تازيون خبرون

Daily Archives: February 26, 2015

سينيٽ چونڊن کي صاف ۽ شفاف بڻائڻ حڪومت جي وڏي ڪاميابي هوندي: وزيراعظم

اسلام آباد (بيورو) وزيراعظم نواز شريف سان مسلم ليگ نون خيبرپختونخواهه جي چونڊيل نمائندن ملاقات ڪري سينيٽ چونڊن سميت مختلف معاملن تي ڳالهيون ڪيون آهن، وزيراعظم چيو آهي ته سينيٽ اليڪشن کي شفاف بڻائڻ حڪومت جي اولين ترجيح آهي، آئيني ترميم آڻڻ لا سياسي پارٽين سان مشاورت ڪئي پئي وڃي. اسلام آباد ۾ وزيراعظم نواز شريف سان خيبر پختونخواهه جي ايم اين اي ۽ ايم پي ايز ملاقات ڪئي، جنهن دوران سينيٽ چونڊن سميت مختلف معاملن تي ڳالهيون ڪيون ويون. ملاقات ڪندڙن ۾ خيبرپختونخواهه جو گورنر سردار مهتاب عباسي، قومي اسيمبلي جو ڊپٽي اسپيڪر مرتضيٰ جاويد عباسي، ڪيپٽن رٽائرڊ صفدر، ايم پي اي عبدالستار، ارباب اختر حيات، محمد راشد خان، محمد شيراز، ولي محمد زالده ۽ ٻيا شريڪ هئا. ان موقعي تي ڳالهائيندي وزيراعظم نواز شريف چيو ته سينيٽ  چونڊن کي صاف ۽ شفاف بڻائڻ حڪومت جي پهرين ترجيح آهي. وزيراعظم نواز شريف چيو ته سينيٽ چونڊن دوران هارس ٽريڊنگ روڪڻ ۽ ڪرپشن جي خاتمي لاءِ سمورين سياسي پارٽين سان رابطا جاري آهن، هارس ٽريڊنگ واري معاملي تي آئيني ترميم آڻڻ لاءِ مشاورت به جاري آهي. وزيراعظم چيو ته سينيٽ چونڊن کي صاف ۽ شفاف بڻائڻ حڪومت جي وڏي ڪاميابي هوندي. وفد سان ڳالهائيندي وزيراعظم وڌيڪ چيو ته حڪومت لوڊشيڊنگ جي خاتمي لاءِ قدم کڻي رهي آهي، توانائي بحران جي خاتمي لاءِ مختلف منصوبن تي ڪم هلي رهيو آهي.

 

سنڌ ۾ گورنر راڄ جو ڪو به امڪان ناهي: قائم علي شاهه

ڪراچي (اسٽاف رپورٽر) سنڌ جي وڏي وزير سيد قائم علي شاهه سپريم ڪورٽ جي اڳوڻي وقتي چيف جسٽس آنجهاني راناڀڳوانداس کي خراع عقيدت پيش ڪندي چيو ته رانا ڀڳوانداس جا انصاف تي ٻڌل فيصلن کيس عدليه ۾ اعليٰ مقام ڏنو، هن شهرت لاءِ ڪڏهن به عدليه کي هٿيار نه بڻايو، قائم علي شاهه اربع تي اڳوڻي چيف راناڀڳوانداس جي رهائشگاهه تي سندس پٽ ۽ ٻين گهر ڀاتين سان افسوس جو اظهار ڪيو، قائم علي شاهه چيو ته رانا ڀڳوانداس جي وفاق عدليه لاءِ نقصان آهي، راناڀڳوانداس محروم ۽ مظلوم طبقي کي انصاف فراهم ڪرڻ لاءِ جدوجهد ڪئي جيڪا فراموش نٿي ڪري سگهجي، عدليه سندس خدمتون ياد رهنديون، هڪ سوال جي جواب وڏي وزير سنڌ ۾ گورنر راڄ جو ڪو به امڪان نه آهي، نبيل گبول ٻيون جون ڳالهيون ڪرڻ بدران پاڻ بابت ڪجهه چپ چوري، هن چيو ته گذريل 5 سالن کان عوام جي خدمت ڪئي ۽ آئينده به ڪنداسين.

