تازيون خبرون

Daily Archives: March 13, 2015

رضا رباني ۽ عبدالغفور حيدري چيئرمين ڊپٽي چيئرمين سنيٽ جو حلف کڻي ورتو

اسلام آباد(بيورو) پيپلز پارٽي جي رضا رباني سينيٽ جي چيئرمين ۽ جميعت علماءِ اسلام ف جي مولانا عبدالغفور حيدري ڊپٽي چيئرمين جي عهدي جو حلف کڻي ورتو جڏهن ته صدر مملڪت جي ملڪ ۾ غير موجودگي سبب رضا رباني وقتي صدر به بڻجي ويو آهي، پيپلز پارٽي جو سينيئر اڳواڻ رضا رباني بنا مقابلي سينيٽ چيئرمين چونڊجي ويو جڏهن ته مولانا عبدالغفور حيدري جي مقابلي ۾ پاڪستان تحريڪ انصاف جو اميدوار شبلي فراز هو، ڊپٽي چيئرمين لاءِ ايوان ۾ 96 ووٽ وڌا ويا جنهن ۾ عبدالغفور حيدري 74 ۽ شبلي فراز 16 ووٽ حاصل ڪئي جڏهن ته 6 ووٽ رد ڪيا ويا، رضا رباني ۽ عبدالغفور کان انهن عهدن جو حلف پرزائيڊنگ آفيسر طور سينيٽر اسحاق ڊار ورتو جڏهن ته حلف کڻن کان اڳ اجلاس سان خيالن جي اظهار ۾ رضا رباني پنهنجي بنا مقابلي چيئرمين چونڊجڻ تي سياسي قيادت جو شڪريو ادا ڪندي چيو ته سياسيقيادت جي اعتماد کي ڌڪ نه رسائيندس ۽ انهن جي اعتماد تي پورو رلهندس هن جو چوڻ هو ته مان شهيد بينظير ڀٽو جي ڪري هيستائين پهتو آهيان سمورين پارٽين جي ميمبرن کي هڪ ئي نظر سان ڏسندس ۽ ڪوشش هوندي ته پارليامان کي مضبوط ڪندي ان جي بالادستي لاءِ ڪردار ادا ڪيان، ان کان اڳ سينيٽ چيئرمين لاءِ رضا رباني پنهنجا نامزدگي ڪاغذ جمع ڪرايا جن جي مقابلي  ۾ ڪنهن به اميدوار پنهنجا ڪاغذ جمع نه ڪرايا ۽ مقرر وقت ختم ٿيڻ کانپوءِ رضا رباني سينيٽ چيئرمين چونڊجي ويو جڏهن ته سينيٽ جي ڊپٽي چرئيمن لاءِ جي يو آءِ (ف) طرفان مولانا عبدالغفور حيدري ۽ حافظ حمد الله ڪورنگ اميدوار طور نامزدگي ڪاغذ جمع ڪرايا، تحريڪ انصاف طرفان شبلي فراز ۽ بي اين پي (مينگل) طرفان جهانزيب جمالديني به ڊپٽي چيئرمين شپ جي لاءِ پنهنجا ڪاغذ جمع ڪرايا جڏهن ته جهانزيب جمالديني جي يو آءِ (ف) جي اميدوار جي حق ۾ هٿ کڻي ويو.

 

