تازيون خبرون

Daily Archives: February 5, 2015

وفاقي سرڪار شڪارپور سانحي جو ذميوار سنڌ حڪومت کي قرار ڏئي ڇڏيو

اسلام آباد (بيورو) وفاقي سرڪار، شڪارپور سانحي جو سنڌ حڪومت کي ذميوار قرار ڏئي ڇڏيو، وفاقي گهرو وزير چوڌري نثار چيو آهي ته وفاق صرف انٽيليجنس شيئرنگ ڪندو آهي پر سڪيورٽي جي ذميواري صوبن جي آهي. قومي اسيمبلي ۾ خطاب ڪندي گهرو وزير چوڌري نثار چيو ته شڪارپور سانحو سنڌ حڪومت جي ماتحتي ۾ اچي ٿو . هن چيو ته دهشتگردي واقعن تي ڪنهن به صوبي تي تنقيد ناهي ڪئي، جڏهن ته دهشتگردن خلاف شروع ڪيل آپريشن جو رد عمل سامهون اچي رهيو آهي. سندس چوڻ هو ته دهشتگرد قوم کي ورهائڻ چاهين ٿا، جڏهن ته سيڪيورٽي جي معاملن تي سياست نه گهرجي. هن چيو ته سانحي ۾آپگهاتي بمبار 5 کان 9 ڪلو ڌماڪيدار مواد استعمال ڪيو. چوڌري نثار چيو ته معاملن کي گڏجي ويهي حل ڪرڻ گهرجي، جڏهن ته ڪراچي ۾ هوندي شڪارپور سانحي بابت ڄاڻ وٺندا رهيس. وفاقي گهرو وزير  چوڌري نثار چيو ته دهشتگردي کي منهن ڏيڻ لاءِ سڀني کي متحد ٿيڻو پوندو، جڏهن ته هڪٻئي بدران دهشتگردي تي آڱريون کڻڻ گهرجي. هن چيو ته امن امان جي صورتحال تي ڪنهن تي به تنقيد نه ٿيڻ گهرجي، صوبي ۾ مقرر فورسز ۽ ڳجھا ادارا وڏي وزير جي ماتحت هوندا آهن. هن جو چوڻ هو ته جيستائين هڪ به دهشتگرد موجود آهي ته آپگهاتي حملا ٿيندا رهندا. چوڌري نثار چيو ته آپگهاتي بمبار جا ڪپڙا سبندڙ درزي کي گرفتار ڪيو آهي، جڏهن ته ڌماڪي واري هنڌان مليل آپگهاتي بمبار جي آڱر تي سڃاڻپ لاءِ نادرا ڪم ڪري رهيو آهي.

 

چيف اليڪشن ڪمشنر ۽ هوائي فوج جي سربراهه جي وزير اعظم سان ملاقات

اسلام آباد (بيورو) وزيراعظم نواز شريف، اتر وزيرستان ۾ دهشتگردن خلاف جاري آپريشن ضرب عضب ۾ هوائي فوج جي ڪردار جي واکاڻ ڪندي چيو آهي ته قومي ايڪشن پلان تي عملدرآمد لاءِ ايئرفورس اهم ڪردار ادا ڪيو آهي، حڪومت هوائي فوج جون صلاحيتون وڌائڻ لاءِ هر  ممڪن وسيلا فراهم  ڪندي. وزيراعظم هائوس اسلام آباد ۾ وزيراعظم نواز شريف سان هوائي فوج جي سربراهه طاهر رفيق بٽ ملاقات ڪئي. ملاقات دوران هوائي فوج جي پيشوراڻي معاملن، دهشتگردن خلاف جاري آپريشن ضرب عضب ۽ قومي ايڪشن پلان تي عملدرآمد تي غور ڪيو ويو. ان موقعي تي وزيراعظم نواز شريف، دهشتگردي خلاف جنگ  هوائي فوج جي ڪردار جي واکاڻ ڪئي. وزيراعظم نواز شريف چيو ته دهشتگردي جي خاتمي لاءِ جوڙيل قومي ايڪشن پلان تي عملدرآمد لاءِ هوائي فوج اهم ڪردار ادا ڪري رهي آهي. وزيراعظم نواز شريف وڌيڪ چيو ته حڪومت ايئرفورس جا وسيلا وڌائڻ لاءِ هر ممڪن وسيلا ۽ فنڊ فراهم ڪندا. ٻئي طرف وزيراعظم نواز شريف سان چيف اليڪشن ڪمشنر جسٽس رٽائرڊ سردار رضا خان جي ملاقات ٿي آهي وزيراعظم هائوس ۾ ٿيندڙ ملاقات ۾ چيف اليڪشن ڪمشنر جسٽس رٽائرڊ سردار رضا خان وزيراعظم نواز شريف کي چونڊ سڌارن ۽ اليڪشن ڪميشن جي معاملن تي بريفنگ ڏني.

