تازيون خبرون

Daily Archives: February 25, 2015

فوجي عدالتن جي اوپن ڪارروائي جو فيصلو جج ڪندو، آرمي ايڪٽ ۾ ترميم جو آرڊيننس جاري

اسلام آباد (بيورو) صدر ممنون حسين پاڪستان آرمي ايڪٽ ۾ ترميم جو آرڊيننس جاري ڪري ڇڏيو آهي، فوجي عدالتن جي ڪارروائي اوپن يا بند ڪمري ۾ ڪرڻ بابت فيصلو جج ڪندو.  صدر ممنون حسين پاڪستان آرڊيننس ۾ ترميم ايڪٽ جو آرڊيننس جاري ڪري ڇڏيو آهي. آرمي ايڪٽ ۾ ترميم جي سمري بچاءُ واري وزارت موڪلي هئي. بچاءُ واري وزارت جي سمري ۾ وزيراعظم جي ايڊوائيس شامل هئي. آرمي ايڪٽ ۾ ترميم کانپوءِ فوجي عدالتن جا جج، وڪيل ۽ گواهن  کي سيڪيورٽي تحفظ فراهم ڪيو ويو آهي. فوجي عدالتن جي ڪارروائي اوپن يا بند ڪمري ۾ ڪرڻ بابت جج پاڻ فيصلو ڪندو.

 

قومي ايڪشن پلان تي عملدرآمد بابت رپورٽ وزيراعظم کي پيش

اسلام آباد (بيورو) قومي ايڪشن پلان تي عملدرآمد جي رپورٽ وزيراعظم نواز شريف کي پيش ڪئي وئي آهي،  رپورٽ ۾ چيو ويو آهي ته 1250  انٽيليجنس آپريشن سان گڏ سڄي ملڪ ۾ 19 هزار کان وڌيڪ آپريشن ڪري 19 هزار 272 ڏوهارين کي گرفتار ڪيو ويو. قانون لاڳو ڪندڙ ادارن 24 ڊسمبر 2014 کان 21 فيبروري 2015 تائين مليل ڄاڻ تحت قومي ايڪشن پلان تي عملدرآمد جي رپورٽ وزيراعظم نواز شريف کي پيش ڪري ڇڏي آهي. رپورٽ ۾ چيو ويو ته سڄي ملڪ ۾ گڏيل طور تي19هزار 7 سئو 89 آپريشن ڪري 19 هزار 2 سئو 72 ڄڻن کي گرفتار ڪيو ويو. رپورٽ موجب، سڀ کان وڌيڪ پنجاب  11 هزار 6 سئو 34 آپريشن ڪيا ويا،  جڏهن ته سنڌ ۾ 2003، خيبرپختونخواهه ۾ 3 هزار 7 سئو 33، اسلام آباد ۾ 6 سئو 68، آزاد ڪشمير ۾ 3 سئو 98،گلگت ۾ 35 ۽ فاٽا ۾ 68 آپريشن ڪيا ويا. وزيراعظم کي آگاهي ڏني وئي ته فنڊز منتقل جي ڪيسن ۾ 26 ڪيس داخل ڪري ملوث 23 ڄڻن خلاف ڪيس داخل ڪيا ويا آهن، جڏهن ته لائوڊ اسپيڪر جي غلط استعمال تي 24 سئو 97 ماڻهن کي حراست ۾ ورتو ويو. رپورٽ موجب، ڳجهي ڄاڻ جي بنياد تي پڻ 12 سئو 50 آپريشن ڪيا ويا، جنهن دوران دهشتگردن جي اهڙن منصوبن ناڪام بڻايو ويو، جيڪڏهن اهي ڪامياب وڃن ها ته وڏي تباهي اچي ها.  قانون لاڳو ڪندڙ ادارن جي رپورٽ موجب، هنڊي ذريعي رقم موڪلڻ تي 23 ڪيس داخل ڪري 26 ڄڻا گرفتار ڪيا ويا، جن وٽان ساڍا 5 ڪروڙ رپين جي رقم به هٿ ڪئي وئي. رپورٽ ۾ چيو ويو آهي ته نادرا جي مدد سان 5 ڪروڙ 76 لک سمز جي تصديق ٿي چڪي آهي.

