تازيون خبرون

Daily Archives: February 14, 2015

پشاور جي امام بارگاهه مسجد ۾ خودڪش ڌماڪو، فائرنگ، 22 نمازي شهيد

پشاور (بيورو) دهشتگردن، پشاور کي هڪ ڀيرو وري رت ۾ وهنجاري ڇڏيو آهي، حيات آباد واري علائقي ۾ اماميه مسجد ۽ امام بارگاهه اندر جمعي نماز دوران آپگهاتي بم ڌماڪن ۽ فائرنگ جي نتيجي ۾ 22نمازي شهيد ٿي ويا ۽ 45 کان وڌيڪ زخمي ٿي پيا، حملي جي ذميواري تحريڪ طالبان قبولي ورتي. پشاور جي علائقي حيات آباد فيز پنج ۾ قائم اماميه مسجد ۽ امام بارگاهه ۾ جمعي نماز دوران 6 دهشتگردن اندر گهڙي 3 ڌماڪا ڪرڻ بعد فائرنگ شروع ڪري ڏني. حملي جي نتيجي ۾ 22نمازي شهيد ٿي ويا ۽ 45 کان وڌيڪ زخمي ٿي پيا، جڏهن ته واقعي بعد فورسز علائقي کي گهيري هيٺ آڻي ورتو ۽ پاڪ فوج جي جوانن کي به طلب ڪيو ويو. سڪيورٽي فورسز ۽ پاڪ فوج جا جوان مختلف هنڌن تي پوزيشنون سنڀالي بيٺل آهن. ڌماڪن کانپوءِ امام بارگاهه ٻاهران بيٺل گاڏين کي باهه وڪوڙي وئي،جڏهن ته ماڻهن ۾ ڀاڄ پئجي وئي. آپگهاتي حملي ۽ فائرنگ جي نتيجي ۾ شهيد ٿي ويل 22نمازين جا لاش ۽ زخمين کي امدادي رضاڪارن کڻائي حيات آباد ميڊيڪل ڪمپليڪس سميت ٻين اسپتالن ڏانهن منتقل ڪيو. اسپتال انتظاميا موجب زخمين مان ڪيترن ئي ماڻهن جي حالت ڳڻتي جوڳي آهي،جنهنڪري جاني نقصان ۾ واڌ جو خدشو آهي. اسپتال انتظاميه ايمرجنسي لاڳو ڪندي عوام کي زخمين لاءِ رت جو عطيو ڏيڻ جي اپيل پڻ ڪئي وئي آهي. حملي جي اکين ڏٺن شاهدن موجب ايف سي جون ورديون پهريل 6 دهشتگردن جمعي نماز دوران مسجد اندر داخل ٿي پهرين 2 دستي بم اڇلايا،جنهن بعد هڪ دهشتگرد پاڻ کي ڌماڪي سان اڏائي ڇڏيو. اکين ڏٺن شاهدن ميڊيا کي وڌيڪ ٻڌايو ته مسجد ۽ امام بارگاهه ۾ ڌماڪي وقت ڏيڍ سئو جي لڳ ڀڳ ماڻهو موجود هئا. مختلف اسپتالن جي انتظاميا ۽ ڪي پي ڪي جي اطلاعات واري وزير مشتاق غني موجب ڌماڪن ۽ فائرنگ جي نتيجي ۾ 22نمازي شهيد ٿيڻ ۽ 45 کان وڌيڪ ماڻهن جي زخمي ٿيڻ جي تصديق ڪئي. ٻئي طرف پشاور ۾ موجوده پِي ٽِي آءِ چيئرمين عمران خان ۽ وڏي وزير پرويز خٽڪ اطلاع ملڻ تي بنا دير واقعي واري هنڌ پهتا ته سڪيورٽي اهلڪارن اڳتي وڃڻ کان روڪي ورتو. آخري اطلاعن تائين سڪيورٽي فورسز امام بارگاهه تي حملي بعد حيات آباد واري علائقي ۾ سرچ آپريشن شروع ڪري ڇڏيو آهي، جنهن دوران ڪجهه گرفتاريون پڻ ڪيون ويون آهن. هوڏانهن پابندي مڙهيل تنظيم تحريڪ طالبان پاڪستان حملي جي ذميواري قبولي ورتي آهي. ٻئي طرف مجلس وحدت المسلمين، اماميه رابطا ڪائونسل ۽ جعفريه الائنس پاران ڪي پي ڪي سميت سڄي ملڪ ۾ 3 ڏينهن سوڳ جو اعلان ڪيو آهي.