لاڙڪاڻي لڳ پلاٽ جي مالڪي تان ٻن ڌرين ۾ جهيڙو، 11 ڄڻا قتل

لاڙڪاڻُو(بيورو) لاڙڪاڻي ويجهو سرڪاري پلاٽ جـِي مالڪي واري تڪرار تان ٻوڪ ۽ مغيري برادري جي ٻن ڌرين ۾ جهيڙي جي نتيجي ۾ مارجي ويلن جو انگ وڌي 11 ٿي ويو آهي ۽ 7 ڄڻا زخمي آهن، جڏهن ته علائقي ۾ پوليس ۽ رينجرز جي موجودگي باوجود سخت ڇڪتاڻ واري صورتحال برقرار آهي، جنهن ڪري ماڻهو گهرن تائين محدود ٿي ويا آهن. ڳوٺ پـَکـَي ۾ مغيري ۽ ٻـُوڪ برادرين جِي ٻن ڌرين ۾ ٿاڻي جي ڀرپاسي خالي پيل آبپاشي کاتي جـَي پلاٽ جـِي مالڪي تان جهيڙو ٿي پيو. جهيڙي دوران گوليون لڳڻ سبب لياقت مغيري، مرتضيٰ، مير مرتضيٰ، شهزور، مير، عاشق مغيري ۽ هڪ واٽهڙو عطا محمد پنهور ٿڏي تي مارجي ويا ۽ 10 زخمي ٿي پيا. اطلاع باوجود پوليس روايتي انداز ۾ هڪ ڪلاڪ دير سان واقعي واري هنڌ پهتي، جنهن بعد مارجي ويلن جا لاش ۽ زخمين کي وڳڻ، قمبر ۽ لاڙڪاڻي جي اسپتالن ڏانهن منتقل ڪيو ويو. آءِ بي جي ڊپٽي ڊائريڪٽر مختيار ٻـُوڪ ۽ آصف ٻـُوڪ لاڙڪاڻي جي چانڊڪا اسپتال ۽ واٽهڙو محمد بخش چني قمبر جي اسپتال ۾ زخمن جا سور نه سهندي دم ڏنو، جنهن بعد مارجي ويلن جو انگ 10 ٿي ويو. مختيار ٻـُوڪ جي فوت ٿيڻ جي ڪجهه منٽن کانپوءِ خيرپور جوسو ۾ ٻوڪ برادري جي منظور نالي شخص کي ويگن مان لاهي گوليون هنيون ويون، جنهن بعد هن خوني تڪرار ۾ مارجي ويلن جو انگ وڌي 11 ٿي ويو. هوڏانهن جهيڙي ۾ زخمي ٿيل محمد نواز ٻـُوڪ، ظهور مغيري، عبدالرزاق مغيري ۽ واٽهڙو زاهد ڳورڙ سميت 7 زخمين جو مختلف اسپتالن ۾ علاج هلندڙ آهي. ٻئي پاسي پوليس ۽ رينجرز جي موجودگي باوجود علائقي ۾ سخت ڇڪتاڻ واري صورتحال برقرار آهي، جنهن ڪري ماڻهو گهرن تائين محدود ٿي ويا آهن. آخري اطلاعن تائين واقعي جو ڪو به ڪيس داخل نه ٿي سگهيو هو ۽ نه وري ڪا گرفتاري عمل ۾ اچي سگهي هئي.

 

نائين زيرو تي ڇاپو، رينجرز گرفتار 23 ڏوهارين جي شروعاتي جاچ رپورٽ گهرو وزارت کي اماڻي ڇڏي

ڪراچي (اسٽاف رپورٽر) پاڪستان رينجرز سنڌ ايم ڪيو ايم جي مرڪز نائين زيرو جي ڪارروائي دوران گرفتار ٿيل قتل ۽ دهشتگردي جي ڪيترن ئي وارداتن ۾ ملوث 23 ڏوهارين جي شروعاتي جاچ رپورٽ گهرو وزارت ۽ اعليٰ عملدارن ڏانهن اماڻي ڇڏي آهي رپورٽ مطابق متحده جي مرڪز تي ڇاپي وقت تحويل ۾ ورتل 23 دهشتگردن جي سڃاڻپ عمل ۽ دهشتگردي جي ڪيترن ئي وارداتن ۾ ملوث هجڻ جي حوالي سان ٿي ويئي آهي جڏهن ته ٻين 83 ماڻهن بابت جاچ ڪئي پئي وڃي رينجرز عملدارن پاران موڪليل رپورٽ مطابق گرفتار ٿيل دهشتگردن ۾ اي ون ڪئٽيگري ۾ 5 دهشتگرد فرحان عرف شبير ملا، عامر علي سرڪٽا، فيصل عرف موٽا، عبيد عرف ڪي ٽو ۽ نادر شاهه عرف منور شاهه شامل آهن اي ڪئٽيگري ۾ 7 دهشتگرد نعمان ولد اسلم، نديم احمد ولد مشتاق احمد، امتياز حسين ولد شميم احمد، محمد جوايد ولد محمد ابراهيم، ڪاظم رضا ولد ناصر رضا، محمد عامر خان ولد معين خان ۽ شهزاد انصاري شامل آهن. ڄاڻايل دهشتگردن کي اسلحي سميت گرفتار ڪيو ويو آهي بي ڪئٽيگري ۾ دهشتگردن ۾ سيد حسيب ولد مقبول، محمد عابد ولد نظيراحمد، محمد زبير ولد محمد جلال، محمد حسين ولد مزمل حسين، ساجد علي ولد هشمت علي محمد فيضان ولد عبدالحليب محمد وجيهه ارحمان ولد محمد علي، محمد آصف ولد صابر حسين سيد ممتاز حسين ولد جاويد حسين محمد شبير ولد محمد هارون، نعمان سيل ولد محمد علي شآمل آهن.

