تازيون خبرون

Daily Archives: January 17, 2015

قومي اسيمبلي ۾ جي آءِ ڊي او آرڊيننس جي مدي ۾ واڌ منظور، مخالف ڌر پاران ڪارروائي جو بائيڪاٽ

اسلام آباد(بيورو) قومي اسيمبلي ۾ ڊگهي عرصي کانپوءِ گڏيل اپوزيشن ڪنهن معاملي تي اڄ به راءِ جي اختلاف سان سامهون آئي آهي، گئس انفرا اسٽرڪچر ڊولپمينٽ آرڊيننس جي مدي ۾ واڌ واري ٺهراءُ تي مخالف ڌر سخت احتجاج بعد اجلاس جي ڪارروائي جو بائيڪاٽ ڪري ڇڏيو آهي. قومي اسيمبلي جي اجلاس گئس انفرا اسٽرڪچر ڊولپمينٽ آرڊيننس جو 22 جنوري تي جيئن ته مدو پورو ٿي رهيو هو، تنهنڪري حڪومت ان جي مدي ۾ واڌ وارو ٺهراءُ اسيمبلي ۾ پيش ڪيو، جنهن تي اپوزيشن جي سمورين جماعتن کي ڪاوڙ لڳي وئي ۽ ايوان جي ايجنڊا جون ڪاپيون ڦاڙي اسپيڪر جي ڊائيس جو گهيراءُ ڪيو ويو، ان موقعي تي گڏيل اپوزيشن واڪ آئوٽ به ڪيو ۽ واڪ آئوٽ وقت سمورين اپوزيشن پارٽيز جي ميمبرن جنهن ۾ تحريڪ انصاف جا به ٻه ميمبر شامل هئا، انهن نعريبازي ڪئي، ڪارو قانون نا منظور جا نعرا هڻندا اپوزيشن ميمبرز ايوان مان ٻاهرنڪري ويا، احتجاج ۾ حصو وٺندڙن ۾ پيپلز پارٽي، جماعت اسلامي، شيرپائو گروپ ۽ ايم ڪيو ايم شامل آهن. اپوزيشن جي واڪ آئوٽ کانپوءِ حڪومت آرام سان ان آرڊيننس جي مدي ۾ واڌ کي منظور ڪري ورتو، جنهن کانپوءِ 120 وڌيڪ ڏينهن لاءِ آرڊيننس قانون جي صورت ۾ موجود هوندو، حڪومت اپوزيشن جي غير موجودگي جو فائدو وٺي اليڪٽرانڪس ڪرائيم جي روڪٿام جي حوالي سان پڻ هڪ بل جي منظوري ڏني. اجلاس ۾ پيٽرول جي پنجاب ۾ کوٽ جي حوالي سان به بحث سامهون آيو.

 

سنڌ سرڪار پاران اين ايف سي ايوارڊ تحت حصو نه ملڻ خلاف معاملو وفاق آڏو اٿارڻ جو فيصلو

ڪراچي(اسٽاف رپورٽر) سنڌ سرڪار اين ايف سي ايوارڊ تحت حصي جي رقم نه ملڻ سميت ناڻي جا ٻيا معاملي وفاق آڏو اٿارڻ جو فيصلو ڪيو آهي، وڏي وزير جي صدارت هيٺ اعليٰ سطحي اجلاس ۾ وڌيڪ حڪمت عملي تيار ڪئي وئي. وزيراعليٰ هائوس ۾ وڏي وزير قائم علي شاهه جي صدارت هيٺ اجلاس ۾ اين ايف سي ايوارڊ ۾ صوبي جو حصو وٺڻ بابت حڪمت عملي جو جائزو ورتو ويو. وڏي وزير قائم علي شاهه جي صدارت هيٺ اجلاس ۾ قومي اسيمبلي ۾ اپوزيشن ليڊر خورشيد شاهه ناڻي واري اڳوڻي وفاقي وزير نويد قمر، مراد علي شاهه ۽ ٻين شرڪت ڪئي. اجلاس دوران اين ايف سي ايوارڊ تحت حصي جا پئسا نه ملڻ ۽ ناڻيکاتي سان واڳيل مسئلن تي وفاقي سرڪار آڏو آواز اٿارڻ جو فيصلو ڪيو ويو. ذريعن موجب خورشيد شاهه کي وفاقي سرڪار سان رابطو ڪري سنڌ کي جائز حصو ڏيارڻ جي ذميواري به ڏني وئي.

