تازيون خبرون

Monthly Archives: January 2015

ورلڊ ڪپ 2015ع ۾ دنيا جا خطرناڪ ترين بالر موجود

ڪراچي (اسپورٽس نيوز) ڪرڪيٽ جي وڏي ميلي ۾ بيٽسمينن ۽ بالرن جي جنگ هميشه ڪرڪيٽ جي سونهن کي اجاڳر ڪندي رهي آهي، ورلڊ ڪپ 2015 ۾ به اها جنگ لڳڻ واري آهي، ايندڙ ورلڊڪپ ۾ جتي ڀلا بيٽسمين شامل آهن، اتي دنيا جا خطرناڪ ترين بالر به موجود آهن، جيڪڏهن بالرن جو ذڪر ڪجي ته پاڪستاني بالر محمد عرفان، ڊيل اسٽين، مورني مورڪل، مچل جانسن، ٽرينٽ بولٽ، ٽم سائوٿي، لتيش ملنگا، جيمز اينڊرسن خطرناڪ بالرن ۾ ليکيا ويندا آهن، جيڪي بيٽسمينن کي آئوٽ ڪرڻ سميت بائونسر ڪرائي دٻاءَ وجهڻ جي ڀرپور صلاحيتون پڻ رکن ٿا. ون ڊي ڪرڪيٽ جي تاريخ ۾ خطرناڪ بالرن ۾ جوئيل گارنر، ميلڪم مارشل، ڊينس للي، عمران خان، وسيم اڪرم، ڪپيل ديو، وقاريونس، ايلن ڊونلڊ، گلين مڪگرا، بريٽ لي، رچرڊ هيڊلي، شعيب اختر جهڙا بالر شامل رهيا آهن.

 

ڀارت ايندڙ سال ٽي ٽوئنٽي ورلڊ ڪپ جي ميزباني ڪندو،فيوچر ٽوئر پروگرام جو اعلان

دبئي (اسپورٽس نيوز) آءِ سي سيءَ فيوچر ٽوئر پروگرام جو اعلان ڪندي ڀارت کي ٽي ٽوئنٽي ورلڊ ڪپ 2016ع جي ميزباني ڏئي ڇڏي، جڏهن ته انگلينڊ ورلڊڪپ 2019ع جي ميزباني ڪندو. آءِ سي سي هيڊ ڪوارٽر دبئي ۾ ڪائونسل اجلاس دوران فيوچر ٽوئر پروگرام جو اعلان ڪيو ويو، جنهن موجب ڀارت ايندڙ سال ٽي ٽوئنٽي ورلڊ ڪپ جي ميزباني ڪندو، جڏهن ته 2019ع تائين طئه ٿيل شيڊول ۾ انگلينڊ ٽِن وڏن ايونٽن جي ميزباني ڪندو. انگلينڊ 2017ع ۾ چيمپئنز ٽرافي ۽ وومين ورلڊ ڪپ جي ميزباني ڪندو، اهڙيءَ طرح 2019ع ۾ 30 مئي کان 15 جولاءِ تائين هلندڙ ون ڊي ورلڊ ڪپ جي ميزباني به انگلينڊ حوالي ڪئي وئي آهي. ٻئي طرف بنگلاديش جي حصي ۾ 4 سالن جي فيوچر ٽور پروگرام مان ٻه ايونٽ آيا، ايندڙ سال بنگلاديش انڊر 19 ورلڊ ڪپ ۽ 2018ع ۾ ورلڊ ڪپ ڪواليفائر جي ميزباني ڪندو جڏهن ته نيوزيلينڊ 2018ع ۾ انڊر 19 ورلڊ ڪپ جي ميزباني ڪندو ۽ ويسٽ انڊيز 2018ع ۾ وومين ٽِي ٽوئنٽي ورلڊ ڪپ جي ميزباني ڪندو. جڏهن ته هن ڀيري به ڪنهن ننڍي ايونٽ کان پاڪستان کي پري رکيو ويو آهي

 

جيڪب آباد ۾ چار پيٽرول پمپ سيل

 

جيڪب آباد ۾حاجي محمد اڪرم ابڙي ۽ آبادگار اڳواڻ راجا جکراڻي سميت چئن ڄڻن جا پمپ سيل، شهري اتحاد ۽ ضلعي انتظاميه ۾ نئين سرد جنگ شروع ٿي وئي خبر موجب جيڪب آباد ۾ ڊي سي راجا شاهه زمان کهڙي پاران شهيد الله بخش پارڪ ويجهو شهري اتحاد  جي صدر ۽ مسلم ليگ ن جي اڳواڻ حاجي محمد اڪرم ابڙو جي 60 سال قديمي قيصر پئٽرول پمپ کي سيل ڪرائڻ تي اسسٽنٽ ڪمشنر ڪاشف علي ٽيپو پوليس ساڻ ڪري پمپ سيل ڪرڻ جي ڪوشش ڪئي ته صدر شهري اتحاد حاجي محمد اڪرم ابڙو ۽ اي سي ڪاشف علي ٽيپو ۾ سخت جملن جي ڏي وٺ ٿي پئي جتي شهري اتحاد ۽ مسلم ليگ ن جي ڪارڪنن پهچي ڊي سي خلاف ڇتي نعريبازي پڻ ڪئي جنهن سبب صورتحال خراب ٿي وئي . اطلاع تي ايس ايس پي جيڪب آباد ظفر اقبال ملڪ شهر جي مختلف ٿاڻن سٽي، صدر، ائيرپورٽ، سول لائين ٿاڻن ۽ سي آءِ اي پوليس جي وڏي نفري ساڻ ڪري پيٽرول پمپ تي پهتو ۽ پوري علائقي کي پوليس اهلڪارن ڪڙو چاڙهي ڇڏيو جڏهن ته ايس ايس پي ۽ محمد اڪرم ابڙو وچ ۾ هڪ اڌ ڪلاڪ تائين ڳالهيون ڪيون ويون ۽ وپاري اڳواڻ مير احمد علي بروهي جي مداخلت تي شهري اتحاد جو وفد ڊي سان ڳالهيون ڪرڻ لاءِ ڊي سي آفيس پهتو ته ايس ايس پي صدر شهري اتحاد محمد اڪرم ابڙو ذاتي گارڊن مٿان تشدد ڪري هٿيار کسي ورتا جتي هڪ ڀيرو ٻيهر صدر شهري اتحاد ۽ ايس ايس وچ ۾ سخت منهن مار ٿي پئي ۽ ايس ايس پي اڪرم ابڙو مٿان پڻ ڏمرجي پيو ۽ سخت نتيجا ڀوڳن جون ڌمڪيون ڏنيون ان سلسلي ۾ ايس ايس پي ٻڌايو ته اڪرم ابڙي جي گارڊن  مون کي ڏسي هٿيار سڌا ڪيا ويا آهن ۽ انهن پوليس سان وڙهڻ جي ڌمڪي به ڏني. صدر شهري اتحاد حاجي محمد اڪرم ابڙو صحافين کي ٻڌايو ته منهنجو پيٽرول پمپ غير قانوني ڪو نه آهي 1954 ۾ مون پيٽرول پمپ جو لائسنس ورتو هو ۽ انهي لائسنس تي منهنجو پيٽرول پمپ هلي رهيو آهي صرف منهنجو لائسنس نئون ڪرائڻ جي ضرورت آهي پر ڊي سي ڄاڻي واڻي منهنجي سياسي مخالفن جي چوڻ تي اسان خلاف سياسي انتقامي ڪاروايون ڪري رهيو آهي جيڪي برداشت نه ڪنداسين جيڪڏهن اوهان کي غير قانوني پيٽرول پمپن خلاف ڪاروائي ڪرڻي آهي ته پوءِ اوهين پهريان اهي سيل ڪريو آئون به پنهنجو پمپ لائسنس نئون نه ٿيڻ تائين بند رکندس. ٻئي پاسي ڊپٽي ڪمشنر جيڪب آباد راجا شاهه زمان صحافين کي ٻڌايو ته اسين ڪنهن خلاف ڪا انتقامي ڪاروايون نه پيا ڪيون اسان کي وفاقي ۽ صوبائي حڪومت پاران ايراني تيل وڪرو ڪندڙ غير قانوني پيٽرول پمپن خلاف ڪاروائي ڪرڻ جون هدايتون مليون آهن جنهن تحت اسين ڪاروائي ڪئي آهي محمد اڪرم ابڙو وٽ پمپ جو لائسنس ضرور آهي جيڪو 2006 تائين نئون نه ٿيل آهي ۽ لائسنس به برما شيل نالي هڪ ڪمپني جو آهي جيڪا هاڻي شيل ۾ تبديل ٿي وئي آهي هن چيو ته محمد اڪرم ابڙو وٽ تيل جي رسيد به ڪو نه آهي ان مان ثابت ٿئي ٿو ته هو ايراني پيٽرول وڪرو ڪري رهيا آهن جيڪب آباد ۾ ابڙن جا سياسي حريف جکراڻي آهن ۽ هتي جکراڻين جا به ٻه پمپ سيل ڪيا آهن.