 

عمران خان هارس ٽريڊنگ جي خاتمي لاءِ حڪومت جو ساٿ ڏئي: پرويز رشيد

اسلام آباد (بيورو) سڌ سماءَ واري وفاقي وزير پرويز رشيد جو چوڻ آهي ته عمران خان کي هارس ٽريڊنگ بابت گهڻيون شڪايتون آهن هاڻ هو ان جي خاتمي لاءِ حڪومت جو ساٿ ڏئي، اسلام آباد ۾ ميڊيا سان ڳالهائيندي سڌ سماءَ واري وفاقي وزير پرويز رشيد چيو ته هارس ٽريڊنگ جي خاتمي لاءِ سمورين پارٽين مثبت ردعمل ڏنو آهي ۽ جمهوري استحڪام لاءِ هارس ٽريڊنگ جو خاتمو به ضروري آهي ان لاءِ حڪومت سياست سان ان جي خاتمي جي ڪوشش ڪري رهي آهي، پرويز رشيد چيو ته پي ٽي آءِ چيئرمين عمران خان کي هارس ٽريڊنگ بابت گهڻيون شڪايتون آهن ان ڪري هاڻ هو ان جي خاتمي لاءِ حڪومت جو ساٿ ڏئي عمران خان پارليامينٽ ۾ اچي ان جي قانونسازي ۾ حصو وٺي ۽ جمهوريت جي مضبوطي ۾ اسان جو ساٿ ڏئي.

 

پئسي جو استعمال روڪڻ لاءِ آئيني ترميم اسان جي ناڪامي آهي: خورشيد شاهه

اسلام آباد (بيورو) قومي اسيمبلي ۾ اپوزيشن ليڊر خورشيد شاهه، سينيٽ چونڊن دوران هارس ٽريڊنگ روڪڻ لاءِ آئيني ترميم جي مخالفت ڪري ڇڏي آهي، خورشيد شاهه چيو آهي ته پئسي جو استعمال روڪڻ لاءِ آئيني ترميم اسان جي ناڪامي آهي، اليڪشن ڪميشن ووٽ جو هنڌ تبديل ڪرڻ واري معاملي جو نوٽيس وٺي. اسلام آباد ۾ ميڊيا سان ڳالهائيندي خورشيد شاهه چيو ته هارس ٽريڊنگ سياسي ۽ پارلياماني نظام لاءِ زهر قاتل آهي، جنهن کي روڪڻ لاءِ سڀني پارٽين کي گڏجي ڪردار ادا ڪرڻو پوندو. هن چيو ته حڪومت جتي خطرو محسوس ڪري پئي، اتي ترميم آڻي رهي آهي، هارس ٽريڊنگ روڪڻ لاءِ آئيني ترميم اسان جي ناڪامي آهي. خورشيد شاهه چيو ته سينيٽ اليڪشن جو شيڊول جاري ٿيڻ باوجود اميدوار پنهنجو ووٽ تبديل ڪرائي رهيا آهن، اليڪشن ڪميشن معاملي جو نوٽيس وٺي. هڪ سوال جي جواب ۾ خورشيد شاهه چيو ته حڪومت گلگت بلتستان ۾ بدترين ڌانڌلين جون تياريون ڪيون آهن، چيف اليڪشن ڪمشنر مسلم ليگ ن جو ڪارڪن آهي.

