تازيون خبرون

Daily Archives: January 13, 2015

وزير اعظم سان آمريڪي پرڏيهي وزير جي ملاقات، پاڪ-آمريڪا لاڳاپن تي ڳالهيون

اسلام آباد (بيورو)  وزيراعظم نواز شريف سان آمريڪي پرڏيهي وزير جان ڪيري ملاقات ڪري ٻه طرفن لاڳاپن سميت مختلف معاملن تي ڳالهيون ڪيون آهن. پي ايم هائوس ۾ وزيراعظم سان آمريڪي پرڏيهي وزير ملاقات ڪئي. ملاقات دوران ٻه طرفن لاڳاپن، خطي جي سيڪيورٽي صورتحال ۽ ٻين گڏيل دلچسپي وارن معاملن تي خيالن جي ڏي وٺ ڪئي وئي. وزيراعظم محمد نواز شريف چيو آهي ته آمريڪا پاڪستان جي پرڏيهي پاليسي جو اهم جزو آهي، 16 ڊسمبر تي پشاور حملي کانپوءِ آمريڪي صدر باراڪ اوباما جو دوستي ۽ تعاون جو پيغام قابل تحسين آهي، هن اها ڳالهه آمريڪي پرڏيهي وزير جان ڪيري سان سومر ڏينهن وزيراعطم هائوس ۾ ملاقات دوران ڳالهائيندي چئي. وزيراعظم چيو ته 16 ڊسمبر تي پشاور سانحي کانپوءِ آمريڪي صدر باراڪ اوباما جي دوستي ۽ تعاون جي پيغام کي قدر جي نگاهه سان ڏسون ٿا، وزيراعظم پاڪستاني مصنوعات لاءِ وسيع تر پهچ ۽ روزگار جا وڌيڪ موقعا پيدا ڪرڻ لاءِ پاڪستان ۾ آمريڪي سيڙپڪاري تي پاڪستان جو ڌيان کي اجاگر ڪيو . ان کان اڳ آمريڪي پرڏيهي وزير جان ڪيري پاڪستان جي ٻن ڏينهن جي سرڪاري دوري تي اسلام آباد پهتو. پرڏيهي معاملن بابت وزيراعظم جي صلاحڪار سرتاج عزيز ايئرپورٽ تي جان ڪيري جي آجيان ڪئي. دوري جي ٻئي ڏينهن پاڪستان ۽ آمريڪا وچ ۾ اسٽريٽرجڪ ڳالهين جو دور ٿيندو جنهن ۾ پاڪستان جي نمائندگي سرتاج عزيز ڪندو. ڳالهين ۾ پاڪ – آمريڪا ورڪنگ گروپ جي نتيجن بابت غور ڪيو ويندو جڏهن ته ٻنهي ملڪن وچ ۾ لاڳاپا وڌيڪ مضبوط ڪرڻ بابت مختلف معاملن تي خيالن جي ڏي وٺ به ٿيندي. ذريعن موجب آمريڪي پرڏيهي وزير پنهنجي دوري دوران پاڪستاني قيادت کي صدر براڪ اوباما جي هلندڙ مهيني ڀارتي دوري بابت آگاهي ڏيندو. پاڪستاني اختيارين، پاران لائن آف ڪنٽرول ۽ ورڪنگ بائونڊري تي ڀارت جي بنا جواز فائرنگ ۽ گولاباري بابت جان ڪيري سان ڳالهايو ويندو جڏهن ته پاڪستان کي سول نيوڪليئر ضرورت کان به آگاهي ڏني ويندي.

 