 

وزير اعظم احتساب جو مضمون نصاب ۾ پڙهائڻ جي منظوري ڏئي ڇڏي

پشاور(م.ڊ) وزير اعظم نواز شريف احتساب کي نصاب ۾ بطور مضمون شامل ڪرڻ جي منظوري ڏئي ڇڏي آهي، ۽ ان حوالي سان صوبن ۾ اعليٰ تعليمي ڪميشنز ۽ تعليم کاتي کي هدايت جاري ڪئي وئي آهي. نجي ٽي وي موجب احتساب کي بطور منضمون تعليمي نصاب ۾ شآمل ڪرڻ جي سبب اهو ٻڌايو ويو آهي ته ٻارن ۾ ڪرپشن متعلق شعور پيدا ٿئي ۽ هو ان کان محفوط رهي سگهن.

 

وزيراعظم ۽ پرويز رشيد پاران ڪراچي ۾ صحافين جي زخمي ٿيڻ تي ڳڻتي ظاهر، بهتر علاج جون هدايتون

اسلام آباد  (بيورو( وزيراعظم محمد نواز شريف ڪراچي ۾ هڪ مظاهري دوران هڪ غيرملڪي خابرو اداري جي صحافي جي زخمي ٿيڻ تي ڳڻتي جو اظهار ڪيو آهي. ڪالهه جمعي ڏينهن هتي وزيراعظم آفيس جي بيان موجب وزيراعظم زخمي صحافي جي جلد صحتيابي لاءِ دعا ڪئي ۽ عملدارن کي هدايت ڪئي ته زخمي صحافي کي بهترين طبي علاج فراهم ڪيو وڃي،. ٻئي طرف اطلاعات ۽ نشريات جي وفاقي وزير سينيٽر پرويز رشيد ڪراچي ۾ هڪ احتجاجي مظاهري ۾ هڪ ڪئميرامين ۽ فوٽوگرافر جي زخمي ٿيڻ تي گهري ڏک ۽ افسوس جو اظهار ڪيو آهي. هن زخمي فوٽو جرنلسٽ جي جلد صحتيابي لاءِ دعا ڪئي آهي.

 

پاڪستان دهشتگرديءَ جي خاتمي لاءِ پــُرعزم آهي: آرمي چيف

لنڊن(م.ڊ) آرمي چيف، لنڊن ۾ رائل ملٽري اڪيڊمي ۽ رائل ڪاليج آف ڊفينس اسٽڊينز جو دورو ڪيو، جنرل راحيل شريف جو چوڻ آهي ته پاڪستان دهشتگرديءَ جي خاتمي لاءِ پــُرعزم آهي. آءِ ايس پي آر موجب آرمي چيف جنرل راحيل شريف برطانوي دوري دوران لنڊن ۾ ملٽري اڪيڊمي سينڊهرٽ ۽ رائل ڪاليج آف ڊفينس اسٽيڊيز جو دورو ڪيو. ان دوران آرمي چيف، سڪيورٽيءَ بابت پاڪستان جو موقف پيش ڪيو ۽ دهشتگرديءَ کي منهن ڏيڻ لاءِ پنهنجي عــَزم جو ورجاءُ ڪيو. رائل ملٽري اڪيڊمي جي دوري دوران خطاب ڪندي آرمي چيف جنرل راحيل شريف چيو ته پاڪستاني ڪيڊٽس ٽيم ليڊر بڻجن ۽ ملڪ لاءِ نالو ڪمائين. جنرل راحيل شريف جو چوڻ هو ته پاڪستان دهشتگرديءَ جي خاتمي لاءِ پــُرعزم آهي. پاڪستان هاءِ ڪميشن پاران آرمي چيف جي مان ۾ ڊنر تقريب به منعقد ڪئي وئي جنهن ۾ پاڪستاني ڪميونٽي جي معزز شخصيتن، برطانيه ۽ يورپي پارليامينٽ جي ميمبرن به شرڪت ڪئي. تقريب کي خطاب ڪندي جنرل راحيل شريف جو چوڻ هو ته پشاور سانحي کانپوءِ سڄي سياسي قيادت متحد ٿي وئي آهي. آرمي چيف چيو ته دهشتگردن خلاف ڪارروائيون جاري آهن ۽ وڏي علائقي کي دهشتگردن کان پاڪ ڪيو ويو آهي.

