تازيون خبرون

Daily Archives: February 12, 2015

دهشتگردي ۽ توانائي بحران ملڪ جا سڀ کان وڏا مسئلا آهن: نواز شريف

چنيوٽ(م.ڊ) زيراعظم نواز شريف چيو آهي ته  دهشتگردي ۽ توانائي بحران ملڪ جا سڀ کان وڏا مسئلا آهن، جن کي ايندڙ ٽن سالن اندر حل ڪيو ويندو. چينيوٽ ۾ معدني ذخيرن جي هٿ اچڻ واري تقريب کي خطاب ڪندي وزيراعظم چيو ته ڪاش ماضي ۾ دهشتگردي خلاف اثرائتو ڪم ٿئي ته عوام کي ههڙا ڏينهن ڏسڻا نه پون ها. هن چيو ته ملڪ جو سڀ کان وڏو مسئلو دهشتگردي آهي، جنهن کي حل ڪرڻ لاءِ ڪوششون جاري آهن ۽ قانون لاڳو ڪندڙ ادارن جو ان ڏس ۾ بنيادي ڪردار آهي. نواز شريف چيو ته ملڪ جو ٻيو وڏو مسئلو توانائي بحران آهي، جنهن تي ضابطي لاءِ ايران ۽ چائنا سميت ٻين ملڪن کان مدد ورتي پئي وڃي. پئٽروليم شين جي قيمتن ۾ گهٽتائي بعد عوام کي فائدو ۽ حڪومت کي نقصان ٿيو آهي، پر وفاقي سرڪار عوام کي رليف ڏيڻ لاءِ هر ممڪن قدم کڻندي. چينيوٽ ۾ معدني ذخيرا هٿ اچڻ تي وزيراعظم قوم کي مبار ڪباد ڏيندي اميد ظاهر ڪئي ته هٿ آيل ذخيرا ملڪ جي ترقي ۽ خوشحالي لاءِ لاڀائتا ثابت ٿيندا. ان کان اڳ چنيوٽ پهچڻ تي پنجاب جي وڏي وزير شهباز شريف وزيراعظم نواز شريف جي آجيان ڪئي. ان موقعي تي وزيراعظم نواز شريف کي ناليواري سياستدان ڊاڪٽر ثمر مبارڪ مند پاران بريفنگ ڏني وئي، جڏهن ته منصوبي تي ڪم ڪندڙ چيني ڪمپني جي وفد پڻ وزيراعظم سان ملاقات ڪئي. وزيراعظم کي بريفنگ ڏني منصوبي تي ڪم 2 جولاءِ 2014 ڪم شروع ڪيو ويو، جنهن ۾ چين ۽ جرمني جون ڪمپنيون حصو وٺي رهيون آهن. وزيراعظم کي ٻڌايو ويو ته هٿ آيل ذخيرا ٽيسٽ لاءِ سوئيٽزلينڊ جي ليبارٽري موڪليا ويا، جنهن به تصديق ڪئي.

 

