تازيون خبرون

Daily Archives: March 17, 2015

نائين زيرو تي ڇاپي جي جاچ ڪميشن جوڙڻ جو مطالبو رد، ڪنهن کي ڀت سان نه پيا لڳايون: چوڌري نثار

اسلام آباد (بيورو) وفاقي گهرو وزير چوڌي نثار علي خان چيو آهي ته دهشتگردن لاءِ سرزمين تنگ ڪري ڇڏي آهي ۽ اهي بدحواسي جو شڪار ٿيڻ کانپوءِ مسجدن، امام بارگاهن، اسڪولن ۽ گرجا گهرن جهڙن آسان ٽارگيٽس کي نشانو بڻائي رهيا آهن، وزارت سنڀاليم ته ڇهه کان 8 ڌماڪا سڄي ملڪ ۾ روز ٿيندا هئا، انهن ۾ گهٽتائي آئي آهي، وزارت جو رڪارڊ ڪمپيوٽرائزڊ ڪري رهيا آهيون، رڪارڊ مڪمل ٿيڻ تائين کاتي جو قبلو درست نه ٿيندو.  اسلام آباد ۾ قومي اسيمبلي جي گهرو معاملن بابت اسٽينڊنگ ڪميٽي جي اجلاس کي بريفنگ ڏيندي چوڌري نثار چيو ته کاتي جي ڪارڪردگي بابت ڪجهه ڳالهائڻ کان اڳ هو لاهور سانحي تي ڳالهائيندو. هن چيو ته لاهور سانحو بدترين دهشتگردي ۽  غير انساني فعل آهي، دنيا جي ڪنهن مذهب ۾ اهڙن واقعن جي اجازت نه آهي، ڪيترائي ڀيرا چيو آهي ۽ وري به چوان ٿو ته ان دهشتگردي جو مقصد پاڪستان ۾ فرق پيدا ڪرڻ ۽  پاڪستاني قوم کي ورهائڻ،  نفرت ۽ مايوسي پيدا ڪرڻ آهي. چوڌري نثار علي خان چيو ته دهشتگردي جي جنگ آسان ڪم نه آهي، گذريل 13 سالن کان پاڪستان تي اها جنگ مڙهيل آهي ۽ جڏهن به قومن تي جنگ مڙهي ويندي آهي ته ٻه طرفا نقصان ٿيندا آهن. هن چيو ته وزارت جي چارج سنڀالڻ وقت ڇهه کان سات- اٺ ڌماڪا سڄي ملڪ ۾ روزانو ٿيندا هئا، جن ۾ گهٽتائي آئي آهي، پختي ارادي، اتفاق ۽ اتحاد سان دهشتگردي خلاف جنگ کي منطقي انجام تائين پهچايو ويندو. هن چيو ته دهشتگردن لاءِ سرزمين تنگ ڪري ڇڏي آهي ۽ اهي هاڻي وائڙائپ جو شڪار ٿي آسان حدفن کي  نشانو بڻائي رهيا آهن، امام بارگاهن، مسجدن، چرچن ۽ اسڪولن تي حملا  آسان ٽارگيٽ آهن، اها دهشتگردن جي  بدحواسي آهي.  چوڌري نثار قوم کي اپيل ڪندي چيو ته دهشتگردن جي نئين پاليسي خلاف سينو ساهڻ جو هڪ ئي طريقو آهي ته پنهنجي ملڪ جي خلاف نه پر دهشتگردن خلاف اٿي بيهجي.  گهرو کاتي جي ڪارڪردگي بابت اسٽينڊنگ ڪميٽي کي آگاهه ڪندي چوڌري نثار چيو ته هـُن ڀرپور ڪوشش ڪئي آهي ته وفاق جي هن اهم ترين وزارت کي قومي مفاد ۾ هلايو وڃي. چوڌري نثار چيو ته ڪو به عقلِ ڪُل نه هوندو آهي، کانئس غلطيون ٿيون هونديون پر هن کاتي جي ڪارڪردگي کي پنهنجي هٿ سان سهيڙيو آهي ۽ جيڪي تفصيل هو ڪميٽي آڏو پيش ڪري رهيو آهي، اهي سندس ذاتي محنت سان گڏ ٿيا آهن. هن چيو ته هو پنهنجي کاتي جي  جيڪا ڪارڪردگي بيان ڪرڻ وڃي رهيو آهي، ان لاءِ ميڊيا سميت سڀني ڌرين کي دعوت ڏئي ٿو ته اهي سندس رپورٽ جي جاچ ڪن، تجزيو ڪن ۽ پوءِ فيصلو ڪن. وفاقي گهرو وزير چوڌري نثار علي خان چيو ته هو روزاني بنيادن تي صوبائي گهرو وزارتن، داخلي معاملن بابت واڳيل ادارن، 6 کان 7 حاضر