تازيون خبرون

Daily Archives: January 27, 2015

ڪراچي، حيدرآباد ۽ سکر سينٽرل جيلز لاءِ سڪيورٽي خدشا آهن: منظور وساڻ

ڪراچي (اسٽاف رپورٽر) جيلن واري صوبائي وزير منظور وساڻ چيو آهي ته ڪراچي سميت صوبي جي سمورن جيلز لاءِ خطرا موجود آهن، سڪيورٽي لاءِ بم بروف ديوارن جي اڏاوت لاءِ حڪم جاري ڪيا ويا آهن. ڪراچي ۾ پريس ڪانفرنس ڪندي منظور وساڻ چيو ته ڪراچي، حيدرآباد ۽ سکر سينٽرل جيلز لاءِ سڪيورٽي خدشا موجود آهن. هن چيو ته جيلز جي سيڪيورٽي وڌائڻ ۽ انهن جي ٻاهران بم بروف ديوارن جي اڏاوت جا حڪم جاري ڪيا ويا آهن. هڪ سوال جي جواب ۾ منظور وساڻ جو چوڻ هو ته بلاول ڀٽو زرداري جي نوازليگ ۾ شموليت جون ڳالهيون ڪندڙ پاڻ پ پ ۾ شموليت اختيار ڪري سگهن ٿا. خوابن بابت پڇيل سوال جي جواب ۾ منظور وساڻ چيو ته سال 2015 امن ۽ خوشحالي جو سال آهي، جنهن ۾ ڪابه وڏي تبديلي نظر نه پئي اچي، باقي سال 2016 ۾ ڪجهه اهم تبديليون نظر اچي رهيو آهن.

 

ملتان ۾ ڀنگ لاءِ اغوا ڪيل ٻارڙو قتل، عورت سميت 2 جوابدار گرفتار

ملتان (بيورو) پوليس شاهه رڪن عالم ڪالوني ۾ گذريل هفتي ڀنگ لاءِ اغوا ڪيل ٻارڙي کي قتل ڪرڻ جي الزام ۾ هڪ عورت سميت 2 جوابدارن کي گرفتار ڪري ورتو، ملتان جي شاهه رڪن عالم ڪالوني جي رهواسڻ ريحانه بي بي جي 7 سالا پت محمد عبدالله کي گذريل هفتي اڻڄاتل ماڻهن ڏينهن ڏٺي گهر کان ٻاهر اغوا ڪيو هو، اغوا ڪندرن ٻارڙي جي والده کان هڪ ڪروڙ روپيا ڀنگ گهريو هو جڏهن ته گذريل ڏينهن ٻار جي لاش خانيوال مان ملي پوليس لاش وارثن حوالي ڪري ڇڏيو آهي پوليس شاهدين جي روشني م حسن نالي جوابدار ۽ ان جي مڱيندي کي حراست ۾ وٺي پڇا ڳاڇا شروع ڪري ڇڏي آهي پوليس جو چوڻ آهي ته جوابدارن سڃاڻپ جي ڊپ کان ٻار کي قتل ڪيو آهي

 