 

نريندر مودي جو نواز شريف سان ٽيليفونڪ رابطو, ڀارت جو پرڏيهي سيڪريٽري پاڪستان موڪلڻ جو اعلان

نئين دهلي/اسلام آباد (م.ڊ)ڀارتي وزيراعظم نريندر مودي وزيراعظم نواز شريف کي ٽيليفون ڪري پاڪ ڀارت ڳالهيون ٻيهر شروع ڪرڻ تي راضپو ظاهر ڪيو آهي، نريندر مودي چيو آهي ته ڀارتي پرڏيهي سيڪريٽري جلد پاڪستان جو دورو ڪرڻ چاهي ٿو، وزيراعظم نواز شريف چيو آهي ته پاڪستان ڀارتي پرڏيهي سيڪريٽري جي دوري جي آجيان ڪندو. ڀارتي وزيراعظم نريندر مودي پاڪستاني هم منصب کي ٽيليفون ڪري پاڪ ڀارت لاڳاپن ۽ خطي جي مجموعي صورتحال تي خيالن جي ڏي وٺ ڪئي، ڀارتي وزيراعظم جو چوڻ آهي ته ڪرڪيٽ سڄي خطي کي گڏائڻ جو سبب بڻجي ٿي. وزيراعظم هائوس جي ترجمان جو چوڻ آهي ته ڀارتي وزيراعظم نريندر مودي پاڪستاني هم منصب نواز شريف کي ٽيليفون ڪئي ۽ خطي جي مجموعي صورتحال تي خيالن جي ڏي وٺ ڪئي. ڀارتي وزيراعظم نريندر مودي وزيراعظم نواز شريف سان 10 منٽن جي ٽيليفونڪ ڳالهه ٻولهه دوران پاڪ ڀارت ڳالهين ۽ ڪرڪيٽ ورلڊ ڪپ ۾ پاڪ ڀارت مئچ تي به خيالن جي ڏي وٺ ڪئي. ڀارتي وزيراعظم چيو ته ڀارتي پرڏيهي سيڪريٽري جلد سارڪ ملڪن جو دورو ڪندو هو پاڪستان جو به دورو ڪرڻ چاهي ٿو. نرريندر مودي سارڪ ملڪن جي سربراهن لاءِ به نيڪ خواهشن جو اظهار ڪيو ۽ چيو ته ڪرڪيٽ خطي کي گڏائڻ جو سبب بڻجي ٿي، ڪرڪيٽ ذريعي سارڪ ملڪن جو عوام هڪ ٻئي سان جڙيل آهي. وزيراعظم نواز شريف ڀارتي هم منصب سان ڳالهائيندي چيو ته پاڪستان ڀارت جي پرڏيهي سيڪريٽري جي دوري جي آجيان ڪندو. ٻئي طرف ڀارت آخرڪار پاڪستان جي موقف سامهون گوڏا کوڙي ڇڏيا ۽ پنهنجي پرڏيهي سيڪريٽري کي پاڪستان موڪلڻ  تي راضپو ظاهر ڪري ڇڏيو ڀارتي ميڊيا جي ذريعن جو چوڻ آهي ته ڀارتي پرڏيهي سيڪريٽري جي شنڪر جلد پاڪستان جو دورو ڪندو ۽ پاڪستاني اختيارين سان پنهنجي دوري دوران خطي جي سيڪيورٽي ۽ ٻه طرفن معاملن تي خيالن جي ڏي وٺ ڪندو.