 

وزيراعظم ۽ آرمي چيف وچ ۾ ملاقات، قومي ايڪشن پلان سميت مختلف معاملن تي ڳالهيون

اسلام آباد (بيورو) وزيراعظم نواز شريف سان آرمي چيف جنرل راحيل شريف ملاقات ڪري قومي ايڪشن پلان سميت مختلف معاملن تي ڳالهيون ڪيون آهن. وزيراعظم هائوس اسلام آباد ۾ پاڪ فوج جي سربراهه جنرل راحيل شريف، وزيراعظم نواز شريف سان ملاقات ڪئي. ملاقات دوران دهشتگردي خلاف قومي ايڪشن پلان ۽ آپريشن ضرب عضب سميت مختلف معاملن تي ڳالهيون ڪيون ويون. وزيراعظم هائوس جي ترجمان موجب، ملاقات دوران آءِ ڊي پيز جي واپسي ۽ سڪيورٽي صورتحال تي به خيالن جي ڏي وٺ ڪئي وئي.

 

سينيٽ چونڊن ۾ شو آف هينڊ نه ٿو ٿي سگهي: خورشيد شاهه

اسلام آباد(بيورو) سينيٽ چونڊن ۾ شو آف هينڊ نه ٿو ٿي سگهي، اهڙن خيالن جو اظهار قومي اسيمبلي ۾ مخالف ڌر اڳواڻ سيد خورشيد شاهه ميڊيا سان ڳالهائيندي ڪيو، هن چيو ته سينيٽ چونڊن ۾ شو آف هيڊ جي معاملي ۾ تيڪنيڪي مسئلا اهن، هن چيو ته گذريل ڏينهن وفاقي وزير خواجه سعد رفيق ۽ پرويز رشيد سان ملاقات دوران به ان ڳالهه تي اتفاق ڪيو ويو هو، هن چيو ته چونڊن جو شيڊيول اچڻ بعد سينيٽ چوندن جي طريقيڪار ۾ ترميم جي گنجائش نه ٿي ٺهي، حڪومت ان معاملي کي چونڊ اصلاحات ڪميٽي جي سامهون رکي.

 

دهشتگردن جي ايجنڊا اسلام دشمن آهي، انهن کي اسلام سان نه جوڙيو وڃي: چوڌري نثار

لنڊن(م.ڊ) دهشتگردي کي اسلام سان نه جوڙيو وڃي، اهڙن خيالن جو اظهار وفاقي گهرو وزير چوڌري نثار لندن ۾ پريس ڪانفرنس کي خطاب ڪندي ڪيو، هن چيو ته دهشتگرد انتهاپسندن جو ايجنڊا اجاگر ڪري رهيا آهن ۽ اسلام جي جنگ جو تاثر ڏئي رهيا آهن، بين الاقوامي دهشتگردن خلاف قدم کڻڻ گهرجن، چوڌري نثار چيو ته 60 کان وڌيڪ ملڪن واشنگٽن اجلاس ۾ شرڪت ڪئي، جنهن ۾ اتفاق راءِ سان قرارداد منظور ڪئي وئي، پاڪستان ۾ 50 هزار کان وڌيڪ ماڻهو دهشتگردي جو شڪار ٿي چڪا آهن.

