تازيون خبرون

Daily Archives: January 9, 2015

ڀارت سان لاڳاپا اميد جي ابتڙ آهن، ڀارت جو ڳالهين جي ميز تان ڀڄڻ سمجهه کان ٻاهر آهي: نواز شريف

بحرين (مانيٽرنگ ڊيسڪ) وزير اعظم ميان نواز شريف چيو آهي ته ڀارت سان لاڳاپا اميد ۽ خواهش جي ابتڙ آهن، سمجهه ۾ ئي نه ٿو اچي ته ڀارت ڳالهين جي ميز تان ڇو ڀڳو پر ٻُڌ سُڌ اها آهي ته والاريل ڪشمير ۾ جيڪي چونڊون رٿيل هيون، انهن جي ڪري ڀارت فرار چاهيو، دهشتگردي خلاف سڄي قوم کي جنگ وڙهڻي پوندي، آپريشن جا سٺا نتيجا نڪري رهيا آهن. بحرين ۾ رهندڙ پاڪستانين جي ميڙ کي خطاب ڪندي نواز شريف چيو ته بحرين سان لاڳاپن ۾ بهتري جي خواهش آهي ۽ ڪوشش ڪري رهيا آهيون ته اهي لاڳاپا وڌيڪ بهتر ٿين، هن چيو ته بحرين ۾ رهندڙ پاڪستاني بحرين جي ترقي ۾ اهم ڪردار ادا ڪري رهيا آهن. نواز شريف جو چوڻ هو ته پاڪستان ۾ حالتون بهتري ڏانهن وڌي رهيون آهن ۽ جلد بجلي بحران سميت ٻين بحرانن تي ضابطو آندو ويندو، تيل جون قيمتون ٽيهه سيڪڙو گهٽايون آهن، جنهن سان به عام ماڻهو رليف محسوس ڪري رهيو آهي. نواز شريف جو چوڻ هو ته آپريشن ضرب عضب جا سٺا نتيجا نڪري رهيا آهن ۽ ڪيترائي دهشتگرد مارجي ويا آهن. هن چيو ته تازو افغان صدر اشرف غني سان اسلام آباد ۾ ملاقات دوران کيس ڏاڍي خوشي ٿي ته هن جا به دهشتگردن خلاف ويچار ساڳيا هئا، مثال طور کيس ان ڳالهه تي بيحد خوشي آهي ته جڏهن هن اشرف غني کي چيو ته لاڳاپن ۾ نئين پيج جو اضافو ڪجي ته اشرف غني کيس چيو ته نئون پيج ڇو نئون ڪتاب ڇو نه؟ نواز شريف بجلي ۽ توانائي جي منصوبن بابت به بحرين ۾ مقيم پاڪستانين کي تفصيل سان بريفنگ ڏني. نواز شريف چيو ته طالبان سان ڳالهيون شروع ڪيوسين پر جڏهن ڪراچي ايئرپورٽ تي حملو ڪيو ويو ته طالبان سان ڳالهين جا در هميشه لاءِ بند ٿي ويا. نواز شريف چيو ته دهشتگردي خلاف جنگ ۾ هزارين پاڪستانين قربانيون ڏنيون، دهشتگردي سبب ملڪي معيشت کي اربين رپين جو نقصان ٿيو. نواز شريف ڀارتي جارحيت جي به مذمت ڪئي ۽ چيو ته ڪشمير تڪرار کي گڏيل قومن جي ٺهرائن جي روشني ۾ حل ڪيو وڃي. نواز شريف ملٽري ڪورٽس جي حمايت به پاڪستانين کي بريف ڪيو ۽ کين ٻڌايون ته اهڙين عدالتن جي ضرورت محسوس ڪئي پئي وئي ۽ انهن جي قيام سان دهشتگردي تي ضابطو آڻڻ ۾ مدد ملندي.

 

