تازيون خبرون

Daily Archives: March 25, 2015

ڪراچي جون حالتون ڏينهون ڏينهن بهتر ٿي رهيون آهن: نواز شريف

اسلام آباد (بيورو) وزيراعظم نواز شريف چيو آهي ته ڪراچي جون حالتون ڏينهون ڏينهن بهتر ٿي رهيون آهن، شهر ۾ آپريشن سڀني پارٽين جي مشاورت سان شروع ڪيو ويو، ملڪ مان دهشتگردي ۽ انتهاپسندي جو خاتمو آڻي ئي سک جو ساهه کنيو ويندو.  اسلام آباد ۾ وزيراعظم نواز شريف سان مسلم ليگ نون سان واسطو رکندڙ سيالڪوٽ، گوجرانوالا، نارووال، حافظ آباد ۽ گجرات جي ايم اين ايز ملاقات ڪئي. ملاقات دوران تڪ جي ترقياتي منصوبن سميت مختلف معاملن تي ڳالهيون ڪيون ويون. ان موقعي تي ڳالهائيندي وزيراعظم نواز شريف چيو ته مسلم ليگ نون جي حڪومت کي توانائي بحران ورثي ۾ مليو آهي پر حڪومت محدود وسيلن باوجود توانائي بحران جي خاتمي لاءِ قدم کڻي رهي آهي. وزيراعظم چيو ته ڪراچي ۾ آپريشن ڏوهارين خلاف آپريشن شروع ڪرڻ جو ڪريڊٽ به مسلم ليگ ن جي حڪومت ڏانهن ئي وڃي ٿو، آپريشن کانپوءِ شهر جون حالتون ڏينهن ڏينهن بهتر ٿي رهيون آهن. هن چيو ته ڪراچي ۾ آپريشن ڏوهارين خلاف ٿي رهيو آهي، آپريشن شروع ڪرڻ کان اڳ سڀني پارٽين کي اعتماد ۾ ورتو ويو هو. وزيراعظم وڌيڪ چيو ته حڪومت ملڪ مان دهشتگردي جي خاتمي لاءِ پر عزم آهي، دهشتگردي ۽ انتهاپسندي جي پاڙ پٽي ئي سک جو ساهه کنيو ويندو. ملڪ مان هر صورت ۾ دهشتگردي جو خاتمو ڪرڻو آهي، ان لاءِ سمورا قدم کنيا پيا وڃن، ڪراچي آپريشن جا بهتر نتيجا ملي رهيا آهن،

 

 

 

 

 

پ پ پاران هر صورت ۾ جمهوريت جي دفاع جو اعلان

ڪراچي (اسٽاف رپورٽر) پيپلزپارٽي جي شريڪ چيئرمين ۽ اڳوڻي صدر آصف علي زرداري چيو آهي ته پيپلزپارٽي جمهوريت جو هر صورت ۾ تحفظ ڪندي جڏهن ته 18 هين آئيني ترميم ئي ملڪ ۾ اصلي تبديلي هئي. پيپلزپارٽي جي ڪو چيئرمين آصف علي زرداري پارٽي اڳواڻ اختر جدون جي گهر پهتو جتي ساڻس گڏ صوبائي وزير شرجيل ميمڻ، شيرين رحمان ۽ ٻيا اڳواڻ موجود هئا جڏهن ته ان موقعي تي ڳالهائيندي اڳوڻي صدر آصف علي زرداري چيو ته پيپلزپارٽي پارليامينٽ کي مضبوط ڪيو ۽ اُن کي سمورا اختيار ڏنا ڇو ته اسين ملڪ ۾ جمهوريت کي مضبوط ڪرڻ چاهياون ٿا ۽ هر صورت ۾ اُن جو تحفظ ڪنداسين. اڳوڻي صدر چيو ته اسان خيبرپختونخواهه کي نالو ڏئي سڃاڻپ ڏني جڏهن ته 18 هين آئيني ترميم ئي ملڪ ۾ اصل تبديلي هئي.