 

سنڌ اسيمبلي ۾ لوڪل گورنيمينٽ ترميمي بل 2015ع اڪثريتي راءِ سان منظور

ڪراچي (اسٽاف رپورٽر) سنڌ اسيمبليءَ جي اجلاس ۾ ڪالهه اڱاري ڏينهن سپريم ڪورٽ آف پاڪستان جي هدايت جي روشني ۾ سنڌ لوڪل گورنمينٽ ( ترميمي) بل 2015 اتفاق راءِ سان منظور ڪيو ويو، جنهن تحت بلدياتي تڪن (وارڊز، يونين ڪائونسلن ۽ يونين ڪميٽيز) جي تڪبندين جو اختيار اليڪشن ڪميشن آف پاڪستان کي ڏنو ويو آهي جڏهن ته چونڊن جو طريقيڪار به تبديل ڪيو ويو آهي. ان ترميم جي منظوري سان پهرين سنڌ لوڪل گورنمينٽ ايڪٽ تحت يونين ڪائونسل ۽ يونين ڪميٽين ۾ سياسي پارٽين کي چونڊن جي لاءِ اميدوارن جا پينل نامزد ڪرڻو هو پر هاڻ ترميم ٿيڻ بعد بلدياتي ادارن جو بنيادي يونٽ وارڊ هوندو. هر يو سي يا يونين ڪميٽي ۾ 4 وارڊ هوندا ۽ هر وارڊ ۾ سياسي پارٽيون اميدوار بيهاري سگهنديون. اهڙي ريت پينل جي بدران انفرادي اميدوارن جي وچ ۾ مقابلو ٿيندو. ترميم موجب ميٽرو پوليٽن ڪارپوريشن ۾ يونين ڪميٽين ۾ آبادي جي حد 40 کان 50 هزار هوندي. پارلياماني معاملن واري صوبائي وزير ايوان کي ٻڌايو ته اليڪشن ڪميشن کي بلدياتي تڪن جي تڪبندي جا اختيار صرف ان وقت هوندا جڏهن بلدياتي چنڊون ٿينديون. بلدياتي چونڊن بعد تڪبندين جوا ختيار سنڌ حڪومت وٽ هوند. ترميمي بل تحت سنڌ حڪومت گزٽ نوٽيفڪيشن تحت ميونسپل ڪميٽيون ۽ ٽائون ڪميٽين ۾ يونين ڪائونسلن، يونين ڪميٽين ۽ وارڊز جي تعداد جو تعين ڪندي ۽ ان جي تڪ بندي به ڪندي ان جي بعد اليڪشن ڪميشن آف پاڪستان انهن يو سيز، يونين ڪميٽيز ۽ وارڊن جي نئين سر تڪبنديون ڪري سگهندي پر حدبندي جي لاءِ ڪجهه اصول به واضح ڪيا ويا آهن. مثال طور هر وارڊ، يو سي ۽ يونين ڪميٽي جي حد هڪ علائقي جي اڪائي هوندي ۽ ان جي آبادي به برابر هوندي، اهي حدون ڪنهن روينيو تعلقي، ميٽرو پوليٽن ڪارپوريشن، ڊسٽرڪٽ ميونسپل ڪارپوريشن، ميونسپل ڪارپوريشن، ميونسپل ڪميٽي يا ٽائون ڪميٽي جي حدن کي نه اورانگهيندي، تڪبندي ڪندي تڪبندي ايڪٽ 1973 ۽ ٻين لاڳاپيل قانونن تي به عمل ڪيو ويند. ترميمي بل تحت هڪ يونين ڪائونسل يا يونين ڪميٽي چئني وارڊن تي ٻڌل هوندي ۽ هر وارڊ جي لاءِ هڪ ميمبر چونڊيو ويندو. هڪ يونين ڪائونسل ۾ هڪ يا هڪ کان وڌيڪ روينيو ديهه يا وارڊ يا هڪ يا هڪ کان وڌيڪ آدمشماري بلاڪس شامل هوندا ۽ ان جو تعين اليڪشن ڪميشن ڪندي شهري يا ٻهراڙي جي علائقن ۾ هڪ وارڊ هڪ مردمشماري بلاڪ تي ٻڌل هوندو، ان جو فيصلو به اليڪشن ڪميشن ڪندي. ترميمي بل تحت حڪومت بلدياتي تڪبندين جي تعين جي لاءِ لاڳاپيل بلدياتي اداري جي ماڻهن جي اعتراضن جي ٻڌڻي ڪندي. جنهن بعد ڪنهن به ڪائونسل جي حد ۾ واڌ يا تبديلي ڪري سگهي ٿي. بل موجب يو سي ۽ يونين ڪميٽين جي چونڊن ۾ چيئرمين ۽ وائيس چيئرمين گڏيل اميدوار هوندا، 4 وارڊن مان هڪ جنرل ميمبر چونڊيو ويندو. هڪ عورت ميمبر، هڪ مزدور ميمبر ۽ هڪ غير مسلم ميمبر جي به سيٽ هوندي. يونين ڪميٽي جو چيئرمين لاڳاپيل ميٽرو پوليٽن ڪارپوريشن يا ميونسپل ڪارپوريشن ۾ پنهنجي يونين ڪميٽي جي نمائندگي ڪندو ۽ وائيس چيئرمين لاڳاپيل ضلعي ميونسپل ڪارپوريشن ۾ پنهنجي يونين ڪميٽي جي نمائيندگي ڪندو. بل موجب ضلعي ميونسپل ڪارپوريشن جي ميمبرن ۾ لاڳاپيل ضلعي جي يونين ڪميٽين جا چونڊيل وائيس چيئرمين، 22 سيڪڙو عورتون، 5 سيڪڙو غير مسلم، 5 سيڪڙو هاري/مزدورن جا نمائيندا شامل هوندا. اهڙي ريت ميٽرو پوليٽن ڪارپوريشن جي ميمبرن ۾ يونين ڪميٽين جا چونڊيل چيئرمين، 22 سيڪڙو عورتون، 5 سيڪڙو غير مسلم ۽ 5 سيڪڙو هاري مزدورن جا نمائيندا شامل هوندا.