 

ڪميشن جي رپورٽ ڪجهه پئي چوي ته خان صاحب وري ڪجهه ٻيو: پرويز رشيد

اسلام آباد(بيورو) پاڪستان تحريڪ انصاف جي سربراهه عمران خان جي بيان جي رد عمل ۾ اطلاعات کاتي جي وفاقي وزير پرويز رشيد چيو آهي ته ڪميشن جي رپورٽ ڪجه پئي چوي ته خان صاحب وري ڪجهه ٻيو، هن چيو ته خان صاحب مڃي وٺو ته توهان کي عوام رد ڪيو، هاڻي روئڻ بند ڪري خيبرپختونخواهه ۾ دهشتگردي خلاف جنگ ۾ پنهنجو ڪردار ادا ڪريو، هن اهو به چيو ته عمران خان ڪيتري به ٽال مٽول ڪري سچ اهو آهي ته جيترا به تڪ کليا آهن انهن ۾ کيس شڪست ملي آهي، ڪپتان جي خواهش تي جيڪو به تڪ کليو ان ۾ کيس شڪست ملي، خوشي آهي ته خان صاحب جون ڌانڌلي جون دعوائون ڪوڙ ثابت ٿيون، پرويز رشيد جو وڌيڪ چوڻ هو ته عمران خان پنهنجي طالبان ڀائرن جيان قانون جا فيصلا نه ٿو مڃي، پنهنجي عدالت لڳائي ويٺو آهي، جتي کيس شڪت نظر آئي اتي ڌانڌلي جو راڳ پيو الاپي.

 

ايوان ۾ دهشتگردي جو مسئلو اٿارڻ سياست ڪرڻ ناهي: خورشيد شاهه

اسلام آباد(بيورو) خورشيد شاهه چيو آهي ته ڪاوڙ ۾ اچڻ جي ضرورت ناهي شڪارپور سانحي ۾ وزيراعظم ۽ ٻيا وزير نه ويا جنهن سبب احساس محروم پيدا ٿي ايوان ۾ دهشتگردي جو مسئلو اٿارڻ سياست ڪرڻ ناهي، وڏا وڏا واقعا ٿيا حڪومت جي مدد ڪئي سياست نه ڪئي، قومي اسيمبلي ۾ گهرو وزير جو جواب ڏيندي اپوزيشن ليڊر خورشيد شاهه چيو آهي ته ڪاوڙ ۾ اچڻ جي ضرورت ناهي، معتبر سوچ رکڻ گهرجي هتي ڪو ماءُ پٽ آزاد ڳالهه نه ٿا ڪن، خورشيد شاهه چيو ته شڪارپور سانحي ۾ وزيراعظم ۽ ٻيا وزير نه ويا جن سبب احساس محروم جنم ورتو، اهڙا الزام ننڍي ذهن جي ڳالهه آهي، اسان کي بريفنگ ۾ ٻڌايو يوو ته دهشتگرد جو مٿو، پير ۽ ٻانهون مليا آهن جڏهن ته  گهرو وزارت چئي ٿي ته صرف آڱر ملي آهي عوام صرف اجلاس يا مذمتي بيان نه پر عملي قدم ڏسڻ چاهي ٿي، ايوان ۾ دهشتگردي جو مسئلو اٿارڻ سياست ڪرڻ ناهي وڏا وڏا واقعا ٿيا حڪومت جي مدد ڪئي سياست نه. هن چيو ته جيڪڏهن ڪنهن ٻئي صوبي ۾ اهڙو واقعو پيش اچي ها ته وزيراعظم سندس ڪابينا سميت ٽن ڏينهن لاءِ اتي موجود هجي ها. خورشيد شاهه چيو ته هو نه ٿا چاهين ته اهڙن واقعن تي سياست ڪجي پر هو مادر پدر واري سياست نه ڪرڻ چاهين. هن چيو ته دهشتگردي 13 سال پراڻو ۽ وڏو مسئلو آهي، جڏهن ته هو ان معاملي تي الزام نه ٿا هڻن . سندس چوڻ هو ته ڇا مظلومن جي ڏک ۾ شريڪ ٿيڻ به سياست آهي ڇا ؟؟ خورشيد شاهه چيو ته ڊي آءِ جي کين بريفنگ ڏني ته شڪارپور ۾ دهشتگرد جا هٿ پير ۽ منڍي هٿ ڪئي آهي پر گهرو وزير جو چوڻ آهي ته آپگهاتي بمبار جي صرف آڱر ملي آهي، جڏهن ته هو ان معاملي تي سنڌ حڪومت سان ٻيهر ڳالهائيندا. هن جو چوڻ هو ته اڃا وقت ناهي ويو وزايرعظم شڪارپور وڃي سگهي ٿو.

