تازيون خبرون

Daily Archives: March 7, 2015

ايندڙ ٽن سالن اندر ملڪ مان لوڊشيڊنگ ختم ڪئي ويندي: نواز شريف

مدينو شريف (مانيٽرنگ ڊيسڪ) وزيراعظم نواز شريف چيو آهي ته پاڪستان جي بهتري لاءِ هر قدم کنيا ويندا ۽ دهشتگردن سان گڏ انهن جي سهولتڪارن جو به خاتمو آندو ويندو. مديني شريف ۾ پاڪستاني ڪميونٽي کي خطاب ڪندي وزيراعظم جو چوڻ هو ته پاڪستان جو امن خراب ڪندڙن کي ڪنهن به صورت ۾ برداشت نه ڪيو ويندو. هن چيو ته دهشتگرديءَ کي منهن ڏيڻ لاءِ حڪومت طرفان دليراڻا فيصلا ڪيا ويا جنهن کي نظر ۾ رکندي دهشتگرديءَ جي مڪمل خاتمي لاءِ آپريشن ضرب عضب شروع ڪيو ويو جنهن ۾ پاڪ فوج کي اهم ڪاميابيون مليون ۽ سياسي قيادت جي اتفاق راءِ سان آرمي ايڪٽ ۾ ترميم به ڪئي. نواز شريف چيو ته حڪومتي قدمن سبب ڪراچي جون حالتون تيزيءَ سان بهتريءَ طرف وڌي رهيون آهن ۽ عزم ڪيو آهي ته ڪراچي ۾ امن جون روشنيون بحال ڪيون وينديون. وزيراعظم هڪ ڀيرو ٻيهر دعويٰ  ڪئي ته ايندڙ ٽن سالن ۾ ملڪ مان بجلي جي لوڊشيڊنگ جو خاتمو آندو ويندو ۽ سال 2017ع تائين 10 هزار ميگاواٽ بجلي سسٽم ۾ اچي ويندي جنهن سان ملڪ ۾ ترقي جا نوان رستا کــُلندا. نواز شريف چيو ته ملڪي معيشت ۾ سمنڊ پار پاڪستانين جو ڪردار اهم آهي ۽ حڪومت سڌارن ذريعي حڪمراني جو طريقيڪار وڌيڪ بهتر بڻائيندي. هن چيو ته ٽرانسپرينسي انٽرنيشنل حڪومتي فيصلن جي شفافيت جي واکاڻ ڪري رهي آهي، هنن جڏهن اقتدار سنڀاليو ته ناڻي جا ذخيرا 8 ارب ڊالرز کان گهٽ هئا پر هاڻي اسٽيٽ بينڪ جا ذخيرا به 11 ڊالرز تائين پهچي چڪا آهن ۽ اميد آهي ته ان ۾ وڌيڪ بهتري ايندي. وزيراعظم نواز شريف چيو ته افغان صدر سان مختلف معاملن تي هم آهنگي آهي ۽ افغانستان سان لاڳاپن ۾ به بهتري آئي آهي جڏهن ته ڀارت طرفان سرحد تي فائرنگ جي واقعن تي ڳڻتي آهي.

 