سنڌ سرڪار کي نه پر ڪراچي ۾ اسڪولن کي خطرا آهن: قائم علي شاهه

ڪراچي (اسٽاف رپورٽر) سنڌ جي وڏي وزير سيد قائم علي شاهه چيو آهي ته ڪراچي ۾ مشنري، انگلش ميڊيم ۽ او ليول جي تعليم ڏيندڙ  اسڪولن کي خطرا آهن پر سنڌ سرڪار کي ڪوبه خطرو نه آهي. وڏي وزير ڪراچي جي لياري ۽ ڪلفٽن وارن علائقن ۾ مختلف اسڪولن جو دورو ڪري سڪيورٽي صورتحال جو جائزو ورتو. ان موقعي تي ميڊيا سان ڳالهائيندي وڏي وزير چيو ته ڪراچي ۾ اسڪولن جي سيڪيورٽي لاءِ اپاءُ ورتا پيا وڃن ۽ ڪجهه اسڪولن کي خطره آهن جنهن لاءِ ڪراچي شهر کي ٽن زونز ۾ ورهايو ويو آهي. هڪ سوال جي جواب ۾ وڏي وزير چيو ته سندس حڪومت کي ڪوبه خطرو نه آهي. ڪراچي ۾ حادثي جو شڪار ٿيل فوتين جا وارث پنهنجي پيارن جي لاشن لاءِ پريشان آهن پر وڏي وزير ميڊيا سان ڳالهائيندي دعويٰ ڪئي ته سمورن لاشن جي ڊي اين اي ٽيسٽ مڪمل ٿي وئي آهي . وڏي وزير سان اسڪولن جي دوري دوران تعليم وارو وزير نثار کهڙو ۽ ٻيا عملدار به گڏ هئا.

 

اين اي 122 تي بوگس ووٽن بابت عمران خان عوام کي گمراهه ڪيو: پرويز رشيد

اسلام آباد (بيورو) اطلاعات واري وفاقي وزير پرويز رشيد چيو آهي ته عمران خان اين اي هڪ سئو 22 ۾بوگس ووٽن بابت عوام کي گمراهه ڪري رهيو آهي، ڌانڌلين جي جاچ لاءِ جڊيشل ڪميشن جي قيام ۾ به پي ٽي آءِ سربراهه ئي رڪاوٽ آهي. اسلام آباد ۾ ميڊيا سان ڳالهائيندي وفاقي وزير پرويز رشيد چيو ته حڪومت عمران خان جي ڪنٽينر تي لڳايل الزامن جي جاچ لاءِ تيار آهي پر پي ٽي آءِ سربراهه ٻڌائي ته اهو الزامن کان ڇو ڀڄي رهيو آهي؟. هن چيو ته عمران خان اهي تڪ کولڻ جا مطالبا ڪري رهيو آهي، جن جا ڪيس اڳ ئي اليڪشن ٽربيونل ۾ هلي رهيا آهن، يا وري اهي اڪلائجي چڪا آهن. ڌانڌلين جي جاچ بابت عدالتي ڪميشن جي قيام بابت سوال جي جواب ۾ پرويز رشيد چيو ته حڪومت ڪڏهن ان کان انڪار ناهي ڪيو پر عمران خان پاڻ ئي جڊيشل ڪميشن جي قيام ۾ رڪاوٽ آهي. وفاقي وزير وڌيڪ چيو ته اين اي هڪ سئو 22 تي بوگس ووٽن بابت عمران عوام کي گمراهه ڪيو پر رپورٽ سامهون اچڻ بعد سڀ ڪجهه واضح ٿي ويو آهي.

 

دهشتگردن جي حملي کانپوءِ آرمي پبلڪ اسڪول ٻيهر کلي ويو، دهشتگرد قوم کي شڪست نٿا ڏئي سگهن: آرمي چيف

پشاور(م.ڊ) دهشتگردن جي حملي کانپوءِ پشاور جو آرمي پبلڪ اسڪول ٻيهر کلي ويو، دهشتگردن سان وڙهڻ جو عزم رکي شاگرد اسڪول پهچي ويا، آرمي چيف جنرل راحيل شريف اسڪول جو دورو ڪري شاگردن کي ڀليڪار ڪيو ۽ سندن والدين سان ملاقات ڪئي، آرمي چيف چيو آهي ته سڀني جا حوصلا بلند آهن، پاڪستاني قوم کي شڪست نٿي ڏئي سگهجي.. 16 ڊسمبر تي دهشتگردي جي دل ڏاريندڙ واقعي کانپوءِ پشاور جو آرمي پبلڪ اسڪول ٻيهر کلي ويو آهي، وڏي انگ ۾ شاگرد دهشتگردن کي شڪست ڏيڻ جو عزم کڻي اسڪول پهتا. آرمي چيف جنرل راحيل شريف آرمي پبلڪ اسڪول پهچي ويو ۽ اسڪول آيل شاگردن کي ڀليڪار ڪيو، آرمي چيف سان سندس گهر واري به گڏ هئي، شاگرد پاڻ سان گڏ آرمي چيف کي ڏسي خوش ٿي ويا ۽ سندن دل اڃان به وڏي ٿي وئي. آرمي چيف جنرل راحيل شريف شاگردن ۽ انهن جي والدين سان ملاقات ڪئي، کين آٿت ڏني ۽ سندن حوصلي کي ساراهيو. ان موقعي تي آرمي چيف جنرل راحيل شريف چيو ته پاڪستاني قوم کي شڪست نه ٿي ڏئي سگهجي، دهشتگردي جي ملڪ مان هميشه پاڙ پٽي ويندي. آرمي چيف جنرل راحيل شريف ۽ سندس گهر واري اسڪول ۾ قومي ترانو به چيو ۽ اسڪول جي استادن سان به ملاقات ڪئي. آءِ ايس پي آر جو چوڻ آهي ته پشاور پبلڪ اسڪول آيل شاگردن جا حوصلا بلند آهن…..

 

ڪراچي ۾ باهه لڳڻ وارن حادثن ۾ اضافي ۽ ٻين حادثن کي منهن ڏيڻ لاءِ فوري طور تي انتظام ڪيا وڃن: شرجيل ميمڻ

ڪراچي (اسٽاف رپورٽر) سنڌ جي اطلاعات ۽ بلديات واري صوبائي وزير شرجيل انعام ميمڻ ڪراچي ۾ باهه لڳڻ وارن حادثن ۾ اضافي ۽ ٻين حادثن کي منهن ڏيڻ لاءِ فوري طور تي انتظام ڪرڻ لاءِ سيڪريٽري بلديات، ايڊمنسٽريٽر ڪراچي ۽ سينيئر ڊائريڪٽر ميونسپل سروسز کي هدايتون جاري ڪري ڇڏيون آهن. هن ڪراچي جي سمورن فائر ٽينڊرز  کي جديد سامان سان ليس ڪرڻ سان گڏوگڏ فائر ٽينڊرز، اسنارڪلز ۽ ٻئي سامان کي مڪمل طور تي استعمال جوڳو بڻائڻ ۽ جلد ئي شهر لاءِ نوان فائر ٽينڊرز ۽ فائر مينز جي حفاظت لاءِ سامان جي خريداري جو عمل شروع ڪرڻ جون هدايتون جاري ڪيون آهن. هن سيڪريٽري بلديات کي هدايت ڪئي آهي ته هو ايندڙ ٽن ڏينهن ۾ ان حوالي سان رپورٽ کيس پيش ڪري. صوبائي وزير شرجيل انعام ميمڻ جي صدارت هيٺ سومر ڏينهن هڪ اعليٰ سطحي اجلاس ٿيو. اجلاس ۾ سيڪريٽري بلديات شازيه رضوي، ايڊمنسٽريٽر ڪراچي ثاقب سومرو، سينيئر ڊائريڪٽر ميونسپل سروسز مسعود عالم ۽ ٻيا اعليٰ آفيسر به موجود هئا. وزير بلديات شرجيل انعام ميمڻ ٽمبر مارڪيٽ سانحي ۽ گذريل ڏينهن نيشنل هائي وي تي لنڪ روڊ تي ٿيل خوفناڪ حادثي جي مڪمل رپورٽ طلب ڪري ورتي. ان موقعي تي سينيئر ڊائريڪٽر ميونسپل سروسز صوبائي وزير کي ٻڌايو ته بس حادثي کان پوءِ کيس 12 لڳي 45 منٽن تي اطلاع مليو ان کان پوءِ 12 لڳي 48 منٽن تي لانڍهي فائر اسٽيشن مان ٻه گاڏيون جڏهن ته ان کان فوري بعد وڌيڪ 4 فائر ٽينڊرز کي واقعي واري هنڌ روانو ڪيو ويو. پر رستي جي خراب حالت ۽ ٽريفڪ جام هئڻ باوجود به 35 منٽن اندر اندر فائر ٽينڊر واقعي واري هنڌ پهچي ويا هئا پر باهه جي شدت سبب ايتري  وڏي انگ ۾ فوتگيون ٿيون. ان موقعي تي شرجيل انعام ميمڻ چيو ته سموري شهر ۾ فائر اسٽيشنن کي جديد سامان ۽ خاص ڪري ڪميونيڪيشن جي سامان سان فوري طور تي آراستا ڪيو وڃي  ته جيئن هنگامي صورتحال جو وقت سر اطلاع ملي سگھي. هن چيو ته سموري شهر جي فائر اسٽيشنن تي موجود فائر ٽينڊرز ڪنهن به ڪارڻ سبب بيڪار آهن يا انهن جي مرمت گھربل آهي ته ان جي رپورٽ کيس ٽن ڏينهن اندر پيش ڪئي وڃي. گڏوگڏ شهر لاءِ نوان فائر ٽينڊر خريد ڪرڻ ، شهر ۾ ڳتيل آبادي ۽ سوڙهين گھٽين تائين فائر ٽينڊرز جي رسائي جي حوالي سان ننڍن فائر ٽينڊرز جي خريداري ۽ پاڻي جي وقت تي فراهمي سميت ٻئي حوالي سان رپورٽ ايندڙ ٽن ڏينهن اندر کيس ڏني وڃي. اجلاس ۾ صوبائي وزير فائر برگيڊ تي مقرر سموري عملي جي حاضري کي يقيني بڻائڻ، سموري فائر اسٽيشنن تي موجود عملي کي خبردار رهڻ ۽ ڪنهن به هنگامي صورتحال ۾ فوري رسپانس جي هدايت جاري ڪئي. اجلاس ۾ شهر ۾ صفائي سٿرائي، سيوريج ۽ ٻين معاملن جو به جائزو ورتو ويو ۽ سمورن اعليٰ آفيسرن کي هدايتون جاري ڪيون ويون ته هو ان سلسلي ۾ فوري طور تي شهر ۾ صفائي سٿرائي جي انتظامن کي يقيني بڻائين ۽ ڪنهن به شڪايت تي انهن خلاف ڪا ڪارروائي ٿئي ان کان بچن.