 

پاڪستان ٽن سالن بعد عالمي بينڪ جي فنڊنگ حاصل ڪرڻ جي اهل بڻجي ويو

اسلام آباد(بيورو) ناڻي واري وفاقي وزير سينيٽر محمد اسحاق ڊار چيو آهي ته حڪومت جو پرڏيهي ناڻي جي ذخيرن جو ايندڙ هدف 17 ارب ڊالر آهي جيڪو سندس غير معمولي ڪوششن جي نتيجي ۾ جلد حاصل ڪيو ويندو. سينيٽر اسحاق ڊار عالمي بينڪ جي ڪنٽري ڊائريڪٽر رشيد بن مسعود سان گڏجاڻي دوران ڳالهائيندي چيو ته حڪومت جو پرڏيهي مٽاسٽا واري ناڻي جو نئون هدف 17 ارب ڊالر آهي جيڪو الله جي مهرباني سان جلد حاصل ڪيو ويندو. ٻنهي اڳواڻن جي ملاقات ۾ ملڪ جي ترقي واري روڊميپ جي حوالي سان غور ويچار ڪيو ويو. عالمي بينڪ جي ڪنٽري ڊائريڪٽر عالمي بينڪ جي انتظاميا جي پاران وفاقي وزير کي ٻڌايو ته پاڪستان ٽن سالن کانپوءِ هڪ دفعو وري آءِ بي آر ڊي جي فنڊنگ حاصل ڪرڻ جي اهل بڻجي ويو آهي. آءِ بي آر ڊي جي فنڊنگ واري سهولت مارچ 2012ع ۾ معطل ڪئي وئي هئي ڇاڪاڻ ته ان وقت پاڪستان ميڪرو ايڪانامڪ اسٽيبلٽي جي حوالي سان گهربل حالتن تي پورو نه پئي لهي سگهيو. هن چيو ته پاڪستان وٽ اڍائي مهينن تائين جا پرڏيهي ناڻي جا ذخيرا موجود آهن ۽ عالمي بينڪ انتظاميا اقتصادي ترقي جي رفتار جي حوالي سان پاڪستان جي پاليسين مان مطمئن پڻ آهي. اهڙي ريت پاڪستان 2015ع کان 2019ع تائين جي چئن سالن لاءِ 2 ارب ڊالرن جي عالمي بينڪ جي فنڊنگ مان فائدو حاصل ڪري سگهي ٿو. رشيد بن مسعود پاڪستان جي ميڪرو ايڪانامڪ جي شعبي ۾ مثبت اهڃاڻن ۽ ايف بي آر جي آمدني ۾ ٿيل جوڳي اضافي، مهانگائي ۾ گهٽتائي، بجيٽ کوٽ ۾ گهٽتائي ۽ مجموعي ملڪي پيداوار ۾ مثبت اڳڀرائي جي ڪري ٿيل اقتصادي استحڪام جي واکاڻ پڻ ڪئي.

 

ڊي جي آءِ ايس آءِ امريڪا پهچي ويو

واشنگٽن (مانيٽرنگ ڊيسڪ) ڊي جـِي آءِ ايس آءِ ليفٽيننٽ جنرل رضوان اختر آمريڪا پهچي ويو آهي، جتي هـُو آمريڪي سي آءِ اي چيف سميت ٻين عسڪري قيادت سان ملاقاتون ڪندو. آءِ ايس پي آر طرفان جاري ڪيل پڌرائي موجب، ڊي جي آءِ ايس آءِ ليفٽيننٽ جنرل رضوان سرڪاري دوري تي آمريڪا پهچي ويو آهي.ليفٽيننٽ جنرل رضوان اختر آمريڪي ڳجهي اداري سي آءِ اي جي چيف سان ملاقات ڪري ڳجهي ڄاڻ جي مٽا سٽا سميت مختلف معاملن تي ڳالهيون ڪندو. ڊي جي آءِ ايس آءِ ٻين عسڪري قيادت سان به ملاقاتون ڪري قومي سلامتي، خطي جي سڪيورٽي صورتحال، دهشتگردي خلاف جنگ سميت ٻين معاملن تي خيالن جي ڏي وٺ ڪندو. دوري دوران ليفٽيننٽ جنرل رضوان اختر آمريڪا جي دفاع واري اداري پينٽاگون جو به دورو ڪندو.