 

پ پ 7 سالن دوران هرشعبي ۾ ترقي ڪئي پر مخالف مڃڻ لاءِ تيار ناهن: وڏو وزير

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته پ پ سنڌ ۾ 7 سالن جي دور ۾ هر شعبي ۾ ترقي ڪئي آهي پر مخالف مڃڻ لاءِ تيار نه آهن، ميڊيا اسان جي بهتر ڪمن کي به ظاهر ڪري، موجوده دور ۾ ميڊيا جي وڏي اهميت آهي، ڪراچي پريس ڪلب جو مثالي ڪردار ملڪگير سطح تي اعتراف ڪيو وڃي ٿو، هو اڱاري تي ڪراچي پريس ڪلب جي دوري تي اتي موجود صحافين کي خطاب ڪري رهيو هو، وڏي وزير سنڌ حڪومت پاران صوبائي بجيٽ ۾ اعلان ڪيل هڪ  ڪروڙ رپين جي گرانٽ جو چيڪ ڪلب جي عهديدارن حوالي ڪيو، ان موقعي تي شرجيل ميمڻ، وقار مهدي، نجمي عالم، لطيف مغل ۽ ٻيا شامل هئا، وڏي وزير جي پريس ڪلب پهچڻ تي صدر فاضل جميلي، سيڪريٽري اي ايڇ خانزاده ۽ بين ميمبرن آجيان ڪئي، وڏي وزير جي ڪراچي پريس ڪلب پهچڻ جي موقعي تي کيس ڪراچي پريس ڪلب جي سڄي ڄمار ميمبرشپ ڏيڻ جو اعلان ڪيو ويو، وڏي وزير خطاب ۾ چيو ته سنڌ جو عوام پنهنجي ذهني صلاحيتن جي اعتبار کان ۽ صوبو پنهنجي قدرتي وسيلن کان مالا مال آهي پر ان جي باوجود ڪجهه ماڻهو اهو چون ٿا ته سنڌ جو عوام ذهين نه آهي، هن چيو ته شهيد ڀٽو ۽ شهيد بي بي جو تعلق به سنڌ سان هو جن پنهنجون صلاحيتيون بين الاقوامي سطح تي مڃرايون، هن چيو ته ڪراچي سنڌ جي گادي جي هنڌ آهي، هتان جا صحافي ذهين آهن، هن چيو ته ڪراچي جا صحافي جڏهن سچ لکڻ تي اچن ٿا ته پنهنجي خلاف لکڻ کان نٿا ڊڄن، اهي سڀني سامهو اصولي ڳالهه بنا خوف ۽ خطري ڪن ٿا، وڏي وزير چيو ته جڏهن ته ڪو به وڏو حادثو ٿئي يا ڪو ٻيو واقعو ٿئي ته ڪراچي ميڊيا منهنجي لاءِ خبر فراهم ڪرڻ جو سڀ کان اهم ذريعو آهي، هن چيو ته اسان جي ايجنسي کي خبر دير سان پهچي ٿي ۽ سرڪاري ڪامورا خبر دير سان آڻين ٿا، هن چيو ته ان جو هي معمول