تازيون خبرون

Daily Archives: March 2, 2015

پاڪستان جي ڪرڪيٽ ٽيم کي ٺيڪ ٿيڻ ۾ 8 سال لڳندا: نجم سيٺي

فيصل آباد(اسپورٽس نيوز) پاڪستان ڪرڪيٽ بورڊ جي اڳوڻي چيئرمين نجم سيٺي جو چوڻ آهي ته پاڪستاني ٽيم جو ٻيڙو گذريل پندرنهن سالن کان غرق ٿي رهيو آهي ان کي ٺيڪ ٿيڻ ۾ وڌيڪ 8 سال لڳندا يعني ايندڙ هڪ نه پر 2 ورلڊ ڪپ ايونٽس ۾ پاڪستان جو الله ئي واهي آهي نجي هوٽل ۾ ميڊيا سان ڳالهائيندي نجم سيٺي پاڪستان ڪرڪيٽ تي اهڙو حيران ڪندڙ بيان ڏنو جو سڀني جا حواس خطا ٿي ويا هن چيو ته ڪرڪيٽ ۽ ٽيم سن 2000ع کان تباهي جو شڪار آهي ۽ انهن مان هينئر ڪا خير جي اميد نه ٿي لڳائي سگهجي، صرف ايترو ئي نه پر پاڪستان ڪرڪيٽ جي ڊان ايندڙ 2 ورلڊ ڪپ ايونٽس تائين خطري جي گهنٽي وڄائي ڇڏي آهي هن چيو ته ڪرڪيٽ ۾ خرابيون ۽ خاميون ايتريون آهن جو انهن کي ختم ڪرڻ لاءِ 7 کان 8 سال لڳي سگهن ٿا.

 

ڏوهارين خلاف ٿيندڙ اڻ اعلانيل ڪارروائي

سنڌ ۾ اڄڪلهه هاف فرائي ۽ فل فرائي واري فارمولي جا چئوٻول آهن، ان فارمولي تحت چيو پيو وڃي ته جيڪي به نامي گرامي ڌاڙيل يا ڏوهاري آهن تن مان ڪجهه کي پوليس مقابلن ذريعي يا ته ماري ڇڏڻ يا کين سخت زخمي ڪري ڇڏڻ واري اڻ علانيل پاليسي تي عمل شروع ٿي چڪو آهي، جن ڏوهارين کي ماريو وڃي ٿو تنهن لاءِ فل فرائي ۽ جن کي زخمي ڪيو پيو وڃي تنهن لاءِ هاف فرائي وارو اصطلاح استعمال ڪيو وڃي ٿو. جيتوڻيڪ حڪومتي سطح تي ته اهڙي ڪنهن فارمولا تي عمل ٿيڻ بابت ڪو به اشارو نه ڏنو ويو آهي ۽ نه ئي پوليس کاتي پاران ڪو اهڙو اظهار ڪيو ويو آهي، جنهن مان اندازو لڳائي سگهجي ته هاف فرائي يا فل فرائي واري ڪنهن فارمولي تي ڪي ڳجهه ڳوهه وارا حڪم جاري ٿي چڪا آهن. بهرحال ڪجهه به هجي پر اها حقيقت آهي ته هاف فرائي ۽ فل فرائي وارن افواهن کانپوءِ گري گنجي وارن ڏوهاري جي سرگرمين کي في الحال ٻنجو اچي ويو آهي ۽ شهرن ۾ اسٽريٽ ڪرائيم ۾ ڳچ حد تائين لاٿ اچي چڪي آهي. جڏهن ته هيل تائين جيڪي به و اقعا سامهون آيا آهن، تن ۾ ته اهو ڏٺو ويو آهي ته انعام رکيل ڌاڙيلن ۽ رهزنن کي فل فرائي ڪيو ويو آهي. جڏهن ته ٻين کي هاف فرائي ڪندي انهن کي گوڏن واري هنڌ تي گوليون هڻي معذور ڪرڻ جي ڪوشش ڪئي وئي آهي ته جيئن اهي سڄي زندگي هلڻ کان به لاچار رهن، جن به ڏوهارين خلاف هاف ۽ فل فرائي وارو فارمولو استعمال ٿيو آهي تن لاءِ اهو ئي چيو ويو آهي ته انهن جوابدارن پوليس کان فرار ٿيڻ جي ڪوشش ڪئي يا انهن سان پوليس جو مقابلو ٿيو، جنهن ۾ اهي مارجي ويا يا زخمي ٿي پيا.