سروس جنرلز سان رابطي ۾ ايندو آهي، جڏهن وزارت سنڀالي ته ڪيترن ئي اهم ڪيسن جو ڪو رڪارڊ ئي نه هو، ڪيترن عالمي معاهدن جون فائيلون به غائب هيون. چوڌري نثار چيو ته هن سڀ کان پهريان گهرو وزارتن جي عملدارن جي پرڏيهي سفارتڪارن جي دعوت ۽ پرڏيهي دورن تي پابندي لڳائي ۽ کاتي جو 8 مهينن اندر رڪارڊ به ڪمپيوٽرائيزڊ ڪرايو پر اهو ڪم اڃا مڪمل ناهي ٿي سگهيو. چوڌري نثار چيو ته هالت اهڙي آهي جو کيس  برطانوي جي انصاف واري وزير خط لکي 2007 ۾ قيدين جي مٽا سٽا بابت ٻنهي ملڪن ۾ ٿيل معاهدو معطل ختم ڪرڻ جي آگاهي ڏني، برطانيه جي انصاف واري وزير جو چوڻ هو ته قيدين جي مٽا سٽا واري انهيءَ معاهدي تحت 2010 ۾ پاڪستان کي خون جي ڪيس ۾ سزا ڪاٽيندڙ 2 ۽ 20 سال قيد جي سزا يافته هڪ قيدي ڏنوسين، جن کي ٻن مهينن ۾ آزاد ڪيو ويو. هن چيو ته پاسپورٽ کاتي وٽ 5 لک ڪيس التويٰ هيٺ هئا، جن کي رڳو اڍائي مهينن اندر اڪلايو ويو، جڏهن ته اي سي اي واري معاملي کي به سياسي کان پاڪ ڪري هڪ ادارو بڻايو ويو آهي. چوڌري نثار چيو ته ملڪ اندر بليو پاسپورٽ انساني اسمگلنگ لاءِ استعمال ٿيا، جن ۾ ڪجهه ماڻهو ن ليگ جا به ملوث هئا. وفاقي گهرو وزير چوڌري نثار چيو آهي ته ڪراچي آپريشن تي ايم ڪيو ايم جا خدشا ختم ڪيا ويندا پر ڏوهاري ڪنهن به جماعت سان واسطو ڇونه رکندا هجن،سندن خلاف ڪارروائي ڪئي ويندي. قومي اسيمبلي جي گهرو معاملن بابت اسٽينڊنگ ڪميٽي جي اجلاس ۾ گهرو وزير چوڌري نثار جي بريفنگ دوران متحده ايم اين اي آصف حسنين نائين زيرو تي رينجرز جي ڇاپي خلاف احتجاج ڪيو. آصف حسنين چيو ته رينجرز سندن لاءِ احترام لائق آهي، غير قانوني هٿيار رکڻ وارا الزام بي بنياد آهن. متحده ايم اين اَي چيو ته چيو ويو ته ڇاپي دوران غير قانوني هٿيار ۽ ڏوهاري گرفتار ڪيا ويا، جڏهن ته پڪڙيل ماڻهن کي عدالت ۾ جنگي قيدين جيان آندو ويو. آصف حسنين چيو ته اڄ هنن سان زيادتي ٿي آهي، سڀاڻي ڪنهن ٻئي سان به اهڙو سلوڪ ٿي سگهي ٿو. سندس چوڻ هو ته متحده اڳواڻ عامر خان کي به حراست ۾ ورتو ويو، نيٽو جا هٿيار رکڻ وارا الزام غلط آهن. هن چيو ته ڪراچي جي حالتن تي کين ڳڻتي آهي، آپريشن جي مانيٽرنگ لاءِ ڪو به بندوبست ناهي ڪيو ويو ۽ هن سميت ٻين ايم اين ايز جا فون ٽيپ ٿي رهيا آهن. ان موقعي تي وفاقي گهرو وزير چيو ته ڪراچي آپريشن تي ايم ڪيو ايم جا خدشا ختم ڪيا ويندا پر ڏوهاري ڪنهن به جماعت سان واسطو ڇونه رکندا هجن،سندن خلاف ڪارروائي ڪئي ويندي. چوڌري نثار چيو ته ڪراچي آپريشن جو مقصد ڪنهن جماعت کي ڀت سان لڳائڻ نه پر ڏوهارين جي خاتمي لاءِ آهي جڏهن ته آپريشن سڀني جماعتن جي حمايت سان شروع ڪيو ويو. هن چيو ته ايم ڪيو ايم ملڪ جي سياسي جماعت آهي هــُو احترام جي نظر سان ڏسن ٿا، آصف حسنين جي اٿاريل اعتراضن جي جاچ ڪرائي ويندي.