 

وڏي وزير سرڪاري ملڪيتن بابت هلندڙ ڪيسن ۾ روينيو کاتي جي آفيسرن جي سست رويي جو نوٽيس ورتو

ڪراچي (اسٽاف رپورٽر) وزير اعليٰ سنڌ سيد قائم علي شاهه عدالتن ۾ سرڪاري ملڪيتن بابت هلندڙ ڪيسن ۾ سنڌ روينيو ڊپارٽمينٽ جي آفيسرن پاران سست رويي جو سختي سان نوٽيس وٺندي سينيئر ميمبر بورڊ آف روينيو کي حڪم ڏنو آهي ته هو عدالت ۾ کاتي جي ڪيسن جي پيروي ۾ غفلت ڪندڙ آفيسرن جي خلاف فوري ڪاروائي ڪري، وڏي وزير ايڊووڪيٽ جنرل سنڌ جي اختيارن ۾ واڌ ڪندي ان کي بورڊ آف روينيو ۽ ڪي ايم سي جا قانوني اختيار ڏيندي انهن کاتن جي آفيسرن ۽ قانوني ماهرن کي ايڊووڪيٽ جنرل سنڌ سان تعاون ڪرڻ جو حڪم ڏنو آهي ته جيئن عدالتن ۾ انهن ڪيسن جو صحيح طريقي سان دفاع ڪري سگهجي. اهڙا حڪم هن ڪالهه وزير اعليٰ هائوس ۾ بورڊ آف روينيو ۽ ڪي ايم سي جي مليڪتن بابت قانوني معاملن جي حوالي سان منعقد اجلاس جي صدارت ڪندي ڏنا. سيد قائم علي شاهه چيو ته سرڪاري زمين عوامي ملڪيت آهي ۽ اسان هر قيمت تي ان جي انچ انچ جي حفاظت ڪنداسين جيڪو به ان ملڪيت جي تحفظ جي سلسلي ۾ ڪا غفلت ڪندو ته ان جي خلاف سخت ڪارروائي ڪئي ويندي. وڏي وزير ايڊووڪيٽ جنرل کي هدايت ڪئي ته هڪ مضبوط ليگل ٽيم جوڙڻ جي لاءِ هو اهليت جي بنياد تي 2 ايڊيشنل ايڊووڪيٽ جنرل سنڌ ڀرتي ڪري جن جي خدمت مختلف سرڪاري ادارن جي حوالي ڪئي وڃي ته جيئن هو عدالتن ۾ سرڪاري ملڪيتن جي حوالي سان ڪيسن جي موثر طريقي سان پيروي ڪري سگهن. وڏي وزير روينيو آفيسرن کي هدايت ڪئي ته هو عدالتن ۾ ٺوس ثبوت ۽ دستاويزي ثبوتن سان ڪيسن جي پيروي ڪن. هن روينيو آفيسرن کي سختي سان هدايت ڪندي چيو ته هو ايڊووڪيٽ جنرل سنڌ سان عدالتن ۾ ڪيسن جي پيروي ڪرڻ جي حوالي سان مڪمل تعاون ڪن. ان موقعي تي بلديات ۽ اطلاعات کاتي جي صوبائي وزير شرجيل انعام ميمڻ چيو ته ڪراچي ۾ ڪيترن ئي سرڪاري زمينن تي لينڊ مافيا جو قبضو آهي. هن چيو ته لينڊ ۽ قبضا مافيا سرڪاري پلاٽن تي غير قانوني قبضا ڪري شادي هالن سميت مختلف قسمن جو اڏاوتون ڪري ڇڏيون آهن پر وڏي عرصي کان انهن کي ڪير به چوڻ وارو ناهي ۽ ان سلسلي ۾ عدالتن ۾ پيل ڪيسن جي ڪير به پيروي نٿو ڪري. هن مشورو ڏنو ته اي جي سنڌ بورڊ آف روينيو سان گڏ ڪي ايم سي جي قانوني معاملا به پنهنجي هٿ ۾ کڻي ۽ ڪي ايم سي جي پراپرٽي/ زمينن بابت ڪيسن جي به پيروي ڪري ۽ قبضا خورن کي عدالتن ۾ چالان ڪري. وڏي وزير ان تجويز جي منظوري ڏيندي ان کي اهڙن ڪيسن جي ڇنڊ ڇاڻ ۽ نشاندهي ڪرڻ جي هدايت ڪئي جن جي خلاف عدالت جو در کڙڪايو وڃي ۽ غير قانوني قبضا ختم ڪرايا وڃن. هن بورڊ آف روينيو جي آفيسرن کي به هدايت ڪئي ته هو ان ملڪيت / پراپرٽي جو رڪارڊ ۽ ٽرانزيشن تي نظر رکي وڃي ته جيئن ڪا به غلطي نه ٿئي. ان موقعي تي عبد الفتاح ملڪ وڏي وزير کي شڪايت ڪئي ته سرڪاري آفيسر خاص ڪري روينيو کاتي جي آفيسر عدالتن ۾ پنهنجي ڪيسن ۾ ڪا دلچسپي نٿا وٺن ۽ نه ئي ڪيسن جي حاضري تي اچن ٿا. هن خدشو ظاهر ڪيو ته جيڪڏهن انهن جو اهو رويو رهيو ته عدالت سرڪار جي غير حاضري جي بنياد تي ٻئي ڌر جي حق ۾ فيصلو ٻڌائي سگهي ٿي جنهن سان سنڌ حڪومت کي وڏو نقصان برداشت ڪرڻو پوندو. ان موقعي تي اجلاس ۾ سينيئر ميمبر بورڊ آف روينيو شاهد گلزار شيخ، وڏي وزير جو پرنسپل سيڪريٽري علم الدين بلو، سيڪريٽري قانون مير محمد شيخ، ايڊووڪيٽ جنرل عبد الفتاح ملڪ ۽ ٻيا آفيسر پڻ موجود هئا.