سنڌ ۽ پنجاب ۾ 20 سيپٽمبر تي مڪاني چونڊون ڪرائڻ جو حڪم

اسلام آباد(بيورو) سپريم ڪورٽ مڪاني چونڊون ڪرائڻ جي حوالي سان ڪيس ۾ اليڪشن ڪميشن کي 10 مارچ تائين پنجاب ۽ سنڌ ۾ مڪاني چونڊن جو شيڊول پيش ڪرڻ جي هدايت ڪندي وڌيڪ شنوائي ملتوي ڪري ڇڏي آهي. عدالت چيو آهي ته چونڊون نين ووٽ فهرستن تحت ڪرايون وڃن. اليڪشن ڪميشن کي سپريم ڪورٽ ۽ پارليامينٽ اٿارٽي ڏئي ڇڏي آهي ان جي اصل لاڳاپيل ڌريون عوام آهن. جمعي ڏينهن هتي جسٽس جواد ايس خواجه جي سربراهيءَ ۾ جسٽس سرمد جلال عثماني ۽ جسٽس مقبول باقر تي ٻڌل ٽه رڪني بينچ ڪيس جي شنوائي ڪئي. ان موقعي تي اليڪشن ڪميشن جي وقتي سيڪر يٽري شيرافگن عدالت ۾ پيش ٿيو. هن عدالت کي ٻڌايو ته خيبرپختونخواه ۾ 30 مئي تي مڪاني چونڊون ڪرايون وينديون جڏهن ته ڪينٽونمينٽ بورڊز ۾ چونڊن لاءِ آرڊيننس لاڳاپيل ڪميٽي جي منظور ڪيو آهي ۽ هاڻي آرڊيننس ڪابينا ڊويزن وٽ آهي جيڪو قومي اسيمبليءَ جي ايندڙ اجلاس ۾ منظوري لاءِ پيش ڪيو ويندو. سيڪريٽري اليڪشن ڪميشن چيو ته اسان جون اسٽيڪ هولڊرز سياسي جماعتون آهن اسان کي انهن جي مطابق هلڻو هوندو آهي. جنهن تي جسٽس جواد ايس خواجه چي وته اليڪشن ڪميشن جو اصل اسٽيڪ هولڊر عوام آهي، اسان به هتي عوام جي مرضي ۽ منشا مطابق ويٺا آهيون. شيرافگن عدالت کي ٻڌايو ته جيڪڏهن ڪيبينيٽ ڊويزن اسان کي ٻه نيون پرنٽنگ مشينون وٺي ڏئي ته اسان پنجاب ۽ سنڌ ۾ مڪاني چونڊون سيپٽمبر ۾ ڪرائڻ لاءِ تيار آهيون. جسٽس جواد ايس خواجه چيو ته اسان عوام جي مسئلن جي حل لاءِ چونڊون چاهيون ٿا. اليڪشن ڪميشن جي سيڪريٽري چيو ته اسان وٽ ڪا اٿارٽي نه آهي، آءِ سي ٽي ۾ چونڊن لاءِ آرڊيننس ايندو ته اسان کي اٿارٽي ملندي. جسٽس جواد ايس خواجه چيو ته سپريم ڪورٽ توهان کي چونڊون ڪرئڻ جو حڪم ڏنو آهي. ڪو ٻيو ڪري يا نه ڪري توهان پنهنجي اٿارٽي کي استعمال ڪندي اليڪشن کي يقيني بڻايو جنهن کي پارليامينٽ به اٿارٽي ڏني آهي، هاڻي عمل ڪرائڻ توهان جو ڪم آهي. آئين تي پوري طرح عمل ڪرڻو آهي. سيڪريٽري عدالت کي وڌيڪ ٻڌايو ته اسان چونڊون ڪرائڻ لاءِ تيار آهيون پر بيلٽ پيپرز لاءِ پرنٽنگ پريس سان رابطو ڪرڻ کانپوءِ ئي چونڊون ڪرائي سگهجن ٿيون. جنهن تي جسٽس سرمد جلال عثماني کيس چيو ته اهڙي صورت ۾ بيلٽ پيپرز جي پرنٽنگ آئوٽ سورس کان ڪرائي وڃي. بعد ۾ عدالت ايندڙ شنوائي تي پنجاب ۽ سنڌ ۾ مڪاني چونڊن جو شيڊول پيش ڪرڻ هيدا ڪئي.