 

سنڌ حڪومت قبضا مافيا کي آخري وارننگ جاري ڪري ڇڏي

ڪراچي(اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته سرسبز سنڌ، پرامن سنڌ مهم ڪراچي سان گڏوگڏ اندرين سنڌ ۾ به زور شور سان جاري آهي ۽ ان جا اثر هاڻ عوام کي نظر اچڻ شروع ٿي ويا آهن. ڪراچي سميت پوري سنڌ ۾ جتي جتي به قبضا آهن انهن کي آخري وارننگ ڏيان ٿو ته هو فوري طور تي گرين بيلٽ، فٽ پاٿ ۽ سرڪاري زمينن تان قبضن جو پاڻ مرادو خاتمو ڪري ڇڏين. ٻي صورت ۾ آپريشن جي صورت ۾ کين نقصان سان گڏوگڏ ڪيسن کي به  منهن ڏيڻو پئجي سگهي ٿو. مهم تي ڪنهن قسم جو اضافي بجيٽ خرچ نٿو ڪيو وڃي ۽ سمورا وسيلا ڊي ايم سيز ۽ ڪي ايم سيز پنهنجي بجيٽ مان ئي پورو ڪري رهيون آهن. اهڙن خيالن جو اظهار هن اربع ڏينهن زولوجيڪل گارڊن (ڪراچي چڙيا گهر) ۾ سرسبز سنڌ، پرامن سنڌ مهم جي ٽئين ڏينهن صفائي ۽ اتي وڻڪاري ڪرڻ کان پوءِ ميڊيا سان ڳالهائيندي ڪيو. ان موقعي تي ڪمشنر ڪراچي شعيب احمد صديقي، ڊپٽي ڪمشنر سائوٿ سليم راجپوت، ميٽروپوليٽن ڪمشنر ڪراچي مسعود عالم، ڊي جي پارڪس نياز سومرو، ايڊمنسٽريٽر سائوٿ افضل زيدي، ميونسپل ڪمشنر سائوٿ محمد رئيسي، محمد عاصم ۽ ٻيا به اتي موجود هئا. ان موقعي تي صوبائي وزير جي آمد تي ٻن ٻارڙين کيس گلدستا پيش ڪيا. صوبائي وزير، ڪمشنر ڪراچي ۽ ٻين ٻهارو ڏئي ۽ چڙيا گهر ۾ وڻ لڳائي مهم جي شروعات ڪئي. ان موقعي تي ميڊيا سان ڳالهائيندي شرجيل انعام ميمڻ چيو ته اڄ مهم جو ٽيون ڏينهن آهي ۽ ان مهم جا اثر اڄ سڀني کي نظر اچڻ شروع ٿي ويا آهن. هن چيو ته ميڊيا به ان مهم ۾ پنهنجو ڀرپور ڪردار ادا ڪري رهيو آهي ۽ منهنجي گذارش آهي ته هو ان سلسلي ۾ اسان تي تنقيد ضرور ڪن جڏهن ته ان مهم جا اثر ۽ ان جي آگاهي لاءِ به پنهنجو ڪردار ادا ڪري. شرجيل ميمڻ چيو ته 100 سيڪڙو صفائي جي دعويٰ نٿا ڪريون پر سنڌ حڪومت ۽ بلديات کاتو ان مهم لاءِ پنهنجا سمورا وسيلا استعمال آڻي رهيو آهي ۽ ان جي ڪاميابي ۾ سول سوسائٽي ۽ عوام جي شرڪت ان ڳالهه جي ضمانت آهي. هن چيو ته اڄ شهر ۾ صفائي تي جيترو به عملو ۽ آفيسر نظر اچي رهيا آهن ايترو ماضي ۾ ڪڏهن نظر ناهن آيا ۽ اسان گوسڙو ملازمن جي خاتمي لاءِ جيڪي سخت قدم کنيا آهن ان جا اثر به سمورن کي نظر اچڻ شروع ٿي ويا آهن. شرجيل ميمڻ چيو ته مون سميت ڪمشنر ڪراچي، ڊي سي ۽ سمورن آفيسرن گذريل ٽن ڏينهن کان شهر جي مختلف علائقن ۾ نه صرف دورا ڪري رهيا آهيون بلڪ هن پوري مهم کي مانيٽر به ڪيو پيو وڃي. ڪجهه هنڌن تي انفرااسٽرڪچر نه هجڻ سبب مشڪلاتن کي منهن ڏيڻو پيو ۽ ان سلسلي ۾ به سمورن لاڳاپيل آفيسرن کي هدايتون ڪيون ويون آهن ته هو انهن کي درست ڪرائين. هن چيو ته گذريل ڏينهن اسان ڪلفٽن ۽ آسپاس وارن علائقن ۾ گرين بيلٽ تي قائم قبضن جو به خاتمو ڪيو آهي ۽ موجود هوٽلن ۽ ٻين قبضن کي ختم ڪرايو ويو آهي ۽ اسان ان دوران انهن هوٽل مالڪن جو ضبط ٿيل سامان کين واپس ڪري ڇڏيو آهي. پر اڄ آئون اهڙن سمورن دڪاندارن ۽ ٻين قبضو ڪندڙن کي آخري موقعو ڏيان ٿو ته هو فوري طور تي انهن قبضن کي ختم ڪري ڇڏين ۽ آپريشن دوران هاڻ جيڪو سامان ضبط ٿيندو اهو واپس نه ڪيو ويندو ۽ انهن جي دڪانن کي به سيل ڪيو ويندو ۽ انهن خلاف ڪيس به داخل ڪيو ويندو. هن چيو ته سول سوسائٽي کي اپيل ڪريان ٿو ته هو هن مهم کي اوون ڪندي شهر ۽ صوبي ۾ وڌ کان وڌ ٻوٽا لڳائين، ڇو ته جڏهن ماحول پرفضا هوندو ته امن به قائم ٿيندو. هڪ سوال جي جواب ۾ صوبائي وزير چيو ته صفائي سٿرائي مهم ۾ ڪراچي واٽر بورڊ به مڪمل طور تي شامل آهي ۽ ان سلسلي ۾ ايم ڊي واٽر بورڊ کي سختي سان هدايتون ڪيون ويون آهن ته جن جن علائقن ۾ سيوريج جا مسئلا ۽ مين هالز تي ڍڪ نه هجڻ جون شڪايتون آهن انهن جو ازالو ڪيو وڃي ۽ شهر ۾ سيوريج جو ڪم بهتر کان بهتر بڻايو وڃي. هن چيو ته هاڻ حڪومت جون هدايتون نه مڃيندڙن آفيسرن لاءِ ڪوبه جواز قابل قبول نه هوندو ۽ جيڪي سرڪاري آفيسر يا ملازم ڪم نه ڪندا اهي سرڪاري کاتي جو حصو نه رهندا. هن چيو ته گوسڙو ملازمن جي حوالي سان به سخت قدمن جي ڪري هاڻ ملازمن جي وڏي تعداد ڪم تي واپس اچي وئي آهي. ۽ هاڻ کين ڪم ڪرڻ جي عادت وجهڻي پوندي، ڇو ته ماضي ۾ جيڪو ٿيو هاڻ نه ٿيڻ ڏنو ويندو. ان موقعي تي هن ڪمشنر ڪراچي جي خدمتن کي به ساراهيندي چيو ته جهڙي طرح هن مهم جي شروعات کان وٺي هاڻ تائين جيڪو ڪم ڪيو آهي ۽ روزانه جي بنيادن تي وزٽ ۽ مانيٽر ڪري رهيو آهي اهو ساراهه جوڳو آهي. شهر ۾ جمع ٿيندڙ ڪچري جي مقابلي ۾ کڻڻ جي گنجائش ۾ گهٽ جي سوال تي صوبائي وزير چيو ته روزانه شهر ۾ 12 هزار ميٽرڪ ٽن ڪچرو گڏ ٿئي ٿو جڏهن ته ايترو نٿو کڻي سگهجي ان جي ڪري اسان سولڊ ويسٽ مينيجمينٽ جو قيام عمل ۾ آندو آهي ۽ هاڻ ان جي ذريعي خانگي ڪمپنين کي ڪچرو کڻڻ جو ٺيڪو ڏنو پيو وڃي. هن چيو ته لاهور جي آبادي ڪراچي کان به گهٽ آهي ۽ ان وٽ اسان کان وڌيڪ وسيلا آهن پر هنن اهو ٺيڪو ترڪي جي هڪ ڪمپني کي ڏنو آهي ۽ اسان به ان سلسلي ۾ پهرين مرحلي ۾ اڳوڻي ٽائون جي بنيادن تي انهن ڪمپنين کي ٺيڪو ڏئي رهيا آهيون، مهم تي اضافي خرچ جي سوال تي هن چيو ته هن مهم ۾ هڪ رپيو به اضافي خرچ نٿو ڪيو وڃي ۽ نه ان سلسلي ۾ سنڌ حڪومت يا ناڻي کاتي کان ڪا اضافي بجيٽ ورتي وئي آهي  بلڪ سمورو خرچ ڪي ايم سي ۽ سمورن ڊي ايم سيز پنهنجي بجيٽ مان ڪري رهيون آهن. ڪي ايم سي جي اسپتالن ۽ ڊسپينسرين جي خراب حالت جي سوال تي شرجيل انعام ميمڻ چيو ته ان سلسلي  ۾ گذريل ڏينهن ئي اعلان ڪيو آهي ته هڪ هفتي کان پوءِ ڪي ايم سي جي سمورين اسپتالن، ڊسپينسرين ۽ اسڪولن ۾ به ٻهارو گهمايو ويندو ۽ اهو صرف صفائي لاءِ نه هوندو بلڪ گوسڙو ملازمن ۽ ڪرپشن ۾ ملوث ماڻهن خلاف به هوندو. ڪراچي ۾ پارڪنگ مافيا جي سوال جي جواب ۾ هن چيو ته 90 سيڪڙو پاڪنگ غيرقانوني ۽ ان ۾ مارڪيٽن ۽ شاپنگ سينٽرز وارا  ملوث آهن. عوام کي به اهو گهرجي ته اهڙي طرح جي غيرقانوني پارڪنگ جي بجاءِ قانوني پارڪنگ ۾ پنهنجون گاڏيون بيهارين ته جيئن شهر ۾ ٽريفڪ جو نظام متاثر نه ٿئي. هن چيو ته سول سوسائٽي ۽ عوام خود هن شهر ۽ صوبي کي جنهن ڏينهن اوون ڪري وٺندو هي صوبو ملڪ جو سڀ کان وڌيڪ خوبصورت صوبو بڻجي ويندو.

