تازيون خبرون

Daily Archives: February 25, 2015

ڌانڌلين جي جاچ لاءِ جوڊيشل ڪميشن قائم ٿيڻ تائين پارليامينٽ ۾ نه وينداسين: عمران خان

اسلام آباد (بيورو) تحريڪ انصاف جي سربراهه عمران خان، هارس ٽريڊنگ روڪڻ لاءِ سينيٽرز جي چونڊ هٿ مٿي کڻي ڪرڻ  واري حڪومتي فيصلي جي حمايت ڪري ڇڏي آهي،  ڪپتان چيو آهي ته ڪروڙين رپيا ڏئي ايوان ۾ ايندڙ عوام جي ڪهڙي خدمت ڪري سگهندو، هارس ٽريڊنگ روڪڻ لاءِ حڪومتي قدمن جي حمايت ڪئي ويندي. اسلام آباد ۾ ميڊيا سان ڳالهائيندي عمران خان چيو ته هڪ شخص کيس تحريڪ انصاف جي سيٽ تي سينيٽر ٿيڻ لاءِ کيس 15 ڪروڙ رپين جي آڇ ڪئي هئي. هن چيو ته سينيٽر ٿيڻ لاءِ قيمتون لڳي رهيون آهن پر اسان ان تي ايڪشن کڻڻ بدران خاموش ويٺا آهيون، حڪومتي پاران سينيٽر جي چونڊ هٿ مٿي کڻڻ وارو فيصلو سٺو آهي، پر ان تي عمل به ٿيڻ گهرجي. هڪ سوال جي جواب ۾ عمران خان چيو ته ڪو به غلط فهمي  ۾ نه رهي، ڌانڌلين جي جاچ لاءِ جوڊيشل ڪميشن قائم ٿيڻ تائين هو پارليامينٽ ۾ نه ويندا. عمران خان چيو ته ڌانڌلين دوران گهٽ ۾ گهٽ 70 لک کان وڌيڪ جعلي ووٽ وڌا ويا، جنهن کي هو جڊيشل ڪميشن ۾ ثابت ڪندا. پي ٽي آءِ سربراهه چيو ته ملڪ ۾ جاري دهشتگردي سبب هنن ڌرڻو ختم ڪيو ۽ حڪومت جو ساٿ ڏنو پر عوام هڪ ڀيرو ٻيهر عمران خان ۽ آزادي بس کي روڊن تي ڏسندو. قبائلي جرڳي سان ملاقات بابت سوال جي جواب ۾ عمران خان چيو ته دهشتگردي خلاف جنگ ۾ قبائلين سڀ کان وڌيڪ قربانيون ڏنيون آهن، هن وقت تائين خيبرپختونخواهه ۾ 22 لک آءِ ڊي پيز آهن.

 

ذوالفقار مرزا جو اياز لطيف پليجي سان فون تي رابطو، ڪرپشن خلاف گڏيل جدوجهد تي اتفاق

ڪراچي (مانيٽرنگ ڊيسڪ) پيپلز پارٽي جي ناراض اڳواڻ ڊاڪٽر ذوالفقار مرزا قومي عوامي تحريڪ جي صدر اياز لطيف پليجي سان فون تي رابطو ڪيو آهي، جنهن دوران ٻنهي اڳواڻن ڪرپشن خلاف گڏيل جدوجهد هلائڻ تي اتفاق ڪيو آهي. ڊاڪٽر ذوالفقار مرزا لنڊن مان فون تي اياز لطيف پليجي سان رابطو ڪيو ۽ ڪرپشن خلاف گڏيل جدوجهد هلائڻ جي آڇ ڪئي، جنهن تي ٻنهي اڳواڻن اتفاق ڪيو. ڊاڪٽر ذوالفقار مرزا جو چوڻ هو ته ڪرپشن خلاف سندس موقف چٽو آهي، هو هم خيال ڌرين سان گڏجي جدوجهد هلائڻ جو فيصلو ڪيو آهي. اياز لطيف پليجي رابطي جي تصديق ڪندي چيو آهي ته ڊاڪٽر ذوالفقار مرزا 20 ڏينهن اندر واپس ايندو، جنهن بعد هو سنڌ سرڪار جي ڪرپشن کي وائکو ڪرڻ لاءِ گڏيل جدوجهد هلائڻ بابت لائحه عمل جوڙيو ويندو.