 

تبديليءَ جي پُڪار؛ڊاڪٽر عائشه صديقه

اِهو ڏسي سٺو ٿو لڳي ته رياست پنجاب ۾ ڪجهه قدم کنيا آهن. ويڙهاڪ گروهن جي ميمبرن جون گرفتاريون هيءَ حقيقت دل کي ڇهندڙ آهي ته پوليس جنهن کي ڪجهه مهينا اڳ ئي بيڪار سمجهيو ٿي ويو تنهن به سندرا ساهڻ شروع ڪيا آهن. نتيجي ۾ پنجاب جي ڪجهه علائقن ۾ ماڻهن ڏوهن جي مجموعي شرح ۾ گهٽتائيءَ بابت ڳالهائڻ شروع ڪيو آهي. جڏهن ته ڪجهه مخصوص گروهن جا ميمبر به ڳڻتيءَ ۾ پئجي ويا آهن، ان کان به وڌيڪ اهم ته انهيءَ تي سٺن شدت پسندن طرفان ڪو ردعمل سامهون آيو آهي ۽ نه ئي وري خراب طرفان ان جو مطلب ته پنجاب ۾ اهڙن ماڻهن کي ڪنهن وقت به ٽوڙهو وجهڻ ممڪن رهيو آهي. مونکي انهن ڏٺن وائٺن صحافين جا اهي دليل به ياد ٿا پون، جيڪي چوندا هئا ته پنجاب ۾ جيئن ته فوجي آپريشن ممڪن ناهي، تنهنڪري اهڙن گروهن کي ڏٺو اڻ ڏٺو ڪرڻ ۽ پاڻ کي ٻين ويڙهن ۾ مصروف رکڻ ئي بهترين حربو هو، ڪنهن به هن حقيقت تي ڌيان نه ڌريو ته پنجاب کي ڪنهن وقت به انٽيليجنس ادارن ۽ پوليس جي گڏيل سهڪار سان صاف ڪري سگهڻ ممڪن رهيو آهي. پر کين هميشه جيڪي وڻين سو ڪرڻ جي ڍر پئي رهي آهي ۽ ڪنهن به سندن لغام ڇڪڻ جي ڪوشش نه ڪئي آهي.ان جو مطلب پڪ سان اِهو بيهي ٿو ته رياست جي ارادو ڪري وٺي ته اُها ويڙهاڪن خلاف بنا ڪنهن رَک رکاءَ وارو رويو اختيار ڪري سگهي ٿي.

سو انهيءَ سلسلي ۾ ڪنهن مامري ۾ منجهڻ کان اڳ اسانکي نه وسارڻ گهرجي ته ماڻهو ته ان کان اڳ به گرفتار ۽ لاڪ اپ ڪيا ويندا رهيا آهن. اهي جي هفتن ۾ نه به سهي ته مهينن ۾ آزاد ٿي ويندا. هر ضلعي ۾ اهڙن شڪي ماڻهن جون فهرستون موجود هجن ٿيون، جن کي جڏهن به امن امان جو ڪو مسئلو ڪَرُ کڻندو آهي ته سوگهو ڪيو ويندو آهي. سو اِهو طريقيڪار جيڪڏهن وري به ورجايو وڃي ٿو، اِها حيرت جهڙي ڳالهه هوندي. جيڪڏهن گرفتار ڪيل انهن ماڻهن منجهان اڪثريت ڪنهن نه ڪنهن نموني آزاد ٿي به وڃي ٿي ته پوليس کي انهن تي ڪرڙي نظر رکڻ جي پاڻ ۾ صلاحيت ضرور پيدا ڪرڻي پوندي. نه رڳو پوليس جي صلاحيت پر ڪجهه ويڙهاڪ گروهن جي لاڳيتن ڪاررواين سبب سندن نگراني ڪرڻ وارو ٽاسڪ منجهه ڏکيو بڻجي وڃي ٿو. گهڻن ماڻهن جو خيال آهي ته سرڪار ۽ فوج اڃا به ڪيترن ئي گروهن تي سخت هٿ نه کنيو آهي ڇو جو اهي رياست لاءِ ڪو مسئلو پيدا نه ڪري رهيا آهن. ان کان به اهم ته اسانکي چيو پيو وڃي ته بهتر سوچ ذريعي انتهائي احتياط سان مرحليوار اڳتي وڌڻو آهي. سور رٿا هي آهي ته سڀ کان اول خراب گروهن جو خاتمو آڻجي ۽ ان کانپوءِ ٻين ۾ هٿ وجهجي، چٽي نموني جيڪو چيو وڃي ٿو تنهن تحت ته ائين ناهي پر هي اِهو آهي جيڪا سول سوسائٽي تشريح ڪري رهي آهي. اهڙي رٿا ۾ کوڙ ساتريون خاميون به آهن.