اسان وٽ ڏوهن ۾ واڌ جو هڪ سبب اهو به آهي جو ملڪ ۾ ڏوهاري سوچ رکندڙ ماڻهن عدالتن جي مجبورين ۽ قانون جي ڪمزورين جو مڪمل اڀياس ڪري ورتو آهي هونئن به اسان جي قانون ۾ اڄ به سڀيئي رعايتون جوابدارن کي حاصل آهن. مثال طور ڪو به شخص ڪنهن جي خلاف ڪيس داخل ڪرائڻ لاءِ ٿاڻي تي وڃي ٿو پهريائين ته هن جو ڪيس داخل ئي نه ٿو ٿيئي پر جيڪڏهن اهو ڏوڪڙ ڏيئي يا ڪا سفارش ڪرائي ڪيس داخل ڪرائي ٿو يا عدالت۾ درخواست داخل ڪري عدالت کان ڪيس داخل ڪرڻ وارو حڪم حاصل ڪري ٿو، تڏهن به پوليس جوابدار کي گرفتارڪرڻ کان لنوائيندي رهي ٿي، پرجيڪڏهن اهو جوابدار گرفتار به ٿي وڃي ۽ ان کي عدالت ۾ پيش ڪيو وڃي ته اهو هڪ يا ٻن ڏينهن اندر گهڻو ڪري ضمانت تي آزاد ٿي ويندو ڇاڪاڻ ته قانون موجب سنگين ڏوهن ۾ ملوث جوابدار کانسواءِ باقي ڏوهن ۾ ملوث جوابدار کي ضمانت تي آزاد ڪرڻ جوابدار جو قانوني حق آهي. هاڻ جڏهن ڪو فريادي ڪنهن جوابدار کي سوگهو ڪرائڻ لاءِ مهينن جا مهينا ڌڪا کائي ڪو ڪيس داخل ڪرائي ٿو ۽ اهو جوابدار هڪ يا ٻن ڏينهن اندر آزاد ٿيو وڃي. هونئن به اسان وٽ اهو ئي سمجهيو وڃي ٿو ته جيڪڏهن ڪو جوابدار ضمانت تي آزاد ٿي وڃي ٿو ڄڻ ته ان جو اڌ ڪيس ختم ٿي ويو آهي باقي آهن، شنوايون اهي پيون هلنديون ۽ اهي ايتريون ته ڊگهيون هلنديون آهن يا ڪيس ايترا سال هلندو آهي جو فريادي پاڻ ئي ڪيس تان هٿ کڻي ٺاهه لاءِ تيار ٿي ويندو آهي. اسان وٽ عدالتن جي انهي ڊگهي عمل جي ڪري ڏوهاري ماڻهن جو من ڏينهون ڏينهن نه رڳو وڌي رهيو آهي پر ڏوهن ۾ به واڌ ٿي رهي آهي. هوڏانهن اهي ڏوهاري جيڪي ڏوهن جو جهان ٺاهي ويٺا آهن،تن نه رڳو سڄو ملڪ تپائي ڇڏيو آهي پر اهي هاڻ پوليس لاءِ به مٿي جو سور بڻجي چڪا آهن. جڏهن ته عدالتون به اهڙن رهزنن خلاف شاهديون نه ملڻ ڪري انهن کي آزاد ڪرڻ تي مجبور ٿي ويون آهن. عدالتن جا جج سمجهن به ٿا ته جيڪو جوابدار عدالت جي ڪٽهڙي ۾ بيٺل آهي اهو واقعي ڏوهاري لڳي ٿو پر جيئن ته ڪاغذن ۾ ۽ قانوني پيچيدگين جي ڪري اهو آزاد ڪرڻ جي لائق آهي ان ڪري جج انهن کي ڇڏڻ تي مجبور ٿي پون ٿا. هاڻ جڏهن سڀ ڪجهه هٿن مان نڪرندو نظر اچي ۽ هر ڪو بيوس ٿيڻ لڳي ته پوءِ آخري حل فل فرائي يا هاف فرائي ئي وڃي بچي ٿو، جنهن تي عمل شروع ٿي چڪو آهي. اسان سمجهون ٿا ته اهو به ڪو مستقل حل ناهي، اوهان جيڪڏهن پنهنجي گهر ۾ پستول رکو ٿا ته اوهان جي گهر تي چڙهائي ڪندڙ پڪ ڪهاڙي کڻي نه ايندو پر اهو پستول کان وڏي شيءِ کڻي حملي آور ٿيندو. اڄ کان 20 سال اڳ هر ٿاڻي تي رڳو هڪ رائيفل هوندي هئي، عام پوليس وارو لٺ کڻي اڌ ڳوٺ کي ٻڌي وٺي ايندو هو ۽ ڪنهن وڏي ڏوهاري کي جهلڻ لاءِ ويندڙ پوليس پارٽي وٽ اها رائيفل رڳو هڪ سپاهي کي ڪلهي ۾ ٽنگيل هوندي هئي اسان وٽ جڏهن کان پوليس کي جديد هٿيار ملڻ شروع ٿيا آهن، تڏهن کان ڌاڙيلن ۽ رهزنن انهن کان به وڌيڪ جديد هٿيار خريد ڪرڻ شروع ڪيا آهن اڄڪلهه هر پوليس واري جي ڪلهي ۾ ڪلاشنڪوف ٽنگيل آهي تڏهن به ڏوهارين کي ڪو به ڊپ ڊاءُ ناهي ڇاڪاڻ ته انهن وٽ ان کان به وڌيڪ خطرناڪ هٿيار موجود آهن.