سنڌ جي اپيڪس ڪميٽي قومي ايڪشن پلان تي عمل لاءِ 4 ڪميٽيون جوڙي ڇڏيون

ڪراچي (اسٽاف رپورٽر) سنڌ جي اطلاعات ۽ بلديات واري وزير شرجيل انعام ميمڻ چيو آهي ته آئين ۾ 21 ترميم جو فيصلو پيپلز پارٽي خوشي يا شوق سان ناهي ڪيو پيپلز پارٽي هن ملڪ جي واحد سياسي جماعت آهي جنهن هميشه مارشل لا جي خلاف جھدوجھد ڪئي آهي. 21 ترميم کان پوءِ وفاق پاران نيشنل ايڪشن پلان تي عملدرآمد جي حوالي سان وزير اعليٰ سنڌ سيد قائم علي شاھ جي صدارت ۾ ٿيل اجلاس ۾ اهم فيصلا ڪيا ويا آهن. اجلاس ۾ ڪورڪمانڊر سنڌ، گورنر سنڌ، گھرو کاتي وارو سيڪريٽري، ڊي جي رينجرز، آئي جي سنڌ ۽ لاڳاپيل ادارن جي اعليٰ آفيسرن شرڪت ڪئي. ان قانون موجب صوبا سمورن اهم ڪيسن جيڪي مذهبي ۽ فرقيواراڻا ڪيسن کان علاوه دهشتگردي جي ٻين ڪيسن کي وفاق کي اُماڻيون ويندو ۽ اهي ان جي ڇنڊ ڇاڻ کان پوءِ انهن کي آرمي ڪورٽ ۾ موڪليندي. اهڙن خيالن جو اظهار هن خميس واري ڏينهن پنهنجي آفيس ۾ ايپيڪس سنڌ چيپٽر جي وزير اعليٰ هائوس ۾ وزير اعليٰ سنڌ جي صدارت هيٺ ٿيندڙ اجلاس کان پوءِ ميڊيا کي بريفنگ ڏيندي ڪيو. ان موقعي تي گھرو کاتي واري سيڪريٽري نياز عباسي ۽ اطلاعات واري سيڪريٽري ذولفقار علي شالواڻي به ساڻس موجود هئا، شرجيل انعام ميمڻ چيو ته اجلاس ۾ 21 آئيني ترميم کان پوءِ وفاق پاران صوبي کي مليل هدايتن ۽ ان سلسلي ۾ صوبي جي ذمي ڏنل ذميوارين جي حوالي سان خيالن جي ڏي وٺ ڪئي وئي . هن چيو ته ان قانون تحت صوبا سڌو سئون آرمي ڪورٽس کي ڪو به ڪيس نه اُماڻينديون مگر صوبا اهي سمورا ڪيس جيڪي آئين ۽ قانون موجب 21 ترميم جي زمري ۾ اچن ٿا انهن کي وفاقي گھرو کاتي کي اُماڻيندي ۽ وفاقي گھرو کاتو انهن جي ڇنڊ ڇاڻ ڪري انهن کي آرمي ڪورٽس ۾ موڪليندو. هن چيو ته ان سلسلي ۾ وزير اعليٰ سنڌ آئي جي سنڌ، ۽ ڊي جي رينجرز کي هدايتون ڏنيون آهن ته هو اهي سمورا ڪيس جيڪي ان زمري ۾ اچن ٿا اهي ايپيڪس ۾ آڻين ته جيئن انهن جي مڪمل ڇنڊ ڇاڻ کان پوءِ انهن ڪيسن کي وفاق ڏانهن اُماڻيووڃي. هن چيو ته ايئرپروٽ سانحو، مهراڻ بيس ڪيس، 18 آڪٽوبر سانحو ۽ ٻيا دهشتگردي جا ڪيس وفاقي گھرو کاتي ڏانهن موڪلڻ تي اتفاق ٿي ويو آهي ان کان علاوه اهي سمورا ڪيس جيڪي دهشتگردي جي زمري ۾ اچن ٿا انهن کي به اُماڻيو ويندو. شرجيل انعام ميمڻ چيو ته اجلاس ۾ فيصلو ڪيو ويو آهي ته هن وقت 375 ڪيس اهڙا آهن جنهن تي سنڌ ۽ سپريم ڪورٽ جڏهن ته هڪ ڪيس جي ايڇ ڪيو ۾ ٻڌڻي هيٺ آهي جڏهن ته 3000 ڪيس ٽارگيٽ ڪلنگ ۽ ڀتاخوري جا آهن جن مان صرف 50 ڏوهارين تي ڪيس ثابت ٿيا آهن باقي رهيل ڪيس دير جو شڪار آهن جڏهن ته ڪافي ڪيسن ۾ ته ڏوهارين معزز عدالت فقط 6 ڪلاڪن جي سزا ڏئي آزاد ڪري ڇڏيو. هن چيو ته نيشنل ايڪشن پلان جي 20 اهم نڪتن ۾ 14 نڪتا صوبائي حڪومتن جي زمري ۾ اچن ٿا ۽ انهن سمورن ڪيسن جي حوالي سان ايپيڪس ۾ غور ڪري انهن کي وفاقي گھرو کاتي جي حوالي ڪيو ويندو. شرجيل انعام ميمڻ چيو ته ايپيڪس ڪميٽي جو سربراھ وزير اعليٰ سنڌ هوندو جڏهن ته وڌيڪ چار ذيلي ڪميٽين ۾ ايگزيڪٽيو ڪميٽي ۽ ليگل ڪميٽي جو اڳواڻ گھرو کاتي وارو سيڪريٽري هوندو ان کان علاوه جانچ ۽ ميڊيا ڪميٽي به جوڙي وئي آهي. شرجيل انعام ميمڻ چيو ته اجلاس ۾ صوبي بابت اهم فيصلا ڪيا ويا آهن، جنهن تحت سموري صوبي ۾ هاڻ ڪرائي تي گھر ڏيڻ ۽ وٺن واري کي رجسٽريشن ڪرائڻي پوندي ۽ ان بابت جلد ئي قانون ۾ ترميم ڪئي ويندي. صوبي ۾ موجود غير ملڪين ۽ افغان مهاجرن جي خلاف ڀرپور ڪريڪ ڊائون ڪيو ويندو ۽ ان سلسلي ۾ صوبي جي سمورن ڊويزنل ڪمشنرن کي ٽاسڪ ڏنو ويو آهي ته هو بلڊرن، پٽرول پمپ مالڪن، هوٽلن ۽ ڳوٺاڻن علائقن ۾ سرن جي ڀٽي مالڪن، دڪاندارن ۽ گھرن جي مالڪن سان رابطو ڪري انهن کان آگاهي حاصل ڪندا ۽ انهن کي باور ڪرايو ويندو ته هو انهنن وٽ موجود غير قانون تاريڪ وطن ۽ افغان مهاجرن کي فوري طور تي پاڻ وٽان هٽائين. هن چيو ته سول سوسائٽي، گھرن ۽ دڪار جي مالڪن تي به اها ذميواري لاڳو ٿئي ٿي ته هو پاڻ وٽ رکيل نوڪرن جي ڪاغذن  ۽ شناختي ڪارڊ جي مڪمل جانچ پڙتال ڪرڻ کان پوءِ کين نوڪري تي رکن ۽ ان سموري عمل لاءِ وقت ڏنو ويندو. هن چيو ته ان بابت نادرا سان رابطي ڪرڻ جو به فيصلو ڪيو ويو آهي ته هو غلط شناختي ڪارڊ جاري ڪرڻ کي روڪڻ ۾ ڀرپور ڪردار ادا ڪري. هن چيو ته اجلاس ۾ فيصلو ڪيو ويو آهي صوبي ۾ دهشتگردن ۽ دهشتگردي کي منهن ڏيڻ لاءِ 1 هزار جوانن تي مشتمل ڪائونٽر ٽيررزم فورس (انسداد دهشتگردي فورس) قائم ڪئي وڃي ۽ ان فورس ۾ اهل ۽ ميرٽ تي ڀريتن جي حوالي سان وزير اعليٰ سنڌ پاران هڪ مانيٽرنگ ڪميٽي جوڙي پئي وڃي. شرجيل انعام ميمڻ اجلاس کي ٻڌايو ته صوبي ۾ 270 سڪيورٽي ڪمپنين ۾ 60 هزار کان وڌيڪ ملازم ڪم ڪري رهيا آهن جن ۾ غير قانوني طارقين وطن، افغان مهاجر ۽ ڏوهارين جي موجودگي جي رپورٽ آهي، جنهن تي فيصلو ڪيو ويو آهي ته انهن سمورين جي ڇنڊ ڇاڻ ڪئي ويندي ۽ جيڪڏهن اهڙو ملوث هوندو ته ان خلاف سخت قدم کنيون ويندو. اجلاس ۾ فيصلو ڪيو ويو ته صوبي جي سمورن داخلي ۽ خارجي رستن تي چيڪ پوسٽون قائم ڪيون وڃن جنهن جو مقصد ٻئي علائقن مان صوبي ۾ داخل ٿيندڙن جي رجسٽريشن کي يقيني بڻائڻ آهي. هن چيو ته اجلاس ۾ ٻڌايو ويو آهي ته صوبي ۾ 500 ٽارگيٽ ڪلرن ۽ 450 ڏوهارين ۽ ڀنگ خاطر اغوا ۾ ملوث ڏوهاري مفرور آهن جنهن تي انهن سمورن جي سرن جي قيمت به مقرر ڪرڻ جو فيصلو ڪيو ويو جڏهن ته فيصلو ڪيو ويو آهي ته عوام ۽ ڳجھن ادارن جي مدد سان انهن سمورن ڏوهارين کي گرفتار ڪري سگھجي. هن چيو ته لائوڊ اسپيڪر، وال چاڪنگ ۽ نفرت انگيز لٽريچر جي پکيڙ کي روڪڻ لاءِ به سخت اُپاءَ وٺڻ لاءِ وزير اعليٰ سنڌ هدايتون جاري ڪيون آهن ۽ سمورن لاڳاپيل کاتن کي هدايتون ڪيون ويون آهن ته هو اڄ جي اجلاس ۾ ٿيل سمورن فيصلن تي سختي سان عمل ڪن. هن چيو ته هن وقت ملڪ جا سمورا اسٽيڪ هولڊرز جن ۾ سياسي جماعتون ، پاڪ فوج ۽ امن امان بحال ڪندڙ ادارا هڪ نڪتي تي متفق آهن ته صوبي ۽ ملڪ مان دهشتگردي ۽ ۽ انتها پسندي کي ختم ڪيو وڃي ۽ اڄ جي اجلاس ۾ ڪورڪمانڊر سنڌ پنهنجي مڪمل تعاون جو يقين ڏياريون آهي. صولت مرزا جي ڦاهي کي روڪڻ بابت سوال جي جواب ۾ شرجيل انعام ميمڻ چيو ته ان جا حڪم وفاقي گھرو کاتي پاران آيا آهن ان ڪري ان سوال جو جواب وفاقي گھرو وزير ئي ڏئي سگھي ٿو. هن هڪ سوال جي جواب ۾ چيو ته سوشل ميڊيا ۽ ٻين ذريعن تي جھڙي قسم جون خبرون هليون آهن ته هاڻ اسان کي ملڪ مان دهشگردي ۽ انتها پسندي لاءِ سنجيده اُپاءَ وٺڻا پوندا . ملٽري ڪورٽ جي تعداد ۽ اهي ڪٿي ڪٿي بڻجنديون جي سوال جي جواب ۾ هن چيو ته ان بابت سمورا ختيار وفاقي حڪومت وٽ آهن ان جو جواب به اهي ئي ڏئي سگھن ٿا. اسان جو ڪم دهشتگردي، مذهبي انتها پسندي ۽ فرقيواريت جي زمري ۾ ايندڙ سمورا اهم ڪيسز کي ايپيڪس جي ذريعي وفاقي گھرو کاتي ڏانهن موڪلڻ آهي. هڪ سوال جي جواب ۾ شرجيل انعام ميمڻ چيو ته 21 ترميم جو فيصلو پيپلز پارٽي خوشي يا شوق سان ناهي ڪيو ، پيپلز پارٽي هن ملڪ جي واحد سياسي جماعت آهي جنهن هميشه مارشل لا جي خلااف جھدوجھد ڪئي آهي. اسان عوام جي جماعت آهيون ۽ هن ملڪ ۾ جتي معصوم ٻارن، پوليس آفيسرن، نوجوانن ۽ قومي ادارن تي حملا ٿيندا ته اتي اهڙي قسم جا مشڪل ۽ سخت فيصلا عوامي مفاد لاءِ ضروري ٿي ويندا آهن.