اول ته عالم آشڪار آهي ته ماضيءَ ۾ تنهن گروهن کي ٿڪائي ٿڪائي بي ساهو ڪري پنهنجا اصل گروهه ڇڏائي انهن گروهن ۾ شموليت ڪرائي ويندي هئي، جيڪي ڪارروائي ۾ يقين رکندڙ هجن ۽ تشدد جو مظاهرو به ڪندا هجن، سو اهڙن نام نهاد خود ساخته گروهن مان نڪرندڙن جي سيڪيورٽيءَ لاءِ ڪجهه نه ڪجهه هئڻ گهرجي. بهرحال ماڻهن سان جهاد جو واعدو ڪيو ويو ۽ ان لاءِ ڀرتي به ڪيا ويا.ٻيو ته نظرياتي طور انهن گروهن جيڪي گرفتار ڪيا پيا وڃن ۽ جن کي آجو ڇڏيو ويو آهي تن ۾ ٿورو ئي فرق آهي. اهي گروپ جي پنهنجي بقا چاهيندا ته سٺن ٻارن وانگر رياست لاءِ ڪي مشڪلاتون پيدا نه ڪندا، سو پنهنجي بقا لاءِ اهي اهڙي يڪمشت ٿيندا جو بچي به سگهن ۽ ضرورت پوڻ تي وري اڀري به سگهن. وسارڻ نه گهرجي ته اهڙن گروهن جي بقا سندن نظريي سان ڳنڍيل آهي، جيڪو جيئن جو تيئن برقرار رهندو.اهي محفوظ گروهه جن ۾ اڃا هٿ نه وڌو ويو آهي تن اڳواڻ ئي پنهنجو پاڻ کي نئون رخ ڏيڻ شروع ڪيو آهي. سوشل ميڊيا تي توڙي سندن تحريري مواد تي نظر ڦيرائبي ته صاف نظر ايندو ته اهي اهڙو رستو اختيار ڪندا جنهن سان رياست کي ڪو خطرو درپيش نه ٿئي ۽ پاڻ به ماڻهن سان ڳنڍيل ۽ سلهاڙيل رهن. انهن مان اڪثر گروهن توهين رسالت ۽ چارلي هينڊو واري جاري معاملي کي اڳ ئي هٿ ۾ کنيو آهي. سندن پبلسٽيءَ تي نظر وجهڻ سان واضح ٿئي ٿو ته هنن ڪاميابيءَ سان پنهنجو پاڻ کي انهن گروهن جي صف ۾ آڻي بيهاريو آهي، جن کي پرامن سمجهيو وڃي ٿو.

مثال طور چارلي هينڊو جي نندا لاءِ پاڪستان علماءَ ڪائونسل ۽ انهن گروهن جيڪو موقف اختيار ڪيو سو هڪڙو ئي هو. سماجي ۽ سياسي طرح سندن موقف غلط نه ٿو ڀانئجي، جنهن جو مطلب هي ٿيو ته سندن اهميت رهندي ۽ اهي عام ماڻهوءَ کي متاثر به ڪندا رهندا. اهي ماڻهو جن کي پشاور سانحي تي صدمو رسيو ۽ ان جي مذمت ڪيائون، تن لاءِ سول سوسائٽيءَ جي تحريڪ به درست آهي، تنهن هوندي به اِهو امڪان پنهنجي جاءِ تي موجود آهي ته شدت پسند گروپ پنهنجي سوچ ۽ فڪر سبب کوڙ سارن ماڻهن لاءِ باعث ڪشش رهندا، ڇو جو انهن گروهن جو فڪر پنهنجي جاءِ تي اڃا به ڪم ڏيکاري ٿو.اسان ڪجهه معاملن کي چٽو ٿيڻو پوندو، شدت پسندي، دهشتگرديءَ کان به وڌيڪ خطرناڪ آهي، ڇو جو اُها اڳ ۾ عرصو جٽاءُ ڪري ٿي ۽ فوري طور ان جو پتو به نه ٿو لڳي، ڇا جي ڪري جو شدت پسندي ڪنهن فوري پر تشدد ڪارروائيءَ جي صورت ۾ ظاهر نه ٿي ٿئي.

ساڳي طرح اهي گروهه ڪڏهن به مکيه ڌارا ۾ شامل ٿي سگهن ٿا. لشڪر طيبه ۽ ٻين گروپن کي فلاح ۽ بهبود جو ڍانچو وڌائڻ جي اجازت ڇا مدد ناهي، اهڙي قسم جي مدد هنن گروپن کي پنهنجي اصليت لڪائڻ ۽ تبديل نه ٿيڻ ۾ مدد فراهم ڪري ٿي. سو ڊاري جي آخر ۾ پرڏيهي آفيس جماعت الدعوه تي پرائي پابندي جو ٻيهر اعلان ڪري ٿي، جنهن جي حافظ سعيد ترديد ڪندي چئي ٿو ته سندس اثاثن کي منجمند ڪرڻ جو اثر فقط سندس ذات تي پيو آهي، ڇو جو سندس پينشن سندس اڪائونٽ ۾ اچي ٿي، جنهن جو مطلب اِهو ٿيو ته مٿس توڙي سندس جماعت تي ڪنهن به قسم جو ڪوبه اثر نه پيو آهي، جڏهن ته تنظيم جي ٻين معاملن کي ڪنهن به نموني هٿ ئي نه لاتو ويو. نه ئي وري لشڪر محمد جي الرحمان ٽرسٽ سميت ٻين تنظيمن جو ڪو نالو به ورتو ويو.

جڏهن ته ڪي تجزيا نگار پڻ حافظ سعيد جو دفاع ڪندي نظر اچن ٿا ۽ چون ٿا ته هن خلاف ثبوت نه هئڻ سبب رياست کيس هٿ نه ٿي لائي. جيتوڻيڪ لشڪر طيبه جي مختلف جنگي محاذن ۾ ملوث هئڻ ۽ القاعده سان لاڳاپن بابت پاڪستان توڙي دنيا وٽ کوڙ سارو مواد موجود آهي. جيڪڏهن هن دليل لاءِ گهڙي پن لاءِ همدردي ڏيکاري ته ڪجهه پريشان پاڙيسرن خلاف ضمانت طور ڪجهه گروهن کي برقرار رکڻو آهي، پر ان دليل خلاف ٻيو دليل هي آهي ته تيزيءَ سان تبديل ٿيندڙ عالمي حالتن جي روشنيءَ ۾ پاڪستان لاءِ اهڙن گروهن کي برقرار رکڻ ۽ استعمال ڪرڻ تمام گهڻو مهانگو هوندو، سو اهڙن گروهن مان جند ڇڏائڻ جو منصوبو هاڻي ئي ٺاهڻ گهرجن.