امام بارگاهه تي حملو ڪندڙ بچي نه سگهندا، سندن قبر تائين پيڇو ڪنداسين: وڏو وزير

شڪارپور(ڊ.ر) سنڌ جي وڏي وزير سيد قائم علي شاهه شڪارپور جي امام بارگاهه پهچي بم ڌماڪي ۾ شهيد ٿي ويلن جي وارثن ۽ شهداءَ ڪميٽي سان تعزيت ڪئي. ان موقعي تي صحافين سان ڳالهائيندي وزير اعليٰ چيو ته هتي شڪارپور سانحو سنڌ جي تاريخ جو وڏو افسوسناڪ واقعو آهي جنهن جو سنڌ حڪومت پهرين ڏينهن ئي سخت نوٽيس ورتو هو ۽ زخمين کي سي 130 جهاز ذريعي ڪراچي جي آغا خان اسپتال منتقل ڪيو، جن جو مفت علاج ڪيو پيو وڃي جنهن مان زخمين جا وارث پڻ مطمئن آهن. آءُ پهرين ڏينهن رات جو دير سان امام بارگاهه ۾ آيو هئم. وزير اعليٰ سنڌ چيو ته ڊي آءِ جي لاڙڪاڻو جي سربراهي ۾ جاچ ڪاميٽي جوڙي وئي آهي جيڪا جلد جاچ مڪمل ڪري دهشتگردن تائين پهچندي ۽ انهن کي قانون جي ڪٽهڙي ۾ آندو ويندو. هن چيو ته آئين ۾ ترميم ڪري فوجي عدالتون قائم ڪيو ويون آهن جتي مذهبي دهشتگردي جا ڪيس هلندا ۽ اهي عدالتون هڪ هفتي اندر ڪيسن جو فيصلو ڏينديون. هن وڌيڪ چيو ته مقامي ماڻهن تي مشتمل هڪ ڪاميٽي پڻ ٺاهي وئي آهي جنهن ۾ 2 علما ءَ اڪرام به شامل آهن ته جيئن شهيدن جا وارث وڌيڪ مطمئن ٿي سگهن. هن وڌيڪ چيو ته ڪالهه سنڌ ڪابينه جي هڪ ميٽنگ ڪوٺائي وئي هئي جنهن جي ايجنڊا ۾ امن امان کي سرفهرست رکيو هو جنهن ۾ امن امان کي وڌيڪ بهتر بڻائڻ لاءِ غور ويچار ڪيو ويو. هن چيو ته سانحي بلديه ٽائون جو ڪيس سنڌ هاءِ ڪورٽ ۾ آهي. ان بعد وزير اعليٰ سنڌ سيد قائم علي شاهه ،ڊپٽي ڪمشنر سيڪريٽريٽ شڪارپور ۾ شهيدن ۽ زخمين جي وارثن ۾ 118 کان وڌيڪ چيڪ ورهايا جن ۾ شهيدن لاءِ 20،20 لک جا چيڪ ۽ زخمين لاءِ 2،2 لک روپين جا چيڪ ورهايا ويا. ان موقعي تي وزير اعليٰ ڳالهائيندي چيو ته تمام وڏي افسوس جي ڳالهه آهي انساني زندگي جي ڪا به نعمل بدل نه آهي نه ئي وري هي ڪو معاوضو آهي، هي سنڌ حڪومت طرفان شهيدن جي وارثن لاءِ دلي همدردي جو اظهار آهي ۽ هي صرف ٽوڪن آهي ٻيو به جيترو ٿي سگهندو اوترو شهيدن جي وارثن لاءِ ڪيو ويندو ۽ انهن کي هن ڏکئي گهڙي ۾ اڪيلو نه ڇڏيو ويندو. هن چيو ته سنڌ حڪومت دهشتگردن کي ڪڏهن به معاف نه ڪندي ۽ انهن کي ڪيفر ڪردار تائين پهچايو ويندو. ان موقعي تي وزير اعليٰ سنڌ اهو به چيو ته امام بارگاهه جو جيڪو به نقصان ٿيو آهي ان جو ڪاٿو (ايسٽيميٽ) ٺاهي وڃي ته جيئن ان جو ڪم مڪمل ڪرائي سگهجي. ان موقعي تي اسپيڪر سنڌ اسيمبلي آغا سراج دراني، صوبائسي وزير ورڪس اينڊ سروسز مير هزار خان بجاراڻي، آءِ جي سنڌ غلام حيدر جمالي، ڪمشنر لاڙڪاڻو ڊاڪٽر سعيد احمد مڱڻيجو، ڊي آءِ جي لاڙڪاڻو سائين رکيو ميراڻي، ڊپٽي ڪمشنر شڪارپور، پ پ پ اڳواڻ مير عابد ڀيو، ذوالفقار ڪماريو ۽ ٻيا موجود هئا.

 

