تازيون خبرون

Monthly Archives: February 2015

سينيٽ چونڊن ۾ هارس ٽريڊنگ روڪڻ لاءِ پارلياماني پارٽين ۾ اتفاق نه ٿي سگهيو

اسلام آباد(م ڊ)سينيٽ چونڊن ۾ هارس ٽريڊنگ روڪڻ لاءِ پارلياماني پارٽين وچ ۾ اتفاق نه ٿي سگهيو ۽ پيپلز پارٽي، جي يو آءِ ف آئيني ترميم جي مخالفت ڪري ڇڏي وزيراعظم نواز شريف جي سربراهي ۾ پارلياماني پارٽين جو اجلاس ٿيو جنهن ۾ اپوزيشن ليڊر سيد خورشيد شاهه، اڳوڻي وزيراعظم راجا پرويز اشرف، بچاءُ واري وفاقي وزير خواجه آصف، ناڻي واري وزير اسحاق ڊار، ايم ڪيو ايم طرفان فاروق ستار، بابر غوري ۽ رشيد گوڊيل شريڪ ٿيا،  جڏهن ته ٻين اڳواڻن ۾ محمود خان اچڪزئي، اعجاز الحق، آفتاب خان شيرپائو، عارف علوي، حاصل بزنجو، اٽارني جنرل، وزيراعظم جي آئيني ۽ قانوني ماهرن ۽ سياسي صلاحڪارن شرڪت ڪئي ذريعن مطابق سينيٽ چونڊن ۾ هارس ٽريڊنگ روڪڻ لاءِ پارلياماني پارٽين جي اجلاس ۾ آئيني ترميم تي غور ڪيو ويو جڏهن ته ان دوران پارلياماني پارٽين ۾ ترميم تي اتفاق نه ٿي سگهيو ذريعن جو چوڻ هو ته پيپلز پارٽي ۽ جي  يو آءِ ف آئيني ترميم جي مخالف ڪندي موقف اختيار ڪيو ته ترميم کي چونڊ سڌارن واري ڪميٽي ۾ پيش ڪيو وڃي جڏهن ته سياسي پارٽيون آئيني ترميم بجاءِ پنهنجي اندر نظر و ضبط پيدا ڪن ۽ ترميم پارٽي مفاد بجاءِ ملڪي مفاد ۾ ڪئي وڃي، ذريعن مطابق حڪومت طرفان سومر تي آئيني ترميم پيش ڪرڻ جو فيصلو ڪيو ويو آهي جنهن ۾ ٻين سياسي پارٽين جي حمايت سان ترميم کي پيش ڪيو ويندو. پارلياماني پارٽين جي اجلاس کي خطاب وزيراعظم نواز شريف جو چوڻ آهي ته پئسا ڏئي ووٽ خريد ڪرڻ مڪروهه عمل آهي ان لاءِ ضمير فروشي جي ڪاروبار کي روڪڻ لاءِ سڀني کي گڏجي ڪم ڪرڻو پوندو، وزيراعظم هائوس ۾ پارلياماني پارٽين جي ميمبرن جو اجلاس منعقد ٿيو جنهن کي خطاب ڪندي وزيراعظم نواز شريف جو چوڻ هو ته سينيٽ چونڊن کان اڳ هارس ٽريڊنگ خلاف آواز اٿاري رهيا آهن ان لاءِ سڀني کي گڏجي سينيٽ جو تقدس برقرار رکڻو پوندو ۽ ضمير فروشي جي ڪاروباري کي روڪڻو پوندو هن چيو ته پئسا ڏئي ايوان ۾ اچڻ انتهائي ڏکوئيندڙ آهي سينيٽ چونڊن ۾ شفافيت جو چونڊ سڌارن سان گهرو تعلق آهي ۽ هر پارٽي جي ذميواري بڻجي ٿي ته مڪروهه فعل روڪڻ لاءِ گڏجي ڪم ڪ

 

عدالتي حڪمن تي عمل نه ٿيو ته ملڪ جي چيف ايگزيڪيوٽو خلاف ڪارروائي ڪنداسين:؛سپريم ڪورٽ