سو ضروري آهي ته ويڙهاڪن جي سوچ کي غير جانبدار بڻائجي، جنهن جي سماج ۾ بهرحال حمايت موجود آهي.

 

افغانستان ۾ جهاد واري پاليسي؛ماروي سرمد

پاڪستان جي فوجي اسٽيبلشمينٽ جا پاڻمرادو ترجمان بڻيل ڪي شخص جڏهن هَرو ڀَرو به پنهنجي ڳالهه کي درست ۽ سچُ ثابت ڪرڻ لاءِ حقيقتن کي ٽوڙن ۽ مروڙِن ٿا ۽ تاريخ سان کِينس ڪن ٿا ته ان تي هاڻي ڪنهن کي به حيرت نه ٿي ٿئي. جڏهن به ڪير جهادي گروپن جي پيداوار کي پاڪستان جي اختيار ڪيل افغان جهاد واري حڪمت عمليءَ سان ڳنڍي ٿو ته اهي انهيءَ حقيقت باوجود ته پاڪستان  هينئر هڪ تبديل ٿيل ملڪ آهي، جيڪو پنهنجي اڳين پاليسين ۾ تبديليون آڻي رهيو آهي، ٺهه پهه نصيحت ڪندي نظر اچن ٿا ته تاريخ ۾ وري نهاريو، ڇو ته ان وقت پاڪستان وٽ اها حڪمت عملي اختيار ڪرڻ کانسواءِ ٻيو ڪو چارو ڪين هو. سو ڇا واقعي به ائين ئي آهي؟جيتوڻيڪ اصل گناههُ جا پيرا 1949ع ڌاري ئي ملن ٿا، جنهن ۾ پاڪستان جي ممڪنه آئين ۾ ناقابل خواهش توسيع ڪئي وئي هئي پر دفاعي سطح تي ان جو ڏسُ وري 1970ع واري ڏهاڪي ۾ ملي ٿو، جڏهن اسان پنهنجي پاڙيسري افعانستان ۾ باغين جي حمايت ڪرڻ شروع ڪئي هئي. هن حڪمت عملي جو مصنف ذوالفقار علي ڀٽو ئي هو، هيءَ حڪمت عملي تنهن وقت ۾ بلوچستان ۾ شروع ٿيل شدت پسنديءَ سان گڏوگڏ اختيار ڪئي وئي هئي، جنهن پاڪستان جي حساس پرڏيهي معاملن منجھان جنم ورتو هو.جنهن کي اسان افغان جهاد سڏيون ٿا، سو اصل ۾ 1979ع کان گهڻو اڳ شروع ٿيو هو، جڏهن 1973ع ڌاري ذوالفقار علي ڀٽو جي پاڪستان انهن شدت پسند مذهبي گروهن جي حمايت ڪرڻ شروع ڪئي هئي، جيڪي افغانستان ۾ دائود خان جي سرڪار جي مخالفت ڪري رهيا هئا. هي اُهو زمانو هو جڏهن پاڪستان، آمريڪا جي ڪميونزم فوبيا کي، سندس ڏوڪڙن ۽ هٿيارن تي اک رکندي پنهنجي فائدي ۾ استعمال آڻڻ شروع ڪيو هو.لڳ ڀڳ اهڙو سبق آمريڪا، 1950 ۽ 1960ع جي ڏهاڪن ۾ پاڪستان جي فوج سان ڪيل معاهدن ۾ پرائي به چُڪو هو. انهيءَ حڪمت عمليءَ تحت ئي اسان 1972ع ۾ آمريڪا کي پنهنجا بندرگاهه اڏن طور استعمال ڪرڻ جي آڇ به ڪئي هئي.  پاڪستان هڪ پاسي ته سوويت يونين جي امڪاني اڳڀرائي جي صورت ۾ آمريڪا کي بار بار دفاعي تعاون جون اپيلون ڪري رهيو هو، ساڳي ئي وقت پشاور ڪوئيٽا ۽ اسلام آباد ۾ باغي افغان اڳواڻن کي پناهه ڏيڻ به شروع ڪري ڇڏي هئائين. رباني ۽ حڪمت يار سان حڪومتي عملدارن جي ملاقاتن جو به نه رڳو سلسلو هلندو رهيو پر پٺتي افغانستان ۾ سرگرميون جاري رکڻ لاءِ سندن ڀرپور مدد به ڪئي ويندي رهي. افغانستان ۾ تنهن زماني ۾ دائود ڪامياب فوجي بغاوت جي ذريعي ظاهر شاهه جي سرڪار جو تختو اونڌو ڪري ظاهر شاهه جي پنهنجي نوعيت جي جمهوريت، پراجيڪٽ ڊيمو ڪريسيءَ جو خاتمو آندو هو. سو دائود جي پشتونستان واري منصوبي ۽ ڊريونڊ لائين جي مخالفت (ڊريونڊ لائين پاڪستان ۽ افغانستان وچ ۾ بيٺڪي راڄ واري سرحد آهي) سبب پاڪستاني اسٽيبلشمينٽ دائود کي اقتدار ۾ ڏسڻ نه ٿي گهريو، جيتري قدر ڪميونسٽ خيال رکندڙ پيپلز ڊيموڪريٽڪ پارٽي آف افغانستان (پي ڊي پي اي) خلاف دائود سرڪار طرفان پرتشدد رويي اختيار ڪرڻ جو معاملو آهي ته ان خلاف دائود سرڪار کي سخت مزاحمت کي منهن ڏيڻو پيو هو. 1978ع واري سور انقلاب ذريعي دائود خان پٺاڻ جي سرڪار جو خاتمو آيو ۽ ان جو خاتمو انتهائي پرتشدد انداز ۾ ٿيو. صدين کان وٺي افغانستان جي قبيلائي حصن جا مرڪز سان عجيب و غريب اقتداري لاڳاپا پئي رهيا آهن. جيتري قدر افغانستان جي انتظامي ڪنٽرول جو تعلق آهي ته ان ۾ هميشه ڪابل کي برتري پئي حاصل رهي آهي.پيپلز ڊيموڪريٽڪ پارٽي آف افغانستان (پي ڊي پي اي) هيءَ حقيقت پرکي نه سگهي هئي ته پنهنجي نوعيت ۾ انتهائي عدمُ مرڪزيت وارو هئڻ سبب افغانستان تاريخي طور ڪابل ۽ ملڪ جي باقي حصن ۾ توازن براقرار پئي  رکيو آهي. مرڪز کي تمامُ گهڻو مضبوط ڪندي رياست جي سوشلزمُ جي طرز تي تڪڙي جوڙ جڪ لاءِ پي ڊي پي اي سماجي سڌارن وارو ڪم شروع ڪري ڏنو، جنهن کي اسلامي شدت پسند گروپن ”غير افغان“ پيش رفت سمجھيو. نياڻي کي ڏاج ۾ رقم کي غير قانوني قرار ڏيڻ، مذهبي عالمن جي اثر رسوخ کي محدود ڪرڻ توڙي زمين رکڻ جي هڪ حد مقرر ڪرڻ لاءِ سخت زميني سڌارا (لينڊ رفارسز) آڻڻ جهڙا پي ڊي پي اي جا قدم ان جا ناقابل معافي گناههُ بڻجي ويا. سو حالتن کي پروڙڻ ۽ سمجھڻ جي ڪوتاهه نظري ۽ عجلت ۾آندل سڌارن جي ڪري پي ڊي پي اي جي سرڪار خلاف بغاوت جنم ورتو، جيڪا ان وقت تائين خالق ۽ پر شام جي ٻن مضبوط گروپن ۾ هڪ تقسيم ٿيل انتطاميا بڻجي وئي هئي، سوويت نواز افغانستان اڳواڻ نور محمد تيرا ڪئي ۽ سوويت مخالف اڳواڻ امين ۾ شديد ڇڪتاڻ کانپوءِ سوويت يونين 1979ع ۾ سڌي مداخلت جو فيصلو ڪيو. ان کان اڳ سوويت يونين جي دستاويزن موجب ٽرائيڪا افغانستان ۾ طاقت جي استعمال جي مخالفت ڪئي