 

بڪتربند گاڏيون خريداري ڪيس: سپريم ڪورٽ معاهدو ڪالعدم قرار ڏئي ڇڏيو

اسلام آباد (بيورو) سپريم ڪورٽ سنڌ حڪومت طرفان بڪتربند گاڏين جي خريداريءَ وارو معاهدو ڪالعدم قرار ڏئي ڇڏيو، عدالت، هيليڪاپٽر ۽ فائر برگيڊ گاڏين جي ادائگين کان به روڪيندي آئين ۽ قانون خلاف ٺاهه ڪرڻ تي آءِ جــِي سنڌ کي طلب ڪري ورتو. جسٽس جواد ايس خواجا جي سربراهي ۾ سپريم ڪورٽ جي ٽه رڪني بينچ، سنڌ حڪومت طرفان بڪتربند گاڏيون خريدڻ بابت ڪيس جي ٻڌڻي ڪئي. عدالت، بڪتربند گاڏين جي خريداري جو معاهدو ڪالعدم قرار ڏيندي ايندڙ ٻڌڻي تي آءِ جــِي سنڌ پوليس کي طلب ڪري ورتو. عدالت، سنڌ حڪومت کي هيليڪاپٽر ۽ 86 فائر برگيڊ گاڏين جي ادائيگين کان به روڪي ورتو. سپريم ڪورٽ، وڪالت نامي کانسواءِ پيشي تي آءِ جــِي سنڌ جي وڪيل عرفاق قادر تي ڪاوڙ جو اظهار ڪيو. جسٽس اعجاز چوڌري پڇاڻو ڪيو ته آءِ جــِي سنڌ ڪهڙي قانون تحت پنهنجو ڌار وڪيل ڪيو؟ عدالت بڪتربند گاڏين واري ڪيس جي ٻڌڻي 26 مارچ تائين ملتوي ڇڏي.