 

گوسڙو ملازم کاتي تي عذاب آهن، سندن خاتمي تائين سک سان نه ويهندس: شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته بلديات کاتي مان گھوسٽ ملازمن کي ڪڍي ئي ساھ کڻنداسين. عدالت پاران اسٽي آرڊر کان پوءِ به اسان جي مهم بند يا ختم نه ٿيندي. صوبي ۾ سالن کان پکيڙيل گند هفتن يا مهينن ۾ ختم نه ٿيندو ان مهم کي سالن تائين جاري رکڻ جو عزم ڪيو آهي ۽ جيستائين صوبي کي صاف سٿرو نه ڪنداسين ۽ ادارن ۾ موجود گند صاف نه ڪنداسين اسان سک سان نه ويهنداسين. آءُ سپرمين ناهيان جو سموري صوبي جو گند ڪجهه ڏينهن ۾ کڻي وٺان. صوبي ۾ دهشتگردي جي خاتمي لاءِ آپريشن جاري آهي ۽ گذريل ڏيڍ سال ۾ شايد هڪ رات  به اهڙي ناهي جڏهن لياري ۾ آپريشن نه ڪيو ويو هجي. پوليس رينجرز ۽ امن امان جي بحالي وارن ادارن کي مڪمل فري هينڊ ڏنو ويو آهي ۽ وزير اعليٰ سنڌ صوبي ۾ امن قائم ڪرڻ لاءِ ڏينهن رات ڪوششون ڪري رهيو آهي. اهڙن خيالن جو اظهار هن سومر ڏينهن ڪينٽ استيشن ڪراچي جي ٻاهران صفائي مهم ۾ حصو وٺڻ بعد ڪينٽ اسٽيشن تي وڻڪاري مهم جي تحت ٻوٽو لڳائڻ  کان پوءِ ميڊيا سان ڳالهه ٻولھ ڪندي ڪيو. ان موقعي تي ايڊمنسٽريٽر ڪراچي ثاقب سومرو، ايم ڊي واٽر بورڊ قطب الدين شيخ، ڊي ايس ريلوي نثار ميمڻ، ڊپٽي ڊي ايس ريلوي شعيب عادل، ميٽروپوليٽن ڪمشنر ڪراچي مسعود عالم، ڊائريڪٽر لوڪل گورنمينٽ روبينه آصف، ڊائريڪٽر پارڪس نياز سومرو، ايڊمنسٽريٽر سائوٿ افضل زيدي، محمد رئيسي، محمد عاصم کا علاوه اعليٰ آفيسر به ان موقعي تي موجود هئا. صوبائي وزير ڪچرو کڻدڙ مشين تي پاڻ ويهي ڪچرو کنيو ۽ ٻوٽو لڳايو. ان موقعي تي ميڊيا سان ڳالهائيندي هن چيو ته اها مهم عوام سان ڪيل واعدي مطابق سمورو سال جاري رهندي ۽ ضرورت پئي ته ان کي ڪئي سالن تائين جاري رکيو ويندو. هن چيو ته اسان هن صوبي کي صاف ۽ سرسبز ڪرڻ ۽ امن بڻائڻ جو عزم ڪيو آهي ۽ ان رستي ۾ ڪا به رڪاوٽ قبول نه ڪئي ويندي. هن چيو ته اسان کي ان ڳالھ تي شديد افسوس آهي ته اسان بلديات کاتي مان اربين روپيا پگھارون کڻڻ باوجود به ڪم نه ڪندڙن خلاف ڪارروائي جو پلان بڻايو ۽ سمورن ملازمن کي سنڌ بئنڪ ۾ کاتا کولرائڻ جي هدايت ڪئي پر عدالت ان تي 15 اپريل تائين استي آرڊر جاري ڪري ڇڏيو آهي. اسان عدالت ۾ ان جو جواب به ڏينداسين پر اسان اهڙن سمورن گھوسٽ ملازمن جو خاتمو ڪري ساهه کڻنداسين. شرجيل انعام ميمڻ چيو آهي ته آءُ اڄ به ان ڳالھ کي تسليم ڪريان ٿوته 100 سيڪڙو صفائي نه پئي ٿئي پر اسان وسيلن ۽ سالن کن موجود گند صاف ڪرڻ جي جنهن مهم ۾ آهيون ان جو ثمر عوام جي سامهون اچڻ شروع ٿي ويو آهي ۽ انشاءالله اسان صوبي ۾ موجود سموري گند سان گڏوگڏ کاتن ۾ موجود گھوسٽ ملازمن کي به ختم ڪنداسين. هن چيو اسان ان مهم جي آغاز تي واضع ڪيو هو ته يا ته آءُ کاتي ۾ موجود سمورو گند صاف ڪندس ۽ ان جو ثمر عوام تائين پهچائيندس ۽ جيڪڏهن ان ۾ ناڪام رهيس ته بلديات جي وزارت تا استعفيٰ ڏئي ڇڏيندس ۽ اڄ به ڳالھ تي قائم آهيان. هڪ سوال جي جواب ۾ هن چيو ته بلاول ڀٽو زرداري بابت غلط افواهون پکيڙڻ جي ڪوشش ڪئي پئي وڃي اهي ڪامياب نه ٿيندا. بلاول ڀٽو زرداري پاڪستان ضرور ايندو ۽ هن ملڪ ۽ ان جي سياست سنڀاليندو. هڪ سوال جي جواب ۾ هن چيو ته مان سپرمين ناهيان جو سموري صوبي جو سالن جو گند چند ڏينهن ۾ صاف ڪري وٺان. جيڪي ملازم پگھارون وٺي رهيا آهن اهي ڪم جيڪڏهن نه ڪندا ته نوڪري تي نه رهندا. هن چيو ته مان ان ڳالھ کي به تسليم ڪريان ٿو ته ڪجھ عنصر اسان جي صفائي مهم ۽ گھوسٽ ملازمن کي ڪڍڻ جي حوالي سان رنڊڪون بڻجي رهيا آهن ۽ اهي نٿا چاهين ته گھوسٽ ملازمن جو خاتمو ٿئي پر مان اهو عهد ڪيو آهي ته چاهي ڪجھ به ٿي پئي عدالت کان اسٽي آرڊر اچي يا ڪا به ٻئي رڪاوٽ هجي مان انهن جو خاتمو ڪري ئي ساھ کڻندس. اسان جي نيت صاف آهي ۽ اسان کي اميد آهي ته اسان جون مشڪلون آسان ٿي وينديون. ڪراچي ۾ جاري دهشتگردن خلاف آپريشن ۽ ان حوالي سان ٻين سياسي جماعتن جي خدشن بابت پڇيل سوال جي جواب ۾ هن چيو ته دهشتگردي خلاف آپريشن پوري سنڌ ۾ جاري آهي ۽ اهو ان وقت تائين جاري رهندو جيستائين اسان هن صوبي کي انهن دهشتگردن، ٽارگيٽ ڪلرز۽ ڀتي خورن کان پاڪ نٿا ڪري وٺون، ان آپريشن ۾ اسان جي پوليس ، رينجرز ۽ امن امان جي بحالي وارا ٻيا ادارا هڪ پيج تي آهن ۽ وزير اعليٰ سنڌ پاران کين ان سلسلي ۾ مڪمل فري هينڊ ڏنو ويو آهي. هن چيو ته مان اڄ هڪ ڀيرو ٻيهر ان ڳالھ جو عزم ڪريان ٿو ته جيستائين مان هن صوبي جي عوام کي بلدياتي سهولتون انهن جي در تائين نه پهچائيندس ۽ هن شهر ۽ صوبي ۾ قبضن ، گند ۽ گھوسٽ ملازمن جو خاتمو نه ڪندس ان وقت تائين سک سان ويهندس.