 

نواز ليگ لسانيت، صوبائيت يا فرقيواريت واري سياست ناهي ڪندي: پرويز رشيد

اسلام آباد (بيورو) سـُڌ سماءَ واري وفاقي وزير پرويز رشيد چيو آهي ته سينيٽ چونڊن ۾ ڪنهن به صوبي سان زيادتي ناهي ڪئي وئي، ن ليگ لسانيت، صوبائيت يا فرقيواريت واري سياست ناهي ڪندي، پارلياماني تجربو رکندڙن کي سينيٽ ۾ اچڻ جو حق آهي. لاهور ۾ اليڪشن ڪميشن آفيس ۾ نامزد اميدوارن سان گڏ نامزدگي ڪاغذ جمع ڪرائڻ کانپوءِ ميڊيا سان ڳالهائيندي پرويز رشيد چيو ته پالياماني تجربو رکندڙن کي سينيٽ جي ٽڪيٽ ڏني آهي، اهل ماڻهن جو ايوان ۾ اچڻ حق آهي.هن چيو ته ن ليگ جي اميدوارن ۾ ڪوبه پيراشوٽ ذريعي ناهي آيو، سينيٽ ۾ چئني صوبن جي نمائندگي ٿيندي  آهي. پرويز رشيد چيو ته سينيٽ چونڊن ۾ ڪنهن به صوبي جي ڪارڪن سان زيادتي ناهي ڪئي وئي، اهليت ۽ ميرٽ جي بنياد تي اميدوارن کي ٽڪيٽون جاري ڪيون ويون آهن. هڪ سوال جي جواب ۾ پرويز رشيد چيو ته پنجاب مان هٿ آيل سون جا ذخيرا رڳو هڪ صوبي جا نه پر پاڪستان جي ملڪيت آهن، جنهن بابت وزيراعظم نواز شريف ۽ وڏو وزير شهباز شريف به چئي چڪا آهن. چوڌري سرور ۽ بئريسٽر سلطان محمود جي پي ٽي آءِ ۾ شموليت واري سوال جي جواب ۾ عمران خان حڪومتن جا مزا وٺندڙن کي پنهنجي پارٽي ۾ شامل ڪري رهيو آهي، پر تنقيد وري ن ليگ مٿان ڪندو آهي. وفاقي وزير پرويز رشيد جو چوڻ هو ته عمرا خان رڳو الزام هڻڻ ڄاڻي ٿو، جيڪي تڪ کوليا ويا آهن، انهن مان رڳو شينهن نڪتا.

 

صدر، وزيراعظم ۽ سياسي پارٽين جي سربراهن پاران پشاور ڌماڪي جي مذمت

اسلام آباد /ڪراچي (بيورو/اسٽاف رپورٽر) وزيراعظم نواز شريف، صدر ممنون حسين، اڳوڻي صدر آصف علي زرداري، پي ٽي آءِ سربراهه عمران خان ۽ ٻين سياسي اڳواڻن پشاور بم حملن جي سخت لفظن ۾ مذمت ڪئي آهي. صدر ممنون حسين ڌماڪن جي سخت لفظن ۾ مذمت ڪندي چيو ته پشاور ڌماڪن جي جيتري مذمت ڪجي گهٽ آهي. ممنون حسين چيو ته دهشتگردن کان بيگناهه ماڻهن جي رت جي ڦڙي ڦڙي جو حساب ورتو ويندو. صدر پاڪستان هدايت جاري ڪندي چيو ته بم حملن ۾ زخمي ٿيلن کي بهتر طبي سهولتون فراهم ڪيون وڃن. وزيراعظم ميان نواز شريف، اڳوڻي صدر آصف علي زرداري ۽ تحريڪ انصاف جي چيئرمين عمران خان به دهشتگردن جي قهري ڪارروائي جي مذمت ڪئي آهي. وفاقي گهرو وزير چوڌري نثار، پرويز رشيد ۽ ڪي پي ڪي جي وڏي وزير پرويز خٽڪ به ڌماڪن جي سخت لفظن ۾ مذمت ڪئي. ايم ڪيو ايم سربراهه الطاف حسين، جماعت اسلامي جي امير ۽ سنڌ جي وڏي وزير سيد قائم علي شاهه پڻ دهشتگرد حملن جي مذمت ڪئي. ٻئي پاسي مجلس وحدت المسلمين، اماميه رابطا ڪائونسل ۽ جعفريه الائنس پاران ڪي پي ڪي سميت سڄي ملڪ ۾ 3 ڏينهن سوڳ جو اعلان ڪيو آهي.

