تازيون خبرون

Daily Archives: January 26, 2015

مسئلن کي جڙ کان ختم ڪرڻ لاءِ حڪمت عملي تحت وڌي رهيا آهيون: نواز شريف

لاهور (بيورو) وزيراعظم محمد نواز شريف چيو آهي ته عوام جي زندگي ۾ آسودگي آڻڻ، ملڪ جي ترقي جي راهه تي گامزن ڪرڻ لاءِ ڪا به ڪثر نه ڇڏينداسين، ملڪ سان جڙيل تمام گهڻن مسئلن کي جڙ کان ختم ڪرڻ لاءِ حڪمت عملي جوڙي اڳتي وڌي رهيا آهيون، سڀني کي گڏ کڻي وڃڻ واري پاليسي تي عمل پيرا آهيون، قوم پنهنجي اتحاد سان ملڪ مان دهشتگردي جي ناسور جو خاتمو ڪري سڪون وٺندي، اهڙن خيالن جو اظهار هن گذريل ڏينهن راءِ ونڊ ۾ پنجاب جي وڏي وزير شهباز شريف سان ملاقات ۾ ڳالهائيندي ڪيو، ملاقات ۾ ملڪ ۾ بجلي جي بريڪ ڊائون، دهشتگردي خلاف قومي ايڪشن پلان تي عملدرآمد، سينيٽ چونڊون، صوبي سميت ملڪ ۾ امن جي گڏيل صورتحال ۽ آمريڪي صدر بارڪ اوباما جي پاڙيسري ملڪ ڀارت جي دوري جي حوالي سان خيالن جي ڏي وٺ ڪئي وئي، ٻڌايو ويو آهي ته ملڪ ۾ امن مان جي گڏيل صورتحال   آمريڪي صدر براڪ اوباما جي پاڙيسري ملڪ ڀارت جي دوري جي حوالي سان خيالن جي ڏي وٺ ڪئي وئي. وڏي وزير، وزيراعظم کي صوبي ۾ جاري مختلف ترقياتي منصوبن تي اعتماد ۾ ورتو، ٻڌايو ويو آهي ته ملاقات دوران پارٽي معاملا، مارچ ۾ ٿيندڙ سينٽ چونڊون ۽ آمريڪي صدر براڪ اوباما جي ڀارت جي دوري تي به خيالن جي ڏي وٺ ڪئي وئي، رپورٽ ۾ ٻڌايو ويو ته بلوچستان ۾ نصير آباد ڊويزن ۾ دهشتگردن پاران گڊو کان سبي ويندڙ مرڪزي ٽرانميشن لائين جي تباهي، بريڪ ڊائون جي مرڪزي سبب بڻي.

 