ٿر ۾ موت جو راڄ برقرار، وڌيڪ 3 ٻارڙا فوت، انگ 373 ٿي ويو

مٺي (نمائندو) ڏُڪاريل ڏيهه ٿر ۾ معصوم ٻارڙن جي فوت ٿيڻ جو سلسلو جاري آهي،وڌيڪ ٽن ٻارڙن جي فوت ٿيڻ کانپوءِ هڪ سئو 8 ڏينهن دوران حياتيون وڃائيندڙن جو انگ وڌي 373 ٿي ويو. اسلام ڪوٽ جي ڳوٺ مهرياري ۾ 14 مهينن جو ٻارڙو عبدالخالق ۽ ڳوٺ ڪــُرن جي رهواسي خان محمد مهراڻ پوٽي جي ڏيڍ مهيني جي پٽ شمس الله دم ڏنو. مٺي جي سول اسپتال ۾ ڳوٺ نينسر جي رهواسي مڪيش ميگهواڙ جو 7 مهينن جو پٽ ساگر فوت ٿي ويو. سول اسپتال مٺيءَ ۾ هن وقت هڪ سئو کان وڌيڪ ٻارڙا داخل آهن،جڏهن ته اسلام ڪوٽ، ڏيپلي، ڇاڇري، عمرڪوٽ ۽ ٻين شهرن جي اسپتالن ۾ پڻ ڪيترن ئي ٻارڙن جو علاج هلندڙ آهي. اڄوڪي ڏينهن دوران وڌيڪ ٽن ٻارڙن جَي فوت ٿيڻ بعد هڪ سئو 18 ڏينهن دوران فوتي ٻارڙن جو انگ وڌي 373 ٿي ويو آهي.

 

ڪراچيءَ ۾ مختلف حادثا، ٻار سميت 5 ڄڻا فوت، 4 زخمي

ڪراچي( اسٽاف رپورٽر) ڪراچيءَ ۾ مختلف حادثن ۾ ٻار سميت 5 ڄڻا فوت ۽ 4 زخمي ٿي پيا. چيپا مطابق شاهراه فيصل لال ڪوٺيءَ ويجهو تيز رفتاريءَ سبب ڪار ڪلٽي ٿي پئي جنهن ۾ 25 سالن جو سلمان، 23 سالن جو فرهان فوت ٿي ويا جڏهن ته 22 ڄڻن جو طلحه ۽ 25 ورهين جو بشير زخمي ٿي پيا جن کي جناح اسپتال پهچايو ويو. گلشن اقبال 13 ڊي ۾ اڻڄاتل گاڏيءَ جي ٽڪر ۾ 12 سالن جو ٻارڙو ياسين پٽ عبدالڪريم فوت ٿي ويو. لاش عباسي شهيد اسپتال منتقل ڪيو ويو. قذافي ٽائون قائد آباد ايبٽ ڪمپنيءَ ويجهو گاڏيءَ جي ٽڪر ۾ 45 ورهين جو شخص فوت جڏهن ته 35 ورهين جو نياز نالي شخص زخمي ٿي پيا، جن کي جناح اسپتال منتقل ڪيو ويو. ڊفينس فيز 7 ۾ گاڏيءَ جي ٽڪر ۾ 32 سالن جو خضر صادق زخمي ٿي پيو ۽ اورنگي ٽائون غازي آباد ۾ ڪرڪيٽ کيڏندي بال لڳڻ سبب 22 ورهين جو ذيشان فوت ٿي ويو.

 

عامر خان جي فلم ”پي ڪي“ جي ڊائريڪٽر ۽ پروڊيوسر کي نوٽيس جاري، 16 اپريل تي طلب

ممبئي(شوبز نيوز)ڀارت جي عدالت عامر خان جي تازو رليز ٿيل سپر هٽ فلم پي ڪي جي ڊائريڪٽر ۽ پروڊيوسر کي نوٽيس جاري ڪندي 16 اپريل تي طلب ڪري ورتو آهي. نئين دهلي هاءِ ڪورٽ جي جج نجمي وزيري ناول نگار ڪپيل ايساپوري جي درخواست تي ٻڌڻي ڪئي. درخواست پنهنجي وڪيل معرفت موقف اختيار ڪيو ته پي ڪي فلم جي ڊائريڪٽر راجڪمار هيراڻي ۽ پروڊيوسر وڌو ونود چوپڙا سندس ناول فرشتا جي ڪهاڻي چوري ڪئي آهي. هن ٻڌايو سندس ناول فرشتا سال 2013ع ۾ شايع ٿيو، جنهن ۾ هن مذهب جي نالي تي ماڻهن کي وهم ۾ مبتلا ڪندڙ ڪردارن خلاف آواز اٿاريو آهي. هن عدالت کي اپيل ڪئي ته سندس ناول جي ڪهاڻي چوري ڪندڙن مٿان هڪ ڪروڙ رپيا ڏنڊ ڀرائي ڏنو وڃي. عدالت، ناول نگار ڪپيل ايساپوري جو موقف ٻڌڻ بعد پي ڪي هدايتڪار راجڪمار هيراڻي، پروڊيوسر وڌو ونود چوپڙا ۽ اسڪرپٽ رائيٽر اڀيجيت جوشي کي نوٽيس جاري ڪندي کين 16 اپريل تي طلب ڪري ورتو آهي. ياد رهي ته تازو رليز ٿيل فلم پي ڪي ڀارت سميت سڄي دنيا ۾ رڪارڊ بزنس ڪيو آهي.