آهي ته هو صبح جو سڀ کان پهريان 5 منٽ ٽي وي جون اهم خبرون ڏسندو آهي ۽ هڪ ڪلاڪ اخبارن جو مطالعو ڪندو آهي ۽ پوءِ اخباري ٽڪڙا ڪڍي مختلف حڪم جاري ڪندو آهيان، هن چيو ته سنڌ حڪومت گذريل 7 سالن ۾ عوام جي وڏي خدمت ڪئي آهي، اقتصادي ۽ معاشي لحاظ کان سنڌ اڳتي وڌي آهي، تعليمي شعبي ۾ سنڌ وڏي ڪاميابي حاصل ڪئي، پبلڪ سيڪٽر ۾ 9 وڏيون يونيورسٽي قائم ڪيون ويون جنهن ۾ لياري يونيورسٽي به شامل آهن، هن چيو ته سنڌ ۾ 52 اسڪول هلائي رهيا آهيون مان 12 هزان جي حالت خراب هئي ان مان 80 سيڪڙو ٺيڪ ڪيا ويا آهن، وڏي وزير چيو ته ٿرپارڪر ۾ ڪو ٻارڙو فوت ٿئي ٿو ته اخبارن ۾ هي خبرون لڳي وڃن ٿيون ته ٿر ۾ بک وگهي ٻارڙا مري رهيا آهن، هن سوال ڪيو ته ڇا ٻارڙو ماني يا ڊبل روٽي کائيندو آهي، هن چيو ته ٻارڙا غذائي کوٽ نه پر ويم دروان فوت ٿين ٿا. هن ٻڌايو ته ميرپور خاص، مٺي، عمر ڪوٽ، ٿرپارڪر جي ٻين علائقن ۾ ڀرپور طبي سهولتون موجود آهن ۽ سرڪاري اسپتالن ۾ هڪ ڏينهن دوران اڍائي هزار مريضن کي تپاسيو ويندو آهي. وڏي وزير چيو ته اڳوڻي صدر آصف علي زرداري ٿرپارڪر جي عوام لاءِ کاري پاڻي کي ميٺو بڻائڻ لاءِ تخليقي تصور پيش ڪيو، مٺي۾ روزانو 20 لک گيلن خاري پاڻي کي مٺو ڪيو پيو وڃي جيڪو ايشيا ۾ سڀ کان وڏو آر او پلانٽ آهي، هن منصوبي کانپوءِ ٿر ۾ هاڻ ڪڏهن به ڏڪار واري صورتحال پيدا نه ٿيندي، هن چيو ته ڪاري سون جي دولت سان مالا مال علائقو آهي جتي بجلي پيدا ٿي دنيا جا ماڻهو اتي سلام پيش ڪرڻ ايندا، وڏي وزير ڪراچي پريس ڪلب جي سڄي ڄمار ميمبرشپ ملڻ تي خوشي جو اظهار ڪندي چيو ته هي منهنجي لاءِ اعزاز آهي، عهدا اچڻا وڃڻا آهن، سڀاڻي عهدو نه هوندو ته مان به ڪراچي جي صحافين سان هتي ويهندس، ڪلب جي عهديدارن سنڌ جي وڏي وزير ۽ ٻين مهمانن کي روايتي سنڌي اجرڪ جا تحفا پيش ڪيا.