 

قومي اسيمبلي ۽ سينيٽ ڪشميرين سان ايڪي جي اظهار طور ٺهراءَ منظور ڪري ورتا

اسلام آباد (بيورو) قومي اسيمبليءَ ۽ سينيٽ ڪشميرين سان ايڪي جــَي اظهار طور ڌار ڌار ٺهراءَ اتفاق راءِ سان منظور ڪري ورتا. قومي اسيمبلي ۾ جي يو آءِ سربراهه ۽ ڪشمير ڪميٽي جي چيئرمين مولانا فضل الرحمان ڪشميرين سان ايڪي جي اظهار طور ٺهراءُ پيش ڪيو جيڪو ايوان اتفاق راءِ سان منظور ڪري ورتو. سينيٽ ۾ ڪشميرين سان ايڪي جي اظهار  طور ٺهراءُ نواز ليگ سينيٽر ايم حمزه پيش ڪيو جيڪو پڻ منظور ڪيو ويو. ٺهرائن ۾ چيو ويو ته ايوان ڪشمير جي شهيدن کي ڀيٽا پيش ڪري ٿو ۽ ڪشمير ۾ ڀارتي ظلم جي ڀرپور مذمت ڪري ٿو. ٺهرائن ۾ چيو ويو ته ڪشمير مسئلي جو حل گڏيل قومن جي نگراني ۾ ممڪن آهي، ايوان گڏيل قومن کان پنهنجي ٺهرائن ذريعي مسئلي جو حل چاهي ٿو. ٺهرائن موجب پاڪستان ڪشمير لاءِ پنهنجي اصولي موقف تي قائم آهي. ٺهرائن ۾ عالمي برادري کان مطالبو ڪيو ويو ته ڪشمير وادي ۾ نوجوانن جي اغوا بعد قتل سميت ڀارتي ظلم جو نوٽيس ورتو وڃي.

 

پاڪ فوج جي 28 بريگيڊيئرز جي ميجر جنرل جي عهدن تي ترقي، ترقي حاصل ڪندڙ ۾ 7 ڊاڪٽر به شامل