سوها علي خان ڪنال کيمو سان شادي جي ٻنڌڻن ۾ ٻڌجي وئي

ممبئي(شوبز نيوز)بالي ووڊ اداڪار سيف علي خان جي ڀيڻ ۽ پٽودي خاندان جي نياڻي سوها علي خان پنهنجي دوست اداڪار ڪنال کيمو سان شادي ڪري ڇڏي آهي، ڀارتي ميڊيا رپورٽنمطابق سوها ۽ ڪنال جي شادي ممبئي ۾ هڪ پرائيويٽ تقريب ۾ ٿي جنهن ۾ سيف علي خان جي والده ۽ ماضي جي ناليواري اداڪاره شرميلا ٽيگور، سيف ۽ ان جي گهرواري ڪرينا ڪپور سميت خاندان جي ڪجهه مخصوص ماڻهن شرڪت ڪئي، شادي جي تقريب انتهائي سادگي سان ٿي

 

گلوڪاره عابده پروين کي دبئي ۾ ايمبيسيڊر ايپريسيئيشن ايوارڊ ڏنو ويو

دبئي (شوبز نيوز) پاڪستاني گلوڪاره عابده پروين کي دبئي ۾ ايمبيسيڊر ايپريسيئيشن ايوارڊ ڏنو ويو. سڌ سماءَ وارن ذريعن موجب دبئي ۾عابده پروين کي اهو ايوارڊ ڏيڻ لاءِ هڪ پروقار تقريب منعقد ڪئي وئي جنهن جو مقصد بين الاقوامي پليٽ فارم تي عابده پروين جي موسيقي کي خراج تحسين پيش ڪرڻ هو. ان موقعي تي خاص وزير جاويد ملڪ چيو ته عابده پروين صوفيانه ڪلام ۾ امن، انسانيت ۽ محبت جو پيغام جنهن خوبصورت انداز م عالمي سطح تي متعارف ڪرايو آهي. ان سان پاڪستان ۽ اسلام جو امن پسند چهرو دنيا ۾ وڌيڪ اجاگر ٿيو آهي.

 

بالي ووڊ فلم ۾ راهول ڀٽ بلاول ڀٽو جو ڪردار ادا ڪندو

ممبئي(شوبز نيوز)پاڪستان پيپلز پارٽي جو چيئرمين بلاول ڀٽو زرداري هڪ نئين ايندڙ ڀارتي فلم ۾ نظر ايندو، حيران ٿي ويو نه پر وڌيڪ حيران نه ٿيو ڇو ته هو اصل بلاول ناهي ڀارتي اداڪار راهول ڀٽ هوندو جيڪو فلم ۾ بلڪل بلاول جي روپ ۾ نظر ايندو، فلم ۾ هيروئن جو هيروئن جو ڪردار ڪترينا ڪيف ادا ڪندي، يقينن اوهان سوچي رهيا هوندو ته ڳالهه ڪهڙي فلم جي ٿي رهي آهي ته توهان کي ٻڌائيندا هلون ته ان فلم جو نالو فتور آهي جيڪا هلندڙ سال جي آخري مهيني ۾ رليز ٿيندي، ڀارتي ميڊيا رپورٽرن مطابق هدايتڪار اڀيشيڪ ڪپور جي فلم فتور جي ڪهاڻي هڪ اهڙي نوجوان پاڪستاني سياستدان جي چوڌاري گهمي ٿي جيڪو طاقتور سياسي خاندان سان تعلق رکي ٿو ذريعن مطابق فلم ۾ اداڪار راهول ڀٽ جو نالو بلاول بجاءِ بلال هوندو جڏهن ته ان جي ڊريسنگ ۽ لڪ بلڪل بلاول ڀٽو وانگر هوندو.