 

سپريم ڪورٽ ڪالاباغ ڊيم جي اڏاوت بابت درخواستون رد ڪري ڇڏيون

اسلام آباد (بيورو) سـپريم ڪورٽ ڪالاباغ ڊيم بابت سموريون درخواستون رد ڪندي چيو آهي ته گڏيل مفادن واري ڪائونسل جو اجلاس سڏائڻ عدالت نه پر حڪومت جو ڪم آهي. چيف جسٽس ناصر المــُلڪ جي سربراهي ۾ ٽه رڪني بينچ،ڪالاباغ ڊيم بابت اَي ڪي ڊوگر جي درخواستن تي ٻڌڻي ڪئي. ان موقعي تي اَي ڪي ڊوگر چيو ته ڪالاباغ ڊيم بابت ريفرينڊم ڪرايو وڃي ۽ سي سي آءِ جو اجلاس گهــُرايو وڃي. اي ڪي ڊوگر چيو ته ملڪ ۾ 10 سالن کانپوءِ پاڻي جو سخت بحران پيدا ٿيندو. چيف جسٽس چيو ته گڏيل مفادن واري ڪائونسل جو اجلاس گهــُرائڻ عدالت نه پر حڪومت جو آهي. بعد ۾ عدالت سموريون درخواستون رد ڪندي چيو ته درخواستون اثرائتيون ناهن.

 

سڄي قوم ۽ هٿياربند فوج پشاور سانحي جي شهيدن جي وارثن سان گڏ آهي: آرمي چيف

راولپنڊي (بيورو) آرمي چيف جنرل راحيل شريف چيو آهي ته سڄي قوم ۽ هٿياربند فوج پشاور سانحي  جي شهيدن جي وارثن سان گڏ آهي. پاڪ فوج جي ترجمان موجب آرمي چيف جنرل راحيل شريف ڪور هيڊڪوارٽر پشاور جو دورو ڪري ڪورڪمانڊر پشاور سان ملاقات ڪئي ۽ آپريشن ضرب عضب سميت آپريشن خيبرون ۾ ٿيندڙ اڳڀرائي جوجائزو ورتو. ترجمان جو چوڻ هوته آرمي چيف جنرل راحيل شريف ۽ سندس گهر واري پشاور سانحي جي شهيدن لاءِ ٿيندڙ قرآن خواني ۾ به شرڪت ڪئي جڏهن ته ان موقعي تي آرمي چيف جو چوڻ هو ته هٿياربند فوج پشاور سانحي جي متاثر خاندانن سان گڏ آهي.