راولپنڊي(م.) آرمي چيف جنرل راحيل شريف 28 بريگيڊيئرز کي ميجر جنرل جي عهدن تي ترقي ڏئي ڇڏي جڏهن ته ترقي حاصل ڪندڙن ۾ آرمي ميڊيڪل ڪور جا 7 ڊاڪٽر به شامل آهن، پاڪ فوج جي ترجمان آءِ ايس پي آر مطابق آرمي چيف جنرل راحيل شريف جي صدارت هيٺ جي ايڇ ڪيو ۾ پروموشن بورڊ جو اجلاس ٿيو جنهن ۾ پاڪ فوج جي 28 بريگيڊ يئرز کي ميجر جنرل جي عهدن تي ترقي ڏيڻ جي منظوري ڏني وئي ترقي حاصل ڪندڙن ۾ آرمي ميڊيڪل ڪور جا 7 ڊاڪٽر به شامل آهن جڏهن ته انفنٽري بريگيڊ سيالڪوٽ جي ڪمانڊنگ بريگيڊيئر ساحر شمشاد مرزا کي به ميجر جنرل جي عهدي تي ترقي ڏني وئي، آرمي چيف طرفان ميجر جنرل جي عهدن ي ترقي حاصل ڪندڙ ٻين بريگيڊيئرز ۾ نديم ذڪي، شاهين، مظهر، محمد عامر، شاهد پرويز، بريگيڊيئر نادر خان، منظور احمد، ارشد محمود، محمد عامر، حفيظ الرحمان، وسيم اشرف، محمد ڪليم، سردار طارق، طاهر مسعود، اظهر عباس، چراغ حيدر، انيس اڪبر، باسط رضا، محمد عدنان، نعمان مسعود، فيض حامد، زاهد حامد، نعيم نقي، ظفر اقبال شامل آهن.

 

وڏي وزير سنڌ ۾ ڊاڪٽرن جي ٽارگيٽ ڪلنگ ۽ کين ڀتي جو چٺيون ملڻ واري معاملي جو نوٽيس وٺي ڇڏيو

ڪراچي (اسٽاف رپورٽر) وڏي وزير سيد قائم علي شاهه سنڌ ۾ ڊاڪٽرن جي ٽارگيٽ ڪلنگ ۽ کين ڀتي جون چٺيون ملڻ واري معاملي جو نوٽيس وٺندي پي ايم اي اڳواڻن کي ڳالهين لاءِ طلب ڪري ورتو آهي. ڳالهين لاءِ طلب ڪيل پي ايم اي اڳواڻن ۾ ڊاڪٽر مجتبيٰ ميمڻ، ڊاڪٽر ادريس ايڌي، ڊاڪٽر قاضي واسق ۽ ڊاڪٽر پير منظور شامل آهن. ڊاڪٽرن تصديق ڪئي آهي ته سي ايم هائوس مان کين ڳالهين لاءِ طلبيءَ جي دعوت ملي آهي. ياد رهي ته پي ايم اي پاران ڀتي جون چٺيون ملڻ ۽ ڊاڪٽرن جي ٽارگيٽ ڪلنگ واري معاملي  تي ڪجهه ڏينهن کان سڄي سنڌ ۾ احتجاج جاري هو ۽ ڊاڪٽرن اعلان ڪيو هو ته سومر واري ڏينهن کان سڄي سنڌ ۾ احتجاج ڪيو ويندو، جنهن کانپوءِ اڄ کين سي ايم هائوس ۾ طلب ڪيو ويو آهي. چيو پيو وڃي ته وڏو وزير ڊاڪٽرن کي خاطري ڪرائيندو ته سندن تحفظ کي يقيني بڻائڻ لاءِ غير معمولي قدم کنيا ويندا.

 

جڙتو پوليس مقابلو، سپريم ڪورٽ پاران سچل ڳوٺ ۽ سهراب ڳوٺ ٿاڻن جا ايس ايڇ اوز معطل

ڪراچي (اسٽاف رپورٽر) سپريم ڪورٽ، لاڙڪاڻي واسي شاگرد کي مقابلو ڄاڻائي قتل ڪرڻ واري ڪيس ۾ سچل ڳوٺ ۽ سهراب ڳوٺ ٿاڻن جي ايس ايڇ اوز کي معطل ڪندي جاچ جو حڪم ڏئي ڇڏيو. سپريم ڪورٽ جي ڪراچي رجسٽري ۾ جسٽس امير هاني مسلم ۽ جسٽس فائز عيسيٰ تي ٻڌل ٻه رڪني بينچ جڙتو مقابلي ۾ قتل ڪيل شاگرد انيس الرحمان جي ڪيس جي ٻڌڻي ڪئي. عدالت پاران ايس ايڇ او اسماعيل لاشاري ۽ ايس ايڇ او شعيب قريشي کي معطل ڪرڻ جو حڪم جاري ڪيو. عدالت، ڊي آءِ جي سلطان خواجا کي واقعي جي جاچ جو حڪم ڏيندي 15 ڏينهن اندر رپورٽ پيش ڪرڻ جي به هدايت ڪئي. ٻڌڻي دوران جسٽس امير هاني مسلم رمارڪس ڏيندي چيو ته جيڪڏهن عهدي تي ويٺل آفيسر کي معطل نه ڪيو ويندو، ان خلاف ڪير شاهدي ڏيندو. واضح رهي ته مقتول شاگرد جي والد انور سومري پاران داخل ڪيل درخواست ۾ موقف اختيار ڪيو ته سندس پٽ کي ايس ايڇ او اسماعيل لاشاري کنڀي 5 لک رپيا رشوت طلب ڪئي ۽ نه ڏيڻ تي کيس قتل ڪري طالبان ڄاڻائي ڇڏيو.