 

صدر ممنون حسين سان چيئرمين سينيٽ رضا رباني جي ملاقات

اسلام آباد (بيورو) صدر ممنون حسين سان چيئرمين سينيٽ رضا رباني جي ملاقات چيئرمين سينيٽ جو عهدو سنڀالڻ تي وادائيون ٿيون  گڏيل دلچسپي جي معاملن تي ڳالهيون ڪيون ويون سومر تي صدر ايوان صدر ۾ ٿيل ملاقات ۾ صدر ممنون حسين چيئرمين سينيٽ کي عهدو سنڀالڻ تي واڌايون ڏنيون ان دوران گڏيل دلچسڇي جي معاملن تي خيالن جي ڏي وئي صدر اميد ظاهر ڪئي ته اوهان جي دور ۾ جمهوريت وڌيڪ مضبوط ٿيندي.

 

آرمي چيف سان يو اي اي جي چيف آف آرمي اسٽاف جي ملاقات

راولپنڊي(م.ڊ) گڏيل عرب امارات جي هٿياربند فوج جي سربراهه ليفٽيننٽ جنرل حماد محمد ثاني الروميٿي سومر ڏينهن جنرل هيڊ ڪوارٽر راولپنڊيءَ ۾ چيف آف آرمي اسٽاف جنرل راحيل شريف سان ملاقات ڪئي. ان موقعي تي عرب امارات جي فوجي سربراهه سان برگيڊيئر جنرل صالح محمد صالح پڻ گڏ هو. آءِ ايس پي آر طرفان جاري بيان مطابق ٻنهي فوجي عملدارن وچ ۾ ٿيل ملاقات ۾ پاڪستان ۽ عرب امارات جي وچ ۾ دفاعي سهڪار کي هٿي وٺرائڻ سميت گڏيل دلچسپيءَ جي معاملن تي خيالن جي ڏي وٺ ڪئي وئي.

 

دهشتگرد قوم جي همت ۽ حوصلي کي ڪمزور نه ٿا ڪري سگهن: خورشيد شاهه

سکر (بيورو) قومي اسيمبليءَ ۾ مخالف ڌر جي اڳواڻ ۽ پاڪستان پيپلزپارٽيءَ جي مرڪزي اڳواڻ سيد خورشيد احمد شاهه هڪ بيان وسيلي لاهور ۾ عيسائي برادريءَ جي مذهبي هنڌن تي ٿيل بم ڌماڪن جي سخت لفظن ۾ مذمت ڪندي چيو آهي ته دهشتگرد پاڪستاني قوم جي همت ۽ حوصلي کي ڪنهن ريت ڪمزور نه ٿا ڪري سگھن. پاڪستان قوم دهشتگرديءَ جي خاتمي بابت متفق آهي ۽ عوام پنهنجي سيڪيورٽي فورسز سان گڏ آهي. لاهور ۾ ٿيل دهشتگرديءَ واري واقعي جي سينيٽر اسلام الدين شيخ، ايم پي اي سيد ناصر حسين شاهه، واپاري ۽ سماجي تنظيمن جي اڳواڻن پڻ مذمت ڪئي آهي.