 

اٽارني جنرل افتخار چوڌري سميت رٽائرڊ ججن کي مليل رعايتن بابت سينيٽ کي آگاهه ڪري ڇڏيو

اسلام آباد (بيورو) اٽارني جنرل آف پاڪستان سينيٽ جي اجلاس ۾ پيش ٿي افتخار چوڌري سميت رٽائرڊ ججن کي مليل رعايتن بابت آگاهي ڏئي ڇڏي، پ پ اڳواڻ اعتزاز احسن چيو آهي ته افتخار چوڌري مقرر حد کان وڌيڪ رعايتون حاصل ڪري رهيو آهي، بلٽ پروف گاڏي جي مرمت ۽ پئٽرول جا پئسا افتخار چوڌري کان ڀرايا وڃن. چيئرمين نيئر بخاري جي صدارت هيٺ سينيٽ اجلاس ۾ اٽارني جنرل سلمان اسلم بٽ پيش ٿي رٽائرڊ ججن کي حڪومت طرفان ڏنل رعايتن بابت آگاهي ڏني. اٽارني  جنرل چيو ته اڳوڻي چيف جسٽس افتخار چوڌري کي بلٽ پروف گاڏي ۽ ٻيون رعايتون اسلام آباد هاءِ ڪورٽ جي حڪم تي ڏنيون پيون وڃن، جنهن تي سينيٽ چيئرمين چيو ته حڪومت هاءِ ڪورٽ جي فيصلي خلاف اپيل ڇو نه ٿي ڪري. پيپلز پارٽي جي سينيٽر اعتزاز احسن اڳوڻي چيف جسٽس افتخار چوڌري کي ملندڙ رعايتن تي سخت اعتراض واريندي چيو ته افتخار چوڌري کي ٻين رٽائرڊ ججن کان وڌيڪ رعايتون ڇو پيون ڏنيون وڃن، اڳوڻو چيف جسٽس صدر پاران مقرر ڪيل حد کان وڌيڪ رعايتون حاصل ڪري رهيو آهي. هن چيو ته افتخار چوڌري جو لاهور ۾ عاليشان بنگلو ڏسڻ وٽان آهي، ان کي مليل بلٽ پروف گاڏي جي مرمت ۽ پئٽرول جا پئسا افتخار چوڌري کان ڀرايا وڃن

 

عمران خان جون سموريون دعوائون ڪوڙيون ثابت ٿيون: پرويز رشيد

اسلام آباد(بيورو) سڌ سماءَ جي وفاقي وزير پرويز رشيد چيو آهي ته عمران خان سينيٽ چونڊن جي حوالي سان جيتريون به دعوائون ڪيون اهي ڪوڙيون ثابت ٿيون. اسلام آباد ۾ پريس ڪانفرنس کي خطاب ڪندي هن چيو ته خيبرپختون خوا ۾ سينيٽ جي چونڊ دوران پي ٽي آئي جا ڪارڪن پرچيون ايوان کان ٻاهر کڻي ويا. اين اي هڪ سو ٻاويهه تي عمران خان جي ڌانڌلي جو پول کلي چڪو آهي. هن چيو ته عمران خان پنهنجي پارٽي تي ڌيان ڏئي ها ته ان کي هر محاذ تي مات کائڻي نه پئي ها. هن چيو ته عمران  خان قومي اسيمبلي کي نٿو مڃي،پر سينيٽ جي چونڊ دوران خيبرپختون خوا ۾ وڃي ويهي رهيو.

 