 

پي سي بي چيئرمين پاران معين خان کي وطن واپس گهرائڻ جو فيصلو

برسبين(م.ڊ) پاڪستان ڪرڪيٽ ٽيم جي مينيجر نويد اڪرم چيما معين خان جي جوا خاني وڃڻ بابت پنهنجي شروعاتي رپورٽ کان پي سي بي چيئرمين کي آگاهه ڪري ڇڏيو آهي، جنهن ۾ چيو ويو آهي ته چيف سليڪٽر پنهنجن قدمن تي معافي گهري آهي نويد اڪرم چيما جي رپورٽ ۾ چيو ويو آهي ته معين خان اعتراف ڪيو آهي ته هو جوا خاني ويو هو پر هن اتي ماني کاڌي هئي جڏهن ته هو پنهنجي ان حرڪت تي معافي چاهي ٿو قومي ٽيم جي مينيجر پنهنجي رپورٽ جي باري ۾ پي سي بي چيئرمين کي آگاهه ڪري ڇڏيو آهي ٻئي طرف پي سي بي معين خان کي وطن واپس گهرائڻ جو فيصلو ڪري ورتو، ان ڳالهه جو امڪان آهي ته هو زمبابوي خلاف ميچ کان اڳ ئي وطن واپس اچي ويندو.

 

سنڌ ۾ 5 هنڌن تي 20 – 20 ميگاواٽ جي سولر پلانٽن جا مختلف ڪمپنين کي ٺيڪا ڏنا ويا آهن: مراد علي شاهه

ڪراچي (اسٽاف رپورٽر)سنڌ جي ناڻي واري وزير سيد مراد علي شاهه چيو آهي ته سنڌ حڪومت ٿر ڪول فيلڊ ۾ وڏي پيئماني تي ڪول مائيننگ جي لاءِ 5 ملڪي ۽ غير ملڪي ڪمپنين کي ليز ڏني وئي آهي. سنڌ ۾ 5 جاين تي 20 – 20 ميگاواٽ جا سولر پلانٽن لاءِ مختلف ڪمپنين کي ٺيڪا ڏنا ويا آهن. اهڙو اظهار  هن ڪالهه اڱاري ڏينهن اسيمبلي جي اجلاس ۾ سوالن جوابن جي وٿي دوران ڪيترن ئي ميمبرن جي سوالن جا جواب ڏيندي ڪيو. هن چيو ته ٿر ڪول جي بلاڪ نمبر هڪ جي ليز سنڌ سينو ريسورسز (پرائيويٽ) لميٽيڊ کي ڏني وئي آهي. هي بلاڪ 122 چورس ڪلوميٽرن تي آهي. مذڪوره ڪمپني 900 ميگاواٽ پاور پلانٽ قائم ڪرڻ جي لاءِ منصوبا بندي ڪئي آهي ۽ 5. 99 چورس ڪلوميٽرن جي بلاڪ 2 جي ليز سنڌ اينگرو مائيننگ ڪمپني کي ڏني وئي آهي. اها ڪمپني 600 ميگاواٽ جو پلانٽ لڳائڻ چاهي ٿي. 159. 66 چورس ڪلوميٽر جي بلاڪ 6 جي ليز سنڌ ڪاربن انر جي پرائيوٽ لميٽيڊ کي ڏني وئي آهي. اها ڪمپني 300 ميگاواٽ پاور پلانٽ لڳائڻ چاهي ٿي ۽ وڌيڪ ٻن بلاڪن جي ليز به ڏني وئي آهي. هن چيو ته وفاقي حڪومت پنجاب ۾ پاور پلانٽ لڳائڻ جو منصوبو جوڙيو هو، اهو ناقابل عمل منصوبو هو ڇو ته پنجاب ۾ ڪوئلو ناهي، ٿر مان ڪوئلو پنجاب کڻي وڃڻ سولو ناهي پوءِ وفاقي حڪومت گڊاني ۾ پاور پلانٽ لڳائڻ جو منصبو تيار ڪيو. ان منصوبي تي سنڌ کي سخت خدشا هئا ڇو ته گڊاني ڪراچي کان صرف 20 ڪلوميٽر جي فاصلي تي آهي، ڪراچي تي ماحولياتي اثر پئجي سگهن ٿا، اهو منصوبو به ختم ٿي ويو. پاڪستان جو مستقبل ٿر سان لاڳاپيل آهي، اسان شهيد محترمه بينظير ڀٽو جي ويزن موجب ڪيٽي بندر ۾ ڪوئلي تي هلندڙ بجلي گهر قائم ڪرڻ لاءِ ڪم ڪري رهيا آهيون. هن چيو ته سنڌ حڪومت وفاق کي خط لکيو آهي ته لاکڙا ڪول پاور پلانٽ سنڌ جي حوالي ڪيو وڃي ڇو ته پاور پلانٽ جي لاءِ جيڪو ڪوئلو استعمال ڪيو پيو وڃي، اهو سنڌ حڪومت جي ملڪيت آهي. هڪ سوال جي جواب ۾ صوبائي وزير ٻڌايو ته 2008 کان 2012 تائين سنڌ جي 3736 ٻهراڙين کي بجلي فراهم ڪئي وئي آهي. وڌيڪ 552 ٻهراڙين کي بجلي جي فراهمي جي لاءِ سنڌ حڪومت فنڊ مهيا ڪري ڇڏيا آهن، هن سال جي آخر تائين انهن ٻهراڙين کي به بجلي ملي ويندي. حيسڪو ۽ سيپڪو جي طرفان ڪم جي رفتار سست آهي، اهي وفاقي حڪومت جا ادارا آهن، اسان وفاقي حڪومت سان ڳالهه ڪنداسين، جن ڪمن جي لاءِ سنڌ حڪومت پيسا ڏئي چڪي آهي اهي ڪم مڪمل ڪيا وڃن. هن چيو ته گيس ڪمپنيون مقامي ماڻهن کي نوڪريون نٿيون ڏين، ان حوالي سان به وفاقي حڪومت سان ڳالهائينداسين. هن چيو ته سنڌ حڪومت صوبي ۾ 5 جاين تي 20 – 20 ميگا واٽ جا سولر پاور پلانٽ لڳائڻ جا ٺيڪا ڏئي ڇڏيا آهن.