آمريڪا ڀارت کي فراهم ڪندڙ ايٽمي مادي جي ٽريڪنگ تان هٿ کڻي ويو

نئين دهلي (م.ڊ/اي پي پي) آمريڪي صدر بارڪ اوباما ڀارت جي 3 ڏينهن جي دوري تي دهلي پهچي ويو آهي.صدر بارڪ اوباما پنهنجي خاص صدارتي جهاز ۾ ڀارت پاڪستاني وقت مطابق صبح جو 9.10 منٽن تي دهلي جي پالم ايئر پورٽ تي لٿو. جتي ڀارتي وزير اعظم نريندر مودي بارڪ اوباما جو استقبال ڪيو. صدر بارڪ اوباما سان گڏ سندس زال مشعل اوباما ۽ هڪ اعليٰ وفد به آيل آهي. هوائي اڏي تان هوٽل تي پهچي ناشتو ڪرڻ بعد صدر بارڪ اوباما پنهنجي وفد سان گڏ ڀارتي صدر پرناب مکرجي سان ملاقات لاءِ ايوان صدر (راشٽر پتي ڀون) پهتو. راشٽر پتي ڀون ۾ صدر پرناب مکرجي بارڪ اوباما جو استقبال ڪيو. ايوان صدر ۾ آمريڪي صدر کي گارڊ آف آنر پيش ڪيو ويو. ڀارتي صدر اوباما جو تعارف ڀارتي ڪابينا سان ڪرايو. صدر اوباما جي دوري جي موقعي تي سيڪيورٽي جا انتهائي سخت انتظام ڪيا ويا هئا. اٽڪل 85 هزار سيڪيورٽي اهلڪارن دهلي کي قلعي ۾ تبديڪ ڪري ڇڏيو هو. صدر بارڪ اوباما جي ڀارتي دوري جي موقعي تي هٿيارن جي خريداري سميت سول نيوڪلير ٽيڪنالاجي جي معاهدن جو به امڪان آهي.خطي جي صورتحال تي نظر رکندڙ ماهرن جو خيال آهي ته جيڪڏهن صدر بارڪ اوباما پنهنجي ڀارتي دوري دوران ڀارت تي زور ڀري ته پاڪستان سان پاڻي ۽ ڪشمير مسئلو حل ڪيو وڃي ته ان جا خطي تي هاڪاري اثر پوندا. صدر بارڪ اوباما ڀارتي يوم جمهوريه جي پريڊ ۾ خاص مهمان طور پڻ شرڪت ڪندو. ڀارتي ميڊيا دعويٰ ڪئي آهي ته ڀارتي وزيراعظم نريندر مودي آمريڪي صدر بارڪ اوباما پنهنجا مطالبا مڃائڻ ۾ ڪامياب رهيو ۽ آمريڪا ڀارت سان ايتمي معاهدي ۾ شامل ايٽمي مادي جي ٽريڪنگ جي قانون تان دستبردار ٿي ويو آهي، ڀارتي ميڊيا مطابق نئين دلي جي حيدرآباد هائوس ۾ ٻنهي اڳواڻن وچ ۾ ٿيندڙ ملاقات ۾ ايٽمي معاهدي جو معاملو غور هيٺ آيو ۽ نريندر مودي بارڪ اوباما کان ايٽمي مادي ۾ ٽريڪنگ ڊيوائيس نه لڳائڻ جو مطالبو ڪيو جنهن کي آمريڪي صدر تفصيلي خيالن جي ڏي وٺ کانپوءِ قبول ڪري ورتو ۽ پنهنجا خصوصي اختيار استعمال ڪندي ايٽمي مادي مان ٽريڪنگ ڊيوائس هٽائڻ تي راضپور ظاهر ڪري ڇڏيو جنهن کانپوءِ هاڻ آمريڪا ڀارت کي فراهم ڪيل ايٽمي فيول جي حرڪت جي تفصيل کان لاعلم رهندو. ٻئي طرف آمريڪي صدر بارڪ اوباما چيو آهي ته ڀارت سان واپار کي وڌيڪ هٿي ڏيڻ چاهيون ٿا، سلامتي ڪونسل ۾ ڀارت جي مستقبل ميمبرشپ جي حمايت ڪريون ٿا. ڀارتي وزيراعظم سان گڏ گڏيل پريس ڪانفرنس ۾ آمريڪي صدر جو چوڻ هو ته افغانستان ۾ آمريڪا جو جنگي مشن ختم ٿي چڪو آهي، آمريڪا ۽ ڀارت افغانستان جا قابل اعتماد پارٽنر رهندا، ڀارت جي مهمان نوازي تي شڪريو ادا ڪريون ٿا هن جو چوڻ هو ته ڀارت سان دوسي جي نئين دور تي پرعزم آهيون، دفاع سميت ڪيترن ئي شعبن ۾ تعاون کي هٿي ملي آهي، دفاعي  ۽ سيڪيورٽي تعاون وڌيڪ مضبوط ڪرڻ تي اتفاق ڪيو آهي، دنئين سان واپاري ۽ اقتصادي تعاون کي هٿي ڏينداسين، ڪجهه سالن ۾ ٻنهي ملڪن وچ ۾ تجارت ۾ 60 سيڪڙو اضافو ٿيو، ڀارت جمهوري ڏهاڙي جي تقريب ۾ شرڪت ڪرڻ تي پهرئين آمريڪي صدر هئڻ تي فخر آهي.