چوڌري نثار سان آمريڪي سفير جي ملاقات، پاڪ – آمريڪا ناتن تي غور ويچار

اسلام آباد (بيورو)گهرو معاملن واري وفاقي وزير چوڌري نثار علي خان سان آمريڪي سفير رچرڊ اولسن جمعي ڏينهن پنجاب هائوس ۾ ملاقات ڪئي، ملاقات ۾ گهرو وزير جي آمريڪا جي تازي دوري، پاڪ – آمريڪا ٻطرفن ناتن ۽ علائقائي صورتحال تي ڳالهيون ڪيون ويون، آمريڪي سفير سان ڳالهائيندي گهرو وزير چيو ته خطي ۾ امن ٻنهي ملڪن جو گڏيل مقصد آهي ۽ ان سلسلي ۾ گڏيل سهڪار ٻنهي ملڪن لاءِ وڏي اهميت وارو آهي، چوڌري  نثار پنهنجي تازي آمريڪي دوري بابت ڳالهائيندي چيو ته وائيٽ هائوس طرفان انتهاپسندي جي تدارڪ لاءِ منعقد ڪيل ڪانفرنس واکاڻ جوڳو قدم آهي، هن چيو ته مقامي ماڻهن کي مضبوط ڪري امن پسند اڪثريت جو اعتماد حاصل ڪري سگهجي ٿو، هن آمريڪي انتظاميا ۽ صدر بارڪ اوباما طرفان اسلام ۽ انتهاپسندي ۾ واضح فرق ڪرڻ جي موقف جي به واکاڻ ڪئي، پاڪ آمريڪا ناتن تي ڳالهائيندي گهرو وزير چيو ته پاڪستان پنهنجي قومي مفادن کي اولين ترجيح ڏيندي آمريڪا سان ڊگهي مدي وارن جٽادار ناتن جو خواهشمند آهي، آمريڪي سفير پاڪستاني عوام ۽ حڪومت جي انتهاپسندي ۽ دهشتگردي خلاف جدوجهد جي واکاڻ ڪندي چيو ته آمريڪا پاڪستان سان ٻطرفن ناتن کي مستحڪم ۽ وڌيڪ مضبوط ڪرڻ لاءِ پرعزم آهي.

 

نيشنل هارس اينڊ ڪيٽل شو ۾ چئني صوبن جي ثقافت جو مظاهرو قومي ٻڌي جي نشاني آهي: وڏو وزير

لاهور (م.ڊ) سنڌ جي وڏي وزير سيد قائم علي شاهه چيو آهي ته نيشنل هارس اينڊ ڪيٽل شو ۾ چئني صوبن جي ثقافت جو مظاهرو قومي ٻڌي جي نشاني آهي. اهڙي قسم جي شو جي اهتمام سان ڀائپي ۽ محبت وڌي ٿي، مان پنجاب جي وڏي وزير جو ٿورائتو آهيان جو هن قومي سطح جي هن شو ۾ گهرايو، اهڙن خيالن جو اظهار هن نيشنل هارش اينڊ ڪيٽل شو جي ٻئي ڏينهن خطاب ڪندي ڪيو، ان موقعي تي صوبائي وزير راڻا مشعود احمد خان ۽ خليل طاهر سنڌو، ايم اين اي پرويز ملڪ ۽ ڊي جي رينجرز ميجر خان طاهر جاويد خان، اعليٰ عملدار ۽ عوام جو وڏو انگ موجود هو، اقليت معاملن جي صوبايئ وزير خليل طاهر سنڌو سنڌ جي وڏي وزير سيد قائم علي شاهه کي ڀليڪار چيو، خاص مهمان کي بگي ۾ ويهاري سلامي لاءِ آندو ويو، ٻارڙن يونٽي ٽيبلو پيش ڪيو ۽ پاڪستان جو جهنڊو ٺاهيو9 جنهن کي ڏسندڙ ساراهيو، آرمي بينڊ قومي ترانن جون ڌنون پيش ڪيون، رينجرز جي جوانن ريڊ پريڊ جو شاندار مظاهرو ڪيو ۽ بندوق کي هٿ ۾ کڻي گهمائڻ جي شاندار پرفارمنس ڪئي، ان موقعي تي ڪيول ڪيڊ، نيزا بازي، گهوڙن جو رقص، ڊاگ ريس ۽ ٽي ٽي شو جو مظاهرو ڪيو، ملٽري پوليس جي جوانن موٽر سائيڪل تي بهتري ڪرتب ڏيکاريا، خاص طور تي جوڪر جي ڪرتب کي ٻارڙن ساراهيو، وڏي وزير چيو ته 11 سالن کانپوءِ نيشل هارس اينڊ ڪيٽل شو جي اهتمام تي محمد شهباز شريف مبارڪ لائق آهي، رينجرز جوانن جيڪي ڪرتب پيش ڪيا آهن اهي ڏسڻ وٽان ۽ متاثرڪن آهن، ان موقعي تي سنڌ جي وڏي وزير کي صوبائي وزير راڻا مشعود خان هارس اينڊ ڪيٽل شو جو سونيئر، جڏهن ته خليل طاهر سنڌو تصويرن جو البم پيش ڪيو.