 

قانون لاڳو ڪندڙ ادارن سان ٽڪراءُ نه ٿا چاهيون، ايم ڪيو ايم ۾ هٿياربند ونگ ناهي: الطاف حسين

لنڊن(م.ڊ) متحده قومي موومينٽ جي قائد الطاف حسين چيو آهي ته ايم ڪيو ايم قانون لاڳو ڪندڙ ڪنهن به اداري سان ٽڪراءُ نه ٿي چاهي متحده ۾ ڪنهن قسم جي ڪابه هٿياربند ونگ ناهي ايم ڪيو ايم اعلامئي مطابق الطاف حسين پنهنجي هڪ بيان ۾ چيو آهي ته ايم ڪيو ايم عدم تشدد تي يقين رکندڙ جمهوري، لبرل ۽ پروگريسو پارٽي آهي، هن چيو ته ڪجهه عنصر سوشل ميڊيا تي پاڻ کي ايم ڪيو ايم جو ظاهر ڪري رينجرز ۽ پوليس سميت قانون لاڳو ڪندڙ ادارن سان ٽڪراءُ جو سبق ڏئي رهيا آهن پر انهن جو ايم ڪيو ايم سان ڪوبه تعلق ناهي، هن جو چوڻ هو ته هي عمل ايم ڪيو ايم کي بدنام ڪرڻ جي سازش جو تسلسل آهي الطاف حسين جو چوڻ هو ته ايم ڪيو ايم ناانصافين خلاف آئين ۽ قانون جي دائري ۾ رهي پرامن احتجاج ۽ اهڙن جلسن جلوسن تي يقين رکي ٿي جن ۾ تشدد کي هڪ سيڪڙو به عمل دخل نه هجي.

 

يوحنا سانحو، وڌيڪ ٻه زخمي فوت، واقعي جي جاچ لاءِ جي آءِ ٽي قائم

لاهور (بيورو) يوحنا آباد ۾ عيسائي عبادتگاهن ٻاهران ٿيل خودڪش ڌماڪن جا وڌيڪ ٻه زخمي فوت ٿي ويا جنهن سان فوتين جو جملي انگ 17 ٿي ويو 60 سالن جو برڪت مسيحي ۽ 25 سالن جو خوشي مسيحي خودڪش ڌماڪن ۾ سخت زخمي ٿيڻ کان پوءِ جنرل اسپتال ۾ علاج هيٺ هئا جتي اهي گذريل ڏينهن زخمن جا سور نه سهندي فوت ٿي ويا ذريعن مطابق اسپتال ۾ علاج هيٺ ڪيترن ئي زخمين جي حالت ڳڻتي جوڳي آهي. ٻئي طرف پنجاب حڪومت سانحي يوحنا آباد جي جاچ لاءِ پنج رڪني جوائنٽ انويسٽيگيشن ٽيم جوڙي ڇڏي جنهن جي سربراهي ڊي ايس پي ڪاحنا اقبال شاهه ڪندو جڏهن ته جاچ ٽيم ۾ آءِ ايس آءِ، آءِ بي، سي ٽي ڊي ۽ اسپيشل برانچ جا  آفيسر پڻ شامل هوندا جوانٽ انويسٽيگيشن ٽيم واقعي جي جاچ ڪري پنهنجي شروعاتي رپورٽ 48 ڪلاڪن ۾ پنجاب حڪومت کي پيش ڪندي واضح رهي ته آچر جي ڏينهن يوحنا آباد گرجا گهرن ٻاهران آپگهاتي ڌماڪن ۾ 15 ڄڻا مارجي ويا جڏهن ته 60 کان وڌيڪ زخمي ٿيا هئا.

 

ملڪ جو اصل مسئلو وسيلن جي کوٽ نه پر حڪمرانن جو عرش ۽ عوام جو فرش تي هجڻ آهي: سراج الحق