قوم مختلف چئلينجن کي ٻڌي ۽ جرئتمندي سان منهن ڏئي رهي آهي: پرويز رشيد

اسلام آباد (بيورو) اطلاعات، نشريات ۽ قومي ورثي جي وفاقي وزير سينيٽر پرويز رشيد چيو آهي ته قوم مختلف چئلينجن کي ٻڌي ۽ جرئتمندي سان منهن ڏئي رهي آهي جيڪا دهشتگردي جي لعنت کي شڪست ڏيڻ ۾ ڪامياب رهندي. ڪالهه اربع ڏينهن هتي دنيا جي ناليواري ڪئميرا ٺاهيندڙ ڪمپنين جي آئوٽ لٽ جي افتتاحي تقريب کي خطاب ڪندي هن چيو ته پاڪستان جلد هڪ پرامن محفوظ ملڪ بڻجي ويندو ۽ درپيش چئلينجن تي ضابطو آڻيندي 2015ع ۾ وڌيڪ مضبوط ملڪ جي حيثيت سان اڀرندو. هن چيو ته مارچ ۾ قطر کان گئس جي درآمد شروع ٿي ويندي جنهن سان گئس جي کوٽ تي وڏي حد تائين ضابطو آڻڻ ۾ مدد ملندي. هن چيو ته گذريل 45 سالن دوران پاڻي جو ڪو وڏو ڊيم تعمير ناهي ڪيو ويو تنهن هوندي به موجوده حڪومت هائيڊرو پاور پراجيڪٽس جي تعمير لاءِ عملي قدم کڻي رهي آهي. هن چيو ته نيلم جهلم هائيڊرو پاور پراجيڪٽ ايندڙ سال مڪمل ٿي ويندو ۽ قومي گرڊ ۾ 960 ميگاواٽ بجلي شامل ڪئي ويندي جڏهن ته ديامير ڀاشا ڊيم ۽ داسو ڊيمن تي به ڪم جاري آهي. هن چيو ته چنيوٽ ۾ سون، ٽامي ۽ لوهه جا ذخيرا ملڻ سان ثابت ٿيو آهي ته پاڪستان ۾ وڏا قدرتي وسيلا آهن. هن چيو ته پنجاب جي وڏي وزير جي اڻٿڪ ڪوششن جي نتيجي ۾ معدنيات ملي آهي. سيلولر ٽيليفون ٽيڪنالاجي ترقي جو ذڪر ڪندي هن چيو ته هاڻي هڪ موبائيل فون، ڪئميرا، گهڙي، انٽرنيٽ ۽ ڪيلڪيوليٽر جي سهولت فراهم ڪري سگهي ٿو. ڪئميرا ٺاهيندڙ ڪمپنين کي پنهنجي پراڊڪٽس جي نمايان رخن جي مقابلي لاءِ سخت محنت ڪرڻي پوندي

 

آرمي چيف سان آسٽريلوي چيف آف ڊفينس جي ملاقات، دفاعي ۽ سهڪار وڌائڻ بابت ڳالهيون

راولپنڊي(م.ڊ) چيف آف آرمي اسٽاف جنرل راحيل شريف سان آسٽريليا جي چيف آف ڊفينس فورس ايئر چيف مارشل مارڪ هنسڪن اربع ڏينهن هتي ملاقات ڪئي. آءِ ايس پي آر مطابق ملاقات دوران ٻنهي ملڪن وچ ۾ دفاعي ۽ سيڪيورٽي سهڪار ۾ وڌيڪ اضافي لاءِ قدمن سميت گڏيل دلچسپي جي معاملن تي خيالن جي مٽا سٽا ڪئي وئي. ان کان اڳ جنرل هيڊ ڪوارٽر پهچڻ تي پاڪ فوج جي هڪ چست ۽ ڦڙت جٿي کيس گارڊ آف آنر پيش ڪيو. ايئر چيف مارشل مارڪ هنسڪن شهيدن جي يادگار تي گلن جي چادر پڻ چاڙهي.ا

 