 

واڌو ٽيڪس تي قومي اسيمبلي مان اپوزيشن جو ٻيهر واڪ آئوٽ

اسلام آباد (بيورو) قومي اسيمبلي جو اجلاس ڊپٽي اسپيڪر مرتضيٰ جاويد جي صدارت هيٺ ٿيو پيپلز پارٽي، ايم ڪيو ايم ۽ ٻين اپوزيشن پارٽين پيٽروليم مصنوعات تي واڌو ٽيسڪن خلاف اڄ به واڪ آئوٽ ڪري ڇڏيو پيپلز پارٽي ۽ ايم ڪيو ايم جي ميمبرن چيو ته صرف اسيمبلي ۾ وضاحت ڪافي ناهي، اضافي ٽيڪس گهٽ ڪيا وڃن اپوزيشن ميمبرن چيو ته هو سمجهن ٿا ته حڪومت ٽيڪس گهٽ ڪندي جڏهن ته ايئن نه ڪيو ويو، قومي اسيمبلي جي اجلاس ۾ پ پ، ايم ڪيو ايم ۽ جماعت اسلامي اڄ به واڪ آئوٽ ڪيو، مخالف ڌر چيو آهي ته تيل جي اگهن تي ٽيڪس واپس وٺڻ تائين احتجاج جاري رکيو ويندو. ڊپٽي اسپيڪر مرتضيٰ جاويد عباسي جي صدارت هيٺ قومي اسيمبلي جي اجلاس ۾ گڏيل مخالف ڌر پئٽروليم شين تي لاڳايل اضافي ٽيڪس خلاف اڄ به احتجاج ڪيو. پيپلز پارٽي، ايم ڪيو ايم، جماعت اسلامي ۽ ٻين پارٽين جي ميمبرن جي ايس ٽي ۾ واڌ خلاف اجلاس جو بائڪاٽ ڪيو. پ پ ميمبر نفيسه شاهه چيو آهي ته تيل جي اگهن تي اضافي ٽيڪس واپس وٺڻ تائين احتجاج جاري رکيو ويندو. ايم ڪيو ايم اڳواڻ رشيد گوڊيل چيو آهي ته غريب عوام پنهنجا گڙدا وڪڻڻ تي مجبور آهي پر حڪمران عوام تي ٽيڪس مٿان ٽيڪس مڙهي رهيا آهن. بعد ۾ ڊپٽي اسپيڪر ڪورم جي نشاندهي تي قومي اسيمبلي جو اجلاس اڻ ڄاڻايل مدي تائين ملتوي ڪري ڇڏيو. هوڏانهن ورلڊ ڪپ تي تزڪرو قومي اسيمبلي ۾ به ٿيڻ لڳو، ايوان ۾ قومي ٽيم ۽ ان جي ڪارڪردگي تي بحث ڪيو ويو ايم اين اي شڪيلا لقمان چيو ته رانديگرن ۾ ڊسيپلين ناهي رياض پيرزاده جو چوڻ هو ته 8 رانديگرن کي هوٽل دير سان پهچڻ تي ڏنڊ وڌو ويو ثريا اصغر بحث ۾ حصو وٺندي چيو ته رانديگر مسلسل انجري جو شڪار ٿي رهيا آهن اجلاس جاري هو ته جماعت اسلامي جي شير اڪبر ڪورم جي نشاندهي ڪري ڇڏي ڊپٽي اسپيڪر ڪورم پورو نه هجڻ تي اجلاس جي ڪارروائي اڻڄاتل مدي تائين ملتوي ڪري ڇڏي.