 

گستاخ خاڪن خلاف سڄي ملڪ ۾ مظاهرا، ڪراچي ۾ چڪريون، ٻن صحافين سميت پنج ڄڻا زخمي

اسلام آباد/ڪراچي/لاهور(م.ڊ) سني تحريڪ جي سربراهه محمد ثروت اعجاز قادري جي اپيل تي توهين آميز خاڪن خلاف جمعي تي ملڪ گير مذمت جو ڏينهن ملهايو ويو. سڄي ملڪ جي مسجدن ۾ جمعي جي خطبن دوران توهين آميز خاڪن خلاف مذمتي ٺهراءَ منظور ڪيا ويا جڏهن ته راولپنڊي،لاهور، فيصل آباد، گوجرانواله، ملتان، حيدرآباد، سکر، پشاور ۽ مظفر آباد سميت ملڪ جي ڪيترن ئي شهرن ۾ جمعي جي نماز کان پوءِ احتجاجي مظاهرا ٿيا ۽ ريليون به ڪڍيون ويون. گستاخ خاڪا ٻيهر شايع  ڪرڻ خلاف ڪراچي ۾ احتجاج دوران مڇريل ماڻهن فرانس جي قونصليٽ جو گهيراءُ ڪرڻ جي ڪوشش ڪئي، ان موقعي تي اسلامي جمعيت طلبه ۽ پوليس وچ ۾ چڪرين سبب ٻن صحافين سميت پنج ڄڻا زخمي ٿي پيا، جڏهن ته علائقو ڪيتري ئي دير تائين جنگ جو ميدان بڻيل رهيو. ڪراچيءَ ۾ اسلامي جمعيت طلباءِ جي ڪارڪنن ٽيــِن تلوار ڪلفٽن کان احتجاجي ريلي ڪڍي. احتجاجي مظاهرو ڪندڙن، فرانسيسي قونصل خاني ڏانهن وڌڻ جــِي ڪوشش ڪئي ته پوليس کين روڪي ورتو، جنهن بعد مڇريل ماڻهن ۽ پوليس اهلڪارن وچ ۾ چڪريون شروع ٿيون. پوليس، احتجاج ڪندڙن کي روڪڻ لاءِ مٿن واٽر ڪينن جو استعمال، لٺبازي ۽ هوائي فائرنگ ڪئي،جڏهن ته مڇريل ڪارڪن به اهلڪارن تي پٿراءُ ڪندا رهيا. چڪرين دوران فائرنگ جي نتيجي ۾ ڪئمرامين عديل، فوٽوگرافر آصف حسنين ۽ هڪ پوليس اهلڪار اخلاق سميت پنج ڄڻا زخمي ٿي پيا. گوليون لڳڻ سبب پرڏيهي خابرو اداري جو فوٽو گرافي محمد آصف ۽ مقامي ٽي وي جو ڪئميرامين عديل پير ۾ گوليون لڳڻ سبب سخت زخمي ٿي پيو جنهن کي فوري طور تي جناح اسپتال منتقل ڪيو ويو جڏهن ته مظاهرين جي پٿراءُ سبب هڪ اهلڪار به زخمي ٿي پيو، ٻئي طرف جناح اسپتال جي حادثن واري شعبي جي انچارج سيمي جمالي جو چوڻ آهي ته فوٽو گرافي محمد آصف کي سيني ۾ گولي لڳي آهي جنهن جو آپريشن ڪيو پيو وڃي هوڏانهن ڇڪتاڻ واري صورتحال تي قابو ڪرڻ ڪرڻ لاءِ رينجرز جي وڏي نفري موقعي تي پهچي پوزيشنون سنڀالي ورتيون جڏهن ته ان دوران ڪيترن ئي شاگردن يک گرفتار ڪيو ويو ۽ شاگرد ٻيهر تين تلوار تي جمع ٿي ويا.