 

اداڪاره پريانڪا چوپڙا ۽ فريده پنٽو گرل رائزنگ انڊيا مهم جي شروعات ڪري ڇڏي

نئين دلي(شوبز نيوز)بالي ووڊ ادڪااره پرينڪا چوپڙا ۽ فريده پنٽو گرل رائزنگ انڊيا مهم جي شروعات ڪري ڇڏي ڀارتي ميڊيا مطابق ان مهم جو مقصد ڀارت ۾ نارين جي زندگي جي معيار کي تبديل ڪرڻ آهي ان حوالي سان پريس ڪانفرنس دوران پريانڪا چوپڙا چيو ته مون کي خوشي آهي ۽ منهنجي لاءِ اعزاز جي ڳالهه آهي ته مان ان مهم جو حصو بڻي آهيان هن چيو ته جيڪڏهن اسان وڌ کان وڌ ڇوڪرين کي تعليم يافته ڪنداسين ان سان عورتن کي پنهنجي حقن جي باري ۾ ڄاڻ حاصل ٿيندي ۽ ملڪي ترقي ۾ به ڪردار ادا ڪنديون.

 

عاطف اسلم پنهنجي سالگرهه تي مداحن کي گاني جو تحفو ڏيندو

نئين دلي(شوبز نيوز)عاطف اسلم مداحن کي خوشخبري ڏني آهي ته هو انهن کي پنهنجي سالگرهه تي هڪ خاص تحفو ڏيندو ڀارتي خابرو اداري کي انٽرويو ۾ عاطف اسلم جو چوڻ هو ته هن وقت ان جي پوري توجهه بالي ووڊ تي آهي جنهن سبب ان جي البم رليز نه پئي ٿئي جيڪا ان جي مداحن جي ناراضگي جو سبب بڻجي رهي آهي، هن چيو ته مداحن جي ناراضگي ختم ڪرڻ لاءِ هو پنهنجي نئين البم تيار ڪري رهيو آهي جنهن جو پهريون گانو هو پنهنجي سالگرهه جي ڏينهن رليز ڪندو.

 

فلمي دنيا جو سڀ کان وڏو آسڪر ايوارڊ فلم ”برڊ مين“ پنهنجي نالي ڪري ورتو

لاس اينجلس(شوبز نيوز)خوشي جا رنگ وکيري هالي ووڊ نگري ۾ سجايل سڀ کان وڏو ايوارڊ ميلو جتي سڀني جي اميدن جي برعڪس فلم برڊ مين بهترين فلم جو ايوارڊ پنهنجي نالي ڪرڻ ۾ ڪامياب ٿي وئي آمريڪي شهر لاس اينجلس جي ڊولبي ٿيٽري ۾ 87 هين سالياني آسڪر ايوارڊ جي تقريب منعقد ٿي جتي لفمي ستارن جلوا ڏيکاريا 87 هين آسڪر ايوارڊ جي ڊوڙ ۾ بهترين فلم لا ءِآمريڪن سنائپر، برڊ مين، بوائي هڊ، دي گرينڊ بڊاپسٽ هوٽل، دي ايميٽيشن گيم، سيلما، دي ٿيوري آف ايوري ٿنگ ۽ ويپ ليش کي نامزد ڪيو ويو هو جڏهن ته جيوري جي گڏيل فيصلي کانپوءِ فلم برڊ مين کي بهترين فلم جي ايوارڊ سان نوازيو ويو آسڪر ايوارڊ ۾ ايڊي ريڊ مائن بهترين اداڪار، جوليا مور بهترين اداڪاره جو ايوارڊ کٽڻ ۾ ڪامياب ٿي