 

سکر ۽ فيصل آباد ۾ اڄ وڌيڪ 5 ڏوهارين کي ڦاهيءَ تي ٽنگيو ويندو

سکر /فيصل آباد(بيورو/مانيٽرنگ ڊيسڪ) دهشتگردن کي عبرتناڪ انجام تي رسائڻ جو عمل جاري آهي، اڄ وڌيڪ 5 ڏوهارين کي ڦاهيءَ تي ٽنگيو ويندو. اڱاري ڏينهن سکر سينٽرل جيل ۾ ٽن ۽ فيصل آباد جيل ۾ قيد مشرف حملي ڪيس جي ٻن جوابدارن کي موت جي سزا ڏني ويندي. سکر سينٽرل جيل ون ۾ قيد محمد شاهد حنيف،محمد طلحه ۽ خليل احمد کي سال 2001ع ۾ ڪراچي جي گلبهار ٿاڻي جي حد ۾ بچاءَ واري وزارت جي ڊائريڪٽر ظفر حسين شاهه کي قتل ڪرڻ جي ڏوهه ۾ ڦاهيءَ جي سزا ٻڌائي وئي هئي. 3 جنوري تي عدالت ٽنهي جوابدارن جا بليڪ وارنٽ جاري ڪيا،جيڪي سکر جيل جي انتظاميا کي ملي ويا آهن. جيل ذريعن جو چوڻ آهي ته ٽنهي دهشتگردن کي اڱاري جي صبح ساڍي ڇهين وڳي سينٽرل جيل ۾ ڦاهي ڏني ويندي. ٻئي طرف ڊسٽرڪٽ جيل فيصل آباد ۾ اڳوڻي صدر پرويز مشرف تي حملي واري ڪيس ۾ ملوث مشتاق احمد ۽ نوازش علي کي به سڀاڻي ڦاهيءَ تي ٽنگيو ويندو. ٻنهي ڏوهارين جي وارثن سان آخري ملاقات ڪرائي وئي آهي

 

گورنر سنڌ اسڪولن تي قبضا ڪندڙ ذميوارن خلاف ڪارورائي ڪري نه ته استعيفيٰ ڏئي: الطاف حسين