ڇڪتاڻ واري صورتحال تي ڪنٽرول لاءِ رينجرز جي وڏي نفري موقعي تي پهچي پوزيشنون سنڀالي ورتيون،جڏهن ته ڪيترن ئي ڪارڪنن کي حراست ۾ پڻ ورتو ويو. فرانسيسي قونصليٽ آڏو چڪرين سبب تين تلوار وارو علائقو ڪيتري ئي دير تائين جنگ جو ميدان بڻيل رهيو ۽ علائقي واسي گهرن تائين محدود ٿي ويا. جماعت الدعوه آچر تي توهين وارن خاڪن جي ڇپائي خلاف مال روڊ تي مظاهري جو اعلان ڪري ڇڏيو حافظ سعيد سياسي ۽ مذهبي پارٽين سميت سمورن شعبن سان تعلق رکندڙ ماڻهن کي مظاهري ۾ شرڪت جي دعوت ڏئي ڇڏي لاهور ۾ جماعت الدعوه جي اهتمام هيٺ توهين وارن خاڪن خلاف احتجاجي مظاهري کي خطاب ڪندي حافظ سعيد جو چوڻ هو ته پاڪستاني حڪومت طرفان مذمتي قرارداد سٺو قدم آهي پر زباني خرچ بجاءِ عملي قدمن جي ضرورت آهي، ديني ۽ سياسي پارٽين کي  ان مسئلي بابت سختي سان نوٽيس وٺڻ گهرجي، جماعت الدعوه جي امير جو چوڻ هو ته فرانس ۾ سڀني اسلام مخالف گروهن جو گڏ ٿيڻ اعلان جنگ آهي، پنهنجي نبي صه جي حرمت تي سڀ ڪجهه قربان ڪري ڇڏينداسين، هن چيو ته 60 مسلم ملڪ کي هڪ پليٽفارم تي گڏ ٿي ايندڙ لائحه عمل تيار ڪن، مسلم امت گڏ ٿي وڃي ته اولهه جون سازشون ختم ٿي وينديون، حافظ سعيد جو چوڻ هو ته سڀني کان وڏي دهشتگردي توهين وارا خاڪا شايع ڪرڻ آهي، حڪمران جيڪڏهن دهشتگردي جو خاتمو چاهين ٿا ته انهن خلاف تحريڪ هلائين دهشتگردي کي اولهه ڦهلائي رهيو آهي. سني تحريڪ جي سربراهه ثروت اعجاز قادري چيو ته توهين رسالت دنيا جي سڀ کان وڏي دهشتگردي آهي. راءِ جي اظهار جي آزادي جي نالي تي مسلمانن جي مذهبي جذبن تي ٺٺول جي اجازت نه ٿي ڏئي سگهجي. هن چيو ته قومي اسيمبلي ۾ توهين آميز خاڪن خلاف مذمتي ٺهراءَ جي آجيان ڪريون ٿا.