اسان سمجهون ٿا ته هاف ۽ فل فرائي وارو فارمولو وقتي طور تي ته ٺاپر ڪرائي سگهي ٿو، جڏهن ته اهو فارمولو سدائين لاءِ ڪارگر ثابت نه ٿو ٿي سگهي، جنهن جو مثال اسان هن طرح به ڏ يئي سگهون ٿا ته ڪراچي ۾ دهشتگردن خلاف جن پوليس اهلڪارن آپريشن ڪيا ۽ انهن جو خاتمو آندو جڏهن ته دهشتگردن بعد ۾ انهن سڀني اهلڪارن کي چونڊي چونڊي قتل ڪري ڇڏيو. اهڙي ريت جيڪڏهن اهو فارمولو ڪجهه عرصي تائين استعمال ٿيندو رهيو ته پوءِ جيڪڏهن رد عمل ۾ ڌ اڙيلن ۽ رهزنن اهلڪارن کي نشانو بڻائڻ شروع ڪيو ته پوءِ ڇا ٿيندو، تنهن بابت به اڄ ئي سوچڻ جي ضرورت آهي ائين نه ٿيئي ته پوءِ اسان کي سڀيئي ٿاڻا بند ڪري انهن ۾ به قانون لاڳو ڪندڙ اهلڪار ويهارڻ تي مجبور ٿيڻو پئي، بهرحال اڳتي ڇا ٿو ٿيئي تنهن لاءِ سوچڻ جو اهو ئي وقت آهي ڇاڪاڻ ته ڪنهن مريض کي جيڪڏهن اٿندي ئي هاءِ ڊوز ڏيئي ڇڏجي ته پوءِ ان جو علاج هاءِ ڊوز کان هاءِ ڊوز ذريعي ئي ڪرڻو پوندو ۽ اهڙو مريض بچي سگهندو يا برداشت ڪري سگهندو، تنهن لاءِ به آساني سان سمجهي سگهجي ٿو.