 

سپريم ڪورٽ انساني عضون جي وڪري بابت ڪيس ۾ وفاق ۽ صوبن کي نوٽيس جاري ڪري ڇڏيا

اسلام آباد (بيورو) سپريم ڪورٽ، انساني عضون جي وڪري بابت ڪيس ۾ وفاق ۽ صوبن  کي نوٽيس جاري ڪري ڇڏيا. جسٽس ثاقب نثار جي سربراهي ۾ سپريم ڪورٽ جي 3 رڪني بئنچ انساني عضون جي وڪري بابت ڪيس جي ٻڌڻي ڪئي. ٻڌڻي دوران ريمارڪس ڏيندي جسٽس ثاقب نثار چيو ته ملڪ جي ڪيترين ئي اسپتالن ۾ انساني گردا وڪرو ڪيا پيا وڃن، پر اها خبر ناهي ته اهي ڪيتري قيمت ۾ وڪرو ڪيا وڃن ٿا. هـُن چي ته ٻڌايو وڃي ته انساني عضون جو وڪرو روڪڻ لاءِ ڪهڙا قدم کنيا ويا آهن؟ جسٽس ثاقب نثار چيو ته عضون جي وڪري کان وڌيڪ انساني حقن جي ڪهڙي لتاڙ ٿي سگهي ٿي؟ عدالت، وفاق ۽ صوبن کي جواب داخل ڪرائڻ لاءِ نوٽيس جاري ڪندي ٻڌڻي اڻڄاڻايل مدي تائين ملتوي ڪري ڇڏي.