 

برهمداغ بگٽي ۽ ٻيا بلوچ انتهاپسند دشمنن کان پئسو وٺي عليحدگي پسندي کي هٿي ڏئي رهيا آهن پرڏيهي کاتو

اسلام آباد(بيورو) پرڏيهي سيڪريٽري اعجاز چوڌري چيو آهي ته آرمي چيف پاران برطانوي وزير اعظم سان بلوچ انتهاپسندن ۽ حزبِ تحرير جو معاملو اٿارڻ ڪا نئين ڳالهه نه آهي، برهمداغ بگٽي ۽ ٻيا بلوچ انتهاپسند دشمنن کان پئسا وٺي ملڪ اندر عليحدگي پسندي کي هٿي ڏئي رهيا آهن. سينيٽ جي پرڏيهي معاملن بابت اسٽينڊنگ ڪميٽي کي ڏنل ڄاڻ ۾ پرڏيهي سيڪريٽري اعجاز چوڌري ٻڌايو ته آرمي چيف برطانوي وزير اعظم ڊيوڊ ڪيمرون سان بلوچ انتها پسندن ۽ حزب تحرير جو معاملو اٿاريو آهي، جيڪا نئين ڳالهه نه آهي. هن چيو ته اهو معاملو اڳي به يورپي يونين جي ميمبر ملڪن سان اٿاريو ويو آهي. اعجاز چوڌري ڪميٽي کي ٻڌايو ته برهمداغ بگٽي ۽ ٻيا بلوچ انتها پسند دشمنن کان پئسو وٺي انتهاپسندي ۽ عليحدگي پسندي کي هٿي ڏئي رهيا آهن، جيڪي ملڪ سندن مالي مدد ڪندا انهن سان اهو معاملو اٿاريو ويندو. پرڏيهي سيڪريٽري اجلاس کي وڌيڪ ٻڌايو ته ڀارت هڪ طرفو ڳالهين جو سلسلو بند ڪري رکيو آهي، پاڪستان سٺي پاڙيسري وارا لاڳاپا قائم رکڻ گهري ٿو پر اهو سڀ ڪجهه هڪ طرفو ممڪن نه آهي، ان لاءِ ڀارت کي به اڳڀرائي ڪرڻي پوندي. سينيٽ جي پرڏيهي معاملن بابت اسٽينڊنگ ڪميٽي جو اجلاس سينيٽر حاجي عديل جي سربراهي ۾ ٿيو. اجلاس ۾ سرتاج عزيز ٻڌايو ته پاڪ-افغان لاڳاپن جي بهتري لاءِ چين ڪردار ادا ڪرڻ جي آڇ ڪئي آهي. اجلاس کي وزير اعظم جي پرڏيهي دورن ۽ افغان صدر اشرف غني جي پاڪستاني دوري بابت بريفنگ ڏني وئي. اجلاس کي وزير اعظم جي چين ۽ جرمني وارن دورن بابت تفصيلي آگاهي ڏني وئي.

 

شهيد بينظير ڀٽو قتل ڪيس: 2 شاهدن بيان رڪارڊ ڪرائي ورتا

راولپنڊي(م.ڊ) راولپنڊي جي دهشتگردي ٽوڙ عدالت بينظير ڀٽو قتل ڪيس ۾ استغاثه جي ٻن شاهدن جا بيان قلمبند ڪرڻ کانپوءِ ڪيس جي ٻڌڻي 19 جنوري تائين ملتوي ڪري ڇڏي آهي. دهشتگردي ٽوڙ عدالت جي جج اسماعيل جويه ڪيس جي ٻڌڻي ڪئي، ٻڌڻي دوران استغاثه جي ٻن شاهدن گهرو وزارت جي اڳوڻي ترجمان جاويد اقبال چيمه ۽ ڊاڪٽر حبيب الرحمان تي جرح مڪمل ڪري سندن بيان قلمبند ڪيا ويا. عدالت ڪيس ۾ شاهد ڄاڻايل 9 ٻين شاهدن جي طلبي جا سمن به جاري ڪيا، جنهن کانپوءِ ڪيس جي ٻڌڻي 19 جنوري تائين ملتوي ڪئي وئي.

