدم قرار ڏيئي چڪو فيصلي کان پوءِ غير جماعتي بلدياتي چونڊن جو فيصلو غير آئيني آهي جسٽس سيد منصور علي شاهه ان ڪيس بابت سموريون درخواستون گڏ ڪرڻ جو حڪم ڏيندي اٽارني جنرل ۽ ايڊووڪيٽ جنرل کي 26 مارچ تي طلب ڪري ورتو.

 

آئوٽ آف ٽرن پروموشن ۽ بڪتر بند گاڏيون ڪيس: سپريم ڪورٽ وڪيل جو لائسنس معطل ڪري ڇڏيو

اسلام آباد(بيورو) سپريم ڪورٽ ۾ آئوٽ آف ٽرن پروموشن ۽ بڪتر بند گاڏين بابت ڪيس جي ٻڌڻي دوران آءِ جي سنڌ غلام حيدر جمالي عدالت ۾ پيش ٿيو، ججن سان منهن ماري تي عدالت آءِ جي جي وڪيل عرفان قادر جو ٻن هفتن لاءِ لائسنس معطل ڪري ڇڏيو. سپريم ڪورٽ ۾ جسٽس جواد ايس خواجه جي سربراهي ۾ 3 رڪني بئنچ آئوٽ آف پروموشن ۽ سنڌ پوليس لاءِ بڪتر بند گاڏيون خريد ڪرڻ بابت ڪيس جي ٻڌڻي ڪئي. آءِ جي سنڌ پوليس غلام قادر جمالي عدالت جي حڪم تي پيش ٿيو،آئوٽ آف ٽرن پروموشن ڪيس ۾ سنڌ حڪومت جواب داخل نه ڪرايو، جنهن تي عدالت سخت ڪاوڙ جو اظهار ڪندي رپورٽ وٺڻ کان انڪار ڪري ڇڏيو. جسٽس جواد ايس خواجه رمارڪس ڏيندي چيو ته عدالتي حڪمن تي عمل نه پيو، ڪيترائي آفيسر اڃان تائين ناهن هٽايا ويا، جن کي انسپيڪٽر ٿيڻو هيو اهي ڊي ايس پي آهن. بڪتر بند گاڏين جي ڪيس ۾ جسٽس جواد ايس خواجه ۽ وڪيل عرفان قادر ۾ منهن ماري ٿي، عدالت عرفان قادر جو لائسنس معطل ڪري ڇڏيو. عدالت چيو آهي ته عرفان قادر جو ٻن هفتن جو لائسنس معطل رهندو.

 

والاريل ڪشمير تڪراري علائقو آهي، سمجهوتا ايڪسپريس جا ڏوهاري اڃان به آزاد آهن: پاڪستان

اسلام آباد (بيورو) پرڏيهي وزارت جي ترجمان تسنيم اسلام آباد ۾ هفتيوار بريفنگ ڏيندي چيو ته جمون اينڊ ڪشمير تڪراري علائقو آهي، ڪشمير ڀارتي شهري ناهن، آسيه اندرابي واقعي سان ڪشميرين جا پاڪستان لاءِ جذبات سامهون آيا آهن، ڪشمير جي مستقبل جو فيصلو گڏيل قومن جي قراردان مطابق ڪشميري عوام کي ڪرڻو آهي، تسنيم اسلم جو چوڻ هو ته سمجهوتا ايڪسپريس واقعي جا ڏوهاري اڃان تائين آزاد گهمي رهيا آهن سمجهوتا ايڪسپريس واقعي جا متاٿر اڃان تائين انصاف جا منتظر آهن دلي مشن سمجهوتا ايڪسپريس حملي ۾ شهيد ٿيندڙ ٻارڙن جي والدين کي انهن جي قبرن تي وڃڻ لاءِ مدد ڪري رهيو آهي، پرڏيهي وزارت جي ترجمان چيو ته چيني صدر جو پاڪستاني دورو حتمي آهي جڏهن ته تاريخ طئه ناهي ٿي، سعودي عرب يمن جي صورتحال جي حوالي سان رابطو ڪيو آهي، يمن ۾ پاڪ مشن بند ڪرڻ جو ڪوبه فيصلو نه ڪيو، پاڪ ٿائلينڊ قيدين جي ڏي وٺ تحت ڪافي قيدي واپس پنهنجي وطن واپس آندا ويا آهن.

 

خيبر ايجنسي ۾ جيٽ جهازن جي بمباري، وڌيڪ 8 دهشتگرد مارجي ويا

خيبر ايجنسي (مانيٽرنگ ڊيسڪ) خيبر ايجنسيءَ ۾ پاڪ فوج جي جيٽ جهازن جي بمباري ۾ وڌيڪ 8 دهشتگرد مارجي ويا ۽ پنج ڄڻا زخمي ٿي پيا. پاڪ فوج جو خيبر ايجنسي ۾ دهشتگردن خلاف خيبر ون آپريشن ڪاميابي سان جاري آهي. سڪيورٽي ذريعن موجب تيره ماٿري ۾ دهشتگردن جي ٿاڪن تي جيٽ جهازن ذريعي بمباري ڪئي وئي،جنهن ۾ 8 دهشتگرد مارجي ويا ۽ پنج ڄڻا زخمي ٿي پيا. سڪيورٽي ذريعن موجب بمباري ۾ دهشتگردن جا ڪيترائي ٿاڪ به تباهه ٿي ويا آهن. گذريل ڏينهن پڻ خيبر ايجنسي جي تيره ماٿري ۾ جيٽ جهازن جي بمباري ۾ 30 دهشتگرد مارجي ويا ۽ ڍ هٿيارن ۽ بارود جا 2 ذخيرا تباهه ٿي ويا هئا.