اسلام آباد (م ڊ) مڪاني چونڊن بابت ڪيس ۾ اليڪشن ڪميشن سپريم ڪورٽ ۾ جواب جمع ڪرائي ڇڏيو، جسٽس جواد ايس خواجا ريمارڪس ڏنا آهن ته عدالتي حڪمن تي عمل نه ڪيو ويو ته ملڪ جي چيف ايگزيڪٽو خلاف ڪارروائي ڪرڻ ۾ دير نه ڪئي ويندي. جسٽس جواد ايس خواجا جي سربراهي ۾ سپريم ڪورٽ جي 2 رڪني بئنچ مڪاني چونڊن بابت ڪيس جي ٻڌڻي ڪئي. ٻڌڻي دوران اليڪشن ڪميشن جي وڪيل اڪرم شيخ جواب داخل ڪرائيندي موقف اختيار ڪيو ته عدالتي حڪم تي عمل ڪرڻ جي هر ممڪن ڪوشش ڪئي پئي وڃي. هـُن چيو ته ڪي پي ڪي هلندڙ سال مئي ۾ چونڊون ڪرايون وينديون، جڏهن ته پنجاب نومبر يا ڊسمبر ۽ سنڌ ۾ ايندڙ سال جنوري يا فيبروري ۾ چونڊون ٿينديون. اڪرم شيخ چيو ته اليڪشن ڪميشن ڄاڻايل تاريخن تي چونڊون ڪرائڻ لاءِ تيار آهي پر عدالتي حڪمن موجب چونڊن کان پهريان قانسازي ڪرڻي پوندي. ان موقعي تي جسٽس سرمد جلال عثماني ريمارڪس ڏيندي چيو ته چونڊون ڪرائڻ لاءِ قانوني گهرجون پوريون ڪرڻ اليڪشن ڪميشن جو ڪم آهي. جسٽس جواد ايس خواجا چيو ته عدالت کي بااختيار چيو وڃي ٿو پر ان جي حڪمن تي عمل نٿو ڪيو وڃي. جسٽس جواد ايس خواجا چيو ته ائين پيو لڳي ڄڻ صوبا مڪاني چونڊون ڪرائڻ لاءِ تيار ئي ناهن. هـُن چيو ته ٻڌايو وڃي ته مڪاني چونڊن ۾ دير جو ذميوار ڪير آهي، سندس خلاف ڪارروائي ڪجي. جسٽس جواد ايس خواجا ڪاوڙ جو اظهار ڪندي چيو ته عدالتي حڪمن تي عمل نه ڪيو ويو ته ملڪ جي چيف ايگزيڪٽو خلاف ڪارروائي ڪرڻ ۾ دير نه ڪئي ويندي. سپريم ڪورٽ ڪيس جي وڌيڪ ڪارروائي اڱاري تائين ملتوي ڪري ڇڏي

 