 

توهين وارن خاڪن جي شايع ٿيڻ خلاف جماعت اسلامي پاران ملين مارچ جو اعلان

لاهور(م.ڊ) فرانس جي مردُود رسالي چارلي ايبڊو پاران گستاخ خاڪن کي ڇاپڻ سبب اسلامي دنيا ۾ باهه لڳي وئي آهي ۽ حبداران رسول صلي الله عليه وآله وصلم لاءِ اِها ڳالهه ڪنهن به طريقي سان قبوليت جوڳي نه آهي، سڄي ملڪ ۾ جمعي نماز کان پوءِ احتجاج ڪري مطالبا ڪيا ويا ته فرانس سان سفارتي لاڳاپا ختم ڪيا وڃن، جماعت اسلامي جي سربراهه سراج الحق چيو آهي ته فرانسيسي رسالي هڪ ارب 7 ڪروڙ مسمانن جي جذبن کي مجروح ڪيو آهي. فرانسيسي مردود رسالي جي انتظاميه اڻ ڄاتل هٿياربندن جي حملي کانپوءِ مسلمان دنيا کان وير وٺڻ لاءِ سموريون اخلاقي حدون ٽوڙي ڇڏيون آهن ۽ ڇپيل خاڪن کي ٻيهر ڇاپي اسلامي دنيا تي اهڙو ته وار ڪيو آهي، جنهن خلاف سڄي دنيا ۽ پاڪستان ۾ سخت تاءُ آهي. پاڪستان جي سمورن ننڍن وڏن شهرن ۾ جماعت اسلامي ۽ ٻين مذهبي پارٽين فرانسيسي رسالي خلاف احتجاج ڪيو، اسلام آباد، لاهور، پشاور، ڪوئٽيا، ڪراچي، فيصل آباد، سرگوڌا ۽ ٻين شهرن ۾ احتجاج ڪري فرانسيسي حڪومت کان مطالبو ڪيو ويو ته اها ان رسالي تي پابندي مڙهي ۽ اسلامي دنيا جا جذبا مجروح ڪرڻ تي معافي وٺي. ڪراچي ۾ احتجاج ڪندڙن فرانسيسي سفارتخاني ڏانهن وڌڻ جي ڪوشش ڪئي ته ڪراچي پوليس احتجاج ڪندڙن مٿان ڪڙڪي پئي، فائرنگ، شيلنگ ۽ واٽر ڪينن جو استعمال ڪري عالمي استعمار کي بچائڻ جي ڀرپور ڪوشش ڪئي وئي، جنهن ۾ ٽي شاگرد بيهوش ٿي پيا، جڏهن ته فرانس سان ئي واسطو رکندڙ خابرو اداري جو هڪ فوٽو گرافر آصف حسنين ڇاتي ۾ گولي لڳڻ سبب زخمي ٿي پيو. لاهور ۾ جماعت اسلامي جي سربراهه سراج الحق وڏي عوامي ميڙ کي خطاب ڪندي 23 جنوري تي گستاخ خاڪن خلاف ڪراچي ۾ ملين مارچ جو اعلان ڪيو. سراج الحق جو چوڻ هو ته رسالي پاران ڇاپيل گستاخ خاڪن سان اسلامي دنيا جا جذبا مجروح ٿيا آهن ۽ هڪ ارب ست ڪروڙ مسلمان انهي زيادتي خلاف خون جا ڳوڙها روئي رهيا آهن. هن چيو ته جماعت اسلامي انهن گستاخ خاڪن خلاف 23 جنوري تي ڪراچي ۾ ملين مارچ منعقد ڪري رهي آهي، جنهن ۾ سڀني کي وڌ کان وڌ شرڪت ڪرڻ گهرجي. هن فرانس جي حڪومت کان مطالبو ڪيو ته رسالي تي پابندي هڻي اسلامي دنيا جا جذبا مجروح ڪرڻ تي معافي ورتي وڃي