 

دهشتگردي جي مسئلي تي ڪا به سوديبازي نه ڪئي ويندي:اسحاق ڊار

ڪراچي (اسٽاف رپورٽر) ناڻي واري وفاقي وزير اسحاق ڊار چيو آهي ته دهشتگردي جي مسئلي تي ڪا به سوديبازي نه ڪئي ويندي، ڪراچي ۾ آپريشن هڪ جماعت نه پر دهشتگردن خلاف ڪيو پيو وڃي. ڪراچي ۾ ايف پي سي سي آءِ تقريب کي خطاب ڪندي اسحاق ڊار چيو ته آپريشن ضرب عضب ۾ سڪيورٽي فورسز وڏيون قربانيون ڏنيون آهن ۽ ڪاميابيون به مليون آهن. هن چيو ته ڪراچي ۾ آپريشن هڪ جماعت نه پر دهشتگردن خلاف ڪيو پيو وڃي. سندس چوڻ هو ته ملڪ کي دهشتگردي کان ڇوٽڪارو ڏيارڻ حڪومت جي پهرين ترجيح آهي. اسحاق ڊار چيو ته ملڪي ترقي لاءِ چئن نقطن تي ڌيان ڏنو پيو وڃي ۽ عملي قدم کنيا پيا وڃن. ناڻي واري وفاقي وزير اسحاق ڊار چيو ته ن ليگ حڪومت واپار دوست حڪومت آهي، پيٽرول جون قيمتون گهٽائڻ لاءِ 50 ارب رپين جو نقصان ٿيو آهي.

 

پنجاب ۾ حڪمران دهشتگردن جا سرپرست آهن، هارين تي تشدد جي مذمت ڪريان ٿو: جمشيد دستي

ملتان (م.ڊ) قومي اسيمبلي جو ميمبر جمشيد دستي احتساب بل کڻي ملتان کان خانيوال روانو ٿي ويو هن چيو ته الطاف حسين کي فرعون چوندڙ عمران خان ڪروڙين روپيا کڻي بيرسٽر سلطان جهڙي وڏي فرعون کي ٽڪيٽ ڏني پنجاب ۾ حڪمران دهشتگردن جا سرپرست آهن هارين تي پوليس تشدد جي مذمت ڪريان ٿو، ملڪ ۾ ڪرپشن، لاقانونيت خلاف احتساب جو نعرو هڻي مظفرڳڙهه کان رواني ٿيندڙ جمشيد دستي جي سائيڪل مارچ اڄ ملتان کان پنهنجي ايندڙ منزل خانيوال طرفان رواني ٿي وئي جمشيد دستي جو چوڻ هو ته وي آءِ پي ڪلچر خلاف آهيون پنجاب پوليس دهشتگرد ۽ حڪمران دهشتگردن جا سرپست لاهور ۾ هارين تي تشدد ۽ گرفتاريون شرمناڪ آهن، جمشيد دستي عمران خان کي تنقيد جو نشانو بڻائيندي چيو ته پارٽي تي جاگيردارن ۽ گادي نشينن جو قبصو آهي الطاف حسين کي فرعون چونڊ عمران خان وڏي فرعون بيرسٽر سلطان جي ڪيمپيئن ڪندو پيو ڦري.

 

دادو: چانڊيا برادري ۾ پراڻو تڪرار ڀڙڪي پيو، 4 ڄڻا گولين جو کاڄ بڻجي ويا

دادو(اصغر ملاح) ندادو ويجهو چانڊيا برادري جي ٻن ڌرين ۾ زمين جو پراڻو تڪرار ٻيهر ڀڙڪي اٿيو، هٿياربندن پيشي تي عدالت ويندڙن جي ڪار تي فائرنگ ڪري ڏني، جنهن سبب 4 ڄڻا مارجي ويا ۽ هڪ زخمي ٿي پيو… ڳوٺ شير محمد سولنگي وٽ لنڪ روڊ تي هٿياربندن سيشن ڪورٽ دادو ۾ پيشي تي ويندڙن جي ڪار تي انڌا ڌنڌ فائرنگ شروع ڪري ڏني. فائرنگ جي نتيجي ۾ علي بخش چانڊيو، ٻُڌل چانڊيو، رياض چانڊيو ۽ ڪار ڊرائيور رياض لانگاهه مارجي ويا، جڏهن ته حسين زخمي ٿي پيو.. مارجي ويلن جا لاش ۽ زخمي کي دادو سول اسپتال منتقل ڪيو ويو، جتي وڏي انگ ۾ چانڊيا برادري جا ماڻهو پهچي ويا…. پوليس هڪ ڄڻي کي گرفتار ڪري ورتو آهي، پوليس جو چوڻ آهي ته چانڊيا برادري جي ٻن ڌرين ۾ زمين جو پراڻو تڪرار هلندڙ هو، جنهن تان واقعو پيش آيو، ڪيس داخل ڪري جوابدارن خلاف ڪارروائي ڪئي ويندي….