 

پاڪ-چين عسڪري قيادت جي ملاقات، دهشتگردي خلاف ڪنهن به حد تائين وڃڻ لاءِ تيار آهيون: ڪياني

بيجنگ (م.ڊ) پاڪ فوج جي سربراهه جنرل راحيل شريف واضح ڪيو آهي ته دهشٽگردي کي پاڙان پٽڻ لاءِ ڪنهن به حد تائين وڃڻ لاءِ تيار آهيون، پاڪ فوج جي ترجمان جنرل عاصم باجوا پارا سمايج رابطي جي ويب سائيٽ تي جاري بيان مطابق آرمي چيف جنرل راحيل شريف بيجنگ ۾ چين جي وائيس چيئرمين سينتڙل ملٽري ڪميشن سان ملاقات ڪئي، ان موقعي تي ٻنهي ملڪن جي اعليٰ ترين عسڪري قيادت خطي ۾ امن امان جي صورتحال ۽ ملڪي سلامتي کي درپيش چيلينجز سان منهن ڏيڻ تي تفصيلي خيالن جي ڏي وٺ ڪئي وئي، ملاقات دوران وائيس چيئرمين  سينٽرل ملٽري ڪميشن پاڪستان کي دهشتگردي خلاف جنگ ۾ مڪمل تعاون جو يقين ڏياريندي آپريشن ضرب عضب جي ڪاميابي کي ساراهيو، جنرل فين چيوته پاڪستان ۽ چين جا نهايت اهم لاڳاپا آهن، چين دهشتگردي خلاف پاڪستاني قوم جون قربانيون ۽ قومي اتفاق راءِ جي ساراهه ڪري ٿو، آرمي چيف جنرل راحيل شريف چيو ته پاڪستان دهشتگردي جي خاتمي لاءِ پرعزم آهي، دهشتگردي کي پاڙا پٽن لاءِ ڪنهن به حد تائين وڃي سگهون ٿا، ضرب عضب دهشتگردن خلاف فيصلائتي ڪارروائي ثابت ٿي رهيو آهي.

 

حڪومت جي نااهلي سبب جمهوريت ۽ رياست ڪمزور پئي ٿئي: خورشيد شاهه

اسلام آباد (بيورو)  قومي اسيمبلي ۾ مخالف ڌر جي اڳواڻ سيد خورشيد شاهه چيو آهي ته حڪومت کي پنهنجي ناڪامي قبول ڪندي سڌارن لاءِ فوري قدم کڻڻا پوندا ڇو ته حڪومتي نااهلي سبب جمهوريت ۽ رياست ڪمزور ٿي رهي آهي، پنهنجي بيان ۾ خورشيد شاهه چيو ته پهريان پيٽرول بحران سبب ملڪ کي 10 ارب روپيا هڪ ڏينهن ۾ نقصان ٿيو ۽ هاڻ بجلي جي بحران سبب معيشت تباهه ٿي رهي آهي، حالانڪه فرنس آئل جي کوٽ سبب بجلي بحران سان بروقت آگاهه ڪيو ويو هو، هن چيو ته حڪومت عوام کي وڌيڪ بيوقوف نه بڻائي ۽ پنهنجي ناڪام قبول ڪندي سڌارن لاءِ فوري قدم کڻي ڇو ته حڪومت جي نااهلي سبب جمهوريت ۽ رياست ڪمزور ٿي رهي آهي پر حڪومت پنهنجو سياسي رويو ترڪ ڪرڻ لاءِ تيار ناهي.