 

سڄي سنڌ جا دورا ڪرڻ جو اعلان، ”صاف سرسبز سنڌ، پرامن سنڌ“ جو سلسلو هاڻ رڪجڻ وارو ناهي: شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته ”صاف سرسبز سنڌ، پرامن سنڌ“ جو سلسلو هاڻ رڪجڻ وارو ناهي. ڪراچي سان گڏ جلد ئي اندرين سنڌ جي سمورن ضلعن جا دورا ڪندس ۽ هن صوبي کي صاف ۽ شفاف ۽ سرسبز بڻائي ساهه کڻندس. ڪم چور ملازم هاڻ ڪم جي عادت وجهي ڇڏين ڇو ته هاڻ ڪنهن به کاتي ۾ ڪوبه ڪم چور يا گوسڙو ملازم باقي نه رهندو. سول سوسائٽي، سياسي ۽ مذهبي جماعتون ۽ سمورن شعبن سان تعلق رکندڙ هن مهم کي اوون ڪن ۽ ان جو ڪريڊٽ مونکي يا منهنجي پارٽي کي ڏيڻ بجاءِ پاڻ کڻن. اهڙن خيالن جو اظهار هن قائداعظم جي مزار جي آسپاس صفائي مهم دوران ٻهارو ڏيڻ  ۽ بعد ۾ اتي وڻڪاري جي مهم تحت ٻوٽو لڳائڻ کان پوءِ ميڊيا سان ڳالهائيندي ڪيو. ان موقعي تي ڪمشنر ڪراچي شعيب احمد صديقي، ميونسپل ڪمشنر ڪراچي مسعود عالم، ايڊمنسٽريٽر ميونسپل ڪمشنر ايسٽ سميت ٻيا اعليٰ آفيسر به ساڻس گڏ هئا. شرجيل انعام ميمڻ ان موقعي تي دائودي وهراه برادري جي هڪ وفد جيڪا قائداعظم جي مزار جي آسپاس ۾ صفائي جي ڪمن ۾ مصروف هئي، ان سان به ملاقات ڪئي ۽ ان جي جذبي کي ساراهيو. ان موقعي تي ميڊيا سان ڳالهائيندي شرجيل انعام ميمڻ چيو ته جيڪڏهن اسان جي چوڻ کانسواءِ ئي ملازم ڪم ڪن ۽ شهر ۽ صوبي کي صاف سٿرو رکن ته اڄ اسان کي اهڙي ريت رستن تي نه اچڻو پوي ها ۽ نه ئي ميڊيا کي اهو ٻڌي ڪجهه ڪرڻو پوي ها، پر دير آئي درست آئي جي مثال تي اسان اڄ هڪ ڀيرو انهن سمورن ڪم چور ۽ گوسڙو ملازمن کي چئون ٿا ته هو هاڻ ڪم ڪرڻ جي عادت وجهن ڇو ته  هاڻ نه ته اها مهم رڪبي ۽ نه ئي اسان جا دورا رڪبا  اسان صوبي جي هڪ هڪ ضلعي، شهر ۽ ڳوٺ ۾ وينداسين ۽ جيستائين هن صوبي کي سرسبز نه ٿا بڻايون ۽ هتي صفائي کي مڪمل نٿا ڪرايون هي مهم جاري رهندي. هن چيو ته اڄ هن مهم ۾ سول سوسائٽي، شاگرد، استاد، تاجر ۽ صنتعڪار برادري ۽ سمورن شعبن سان تعلق رکندڙن کي شرڪت جي دعوت ڏيون ٿا ته هو ان مهم کي اوون ڪن ۽ ان جو ڪريڊٽ مونکي، بلديات ۽ سنڌ حڪومت يا پيپلز پارٽي کي ڏيڻ بجاءِ پاڻ کڻن ۽ عوام ۾ صفائي جي شعور کي اجاگر ڪن. هڪ سوال جي جواب ۾ هن چيو ته هي مهم صرف صفائي يا سرسبز سنڌ بڻائڻ سان گڏوگڏ قبضن جي خاتمي جي مهم آهي ۽ ان تي به تيزي سان ڪم جاري آهي.