ڪراچي جي رستن تان قبضا ختم ڪرايا وڃن:شرجيل انعام ميمڻ

ڪراچي(رپورٽر)سنڌ جي اطلاعات ۽ بلديات واري صوبائي وزير شرجيل انعام ميمڻ چيو آهي ته ضرورت ان ڳالهه جي آهي ته ڪراچي جو نئين سر ماسٽر پلان تيار ڪيو وڃي ۽ هتي رستن کي عوام لاءِ استعمال جي قابل بڻايو وڃي. اڄ ڪراچي جا وڌيڪ رستا يا ته دڪاندارن پنهنجي سامان ۽ ٻين قبضن ذريعي گهيري رکيا آهن يا وري ان تي ٺيلها ۽ ٻيا قبضا قائم ڪيا ويا آهن ۽ عوام کي صرف 20 سيڪڙو ئي رستو دستياب آهي. ميٽروپوليٽن ڪمشنر کي سمورن رستن تان قبضن جي خاتمي جي سختي سان هدايتون ڪيون ويون آهن ۽ جيڪڏهن ڪنهن آفيسر سان ڪنهن قسم جي ڪا بدتميزي ڪئي وڃي ته ان خلاف فوري طور تي ڪيس داخل ڪرايو وڃي. شهر کي عوام جي اوون ڪرڻ کانسواءِ صفائي سٿرائي جي مهم کي ڪامياب نٿو بڻائي سگهجي. عوام گهٽ ۾ گهٽ پنهنجي پاڙي ۽ علائقي ۾ پاڻ صفائي لاءِ ميدان ۾ اچي. هن مهم دوران هاڻ صرف آفيسرن ۽ ملازمن کي ڪم ڪرڻو پوندو ۽ هي مهم ان وقت تائين جاري رهندي جيستائين هن شهر ۽ صوبي کي مڪمل طور تي گندگي، قبضن ۽ دهشتگردي کان پاڪ نٿو ڪيو وڃي. اهڙن خيالن جو اظهار هن صاف سرسبز سنڌ، پرامن سنڌ مهم جي پنجين ڏينهن ڊسٽرڪٽ ويسٽ جي علائقي اورنگي ٽائون ۾ صفائي، وڻڪاري ۽ وال چاڪنگ جي خاتمي واري مهم ۾ شرڪت کان پوءِ شارع فيصل تي ايف ٽي سي برج جي آسپاس جي رستن جي ڀتين کان مختلف سياسي ۽ مذهبي جماعتن ۽ ڪمرشل وال چاڪنگ کي مٽائڻ کان پوءِ موجود ميڊيا سان ڳالهائيندي ڪيو. ان موقعي تي ڪمشنر ڪراچي شعيب احمد صديقي، ايم ڪيو ايم جي ايم پي اي سيف الدين خالد، مظاهر عامر، قومي اسيمبلي ميمبر محبوب عالم، ايم ڊي واٽر بورڊ قطب الدين شيخ، ميٽروپوليٽن ڪمشنر مسعود عالم، ڊپٽي ڪمشنر محمد علي شاهه، ايڊمنسٽريٽر ويسٽ سجاد احمد ميمڻ، ميونسپل ڪمشنر اشفاق ملاح ۽ ٻيا آفيسر به ساڻس گڏ هئا. ان موقعي تي صوبائي وزير رستن تي پاڻ ٻهارو ڏئي ٻوٽو لڳائڻ کان پوءِ ڀتين تي وال چاڪنگ جو خاتمو ڪيو. ان موقعي تي ميڊيا سان ڳالهائيندي شرجيل انعام ميمڻ چيو ته اسان هن شهر صوبي کي گندگي کان پاڪ بڻائڻ جو عزم ڪيو آهي ۽ هن شهر ۽ صوبي کي سرسبز ۽ پرامن صوبو بڻائي ئي ساهه پٽينداسين. هن چيو ته آئون ان ڳالهه کي اڄ به ميڊيا آڏو تسليم ڪريان ٿو ته هاڻ تائين پنهنجا گهربل نتيجا حاصل ناهن ڪيا ۽ 100 سيڪڙو صفائي جو اسان ڪوبه دعويٰ ناهي ڪري رهيا آهيون.

 

بينظير قتل ۽ ڪاهره بيس حملي ۾ اسان جا طالب ملوث هئا: مدرسه حقانيه جي ناظم جو اعتراف

راولپنڊي (م ڊ) مدرسه دارالعلوم حقانيه اڪوڙه خٽڪ جي ناظم تعليمات مولانا وصال احمد اعتراف ڪيو آهي ته بينظير ڀٽو قتل ۽ ڪاهرا بيس تي حملي ۾ اسان جي مدرسي جا طلب ملوث هئا، دهشتگردي جي خاص عدالت بينظير ڀٽو قتل ڪيس ۾ مدرسه دارالعلوم حقانيه اڪوڙه خٽڪ جي تعليمي ناظم مولانا وصال احمد جو بيان رڪارڊ ڪري ورتو، مولانا وصال احمد تسليم ڪيو ته بينظير ڀٽو جي قتل ڪيس ۾ نامزد 4 جوابدار خودڪش بمبار عبدالله عرف صدام، ٻيون خودڪش بمبار نادر عرف قاري اساعيل، رشيد احمد عرف ترابي، فيض محمد ڪسڪٽ ۽ ڪاهرا ۾ ايئرفورس جي بيس تي ميزائيل حملي جا جوابدار سيد عرب، گل روز، محمد شفيق انهن جي مدرسي جا طالب هئا جڏهن ته انهن جي ڪردار ۽ فعل جو اسان سان ڪوبه تعلق ناهي. ٻئي طرف گرفتار جوابدار رشيد عرف ترابي چيو ته هو حقانيه مدرسي جو شاگرد نه هو جڏهن ته مولانا وصال احمد جواب ڏنو ته ڪوڙ ڳالهائڻ جي ڪابه ضرورت ناهي، هي جوابدار مدرسي جو شاگرد هو جڏهن ته هن جوابدار جو مڪمل رڪارڊ به پيش ڪري ڇڏيو سينيئر سرڪاري پراسيڪيوٽر چوڌري محمد اظهر ٻڌايو ته هو ان ڪيس جي يزي سان ٻڌڻي مڪمل ڪرائي رهيو آهي ۽ ڪيس مارچ ۾ مڪمل ٿيڻ جو امڪان ظاهر ڪيو پيو وڃي.