 

اليڪشن ڪميشن پاران سينيٽ چونڊن ۾ حصو وٺندڙ اميدوارن جي ڇنڊڇاڻ جو فيصلو، مختلف کاتن کي خط لکيو ويو

اسلام آباد (بيورو) اليڪشن ڪميشن 5 مارچ تي ٿيندڙ سينيٽ جي چونڊن ۾ حصو وٺندڙ اميدوارن جي آئين جي آرٽيڪل 52 ۽ 63 تي پورو لهڻ جي حوالي سان نادرا، احتساب بيورو، ايف بي آر سميت 10 مختلف ادارن مان ڇنڊڇاڻ ڪرائڻ جو فيصلو ڪيو آهي. پاڪستان جي آئين تحت پاڪستان قائم ٿيڻ کانپوءِ نظريه پاڪستان مخالف ڪنهن سرگرمي يا ملڪ جي سلامتي جي خلاف ڪنهن ڪارروائي ۾ ملوث ٿيندڙ شخص سينيٽ ميمبر چونڊجڻ جي لاءِ اهل نه آهي. اليڪشن ڪميشن پاران ڪالهه جمعي ڏينهن نادرا، اسٽيٽ بئڪ آف پاڪستان، پيپڪو، ناڻي واري وزارت، پيٽروليم واري وزارت، پي ٽي سي ايل، نيب، گهرو وزارت، ايف بي آر، اسٽيبلشمينٽ ڊويزن ۽ پاڻي ۽ بجلي واري وزارت جي نالي خط موڪليا ويا جن ۾ انهن وزارتن ۽ ادارن کي چيو ويو آهي ته هو سينيٽ جي چونڊن ۾ حصو وٺندڙ اميدوارن جي نامزدگي ڪاغذن جي ڇنڊڇاڻ ۾ مدد جي لاءِ پنهنجي پنهنجي ادارن ۾ فوڪل پرسنز جي فوري نامزدگي ڪن جڏهن ته اليڪشن ڪميشن رٽرننگ آفيسرن پاران اميدوارن جي ملندڙ حتمي فهرست انهن سمورن ادارن وٽ ڇنڊڇاڻ جي لاءِ موڪليندا. اهي ادارا چونڊن ۾ حصو وٺندڙ اميدوار، انهن جي والدين، گهرواريءَ ۽ ٻارن جا تفصيل فراهم ڪندا جڏهن ته نادرا پاران اميدوار جي ڪمپيوٽرائيزڊ قومي سڃاڻپ ڪارڊ جي تصديق جڏهن ته عام سڃاڻپ ڪارڊ جي ڪمپيوٽرائيزڊ سڃاڻپ ڪارڊ ۾ تبديلي، بجلي ۽ گئس جا بلز، ايف بي آر کان ٽيڪسن جي ادائيگي، گهرو وزارت کان ڪنهن سنگين ڏوهه ۾ ملوث هجڻ بابت معلومات ۽ نيب کان به تصديق ڪرائي ويندي. اليڪشن ڪميشن انهن ادارن کان اها معلومات واپس وٺي رٽرننگ آفيسرن کي موڪليندا، 19 ۽ 20 فيبروري تي اميدوارن جي موجودگي ۾ ڇنڊڇاڻ جي موقعي تي انهن کان ان حوالي سان پڇيو ويندو. لاهور هاءِ ڪورٽ جي فيصلي جي روشني ۾ اليڪشن ڪميشن سينيٽ چونڊن ۾ حصو وٺندڙ اميدوارن جي نامزدگي ڪاغذن جي پاڪستان جي آئين جي آرٽيڪل 62 ۽ 63 تحت ڇنڊڇاڻ ڪرڻ جو فيصلو ڪيو آهي. آئين جي آرٽيڪل 63 اي تحت اهڙو اميدوار جنهن جو ذهني توازن ٺيڪ نه هجي، پاڪستان جو شهري نه هجي ۽ هن ڪنهن ٻئي ملڪ جي شهريت حاصل ڪئي هجي، هو سرڪاري ناڻي مان پگهار وٺندڙ ملازم هجي، هو آرٽيڪل 14 بي تحت پاڪستان سٽيزن شپ ايڪٽ 1951ع تحت وقتي طور تي نااهل قرار ڏنو ويو هجي جڏهن ته نظريه پاڪستان جي خلاف راءِ رکڻ تي ڪنهن عدالت کان سزا يافته هجي، پاڪستان جي سرڪاري ملازمت مان ڪنهن بنياد تي برطرف ڪيو ويو هجي، سينيٽ جي چونڊن ۾ حصو وٺڻ جو اهل نه آهي. آرٽيڪل 62 ۽ 63 تحت ڪو به اهڙو اميدوار جيڪو سٺو ڪردار رکندڙ نه هجي ۽ عام طور تي اسلامي حڪمن کان انحراف ۾ مشهور هجي، هو اسلامي تعليم جي ڪا گهڻي ڄاڻ نه رکندو هجي ۽ اسلام جي مقرر ڪيل فرضن جو پابند ايستائين جو هو ڪبيره گناهن کان به نه مڙندو هجي، چونڊن ۾ حصو وٺڻ جي لاءِ نااهل تصور هوندو. پاڪستان جي آئين جي آرٽيڪل 62 تحت 35 سال کان وڌيڪ عمر جو شهري سينيٽ چونڊن جي لاءِ اهل آهي.