آمريڪا يا ڀارت جي خواهش تي ڪنهن به تنظيم تي پابندي نه لڳائي ويندي:چوڌري نثار

اسلام آباد(بيورو) وفاقي گهرو وزير چوڌري نثار علي چيو آهي ته آمريڪا يا ڀارت جي خواهش تي ڪنهن به تنظيم تي پابندي نه لڳائي ويندي، فوجي آپريشن کانپوءِ ملڪ ۾ امن امان جي صورتحال بهتر ٿي آهي. قومي اسيمبلي جَي اجلاس دوران ڳالهائيندي چوڌري نثار چيو ته ملڪ 13 ورهين کان دهشتگردي کي منهن ڏئي رهيو آهي. گهرو وزير چيو ته ملڪي تاريخ ۾ پهريون ڀيرو موجوده نون ليگ سرڪار نيڪ نيتي سان دهشتگردن سان ڳالهيون ڪيون، جيڪي دهشتگردن جي غيرسنجيدگي سبب ڪامياب نه ٿي سگهيون. چوڌري نثار چيو ته دهشتگرديءَ جَي خاتمي لاءِ سمورا لاڳاپيل ادارا ڪم ڪري رهيا آهن پر ضرب عضب آپريشن کانپوءِ دهشتگردي ۾ واضح گهٽتائي آئي آهي.وفاقي گهرو وزير چيو ته دهشتگردن جي قيادت پرڏيهه فرار ٿي چڪي آهي، پر ملڪ مان دهشتگردي جي مڪمل خاتمي لاءِ آخري دهشتگردي جي موجودگي تائين آپريشن جاري رکڻو پوندو. فوجي عدالتن بابت ڳالهائيندي چوڌري نثار چيو ته دهشتگردي جا 20 ڪيس فوجي عدالتن ڏانهن منتقل ڪيا ويا آهن، جن مان 12 تي ڪارروائي به شروع ٿي چڪي آهي. هـُن چيو ته موبائل سمن جي تصديق سان نه صرف جعلي سڃاڻپ ڪارڊن ۽ بنا نالن وارين سمن جي نشاندهي ٿي آهي پر ان سان ڪيترائي ٻيا معاملا به سامهون آيا آهن. وفاقي گهرو وزير چيو ته موبائل سمن جي تصديق سان دهشتگردن جا وڏا هٿيار پاڻمرادو ختم ٿي ويندا. سندس چوڻ هو ته گڏيل قومن 177 تنظيمن تي پابندي مڙهي آهي، جن ۾ 10 پاڪستان طرفان ڪالعدم قرار ڏنل تنظيمون به شامل آهن. چوڌري نثار چيو ته پاڪستاني قانون موجب 60 تنظيمن تي پابندي مڙهي وئي آهي، جڏهن ته ڀارت يا آمريڪا جي خواهش تي ڪنهن به تنظيم کي ڪالعدم قرار نه ڏنو ويندو. هـُن چيو ته گذريل 13 ورهين دوران ڪيترين ئي تنظيمن تي پابنديون مڙهيون ويون پر انهن مان ڪجهه تنظيمن نالا بدلائي پنهنجون ڪارروايون جاري رکيون. وفاقي گهرو وزير چيو ته نالا بدلائي ملڪ ۾ دهشتگرد ڪارروايون ڪندڙ تنظيمن جو جائزو ورتو پيو وڃي، ايندڙ ڪجهه هفتن دوران ڄاڻايل تنظيمن خلاف قانوني ڪارروائي شروع ڪئي ويندي. هٿيارن جي نمائش بابت چوڌري نثار جو چوڻ هو ته ملڪ ۾ سڪيورٽي ادارن کانسواءِ ڪنهن کي به هٿيارن جي نمائش ڪرڻ نه ڏني ويندي، جڏهن ته ان سلسلي ۾ ڪيترن ئي علائقن ۾ ڪارروايون به ڪيون ويون آهن. سندس چوڻ هو ته لائوڊ اسپيڪر جو غلط استعمال روڪڻ وفاق جو نه پر صوبائي سرڪار جي ذميواري آهي. چوڌري نثار چيو ته لائوڊ اسپيڪر جو غلط استعمال ڪرڻ تي سڄي ملڪ ۾ 3 هزار 265 ڪيس داخل ٿيا آهن، جڏهن ته 2 هزار 65 ڄڻن کي گرفتار پڻ ڪيو ويو آهي.

 