 

الطاف حسين بابت ڪي به دستاويز برطانوي حڪومت حوالي ناهن ڪيا: چوڌري نثار

اسلام آباد(بيورو) چوڌري نثار علي خان پريس ڪانفرنس کي خطاب ڪندي چيو آهي ته ايم ڪيو ايم جي قائد الطاف حسين منهنجي باري م بيان ڏنو هو ته مون برطانوي حڪومت کي ان خلاف ڪنهن قسم جا دستاويز فراهم ڪيا آهن مان واضح ڪرڻ چاهيان ٿو ته منهنجي ۽ برطانوي سفير وچ ۾ ملاقات ڪنهن کان لڪيل ناهي برطانوي سفير سان ملاقات ۾ الطاف حسين خلاف داخل ايف آءِ آر ۽ ان جي تقريرن اببت ڳالهه ٻولهه ڪئي وئي برطانوي سفير کي الطاف حسين جي ڌمڪين بابت آگاهه ڪيو، برطانوي سفير واضح ڪيو ته الطاف حسين برطانوي شهري آهي ۽ برطانيه ۾ ويهي ڌمڪيون ڏئي ٿو هن جو چوڻ هو ته برطانوي سفير واپسي تي پنهنجي ايندڙ لائحه عمل جي باري ۾ ٻڌائيندو، گهرو وزير جو چوڻ هو ته اي سي ايل ۾ ساڍا 8 هزار ماڻهن جا نالا شامل آهن جيڪي نه هجڻ گهرجن، جلد نئين اي سي ايل پاليسي سامهون آڻينداسين، هن واضح ڪيو ته حڪومت بغير ڪنهن ثبوت جي ڪنهن جو نالو اي سي ايل ۾ نه وجهندي، ايم ڪيو ايم جي ڪارڪن صولت مرزا جي موت واري سزا جي حوالي سان هن جو چوڻ هو ته بلوچستان حڪومت جي درخواست تي صولت مرزا جي ڦاهي ملتوي ڪئي وئي صولت مرزا کي 19 مارچ تي ڦاهي ڏني وڃي ها پر صولت مرزا جي بيان جي تصديق لاءِ 90 ڏينهن جي واڌ ڪئي وئي موت جي سزا ٻڌايل ٻئي قيدي شفقت حسين جي باري ۾ ڳالهائيندي گهرو  وزير ٻڌايو ته ڪنهن پرڏيهي دٻاءُ تي شفقت حسني جي سزا ملتوي ناهي ڪئي وئي شفقت حسين جي معاملي تي ڪجهه عنصر پاڪستان کي بدنام ڪرڻ چاهين ٿا ڪوبه اندروني يا ٻاهريون دٻاءُ ناهي پر صرف الله تعاليٰ جي ذات جو خوف آهي هن جو چوڻ هو ته شفقت حسين ڪيس جي حقيقتن تائين پهچڻ لاءِ هڪ مهيني جي مهلت ورتي وئي آهي سموريون حقيقتون عدليه، ميڊيا ۽ قوم سامهون رکيون وينديون ڇو ته اسان شفقت حسين ۽ جن جو ٻار قتل ٿيو ان سان به انصاف ڪرڻو آهي، پريس ڪانفرنس کي خطاب ڪندي چوڌري نثار انڪشاف ڪيو ته ڪجهه ملڪن مان قيدين جي حوالگي جي معاهدي کي گذريل دور ۾ غلط استعمال ڪيو ويو هو جاچ کانپوءِ خبر پئي ته هڪ نه پر چار قيدي برطانيه کان وطن واپس آندا ويا، 2000ع ۾ ڇڏيل چئن ئي ماڻهن کي ٻيهر گرفتار ڪيو ويو آهي، هن چيو ته قيدين کي آزادي ڏيارڻ ۾ ڪا مافيا ملوث آهي .