 

۽ نيٺ برف پَگھِرجڻ لڳي ؛ارشاد ڪاغذي

ايران جو ايٽم بم ٺاهڻ امريڪا، اسرائيل، يورپ ۽ عالمي طاقتن لاءِ خطري جي گھنٽي وانگر هو ۽ آهي. امريڪا ۽ اسرائيل ايران جي ايٽم بم ٺاهڻ جي منصوبي جي خلاف پروپيگنڊه ڪندو رهيو ۽ ٻئي ملڪ حملي ڪرڻ جون ڌمڪيون ڏيندا رهيا. نار جي جنگ، پابنديون، ناڪابندي ۽ تيل ۾ گھٽتائي ۽ هر قسم جي ارهه زورائي ۽ زبردستيءَ جي باوجود ايران ايٽمي پروگرام تي ڄمي مقابلو ڪندو رهيو. امريڪا 1950ع ۾ جوهري امن پروگرام تحت ننڍڙو ريسرچ ريڪٽر شاهه رضا پهلوي جي حوالي ڪيو. يورپ جا ٻيا ملڪ پڻ وقت بوقت مدد ڪندا رهيا. ايران ۾ اسلامي انقلاب اچڻ کانپوءِ آيت الله خميني جوهري هٿيارن جي پروگرام کي انسانيت جي قتلام برابر قرار ڏيندي ان کي حرام ڪوٺيو ۽ هي منصوبو بند ڪري ڇڏيو. اسلامي انقلاب کان وٺي اڄ ڏينهن تائين امريڪا ۽ ايران هڪٻئي جا سخت دشمن هئا، پر هاڻي دوستي رکڻ جا خواهشمند آهن. لڳي ٿو ته ٻئي هڪ پيج تي آهن. مرگ بر امريڪا جا نعرا گونجندا يا ياري جا دهل دهمام وڄندا.

نئين دور جو آغاز شروع ٿيڻ وارو آهي. امريڪا ۽ ايران دوستي جي معاهدي جي ويجهو پهتا آهن. جوهري پروگرام تي ٻئي ملڪ ٺهي ويا آهن. ٻنهي ملڪن جي سربراهن هڪٻئي ڏانهن پريم پتر موڪلي راضپي جو اعلان ڪيو آهي.

سڌ سماءَ جي معتبر ۽ مشهور ذريعن وال اسٽريٽ جنرل امريڪا ۽ ايران جي وچ ۾ ائٽمي مامري تي ٿيندڙ معاهدي جا تفصيل پڌرا ڪيا آهن. امريڪا جي پرڏيهي وزير جان ڪيري ۽ ايران جي پرڏيهي وزير جواد ظريف جي جنيوا ۾ گڏجاڻي ٿي. جنهن ۾ ٻنهي ڄڻن ايران جي جوهري پروگرام جي ڊگھي مدت واري مسئلي تي ڳالهه ٻولهه ڪئي. بند ڪمري ۾ ٿيل ڳالهين کي ظاهر ڪندي وال اسٽريٽ لکيو آهي ته امريڪا، ايران کي 10 سالن تائين جوهري پروگرام کي ملتوي يا مُنجمند ڪرڻ لاءِ راضي ڪري ورتو آهي. ايران يورينيم جي رچاءُ کي محدود يا مُنجمند رکڻ بابت ابتدائي طور ڳالهين ۾ حصو ورتو. معاهدي جي مختلف ٽيڪنيڪلي پهلوئن تي اعليٰ سطحي وفد ڳالهين جي ميز تي ويهي غور ۽ ويچار ڪيو. امريڪا پاران انرجي جي وزير ارنسٽ مونز ۽ ايران جي ايٽمي توانائي تنظيم جي ڊائريڪٽر علي اڪبر صالحي صلاح مصلحت ڪئي. سڌ سماءَ جي ذريعن مطابق يورينيم جي افزودگي کي ڏهن سالن تائين منجمند ڪرڻ جي تجويز آهي، جنهن جي بدلي ۾ ايران کي راحت ۽ رليف، پابنديون هٽائڻ ۽ جهجهي تعداد ۾ پئسا ڏوڪڙ ڏيڻ جو امريڪا آسرو ڏنو آهي.