 

لڳي ٿو ته سنڌ ۽ پنجاب صوبا مڪاني چونڊون نه ٿا ڪرائڻ گهرن: چيف جسٽس

اسلام آباد (بيورو) سپريم ڪورٽ آف پاڪستان سنڌ ۽ پنجاب کان مڪاني چونڊن لاءِ ايندڙ ٻڌڻي تي تاريخ طلب ڪندي ٻنهي صوبن کي تڪ بندين لاءِ هڪ مهيني جي مهلت ڏئي ڇڏي آهي، چيف جسٽس جسٽس ناصر الملڪ چيو آهي ته لڳي ٿو ته ٻئي صوبا مڪاني چونڊون نه ٿا ڪرائڻ گهرن.سپريم ڪورٽ ۾ چيف جسٽس، جسٽس ناصر الملڪ جي سرابراهي مڪاني چونڊن بابت ڪيس جي ٻڌڻي ٿي. سپريم ڪورٽ، اليڪشن ڪميشن کان سنڌ ۽ پنجاب ۾ مڪاني چونڊن لاءِ تاريخ طلب ڪندي چيو آهي ته لڳي ٿو ته ٻئي صوبا مڪاني چونڊون ڪرائڻ نٿا چاهين. چيف جسٽس آف پاڪستان جسٽس ناصر الملڪ چيو آهي ته ايندڙ ٻڌڻي تي هر صورت ۾ ٻئي صوبا مڪاني چونڊن جي تاريخ ڏين. عدالت، سنڌ ۽ پنجاب ۾ تڪبنديون هڪ مهيني اندر مڪمل ڪرڻ جو به حڪم ڏيندي چيو آهي ته فوجي ڇانوڻين ۾ مڪاني چونڊن لاءِ قانونسازي هڪ هفتي ۾ مڪمل ڪئي وڃي.

 

اليڪشن ڪميشن پاران اسيمبلي ميمبرن جي اثاثن جا تفصيل جاري، 4 ميمبر معطل ڪرڻ جو حڪم

اسلام آباد (بيورو) اليڪشن ڪميشن پارليامينٽ ۽ چئني صوبائي اسيمبلين جي ميمبرن جي اثاثن جا تفصيل جاري ڪيا ويا آهن، جڏهن ته اثاثا جمع نه ڪرائيندڙ 5 ميمبرن جي ميمبرشپ معطل ڪرڻ جا حڪم جاري ڪري ڇڏيا آهن. اليڪشن ڪميشن پارليامينٽ ۽ چئني صوبائي اسيمبلين جي ميمبرن جي اثاثن جا تفصيل جاري ڪيا ويا. وزيراعظم نواز شريف اليڪشن ڪيمشن وٽ جمع ڪيل اثاثن ۾ هڪ ارب، مري ۾ سندس ڌيءَ ڪلثوم نواز جي نالي تي مري ۾ 10 ڪروڙ رپين جو گهر ۽ پنهنجي اڪائونٽ ۾ 16 ڪروڙ رپيا ظاهر ڪيا ويا آهن. پي ٽي آءِ سربراهه عمران خان اليڪشن ڪميشن وٽ 3 ڪروڙ 33 لک ۽ 63 هزار جا اثاثا ظاهر ڪيا آهن، جنهن ۾ بني گالا ۾  3سئو ڪئنال جو گهر جا به تفصيل ڏنا ويا آهن، جڏهن ته تفصيلن ۾ پرڏيهه ۾ ڪابه ملڪيت ظاهر نه آهي ڪئي وئي. اليڪشن ڪميشن موجب، وڏي وزير سيد قائم علي شاهه هڪ ڪروڙ 93 لک رپين جي ملڪيت جا اثاثا ظاهر ڪيا ويا آهن، جڏهن ته هن اثاثن ۾گاڏي نه هجڻ جا تفصيل جعم ڪرايا آهن. اليڪشن ڪميشن وٽ جمع ڪيل تفصيلن موجب، وفاقي گهرو وزير چوڌري نثار وٽ هڪ مرسڊيز، هڪ پيجارو گاڏي، 6سئو ڪئنال تي گهر ۽ 53 لک بينڪ ۾ آهن. واضح رهي ته قومي اسيمبلي ۾ تحريڪ انصاف جي ٻن ميمبرن شهريار آفريدي ۽ ساجد نواز اڃا تائين اثاثن جا تفصيل جمع نه ڪرايا آهن، جڏهن ته پنجاب اسيمبلي جي ٻن ۽ سنڌ اسيمبلي جي هڪ ميمبر سميت 5 ميمبرن اڃا تائين پنهنجي اثاثن جا تفصيل جمع نه ڪرايا آهن.

 

پاڪستان کي دهشتگردي خلاف قدمن تي ڀارتي سرٽيفڪيٽ جي ضرورت ناهي: پرڏيهي وزارت

اسلام آباد (بيورو) : پرڏيهي وزارت جي ترجمان تسنيم اسلم چيو آهي ته ڀارت لائن آف ڪنٽرول ۽ ورڪنگ بائونڊري تي معصوم شهرين کي قتل ڪري رهيو آهي، ان صورتحال ۾ اسان کي دهشتگردي خلاف پنهنجن قدمن تي ڀارتي سرٽيفڪيٽ جي ضرورت ناهي، پرڏيهي وزارت ۾ هفتيوار ميڊيا بريفنگ دوران تسنيم اسلم جو چوڻ هو ته پاڪستان جي ڪابه ٻيڙي گم ناهي، ڀارت وٽ ٻيڙي واري واقعي جو ٺوس ثبوت ناهي، ان سلسلي ۾ ڀارت ۾ به سوال اٿي رهيا آهن. پاڪستان ڀارت سان ڪن هن به قسم جي ڇڪتاڻ نٿو چاهي، پاڪستان جي پوري توجهه ملڪ ۾ دهشتگردن خلاف جاري آپريشن ضرب عضب تي آهي، ان صورتحال ۾ اسان سرحدن تي ڪنهن به قسم جي ڇڪتاڻ برداشت نه ٿا ڪري سگهون، ان لاءِ لائن آف ڪنٽرول ۽ ورڪنگ بائونڊري تي ڪنهن به قسم جي جارحيت جو ذميوار پاڪستان کي قرار ڏيڻ بي بنياد آهي، ڀارت لائن آف ڪنٽرول ۽ ورڪنگ بائونڊري تي معصوم شهرين کي قتل ڪيو پيو وڃي، ان صورتحال ۾ اسان کي دهشتگردي خلاف پنهنجن قدمن تي ڀارتي سرٽيفڪيٽ جي ضرورت ناهي، پرڏيهي وزارت جي ترجمان جو چوڻ هو ته پيرس ۾ ميگزين جي آفيس تي حملي جي مذمت ڪروين ٿا پر توهين رسالت صه تي پاڪستان جو موقف بلڪل واضح آهي ته اسان هڪ ٻئي مذهبن ۽ عقيدن جو احترام ڪرڻ گهرجي، هن چيو ته آمريڪي پرڏيهي وزير جان ڪيري جي پاڪستاني دوري جي حتمي تاريخ طئه نه ٿي هئي، جان ڪيري جي دوري دوران پاڪ آمريڪا اسٽريٽجڪ ڊائيلاگ تي ڳالهه ٿيندي.