 

نواز شريف ۽ نريندر مودي وچ ۾ ايندڙ مهيني ملاقات جو امڪان

اسلام آباد (بيورو) وزيراعظم نواز شريف ۽ سندس ڀارتي هم منصب نريندر مودي وچ ۾ ايندڙ مهيني انڊونيشيا ۾ ملاقات جو امڪان آهي. ميڊيا رپورٽس موجب پاڪستان ۽ ڀارت جا وزيراعظم ايندڙ مهيني انڊونيشيا جي شهر بندونگ ۾ بندونگ ڪانفرنس جي 60 هين سالگرهه جي موقعي تي ملاقات ڪندا. سفارتي ذريعن موجب پاڪستان ڀارت سان ملاقات جي درخواست ناهي ڪئي پر ٻنهي ملڪن وچ ۾ ڪانفرنس جي موقعي تي ملاقات ٿيندي. 1955ع ۾ بندونگ ڪانفرنس  ۾ پاڪ چين وزيراعظمن وچ ۾ پهرين باضابطا ملاقات ٿي هئي جنهن جي درخواست پاڪستان ڪئي هئي. سرد جنگ جي زماني ۾ ٿيل بندونگ ڪانفرنس ذريعي اڻ لاڳاپيل ملڪن جي تنظيم جوڙي وئي جنهن ذريعي پاڪستان ۽ چين وچ ۾ دوستي جو بنياد وڌو ويو. هلندڙ مهيني اپريل ۾ رٿيل بندونگ ڪانفرنس دوران به وزيراعظم نواز شريف پنهنجي چيني منصب سان ملاقات ڪندو.

 

خيبر ايجنسي: فورسز جي ڪارروائي ۽ ڊرون حملو، 19 دهشتگرد ماجي ويا

ڪابل/خيبر ايجنسي (مانيٽرنگ ڊيسڪ) خيبر ايجنسي جي علائقي وادي تيره ۾ سڪيورٽي فورسز جي فضائي ڪارروائي جي نتيجي ۾ 10 دهشتگرد مارجي ويا ۽ ڪيترائي زخمي ٿي پيا، جڏهن ته فورسز جي بمباري جي نتيجي ۾ دهشتگردن جا 6 ٿاڪ پڻ تباهه ٿي ويا. خيبر ايجنسي جي وادي تيره واري علائقي ۾ سڪيورٽي فورسز جيٽ جهازن جي بمباري ذريعي دهشتگردن جي ٺڪاڻن کي نشانو بڻايو. ذريعن جو چوڻ آهي ته بمباري جي نتيجي ۾ اهم ڪمانڊر سميت 10 دهشتگرد مارجي ويا ۽ ڪيترائي زخمي ٿي پيا. فورسز جي بمباري جي نتيجي ۾ دهشتگردن جا 6 ٿاڪ پڻ تباهه ٿي ويا. ٻئي طرف افغان سرحدي علائقي نازيان ۾ آمريڪي ڊرون حملي ۾ 9 دهشتگرد مارجي ويا، افغان سيڪيورٽي اختيارين مطابق خيبرايجنسي سان لاڳاپيل علائقي نازيان ۾ آمريڪي ڊرون جهازن دهشتگردن جي 2 ٺڪاڻن کي نشانو بڻايو جنهن جي نتيجي ۾ 9 دهشتگرد مارجي ويا مارجي ويلن ۾ پابندي ۾مڙهيل لشڪر اسلام جي امير منگل باغ جي ڊرائيور سميت 7 اهم ڪمانڊر به شامل آهن.

 