 

دهشگردي خلاف جنگ اسان کي ئي وڙهڻي آهي ٻاهران اچي ڪير نه وڙهندو: قائم علي شاهه

ڪراچي(اسٽاف رپورٽر) سنڌ جي وڏي وزير سيد قائم علي شاهه پشاور جي شهيدن جي چاليهي جي موقعي تي انهن کي زبر دست خراج عقيدت پيش ڪرڻ لاءِ پنهنجي پيغام ۾ چيو آهي ته آرمي پبلڪ اسڪول پشاور جا شاگرد، استاد ۽ اسٽاف ميمبرن جي شهادت دهشتگردن جي خلاف پوري قوم کي وڌيڪ مضبوط بنايو آهي اڄ ملڪ جا سڀئي ادارا سماجي ۽ سياسي طبقو دهشتگردي جي خلاف گڏيل طور تي جنگ وڙهي رهيو آهي جيڪا اسان هر صورت ۾ کٽنداسين هن چيو ته دهشتگردي نه صرف نه صرف ملڪ جي ترقي ۽ عوام جي ڀلائي ۾ رڪاوٽ بڻيل آهي پر ماڻهن جي جان ۽ مال جي لاءِ به هڪ وڏو خطرو ۽ چيلينج آهي جنهن کي منهن ڏيڻ جي لاءِ هر هڪ کي انفرادي ۽ اجتماعي طور تي هن جنگ ۾ ڪردار ادا ڪرڻو پوندو.وڏي وزير چيو ته دهشگردي جي خلاف جنگ اسان کي ئي وڙهڻي آهي باهران اچي ڪير نه وڙهندو ان ڪري اسان سڀني کي پنهن جو پنهنجو ڪردار ادا ڪرڻو پوندو. وڏي وزير چيو ته اسان ته سيپٽمبر2013 کان دهشتگردي جي خلاف جنگ شروع ڪري ڇڏي هئي ۽ هاڻ نيشنل ايڪشن پلان ۾ ڀرپور حصو وٺي رهيا آهيون ۽ انشاالله معصوم شهرين جي قاتلن کي عدالت جي ڪٽهڙي ۾ آڻي مظلومن کي انصاف فراهم ڪنداسين . سيد قائم علي شاهه واضع ڪيو ته ملڪ ۾ باقي دهشتگردن جي خلاف انهن جي خاتمي تائين جنگ جاري رهندي. هن چيو ته اسان دهشتگردي جي خلاف جنگ ۾ سنجيده آهيون ان جو نادازو ان ۾ لڳائي سگهجي ٿو ته سنڌ پوليس جي سالياني بجيٽ 60 ارب روپين تائين وڌايو ويو آهي جڏهن ته گذريل سال ته 5 ارب روپيا آئوٽ آف ٽرن بجيٽ به ڏنو ويو هو پوليس کي . وڏي وزير آرمي پبلڪ اسڪول جي شهيدن کي خراج عقيدت پيش ڪندي چيو ته اڄ سومر جي ڏينهن انهن جي چاليهي جي موقعي تي سنڌ صوبي ۾ سڀني سرڪاري ۽ خانگي اسڪولن ۽ سرڪاري افيسن ۽ پارٽي جي آفيسن ۾ دعائن جي لاءِ تقريبون ٿينديون هن چيو ته سڀني مشنري اسڪولن ۾ 5 منٽن جي لاءِ خاموشي ۽ پي پي جي آفيسن ۾ قرآن خواني ڪئي ويندي . وڏي وزير پشاور سانحي جي شهيدن کان علاوه آرمي جي جوانن، رينجرز ۽ پوليس جي جوانن کي به زبردست خراج عقيدت پيش ڪيو ۽ انهن جي عظمت کي سلام پيش ڪيو هن چيو ته اسان جي نوجوانن جون اهي قربانيون ضرور رنگ لائينديون ۽ اهي ڏينهن پري ناهن جو اسان جو هي ملڪ امن جو گهوارو بڻبو.

 