قومي اسيمبلي: جي ايس ٽي ۾ واڌ خلاف اپوزيشن جو احتجاج، واڪ آئوٽ

اسلام آباد(بيورو) قومي اسيمبلي جي اجلاس ۾ اپوزيشن پاران پيٽروليم شين تي ٽيڪس ۾ واڌ خلاف حڪومتي جواب نه اچڻ تي ٻـَي ڏينهن به واڪ آئوٽ ڪيو ويو، خورشيد شاهه چيو آهي ته حڪومت سان ڪو جهيڙو ناهي، حڪومتي وزير ڪلاڪن جا ڪلاڪ چينلز تي بحث ڪن پيا پر وٽن ايوان ۾ اچڻ جو وقت ناهي، اسان “ گو بابا” گو جا نعرا نٿا لڳائڻ چاهيون. قومي اسيمبلي جو اجلاس اسپيڪر سردار اياز صادق جي صدارت هيٺ ٿيو، جنهن ۾ مختلف معاملن تي بحث ڪيو ويو. اجلاس ۾ ايم  ڪيو ايم جي وسيم احمد چيو ته اپوزيشن پيٽروليم شين تي جي ايس ٽي خلاف روز احتجاج ڪري رهي آهي پر ڪو به وزير جواب ڏيڻ لاءِ تيار ئي ناهي. اپوزيشن ليڊر خورشيد چيو ته هنن سوچيو هو ته اچ ڪو وزير پيٽرول معاملي تي بريفنگ ڏيندو پر ٻڌايو ويو آهي ته وزير مصروف آهن. خورشيد شاهه چيو ته وزير ٽـِي وي چينلز تي ويهي ڪلاڪن جا ڪلاڪ بحث ڪن پيا پر وٽن ايوان ۾ اچڻ لاءِ وقت ناهي. اپوزيشن ليڊر وڌيڪ چيو ته سندن حڪومت سان ڪو جهيڙو ناهي ۽ نه ئي هو “ گو بابا” گو جا نعرا لڳائڻ چاهين ٿا. خورشيد شاهه جي خطاب بعد گڏيل اپوزيشن ايوان مان واڪ آئوٽ ڪري وئي، جن ۾پ پ، ايم ڪيو ايم، جماعت اسلامي ۽ قومي وطن پارٽي جا ميمبر شامل هئا. پاڻي ۽ بجلي واري وفاقي وزير خواجه آصف چيو ته مخالف ڌر جي موقف ۾ وزن آهي، هو سڀاڻي پيٽرول مع املي تي ايوان کي بريفنگ ڏيندو. ان کان اڳ پارلياماني معاملن واري سيڪريٽري ايوان کي لکت ۾ آگاهي ڏني ته 18 هين ترميم کانپوءِ آثار قديم وارو معاملو صوبن ڏانهن منتقل ٿي چڪو آهي، قومي ورثو تباهه ٿي چڪو آهي پر صوبا قدم نٿا کڻن، وفاق وٽ ان حوالي سان نه ئي اختيار موجود آهن ۽ ئي ايترا فنڊ آهن جو صوبن کي ڏئي سگهجن . ريلوي واري وزارت لکت ۾ آگاهي ڏيندي چيو ته ڪراچي سرڪلر ريلوي منصوبي لاءِ پرڏيهي قرض نه ملي رهيو آهي، منصوبي کي ڪجهه شرطن تحت سنڌ حڪومت ۽ ڪراچي ڊسٽرڪٽ حوالي ڪري سگهجي ٿو. ريلوي واري وزارت چيو ته سنڌ حڪومت جي سرڪلر منصوبي بابت ٽيڪنيڪل مدد ئي ڪري سگهجي ٿي. پارلياماني معاملن واري وزير شيخ آفتاب ايوان کي ٻڌايو ته يوٽيوب تي پابندي سپريم ڪورٽ لڳائي آهي، هـُو ختم نٿا ڪري سگهن، پاڪستان سميت  ٻين 8 ملڪن ۾ به يوٽيوب بند ڪيو ويو آهي. ايوان ۾ مختلف معاملن تي بحث جاري هو ته اسپيڪر ڪارروائي سڀاڻي تائين ملتوي ڪري ڇڏي.

 

وفاقي سرڪار، سنڌي چئنلز کان وڌيڪ اردو چئنلز کي سرڪاري اشتهار ڏيڻ جو اعتراف ڪري ورتو، اياز سومرو جو ٻه اکيائي خلاف احتجاج