سنڌ سرڪار پاران ڪراچي ۾ غيرقانوني شادي هالن کي سيل ڪرڻ جو حڪم

ڪراچي(اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ جي صدارت هيٺ بلديات کاتي جي اعليٰ آفيسرن جو اهم اجلاس منعقد ٿيو. اجلاس ۾ ڪراچي سميت سموري صوبي ۾ جاري ”صاف ۽ سرسبز ، پر امن سنڌ“ مهم جي حوالي سان تفصيلي رپورٽ پيش ڪئي وئي. اجلاس ۾ ايڊمنسٽريٽر ڪراچي ثاقب سومرو سميت اعليٰ آفيسرن شرڪت ڪئي. اجلاس ۾ صوبائي وزير شرجيل انعام ميمڻ صوبي ۾ قبضن جي خاتمي خاص ڪري شهر۾ هلندڙ اهڙا سمورا شادي هال جيڪي بغير اين او سي يا ٽيڪس جي هلي رهيا آهن انهن کي فوري طور تي سيل ڪرڻ جون هدايتون ڏنيون ۽ سمورن ضلعن جي ايڊمنسٽريٽرن کي خصوصي هدايتون جاري ڪندي چيو ته ستن ڏينهن جي اندر هو پنهنجي پنهنجي ضلعن جي اهڙن سمورن هالن کي سيل ڪري رپورٽ کيس پيش ڪن. اجلاس ۾ ايڊمنسٽريٽر ڪراچي صوبائي وزير کي شهر ۾ هلندڙ اهڙي سمورن شادي هالن بابت مڪمل رپورٽ پيش  ڪئي جيڪي يا ته بغير اجازت نامي جي هلي رهيا آهن يا اهي شادي هال ٽيڪس ادا نٿا ڪن. صوبائي وزير اجلاس ۾ موجود سمورن آفيسرن کي هدايتون ڏيندي چيو ته شهر ۾ غير قانوني، گرين بيلٽ يا رفائي پلاٽن تي قائم شادي هالن سميت اهڙا سمورا شادي هال جيڪي بغير اين او سي جي يا وري ٽيڪس ادا نٿا ڪن انهن کي فوري طور تي سيل ڪيو وڃي. ان موقعي تي هن سمورن ڊسٽرڪٽ جي ايڊمنسٽريٽرن کي سختي سان هدايتون ڏنيون ته هو پنهنجي پنهنجي ضلعن ۽ اهڙي قسم جي شادي هالن کي فوري طور تي سيل ڪري رپورٽ هڪ هفتي جي اندر اندر جمع ڪرائين. شرجيل انعام ميمڻ چيو ته ڪراچي سميت پوري سنڌ ۾ صفائي، وڻڪاري ۽ قبضن جي خاتمي لاءِ 23 فيبروري کان شروع ڪيل مهم ۾ تيزي آندي وڃي ۽ مين رستن سان گڏوگڏ گھٽين رستن ۽ پاڙن جي سطح تي صفائي کي يقيني بڻايو وڃي ۽ ان سلسلي ۾ ڪنهن به قسم جي ڪوتاهي برداشت نه ڪئي ويندي.

 

متحده سربراهه الطاف حسين کي انٽرپول ذريعي ڏيهه آڻڻ لاءِ سپريم ڪورٽ ۾ درخواست داخل

لاهور(م.ڊ) متحده سربراهه الطاف حسين کي انٽرپول ذريعي ڏيهه آڻڻ لاءِ سپريم ڪورٽ لاهور رجسٽري ۾ درخواست داخل ڪئي وئي آهي، درخواست گذار گورنر سنڌ عشرت العباد کي هٽائڻ ۽ صولت مرزا جي ڦاهي عمر قيد ۾ تبديل ڪرڻ جي به اپيل ڪئي آهي. بيريسٽر ظفرالله سپريم ڪورٽ لاهور رجسٽري ۾ متحده سربراهه الطاف حسين کي انٽرپول ذريعي ڏيهه آڻڻ لاءِ درخواست داخل ڪئي آهي، جنهن ۾ هن اپيل ڪئي آهي ته الطاف حسين تي دهشتگردي ايڪٽ تحت ڪيس داخل ٿي چڪو آهي ان ڪري سندس بيانن تي به پابندي وڌي وڃي. درخواست گذار گورنر سنڌ عشرت العباد کي هٽائڻ ۽ صولت مرزا جي ڦاهي عمر قيد ۾ تبديل ڪرڻ جي به اپيل ڪئي آهي. بيريسٽر ظفر الله پنهنجي درخواست ۾ عدالت کي اپيل ڪئي آهي ته ايم ڪيو ايم جي سياسي رجسٽريشن ختم ڪئي وڃي..