 

سنڌ هاءِ ڪورٽ پاران ارباب رحيم خلاف انتقامي ڪارروائي کان روڪڻ لاءِ اسپيڪر کي نوٽيس جاري

ڪراچي (اسٽاف رپورٽر) سنڌ هاءِ ڪورٽ سينيٽ جي چونڊن دوران اڳوڻي وڏي وزير ارباب رحيم کي تحفظ ڏيڻ ۽ سندس خلاف انتقامي ڪارروائي نه ڪرڻ خلاف درخواست تي سنڌ اسيمبلي جي اسپيڪر ۽ ٻين عملدارن کي 2 مارچ تائين جواب داخل ڪرائڻ لاءِ نوٽيس جاري ڪيا ويا آهن. سنڌ هاءِ ڪورٽ جي جسٽس احمد علي شيخ جي سربراهي ۾ بئنچ ارباب رحيم جي پٽ ارباب عنايت جي درخواست تي ٻڌڻي ڪئي. درخواست ۾ موقف اختيار ڪيو ويو آهي ته ارباب رحيم سنڌ اسيمبلي جوميمبر آهي هو سينيٽ چونڊن ۾ ووٽ ڪاسٽ ڪرڻ چاهي ٿو پر کين خدشو آهي ته هو واپس آيو ته سندس خلاف انتقامي ڪارروائي ڪئي ويندي. درخواست ۾ استدعا ڪئي وئي آهي ته ارباب رحيم کي تحفظ فراهم ڪري سندس خلاف انتقامي ڪارروائي کان روڪيو وڃي. عدالت اهڙي درخواست تي سنڌ اسيمبلي جي اسپيڪر، گهرو سيڪريٽري ۽ ٻين عملدارن کي 2 مارچ تائين جواب داخل ڪرائڻ لاءِ نوٽيس جاري ڪري ڇڏيا آهن.

 

ڪراچي جي مختلف علائقن ۾ پوليس ۽ رينجرز جون ڪارروائيون،3 ڏوهاري مارجي ويا

ڪراچي (رپورٽر) ڪراچي جي مختلف علائقن ۾ پوليس ۽ رينجرز سان مقابلن ۾ منشيات فروش سميت 3 ڏوهاري مارجي ويا، جڏهن ته پوليس هڪ گهر تي ڇاپو هڻي 30 ڪلو گرام ڌماڪيدار مادو هٿ ڪري ورتو. گلشن اقبال واري علائقي ۾هٿياربندن گهر اندار داخل ٿيڻ جي ڪوشش ڪئي ته اطلاع تي پوليس پهچي وئي. پوليس کي ڏسندي هٿياربندن فائرنگ ڪري ڏني، جوابي فائرنگ ۾ هڪ ڦورو مارجي ويو. لياري جي بغدادي واري علائقي ۾ رينجرز ڪارروائي دوران هڪ ڏوهاري کي ماري ڇڏيو، جڏهن ته مومن آباد واري علائقي ۾ پوليس جي فائرنگ ۾ هڪ منشيات فروش مارجي ويو. ٻي طرف اتحاد ٽائون واري علائقي ۾ پوليس ڳجهي اطلاع تي هڪ گهر تي ڇاپو هنيو، جنهن دوران 30 ڪلو گرام ڌماڪيدار مادو هٿ ڪري ورتو. ايس ايس پي انويسٽي گيشن لطيف صديقي چيو ته ڪارروائي دوران ڪابه گرفتار عمل ۾ نه آئي آهي. هوڏانهن رينجرز نارٿ ڪراچي ۽ ناظم آباد واري علائقي ۾ ٽارگيٽيڊ آپريشن ڪري پابندي مڙهيل تنظيم جي 4 دهشتگردن کي گرفتار ڪري ورتو. رينجرز ترجمان جو چوڻ آهي ته گرفتار ڪيل دهشتگردن وٽان هٿيار هٿ ڪيا ويا آهن.