 

عمران خان تنقيد بجاءِ خيبرپختونخواهه جي عوام جي تحفظ کي يقيني بڻائي: آصف زرداري

اسلام آباد (بيورو) سينيٽ اليڪشن کي نظر ۾ رکندي پيپلز پارٽي جو شريڪ چيئرمين آصف علي زرداري اسلام آباد پهچي ويو آهي ذريعن جو چوڻ آهي ته آصف زرداري وفاقي گادي واري شهر ۾ رهائش دوران سينيٽ چونڊن بابت  معاملن تي توجهه رکندو، پيپلز پارٽي جي اڳواڻن کي ان جي اچڻ جي اطلاع ڏني وئي آهي. پشاور ڌماڪي جي مذمت ڪندي اڳوڻي صدر آصف علي زرداري چيو آهي ته خودڪش حملي ۾ قيمتي جانين جي ضايع ٿيڻ تي افسوس آهي، عمران خان تنقيد بجاءِ خيبرپختونخواهه جي عوام جي تحفظ کي يقيني بڻائي.

 

پشاور خودڪش حملو، شروعاتي رپورٽ وفاقي گهرو وزير کي ملي وئي

اسلام آباد(بيورو) گهرو وزارت کي خيبرپختونخواهه پوليس طرفان تيار ڪيل پشاور امام بارگاهه ڌماڪن جي شروعاتي رپورٽ ملي وئي آهي پشاور پوليس ۽ بم ڊسپوزل اسڪواڊ طرفان ڏنل شروعاتي رپورٽ ۾ چيو ويو آهي ته اماميه مسجد حيات آباد ۾ 4 خودڪش  حملا آور داخل ٿيا 3 حملا آورن خودڪش حملو ڪيو چوٿون حملا آور گولين جو نشانو بنيو رپورٽ مطابق چوٿين حملا آور جي خودڪش جيڪٽ نه ڦاٽي جنهن کانپوءِ بم ڊسپوزل ٽيم ان کي ناڪاره بڻايو رپورٽ ۾ گهرو  وزير کي ٻڌايو ويو ته واقعي واري جاءِ تان 3 حملا آورن جون ٽنگون، هڪ حملي آور جو لاش ۽ 3 ڪار آمد هينڊ گرينڊ هٿ ڪيا ويا جن کي بروقت ناڪاره بڻايو ويو.