 

اليڪشن ڪميشن خيبرپختونخواهه ۾ مڪاني چونڊن جو شيڊول جاري ڪري ڇڏيو

اسلام آباد (بيورو) اليڪشن ڪميشن، خيبرپختونخواهه ۾ مڪاني چونڊن جو شيڊول جاري ڪري ڇڏيو آهي، ڪي پي ڪي ۾ مڪاني چونڊن لاءِ پولنگ 30 مئي تي ٿيندي  ۽ 10 جون تي نتيجا پڌرا ڪيا ويندا. اليڪشن ڪميشن خيبرپختونخواهه ۾ مڪاني چونڊن جو شيڊول جاري ڪري ڇڏيو آهي،   جنهن تحت نامزدگي فارم 13کان17 اپريل وصول ڪيا ويندا  ۽ 20کان 25 اپريل تائين نامزدگي فارمز جي جاچ پڙتال مڪمل ٿيندي. شيڊول موجب، 26کان 28 اپريل تائين نامزدگي فارمن خلاف اپيلون داخل ڪرائي سگهبيون، جڏهن ته 29اپريل کان 4مئي تائين اپيلون اڪلايون وينديون. اليڪشن ڪميشن جو چوڻ آهي ته 5 مئي تائين اميدوار نامزدگي فارم واپس وٺي سگهندا، جڏهن ته حتمي فهرست 6 مئي تي جاري ڪئي ويندي. خيبرپختونخواهه ۾ مڪاني چونڊن لاءِ پولنگ 30 مئي تي ٿيندي ۽ نتيجا 10 جون تي جاري ڪيا ويندا.

 

ايم ڪيو ايم جوڊيشل ڪميشن قائم ڪرڻ جي مخالفت ڪري ڇڏي

اسلام آباد(بيورو) وزيراعظم نواز شريف جي صدارت هيٺ سياسي پارٽين جي اڳواڻن جو اجلاس ٿيو جنهن ۾ جوڊيشل ڪميشن قائم ڪرڻ بابت ڳالهه ٻولهه ڪئي وئي ذريعن مطابق متحده قومي موومينٽ جوڊيشل ڪميشن قائم ڪرڻ جي مخالفت ڪري ڇڏي آهي، اجلاس ۾ ڳالهائيندي ايم ڪيو ايم اڳواڻ فاروق ستار جو چوڻ هو ته ڪابه اهم قانونسازي آئين سان ٽڪراءُ ۾ نٿي ٿي سگهي  جوڊيشل ڪميشن قائم ڪرڻ آئين جي آرٽيڪل 225 ۽ 189 جي ڀڃڪڙي هوندي، ذريعن مطابق ايم ڪيو ايم کان علاوه باقي سمورين پارٽين جوڊيشل ڪميشن جي حمايت ڪري ڇڏي آهي هوڏانهن ايم ڪيو ايم ڪراچي جي صورتحال تي وزيراعظم سان ملاقات جو وقت گهري ورتو آهي.

 

 

صولت مرزا جو هڪ مهيني ۾ ٻيون ڀيرو ڊيٿ وارنٽ جاري

ڪراچي (اسٽاف رپورٽر) ڪراچي جي دهشتگردي ٽوڙ جي عدالت صولت مرزا جا ٻيهر ڊيٿ وارنٽ جاري ڪري ڇڏيا آهن صولت مرزا کي پهرين اپريل تي مڇ جيل ۾ ڦاهي ڏني ويندي ڪراچي ۾ دهشتگردي ٽوڙ جي خاص عدالت نمبر 5 جي جج جاويد عالم مڇ جيل عملدارن پاران صولت مرزا جا ڊيٿ وارنٽ جاري ڪرڻ جي حوالي سان درخواست جي ٻڌڻي ڪئي جيل عملدارن پاران عدالت کي ٻڌايو ويو ته وفاقي حڪومت پاران صولت مرزا جي موت جي سزا ملتوي ٿيڻ جي باوجود جوابدار کي ڊيٿ سيل ۾ رهايو ويو آهي ان لاءِ عدالت کي درخواست آهي ته صولت مرزا جي سزا تي عملدرآمد جي تاريخ مقرر ڪئي وڃي جنهن تي عدالت جي جج جاويد عالم صولت مرزا کي پهرين اپريل تي موت جي سزا ڏيڻ جا حڪم جاري ڪري ڇڏيا آهن.