وال اسٽريٽ جنرل هڪ ٻيو انڪشاف ڪيو آهي ته ايران جي رهبر اعليٰ آيت الله علي خامنائي هڪ ڳجهو خط امريڪا جي صدر باراڪ اوباما ڏانهن لکي موڪليو آهي. ان خط ۾ امريڪا سان سٺا لاڳاپا رکڻ ۽ ٻين معاملن تي سهڪار ڪرڻ لاءِ چيو آهي. وال اسٽريٽ جو وڌيڪ چوڻ آهي ته صدر اوباما طرفان گذريل سال لکيل خط جي جواب ۾ ايران جي روحاني اڳواڻ ”سٺن عزت ۽ احترام جي لفظن ۾ جواب ڏنو آهي“. ايران جو اعتدال پسند صدر حسن روحاني امريڪا سان جوهري ٺاهه جي ڪوشش ڪري رهيو آهي. هي خط صدر روحاني جي حمايت ۽ همت افزائي کي ظاهر ڪري رهيو آهي. مائيڪل سنگھه مئنيجنگ ڊائريڪٽر واشنگٽن انسٽيٽيوٽ جي بقول: ”هو (خامنائي) سمورو ڪريڊٽ حاصل ڪرڻ گھري ٿو، اهو ته جيڪڏهن سودو ٿئي ٿو ته تمام سٺو ۽ جيڪڏهن نٿو ٿئي ته هو پاڻ کي ڏِٺو ڪرڻ نٿو گھري“. تنهن ڪري وچٿرا، سفارتڪاري جي ادب آداب جي ستر پردن ۾ ويڙهيل خيال، ويچار ۽ لفظ چونڊي صدر اوباما ڏانهن خط جي ذريعي موڪليا آهن. هي امريڪي صدر ڏانهن ايران جي روحاني رهنما جو ٻيو خط هو. وائيٽ هائوس ۽ اقوام متحده ۾ ايران جي مشن ذڪر ڪيل خط تي تبصري ۽ تصديق ڪرڻ کان انڪار ڪيو هو. پر ڪجهه ڏينهن کان پوءِ وائيٽ هائوس جي ترجمان جوش ارنسٽ ڏهه سالن جي ڊيل جي ترديد ڪئي آهي. جڏهن ته اسرائيل ۽ امريڪا جي وچ ۾ ناراضگي چوٽ چڙهي ويئي آهي ۽ گرما گرمي وڌي ويئي آهي. اسرائيل جو وزير اعظم ان تجويز کي امن عالم مڊل ايسٽ ۽ خطي لاءِ هاڃيڪار ڪوٺي ٿو. امريڪا جي ڪانگريس جي ميمبرن جيڪي اسرائيلي لابي طور مشهور آهن، انهن نيتن ياهو کي ڪانگريس کي خطاب ڪرڻ جي دعوت ڏني آهي. ان ڪارڻ اوباما سرڪار چڙي پئي آهي. اوباما جي قومي سلامتي جي مشير سوسن رائيس چيو ته ”نيتن ياهو جي ڪانگريس ۾ تقرير ڪرڻ سان تعلقات ڇيتيون ڇيتيون ٿيڻ جو انديشو آهي“. جڏهن ته اسرائيل جي مخالف ڌر وزيراعظم کي ان حرڪت کان باز اچڻ جو زور ڀريو آهي.