هئي. سو انقلاب کانپوءِ مٿي ڄاڻايل واقعن (دائود خلاف فوجي بغاوت کي عوام جي حمايت حاصل هئي) سبب سوويت يونين افغانستان ۾ سڌي مداخلت ڪئي، جڏهن ته پاڪستان وري ان خلاف جيڪا پراڪسي وار (ڳجھي لڙائي) شروع ٿي، تنهن ۾ استعمال لاءِ آمريڪا، برطانيا ۽ سعوديءَ کان مالي مدد حاصل ڪئي. آمريڪا جنهن ان وقت تائين افغانستان کي انتهائي غير سنجيده ٿي ورتو، سو به ڪو مروڙي اٿيو ۽ سوويت قبضي خلاف پاڪستاني پاليسيءَ کي نه رڳو ساراهيو پر ان جي مدد به ڪئي. ائين ڏوڪڙ، هٿيار، منشيات ۽ جھجھي ناڻي سان گڏ واپار شروع ٿيو، جنهن سان اسلام آباد ۾ صندوقون ته ڀريون پر ان مان ڪجهه رقم هارَ ويرَ جي صورت ۾ افغانستان جي جهادي گروپن تائين به پهتي. حسين حقانيءَ بلڪل درست لکيو آهي ته آمريڪا، سوويت يونين جو رت وهائڻ جو خواب ڏٺو هو.ستم ظريفي چئجي ته ڀٽو جيڪو سوشلزم جي نعري ۽ فڪر هيٺ اقتدار ۾ آيو هو، سو افغانستان ۾ جهادي منصوبو شروع ڪرڻ جو ذميوار بڻيو، جنهن جي نتيجي ۾ افغانستان ۾ سماجي ايجنڊا کي ڪاپاري ڌڪ لڳو، سوويت خطري وارو ورهيه پراڻو نسخو استعمال ڪندي فوجي آمر جنرل ضياءُ الحق، ڀٽي جي جهادي افغانستان وارو منصوبو اڳتي وڌايو.اهڙي قسم جو خطرو اڻويهين صديءَ جي وارم واٽر واري ٿيوريءَ جو جنميل آهي، جڏهن سمجھيو ويو هو ته سوويت يونين  سمنڊ جي گرمُ پاڻي تائين پهچڻ گهري ٿو، جتي بندرگاهه برف سان ڄمي نه ٿاوڃن. جنهن جي ڪري برطانوي راڄ واري ڀارت (هاڻي پاڪستان) سان لڳندڙ افغانستان جا سرحدي علائقا سوويت يونين لاءِ خطرو بڻايا ويا هئا.جيتوڻيڪ اهو نظريو اڳ ئي اسڪالر ردڪري چڪا هئا، جنهن جي ثابتي 1990ع ڌاري سوويت يونين جي پڌري ٿيل دستاويزن مان به ملي ٿي، ۽ وڪي ليڪس مان به جنهن پڻ هن منصوبي بابت آمريڪي سوچ کي عوام اڳيان، پڌرو ڪيو. جيڪڏهن سوويت يونين کي پاڪستان جي حدن هيٺ سنڌوءَ جي پاڻيءَ ۾ ڪا دلچسپي هجي ها ته ان کي 1950ع ۽ 1960ع واري ڏهاڪي ۾ ڪير روڪڻ وارو ڪين هو. ٻيو ته گرمُ پاڻي جي بندرگاهن تائين پهچڻ لاءِ گهڻ بلاڪن واري دنيا ۾ فقط ڪاههُ ۽ قبضو ئي واحد آپش نه هو، ٻيا به کوڙ سارا آپشن موجود هئا.جيڪڏهن گهڙي کن لاءِ مڃي به وٺون ته پاڪستان جي بقا لاءِ افغانستان وارو خطرو هڪ حقيقي خطرو هو ته سوال اِهو ٿو پيدا ٿئي ته ڇا ان خطري کي منهن ڏيڻ لاءِ سوويت فوجن کي مصروف رکڻ لاءِ ڳجھي جهادي ويڙهه ئي واحد آپشن هو؟ اِهو سوال جڏهن سينيئر صحافي وجاهت ايس خان کان پڇيو ويو ته سندس چوڻ هو ته”جيڪڏهن سوويت يونين کي ڳجھي عسڪري ويڙهه ۾ مصروف رکڻ کان سواءِ ٻيو ڪو چارو نه هو ته پاڪستان کي ان نام نهاد جهاد جي مستقبل ۾ جيڪا قيمت ادا ڪرڻي پئي ها، تنهن جو ڪاٿو ضرور لڳائڻ گهرجي ها. ڇو جو لڪل ويڙهه به مختلف نموني وڙهي ويندي آهي. ٻين جي قيمت تي مخصوص گروهن جي پٺڀرائي آخرڪار ڇو ڪئي وئي؟ فقط پشتونن ۽ جهادين جي پٺڀرائي تي ڌيان ڇو ڏنو ويو،  سمورن افغانين جي پٺڀرائي ڇو نه ڪئي وئي؟ نتيجي ۾ پاڪستان کي ان جو ڪيتو ڀوڳڻو پيو، جيڪو اڄ سوڌو ڀوڳي رهيو آهي.وجاهت خان سچ ٿو چئي پاڪستان جن جهادي گروهن جي حمايت ٿي ڪئي، تن کي پشاور سيون جي نالي سان سڃاتو ويندو هو ۽ اهي سڀ جا سڀ سني گروهه هئا. اتي شيعا گروهن جو هڪ اتحاد به هو جيڪو تهران ايٽ جي نالي سان سڃاتو ويندو هو، جنهن کي ايران جي حمايت حاصل هئي. سو افغانستان ۾ مزاحمت يا ائين کڻي چئجي ته شدت  پسنديءَ ۾ سنين ۽ پشتونن جي حمايت ۽ باقين کي نظرانداز ڪرڻ جو نتيجو ئي آهي جو ٻيون برادريون ڪنهن چڱي نالي سان پاڪستان کي ياد نه ٿيون ڪن. سو افغانستان جهاد کي لساني ۽ فرقيوار بڻائڻ  پاڪستان تي پر تشدد ۽ شدت پسنداڻا اثر ڇڏيا شدت پسندن کي پنهنجي سرزمين تي پناهه ڏيڻ جي ڪري پاڪستان اڄ ڪڏهن به ختم نه ٿيندڙ تشدد ۽ شدت پسنديءَ جي ڪڏهن به ختم نه ٿيندڙ ڌٻڻ ۾ ڦاسي پيو آهي. ان کي جهاد سڏي مذهبي رنگ  ڏيڻ ۽ عرب دهشت گرد گروپن سميت اڻ ڳڻيا پرڏيهي گروهه آڻي (جيڪي ڪنهن دور ۾ آمريڪا، برطانيا ۽ ٻين اولهه جي ملڪن لاءِ فريڊم فائيٽر هئا) ايندڙ ڳچ عرصي لاءِ پرامن پاڪستان جي اميدن کي ئي تباههُ ڪري ڇڏيو آهي. ان پاليسيءَ تان هٿ کڻڻ اڃا به ممڪن آهي، اِهو تڏهن ممڪن ٿي سگهندو، جڏهن ان جي بنيادي سببن کي ايمانداريءَ ۽ مقصد سان سچائيءَ سان تسليم ڪريون، جيڪڏهن اسٽيبلشمينٽ اڃا به پاڪستاني ميڊيا تي پنهنجي وات ڦاٽوڙن لڪل مُهرن جي ذريعي پنهنجي غلطين کي رست ثابت ڪرڻ جي ڪوشش ڪري رهي آهي ته ان مان سمجھي سگهجي ٿو ته سرڪاري پاليسيءَ ۾ اڃا به ڪا به تبديلي نه آئي آهي، مرض کي ڇڏي فقط علامتن جو علاج ڪرڻ سان ڪابه نجات ملڻي ناهي.  جيڪڏهن اڃا به چئو ٿا ته افغان جهاد درست ۽ جائز هو ته معاف ڪجو ته اوهان اهو چئي پنهنجو پاڻ کي ٺڳي رهيا آهيو ته توهان سٺي ۽ خراب طالبان ۾ فرق نه  ٿا سمجھو..