 

پي ٽي آءِ جو سربراهه عمران خان نيٺ شادي جي ٻنڌڻ ۾ ٻڌجي ويو

اسلام آباد (بيورو) پي ٽي آءِ جو سربراهه عمران خان نيٺ شادي جي ٻنڌڻن ۾ ٻڌجي ويو آهي ۽ مفتي سعيد انور بني گالا ۾ سندس نڪاح پڙهائي ڇڏيو آهي. حق مهر هڪ لک روپيا لکيو ويو، عمران خان جنهن جي شادي جو ڊگهي عرصي کان نه رڳو سندس مداحن پر سندس مخالفن کي به انتظار هو، نيٺ اڄ انتظار جون گهڙيون ختم ٿيون ۽ عمران خان جو نڪاح مفتي سعيد انور انتهائي سادگي سان پڙهائي ڇڏيو. عمران خان جي شادي ۾ عمران خان جون ڀينر يا سندس ڪي ٻيا ويجها عزيز شريڪ نه ٿيا، سندن عدم شرڪت جو سبب به سامهون نه اچي سگهيو آهي. ذريعن جو چوڻ آهي ته عمران خان جي ڀينرن هُن لاءِ هڪ ٻيو رشتو پسند ڪيو هو ۽ عمران خان جڏهن ڀينرن جي ڳالهه نه مڃي ته ڪاوڙ ۾ سندس ڀينرن ۽ ٻين عزيزن سندس شادي ۾ شرڪت نه ڪئي. عمران خان ۽ ريحام خان جي نڪاح ۾ ذاڪر خان ۽ عون چوڌري گواهه طور شرڪت ڪئي. عمران خان جي شادي تقريب انتهائي سادگي سان ٿي ۽ مهمانن لاءِ مزيدار کاڌن بدران هڪ ڊش جو بندوبست ڪيو ويو هو.

 

آبادگارن ۽ مختلف تنظيمن جو اجلاس، ڪمند جي مقرر ڪيل اگهه 182 روپين تي عمل ڪرائڻ جو مطالبو