 

سينيٽ چيئرمين لاءِ اميدوار جي نالي جو ڪوبه فيصلو ناهي ڪيو ويو: شرجيل ميمڻ

ڪراچي(اسٽاف رپورٽر) اطلاعات ۽ بلديات واري صوبائي وزير شرجيل انعام ميمڻ چيو ته سينيٽ جي چيئرمين جي چونڊن لاءِ پيپلز پارٽي سينيٽ ۾ موجود سمورين سياسي جماعتن سان رابطا ۽ انهن سان ووٽ لاءِ ڳالهائيندي. پيپلز پارٽي جي اعليٰ قيادت پاران اڃان تائين سينيٽ چيئرمين لاءِ اميدوار جي نالي جو ڪوبه فيصلو ناهي ڪيو ويو. ايم ڪيو ايم ۽ پيپلز پارٽي وچ ۾ سازگار ماحول ۾ ڳالهين جو عمل جاري آهي ۽ ان جي سنڌ حڪومت ۾ شموليت جي حوالي سان پارٽي پاران عبدالرحمان ملڪ کي ٽاسڪ ڏنو ويو آهي. عبدالقادر پٽيل کي ڪنهن به ملڪ ۾ سياسي پناهه وٺڻ جي ڪابه ضرورت نه آهي هو پارٽي جو معتبر ۽ هردل عزيز ڪارڪن آهي ۽ ان تي ڪوبه ڪيس نه آهي. هو جمعي تي ڪراچي واٽر اينڊ سيوريج بورڊ پاران عوام لاءِ شروع ڪيل شڪايتي سيل جي افتتاح جي موقعي تي ميڊيا سان ڳالهائي رهيو هو. هڪ سوال جي جواب ۾ هن چيو ته سنڌ ۾ سينيٽ جي چونڊن ۾ ڪنهن قسم جي ڪابه هارس ٽريڊنگ نه ٿي آهي ۽ اهڙي طرح ٻين صوبن ۾ به هارس ٽريڊنگ ناهي ٿي. هن چيو ته سنڌ ۾ پيپلز پارٽي ۽ ايم ڪيو ايم جي واضح اڪثريت آهي ۽ پيپلز پارٽي کي 7 ۽ ايم ڪيو ايم کي 4 سيٽون مليون، جڏهن ته مسلم ليگ فنڪشنل کي 10 ايم پي ايز جي باوجود 13 ووٽ مليا جيڪي يقينن مسلم ليگ ن جي ميمبرن ڏنا هوندا. پيپلز پارٽي کي وڌيڪ 7 ووٽ مان 2 ووٽ اين پي پي جا جڏهن ته ٻين سياسي جماعتن جي ايم پي ايز ڏنا آهن، جن جو ڪوبه اميدوار ميدان ۾ نه هو. چيئرمين سينيٽ جي حوالي سان سوال تي شرجيل ميمڻ چيو ته ان سلسلي ۾ پيپلز پارٽي پوري ڪوشش ڪندي ته چيئرمين سينيٽ پيپلز پارٽي جو هجي ۽ ان لاءِ سينيٽ ۾ موجود سمورين سياسي جماعتن سان ڳالهه ٻولهه ڪئي ويندي ۽ انهن کان ووٽ گهريو ويندو، جڏهن ته هاڻ تائين پارٽي ىاعليٰ قيادت پاران چيئرمين سينيٽ جي اميدوار جي نالي جو ڪوبه اعلان ناهي ڪيو ويو. ايم ڪيو ايم جي سنڌ حڪومت ۾ شموليت جي سوال تي شرجيل انعام ميمڻ چيو ته ايم ڪيو ايم سان اسان جو ڳالهين جو سلسلو سازگار ماحول ۾ جاري آهي ۽ ان سلسلي ۾ پارٽي جي اعليٰ قيادت رحمان ملڪ کي ان جو ٽاسڪ ڏنو ويو آهي. پيپلز پارٽي ڪراچي ڊويزن جي صدر جي ٻي ملڪ ۾ سياسي پناهه حاصل ڪرڻ جي خبرن جي سوال تي هن چيو ته ان قسم جي ڪابه ڳالهه ناهي. قادر پٽيل پارٽي جو معتبر ميمبر آهي ۽ نه ئي ان خلاف ڪي ڪيس آهن ان لاءِ ان جو ڪنهن ٻي ملڪ ۾ سياسي پناهه حاصل ڪرڻ جو ڪوبه جواز نه آهي.