لاهور (بيورو) جماعت اسلامي جي سربراهه سراج الحق چيو آهي ته ملڪ جو اصل مسئلو وسيلن جي کوٽ نه پر حڪمرانن جو عرش ۽ عوام جو فرش تي هجڻ تي آهي، خراب نظام ظالم لاءِ ڀلو ۽ غريب تي قهر وانگي آهي، وياجي نظام جي خاتمي لاءِ جدوجهد ڪبي. لاهور ۾ تقريب کي خطاب ڪندي جماعت اسلامي جي سربراهه سراج الحق چيو ته جماعت اسلامي پهريون ڀيرو اهڙي ماڻهو کي سينيٽر طور چونڊرايو آهي، جنهن وٽ پنهنجي سائيڪل يا پشاور ۾ رهڻ لاءِ گهر نه آهي. هن پاڻ ڏانهن اشارو ڪندي ٻڌايو ته کيس پشاور ۾ رهڻ لاءِ ڪرائي جو گهر آهي. سراج الحق جو چوڻ هو ته بينڪون رڳو اميرن کي قرض ڏيڻ لاءِ آهن ۽ ضمانت ۾ ڪروڙين رپين جي ملڪيت چاهين ٿيون، جڏهن ته هر پاڪستاني شهري کي شناختي ڪارڊ ڏيکاري پنهنجي ضرورتن لاءِ قرض جي سهولت ڏيڻ گهرجي پر ايئن نه آهي. هن چيو ته ملڪ ۾ وياجي نظام جي ڪري الاهي مسئلا آهن،سندس چوڻ هو ته هو اهڙي نظام خلاف جدوجهد ڪندو، هاري مزدور ۽ پورهيت جي حقن لاءِ وڙهندو. سراج الحق ٻڌايو ته هڪ ڀيري هڪ جاپاني عورت ان وقت ساڻس ملاقات ڪئي، جڏهن هو خيبرپختونخواهه جو ناڻي وارو وزير هو، ان عورت کيس ٻڌايو ته اسان جي ملڪ جو مسئلو وسيلن جي کوٽ نه پر حڪمرانن جو عرش ۽ عوام جو فرش تي رهڻ آهي. هن چيو ته ڪرپٽ سياسي مگر مڇن سان عوام کي مهاڏو اٽڪائي پنهنجا حق وڙهي وٺڻا پوندا.

 