حيدرآباد (بيورو)  سنڌ جي آبادگارن، قومپرست، سياسي، مذهبي تنظيمن جي اڳواڻن حڪومت کي چتاءُ ڏيندي چيو آهي ته ڪمند جو 182 رپيا في مل اگھ مقرر ڪرڻ واري نوٽيفڪيشن تي عمل درآمد ڪرائي شگرملون شروع ڪرايون وڃن ٻي صورت ۾ آبادگارن ۽ سمورين سياسي پارٽين پاران ڀرپور احتجاجي تحريڪ جو اعلان ڪيو ويندو. حيدرآباد ۾ مگسي هائوس تي راحيله گل مگسي جي ميزباني هيٺ آبادگارن ۽ مختلف سياسي، سماجي تنظيمن جو اعليٰ سطحي اجلاس منعقد ڪيو ويو. جنهن ۾ اڳوڻي وڏي وزير ارباب غلام رحيم، لياقت جتوئي، قومي اسيمبلي جي اڳوڻي اسپيڪر الاهي بخش سومرو، ڊاڪٽر قادر مگسي، اياز لطيف پليجو، ڊاڪٽر نياز ڪالاڻي، اعجاز شاهه شيرازي، سيد زين شاهه، نصرت سحر عباسي، آبادگار اڳواڻن عبدالمجيد نظاماڻي، ذوالفقار يوسفاڻي، شفقت شاهه شيرازي، سردار شهريار مهر، ايم ڪيو ايم جي غازي صلاح الدين، راشد خلجي، اشفاق منگي، نواب غني ٽالپر سميت مسلم ليگ ن سنڌ جي نائب صدر شاهه محمد شاهه، تحريڪ انصاف جي ايم پي اي سيد حفيظ الدين، چيمبر آف ڪامرس جي گوهر الله ، مير اعجاز ٽالپر، پير سجاد جان سرهندي ۽ ٻين سوين آبادگارن توڙي هارين شرڪت ڪئي. ان موقعي تي سنڌ جي اڳوڻي وڏي وزير ڊاڪٽر ارباب غلام رحيم چيو ته ٽن ڏينهن ۾ جيڪڏهن حڪمرانن ڪمند جو اگهه مقرر ڪيل اگهه تي نه ورتو ۽ شگر ملون نه هلايون ويون ته وڌيڪ لائحيه عمل جوڙيو ويندو. هن چيو ته زراعت ريڙهه جي هڏي واري حيثيت رکي ٿي، سنڌ جون 17 شگر ملون هڪ ئي مالڪ جون آهن، شگر ملون قانون مطابق پهرين آڪٽوبر کان هلائڻ گهرجن. هن چيو ته سندس وڏ وزارت جي دور ۾ شگر مل مالڪن ۽ آبادگارن وچ ۾ اگهه بابت پيدا ٿيل ڇڪتاڻ کي حل ڪرڻ لاءِ سخت قدم کنيا هئا ۽ ان دوران شگر مل مالڪن پاران سرڪار جي مقرر ڪيل اگهه تي ڪمند خريد نه ڪرڻ تي شگر مل مالڪن کي گرفتار ڪرڻ جو حڪم ڏنو هو، جڏهن ته هاڻ حڪمرانن جي هڪ سازش تحت مقرر ڪيل اگهه ڪمند خريد نه ڪيو پيو وڃي. هن چيو ته سنڌ اندر هم آهنگي ۽ ڀائچاري واري صورتحال کي قائم رکندي سنڌ جي مسئلن کي حل ڪرڻ تي سمورين سياسي، قومپرست ۽ مذهبي پارٽين سميت آبادگار ۽ هاري گڏ آهن.سنڌ ترقي پسند پارٽي جي چيئرمين ڊاڪٽر قادر مگسي چيو ته سرڪار اسان سڀني جي خلاف نفسياتي جنگ ڪري رهي آهي، شروع ۾ ڪمند جي معاملي تي اگهه جو مطالبو وڌيڪ ڪيو ويو هو، جنهن تي اهو چيو ويو ته 300 روپيا مڻ ڪاٺيون وڪرو ٿي رهيون آهن، ان ڪري سستي اگهه تي ڪمند نه ڏينداسين. هن چيو ته جڏهن سرڪار پنهنجي ڪميشن مقرر ڪري ٺاهيل اگهه جاري ڪيو ۽ هاڻ اسان به ان حڪمرانن جي ٺاهيل اگهه جي گهر ڪري رهيا آهيون، ان تي اسان سڀني کي سوچڻ جي ضرورت آهي، اسان سڀ اتحاد ۽ مضبوطي سان پنهنجي حق کي مڃرايون. هن چيو ته سنڌ ۾ بصر، مرچ، سارين، ڦٽين کان وٺي هر زرعي فصل جو اگهه تمام گهٽ آبادگارن کي ملي ٿو، ان سڄي مصيبت مان نڪرڻ لاءِ ڀرپور جدوجهد جي ضرورت آهي، سنڌ جي آبادگارن طرفان جيڪا به جدوجهد شروع ڪئي ويندي ان ۾ اسان گڏ آهيون. هن چيو ته سنڌ جي ماڻهن جي هر حق لاءِ رت جي آخري ڦڙي تائين گڏ رهنداسين. هن چيو ته سنڌ جي زراعت کي تباهه ڪرڻ جي سازش ڪئي پئي وڃي، ان سازش کي ڪنهن به صورت ۾ برداشت نه ڪنداسين. هن چيو ته سنڌ جي حقن لاءِ مزاحمت جي ضرورت آهي.  قومي عوامي تحريڪ جي صدر اياز لطيف پليجي چيو ته ڪمند جو اگهه ۽ شگر ملن کي هلرائڻ لاءِ باقائدا احتجاجي تحريڪ هلائيندي سنڌ اسيمبلي جو گهراءُ ڪيو وڃي، سنڌ ۾ شٽربند هڙتال ڪرڻ کپن، سنڌ جا سمورا هاءِ ويز بند ڪيا وڃن. هن چيو ته آصف علي زرداري جي 17 هن شگر ملن جو گهراءُ ڪيو وڃي، آصف علي زرداري سوني ڪڪڙ کي ڪهڻ کان پاسو ڪري، آبادگارن سان ناانصافي ختم ڪئي وڃي، ٻي صورت ۾ سنڌ ۾ انارڪي پيدا ٿيندي ۽ سنڌ حڪومت جو هلڻ مشڪمل ٿي ويندو. هن چيو ته سنڌ ۾ ڪمند سارين، ڪپهه، مرچن سميت سمورن ذريعي فصلن ۾ آبادگارن سان ظلم ڪيو پيو وڃي، اها سنڌ جي زراعت کي تباهه ڪرڻ جي سازش آهي.جيئي سنڌ قومي محاذ جي سينيئر وائيس چيئرمين ڊاڪٽر نياز ڪالاڻي چيو ته سنڌ جي سمورن وسيلن جا مالڪ سنڌي آهن، حڪمرانن پاران ڪيل سنڌ دشمن فيصلي تي عمل نه ٿيڻ خلاف اڄ جيڪي گڏ ٿيا آهن، اهي سنڌ جي مختلف ضلعن ۾ ڌرڻا هڻي روڊ بلاڪ ڪن ۽ ان سان گڏ ڪراچي ۾ وزيراعليٰ هائوس سامهون ڌرڻو هڻن. هن چيو ته سنڌ جي تيل، گيس ۽ فيڪٽرين جو مالڪ ڌارين کي ڪيو ويو آهي، پنجاب سنڌ جو استحصال ڪري رهيو آهي، هڪ سازش تحت سنڌ جي زراعت کي تباهه ڪري رهيو آهي.مسلم ليگ فنڪشنل جي ايم پي اي نصرت سحر عباسي چيو ته فنڪشنل ليگ سنڌ جي مسئلن سميت آبادگارن لاءِ آواز بلند ڪيو آهي، اڄ آبادگار پنهنجن حقن جي حاصلات لاءِ رڙيون ڪرڻ تي مجبور آهن، پر حڪمرانن طرفان ڪوبه ڌيان نٿو ڏنو وڃي. هن چيو ته سنڌ اسيمبلي ۾ آواز اٿاريو ويندو، هي سنڌ صرف پ پ جي حڪمرانن جي ناهي، پر سڄي سنڌ جي ماڻهن جي آهي. هن چيو ته هن مسئلي جي حل لاءِ ڪنهن کي ته اڳتي اچڻو پوندو.ايس يو پي جي مرڪزي اڳواڻ سيد زين شاهه چيو ته شگر ملن واري مسئلي تي سنڌ حڪومت ڌر بڻيل آهي، ڪمند جي آبادگارن سان تمام وڏي ناانصافي ٿي رهي آهي. هن چيو ته ڪمند جو اگهه جو وٺڻ ۽ شگر ملون هلرائڻ لاءِ سنڌ جي سمورن وڏن روڊن ۽ ريلوي پٽڙين تي ڌرڻا هنيا وڃن، اهڙي جدوجهد سان حق ملي پوندا. هن چيو ته آبادگارن کي ڀرپور نموني سان ڌرڻن جي ضرورت آهي، اسان قومپرستن سنڌ جي حقن لاءِ جدوجهد ڪندي ڪارڪنن جا لاش به کنيا آهن، سمورا قومپرست ڪارڪن آبادگارن جي ڌرڻن ۾ اڳيان هوندا.سنڌ آبادگار بورڊ جي صدر عبدالمجيد نظاماڻي چيو ته 34 شگر ملون سنڌ ۾ آهن، جن مان 3 شگر ملون خرابي سبب بند آهن، جڏهن ته 31 شگر ملن مان ڪيتريون ئي شگر ملون بلاجواز بند ڪري آبادگارن کي پريشان ڪيو پيو وڃي ۽ حڪومت جو اعلانيل 182 روپيا اگهه به نٿو ڏنو وڃي. هن چيو ته جنهن طريقي سان زراعت کي تباهه ڪيو پيو وڃي، ان سان سنڌ کي تمام وڏو نقصان پهچندو، آبادگارن جي هن مسئلي کي حل ڪرائڻ لاءِ اسان احتجاج به ڪيو آهي ۽ هاڻ سمورين سياسي پارٽين سان گڏجي جدوجهد به هلائينداسين.  