بجلي مفت ۾ نه پيا وٺون، گهٽتائي قبول ناهي: شرجيل ميمڻ

ڪراچي(اسٽاف رپورٽر) سنڌ جي اطلاعات ۽ بلديات کاتي جي وزير شرجيل انعام ميمڻ چيو آهي ته وفاق حڪومت پاران ڪي اليڪٽرڪ جي ذريعي ڪراچي کي ملڻ واري 650 ميگاواٽ بجلي ۾ ڪنهن قسم جي گهٽتائي نه ڪري. اسان هڪ ميگاواٽ جي به گهٽتائي کي ڪنهن صورت ۾ قبول نه ڪنداسين. وفاقي حڪومت جا ڪجهه وزير معاهدي جي واڌ ۾ رڪاوٽ بڻجڻ جي ڪوشش ڪري رهيا آهن. وزيراعظم فوري طور تي وفاق ۽ صوبن وچ ۾ نفرتون پکيڙڻ جي سازش ڪندڙن خلاف ايڪشن کڻي. آچر تي جاري ٿيندڙ پنهنجي هڪ بيان ۾ شرجيل انعام ميمڻ چيو ته ڪراچي ملڪ جي معيشيت جو 70 سيڪڙو روينيو ڏي ٿو ۽ وفاق کان ڪي اليڪٽرڪ کي بجلي جي فراهمي جي معاهدي ۾ جيڪڏهن ڪا رڪاوٽ وڌي وئي ته ان جو سڌوسنئون اثر ملڪي معيشيت تي پوندو. هن چيو ته ڪي اليڪٽرڪ کي ملندڙ 650 ميگاواٽ بجلي وفاق مفت يا ڪنهن گهٽ رقم تي نه بلڪه ان کي وڌيڪ قيمت تي فراهم ڪري ٿو، جنهن قيمت تي وفاق ٻين صوبن کي بجلي فراهم ڪندو آهي. شرجيل ميمڻ چيو ته وفاقي حڪومت فوري طور تي ڪي اليڪٽرڪ جا 650 ميگاواٽ بجلي جي فراهمي جي معاهدي ۾ واڌ ڪري ٻئي صورت ۾ ڪي اليڪٽرڪ کي وفاق کان بجلي جي فراهمي ۾ ڪنهن قسم جي گهٽتائي جو سڌوسنئون فرق ملڪي معيشيت تي پوندو. شرجيل ميمڻ چيو ته ڪجهه وفاقي وزير ان معاهدي جي واڌ ۾ ڄاڻي واڻي رڪاوٽون پيدا ڪري رهيا آهن ۽ هو هن ملڪ جي معيشيت کي تباهي طرف گامزن ڪرڻ وارين سازشن ۾ مصروف آهن. ان لاءِ وزيراعظم فوري طور تي انهن وزيرن  خلاف ايڪشن کڻي ۽ اهڙي طرح وفاقي حڪومت ۽ صوبن وچ ۾ مسئلا پيدا ڪرڻ کان پاسو ڪن. هن گذريل رات ڪراچي سميت سموري سنڌ ۾ بجلي جي ڊگهي بريڪ ڊائون جي به جاچ ڪرڻ ۽ ان جا سبب عوام آڏو آڻڻ جو به وفاق کان مطالبو ڪيو آهي.

 

نصير آباد ۾ دهشتگردن پاران ٽرانسميشن لائن جي تباهي بريڪ ڊائون جو سبب بڻي: عابد شير علي

لاهور (بيورو) پاڻي ۽ بجلي واري مملڪتي وزير عابد شير علي چيو آهي ته دهشتگردن طرفان سبي ويندڙ مرڪزي ٽرانسميشن لائن جي تباهي ملڪ ۾ بجلي جي بريڪ ڊائون جو سبب بڻي آهي، سرڪاري ٽي وي کي انٽرويو ۾ مملڪتي وزير جو چوڻ هو ته ڇنڇر جي رات نصيرآباد ۾ دهشتگردن گڊو کان سبي ويندڙ مرڪزي ٽرانسميشن لائن کي تباهه ڪيو جنهن سبب ملڪ  بجلي فراهمي جي نظام تي دٻاءُ وڌيو ۽ پورو ملڪ اونداهين ۾ ٻڏي ويو، هن جو چوڻ هو ته گذريل ٻن هفتن ۾ نصيرآباد ۾ دهشتگردي جو هي ٽئين وڏي ڪارروائي هئي، پاڻي ۽ بجلي واري وزارت مستقبل ۾ اهڙي بحران کي منهن ڏيڻ جي لاءِ بجلي جي فراهمي جو متبادل نظام به وضح ڪري رهي آهي، ياد رهي ته گذريل ڏيڍ مهيني دوران ملڪ ۾ ٽيون ڀيرو بجلي جو وڏو بريڪ ڊائون ٿيو آهي.