 

مڌوبالا کي مداحن کان وڇڙئي 46 سال گذري ويا

ممبئي(شوبز نيوز) بالي ووڊ جي تاريخ جي سڀ کان خوبصورت هيروئن مڌوبالا 40 ۽ 50 جي ڏهاڪي ۾ مداحن جون ننڊون ڦٽايون محل جي ڪامني هجي يا امر جي انجو مڌوبالا هر ڪردار زبردست طريقي سان نڀايو مسٽر اينڊ مسز 55۽ چلتي ڪا نام گاڙي ۾ مڌو جي بي مثال اداڪاري شوقينن کي اڄ به ياد آهي مغل اعظم ۾ شهزادي سليم جي انارڪلي جو ڪردار مڌوبالا کي بالي ووڊ نگري ۾ امر ڪري ڇڏيو مڌوبالا جو شمار هندي فلمن جي سڀ کان وڌيڪ بااثر شخصيتن ۾ ڪيو وڃي ٿو حسن ۽ عشق جي ديوي مڌوبالا جو دليپ ڪمار سان زبردست رومانس هليو جڏهن ته ان جي شادي ڳائڻي ڪشور ڪمار سان ٿي صرف 36 سالن جي ڄمار ۾ مداحن کي وڇڙي ويندڙ مڌوبالا اڄ به ڪروڙين دلين جي ڌڙڪن آهي.

 

ڪرس گيل جي ڊبل سينچري، زمبابوي کي ميچ ۾ ڪاميابي لاءِ 373 رنسن جو هدف

ڪينبرا(اسپورٽس نيوز)ويسٽ انڊيز زمبابوي کي ميچ ۾ ڪاميابي لاءِ 373 رنسن جو هدف ڏنو آهي ويسٽ انڊيز جي بيٽنگ جي خاص ڳالهه ڪرس گيل جي 215 رنسن جي تاريخي اننگ هئي جنهن ۾ هن 16 ڇڪا ۽ 10 چوڪا هنيا ڪرس گيل ورلڊ ڪپ ۾ پهرين ڊبل سينچري ٺاهڻ جو  اعزاز به حاصل ڪيو گيل اننگ جي آخري بال تي 215 رنسن جي انفرادي اسڪور تي ڪيچ آئوٽ ٿيو ان کان اڳ ورلڊ ڪپ ۾ سڀ کان وڏي اننگ کيڏڻ جو  اعزاز ڏکڻ آفريڪا جي گيري ڪرسٽن وٽ هو ڪرسٽن 1996ع  جي ورلڊ ڪپ ۾ يو اي اي خلاف 188 رنسن جي اننگ کيڏي هئي ڪرس گيل پنهنجي هن اننگ دوران ون ڊي ڪيريئر جون 9 هزار رنسون به مڪمل ڪيون، گيل کان علاوه مارلن سيموئل سينچري اسڪور ڪندي 133 رنسون ٺاهيون ان جي اننگ ۾ 11 چوڪا ۽ 3 ڇڪا شامل هئا ان طرح ويسٽ انڊيز مقرر 50 اوورن ۾ ٻن وڪيتن جي نقصان تي 372 رنسون ٺاهي مخالف زمبابوي کي 373 رنسن جو هدف ڏنو.

 

ڪرس گيل ون ڊي ڪرڪيٽ ۾ 22 سينچريون ٺاهي ڪوهلي ۽ گنگولي جو رڪارڊ برابر ڪري ڇڏيو

ڪينبرا(اسپورٽس نيوز) ويسٽ انڊيز جي بيٽسمين ڪرس گيل ون ڊي ڪرڪيٽ جي تاريخ ۾ 22سينچريون ٺاهي ويران ڪوهلي ۽ سارو گنگولي جو رڪارڊ برابر ڪري ڇڏيو آهي. ون ڊي ميچن ۾ وڌيڪ سينچريون ٺاهيندڙ گڏيل طور تي دنيا جو چوٿون بيٽسمين بڻجي ويو. هڪ ڏينهن واري ميچن ۾ وڌيڪ سينچريون ٺاهڻ جو عالمي اعزاز ٽنڊولڪر وٽ آهي. هن 29 سينچريون ٺاهيون آهن. پونٽنگ 30 سينچريون ٺاهي ٻين ۽ جي سوريا 28 سينچريون ٺاهي ٽئين نمبر تي موجود آهي.