اسلام آباد(بيورو) وفاقي سرڪار، سنڌي ٽي وي چئنلز کان وڌيڪ اردو چئنلز کي سرڪاري اشتهار ڏيڻ جو اعتراف ڪري ورتو، قومي اسيمبلي جي اجلاس ۾ پارلياماني سيڪريٽري محسن رانجها ٽي وي چينلز کي ملندڙ اشتهارن بابت تفصيل ايوان ۾ پيش ڪيا. ٻڌايو ته اشتهار ريٽنگ جي بنياد تي ڏنا ٿا وڃن،جيڪو ٽي وي چينل وڌيڪ ڏٺو وڃي ٿو، ان کي اشتهار به ان ئي حساب سان ملي ٿو، هن اعتراف ڪيو ته اردو چينلز جي ڀيٽ ۾ سنڌي ٽي وي چينلز کي ملندڙ اشتهارن جا پئسا گهٽ جاري ڪيا وڃن ٿا.پ پ ايم اين اي محمد اياز سومري، سنڌي چينلز سان ٻه اکيائي خلاف احتجاج ڪندي چيو ته وفاقي سرڪار رڳو اردو ٽي وي چينلز کي نوازيو آهي،جڏهن ته سنڌي ٽي وي چينلز جي ڀيٽ ۾ اردو چينلز کي اربين رپين جا اشتهار ڏنا پيا وڃن. ايم اين اي اياز سومري چيو ته ٻڌايو وڃي ته سنڌي ٽي وي چينلز کي اشتهار ڇو نه ٿا ملن؟ سڌ سماءَ واري پارلياماني سيڪريٽري محسن رانجها چيو ته صوبن ۾ موجود قديم آثارن جا ماڳ ۽ ثقافتي هنڌن لاءِ وفاق وٽ پئسا ناهن،اهو ڪم صوبن وٽ آهي. هن چيو ته صوبن جي نااهلي آهي جو تاريخي ماڳن ڏانهن ڌيان نه پيو ڏنو وڃي. محسن رانجها چيو ته تاريخي ماڳ خطري ۾ آهن، صوبن کي ڪم ڪرڻ گهرجي. هن چيو ته صوبن کي پرڏيهي فنڊنگ به ٿئي ٿي پر صوبا ڪم نه پيا ڪن. سڌ سماءَ بابت پارلياماني سيڪريٽري محسن رانجها چيو ته يوٽيوب تي پابندي سپريم ڪورٽ جي حڪم تي لڳي آهي. وفاقي وزير شيخ آفتاب چيو ته سپريم ڪورٽ جي حڪم کان سواءِ پابندي نه ٿي هٽائي سگهجي ڪابينا ڊويزن جو لکت ۾ جمع ڪرايل جواب ۾ چيو ويو آهي ته پاڪستان کان سواءِ افغانستان، انڊونيشيا، بنگلاديش، ايران، مصر ۽ سوڊان ۾ به يو ٽيوب تي پابندي لاڳو آهي. جواب ۾ وڌيڪ ڄاڻايو ويو آهي ته سڀني پابندي ختم ڪئي رڳو ايران ۽ پاڪستان ۾ يوٽيوب تي پابندي آهي. ڪابينا ڊويزن جو لکت ۾ جواب ۾ چيو ويو آهي ته ملڪ اندر موبائيل استعمال ڪندڙن جو تعداد 13 ڪروڙ، 73 لک آهي. ريلوي واري وزارت لکت ۾ جمع ڪرايل بيان ۾ چيو ويو آهي ته ڪراچي سرڪلر ريلوي منصوبي لاءِ پرڏيهي قرض نه پيا ملن، جنهن ڪري منصوبي کي ڪجهه شرطن تي سنڌ حڪومت ۽ ڪراچي انتظاميا حوالي ڪري سگهجي ٿو.

 

رحمان ملڪ جي اڳوڻي صدر آصف علي زرداري سان ملاقات، ايم ڪيو ايم سان طئي ٿيل معاهدي تي بريفنگ

ڪراچي(اسٽاف رپورٽر) اڳوڻي وفاقي گهرو وزير ۽ پ پ سينيٽر رحمان ملڪ، لنڊن کان ڪراچي پهچڻ بعد پ پ جي شريڪ چيئرمين آصف علي زرداري سان ملاقات ڪري کيس ايم ڪيو ايم سان طئه ٿيل معاهدي بابت بريفنگ ڏني. پيپلز پارٽيءَ جي سينيٽر رحمان ملڪ لنڊن کان ڏيهه واپسي بعد بلاول هائوس ڪراچي ۾ آصف علي زرداري سان ملاقات ڪئي. رحمان ملڪ، لنڊن ۾ متحده سربراهه الطاف حسين سان ٿيل ملاقات ۽ پ پ، متحده معاهدي جي تفصيلن بابت پارٽيءَ جي شريڪ چيئرمين کي ڄاڻ ڏني.رحمان ملڪ سان صلاح مشوري کانپوءِ اڳوڻو صدر آصف علي زرداري اڄ اسلام آباد روانو ٿيندو، جتي هو مختلف سياسي اڳواڻن سان صلاح مشورا ڪندو. آصف علي زرداري سينيٽ جي چونڊن ۾ حمايت حاصل ڪرڻ توڙي جوڙ ٽوڙ لاءِ مختلف سياسي پارٽين جي اڳواڻن سان ملاقاتون پڻ ڪندو