يوحنا آباد ڌماڪا: ملڪ ۾ سوڳ ملهايو ويو، مظاهرا، ڀڃ ڊاهه، راهگيرن تي تشدد

ڪراچي/لاهور (م.ڊ) لاهور جي علائقي يوحنا آباد ۾ گرجا گهرن ٻاهران آپگهاتي حملن خلاف ملڪ ۾ سوڳ ملهايو پيو وڃي، مشنري اسڪول بند آهن، مسيحي برادري روڊن تي نڪري آئي، مڇريل ڪارڪن ميٽرو بس سروس ۾ گهڙي ويا ۽ ڀڃ ڊاهه ڪئي، لاهور جي مختلف هنڌن تي ڌرڻا هڻي ٽائرن کي باهيون ڏنيون ويون، هڪ رڪشا ڊرائيور تي به تشدد ڪيو ويو.. يوحنا آباد ۾ ٻن گرجا گهرن اندر دعا جي تقريب دوران هڪٻئي پويان 2 آپگهاتي ڌماڪن جي نتيجي ۾ 15 ڄڻن جي مارجڻ ۽ 70 کان وڌيڪ زخمي ٿيڻ تي سڄي ملڪ ۾ ماحول سوڳوار آهي. يوحنا آباد واري علائقي ۾ ماحول سوڳوار آهي، علائقي ۾ سموريون بازارون بند پيل آهن، جڏهن ته لاهور، ڪراچي ۽ ٻين شهرن ۾ سمورا مشنري اسڪول به بند آهن، پاڪستان بار ڪائونسل طرفان به سوڳ ملهايو پيو وڃي.. لاهور جي مختلف علائقن ۾ مسيحي برادري طرفان يوحنا آباد واقعي خلاف احتجاجي مظاهرا ڪري ڌرڻا هنيا ويا، مڇريل ڪارڪن ميٽرو بس سروس ۾ گهڙي ويا ۽ ڀڃ ڊاهه ڪئي، پوليس ماڻهن کي روڪڻ ۾ مڪمل طور ناڪام ٿي وئي. ملت روڊ تي مڇريل شهرين هڪ ڊرائيور تي به تشدد ڪيو ويو، جڏهن ته هڪ ٻئي علائقي ۾ هڪ شاگرد تي به تشدد جا اطلاع آهن. ٻئي پاسي، پاڪستان بار ڪائونسل طرفان به سانحي تي سوڳ ملهايو پيو وڃي، مختلف شهرن ۾ عدالتي ڪاررواين جو به بائيڪاٽ ڪيو ويو آهي…هوڏانهن، مسيحي برادري جي فرياد تي گرجا گهرن ٻاهران ٿيل آپگهاتي حملن جا 2 ڌار ڌار ڪيس دهشتگردي ايڪٽ تحت داخل ڪيا ويا آهن… يوحنا آباد بم ڌماڪن جي جاچ ۾ اڃا اڳڀرائي نه ٿي سگهي آهي، جڏهن ته ٻن ڄڻن کي زنده ساڙڻ جو ڪيس پڻ داخل ناهي ٿيو . لاهور ۾ گرجا گهرن تي حملن خلاف سنڌ جي مخلتف شهرن ۾ مسيحي برادري طرفان احتجاجي مظاهرا ڪري ڌرڻا هنيا ويا آهن… حيدرآباد ۾ لاهور سانحي خلاف هزارين عيسائي برادري جي عورتن ۽ مردن ڊينل فياض جي اڳواڻي ۾ اولڊ ڪئمپس کان ريلي ڪڍي پريس ڪلب اڳيان ڌرڻو هنيو ويو، جنهن سبب ڊسٽرڪ ۽ سيشن ڪورٽ ڏانهن ايندڙ ويندڙ رستا بند ٿي ويا. سانگهڙ ۾ يوحنا آباد سانحي خلاف مسيحي برادري جي ماڻهن پريس ڪلب اڳيان ٽائرن کي باهيون ڏئي ڌرڻو هنيو جنهن سبب ايندڙ ويندڙ ٽرئفڪ معطل ٿي وئي. دادو ۾ مسيحي برادري جي ماڻهن لاهور ۾ ٿيل آپگهاتي حملي ۾ مارجي ويلن جي قاتلن جي گرفتاري لاءِ احتجاجي مظاهرو ڪري ڌرڻو هنيو ويو. ڏهرڪي ۾ يوحنا آباد ۾ خودڪش حملي خلاف مسيحي برادري طرفان پريس ڪلب اڳيان احتجاجي مظاهرو ڪيو ويو.. ٽنڊو آدم ۾ مسيحي برادري جي ماڻهن لاهور ۾ ٻن گرجا گهرن مٿان آپگهاتي حملو ڪندڙ دهشتگردن جي گرفتاري خلاف احتجاجي مظاهرو ڪري ريلي ڪڍي وئي جنهن ۾ سوين مسيحي برادري جي ماڻهن شرڪت ڪئي. ڪوٽ غلام محمد ۾ لاهور جي گرجا گهرن ۾ آپگهاتي حملي خلاف مسيحي برادري جي عورتن ۽ ٻارڙن طارق مسيحي جي اڳواڻي ۾ احتجاجي مظاهرو ڪري شاهه لطيف چوڪ تي ڌرڻو هنيو. اڳواڻن مطالبو ڪيو ته عيسائي برادري جي عبادتگاهن جي سيڪيورٽي سخت ڪري لاهور ۾ ڌماڪا ڪندڙ دهشتگردن کي فوري طور گرفتار ڪري مسيحي برادري ۾ پيدا ٿيل بيچيني ختم ڪئي وڃي .

 

ڏکڻ پنجاب مان محروميون ختم ڪرڻ لاءِ ڌار صوبو ٺاهڻ چاهيون ٿا: يوسف رضا گيلاني

رحيم يارخان (مانيٽرنگ ڊيسڪ)  اڳوڻي وزير اعظم ۽ پيپلز پارٽي جي اڳواڻ يوسف رضا گيلاني چيو آهي ته ڏکڻ پنجاب مان محروميون ختم ڪرڻ لاءِ ڌار صوبو ٺاهڻ چاهيون ٿا، جڏهن ته آپريشن ڪنهن پارٽي خلاف نه پر دهشتگردن خلاف ٿي رهيو آهي. رحيم يار خان ۾ صحافين سان ڳالهائيندي اڳوڻي وزير اعظم يوسف رضا گيلاني چيو  ته هو حڪومت کان مطالبو ڪري ٿو ته اقليتن جي حقن جو تحفظ يقيني بڻايو وڃي. هن چيو ته ڏکڻ پنجاب جي ماڻهن مان محرومي جو احساس ختم ٿيڻ گهرجي ۽ اُن لاءِ ڌار صوبي جو قيام ضروري آهي.