 

سينيٽ چيئرمين ۽ ڊپٽي چيئرمين لاءِ سياسي جوڙ ٽوڙ جاري، پ پ ن ليگ لاءِ ڏکيايون پيدا ڪري ڇڏيون

اسلام آباد (بيورو) سينيٽ ۾ پارٽي پوزيشن واضح، پيپلز پارٽي جون 27، ن ليگ جون 26، ايم ڪيو ايم جون 8 ۽ تحريڪ انصاف جون 6 سيٽون ٿي ويون، سينيٽ چيئرمين لاءِ جوڙ ٽوڙ جاري، راجا ظفر الحق چيو آهي ته نئين چيئرمين جي مقرري جو فيصلو ٻين پارٽين جي مشاورت سان ٿيندو حڪمران پارٽي ن ليگ لاءِ سينيٽ جي چيئرمين شپ حاصل ڪرڻ جو امڪان ايترا ئي آهن جيترا پاڪستان ڪرڪيٽ ٽيم جي ورلڊ ڪپ ۾ ڪوارٽر فائنلز تائين پهچڻ جا، يعني ايئن ٿي به سگهي ٿو ۽ نه به، ڪجهه مخالف قابو ۾ اچي سگهن ٿا پر ڪجهه مخالف ٽف ٽائم به ڏئي سگهن ٿا، سينيٽ جي هاڻوڪي چونڊن ۾ واضح ڪاميابي جي باوجود ن ليگ لاءِ سينيٽ جي چيئرمين  شپ حاصل ڪرڻ آسان ناهي، 104 جي ايوان ۾ سادي اڪثريت لاءِ 53 جي انگ تائين پهچڻ مشڪل ڪم بڻجي ويو آهي جنهن تائين پهچڻ لاءِ ن ليگ کي وڏي جاکوڙ ڪرڻي پوندي هن وقت ن ليگ جون رڳو 26 سيٽون آهن جڏهن ته سندس اتحادي جي يو آءِ ف کي 5، پي ڪي ميپ جون  3 ۽ نيشنل پارٽي جون 3 سيٽون ملائجن ته به اهي وڌي وڃي 37 ٿينديون هاڻ جيڪڏهن ان ۾ وڌيڪ ڇڙ وڇڙ 6 سينيٽرن کي ملائجي ته به اهو انگ وڌي 43 ٿئي ٿو ۽ جيڪڏهن اڳتي هلي فاٽا جي چونڊن ۾ اهي چار سينيٽر به ن ليگ سان ملي وڃن ته به اهو تعداد 47 ٿئي ٿو ۽ جيڪڏهن اڃان به وڏي جدوجهد کانپوءِ بلوچستان جون اڻڌريون پارٽيون بي اين پي عوامي، بي اين پي مينگل جون 3 سيٽون به کين ملي وڃن ته به اهو انگ وڌي 51 ٿيندو اڃان به ان جون 2 سيٽون کٽل آهن تنهن ڪري هن کي بهرحال هر حالت ۾ پيپلز پارٽي کان ساٿ گهرڻو پوندو جڏهن ته پ پ پاڻ سينيٽ جي اميدوار آهي. هوڏانهن پيپلز پارٽي جي لاءِ سينيٽ جي چيئرمين شپ حاصل ڪرڻ نواز ليگ جي مقابلي ۾ سولي ڳالهه ڏسڻ ۾ پئي اچي جو انهن جون پنهنجون 27 سيٽون آهن جڏهن ته سندس اتحادي ايم ڪيو ايم جون 8 ۽ اي اين پي جون 7 ۽ ق ليگ جون چار سيٽون آهن جيڪو تعداد گڏجي 46 تي پهچي ٿو ۽ جيڪڏهن تازو کٽيل آزاد ميمبر به سندس ساٿ ڏين ۽ اختر مينگل به ساڻن گڏجي وڃي ته پوءِ ان لاءِ اها ڪا مشڪل ڳالهه نه هوندي.