ياد رهي ته سال 24 نومبر 2013ع تي ايران ۽ پنجن عالمي طاقتن 1+5 امريڪا، چين، روس، فرانس، جرمني ۽ يورپي يونين جي پرڏيهي وزيرن ۽ سفارتڪارن ۽ ايران جي وچ ۾ پنجن ڏينهن تائين جاري مذاڪرات ۽ مشاورت جي نتيجي ۾ جنيوا ۾ هڪ عارضي ٺاهه ٿيو، جنهن کي سرڪاري طرح ”Joint Plan of Action“ سڏيو ويو. هن معاهدي تحت ايران پنهنجو ايٽمي منصوبو رول بيڪ ڪندو. ايران يورينيم جو پنج سيڪڙو کان وڌيڪ رچاءُ (Enrichment) نه ڪندو. ايران پنهنجا ايٽمي ٺڪاڻا عالمي معائني لاءِ هر وقت کليل رکندو. ايران ڳوري پاڻيءَ وارو منصوبو ختم ڪندو. ايران تي ڇهن مهينن تائين ڪابه پابندي ڪونه لڳندي ۽ ٻيون پابنديون هٽايون وينديون. اقتصادي ۽ معاشي ترقي لاءِ ست ارب ويهه ڪروڙ ڊالر جو پيڪيج ملندو. امريڪا ۽ ايران ڇهن مهينن کان ڳجهي نموني ڳالهيون ڪندا رهيا ۽ 1+ 5 جي ڪوشش سان ايران راضي ٿيو. اڳوڻي صدر نزادي ۽ موجوده صدر روحاني جي قسم کڻڻ کان پوءِ اومان جي شاهه قابوس جي ميزباني ۽ ٽياڪڙي ۾ ڳجهي نموني ڳالهيون ٿيون. سلطان قابوس ايران وڃي صدر روحاني سان پڻ مليو هو. انهن لڪل ڳالهين کي پرنٽ ۽ اليڪٽرانڪ ميڊيا وقت بوقت وائکو ڪندي رهي. پر ايران، امريڪا ۽ اومان ترديد ڪندا رهيا. لڪيل ۽ بيڪ ڊور ڊپلوميسي جي نتيجي ۾ امريڪا ۽ ايران پنهنجي ضد ۽ هوڏ ڇڏي ۽ سخت موقف تان دستبردار ٿي وچٿرو ۽ نرم رويو اختيار ڪري ٺاهه تي راضي ٿيا. امريڪا انهن ڳالهين کي ڳجهو رکيو ۽ پنهنجي اتحادين کي سُڻسَ ملڻ نه ڏني، پر اسرائيل جي وزيراعظم کي صدر اوباما اعتماد ۾ ورتو هو ته جيئن هو خاموشي اختيار ڪري پر نيتن ياهو سخت مذمتي بيان جاري ڪري امريڪا لاءِ پريشاني پيدا ڪئي هئي. هن ٺاهه کي ”تاريخي غلطي“ سڏيو هو. سعودي عرب هن معاهدي کي دنيا ۽ امن جي شڪست سان مشابهت ڏني هئي. جڏهن ته پاڪستان هن جي آجيان ڪندي تاريخي ٺاهه ڪوٺيو هو. معاهدي ٿيڻ کان پوءِ امريڪا ۽ ايران پنهنجي پنهنجي موقف جي فتح قرار ڏئي رهيا آهن. ان معاهدي ۾ اهو طئي ڪيو ويو ته آئنده به ڳالهيون جاري رکبيون.

هي نئين ڊيل جنهن جو تذڪرو ٿي رهيو آهي، تنهن بابت گھڻو پڙهڻ ۽ ٻڌڻ ۾ آيو آهي. امريڪا ۽ ايران جي وچ ۾ جيڪي ڳالهيون ٿيون تن کي سڌ سماءَ جي ذريعن پڌرو ڪيو آهي جنهن مطابق ايران ڏهن سالن تائين انتظار ڪندو ۽ ڊگھي مدت واري معاهدي جي ايران پاسخاطري ڪرڻ لاءِ راضي ٿيو آهي. ان جي بدلي ۾ امريڪا ۽ يورپي ملڪ پنهنجا خزانا ايران جي حوالي ڪندا. امريڪي پرڏيهي وزير ڳالهين جي پٺڀرائي ڪندي امريڪي سينيٽ ۾ سوالن جا جواب ڏيندي چيو: ”ايران هڪ قابلِ قبول ۽ معقول پلان تي متفق ۽ راضي ٿيو آهي“.

الجزيره ۽ دي گارجين جي رپورٽ مطابق اسرائيل جو وزيراعظم ايراني ايٽمي پروگرام تي تنقيد ڪري رهيو آهي ۽ هو پڪ سان چوي ٿو ته ايران ايٽم بم تيار ڪري ورتو آهي. هن 2012ع ۾ اقوام متحده ۾ تقرير ڪندي پوري وثوق سان ثابت ڪرڻ جي ڪوشش ڪئي هئي ته ايران وٽ ايٽم بم آهي. جڏهن ته اسرائيل جي انٽيليجنس ايجنسي موساد ايران جي ايٽمي قوت بابت لاعلمي ظاهر ڪئي هئي. جڏهن ته سي آءِ اي ايران ۾ ايٽمي مواد بابت پنهنجي رپورٽ ۾ اهو انڪشاف ڪيو هو ته ايران سويلين مقصد تحت جوهري مواد کي استعمال ڪري رهيو آهي، ان وٽ موتمار جوهري هٿيار ڪونه آهن.