 

پاڪستان داعش طرفان نام نهاد خلافت جي دعويٰ کي رد ڪري ٿو: مسعود خان

نيو يارڪ(اي پي پي) پاڪستان فلسطينين ۽ اسرائيل وچ ۾ ڳالهين ۾ تعطل تي ڳڻتي جو اظهار ڪندي گڏيل قومن واري اداري جي سلامتي ڪائونسل جي ميمبرن تي زور ڀريو آهي ته اهي واضح طور تي امن جي راهه هموار ڪندڙ ٺهراءُ آڻڻ لاءِ ڪم ڪن. عالمي تهذيب کي محفوظ رکڻ لاءِ سڀني کي گڏجي داعش کي روڪڻو پوندو، پاڪستان داعش طرفان نام نهاد خلافت جي دعويٰ کي رد ڪري ٿو مسعود خان چيو ته پاڪستان  داعش جي دهشتگرد ڪارروائين جي مذمت ڪري ٿو، مسعود خان چيو ته شام ۾ جنگبندي ۽ سيسي عمل جي بحالي لاءِ گڏيل قومن جي ڪوششن جي حمايت ڪريون ٿا. گڏيل قومن واري اداري ۾ پاڪستان جي مستقل نمائندي مسعود خان وچ اوڀر جي صورتحال تي بحث ۾ حصو وٺندي 15 رڪني سلامتي ڪائونسل کي ٻڌايو ته فلسطيني اٿارٽي ۽ اسرائيل وچ ۾ امن ڳالهين جي عدم موجودگي سبب اسرائيلين ۽ فلسطينين کي لڳاتار ڊپ ۽ جنگي صورتحال ۽ فلسطينين جي حقن جي خلاف ورزين کي منهن ڏيڻو پئجي رهيو آهي. مسعود خان سلامتي ڪائونسل جي ميمبرن کي خبردار ڪندي چيو ته ڪنهن به وقت وچ اوڀر ۾ تشدد ۽ تڪرار پيدا ٿي سگهي ٿو تنهن ڪري نيون امن ڪوششون شروع ڪرڻ جي فوري ضرورت آهي. هن اسرائيل طرفان فلسطيني اٿارٽي جو روڪيل ٽيڪس فوري جاري ڪرڻ سميت ٻين شروعاتي قدمن تي زور ڀريو ۽ چيو ته اسرائيل کي فلسطين جو گهيرو فوري طور تي ختم ڪرڻ گهرجي ۽ عالمي برادري کي غزه جي نئين سر تعمير لاءِ عطيا ڏيڻ جا پنهنجا واعدا پورا ڪرڻ گهرجن. هن چيو ته سڄي دنيا ۾ برطانيه، آئر لينڊ ۽ سوئيڊن سميت گهڻي ڀاڱي ملڪ فلسطين کي ڌار ملڪ طور مڃي رهيا آهن، ان اڳڀرائي باوجود سلامتي ڪائونسل متفق ٿيل دائري تي ٻڌل ٺهراءُ منظور ڪرڻ ۾ ناڪام رهي آهي. هن چيو ته 2012ع ۾ به هن وچ اوڀر جي صورتحال تي بحث ۾ حصو ورتو هو پر هن وقت به اهو مسئلو حل طلب آهي. واضح رهي ته گڏيل قومن واري اداري ۾ پاڪستان جو مستقل نمائندو مسعود خان پنهنجو عهدو ڇڏڻ وارو آهي جڏهن ته هاڻي سندس جاءِ تي مليحه لوڌي گڏيل قومن واري اداري ۾ پاڪستان جي مستقل نمائندي جي حيثيت سان پنهنجو عهدو سنڀاليندي