 

ڪي پي ڪي ۾ سينيٽ چونڊن ۾ اتحاد لاءِ مختلف پارٽين سان رابطا جاري آهن: خواجه سعد رفيق

اسلام آباد (بيورو) ريلوي واري وفاقي وزير خواجه سعد رفيق چيو آهي ته خيبرپختونخواهه ۾ ڪي پي ڪي ۾ سينيٽ چونڊن ۾ اتحاد لاءِ مختلف پارٽين سان رابطا جاري آهن، هارس ٽريڊننگ ڪندڙن ميمبرن خلاف قانون حرڪت ۾ ايندو. اسلام آباد ۾ پارليامينٽ هائوس ٻاهران ميڊيا سان ڳالهائيندي سعد رفيق چيو ته ڪي پي ڪي ۾ هڪ شخص هارس ٽريڊنگ جي ڪوشش ڪري رهيو آهي. هن چيو ته مسلم ليگ ن فيصلو ڪيو آهي ته خيبرپختونخواهه ۾ پي ٽي آءِ جي فاروڊ بلاڪ سان رابطو نه ڪيو ويندو. سعد رفيق چيو ته پيپلزپارٽي ۽ شيرپائو گروپ سان رابطا جاري آهن، پارٽي جي ڪنهن ميمبر هارس ٽريڊنگ ڪئي ته قانون حرڪت ۾ ايندو.

 

 

بلديه سانحي جي رپورٽ مان ثابت ٿي ويو ته مزدور حادثي ۾ فوت نه ٿيا پر انهن کي قتل ڪيو ويو: سراج الحق

پشاور (بيورو) جماعت اسلامي جي سربراهه سراج الحق چيو آهي ته بلديه سانحي جي رپورٽ مان ثابت ٿي ويو آهي ته مزدور حادثي ۾ فوت نه ٿيا پر انهن کي قتل ڪيو ويو، جي آءِ ٽي رپورٽ کان پوءِ هاڻي عدليه ۽ حڪومت جو امتحان آهي. سينيٽ چونڊن لاءِ نامزدگي فارم جمع ڪرائڻ کانپوءِ پشاور ۾ صحافين سان ڳالهائيندي جماعت اسلامي جي امير چيو ته پشاور سانحي قوم کي متحد ڪيو آهي پر بلديه ٽائون سانحو به ان کان گهٽ نه هو. هن چيو ته 259 پورهيتن کي زندهه ساڙي قتل ڪيو ويو پر افسوس ته پيپلز پارٽي انهي سانحي تي خاموش رهي. سراج الحق چيو ته وزير اعظم گجرن، ميون ۽ ڀاڄين جا اگهه پڇائيندو پيو وتي پر هتي ادارن جو ڍينگو ڍيري لڳو پيو آهي پر ڪو به انهن جو حال پڇڻ وارو نه آهي. هن چيو ته فرانس ۾ 9 ماڻهن کي قتل ڪيو ويو ته سڄي ملڪ جو عوام ۽ 40 ملڪن جا سربراهه هڪ هنڌ گڏ ٿيا پر هتي ننڍيون ننڍيون قيامتون روز ڪڙڪن ٿيون پر ڪو پرسانِ حال نه آهي. سراج الحق جو چوڻ هو ته بلديه ٽائون سانحي جي رپورٽ اچڻ کانپوءِ اهو ثابت ٿي ويو آهي ته اهو حادثو نه قتل هو ۽ ڀتي نه ڏيڻ تان مزدورن کي جيئرو ساڙي ماريو ويو، ايڏي وڏي ظلم تي خاموشي سمجهه ۾ نه ايندڙ آهي. هن چيو ته جهڙي نموني سان غريبن کي ملڪ ۾ ماريو پيو وڃي، ان مان لڳي رهيو آهي ته ملڪ ۾ غريبن جي خون جي ڪا به قيمت نه آهي.