 

خبر پئجي وئي ته اليڪشن ڪئين فڪس ڪئي وئي هئي: عمران خان

اسلام آباد(بيورو) تحريڪ انصاف جي چيئرمين عمران خان چيو آهي ته خبر پئجي وئي آهي ته اليڪشن ڪيئن فڪس ڪئي وئي هئي سڀ ثبوت اچي ويا، اصل گيم رٽرننگ آفيسرن کيڏي هاڻ گلگت بلتستان جي چونڊن ۾ به ڌانڌلي جي تياري ڪئي وئي، ن ليگ جي ميمبر کي نگران وڏو وزير لڳايو ويو مقرري کي سپريم ڪورٽ ۾ چئلينج ڪنداسين، هاڻ ته اليڪشن ٽربيونل ۾ فيصلا ٿيندا، تڪ اين اي 122 تي فارنزڪ ليبارٽري جي رپورٽ اچي وئي آهي ۽ هاڻ اهو دعويٰ سان چئي سگهون ٿا ته اياز صادق قومي اسميبلي جو ميمبر نٿو رهي سگهي اسلام آباد ۾ پريس ڪانفرنس ڪندي تحريڪ انصاف جي چيئرمين عمران خان چيو ته جن اسيمبلين مان استعيفائون ڏئي ڇڏيون اتي واپس نه وينداسين هن چيو ته 126 ڏينهن جو ڌرڻو صرف ان ئي ڌانڌلي سبب هنيو ويو هو، جيڪڏهن ڌرڻو نه هڻون ها ته ايندڙ 5 سالن تائين رزلٽ نه اچي ها، اهڙي اليڪشن ڪرائڻ کان بهتر آهي هت اليڪشن ئي نه ڪرائي وڃي، مسلم ليگ ن کي ڌانڌلي ڪرڻي هئي ته ٿوڙو عقل استعمال ڪري ها عمران خان الزام لڳايو ته گلگت بلتستان جي چونڊڻ ۾ ڌانڌلي جي تيار ڪئي وئي آهي.

 

سڀني کي گڏجي جهالت خلاف جهاد ڪرڻو پوندو: سراج الحق

لاهور (م.ڊ) جماعت اسلامي جي امير سراج الحق جو چوڻ آهي ته سڀني کي گڏجي جهالت خلاف جهاد ڪرڻو پوندو، اهڙو ميزائيل به ايجاد ڪيو وڃي جنهن سان جهالت جو خاتمو آڻي سگهجي لاهور ۾ منعقد هڪ تقريب کي خطاب ڪندي جماعت اسلامي جي امير سراج الحق جو چوڻ هو ته اها تعليم فتنو آهي جنهن جي ذريعي  انسان الله کي وساري ڇڏي، علمي ذريعي ئي سڀ ڪجهه حاصل ڪري سگهجي ٿو هن چيو ته بدقسمتي سان بجيٽ ۾ سڀ کان گهٽ حصو تعليم لاءِ رکيو ويندو آهي اڄ جا ٻار سڀاڻي جو مستقبل آهن، انهن تي توجهه ڏيڻ حڪومت جي پهرين ترجيح ۾ شامل هجڻ گهرجي، جماعت اسلامي جي امير جو چوڻ هو ته تعليم جو مقصد زندگي جي مقصد کي سمجهڻ آهي، ان موقعي تي هن رعد ميزائيل جي ڪامياب تجربي تي سائنسدانن ۽ قوم کي مبارڪباد به ڏني.