آل پاڪستان مسلم ليگ سنڌ جي صدر شهاب الدين شاهه حسيني چيو ته ڪمند جي آبادگارن سان وڏو ظلم ڪيو پيو وڃي، ڪمند جو اگهه گهٽ ڪري شگر مل مالڪ آبادگارن کي تباهه ڪرڻ گهرڻ ٿا. هن چيو ته عدالت ۽ سنڌ حڪومت جي حڪم کان پوءِ به شگر ملن وارا ڏاڍيون ڪري رهيا آهن، هاڻ اهڙين ڏاڍاين تي خاموش نه وهنداسين.تحريڪ انصاف جي ايم پي اي سيد حفيظ الدين چيو ته سنڌ ۾ ڪمند جي آبادگارن سان تمام وڏي ناانصافي ٿي رهي آهي، سنڌ حڪومت خاموش آهي ۽ شگر مالڪن خلاف ڪابه ڪارروائي نه ڪري رهي آهي. هن چيو ته آباگارن کي 182 روپيا ڪمند جو اگهه ڏياريو وڃي، تحريڪ انصاف ڀرپور نموني سان احتجاج ۾ گڏ هوندي.اڳوڻي ضلعي ناظمه ٽنڊوالهيار ڊاڪٽر راحيلا گل مگسي چيو ته شگر ملون هر صورت ۾ هلرائينداسين ۽ آبادگارن کي 182 روپيا اگهه وٺرائي ڏينداسين ۽ سنڌ جي اندر ڪمند جي آبادگارن سان جيڪو ظلم ٿي رهيو آهي، ان تي پ پ جي ايم اين اي نواب يوسف ٽالپر آواز اٿاريو آهي ۽ احتجاج ۾ گڏ آهي، ڊاڪٽر ذوالفقار مرزا کيس فون ڪري ٻڌايو آهي ته ان جي شگر مل 182 روپيا ڪمند جو اگهه ڏئي رهي آهي، ڪمند جي ان مسئلي تي پ پ جا ڪيترائي ايم اين ايز ۽ ايم پي ايز آبادگارن سان گڏ آهن. هن چيو ته قومپرستن کان وٺي مذهبي جماعتن ۽ وفاقي پارٽيون هن مسئلي تي هڪ آهن، جيڪڏهن آبادگارن سان انصاف نه ٿيو ته اسلام آباد پارليامينٽ هائوس آڏو ڌرڻو هڻي سگهون ٿا. سنڌ آبادگار بورڊ جي جنرل سيڪريٽري ڊاڪٽر ذوالفقار يوسفاڻي چيو ته گهوٽڪي جي شگر مل وارن کي جس ڏيون ٿا، جن 182 جي اگهه تي ڪمند ورتو آهي، جڏهن ته سنڌ جي باقي شگر ملن انڪار ڪندي ڪمند نه وٺي رهيون آهن، سنڌ هاءِ ڪورٽ واضع طور تي حڪم ڏنو آهي ته ڪمند آبادگارن کان 182 روپين تي ورتو وڃي ۽ شگر ملون هلايون وڃن، سنڌ جي اندر جيڪي به شگر ملون مالڪن جي طرفان بند ڪيون ويون آهن ۽ اگهه نه ڏئي رهيون آهن، انهن جي خلاف ڪارروائي سنڌ حڪومت ڪري، پر سنڌ حڪومت خاموش نظر اچي رهي آهي، سڄي سنڌ ۾ آبادگار سراپا احتجاج بڻيل آهن.سنڌ اسميبلي ۾ مخالف ڌر جي اڳواڻ شهريار مهر چيو ته سنڌ اسيمبلي جيڪي به ٺهراءُ پاس ڪري ٿي، انهن تي عمل ڪرائڻ سنڌ حڪومت جو ڪم آهي، پر سنڌ اسيمبلي مان جيڪي به ٺهراءُ عوام جي فائدي وارا پاس ٿين ٿا، انهن تي سنڌ حڪومت ڪوبه عمل نٿي ڪرائي. هن چيو ته جمهوريت جي آڙ ۾ سنڌ ۾ بدترين مارشلا آهي، سنڌ جا کاتا انهن کي خانگي ماڻهو هلائي رهيا آهن، سنڌ  حڪومت جي اهڙي عمل سبب سنڌ جي عوام جو ڪوبه بنيادي مسئلو حل نه ٿي رهيو آهي، سنڌ جي آبادگارن کي ڪمند جو اگهه 182 روپيا ڏنو وڃي ۽ جن مالڪن شگرملون بند ڪيون آهن، انهن کي فوري طور تي هلايو وڃي. هن چيو ته آبادگارن جي احتجاج ۾ ڀرپور نموني سان هر قدم تي گڏ هونداسين. هن چيو ته سنڌ جي وڏي وزير جي ڪارڪردگي تي سواليه نشان بڻجي ويا آهن، جنهن ڪري عدم اعتماد جي تحريڪ هلائي شروع ڪيون آهن. هن چيو ته سنڌ اسيمبلي جي صورتحال اها آهي جو هر معاملو غير قانوني طريقي سان هلي رهيو آهي، اسان سنڌ ۾ هري معاملي کي قانون مطابق هلرائڻ چاهيون ٿا. قومي اسيمبلي جي اڳوڻي اسپيڪر الاهي بخش سومري چيو ته هتي اڄ سڀ زميندار گڏ ٿيا آهيون، جن سان هاري به ڀاڳي ڀائيوار آهن، آبادگار پنهنجو حق گهري رهيا آهن، جن کي ڪير به روڪي نٿو سگهي. هن چيو ته هڪ طرف عدالتن تي عزت ۽ فيصلن تي عمل ڪرڻ لاءِ چيو وڃي ٿو ته ٻئي طرف انهن جي فيصلن کي تسليم نٿو ڪيو وڃي، اها ڪهڙي سوچ آهي. چيمبر آف ڪامرس جي نائب صدر ضياءُ الدين قريشي چيو ته آبادگارن ۽ چيمبر ڪامرس جو مسئلو هڪ آهي، پاڪستان ۾ هڪ طرف دهشگرد دهشتگردي ڪري رهيا آهن ته ٻئي طرف حڪمران آبادگارن ۽ صنعتڪارن کي حق نه ڏئي رهيا آهن. پ پ اڳواڻ اڳوڻي ايم اين اي نواب غني ٽالپر چيو ته سنڌ اٿي آهي ۽ سنڌ حڪومت کي ڪن کولڻ گهرجن ته جڏهن ته سنڌ جو عوام جڏهن اٿندو آهي ته پنهنجا حق وٺندو آهي. هن چيو ته اسان کي اڳ ۾ گڏ ٿيون ها ته ملون بند نه ٿين ها ۽ هاڻ گڏ ٿيا آهيون ته 72 ڪلاڪن ۾ مل مالڪ پنهنجو شگر ملون هلائڻ تي مجبور ٿيندا. هن چيو ته سنڌ جو عوام پنهنجن چونڊيل نمائندن کان پڇاڻو ڪري. مسلم ليگ(ن) جي اڳواڻ سيد شفقت شاه حسين شيرازي چيو ته اسان کي حق نه ملي رهيا آهن، سنڌ ۾ آصف علي زرداري شگر ملون خريد ڪيون آهن ۽ هڪ سازش تحت ڪمند جا اگهه گهٽ ڪيا ويا آهن، جڏهن ته آصف علي زرداري ٺٽو، بدين ۽ سجاول جي ٻيلي کاتي جي هڪ لک 30 هزار ايڪڙ زمين تي قبضو ڪري ورتو آهي. هن چيو ته اسان کي پنهنجن حقن جي حاصلات گڏيل طور تي هڪ ڏينهن سڄي سنڌ کي بند ڪيو وڃي. اڳوڻي وڏي وزير لياقت علي جتوئي چيو ته سنڌ جي آبادگارن جي مسئلي تي گڏ ٿيڻ تبديلي جو آغاز آهي، شهريار مهر قدم وڌائي اسان هن سان گڏ آهيون. هن چيو ته آبادگارن کي ڪمند جو اگهه عدالتي حڪم باوجود نه ملڻ هڪ سازش آهي، سنڌ ۾ زراعت جي زراعت کي هٿ وٺي تباهه ۽ برباد ڪيو پيو وڃي. هن چيو ته حڪمران ڌانڌلين ذريعي آيا آهن، 7 سالن جو اهڙو نقشو تبديل ڪيو ويو آهي جو اڄ سنڌ ۾ بدامني بک وڌي وئي آهي. هن چيو ته موجوده حڪومت جو عوام سان ڪوبه واسطو نه رهيو آهي، اسان اهڙين حڪومتن کي تسليم نٿا ڪيون. هن چيو ته سندس وڏ وزارت جي دور ۾ آبادگارن کان مقرر ڪيل اگهه تي ڪمند خريد ڪيو ويندو هو ۽ عمل نه ڪندڙ شگر مل مالڪن خلاف ڪارروائي ڪئي ويندي هئي. هن چيو ته غريبن کي کائڻ لاءِ ڪجهه به ناهي، جيڪڏهن غريب ماڻهو کي ڪجهه نه ملندو ته هو وڙهندو. متحده قومي موومينٽ رابطا ڪميٽي جي ميمبر غازي صلاح الدين چيو ته متحد قومي موومينٽ ڪالاباغ ڊيم خلاف سنڌ جي ماڻهن سان گڏ هئي ۽ هاڻ به سنڌ جي ڪمند واري اهم مسئلي تي گڏ آهي. هن چيو ته ايم ڪيو ايم مسئلي کي حل ڪرڻ لاءِ ڪاميٽي ناهي ٺاهيندي، اها مسئلي کي حل ڪرائڻ لاءِ عملي طور ميدان ۾ اچي ويندي آهي ۽ اهو مسئلو حل ٿي ويندو آهي، ايم ڪيو ايم جو قائد الطاف حسين آبادگارن سان احتجاج ۾ هر قدم تي گڏ هوندو. هن چيو ته سنڌ جي آبادگارن سان وڏو ظلم ٿي رهيو آهي، جنهن جون 17 شگر ملون هونديون اهو ته پنهنجو پيٽ ڀريندو ۽ اهو آبادگارن سان اگهه جي معاملي ۾ ڪهڙو انصاف ڪندو. هن چيو ته اسان کي گڏيل طور اها جدوجهد ڪرڻي آهي، جنهن ۾ پاڪستان ۽ سنڌ کي ترقي ملي، اهڙي قسم جو ڌرڻو نه هجي جنهن جي پڇاڻي شادي تي وڃي پڄي، ايم ڪيوايم آبادگارن سان مظاهرن، ڌرڻن ۾ گڏ هوندي.