تاريخ جي ستم ظريفي تي روئڻ ٿو اچي. ڇاڪاڻ ته اڄ ۽ ڪالهه جي قصن ۽ حقيقتن ۾ هڪجهڙائي ۽ مطابقت جي ڪري هڪ اهڙي المئي کي ورجايو ويو آهي، جنهن تي اعتبار ڪرڻ ڏکيو ٿو لڳي. ڪالهه جي ڳالهه آهي ته صدر بش عراق تي ان لاءِ حملو ڪيو ته سندس خيال مطابق اتي جوهري هٿيار ۽ مواد موجود آهي پر اتي ڪجهه به نه هو. مشهور ليکڪ سيموئر هرش چواڻي: ”ايران تي حملي جا امريڪي انتظاميا جا عملدار هاڻي ان ڪري به مونجهاري جو شڪار آهن جو امريڪي سي آءِ اي طرفان ڪيل تحقيقات ۾ وائيٽ هائوس طرفان ايران وٽ ايٽمي هٿيارن جي دعويٰ کي چئلينج ڪيو ويو آهي. سي آءِ اي کي تحقيق دوران اهڙي ڪا به شاهدي نه ملي آهي. جنهن مان اهو ثابت ٿي سگھي ته ايران وٽ سولين مقصدن جي استعمال کان سواءِ ڪا ايٽمي ٽيڪنالاجي آهي. حالانڪه اهڙي معلومات ايران انٽرنيشنل ايٽامڪ انرجي کي به ڏئي چڪو آهي… سي آءِ جي اها رپورٽ سيٽلائٽ وسيلي حاصل ڪيل فني معلومات تي ٻڌل آهي. ان کان سواءِ پاڻي جا نمونا ۽ پاور پلانٽس مان هٿ ڪيل معلومات ۽ ايران جي نيوڪليئر ويجهو گذريل هڪ سال کان موجود پنهنجي مخبرن جي ڏنل اطلاعن کان پوءِ سي آءِ اي ان نتيجي تي پهتي آهي ته ايران وٽ ايٽمي هٿيار ٺاهڻ جي ٽيڪنالاجي موجود ناهي“. (تاريخ جو مقتل گاهه، سنڌيڪار: همسفر گاڏهي)

موساد به امريڪي سي آءِ جيان ايران جي ايٽمي ٺڪاڻن جو خفيه معائنو ڪيو ۽ ظاهر ڪيو ته ايران وٽ ايٽم بم يا خطرناڪ هٿيار ناهن. اهي خبرون اخبارن ۾ به شايع ٿيون. وائيٽ هائوس ۽ امريڪي انتظاميا وانگر اسرائيلي وزيراعظم ۽ سندس سرڪار موساد جي رپورٽن کي رد ڪيو ۽ ايران جي ڪاهي ڪڍ پيو آهي. اسرائيل جو وزيراعظم نيتن ياهو مارچ ۾ امريڪا جي دوري تي اُسهندو. اسرائيل ۽ امريڪا جي لفظي ويڙهه ڪٿي دنگ ڪندي؟ ڇا هو ڳالهين ۾ ٺهي ويندا يا پري وڃي پوندا؟ امريڪا جي ڪوشش آهي ته اسرائيل تي هٿ رکجي ۽ کيس ٿڌو ڪجي. اسرائيل ۾ عام اليڪشن مارچ 2015ع ۾ ٿي رهي آهي. نيتن ياهو جو هي دورو اهميت جو حامل آهي. هو کلي عام ڳالهائڻ گهري ٿو. پنهنجا پتا کيڏڻ چاهي ٿو. امريڪا ان اليڪشن تي حاوي ٿيڻ جي موڊ ۾ آهي ۽ اهو دارومدار نيتن ياهو جي رويي تي آهي ته هو معاملن کي درست ڪندو يا وري ٽِمجهَڻِ مچائي اوباما جي مٿي ۾ سور وجهندو!