ڪراچي (اسٽاف رپورٽر) شاهه فيصل ڪالوني جي علائقي گرين ٽائون ۾ آصف بوائز اسڪول ۽ اختر گرلز سيڪنڊري اسڪول تي قبضا مافيه طرفان قبضو ڪرڻ ۽ ان کي مسمار ڪرڻ تي ايم ڪيو ايم جي قائد الطاف حسين سخت مذمت جو اظهار ڪيو آهي، الطاف حسين جو چوڻ آهي ته گورنر ذميوارن خلاف فوري ڪارروائي ڪري ۽ جيڪڏهن نه ٿو ڪري سگهي ته استعيفيٰ ڏئي، ايم ڪيو ايم جي قائد الطاف حسين معاملي تي فوري طور تي گورنر سنڌ ڊاڪٽر عشرت العباد سان رابطو ڪري هدايت ڪئي آهي ته آصف بوائز اسڪول ۽ اختر گرلز سيڪنڊري اسڪول تان قبضا ختم ڪرائي انهن اسڪولن جي تعمير جي جلد شروعات ڪئي وڃي اسڪولن جي تعمير مڪمل ٿيڻ تائين ٻارڙين جي تعليم جو جلد متبادل انتظام ڪيو وڃي، جن عنصرن اسڪولن کي مسمار ڪيو آهي انهن کي فوري طور گرفتار ڪيو وڃي ڀلي اهي ڪيترا به بااثر هجن.

 

محترمه پنهنجي وصيت ۾ بلاول ۽ بختاور جي اليڪشن وڙهڻ بابت ڪجهه به ناهي لکيو: امين فهيم

نيو سعيدآباد (نمائندو) پ پ پارليامينٽيرين مخدوم امين فهيم چيو آهي ته شهيد بي بي جي وصيت جو ڪوبه ٻيو حصو موجود ناهي، مون بابت بلاول ڀٽو کي پرچائڻ لاءِ لنڊن وڃڻ واري خبرن ۾ ڪابه سچائي ناهي. نيو سعيد آباد ويجهو اڳوڻي ايم پي اي ڪامل خان جمالي جي وارثن سان تعزيت بعد ميڊيا سان ڳالهائيندي امين فهيم چيو ته پيپلزپارٽي ۾ ڪابه ڌڙا بندي ناهي. مخدوم امين فهيم چيو ته شهيد راڻي جي ڪابه ٻي وصيت موجود ناهي، محترمه پنهنجي وصيت ۾ بلاول ۽ بختاور جي اليڪشن وڙهڻ بابت ڪجهه به ناهي لکيو. مخدوم امين فهيم چيو ته هو بلاول ڀٽو کي پرچائڻ لاءِ لنڊن نه ويو هو، هن بابت ڪوڙيون افوائون پکيڙيون ويون آهن. مخدوم امين فهيم چيو ته قومي ايڪشن پلان تي سموريون سياسي پارٽيون متفق آهن، فوجي عدالتن جي ڪم ڪرڻ بعد ڪجهه راءِ ڏئي سگهجي ٿي. مخدوم امين فهيم وڌيڪ چيو ته لڳي ٿو موجوده  حڪومت پنهنجو مدو پورو ڪندي، ٻين پارٽين جيان پيپلزپارٽي به عام چونڊن جي تياري ڪري رهي آهي.

 

 

بااختيار جوڊيشل ڪميشن نه بڻائي وئي ته نواز شريف لاءِ حڪومت هلائڻ ناممڪن ٿي ويندو: عمران خان