 

سنڌ حڪومت پاران بلدياتي چونڊون فيبروري 2016ع ۾ ڪرائڻ تي راضپو ظاهر

ڪراچي (اسٽاف رپورٽر) سنڌ حڪومت بلدياتي چونڊون لاءِ ڏنل چوٿين تاريخ ۾ هڪ مهيني جي گهٽتائي ڪري ڇڏي صوبائي حڪومت مارچ بجاءِ فيبروري 2016 ۾ ڪرائڻ لاءِ تيار سنڌ حڪومت سپريم ڪورٽ ۽ اليڪشن ڪميشن کي نئين تاريخ بابت آگاهه ڪري ڇڏيو چيف سيڪريٽري سنڌ سجاد سليم هوتيانه سپريم ڪورٽ کي ٻڌايو آهي ته سنڌ بلدياتي چونڊون فيبروري 2016 ۾ ڪرائڻ لاءِ تيار آهي رپورٽ ۾ ٻڌايو ويو آهي ته صوبائي حڪومت نئين تاريخ جي حوالي سان چيف اليڪشن ڪمشنر کي آگاهه ڪري ڇڏيو آهي بلدياتي قانونن ۾ اليڪشن ڪميشن طرفان نشاندهي کانپوءِ خاميون ختم ڪري ڇڏيون آهن، سنڌ حڪومت طرفان پهريان 27 نمومبر 2013ع پوءِ 7 ڊسمبر 2013 جي تاريخ ڏني وئي جنهن کانپوءِ صوبائي حڪومت 18 جنوري 2014ع تي بلدياتي چونڊون ڪرائڻ جو چيو سنڌ طرفان چوٿون ڀيرو مارچ 2016 ۾ چونڊون ڪرائن جي تاريخ ڏني وئي جنهن ۾ هڪ مهيني جي گهٽتائي ڪئي وئي آهي.

 

افغانستان ۽ امريڪا جي ڪري خيبرپختونخواهه جون حالتون خراب آهن: عمران خان

دبئي (مانيٽرنگ ڊيسڪ) تحريڪ انصاف جي سربراهه عمران خان، ڪـَي پـِي ڪـَي پوليس کي مڪمل طور غير سياسي بڻائڻ جي دعويٰ ڪندي چيو آهي ته افغانستان ۽ آمريڪا جي ڪري خيبرپختونخواهه جون حالتون خراب آهن، خطي مان آمريڪا جي نڪري وڃڻ بعد صورتحال بهتر ٿي ويندي. دبئي ۾ ميڊيا سان ڳالهائيندي پي ٽي آءِ سربراهه عمران خان چيو ته خيبرپختونخواهه جي پوليس مثالي آهي، صوبي اندر ڪرپشن تي ضابطو آندو ويو آهي. هن چيو ته  خيبر پختونخواهه سان مختلف سرحدون ملي رهيون آهن، ان ڪري اتان جون حالتون خراب آهن پر ڪجهه سالن کان صورتحال ۾ بهتري آندي وئي آهي ۽ پوليس کي غير سياسي بڻائي فري هينڊ ڏنو ويو آهي. عمران خان چيو ته پرڏيهي سيڙپڪار خيبرپختونخواهه ۾ اچي سيڙپڪاري ڪن، کين تحفظ فراهم ڪيو ويندو. هڪ سوال جي جواب ۾ پي ٽي آءِ سربراهه چيو ته افغانستان ۽ آمريڪا جي ڪري خيبرپختونخواهه جون حالتون به خراب آهن، خطي مان آمريڪا جي نڪرڻ بعد حالتون بهتر ٿي وينديون. نبيل گبول جي پي ٽي آءِ ۾ شموليت بابت سوال جي جواب ۾ عمران خان چيو ته جنهن تي به ڪرپشن جو داغ نه هوندو، ان کي پارٽي ۾ ڀليڪار ڪيو ويندو پر ڪرپٽ ماڻهن جي تحريڪ انصاف ۾ جاءِ ناهي. قومي ڪرڪيٽ ٽيم جي ڪارڪردگي تي ڳالهائيندي عمران خان چيو ته رانديگرن کي ڪاميابي لاءِ دفاعي حڪمت عملي اختيار ڪرڻي پوندي.