 

حڪمران جماعت مسلم ليگ نواز سينيٽ چونڊن لاءِ اميدوارن جو اعلان ڪري ڇڏيو

اسلام آباد(بيورو) حڪمران جماعت مسلم ليگ نون سينيٽ چونڊن لاءِ اميدوارن جو اعلان ڪري ڇڏيو آهي، جنرل سيٽن تي اڪثر پراڻي ميمبرز کي ٽڪيٽ ڏني وئي آهي، جڏهن ته سنڌ مان رڳو هڪ سينيٽرز کي ٽڪيٽ جاري ڪئي وئي آهي. وزيراعظم نواز شريف جي صدارت هيٺ مسلم ليگ نون جي پارلياماني بورڊ جي اجلاس ۾ سينيٽ چونڊن لاءِ مليل 172 درخواستن مان چونڊيل اميدوارن جو اعلان ڪيو ويو آهي. مسلم ليگ نون جي ترجمان موجب، پنجاب مان ليفٽيننٽ جنرل رٽائرڊ عبدالقيوم، مشاهد الله خان، ڊاڪٽر غوث نيازي، بيگم نجمه حميد، ڪرن ڊار،نهال هاشمي، چوڌري تنوير، آصف ڪرماني ۽ پروفيسر ساجد مير کي ٽڪيٽ ڏني وئي آهي. اسلام آباد مان راحيلا مگسي، ظفر اقبال جهڳڙا ۽ سنڌ مان ظفر علي شاهه سينيٽ چونڊن لاءِ اميدوار هوندا. مسلم ليگ ن جي ترجمان موجب، خيبرپختونخواهه مان ليفٽيننٽ جنرل صلاح الدين تميزي کي ٽڪيٽ ڏني وئي آهي، سندس ڪورنگ اميدوار پير صابر شاهه هوندو. بلوچستان مان سردار يعقوب خان ناصر، امير افضل خان مندوخيل، ثناءُ الله زهري، شهباز خان دراني ۽ اياز خان سواتي کي ٽڪيٽ جاري ڪئي وئي آهي، جڏهن ته دانش ڪمار ٽيڪنوڪريٽس، ڪلثوم پروين عورتن جي سيٽ ۽ سئيدال خان ناصر جنرل سيٽن تي ڪورنگ اميدوار هوندا.

 

پيٽرول بحران، حڪومت پي ايس او جا وڌيڪ 4 آفيسر معطل ڪري ڇڏيا

اسلام آباد (بيورو) حڪومت پيٽرول بحران جو ذميوار قرار ڏيندي پاڪستان اسٽيٽ آئل جا وڌيڪ 4 آفيسر معطل ڪري ڇڏيا آهن خانگي ٽي وي ذريعن جي حوالي سان ٻڌايو ته ملڪ ۾ گذريل مهيني 10 ڏينهن لاءِ ٿيندڙ پيٽرول بحران جي ذميوارن جو تعين ڪرڻ لاءِ جوڙيل جاچ ڪميٽي ۾ شامل بئريسٽر ظفرالله خان، اڳوڻو آءِ جي طارق کوسه پاران تيار ڪئي ويندڙ رپورٽ کان پوءِ پي ايس او جي چئن آفيسرن کي ذميوار قرار ڏنو ويو آهي آفيسرن کي معطل ڪرڻ جا حڪم وزيراعظم هائوس مان جاري ڪيا ويا آهن وقتي پيٽروليم سيڪيورٽي ارشاد مرزا مطابق پي ايس او جي معطل ٿيل آفيسرن ۾ نائب مئنيجنگ ڊائريڪٽر جهانگير علي شاهه، سينيئر جنرل مئنيجر ڊاڪٽر نظير زاهد، جنرل مئنيجر آصف اسلم ۽ ايڪٽنگ جنرل مئنيجر منصور اسماعيل شامل آهن ڄاڻايل رپورٽ 20 صفحن تي ٻڌل آهي ۽ ان جي تشڪيل ۾ بئريسٽر ظفرالله خان سميت وزيراعظم آفيس جو ايڊيشنل سيڪريٽري فواد حسن فواد ۽ ارشاد مرزا شامل آهن.