 

صادق فقير جو اوچتو وڇوڙو ڪنهن صدمي کان گهٽ نه آهي:شرميلا فاروقي

ڪراچي(رپورٽر) وزيراعليٰ سنڌ جي ثقافت ۽ سياحت بابت معاون خصوصي شرميلا فاروقي استاد صادق فقير جو مڪي مديني ۾ ٽريفڪ حادثي ۾ فوت ٿيڻ تي ڏک جو اظهار ڪندي چيو آهي ته صادق فقير جو اوچتو دنيا کي ڇڏڻ ڪنهن صدم
ي کان گهٽ نه آهي. هو هڪ قابل فنڪار هجڻ سان گڏ سٺو استاد به هو. ان جي وڃڻ سان سنڌ هڪ عظيم فنڪار کان محروم ٿي وئي آهي شايد ان جي وفات سان پيدا ٿيل خال ڪڏهن ڀرجي نه سگهي. اهو سنڌ جي ڪلاسيڪل موسيقي لاءِ وڏو سانحو آهي. شرميلا فاروقي وڌيڪ چيو ته ثقافت کاتو ۽ سنڌ حڪومت هر ممڪن مدد لاءِ تيار آهي. الله تعاليٰ مرحوم جي گهرواري ۽ سالي کي جلد صحتيابي ڏئي جيڪي ان حادثي ۾ ساڻس گڏ هئا ۽ اسپتال ۾ داخل آهن. هن چيو ته وزيراعليٰ سنڌ سان ڳالهائينديس ته مرحوم کي پرائڊ آف پرفارمنس ايوارڊ سان نوازيو وڃي. شرميلا فاروقي مرحوم صادق فقير جي مغفرت ۽ پونئرن کي اهو صدمو برداشت ڪرڻ لاءِ دعا ڪئي.

 

پنجاهه سالن جي مونيڪا جيمز بانڊ سيريز جي نئين فلم اسپيڪٽر ۾ هيروئن ڪاسٽ

لاس اينجلس(شوبز نيوز)ريشمي وار، وڏو قد ۽ سدا بهار خوبصورت اداڪاره مونيڪا کي جيمز بانڊ سيريز جي نئي فلم” اسپيڪٽر”  ۾ خاص ڪردار  جي لاءِ ڪيو ويو آهي،   مونيڪا جو چون هو ته 50 سال جي اداڪاره کي جيمز بانڊ ۾ ڪهڙو ڪم آهي، جڏهن ته فلم ڊائريڪٽر سام مينڊز جو چوڻ هو ته تاريخ ۾ پهريون دفعو جيمز بانڊ فلم جي لاءِ هڪ ملندڙ جلندڙ عورت جي ضرورت آهي ۽ مونيڪا ان لاءِ مناسب آهي، مونيڪا ان کان پهرين ڪيترين ئي فلمن ۾ خاص ڪردار ادا ڪري چڪي آهي.

 

شاه رخ ۽ بالي ووڊ جي ٻين اداڪارن جي موجودگيءَ ۾ پروگرام سيٽ تي باه لڳي وئي

نئي دهلي(شوبز نيوز) ڀارتي ميڊيا جي مطابق بالي ووڊ اسٽار شاه رخ، ڪرن جوهر، فرح خان، عاليه بٽ ۽انوڪشا شرما ڀارتي ٽي وي پروگرام “  انڊيا پوڇي گا سب سي شانا ڪون” جي شوٽنگ ۾ مصروف هئا ته اوچتو سيٽ تي تي باه ڀڙڪي پئي جنهن کان پوءِ سڀ ماڻهون حفاظت سان نڪرڻ ۾ ڪامياب ٿي ويا. پوليس جي ريپورٽ جي مطابق باه شارٽ سرڪٽ مان لڳي، جنهن ۾ سڀ ماڻهون  خوش قسمتيءَ سان محفوظ رهيا ۽ فائر برگيڊ موقع تي پهچي باه تي ضابطو آندو .

 

پاپ اسٽار ميڊونا پرفارمنس دوران اسٽيج تان ڪري پئي

نيويارڪ(شوبز نيوز)فنڪارن جي پرفارمنس دوران زمين تي ڪرڻ جا ڪيترائي واقعا پهريان به رونما ٿي چڪا آهن پر هن ڀيري اهڙو واقعو پاپ اسٽار ميڊونا سان پيش آيو جيڪا هڪ ايوارڊ تقريب دوران پرفارم ڪندي اوچتو اسٽيج جي ڏاڪڻين تي ڪري پئي، ميڊيا رپورٽن مطابق تقريب ۾ پرفارمنس دوران ميڊونا معمول مطابق پنهنجو گائون لاهي رهي هئي پر ان دوران هو پنهنجو توازن برقرار نه رکي سگهي ۽ چيلهه ڀر اسٽيج جي ڏاڪڻين تي ڪري پئي جڏهن ته موقعي تي جي نزاڪت کي ڏسندي هن فوري طور تي پاڻ کي سڀالي ورتو ۽ اسٽيج تي اچي پنهنجو گانو مڪمل ڪيو.