 

پي ٽي آءِ سينيٽ چيئرمين جي چونڊ جي بائيڪاٽ ڪرڻ جو اعلان ڪري ڇڏيو

اسلام آباد (بيورو) تحريڪ انصاف جي سربراهه عمران خان چيو آهي ته وڏي وزير پرويز خٽڪ سينيٽ جي چونڊ دوران هارس ٽريڊنگ کي ناڪام بڻايو، هو مبارڪباد جو حقدار آهي. اسلام آباد ۾ ميڊيا سان ڳالهائيندي هن چيو ته اسان جي ميمبرن کي ڪروڙين رپين جي آڇ ٿي. هن چيو ته ٻين صوبن جي اميدوارن کي خيبرپختون خوا ۾ ٽڪيٽون نه ڏنيون ويون. هن چيو ته جمهوري اصولن تي سوديبازي نه ڪئي ويندي. عمران خان چيو ته تحريڪ انصاف قابل ماڻهن کي سينيٽ جي ٽڪيٽ ڏني. هن چيو ته نواز شريف کي جمهوريت جي نه پر سيٽن جو فڪر آهي. عمران خان چيو ته نواز شريف آئيني ترميم جو ڊرامو ڪيو.

 

سينيٽ چونڊن دوران پئسن جي سياست دفن ٿي وئي آهي: سراج الحق

پشاور (بيورو) جماعت اسلامي جي سربراهه سراج الحق چيو آهي ته سينيٽ چونڊن دوران پئسن جي سياست دفن ٿي وئي آهي، عوام جي اعتماد ڪرڻ تي سندن ٿورائتو آهيان. پشاور ۾ پريس ڪانفرنس کي خطاب ڪندي جماعت اسلامي جي سربراهه سراج الحق چيو ته سينيٽ چونڊن دوران پئسن جي سياست هميشه لاءِ دفن ٿي وئي آهي. هن چيو ته جماعت اسلامي جا سينيٽر مٿئين ايوان ۾ مظلوم ۽ مسڪين عوام جو آواز اٿاريندا، عوامي اعتماد تي هو سندن ٿورائتو آهي. هڪ سوال جي جواب ۾ جماعت  اسلامي جي امير سراج الحق چيو ته پاڪ-چين اقتصادي راهداري جو روٽ تبديل ڪري منصوبي کي تڪراري بڻايو پيو وڃي، حڪومت اهڙي قدمن کان پاسو ڪري.