 

ڪميشن چونڊون شفاف قرار ڏئي ته ڪهڙي گارنٽي آهي ته عمران ڌرڻو نه هڻندو: پرويز رشيد

اسلام آباد (بيورو) اطلاعات، نشريات ۽ قومي ورثي جي وفاقي وزير سينيٽر پرويز رشيد چيو آهي ته عمران خان وزيراعظم محمد نواز شريف ۽ سندس خاندان جي خلاف بي بنياد الزام هڻي رهيو آهي ۽ عوامي ڀلائي لاءِ شروع ڪيل منصوبن جي مخالفت ڪري رهيو آهي، شريف خاندان جا سمورا اثاثا سدائين رڪارڊ تي رهيا، عمران خان جي جائيداد جو رڪارڊ اڄ به صحيح نه آهي. ڪالهه خميس ڏينهن هتي پريس ڪانفرنس کي خطاب ڪندي هن چيو ته جهازن جا مالڪ غريبن جي ڳالهه ڪري رهيا آهن ۽ وزيراعظم نواز شريف، حڪومتي وزيرن اليڪشن ڪميشن آڏو پنهنجا اثاثا ظاهر ڪيا ۽ ٽيڪسن جا گوشوارا جمع ڪرايا، عمران خان ٻين بابت ڪوڙ ڳالهائڻ جو عادي آهي ۽ جڏهن ٻيا سندس باري ۾ سچ ڳالهائين ٿا ته کيس خراب لڳي ٿو. سينيٽر پرويز رشيد چيو ته عمران خان چنيوٽ ۾ چناب درياءِ تي جنهن پل جي مخالفت ڪري رهيو آهي اها شگر ملز کان 50 ميل جي مفاصلي تي آهي. وفاقي وزير چيو ته عمران خان رمضان شگر ملز بابت حقيقتن جي خلاف ڳالهه ڪئي جڏهن ته پنجاب حڪومت پاران چنيوٽ ۾ پل ٺاهڻ تي عمران خان کي خوش ٿيڻ گهرجي ها. پي ٽي آءِ جي سربراهه جي عادت آهي ته هو هر ڏينهن بي بنياد اشوز تي پريس ڪانفرنسون ڪندو رهي ٿو. هن چيو ته عمران خان پنهنجي وليمي جي دعوت جي ڏينهن به پريس ڪانفرنس کان باز نه آيو. اطلاعات واري وزير چيو ته جوڊيشل ڪميشن بابت عمران خان پراڻيون ڳالهيون ورجايون. هڪ سوال تي وفاقي وزير چيو ته اسان ڪميشن ٺاهڻ چاهيون ٿا پر عمران خان نه ٿو چاهي ڇو ته هو ڪنهن ڪميشن جي فيصلي کي تسليم نه ٿو ڪري سگهي. هن چيو ته عمران خان ڪميشن کان ڀڄي رهيو آهي، هو جن چئن تڪن ۾ ڌانڌلي جا الزام هڻي رهيو آهي انهن الزامن جو پول کلي ويو آهي، ڪنهن تڪ ۾ ڌانڌلي جا الزام ثابت ناهن ٿيا. هن چيو ته عمران خان کي ٻين بابت ڳالهائڻ کان اڳ پنهنجي گريبان ۾ ڏسڻ گهرجي، اسان وٽ ڪي بي نام اثاثا نه آهن، اسان مان هر ڪو انڪم ٽيڪس جمع ڪرائي ٿو. هن چيو ته شريف فيملي جي ڪاورباري ادارن جي عمر پاڪستان جي عمر کان وڌيڪ آهي، 1970ع ۾ جڏهن 22 صنعتن کي نيشنلائيزڊ ڪيو ويو ته ان ۾ ميان شريف جون صنعتون به شامل هيون. هن چيو ته حيرت آهي ته پرائيويٽ جهاز ۾ سفر ڪندڙ ٻين تي آڱريون کڻي رهيا آهن، اسان وٽ عمران وانگر 100 ڪينال جو گهر نه آهي. هن چيو ته عمران شيشي جي گهر ۾ ويهي ٻين تي پٿر هڻڻ کان پاسو ڪري. اطلاعات واري وفاقي وزير چيو ته عمران خان اليڪشن ٽربيونلز ۾ پيش نه ٿيو، هو 8 مهينن تائين عدالت ۾ حاضر نه ٿيو. هن چيو ته عمران خان رڳو ان انصاف کي مڃي ٿو جيڪو پي ٽي آءِ چيئرمين ڪري ٿو، هو چيف جسٽس، اليڪشن ٽربيونل يا ڪنهن عدالت جو انصاف نه ٿو مڃي، 4 تڪن بابت جيڪي بي بنياد الزام هنيا ويا اهي غلط ثابت ٿيا. هن چيو ته جوڊيشل ڪميشن ٺهڻ تي جيڪڏهن جوڊيشل ڪميشن به چونڊن کي شفاف قرار ڏئي ڇڏيو ته پو ڇا عمران خان جوڊيشل ڪميشن جي خلاف ڌرڻو هڻندو. عمران خان نجم سيٺي تي 35 پنڪچر جو الزام هنيو ۽ نجم سيٺي انصاف لاءِ عدالت هليو ويو، عمران خان سمجهي ٿو ته انصاف رڳو تحريڪ انصاف جو ميراث آهي ۽ هو اڄ تائين ان ڪيس ۾ پيش نه ٿيو جنهن تي عدالت کي عمران خان جي رهائشگاهه تي اشتهار هڻڻو پيو ۽ ڪجهه اخبارن به شايع ڪيو ته عمران خان کليل طور پيش ٿيڻ کان لاچار آهي ۽ روپوش آهي، اسان کيس مفرور نه چيو، هن چيو ته عمران خان عدالت ۾ معافي نامو جمع ڪرايو ته هو آئنده ڪڏهن الزام بازي نه ڪندو، عدليه جو احترام ڪندو. هن چيو ته عمران خان جي دل ۾ عدالتن جي فيصلن جو جيڪو احترام آهي اسان کي ان جي خبر آهي، فيصلا اچي به وڃن هو پوءِ به تڪرار جاري رکندو. هن چيو ته پاڪستان تحريڪ انصاف جو سربراهه گهپلن جي ڪيس ۾ ملوث ڏوهارين جي حمايت ڪري رهيو آهي، هو اهو ڪيس ميڊيا تي وڙهي رهيو آهي، عمران خان جي اخلاقيات جي سياست جو معيار اهو آهي ته عوامي فائدي لاءِ ٺهندڙ پل تي اعتراض ڪري ٿو جڏهن ته سياستدانن کي پل، اسڪول، اسپتال نه ٺهڻ تي اعتراض هوندو آهي. هن چيو ته عمران خان اي پي سي ۾ فوجي عدالتن کي مڃي هاڻي پاڻ ئي ان جي مخالفت ڪري رهيو آهي. وفاقي وزير چيو ته عمران خان اڄ جن فوجي عدالتن جي مخالفت ڪري رهيو آهي، انهن عدالتن ۾ دهشتگردن جا ڪيس هلائڻا آهن، جن اسان جي معصوم ٻارن، شهرين ۽ فوجي جوانن کي شهيد ڪيو ۽ اسان جي عبادتگاهن، درسگاهن کي نشانو بڻايو. هڪ سوال تي هن چيو ته عمران خان باقي صوبن ۾ پوليس ۾ سياسي مقررين جو الزام هڻي ٿو جڏهن ته بني گالا جي تخت تان هو خيبرپختونخواهه جي پوليس کي ڪنٽرول ڪرڻ چاهي ٿو ۽ انهي رويي تي اتان جي چيف سيڪريٽري استعيفيٰ ڏني ۽ چيو ته هو بني گالا جي مداخلت ۾ ڪم نه ٿو ڪرڻ چاهي. ڪي پي ڪي جو جيڪو نئون چيف سيڪريٽري مقرر ٿيو ان جي خلاف نيب ۾ ڪيس آهن جڏهن ته ڪي پي ڪي جو وڏو وزير ان جون صفايون پيش ڪري رهيو آهي. پنجاب صوبي جي گورنر چوڌري سرور جي استعيفيٰ بابت هڪ سوال تي هن چيو ته گورنر جو آئيني ڪردار هوندو آهي، چوڌري سرور پنهنجي آئيني ڪردار کان ٻاهر ٿي ڪم ڪرڻ چاهيو ٿئي، اسان جي دعا آهي ته هو جنهن نئين سفر جي شروعات ڪري رهيو آهي کيس ڪاميابي ملي. اطلاعات ۽ نشريات واري وفاقي وزير چيو ته پرويز مشرف اي سي ايل مان نالو ڪڍرائڻ جي لاءِ غلط پتي تي درخواست موڪلي، کيس گهرجي ته گهرو وزارت بدران سپريم ڪورٽ درخواست موڪلي. اطلاعات واري وزير چيو ته هي اهي حقيقتون آهن جيڪي اسان ميڊيا ۽ عوام آڏو آڻڻ ضروري سمجهون ٿا، جيڪڏهن توهان کي ڪوڙ لڳي ٿو ته جهڙي طرح نجم سيٺي عمران خان کي عدالت ۾ وٺي ويو عمران خان به اسان کي عدالت ۾ وٺي وڃي، آئون سائيڪل تي اچي هر تاريخ تي عدالت پهچندس، جهانگير ترين به مون کي عدالت وٺي وڃڻ جو چيو هو، آئون انتظار ۾ آهيان ته هو ڪڏهن مون کي عدالت وٺي ويندو. ان موقعي تي قومي اسيمبلي ميمبر چوڌري دانيال عزيز بلدياتي چونڊن جي حوالي سان سوال جي جواب ۾ چيو ته مسلم ليگ (ن) جي پنجاب ۽ وفاقي حڪومت تڪبندين جي اعتراضن جي حوالي سان اختيار اليڪشن ڪميشن ڏانهن منتقل ڪري ڇڏيا. مسلم ليگ (ن) ماضي ۾ به پنجاب ۽ بلوچستان ۾ بلدياتي چونڊون ڪرايون ۽ هي واحد پارٽي آهي جنهن بلوچستان ۾ نيشنل پارٽي کي اقتدار جو موقعو ڏنو جنهن اتي بلدياتي چونڊون ڪرايون، ان لاءِ اسان سمجهون ٿا ته بلدياتي چونڊن جي حوالي سان ڪاميابي ملي آهي.