 

ملڪ جي ترقي لاءِ سڀني کي گڏجي ڪم ڪرڻو پوندو: خواجه آصف

اسلام آباد (بيورو) خيبرپختونخواهه جي وڏي وزير پرويز خٽڪ، ناڻي واري وفاقي وزير اسحاق ڊار سان ملاقات ڪري مختلف معاملن سان ڳالهيون ڪيون آهن، پرويز خٽڪ چيو آهي ته هـُن ڪڏهن به وفاق جو بائيڪاٽ ناهي ڪيو، ڌانڌلين جي جاچ لاءِ جڊيشل ڪميشن ٺهي وڃي ته معاملا حل ٿي  ويندا. اسلام آباد ۾ خيبرپختونخواهه جي وڏي وزير پرويز خٽڪ، ناڻي واري وفاقي وزير اسحاق ڊار سان ملاقات ڪئي، ان موقعي تي وفاقي وزير خواجه آصف ۽ شاهد خاڪان عباسي پڻ موجود هئا. ملاقات دوران ترقياتي منصوبن، صوبي اندر گيس ۽ بجلي جي چوري روڪڻ سميت مختلف معاملن تي ڳالهيون ڪيون ويون. ملاقات کانپوءِ ميڊيا سان ڳالهائيندي وفاقي وزير خواجه آصف چيو ته خيبرپختونخواهه جي قربانين جو اعتراف آهي، ملڪ جي ترقي لاءِ سڀني کي گڏجي ڪم ڪرڻو پوندو. هن چيو ته پرويز خٽڪ سان ملاقات مثبت رهي، بجلي ۽ گيس جي چوري روڪڻ واري معاملن تي تفصيلي ڳالهيون ڪيون ويون. ان موقعي تي ڳالهائيندي خيبرپختونخواهه جي وڏي وزير پرويز خٽڪ چيو ته هـُن ڪڏهن به وفاق جو بائيڪاٽ ناهي ڪيو، ڌانڌلين جي جاچ لاءِ جڊيشل ڪميشن ٺهي وڃي ته معاملا حل ٿي  ويندا.

 

نبيل گبول پاران قومي اسيمبلي ۽ ايم ڪيو ايم جي ميمبرشپ تان استعيفيٰ ڏيڻ جو اعلان

ڪراچي (اسٽاف رپورٽر) ايم ڪيو ايم اڳواڻ نبيل گبول قومي اسيمبلي جي ميمبرشپ تان استعيفيٰ ڏئي ڇڏي هن چيو ته ايم ڪيو ايم به ڇڏي ڏني  آئنده ڪهڙي پارٽي کي جوائن ڪندس ان بابت ڪجهه نه ٿو چئي سگهان، ايم ڪيو ايم جي اڳواڻ نبيل گبول ميڊيا سان ڳالهائيندي چيو ته ڪهڙي پارٽي جوائن ڪندس هينئر ڪجهه نه ٿو چئي سگهان، ڪجهه ڏينهن آرام ڪندس، هن چيو ته اسپيڪر آفيس ۾ استعيفيٰ جمع ڪرائي ڇڏي آهي سياست کي الوداع چوڻ هو ڪوبه ارادو ناهي، آئنده جي حڪمت عملي بابت ڪجهه ڏينهن ۾ پريس ڪانفرنس ڪندس، نبيل گبول اين اي 246 مان قومي اسيمبلي جو ميمبر چونڊيو هو نبيل گبول ايم ڪيو ايم کان اڳ پيپلز پارٽي جو به قومي اسيمبلي ميمبر رهي چڪو آهي.