 

ناموس رسالت صه تي رت جو آخري ڦڙو به قربان ڪري ڇڏينداسين: سراج الحق

ڪراچي (اسٽاف رپورٽر) جماعت اسلامي جي امير سراج الحق چيو آهي ته امر جو وجود رڳو نبي ڪريم صه سان آهي، نامور رسالت صه تي رت جو آخري ڦڙو به قربان ڪنداسين، ناموس رسالت صه تي لکين عوام روڊن تي نڪري سگهي ٿو. جماعت اسلامي پاران يونيورسٽي روڊ تي گستاخ خاڪن خلاف مارچ کي خطاب ڪندي سراج الحق جو چوڻ هو ته اسان وزيراعظم کي اپيل ڪئي هئي ته او آئي سي جو اجلاس گهرائي، اجلاس نه گهرائڻ تي مختلف مسلم ملڪن جي نمائندن سان رابطو ڪيو،مون مسلم ملڪن جي سربراهن کي چيو آهي ته گڏجي پاڻ ئي احتجاج ڪرڻو پوندو. جماعت اسلاميي جي امير جو چوڻ هو ته نبي ڪريم صه جي شان ۾ گستاخي ڪندڙن جو پيڇو ڪندا رهنداسين، سموريون سياسي پارٽيون ناموس رسالت صه تي متحد ٿي وڃن.

 

اُتر وزيرستان ۾جيٽ جهازن جي بمباري، 35 دهشتگرد مارجي ويا

ميران شاهه (مانيٽرنگ ڊيسڪ) اُتر وزيرستان ۾ پاڪ فوج جي جيٽ جهازن جي بمباري ۾ پرڏيهين سميت 35 دهشتگرد مارجي ويا. آئي ايس پي آر موجب هوائي ڪارروائي ۾ اُتر وزيرستان جي تحصيل دته خيل ۾ ڪئي وئي ۽ جيٽ جهازن جي بمباري ۾ 35 دهشتگرد مارجي ويا، مارجي ويل دهشتگردن ۾ ڪيترائي پرڏيهي دهشتگرد به شامل آهن جڏهن ته فضائي ڪاررائي ۾ ملوث دهشتگردن جا ڪيترائي ٺڪاڻا تباهه ڪيا ويا. واضح رهي ته اُتر وزيرستان ۾ دهشتگردن خلاف آپريشن ”ضربعضب“ ڪاميابي سان جاري آهي ۽ جيٽ جهازن جي بمباري ۽ شيلنگ ۾ هن وقت تائين ڪيترائي دهشتگرد مارجي ويا ۽ ڪيترائي زخمي ٿي پيا آهن جڏهن ته سندن ٺڪاڻا پڻ تباهه ڪيا ويا آهن.

 

دپيڪا پڊوڪون جون 3 نيون فلمون هلندڙ سال سينيما گهرن جون زينت بڻبيون

ممبئي (شوبز نيوز) بالي ووڊ اداڪار دپيڪا پڊوڪون جون 3 وڏيون نيون فلمون ”تماشا“، ”پيڪو“ ۽ ”باجي رائو مستاني“ هلندڙ سال سينيما گهرن جون زينت بڻجنديون. ڀارتي ميڊيا موجب اداڪاره فلم پيڪو جي عڪسبندي مڪمل ڪرائي ورتي آهي جڏهن ته تماشا ۽ باجي رائو مستاني جي عڪسبندي اڃا رهيل آهي. جنهن سان کيس مصروفيت وڌائڻي پوندي. دپيڪا فلم ”تماشا“ جي ايندڙ شيڊول جي عڪسبندي جلد ئي دهلي ۾ شروع ڪرڻ واري آهي جنهن ۾ هو اٽڪل هڪ مهيني تائين مصروف هوندي ۽ ”باجي رائو مستاني“ جي شوٽنگ لاءِ پڻ خاص طور تي تياري ڪئي پئي وڃي.