اسلام آباد(بيورو) تحريڪ انصاف جي چيئرمين عمران خان چيو آهي ته 18 جنوري تي ڌرڻا ڪنوينشن ۾ ايندڙ لائحه عمل جو اعلان ڪنداسين ۽ جيڪڏهن ان وقت تائين بااختياري جوڊيشل ڪميشن نه ٺهي ته نواز شريف لاءِ حڪومت ڪرڻ ناممڪن ٿي ويندو، اسلام آباد ۾ پريس ڪانفرنس ڪندي عمران خان جو چوڻ هو ته ڌانڌلي واري حڪومت کي کٽرائڻ  نگران حڪومت هئي جنهن ڌانڌلي ۾ انهن جي مدد ڪئي ۽ جڏهن به رٽرننگ آفيسرن کي ڪٽهڙي ۾ آندوويندو ته هو پاڻ ٻڌائيندا ته انهن کي ڪنهن ڌانڌلي تي مجبور ڪيو ان لاءِ چونڊن ۾ ڌانڌلي ڪندڙن تي آرٽيڪل 6 لڳڻ گهرجي، هن چيو ته حامد خان جهانگير ترين ۽ منهنجي تڪ ۾ ڌانڌلي ثابت ٿي چڪي آهي ۽ اعتزاز احسن جي گهرواري بشريٰ اعتزاز جي تڪ اين اي 124 جا ٿيلها اين اي 122 مان ملي جتان اياز صادق ڪامياب ٿيو ۽ فراڊ اليڪشن سان بڻجڻ واري اسيمبلي اياز صادق ڪهڙي طرح هلائي رهيو آهي ان ڪري ان کي فوري طور استعيفيٰ ڏيڻ گهرجي، عمران خان جو چوڻ هو ته جيڪڏهن پاڪستان کي عظيم ملڪ بڻائڻو آهي ته صاف ۽ شفاف چونڊون ڪرائڻيون پونديون ڇو ته ڌانڌلي ڪري اڳتي ايندڙ ماڻهو اسيمبلي ۾ اچي ڪرپشن جو مقابلو نه ڪري سگهندا، چونڊ ڌانڌلي جي جاچ لاءِ بااختيار جوڊيشل ڪميشن نه بڻائي وئي ته اليڪشن وڙهڻ جو ڪوبه فائدو ناهي هن جو چوڻ هوته جمهوريت جي ڏوهارين کي سزائون ملڻ تائين چونڊ سڌارن سان ڪوبه فرق نه پوندو.

 

سول عدالتن پاران 8 هزار جوابدارن کي ٻڌايل ڦاهي جي سزائن تي حڪومت خود عملدرآمد ناهي ڪيو: سراج الحق

چيچاوطني (م.ڊ) جماعت اسلامي جي امير سراج الحق چيو آهي ته سول عدالتن پاران 8 هزار جوادبدارن کي ٻڌايل ڦاهين جي سزائن تي حڪومت پاڻ عملدرآمد ناهي ڪيو مدرسن تي لڳايل الزامن جو حڪومت اڄ تائين ڪوئي ثبوت ناهي ڏيئي سگهي ۽ دهشتگردي ۾ ملوث ڪنهن هڪ به مدرسي جي نشاندهي ڪئي ويئي هتي ڪسوال مان ميڊيا سان ڳالاهئيندي هن چيو ته 16 ڊسمبر کان پوءِ قوم متحد ٿي حڪومت سان گڏ بيهي رهي هئي ۽ وزيراعظم کي دهشتگردي ختم ڪرڻ جو مينڊيٽ ڏنو هو پر حڪومت موقعي مان فائدو وٺڻ ۾ 100 سيڪڙو ناڪام ٿي رهي آهي مسلسل اختيار ملڻ جي باوجود دهشتگردي کي ختم ڪرڻ لاءِ حڪومت ڪائي متاثر ڪندڙ ڪارروائي ناهي ڏيکاري سگهي تحفظ پاڪستان بل جي نالي سان شهرين جي آزادي کسي ويئي پر بدامني ۽ دهشتگردي تي ڪنٽرول ڪرڻ جي ڪائي عملي شڪل آڏو ناهي آندي ويئي حڪومت دهشتگردي کي روڪڻ لاءِ ڪي به اڳواٽ قدم ناهي ڪري سگهي ايئن لڳي ٿو ته حڪومت کي عوام جي جان ۽ مال ۽ عزت جي تهفظ سان ڪوئي تعلق نه آهي جماعت اسلامي جي شوريٰ طئي ڪيو آهي ته 2015 ۾ وڏي پئماني تي رابطا عوام مهم هلائي ويندي ۽ جماعت اسلامي جا دروازا عام ماڻهن لاءِ کوليا ويندا سڄي ملڪ ۾ ميمبرسپ مهم هلائي هڪ ڪروڙ ماڻهن کي جماعت جو ميمبر ڪارڪن ۽ رڪن بڻايو ويندو رابطا عوام مهم ۾ ڊويزنل هيڊڪوارٽرز تي نوجوانن آبادگارن ۽ پورهيتن جا وڏا وڏا ڪنوينشن منعقد ڪيا ويندا.