 

انتقامي سياست تي يقين نٿا رکون، معاملا ڳالهين ذريعي حل ڪيا وڃن: زرداري

ڪراچي (اسٽاف رپورٽر) اڳوڻي صدر آصف علي زرداري جي صدارت ۾ غير رسمي اجلاس کي خطاب ڪندي اڳوڻي صدر آصف علي زرداري چيو آهي ته انتقامي سياست تي يقين نٿا رکون. هن چيو ته صوبي جي معامن کي ڳالهين ذريعي حل ڪيو وڃي. آصف زرداري چيو ته سينيٽ جي ٽڪيٽ ميرٽ تي ڏني وڃي. اڳوڻي صدر سنڌ جي وڏي وزير سيد قائم علي شاهه کي سنڌ جي گورنر ڊاڪٽر عشرت العباد سان رابطو ڪرڻ جو به چيو آهي. هن جو چوڻ هو ته ايم ڪيو ايم جي خدشن کي سنڌ جي گورنر جي مدد سان ختم ڪيو وڃي، آصف زرداري جي صدارت ۾ غير رسمي اجلاس ۾ صوبائي وزير شرجيل ميمڻ، پيپلزپارٽي جي اڳواڻ فريال ٽالپر ۽ سنڌ جي وڏي وزير سيد قائم علي شاهه شرڪت ڪئي. هوڏانهن اڳوڻي صدر آصف علي زرداري سنڌ جي گورنر ڊاڪٽر عشرت العباد خان کي ٽيليفون ڪري ايم ڪيو ايم جي ڪارڪن سهيل احمد جي قتل تي تعزيت ڪئي.  ملاقات ۾ وڏي وزير اڳوڻي صدر کي صوبي جي صورتحال، ڪراچي ۾ امن امان ۽ ترقياتي منصوبن سميت مختلف معاملن تي بريفنگ ڏني، پ پ جي ذريعن جو چوڻ آهي ته ملاقات ۾ سنڌ جي سينيٽ چونڊن لاءِ اميدوارن کي پارٽي ٽڪيٽ جاري ڪرڻ سميت ايم ڪيو ايم پاران پ پ تي الزام لڳائڻ ۽ سنڌ حڪومت تي تقيد جو تفصيلي جائزو ورتو ويو، ذريعن جو چوڻ آهي ته آصف علي زرداري وڏي وزير کي هدايت ڪئي ته صوبي ۾ مڙني جماعتن سان ورڪنگ رليشن شپ بهتر بڻائي وڃي ۽ امن امان جي قيام تي سياسي قوتن کي اعتماد ۾ ورتو وڃي. ذريعن جو چوڻ آهي ته اڳوڻي صدر وڏي وزير کي هدايت ڪئي ته گورنر سان رابطو ڪري صوبي جي سطح تي ايم ڪيو ايم جا جيڪي تحفظات آهن انهن جو حل ڳالهين ذريعي ڪڍيو وڃي.

 

صدر پنجاب جي گورنر جي استعيفيٰ منظور ڪري ورتي

اسلام آباد (بيورو) صدر ممنون حسين پنجاب جي گورنر محمد سرور جي استعيفيٰ منظور ڪري ورتي آهي. ڪالهه خميس ڏينهن ڪابينا ڊويزن پاران سمري تي صدر وزيراعظم جي ايڊوائيس تي پنجاب جي گورنر جي استعيفيٰ منظور ڪري ورتي.

 

وزيراعظم ڪراچي ۾ امن امان جي صورتحال بابت اهم اجلاس اڄ طلب ڪري ورتو

اسلام آباد (بيورو) وزيراعظم نواز شريف ايم ڪيو ايم اڳواڻن ۽ قتل ٿيل ڪارڪنن جي وارثن سان تعزيت لاءِ اڄ ڪراچي جو دورو ڪندو، وزيراعظم ڪراچي ۾ امن امان جي صورتحال بابت اهم اجلاس طلب ڪري ورتو آهي. وزيراعطم نواز شريف ڪراچي ۾ امن امان جي صورتحال بابت اهم اجلاس سڀاڻي گورنر هائوس ۾ طلب ڪري ورتو آهي.وزيراعظم هائوس پاران جاري ڪيل بيان ۾ ڄاڻايو ويو آهي ته وزير اعظم نواز شريف سڀاڻي ايم ڪيو ايم ڪارڪنن سهيل احمد جي گهر وارن سان تعزيت ڪندو.وزيراعظم چيو آهي ته ايم ڪيو ايم ڪارڪن سهيل احمد جي قتل ۾ ملوث جوابدارن خلاف سخت ڪارروائي ڪئي ويندي. وزيراعظم نواز شريف چيو ته ايم ڪيو ايم جا سمورا خدشا دور ڪيا ويندا.

 

وفاقي حڪومت سان اختلافن کانپوءِ پنجاب جي گورنر چوڌري سرور عهدي تان استعيفيٰ ڏئي ڇڏي

لاهور (بيورو) چوڌري سرور جي استعيفيٰ کانپوءِ  پنجاب ۾ نئين گورنر لاءِ هڪ عورت سميت مختلف نالن تي غور شروع  ڪيو ويو آهي، ذڪيه شاهنواز، راجا ظفر الحق ۽ راڻا ثناءُ الله سميت مختلف نالن تي ويچاريو پيو وڃي. چوڌري سرور جي پنجاب جي گورنر طور استعيفيٰ کانپوءِ حڪومت، نئين گورنر لاءِ مختلف نالن تي مشاورت شروع ڪري ڇڏي آهي.ذريعن موجب، نئين گورنر لاءِ ذڪيه شاهنواز، راجا ظفر الحق، راڻا ثناءُ الله، راجا ظفر الحق، مخدوم احمد محمود ۽ جعفر اقبال جي نالن تي غور ڪيو پيو وڃي.ذريعن موجب، ذڪيه شاهنواز  پنجاب جي گورنر جي عهدي لاءِ مضبوط اميدوار سمجهي پئي وڃي، مقرري جي صورت ۾ ذڪيه شاهنواز پنجاب جي پهرين عورت گورنر هوندي.ذريعن موجب، وزيراعظم نواز شريف جي پارٽي جي سينيئر اڳواڻن سان مشاورت جاري آهي، جلد ڪنهن هڪ نالي تي اتفاق ڪري مقرري ڪئي ويندي.پنجاب جي گورنر جي استيعيفيٰ تي رد عمل ظاهر ڪندي سينيئر قانوندان عاصمه جهانگير چيو ته شڪر آهي ڪنهن سرڪاري عملدار پاڻ استعيفيٰ ڏني، وڌيڪ استعيفائون به اچڻ گهرجن.