 

آءِ سي سي بورڊ جو بن ڏينهن وارو اجلاس (سڀاڻي) آءِ سي سي هيڊڪوارٽر دبئي ۾ شروع ٿيندو

دبئي (اسپورٽس نيوز) هلندڙ هفتي شيڊول انٽرنيشنل ڪرڪيٽ ڪائونسل (آءِ سي سي) بورڊ اجلاس ۾ غيرقانوني بالنگ ايڪشنن، اينٽي ڪرپشن ۽ اينٽي ڊوپنگ معاملن سميت ٻين ڪيترن ئي اهم اشوز تي خيالن جي ڏي وٺ ڪئي ويندي. آءِ سي سي بورڊ جو ٻن ڏينهن وارو اجلاس (سڀاڻي) اربع کان آءِ سي سي هيڊ ڪوارٽر دبئي ۾ شروع ٿيندو. آءِ سي سي طرفان جاري بينا موجب بورڊ اجلاس کان علاوه آءِ سي سي چيف ايگزيڪيوٽو ڪميٽي اجلاس سميت ٻين ڪيترن ئي ڪميٽين جا اجلاس پڻ ٿيندا. اجلاس ۾ آءِ سي سي ڪرڪيٽ ڪميٽي ڪمپوزيشن، ورلڊڪپ ۾ اپليڪيشن آف دي آءِ سي سي ڪوڊ آف ڪنڊڪٽ، ايف ٽي پي، غيرقانوني بالنگ ايڪشنز، اينٽي ڪرپشن، اينٽي ڊوپنگ سميت ڪيترن ئي اهم معاملن تي بحث ڪئي ويندي. اجلاس ۾ ايندڙ مهيني شيڊول ورلڊڪپ جي تيارين جي سلسلي ۾ انتظامن کي قطعي شڪل پڻ ڏني ويندي. اجلاس ۾ سمورن ميمبر ملڪن جا نمائندا شرڪت ڪندا

 

گلڪرسٽ ۽ رائيڊر آسٽريلين ڪرڪيٽ هال آف فيم ۾ شامل ٿي ويو

ميلبورن (اسپورٽس نيوز) ايڊم گلڪرسٽ ۽ جيڪ رائيڊر کي آسٽريلين ڪرڪيٽ هال آف فيم ۾ شامل ڪيو ويو اهي، رائيڊر هال آف فيم ۾ شامل ٿيندڙ 40هون ۽ گلڪرسٽ 41هون رانديگر آهي، ٻنهي رانديگرن کي ايلن بارڊر ميڊل نائٽ تقريب جي دوران آن ۽ آف دي فيلڊز ۾ ملڪي ڪرڪيٽ لاءِ خدمتون سرانجام ڏيڻ جي اعزاز سان نوازيو ويو، هال آف فيم چيئرمين ڊيوڊ ڪروني پنهنجي بيان ۾ چيو ته گلڪرسٽ ۽ رائيڊر مختلف طريقن سان آسٽريليا ڪرڪيٽ لاءِ خدمتون سرانجام ڏنيون، ان ڪري ٻئي پليئر هال آف فيم م شموليت جا حقدار ٿيا.