 

ڪراچي: سهراب ڳوٺ ۾ آپريشن، 7 مبينا دهشتگرد مارجي ويا

ڪراچي (اسٽاف رپورٽر)ڪراچي جي سهراب ڳوٺ واري علائقي ۾ پوليس جي سرچ آپريشن دوران القاعده جي مقامي ڪمانڊر سميت 7 مبينا دهشتگرد مارجي ويا،جڏهن ته ٻن ڄڻن کي زخمي حالت ۾ گرفتار ڪيو ويو. ايس ايس پي ملير رائو انوار موجب پوليس جي 500 اهلڪارن دهشتگردن جي موجودگيءَ واري اطلاع تي سهراب ڳوٺ جي مدينا ڪالوني ۾ سرچ آپريشن ڪيو. ايس ايس پي ملير ٻڌايو ته سرچ آپريشن دوران دهشتگردن هڪ اهلڪار کي يرغمال بڻائڻ جي ڪوشش ڪئي،جنهن تي ٻنهي پاسن کان فائرنگ جي ڏي وٺ شروع ٿي. ايس ايس پي رائو انوار موجب،فائرنگ جي ڏي وٺ ۾ 7 مبينا دهشتگرد مارجي ويا، جڏهن ته ٻن جوابدارن کي زخمي حالت ۾ گرفتار ڪيو ويو. ايس ايس پي ملير ٻڌايو ته آپريشن دوران مارجي ويل ۽ زخمي دهشتگردن جو تعلق القاعده سان آهي،مارجي ويلن ۾ القاعده جو مقامي ڪمانڊر پرويز عرف پرو به شامل آهي