 

پنجاب ۽ سنڌ لاءِ 43 ڪروڙ بيلٽ پيپرز جي ضرورت پوندي: اليڪشن ڪميشن

اسلام آباد (بيورو) اليڪشن ڪميشن سنڌ ۽ پنجاب ۾مڪاني چونڊن جو شيڊول 28 جولاءِ تي جاري ڪرڻ جو فيصلو ڪري ورتو آهي، اليڪشن ڪميشن جي وقتي سيڪريٽري سنڌ، پنجاب ۽ ڪي پي ڪي ۾ مڪاني چونڊن لاءِ 50 ڪروڙ کان وڌيڪ بيلٽ پيپرز ڇاپڻ جي ضرورت آهي، وقت جي کوٽ سبب خانگي پرٽنگ پريس کان به بيلٽ پيپر ڇپرائڻ تي غور ڪيو پيو وڃي. اليڪشن ڪميشن جو اجلاس چيف اليڪشن ڪمشنر جسٽس رٽائرڊ سردار رضا جي صدارت هيٺ ٿيو، جنهن ۾ سيڪريٽري ڪابينا ڊويزن جي سيڪريٽري، ايم ڊي پي سي پي ۽ ايس پـِي سـِي پـِي جي عملدارن شرڪت ڪئي. اجلاس ۾ بريفنگ ڏني وئي ته ملڪ ۾ ڪروڙين بيلٽ پيپر ڇاپڻا آهن، پنجاب لاءِ 31 ڪروڙ، سنڌ لاءِ 11 ۽ خيبرپختونخواهه لاءِ 10 ڪروڙ بيلٽ پيپر به گهربل آهن. اليڪشن ڪميشن جي عملدارن ٻڌايو ته اسلام آباد ۽ ڪنٽونمينٽ لاءِ 50 کان 50 لک بيلٽ پيپرز جي ضرورت پوندي، جنهن لاءِ 7 کان 8 مهينا گهربل آهن پر پرنٽنگ ڪارپوريشن جي مشينري پراڻي هئڻ سبب بيلٽ پيپرز ڇپرائڻ ۾ ڏکيائي پيش اچي رهي آهي. اجلاس کانپوءِ ميڊيا کي بريفنگ ڏيندي اليڪشن ڪميشن جي وقتي سيڪريٽري شيرافگن چيو ته سنڌ ۽ ڪي پي ڪي ۾ مڪاني چونڊن لاءِ 50 ڪروڙ کان وڌيڪ بيلٽ پيپرز جي ضرورت آهي، پرنٽنگ ڪارپوريشن، سڪيورٽي پرنٽنگ ۽ پوسٽ آفيس جي پرنٽنگ ڪمپني رڳو 11 ڪروڙ بيلٽ پيپر ڇپرائڻ جي خاطري ڪرائي آهي. اليڪشن ڪميشن جي وقتي سيڪريٽري چيو ته وقت جي کوٽ سبب خانگي پرنٽنگ پريسز کان به بيلٽ پيپرز جي ڇپائي تي غور ڪيو پيو وڃي. هن چيو ته پنجاب ۽ سنڌ لاءِ 43 ڪروڙ بيلٽ پيپرز جي ضرورت آهي، ٻنهي صوبن ۾ مڪاني چونڊن جو شيڊول 28 جولاءِ تي جاري ڪيو ويندو.

 

حڪومت فاٽا ۾ صدارتي چونڊن بابت صدارتي آرڊيننس واپس وٺي ڇڏيو

اسلام آباد (بيورو) فاٽا ۾ صدارتي چونڊن بابت صدارتي آرڊيننس واپس ورتو ويو آهي، وقتي صدر سردار اياز صادق صدارتي فرمان واپس وٺڻ جي منظوري ڏئي ڇڏي آهي. ذريعن موجب، وزيراعظم نواز شريف جي هدايتن بعد وقتي صدر اياز صادق فاٽا ۾ سينيٽ چونڊن بابت صدارتي فرمان واپس وٺي ڇڏيو آهي، جنهن بعد فاٽا ۾ ملتوي ڪيل سينيٽ چونڊن جو شيڊول جلد جاري ٿيڻ جو امڪان آهي. واضح رهي ته،حڪومت سينيٽ چونڊن کان هڪ ڏينهن اڳ صدارتي آرڊيننس جاري ڪيو هو، جنهن تحت فاٽا ميمبرن لاءِ ووٽن جو طريقيڪار تبديل ڪيو  هو. اليڪشن ڪميشن صدارتي آرڊيننس سبب فاٽا ۾ سينيٽ چونڊون اڻڄاتل مدي تائين ملتوي ڪيون هيون.

 

راجا ظفر الحق سينيٽ ۾ قائد ايوان مقرر، وزير اعظم منظوري ڏئي ڇڏي

اسلام آباد (بيورو) وزيراعظم نواز شريف راجا ظفر الحق کي سينيٽ ۾ قائد ايوان مقرر ڪري ڇڏيو آهي، وزيراعظم ميان رضا رباني کي بنا مقابلي سينيٽ جو چيئرمين چونڊجڻ تي واڌايون ڏيندي چيو آهي ته ن ليگ جمهوريت ۽ ڳالهين تي يقين رکي ٿي، رضا رباني جي بنا مقابلي سينيٽ چيئرمين چونڊجڻ سان جمهوريت مضبوط ٿيندي. وزيراعظم هائوس پاران جاري ڪيل پڌرائي موجب، وزيراعظم نواز شريف حڪومت ۽ اپوزيشن پاران نامزد ڪيل رضا رباني کي بنا مقابلي سينيٽ چيئرمين چونڊجڻ تي واڌايون ڏنيون آهن. وزيراعظم نواز شريف چيو ته رضا رباني جي بنا مقابلي سينيٽ چيئرمين چونڊجڻ سٺو عمل آهي، ان سان جمهوريت مضبوط ٿيندي. وزيراعظم چيو ته مسلم ليگ ن ڳالهين ۽ مفاهمت تي يقين رکي ٿي. جاري ڪيل پڌرائي ۾ اهو به چيو ويو آهي ته وزيراعظم نواز شريف راجا ظفر الحق کي هڪ ڀيرو ٻيهر سينيٽ ۾ قائد ايوان ۽ اقبال ظفر جهڳڙا کي پارلياماني ليڊر مقرر ڪري ڇڏيو آهي.

 

ايم ڪيو ايم اڳواڻ عامر خان سميت 28 جوابدار عدالت ۾ پيش، 90 ڏينهن جي جسماني رمانڊ تي رينجرز حوالي

ڪراچي (اسٽاف رپورٽر) ڪراچي جي دهشتگردي ٽوڙ عدالت ايم ڪيو ايم جي مرڪز نائين زيرو تان گرفتار ڪيل ايم ڪيو ايم اڳواڻ عامر خان ۽ اڳوڻي ايم پي اي يوسف منير شيخ سميت 27جوابدارن کي 90 ڏينهن جي جسماني ريمانڊ تي رينجرز حوالي ڪيو ويو آهي، جڏهن ته ايف آءِ آرز ۾ نامزد 26 جوابدارن کي سڀاڻي عدالت ۾ پيش ڪيو ويندو. نائين زيرو تي رينجرز جي ڇاپي دوران گرفتار ٿيل ايم ڪيو ايم جي اڳواڻ عامر خان، اڳوڻي ايم پي اي يوسف منير شيخ، عزيز انصاري، فهد فريد، سلمان احمد ۽ عمرخان سميت 27 جوابدارن کي ريمانڊ لاءِ اي ٽي سي ۾ پيش ڪيو ويو. رينجرز جي درخواست تي دهشتگردي ٽوڙ عدالت تحفظ پاڪستان قانون تحت 27 جوابدارن کي 90 ڏينهن جي جسماني ريمانڊ تي رينجرز حوالي ڪري ڇڏيو. رينجرز پاران اڄ عدالت ۾ پيش ڪيل ٻين جوابدارن ۾ محمد اسلم، محمد ساجد، علي اصغر، محمد اعظم، خالد رشيد، محمد عمران، سيد محمد علي، سيد نجم علي، حسن اختر، مرزا خليل، صابر، عرفان، سيد محمد شاهه، جهانگير، محمد حنيف، محمد يوسف ۽ فراست علي شامل آهن.  ذريعن جو چوڻ آهي ته ايف آءِ آرز ۾ نامزد فيصل موٽا سميت 26 جوابدارن کي سڀاڻي ريمانڊ لاءِ عدالت ۾ پيش ڪيو ويندو. عدالت آڏو عامر خان شڪايت ڪئي ته کيس هٿڪڙيون هڻي پيش ڪيو ويو آهي، جيڪا انساني حقن جي ڀڃڪڙي آهي، جنهن تي عدالت چيو ته اها ڪهڙي وڏي ڳالهه آهي، شهيد ڀٽو کي به هٿڪڙيون هڻي پيش ڪيو ويو هو. عدالت آڏو ايم ڪيو ايم جي  گرفتار ڪارڪنن شڪايت ڪئي ته رينجرز جو رويو درست نه آهي. ٻڌڻي بعد رينجرز سمورن جوابدارن کي اڻڄاتل هنڌ منتقل ڪري ڇڏيو. ايم ڪيو ايم جي وڪيلن ميڊيا سان ڳالهائيندي چيو ته جج صاحب کي شايد اهو ياد ناهي ته ان وقت ملڪ ۾ آمريت هئي ۽ هن وقت جمهوريت آهي. ايم ڪيو ايم جي وڪيل ميڊيا سان ڳالهائيندي چيو ٻڌايو وڃي ته رينجرز ڪهڙن بنيادن تي نائين زيرو تي چڙهائي ڪئي .

 

سياسي متڀيد کان مٿانهون ٿي ڏوهارين خلاف ڪارروائي ڪئي وڃي: ڪور ڪمانڊر ڪراچي جي رينجرز کي هدايت

ڪراچي (اسٽاف رپورٽر) ڪور ڪمانڊر ڪراچي رينجرز هيڊڪوارٽر جو دورو ڪيو، جنهن دوران کيس ايم ڪيو ايم جي مرڪز تان هٿ آيل هٿيارن ۽ گرفتار جوابدارن بابت بريفنگ ڏيندي چيو آهي ته 26 جوابدارن مٿان اڳواٽ ئي ڪيسز داخل ٿيل آهن. ڪورڪمانڊر ڪراچي ليفٽيننٽ جنرل نويد مختار پاڪستان رينجرز سنڌ جي هيڊڪوارٽر جو دورو ڪيو، جتي کيس بريفنگ ڏيندي ٻڌايو ويو ته نائين زيرو تي ڇاپو ڳجهن ادارن جي رپورٽ جي آڌار تي هنيو ويو. رينجرز پاران نائين زيرو تان گرفتار ڪيل 27 جوابدارن کي به ڪورڪمانڊر آڏو پيش ڪيو ويو ۽ تفصيل ٻڌائيندي چيو ويو ته حراست ۾ ورتلن مان 26 ڄڻن مٿان ايف آءِ آرز اڳواٽ ئي داخل آهن. ان موقعي تي ڪورڪمانڊر کي نائين زيرو ۽ ڀرپاسي مان هٿ ڪيل 5 جي ٿريز، 23 ڪلاشنڪوفز، 2 ايل ايم جيز، 8 ايم ايم جون 4 رائفلز، سيون ايم ايم جون 19 رائيفلز پيش ڪيو ويو. ٽرپل ٽو  بور جون 3 رائفلز، 22 بور جون 25 رائفلز، هڪ ايم فور سنائيپر ۽ 14 ٽي ٽي پسٽل، 4 عدد نائين ايم ايم پسٽل به ڏيکاريا ويا. نائين زيرو تان هٿ آيل 5 ٽيلي اسڪوپ سائيٽ، 36 واڪي ٽاڪيز، 2 بليٽ پروف جئڪٽس ۽ وڏي مقدار ۾ گوليون ۽ ڪارتوس به ڪورڪمانڊر کي ڏيکاريا ويا. ڪورڪمانڊر ڪراچي رينجرز جي ڪردار جي واکاڻ ڪندي چيو ته سياسي متڀيد کان مٿانهون ٿي ڏوهارين خلاف ڪارروائي ڪئي وڃي ۽ ڪنهن سان به رعايت نه ڪئي وڃي. ڊائريڪٽر جنرل سنڌ رينجرز ميجر جنرل بلال اڪبر ڪور ڪمانڊر ڪراچي ليفٽيننٽ جنرل نويد مختار کي يقين ڏاريو آهي ته نائن زيرو آپريشن جي جاچ تي ڪوبه اثرانداز نه ٿيندو.